“Weyo unodhakala na miyo Paradaizo”

1. N’nga Yesu anga-adhi vang’ono funa ukwa am’mwandenlen’ni lipanga lelo lali vakunduvee? (Luka 23:39-43)

YESU na lipanga lathomeiwena liye vambo-i tanoovwa upa oopi-a, vevo ingumi yiwa mwamari-eya aliwa mwavang’ono na vang’ono. (Luka 23:32,33) Mapanga othene enala tanom’nyoza Yesu moi ee-no pyoidhiweyelatu ira katali anamafunjedhee. (Mat. 27:44; Marku 15:32) Mbwenye m’mbo-i mwaaliwa atochinja mathuulelo. Liye aongile ira: “Yesu mumandithuulele mwadhavolowa Muumweninyu.” Yesu atomwakula ira: “Pyaimbarimbari ndinouwandela penene, weyo unodhakala na miyo paradaizo.” (Muleri Luka 23:39-43.) Kavali umboni othonyi-edha ira lipangalo, latorumela milanyu “Umwene wadhulu yalaleele Yesu muurumiwee.” Thitho Yesu kaam’mwandenle mutuo ira unodha volowa Muumwene wadhulu. (Mat. 4:17) Yesu aonga vya paradaizo wa vailamboi sogolou. Mwasiwa ngwan’ni ninoonga e-no?

2. N’nga chini inothonyi-edha ira lipanga lachinyuwilelo ali Myuda?

² Vinooneya ira lipanga lachinyuwilelo, ali Myuda. Liye atom’mwandela lipanga fwee ira: “N’nga we kunom’mova Nlungu-i, voi naweene thitho unaalangiwa mofwanafwana na mutu wen’na?” (Luka 23:40) Ayuda talambela Nlungu m’mbo-i, mbwenye atu amaziza enango talambela alungu anjinji. (Ekis. 20:2, 3; 1 Akor. 8:5, 6) Aakale ira lipangalo kalali Myuda, yofuka yafuke liye yaakale ira: “N’nga we kunoaova alungu tai?” Wenjedhela vevo Yesu karumiwile waatu amaziza enango, mbwenye “wa mabila odimela, a nyumba ya Isaraeli.” (Mat. 15:24) Thitho Nlungu ali angaaidhiwi-e Aisraeli ira unodha venyathi-a atu takwide. Vinooneya ira lipanga lachinyuwilelo, lanooviidhiwa vyevi, thitho madhwee tanothonyi-edha ira anoodedi-edha ira Nlungu, unodha m’venyathi-a Yesu ira amatonge Muumwene wa Nlungu. Pyooneelatu ira mutuo naliyene anororomela ira Nlungu unodha m’venyathi-a.

3. N’nga vinooneya ira lipanga lachinyuwilelo lathuulelan’ni Yesu angaongile vya paradaizo? Muongemo. (Maromelo 2:15)

³ Ninga Myuda, lipanga lachinyuwileli vinooneya ira anoidhiwa vyokuza Adamu na Eva, thitho paradaizo wenuo mwaa-edhi Yohova. Ee-no vinooneya ira anoororomela ira paradaizo waonga Yesu, unodhakala munda obaleya vailambo yavathivano.—Muleri Maromelo 2:15.

4. N’nga madhu am’mwandenle Yesu lipanga tanofwanela niiri-a thuulelan’ni?

⁴ Madhu a Yesu am’mwandenle liye lipangali, anofwanela niiri-a thuulela mwemo munofuna dhakalela ingumi paradaizo. Thitho ninooda funjedhavo yongo yoonga paradaizo va utongi wa Mwene Solomu oi wali warendele. Ninooda dedi-edhela Yesu oi ngokwaranya Solomu ira adha labe basa na anamatonga afwee vosaka-edha ilamboi ira ikale limburo lapama maningi. (Mat. 12:42) Pyovweya ira a “mabila enango” tanooda kala ofunechecha idhiwa vyevyo vinofwanela aliwa irana ira tadhakaena ingumi yodhowa nodhowa paradaizoni.—Juwau 10:16.

N’NGA INGUMI INODHAKALA YOI A-VI PARADAIZONI?

5. N’nga munodedi-edhela ira ingumi inodhakala a-vi paradaizoni?

⁵ N’nga mathuuleloni mwinyu munodha vyoi a-vi, mwathuulela mwemo munofuna dhakalela ingumi paradaizoni? Vinooneya ira munothuulela vya malo obaleya mofwanafwana na munda wa Edeni. (Maro. 2:7-9) Venango munothuulela ulosi wa Mika okuza atu a Nlungu oonga ira: “Uliwethene unodha kaathi vathi vamwiree wa uva na mwiree wa savu.” (Mika 4:3,4) Venango munothuulela thitho vinoonga Bibilya vyoi unodhakala vyodya vinjinji. (Sal. 72:16; Esaya 65:21, 22) Ee-no munooda dhifwanafwani-edhela mungali mundani mobaleya, thitho vamezani vokala vyodya vinjinji vyoriya. Munooda fwanafwani-edhela thitho muvumanga mwela wapama wa vyomela na mafolori, thitho muvwanga theya waabali na afwinyu thangani-avo thitho atu ovenyathi-iwa enao tanosangalala waredhela vambo-i. Vyevi kai vyoro-a. Mo-okaikela vyongo vyevi vinodha ireya vailamboi. Mbwenye paradaizoni, ninodha labanga thitho basa losangalali-a.

6. N’nga ninodha laba basa loi a-vi paradaizoni?

⁶ Yohova atonipanducha ira nisangalalenga nalabanga basa. (Namal. 2:24) Ninodha pingeya volaba basa simbwa simbwa vautongi wa wavyawa 1.000 vyautongi wa Kristu. Atu tanofuna dhavulumuwa va nyarwa ilukulu thitho enao tanofuna dhavenyathi-iwa, tanodha funeela vyowara, vyodya mamburo okaathi. Ira vyofuneela vyevi vifwanyeye, vanodha kala basa linjinji losangalali-a. Mofwanafwana na Adamu na Eva enao tafwanela lima mundiwa, ninodha kaana ngari yosaka-edha ilambo-i ira ikale paradaizo. Kathuulelani munofuna aliwa dhakalela osangalali-a funji-a atu mamiliau enao tanofuna dhavenyathi-iwa anofuna dhakala tangaidhi vyoyeva vyokuza Yohova na vifunelovyee. Vinodha thitho kala vyosangalali-a kami-a atu ororomeleya anao takanleo Yesu a-anadhe vailamboi ira taidhiwe vinjinji.

7. N’nga ninokala osikimizelan’ni, n’nga mwasiwa ngwan’ni?

⁷ Ninooda kala osikimiza ira ingumi paradaisoni inodha kala yarendele kaninodha rambulela iliyothene vyongo vinodha ireyanga mwapama. Mwasiwa ngwan’ni ninoonga e-no? Namwasa oi Yohova utoniva-a wale iruthiruthi ya mwemo ingumi munofuna aliwa dhakalela muumwee. Ninoona vyevi nathuulenga vya utongi wa Solomu.

UTONGI WA MWENE SOLOMU UNOTHONYI-EDHA MODA UNOFUNA DHAKALELA VYONGO PARADAIZONI

8. N’nga madhu ofwanyeya valemba la Salimo 37:10, 11, 29 enao alembile mwene Davide, takwakwaneli-edhiwe a-vi? (Muone “Vyofuka vyokumela waalimbo leri” uli muyofunjedha yei.)

⁸ Mwene Davide atovudheleliwa lemba mwemo munofuna dhakalela ingumi sogolou mwene wazelu na ororomeleya adharoma tonga. (Salimo 37:10, 11, 29.) Hora dhinjinji ninoalerela atu anjinji Salimo 37:11 naonganga vya paradaizo wenuo unodha. Nitokaana myasa yapama yoirela vyevi namwasa oi Yesu atonga madhu avalembani vaulalikee vamwangoni vothonyi-edha ira vyevi vinodha kwakwaneli-edha sogolou. (Mat. 5:5) Mbwenye madhu a Davidala atothonyi-dha mwemo ingumi mwafuna aliwa dhakalela va hora ya utongi wa mwene Solomu. Vahora yatonga Solomu Israeli, atu a Nlungu tanosangalala na rendele thitho katarambulela yongo iliyothene muilambo yokaana ukaka na nui. Nlungu aongile ira: “Mwadhowanave a-relanga malangi-oanga, ndinodha uva-ani rendele muilamboyo moi munodha gonanga vathi vo-okala outuchani.” (Lev. 20:24; 26:3, 6) Vyolanyedha vyevi vyatokwakwaneli-edhiwa muutongi wa Solomu. (1 Limb. 22:9; 29:26-28) Thitho Yohova atolanyedha atu othakala olambela alungu enango, “katinodha kalaove.” (Sal. 37:10) Ee-no madhu ofwanyeya va lemba la Salimo 37:10, 11, 29, tatokwakwaneli-edhiwavo ndulimu thitho tanodha kwakwaneli-edhawa sogolou.

9. N’nga mwene wa i-yana wau Sheba aongile vyoi a-vi vyokuza utongi wa Mwene Solomu?

⁹ Mwene wa i-yana wau Sheba, atovwa ira atu tanaasangala wu Israeli na rendele thitho ingumi-yapama muutongi wa mwene Solomu. Mwene wa i-yanuo, atowenda ulendo olapa kuma wuniwa dhowa Yerusalemu ira amaone ekene. (1 Mam. 10:1) Angewendenle umwene wa Solomu, mwene wa i-yanula aongile ira: “Nditoona ira ndate wandeliwa vyoeva baa-i. . . . Oraeli-iwa mbaatwinyu, oraeli-iwa mbaarumiwinyu tanolaba vamethoni vinyu hora dhothene, novuruwananga zelu dhinyu!” (1 Mam. 10:6-8) Mbwenye moda wali vyongo muumwene wa Solomu, vyathonyi-edha vyevyo Yohova vinofuna liye dhaairela atu muutongi wa Mwanee Yesu.

10. N’nga Yesu unokwaranya Solomu mudhila dhiivi?

¹⁰ Yesu unom’kwaranya Solomu mu vyongo vyothene. Solomu kaali ochena thitho anodawi-a vyongo vyevyo vyairi-a ira atu a Nlungu tagumanengana nyarwa. Mbwenye ngunamatonga ochena oi kanodawi-a vyongo. (Luka 1:32; Aeb. 4:14, 15) Yesu kaagonjile va vyowesedha vyorucha maningi vyam’dhelana Satana. Kristu atothonyi-edha ira kanadawe venango irana yeyo inapei-e anaralee ororomeleya. Ndingari ya pereso yavadhulu kanaa Mwene ninga wen’na.

11. N’nga mbaani anofuna dhamkami-a Yesu tonga?

¹¹ Yesu unodha laba basa vambo-i naanamatonga afwee okwakwana 144.000 vokami-a atu thitho kwakwaneli-edha ifunelo ya Yohova vailamboi. (Apok. 14:1-3) Anamatonga afweala, tanodha kala atangaranga namwasa oi naaliwene thitho tatoogumanana nyarwa vyali aliwa vailamboi. N’nga aliwa tanodha kaana izo yoi a-vi?

N’NGA OZOZIWA TANODHA KAANA IZO YOI A-VI?

12. N’nga Yohova unodha ava-a a 144.000 basa loi a-vi?

¹² Yesu na anamatonga afwee, tanodha kaana basa lukulu kwaranya basa lana Solomu. Mwene wa Aisaraelula, anofuneela samalela atu mamiliyau enao takala muilambo imbo-i baa-i. Mbwenye anamatonga a Umwene wa Nlungu anodhakami-a atu mabiliyau vailambo yothene yavathi. Veva Yohova atoovelela ngari yavakundu maningi, wa a 144.000.

13. N’nga izo ya anamatonga afwee a Yesu inodha thangani-avo vyongo vivi?

¹³ Mofwanafwana na Yesu, a 144.000 tanodha laba ninga mamwene na asembe. (Apok. 5:10) Vo-arela ilamulo ya Mose, asembe tatookaana izo yoonechecha ira atu tatokaana manungo apama thitho tali vauxamwali wapama na Yohova. Voi ilamuloi yaimelela “vyongo vyadha sogolo,” pyovweya onga ira anamatonga afwee a Yesu tanodha kami-a atu kaana manungo apama thitho kala vauxamwali wapama na Nlungu. (Aeb. 10:1) Ninofwanela dedi-edha ira nidhaone mwemo mamwene na asembala munofuna aliwa dhakami-edha anarala a umwene enao anofuna dhakala vailambo yavathi. Mulimothene mwemo Yohova munofuna liye dhasaka-edhela vyongo, nili osikimiza ira paradaizo unodhuo, atu anofuna dhakala vailamboi anodha va-iwa malangi-o anofuneela aliwa.—Apok. 21:3, 4.

N’NGA A “MABILA ENANGO” ANOFWANELA IRAN’NI IRA TADHAKALE PARADAIZONI?

14. N’nga vali vwelana oi a-vi vari va “mabila enango” na abalee a Kristu?

¹⁴ Yesu atoonga vyaatu anofuna dhatonga vambo-i naliye ira “ixigulu ya mabila.” (Luka 12:32) Atoonga thitho vyagulu n’nango lelo laongile liye ira “mabila enango.” Magulu melala anoimelela kala gulu limbo-i lamabila ovwelana. (Juwau 10:16) Va ee-ni magulu melala tanolaba basa vambo-i thitho vyevi, vinodha dhowanave ireya fwiyedha ilambwila munofuna aliwa dhakala paradaizo. Vahora yeniyo a “ixigulu ya mabila” anodha kala tangali dhulu, vevo amabila enango anodha kala tangana idedi-edho yodhasangalala na ingumi vailamboi, modhowa nodhowa. Mbwenye vatokala vyevyo a “mabila enango” vinofwanela aliwa ira va ee-ni ira tadhakale paradaizoni.

15. (a) N’nga a “mabila enango” tanolaba a-vi basa na abalee a Kristu? (b) N’nga ninalandele a-vi ifwanafwani-o ya bali wenuo udhowile magula vyongo? (Muone iruthiruthi.)

¹⁵ Lipanga achinyuwilule, atookwa a-anakaena ngari yokwakwanela yothonyi-edha ira anomsiba Kristu. Mo-iyana na vyevi, va ee-ni i-yo a “mabila enango” nitokaana ngari ilukulu yothonyi-edha ira nili ikundu ya Yesu. Mwaifwanafwani-o, ninothonyi-edha ira ninomdhiveliwana va vinoirela i-yo abalee ozoziwa. Yesu atoonga ira unodha tonga atu votukulela moda unoirela aliwa vyongo na abaleala. (Mat. 25:31-40) Ninooda kami-a abalee a Kristu nalabanga naaliwa vambo-i mwathindhi basa lolaleela nofunji-a atu. (Mat. 28:18-20) Ngumwasiwa ninofunechecha indi-edha basa pama vyongo vyokami-a vofunjedha Bibilya, ninga bukhu loi Ingumi Yokalao Dhowa Nodhowa! Akala kamunarome funjedha Bibilya na mutu unango, n’nga munoona a-vi kaana ifunelo yoi muvepe atu anjinji ira muafunjedhengana Bibilya?

16. N’nga ninofuneela iran’ni ira nidhakale anarala a Umwene wa Nlungu?

¹⁶ Kaninofwanela dedi-edhela fiyedha nidhavolowe paradaizoni ira nikale tundu waatu anofuna Yohova ira tadhakalemo. Va ee-ni ninofwanela dhilimbi-edha ira nikale atu oona rima, mu vyoonga vi-u na vyoira thitho kaana makalelo apama. Ninofwanela thitho kala ororomeleya wa Yohova, waman’ni-u venango i-yani-u thitho wa Makristau afwi-u. Nadhilimbi-edhanga a-rela makundo a Nlungu va ee-ni vili i-yo muilambo yothakalai, vinodhakala vyo-orucha a-arela nadhakala paradaizoni. Ninooda romelatu va ee-ni ulukuli-a dodoliso thitho makalelo anofuna dhafuneela vahora yeniyo. Muone mwasa oi “N’nga muli okozeya ‘dhawachela ilambo yavathi’?” wenuo uli muyofunjedha yei.

17. N’nga ninofwanela kalela dhiombanga landu namwasa wa vyodawa vyairile i-yo ndulimu? Muongemo.

¹⁷ Kaninofwanela dhiombanga landu namwasa wa vyodawa vilukulu vyairile i-yo ndulimu. Pyaimbarimbari ira kaninofwanela onanga sembe ya kuto ninga mwasa “oirelanga vyodawa mwakomove.” (Aeb. 10:26-31) Mbwenye ninokala osikimiza ira akala nitochinyuwa mokumela vathi varima thitho nitowachela kami-o lokumela wa Yohova nochinja kalelo li-u, liye unodha nilevelela na rima othene. (Esaya 55:7; Mayir. 3:19) Thuulelani madhu am’mwandenle Yesu Farisi oira: “Miyo kandadhele dhaitana atu olongomana, mbwenye odawa.” (Mat. 9:13) Ee-no sembe ya kuto njakopolo maningi moi inooda gudumeya vyodawa vi-u.

MUNOODA DHAKALA PARADAIZO MODHOWA NODHOWA

18. N’nga munofuna dhatapanya vyoi a-vi na mutu wenuo athomeiwile vambo-i na Yesu?

¹⁸ N’nga munooda dhifwanafwani-edhela mungali paradaizoni muwaredhanga na lipanga laonga na Yesule? Pyo-okaikela ira mwethene munodha onganga moda onosimbelanyo sembe ya Yesu. Venango munodha mfuka ira auwandeleni vinjinji vyevyo vyaireile mahora omari-a vaingumi ya Yesu vailamboi, thitho mwemo mwavwela liye Yesu angawakunle yovepayee. Vinooneya ira liye unodha ufukani ira mum’mwandele mwemo vyongo mwali aliwa malambo omari-a. Inodhakala ngari ilukulu funjedha madhu a Nlungu naatu ali ninga liye!—Aef. 4:22-24.

19. Mwasiwa ngwan’ni ingumi paradaizoni kinodhakala yochenyeli-a? (Muone iruthiruthi yavakapani.)

¹⁹ Ingumi paradaizoni kinodhakala yochenyeli-a. Hora dhothene ninodha gumanangana atu apama thitho laba basa losangalali-a. Kwaranya vyothene dambo lilothene, ninodha m’mwidhiwa pama Babi-u wadhulu thitho sangalala na vyongo viniva-idhe liye. Kaninodha mari-a funjedha vyaliye thitho vanodhakala vinjinji vyoi nifunjedhe vyokuza vyopanduchiwavyee. Vanofuna i-yo dhakaana ingumi wahora indendai paevo vanofuna i-yo dhamdhiveliwangana maningi Nlungu. Ninosimba maningi Yohova na Yesu, vonilanyedha ira ninodhakaana ingumi yodhowa nodhowa paradaizoni!