“Atu ana mathuulelo apama” anodha vuruwana

1. N’nga vyoira vyaatu vinochinja a-vi tavwa milanyu yapama? (Mayirelo 13:47, 48; 16:14, 15)

MUHORA yaarumiwi, atu anjinji tanoosangalala tavwa milanyu yapama. (Muleri Mayirelo 13:47, 48; 16:14, 15.) Malamboano atu anjinji anosangalala tavwa milanyu yapama fendo yoromene. Mbwenye vatokala enango oi fendo yoromene katinofuna vuruwana mbwenye vira wahora anochinja noroma funa funjedha Bibilya. N’nga ninaire a-vi nafwanya “atu ana mathuulelo apama”?

2. N’nga basa li-u lofunji-a atu linofwanafwana a-vi na namalima?

² Ninooda fwanafwani-edha basa yofunji-a atu Bibilya na vinoira namalima. Mundanimo mwakala vyova-a vyoitwa, unovi-anda angalive ira unaadhowanave lima venango dhala mbeu dhinango. Mofwanafwana na vyevyo, na-iyene thitho nafwanya mutu oi unofuna funjedha Bibilya, nim’kami-enga mombaranya ira akale namafunjedha wa Kristu. Mbwenye waatu oi katinothonyi-edha ifunelo, nidhowenganave akami-a ira taone funeya wa vyongo vinoafunji-a i-yovyo. (Ju. 4:35, 36) Zindiyela unonikami-a fwanya ndhila yapama yooda kami-ana mutu uliwethene. Va-eeni dhoweni nitapanyeni vinaire i-yo nafwanya mutu waifunelo na moda munaakami-edhe i-yo.

NAFWANYA ATU OFUNA VURUWANA

3. N’nga nagumanana atu anofuna vuruwana niirenga n’ni? (1 Akoritiyo 9:26)

³ Nafwanya atu ana ifunelo, ninofwanela akami-a vahora yiniyene ira tarome wenda vandhila yodhowa wu ingumi yo-omala. Vaulendo oromene naavephenga ira nirome funjedha Bibilya vambo-i naaliwa thitho avepha ira tafwanyeyenga vamigumanoni.—Muleri 1 Akoritiyo 9:26.

4. Muonge ifwanafwani-o ya mutu wenuo afuna roma funjedha Bibilya va fendo yoromene.

⁴ Naavephenga ira nirome funjedha Bibilya vambo-i naaliwa. Atu enango anowalaleela i-yo anokala okozeya roma funjedha Bibilya fendo yoromene. Mofwanafwani-a, rongola mwinango wau Canada alaleelanga na karinya, sikana mwinango atoodha dha landa broxura loi Ingumi yokalao dhowa nodhowa. Rongoluo angam’mwandenle ira anooda roma funjedha broxuralo, sikanuo atoorumela moi tatoova-ana manumero atelefoni. Dambo lelolene nathana, sikanuo atom’lembela mesaji rongoluo yom’fuka vya dambo linofuna aliwa roma funjedha. Rongoluo angam’mwakunle ira anoroma Sabudu venango Dimingu, sikanuo atom’fuka ira: “N’nga munoona a-vi aakale bebe-i? Miyo bebe-i ndinokaana hora.” Dambo lo-arela loi ali Xixanu, atooroma funjedha Bibilya. Sumana yeniyene sikanuo atooroma fwanyeya vamigumanoni ya pingo thitho atoodhowanave funjedha.

5. N’nga ninathonyi-edhe a-vi zindiyela navepha mutu ira nifunjedhenga Bibilya na liye? (Muone viruthiruthi.)

⁵ Imbarimbari choi kai atu othene anowalaleela i-yo anokala okozeya funjedha Bibilya ninga sikanule. Atu enango ninofuneela dhowanave akami-a ira ifunelwiwa iwenjedheleye. Venango fendo yoroma ninooda tapanya naaliwa mwasa oi unooda asangalali-a. Mbwenye nadhowanave kaana mathuulelo apama nodhowanave m’thonyi-edha ifunelo, kavanovira hora ira nirome funjedha Bibilya na liye. N’nga ninaonge vyongo vivi vom’vepha mutu ira nifunjedhenga Bibilya vambo-i na liye? Abali naarongola oi katinorucheya romi-a funjedha wa Bibilya, tatoofukiwa yofuka yei.

6. N’nga ninavephe a-vi mutu ira nidhowenave tapanya na liye?

⁶ Ananamalaleya na apainiya enao tafukiwile yofuka yei, tatoonga ira muvilambo vinango vinokala pama rambela onga madhu ninga “Romi-a funjedha,” “funjedha wa Bibilya” venango “ufunji-ani Bibilya.” Aliwa taongile ira ano-indi-edhecha basa madhu ninga “waredha,” “tapanya” venango “idhiwa pama vinoonga Bibilya.” Ira mudhowenave tapanaya munooda onga ira: “Pyova-a ifunelo ira Bibilya linowakula vyofuka vyofuneya maningi vaingumi yi-u,” venango “Bibilya kai bukhu lamareligiau baa-i mbwenye linooda nikami-a vaingumi yi-u.” Munooda wenjedhela ira, “thitho kai vyofuneela hora injinji. Munooda funjedha makundo ofuneya maningi votapanya maminuto 10 venango 15 baa-i.” Munooda onga vyevi mo-othonyi-edha ira munongodha sumana iliyothene.

7. N’nga ndi vahora iivi vevo atu vyazindiyele aliwa ira atofwanya imbarimbari? (1 Akoritiyo 14:23-25)

⁷ Naaitanelenga migumanoni yapingo. Vinooneya ira atu enango amuhora ya rumiwi Paulo, tatoozindiyela fendo yoromene ira atofwanya imbarimbari tangafiile vamigumanoni yapingo. (Muleri 1 Akoritiyo 14:23-25.) Atu anjinji malamboano anodhowa vasogolo maningi taroma fwanyeya vamigumanoni. N’nga ndi vahora iivi inaaitanele i-yo migumanoni yapingo? Muyofunjedha 10 ya bukhu loi Ingumi yokalao dhowa nodhowa, linoonga ira naaitanelenga migumanoni yapingo atu anowafunjedhana i-yo Bibilya. Mbwenye kanidedi-edhelenga ira nifiye muyofunjedha yei. Romela vahora iromile i-yo tapanya naaliwa, ninooda aitanela migumanoni yapingo yakomoni wa sumana. Ninooda awandela muru wa mwasa wavatando venango makhundo enango anofuna i-yo funjedha mu Sanja ya Namaing’anela ya sumana lelo.

8. N’nga ndi vyongo vivi vinam’mwandele i-yo mutu nam’mwitanelanga migumanoni yapingo? (Esaya 54:13)

⁸ Nam’mwitanelanga mutu migumanoni yapingo, nim’mwandelenga moda migumanwiyo muno-iyanela aliwa na vyongo vikadhi liye aonanga mumareligiau enango. Namafunjedha Bibilya mwinango angaone moda wafunjedhiwile Sanja ya Namaing’anela fendo yoromene, atoom’fuka namafunji-ee ira, “N’nga mulimbo iri-a sanjule unoidhiwa dhina la mutu uliwethene?” Rongoluo atom’mwakula ira, “I-yo othene ninodhilimbi-edha idhiwana madhina ninga mwemo munoirelecha i-yo naatu avabanjani vi-u.” Namafunjedhuo atoona ira vyevyo vyali vyo-iyana maningi na vinoireya gerejani wiwa. Atu anjinji katinoidhiwa moda munoireela migumanwi-u. (Muleri Esaya 54:13.) Ninogumanyeya ira nim’lambele Yohova, nifunji-iwe thitho nilimbi-ane. (Aeb. 2:12; 10:24, 25) Ee-no migumanwi-u inoireya mundhila yofwanelela thitho mundhila yokami-a, a-kala a-rela malamulo baa-i. (1 Ak. 14:40) Nyumba ya Umwene inokala yooneya pama namwasa oi ninodhowecha mafunjedhamo. Kaninovolowela vyongo vyailambo venango onanga ira partido inango njapama kwaranya inango. Kaninoira magereve venango kangana na maguverno. Vinooda kala pama m’moni-a mutu unom’funjedhana i-yo Bibilya vidiyo ya muru oi Chini inoireya va Nyumbani ya Umwene? Vidiwiyo inooda m’kami-a idhiwelatu vinofuna liye maona adhowa migumanoni thitho vinodha m’kami-a i-yani-a na vinoireya mureligiaulee.

9-10. N’nga ninam’kami-e a-vi mutu idhiwa ira kaninom’kanyi-edha volowa mureligiau li-u venango m’kanyi-edha irana vyongo vinoira i-yo? (Muone thitho iruthiruthi.)

⁹ Atu enango anoova dha migumanoni wi-u yapingo namwasa othuulela ira ninooda akanyi-edha ira “ta-iye religiau liwa.” Ee-no ninooda awandela ira ninosangalala wachela alendo thitho kaninowakanyi-edha ira ta-iye religiau liwa noiranga vyongo vinoira i-yo vamigumanoni. Mutuo unooda udha na banjalee thitho a-imee ang’ono. A-ima katinowachela malangi-o vaokene, malomwee anokala vambo-i naanamabaliwa funjedhanga vambo-i. Moi e-no, anamabala anoidhiwa ira a-imiwa mbobareleya thitho anoidhiwa vinofunjedha aliwa. (Dot. 31:12) Vamigumanoni vi-u kavanowendi-a parato ya vyovelela venango va-a atu maevelopi ira ta-elemo kobiri. Malo mwavyevyo nino-arela lamulo la Yesu loi: “Mwawachele mwapezi, muva-e thitho mwapezi.” (Mat. 10:8) Ninooda thitho m’mwandela mutuo ira kanofuneela wara vyowara vyodula ira afiye vamigumanoni vi-u, namwasa oi Nlungu unoona vili rimani mwa mutu a-kala maoneelwee aundhe.—1 Sa. 16:7.

¹⁰ Mutu afiya vamigumanoni yapingo mum’mwachelenga pama. Mum’kami-enga ira aidhiwane naandimuwa avapingoni thitho naabali naarongola enango. Aona ira utowacheliwa pama unodha wela dambo n’nango. Akala kana Bibilya mum’moni-enga malemba dhela Bibilyani mwinyu ira a-arelenga vinofunjedhiwa.

VYONGO VINAIRE I-YO NAROMA FUNJEDHA BIBILYA NA MUTU

11. N’nga ninathonyi-edhe a-vi ira ninolokota hora ya mutuo?

¹¹ Naroma funjedha Bibilya na mutu, nithuulelenga thitho ira mutuo utokaana vyoira vinango. Mofwanafwani-a, mu-arele pama hora ivwelan’ne nyo angalive ira atu aisa inyu katinooda irana vyevyo. Munoira pama dambo loroma funjedha maminuto oyeva. Anamalaleya enango adodoliso anoonga ira ndi pama funjedha vyongo vyoyeva angalive ira mutuo utoonga ira unofuna funjedha vyongo vinjinji. Mum’rumeli-enga ira aonge mathuulelwee thitho nyo kamuongenga maningi.—San. 10:19.

12. N’nga ifunelo yi-u ikalenga yoi a-vi naroma funjedha Bibilya na mutu?

¹² Romela va dambo liromile i-yo funjedha Bibilya na mutu, nim’kami-enga ira aidhiwe thitho arome m’dhiveliwana maningi Yohova na Yesu. Ira vyevi viodeye, nim’fuji-enga makhundo okumela Bibilyani a-kala vyamathuuleloni mwi-u. (May. 10:25, 26) Rumiwi Paulo anookami-a atu thuulelanga maningi vya Yesu Kristu, oi ngwarumiwile na Yohova ira adhakami-e atu m’mwidhiwa Yohovuo nom’dhiveliwangana. (1 Ak. 2:1, 2) Paulo atoonga movweya pama funeya okami-a anamafunjedha apya ira taulukuli-e makalelo apama enao anaafwanafwani-edhe i-yo na oro, siliva na mabwe apereso yavadhulu. (1 Ak. 3:11-15) Makalelo enala anothangani-avo iroromelo, zelu, zindiyela noova Yohova. (Sal. 19:9, 10; San. 3:13-15; 1 Pe. 1:7) Ee-no nim’sazi-edhenga Paulo vokami-a atu kaana iroromelo yolimba thitho kala vauxamwali wa pama na Babiwa wa dhulu.​—2 Ak. 1:24.

13. N’nga ninathonyi-edhe a-vi limba rima thitho vuruwana nafunjedhanga Bibilya na mutu? (2 Akoritiyo 10:4, 5) (Muone thitho iruthiruthi.)

¹³ Nafunji-anga atu Bibilya nisazi-edhenga Yesu vokala oleva rima thitho ovuruwana. Nirambelenga afuka vyofuka vyoi vinooda ava-a manyadho atwao. Hora dhinango munooda i-ya likhundo lelo linom’rucha vwechecha ira mudhatapanye mwamari-a funjedha. Malo mom’kanyi-edha rumela likhundo n’nangolee, a-analivwecheche pama, nim’va-enga hora yoi aode lithuulela pama likhundolo norumela ekene. (Ju. 16:12; Ako. 2:6, 7) Bibilya linofwanafwani-edha mafunji-edho onama na vyongo vikaathi-iwile molimba. (Muleri 2 Akoritiyo 10:4, 5.) Ira mutu a-iye roromela vyongo vyaroromela liye, yoroma ninofwanela m’kami-a ira am’nyindelenga maningi Yohova.—Sal. 91:9.

MODA UNAKAMI-EDHELE I-YO ATU IRA TAROME FIYA VAMIGUMANONI

14. N’nga ninakami-e a-vi atu aromile fwanyeya vamigumanoni yapingo?

¹⁴ Yohova unofuna ira naawachelenga pama atu aromile fiya vamigumanoni yapingo mo-okaana sakulo, mo-othuulela ikalelo yiwa, ziza liwa venango vyongo vinaaliwa. (Yak. 2:1-4, 9) N’nga ninathonyi-edhe a-vi ira ninodhiveliwana alendo adhidhe vamigumanoni vi-u?

15-16. N’nga ninakami-e a-vi atu aromile fwanyeya vamigumanoni yapingo ira takale othathuwa?

¹⁵ Atu enango anodha migumanino wi-u yapingo ira tadhaone moda munoireela aliwa. Voi atu enango anokala tangawandeliwile na mutu waisa inango. Ee-no naona mutu mwinango migumanoni nim’mongi-enga. Nim’mwachelenga pama mbwenye mo-osimbwi-a vyongo. Ninooda m’vepha ira akaathi vaduzi na i-yo. Ninooda leringa vambo-i Bibilya venango mabukhwi-u ninooda m’va-a Bibilya na bukhulee. Muthuulelenga thitho vyongo vinango vinam’kami-e kala othathuwa. Mutu mwinango angafiile va Nyumbani ya Umwene atoom’mwandela bali am’mwachenle ira, kaawarile pama ninga muwarele abali naarongola enango. Baluo atom’kami-a kala othathuwa. Atoom’mwandela ira angalive ira Amboni dha Yohova anowara moi e-no, kai o-iyana na mutu uliwethene. Mutuo atoofunjedha Bibilya fiyedha badiziwa thitho kaadiwanle moda mwam’kami-edhe baluo. Mbwenye naonganga na alendo adhidhe vamigumanoni yapingo, niirenga polepole. Kanaafukenga vyofuka vyowava-a manyadho venango kalanga ninga ninaasakasaka.—1 Pe. 4:15.

¹⁶ Ninooda kami-a atu adhidhe vamigumanoni yapingo kala othathuwa, naonganga mwalemezo vyongo vyokuza aliwa venango vinororomela aliwa. Ninooda irana vyevi vowaredha, vowakula venango naonganga mwasa. Nirambelenga madhu anaasukwali-e venango ooneya ninga ninaanyoza. (Tit. 2:8; 3:2) Mofwanafwani-a, kaninofwanela nyoza makhundo anororomela atu enango. (2 Ak. 6:3) Abali anoonga myasa yavatando anofwanela ira polepole vaikhundu yen’na. Alimbo onga myasa anooda thonyi-edha ira anothuulela atu oi kai Amboni, voonga movweya pama madhu oi atwao katinoavwachecha pama.

17. N’nga ifunelwi-u ikalenga yoi a-vi nafwanya “atu ana mathuulelo apama” muurumiwini?

¹⁷ Dambo nlilothene laviranga, hora yoi nilabe basa yofunji-a atu inokala iyevanga. Ee-no nidhowenave sakasaka “atu ana mathuulelo apama oi anooda akami-a kaana ingumi yo-omala.” (May. 13:48) Naafwanya kanidembuwenga, niromenga funjedha Bibilya naaliwa venango aitanela migumanoni yapingo. Naira e-no ninowakami-a ira tarome wenda va “ndhila yodhowa wu ingumi yo-omala.”—Mat. 7:14.