Marko 11:24​—“Soki bozali kosenga eloko na Nzambe, bóndima ’tè bosi’ bozwi yango”

“Yango wana nazali koyebisa bino, biloko nyonso oyo bozali kobondela mpo na yango mpe kosɛnga, bózala na kondima ete bozwi yango, mpe bokozala na yango.”​—Marko 11:24, Libongoli ya Mokili ya Sika.

“Yango wana nalobi na bino: soki bozali kosenga eloko na Nzambe, bóndima ’tè bosi’ bozwi yango, bongo bokozwa yango.”​—Marko 11:24, Bible na lingala ya lelo oyo.

Ndenge Marko 11:24 elimbolami

Na maloba yango, Yesu amonisi bayekoli na ye ezali na ntina mingi bázala na kondima makasi na nguya ya libondeli. Amonisi bango ete Nzambe asukaka kaka te na koyoka mabondeli na bango, kasi ayanolaka yango mpe. Moto oyo abondeli na motema ya sembo na boyokani na mokano ya Nzambe akoki kotya motema ete makambo oyo asɛngi na libondeli ekokokisama mpenza. Ezali lokola nde libondeli yango esili kozwa eyano.

Yesu amonaki ntina ya kobondela mpe kozala na kondima. Alobaki ete moto oyo azali kobondela asengeli kotya “ntembe te na motema na ye” kasi asengeli kozala “na kondima ete likambo oyo alobi ekosalema.” (Marko 11:23) Mpo na nini? Mpo moto oyo azali na ntembe “akanisa te ete akozwa eloko epai ya Yehova.”a​—Yakobo 1:5-8.

Moto oyo azali na kondima abondelaka mingi. (Luka 11:9, 10; Baroma 12:12) Na ndenge yango, amonisaka ete azali mpenza na mposa ya eloko oyo azali kosɛnga mpe andimi mpenza ete Nzambe akoki koyanola libondeli na ye. Ya solo, ayebaka mpe ete Nzambe akoki komona malamu ayanola libondeli na ye na ndenge mosusu, mpe akoki kosala yango na ntango mosusu moto oyo abondeli azali kozela te.​—Baefese 3:20; Baebre 11:6.

Kasi, maloba ya Yesu elingi koloba te ete moto nyonso akoki kozela kozwa eleko nyonso oyo asɛngi na libondeli epai ya Nzambe. Yesu azalaki koloba na bayekoli na ye, mibali oyo bazalaki na kondima, oyo bazalaki kosala makasi básambela Yehova Nzambe na ndenge oyo andimaka. Biblia elobi ete Yehova ayokaka kaka mabondeli oyo ezali na boyokani na mokano na ye. (1 Yoane 5:14) Ayokaka te mabondeli ya baoyo baboyaka na nko kotosa mibeko na ye mpe oyo basalaka makambo ya mabe kozanga kobongola motema. (Yisaya 1:15; Mika 3:4; Yoane 9:31) Mpo na koyeba makambo mosusu oyo etali mabondeli oyo Nzambe ayokaka, talá video oyo ya mokuse.

Makambo oyo bazali kolobela na Marko 11

Na mikolo ya nsuka ya mosala na ye awa na mabele, Yesu ayebisaki bayekoli na ye ntina ya komonisa kondima makasi epai ya Nzambe. Apesaki ndakisa moko mpo na kosalisa bango bákanga ntina malamu. Ntango azalaki kokende na Yerusaleme, amonaki nzete moko ya figi oyo ebimaki nkasa noki mpenza. Kasi, lokola nsukansuka nzete yango ebotaki mbuma te, Yesu alakelaki yango mabe. (Marko 11:12-14) Ndenge nzete yango ezalaki komonana malamu nzokande ebotaka mbuma te ezalaki komonisa ekólo ya Yisraele ya kala, oyo ezalaki komonisa ete esambelaka Nzambe, nzokande ezalaki na kondima te. (Matai 21:43) Mwa moke na nsima, nzete ya figi ekaukaki, mpe yango emonisaki likambo oyo mosika te ekokómela Yisraele oyo ezangaki kondima.​—Marko 11:19-21.

Kasi, Yesu azalaki kondimisa bayekoli na ye ete bakoki kokóma na kondima oyo esengeli mpo na kolonga mikakatano mpe kosala makambo ya kokamwa. (Marko 11:22, 23) Toli oyo Yesu apesaki na likambo ya libondeli eyaki mpenza na ntango oyo ebongi mpo kondima ya bayekoli na ye emekamaki mwa moke na nsima. Yesu akufaki mpe bakutanaki na botɛmɛli makasi mpo na mosala na bango ya kosakola. (Luka 24:17-20; Misala 5:17, 18, 40) Lelo, bayekoli ya Yesu bakoki kolonga mikakatano soki bamonisi kondima epai ya Nzambe mpe na nguya ya libondeli.​—Yakobo 2:26.

Talá video oyo mpo omona na mokuse makambo oyo ezali na mokanda ya Marko.