Osalaka oyo ekoki na yo mpo lapolo ya mosala ya kosakola ezala sikisiki?
1 Na masolo mingi ya Biblia, balobeli mitángo ya sikisiki mpe yango esalisaka mpo na koyeba malamu mpenza ndenge oyo makambo elekaki. Na ndakisa, Gideona alongaki Bamidyani na bato 300 mpamba. (Bas. 7:7) Anzelu ya Yehova abomaki basoda ya Asulia 185 000. (2 Mik. 19:35) Na Pantekote ya mobu 33 na ntango na biso (T.B.), bato pene na 3000 babatisamaki, mpe mwa moke na nsima motángo ya bandimi ebakisamaki tii 5 000. (Mis. 2:41; 4:4) Na masolo yango, ezali polele ete basaleli ya Nzambe na ntango ya kala bazalaki kosala milende mingi mpo na kokoma balapolo ya sikisiki.
2 Lelo oyo, ebongiseli ya Yehova ezali kosɛnga biso tópesaka lapolo ya mosala na biso ya kosakola sanza na sanza. Soki tozali kosala elongo na ebongiseli yango na bosembo mpenza, ekosalisa bakɛngɛli bátalela malamumalamu ndenge mosala ya kosakola ezali kosalema. Balapolo elakisaka soki esengeli kotyela eteni moko ya mosala ya kosakola likebi mingi to soki esengeli kotinda basakoli mosusu na teritware moko. Na kati ya lisangá, balapolo esalisaka bankulutu bámona baoyo bazali na likoki ya kosakola mingi lisusu mpe baoyo basengeli kozwa lisalisi. Lisusu, balapolo oyo etali bokoli ya mosala ya kosakola elendisaka lisangá ya boklisto na mokili mobimba. Opesaka mpenza mabɔkɔ mpo ete lapolo ebima sikisiki?
3 Mokumba na yo: Na nsuka ya sanza, ozalaka na mokakatano mpo na koyeba ngonga boni osalaki na mosala ya kosakola? Soki ezali bongo, mpo na nini te kokoma mbala moko ngonga oyo osali na mosala soki kaka ozongi na ndako nsima ya mosala ya kosakola? Bandeko mosusu basalelaka manaka to mwa kaye. Basusu batambolaka na lokasa ya lapolo ya mosala ya kosakola oyo bakomi eloko te. Na nsuka ya sanza nyonso, pesá mokɛngɛli na bino ya boyekoli ya mokanda lapolo na yo nokinoki. To soki olingi, okoki kokɔtisa yango na kɛsi ya balapolo na Ndako ya Bokonzi. Soki obosani kozongisa lapolo na yo, luká nokinoki mokɛngɛli na bino ya boyekoli ya mokanda na esika ozela ye nde aluka yo. Kozongisa lapolo na yo ya mosala ya kosakola malamu mpenza ekomonisa limemya na yo mpo na ebongiseli ya Yehova mpe ekomonisa ete opesaka lokumu na bandeko oyo bazali na mokumba ya kokɔngɔla mpe kobongisa balapolo.—Luka 16:10.
4 Mokumba ya mokɛngɛli ya boyekoli ya mokanda: Lokola azali mobateli ya bampate oyo atyelaka bango likebi mpenza, mokɛngɛli ya boyekoli ya mokanda alandelaka mosala ya kosakola ya etuluku mobimba na boumeli ya sanza. (Mas. 27:23) Ayebaka soki mosakoli nyonso azali kosakola mbala na mbala, azali kosala mingi mpe na esengo, bongo akoyeba kosalisa nokinoki moto nyonso oyo asakoli te sanza mobimba. Mbala mingi, mosakoli yango azali kaka na mposa bálendisa ye, bápesa ye mwa likanisi oyo ekosalisa ye, to bábenga ye mpo na kobima elongo na mosala ya kosakola.
5 Na nsuka ya sanza, mokɛngɛli ya boyekoli ya mokanda akotala mpenza ete bato nyonso ya etuluku bakokisi mokumba na bango ya kopesa lapolo ya mosala na bango mpo ete mokomeli atinda lapolo ya sikisiki ya lisangá na biro liboso ya mokolo ya motoba ya sanza oyo elandi. Ntango nsuka ya sanza ezali kobɛlɛma, ezali malamu akundolelaka etuluku na ye mpe apesaka bango nkasa ya lapolo na esika ya boyekoli ya mokanda. Soki ezali na bato oyo babosanaka kozongisa lapolo na bango ya mosala, akoki kokundolela bango na ndenge ebongi mpe kolendisa bango.
6 Kopesa balapolo ya mosala ya kosakola nokinoki esalisaka mpo na kosangisa lapolo oyo ekomonisa ndenge mosala esalemaki. Okosala oyo ekoki na yo na kopesáká nokinoki lapolo na yo ya mosala sanza na sanza?