Ndenge ya kolakisa mikanda na teritware oyo bato balobaka minɔkɔ ndenge na ndenge
1. Mpo na nini masangá mingi ezali na mposa ya mikanda oyo ezali na minɔkɔ ya bapaya?
1 Bateritware mingi ekómi na bato ebele oyo bauti na bikólo to bamboka mosusu. Mingi kati na bango bayekolaka solo nokinoki mpe bakangaka ntina na yango malamumalamu soki bazali koteya bango yango na monɔkɔ na bango ya mboka. Bibongiseli nini tosengeli kozwa mpo na kopesa bato oyo bazali kosepela na solo mikanda oyo elimbolaka Biblia na monɔkɔ oyo bayokaka malamumalamu?
2. Boyokani nini esengeli kozala ntango masangá mibale to koleka, oyo mokomoko esalaka makita na monɔkɔ na yango, ezali kosakola na teritware moko?
2 Ntango oyo esengeli kolakisa mikanda: Ntango masangá mibale to koleka, oyo mokomoko esalaka makita na monɔkɔ na yango, ezali kosakola na teritware moko, masangani ya bankulutu ya masangá yango—mingimingi bakɛngɛli na mosala ya kosakola—bakoyokana mpo na kosala ebongiseli ya malamu oyo ekopesa nzela na basakoli ya lisangá mokomoko bápesa litatoli malamumalamu epai ya bato oyo balobaka monɔkɔ oyo lisangá na bango esalelaka na makita. Ntango basakoli bazali kosakola ndako na ndako, ekozala malamu ete bálakisa kaka mikanda oyo ezali na monɔkɔ oyo lisangá na bango esalaka na yango makita, kasi te oyo ezali na minɔkɔ oyo masangá mosusu esalaka makita na yango. Nzokande, ntango basakoli bazali kopesa litatoli ya libaku malamu to bazali kosakola na bisika ya bato mingi, bakoki kolakisa mikanda oyo ezali na minɔkɔ oyo elobamaka na teritware yango.
3. Ntango nini lisangá moko ekoki kozala na mikanda ya minɔkɔ mosusu na stokɛ na yango?
3 Ntango oyo masangá ekoki kozala na mikanda ya minɔkɔ mosusu na stokɛ na yango: Makambo nini ekoki kosalema soki na teritware moko ezali na bato mingi oyo balobaka monɔkɔ moko ya bapaya, nzokande ezali na lisangá moko te oyo esalaka makita na monɔkɔ yango? Na ntango wana, masangá oyo ezali na teritware yango ekokikozala na mwa ndambo ya mikanda na stokɛ na yango, mikanda oyo tosalelaka mingi na mosala ya kosakola, oyo ezali na monɔkɔ yango, na ndakisa batrakte, mwa babuku Azali kosɛnga mpe Moninga ya Nzambe, mpe buku Boyebi. Basakoli bakoki kolakisa mikanda yango ntango nyonso oyo bakokutana na moto moko oyo akoki kotánga monɔkɔ yango.
4. Ndenge nini lisangá ekoki kozwa mikanda oyo ezali na monɔkɔ moko oyo ezali na stokɛ te?
4 Ndenge oyo masangá ekoki kosɛnga mikanda: Soki mikanda oyo moto moko oyo asepeli na solo akoki kotánga ezali te na stokɛ ya lisangá, ndenge nini bokoki kozwa mikanda oyo ezali na monɔkɔ yango? Mosakoli akotuna ndeko oyo atalelaka makambo ya mikanda, mikanda oyo ezali na monɔkɔ yango mpo básɛnga mikanda oyo azali na yango mposa ntango lisangá ekosɛnga mikanda na mbala oyo ekolanda.
5. Tokoki kosala nini soki tolingi kozwa mikanda liboso ya ntango oyo basengeli kotindela lisangá mikanda?
5 Soki mposa ezali ya kozwa mikanda yango nokinoki, mosakoli akoki kotuna nkulutu moko ya Komite ya mosala ya lisangá soki bakoki kosɛnga mikanda yango liboso ya ntango oyo lisangá ekosɛnga mikanda na yango. Soki nkulutu yango andimi, ndeko oyo atalelaka mikanda na masangá oyo esalelaka Ndako ya Bokonzi na bango to ndeko mosusu oyo ye akopona akoki kotondisa formilɛrɛ, akotinda yango na biro mpe akomonisa ete basengeli kotindela bango mikanda yango nokinoki. Biro ekotindela lisangá mikanda yango na adrɛsi oyo yango emesaná kotindela bango mikanda to soki balingi, na adrɛsi mosusu oyo ekosalelama kaka mpo na mikanda wana oyo basɛngi.
6. Mpo na nini tokabolelaka bato mikanda oyo elimbolaka Biblia?
6 Tiká tósalela malamu mikanda oyo elimbolaka Biblia mpo na kosalisa “bato ya ndenge nyonso,” ezala balobaka monɔkɔ nini, ‘bákóma na boyebi ya sikisiki ya solo mpe bábika.’.—1 Tim. 2: 3, 4.