Masoló ya basakoli na Bokonzi

Etamboli oyo ezali komonisa mosala na biso ya boklisto kati na makambo nyonso

NTOMA Petelo alendisi baklisto na maloba oyo ete: “Bozala na etamboli malamu kati na bapakano.” (1 Pierre 2:12) Ntóma Paulo alimboli ete, na etamboli na biso malamu, tozali ‘komonisa na makambo nyonso mateya ya Mobikisi na biso, Nzambe.’ (Tite 2:10) Na mokili mobimba, ba Témoins de Jehovah bayebani mpo na etamboli na bango malamu. Tala mwa bandakisa

Etamboli malamu epesi nzela ete molakisi moko andima solo

◻ Filiale ya la Société Watch Tower na costa Rica eyebisi ete bilenge mingi ya ekolo yango bazali kopesa ndakisa moko malamu. Moklisto moko alimboli lolenge oyo ye andimaki solo. Alobi ete: “Eloko ebendaki ngai mingi, ezali etamboli malamu ya [ba Témoins], bilenge to bakolo, kasi mingi mpenza bilenge. Lokola nazalaki molakisi, nazalaki kotala malamu malamu ba Témoins oyo bazalaki kotanga na eteyelo epai kuna nazalaki kotangisa. Lisusu lokola nazalaki kofanda na libota moko ya ba Témoins de Jéhovah, kuna mpe nazalaki kotalela etamboli ya bana.

“Kokesena oyo ezali kati na ba Témoins mpe bayekoli mosusu na eteyelo epai kuna nazali kotangisa, esimbaki motema na ngai. Ba Témoins bazalaki koya ntango nyonso na ngonga malamu mpe kolata malamu, bazalaki kokósa te mpe bazalaki kosala ba devuare na bango ntango nyonso. Lisusu namonaki ete bazali bato na kolongobana na ntango ya momekano, atako bana mingi mosusu bazalaki kofungola bakayé to kotalatala epai na baninga mosusu, nzokande yango epekisami. Lisusu, bazalaki na bonkonde epai na ngai, molakisi na bango, mpe bazalaki komemya ngai. Bilenge ba Témoins basalaki bopusi malamu epai na ngai, ezala na eteyelo to na libota oyo nazalaki kolanda. Ne yango, nabandaki kotalela malamumalamu lingomba na bango mpe, na nsima, nandimaki solo.”

Etamboli ya baklisto ebóti mbuma malamu na ntango ya assemblée moko

◻ Témoin de Jehovah moko ya lisangá moko na ouest ya Salvador alingaki koyebisa nsango malamu ya Bokonzi epai na bandeko na ye mibale ya mibali. Moko ayokaki malamu mpe abandaki koyekola Biblia elongo na ba Témoins de Jehovah. Mosusu, oyo azalaki na Lingomba moko ya misioni libengami ete Prince de Paix (Mokonzi na Kimya), alobaki na ndeko na ye mobali ete: “Koloba na ngai te; ozali kosalela matomba ya Diable.”

Na ntango ya assemblée de district, ye oyo azalaki koyekola Biblia elongo na ba Témoins abengisaki ndeko na ye ya mobali ete akende na ye elongo na assamblée. Moto yango ayanolaki ye ete: “Nandimi kokenda elongo na yo. Kasi nakokende bobele mpo na komona mbéba epai ya ba Témoins.” Bayanganaki bongo assamblée. Motuya ya bayangani mpe ebongiseli malamu oyo ezalaki kuna, ezalaki na bopusi malamu likoló na moto na protestá wana, oyo alobaki ete amona naino makambo ya lolenge wana te. Na ntango azongaki epai na ye, asengaki na ndeko na ye ya mobali ete: “Pesa ngai loboko.” Mosusu wana ayanolaki ete: “Olingi mpenza koloba nini‘?” Ye abakisaki ete: “Nalobi na yo, ‘Pesa ngai loboko.”’ Bapesanaki maboko, mpe moto na protestá alobaki ete: “Kobanda lelo, nakoyekola elongo na ba Témoins de Jéhovah. Nayebaki te ete nazalaki kozanga makambo malamu.’’ Sikawa, azali mosakoli na nsango malamu ya Bokonzi na Nzambe oyo na molende mingi.