Bankulutu bazali kotambwisa lisangá—Mikumba ya motambwisi ya boyekoli ya mokanda
1 Ezali libaku moko malamu mpo na nkulutu moko ya makoki to mpo na mosaleli moko na misala ete asala lokola motambwisi ya boyekoli ya mokanda. Kokokisa bamposa ya elimo ya baoyo bazali kati na etuluku ya boyekoli ya mokanda ezali mokumba moko monene. Mikumba na ye ekabolami na biteni misato.
2 Moteyi malamu: Yango ezali kosɛnga ete motambwisi ya boyekoli ya mokanda amibongisaka malamu mpo na koteya bandeko ya etuluku ya boyekoli pɔsɔ na pɔsɔ. Asengeli koluka kobimisa makambo oyo ekotinda bato ete básepela na boyekoli. Na esika ete alobaka mingimingi na boumeli ya boyekoli, soki yango esengeli, akoki nde kotuna mwa mituna ya sikisiki mpo na kobimisa polele makambo oyo mazali kolobelama kati na liteya. Azali na mokumba ya kosala ete boyekoli esepelisa mpe eteya mpenza bato mpe asengeli kosala ete moto nyonso apesa biyano. Mokano na ye esengeli kozala ya kolendisa bato na elimo, kobimisa polele lolenge nini kosalela makambo oyo mazali kolobama na boyekoli, mpe kosala ete mateya yango esimba makanisi mpe motema.—1 Tes. 2:13.
3 Lisungi mpo na mosala ya kobatela bampate: Motambwisi ya boyekoli ya mokanda azali ‘lokola ebombamelo mpo na mopɛpɛ, ezipelo na ntango na mbula makasi.’ (Yis. 32:2) Amibanzabanzaka mpenza mpo na bandeko ya etuluku na ye mpe asalaka ete lisungi ya elimo epesama, mingimingi mpenza soki moko kati na bandeko alɛmbi.—Ezk. 34:15, 16; 1 Tes. 2:7, 8.
4 Kosakola na molende: Motambwisi ya boyekoli ya mokanda asengeli kozwa bibongiseli bibongi mpo na bandeko ya etuluku na ye ete básanganaka mingi na mosala ya kosakola. Apesaka ndakisa mpo na mosala ya kosakola, koyebáká ete etingya, molende, mpe mɔ́tɔ oyo azali komonisa mpo na mosala yango ekozala na bopusi malamu epai na bandeko mosusu ya etuluku. (Kols. 4:17; 2 Tes. 3:9) Na nsima akosala milende mpo na kosakola elongo na ndeko mokomoko ya etuluku na ye. Soki tozali na mposa ya kokolisa lisusu makoki na biso na mosala ya kosakola, motambwisi ya boyekoli akoki kosalisa biso na kokokisa mokano na biso.—1 Tim. 4:16; 2 Tim. 4:5.
5 Tozali solo kozwa matomba na makabo na motindo na mibali, baoyo bazali pene mpo na kopesa biso lisungi ya elimo mpe komonisela biso bolingo. (1 Tes. 5:14) Tiká ete lolenge oyo tozali kosangana mbala na mbala na boyekoli ya mokanda mpe molende na biso mpo na kosimba mosala ya kosakola emonisa bosepeli na biso mpo na ebongiseli kitoko oyo ezali kouta na Yehova.—Ebe. 10:25.