Misala ya kotonga na filiale—Eteni ya ntina mingi ya mosala ya bosantu
1. Mosala nini esalemi na misala ya kotonga Bandako ya Bokonzi mpe misala mosusu ya kotonga oyo biro ezali kotambwisa, atako bongo misala nini mosusu esengeli kosalema?
1 Na mbula mitano oyo eleki, batongaki to babongisaki Bandako ya Bokonzi 564 na teritware ya filiale na biso. Na yango, tozali kotɔnda mpenza bandeko mpo na mosala makasi oyo bazali kosala ndenge bazali kopesa mabɔkɔ na bandeko oyo biro ezali kotinda. Atako mosala monene esalemi, ezali naino na makambo mingi ya kosala na mosala ya kotonga Bandako ya Bokonzi mpe bandako mosusu, na ndakisa Bandako ya mayangani oyo bazali kotonga na Limete (Kinshasa), na Kisangani (Province Orientale), mpe na Brazzaville (République du Congo). Ndenge nini mokomoko na biso akoki kopesa mabɔkɔ na mosala wana ya ntina mingi oyo tozali kosalela Yehova?—Emon. 7:15.
2. Ndenge nini tokoki kopesa mabɔkɔ na misala ya kotonga oyo biro ezali kotambwisa?
2 Ndimá kopesa mabɔkɔ: Soki ozwá batisimo, tosɛngi yo opesa mabɔkɔ na misala ndenge na ndenge oyo touti kolobela, mingimingi soki bazali kotonga to kobongisa Ndako ya Bokonzi na bino. (Nz. 110:3) Bandeko nyonso oyo bakondima kopesa mabɔkɔ basengeli kolinga mosala mpe kosala na boyokani na bandeko mosusu. (Nz. 133:1) Ata soki oyebi misala ya kotonga te, ezali na makambo mingi oyo okoki kosala mpo mosala yango ekende liboso. Bakoki mpe kolakisa yo makambo mingi oyo ekosalisa yo osala lisusu mingi na mikolo ezali koya.
3. Ndenge nini mosusu tokoki kopesa mabɔkɔ na ebongiseli yango?
3 Soki okokoka kosala te, okoki kopesa mabɔkɔ na misala yango soki ozali kolendisa bandeko oyo bakoki kosala yango. Na ndakisa, okoki kokokisa mikumba oyo lisangá epesaki bandeko oyo bakei kopesa mabɔkɔ na misala yango. Soki bankulutu babongisi makambo liboso, bakoki kosala ete lisangá eleisama malamu, ata soki bandeko mosusu bakei kopesa mabɔkɔ na mosala ya kotonga Ndako ya Bokonzi to mosala mosusu ya kotonga oyo biro ezali kotambwisa. Kozanga ntembe, Yehova asepelaka mingi ntango tozali kosala na bomoko mpo misala ya Bokonzi ekende liboso.—Ebe. 13:16.
4. Ndenge nini tokoki kolendisa baoyo bazali kopesa mabɔkɔ na mosala ya kotonga?
4 Zalá na makanisi ya malamu: Kotonga bisika ya losambo mpe bandako mosusu ya misala ya Bokonzi esɛngaka ntango mpe mosala mingi. Yango wana, ntango mosusu esɛngaka ete bandeko oyo bazali kopesa mabɔkɔ na mosala moko ya kotonga, bátika masangá na bango. Tosengeli kokakatana te kopesa longonya mpe kolendisa bandeko oyo bandimi kopesa mabɔkɔ na misala ya kotonga, oyo bazali komipimela makambo mingi mpo na kokokisa “mokumba oyo ya ntina.”—Mis. 6:3; Lom. 14:19.
5. Ndenge nini bandeko oyo bandimi kopesa mabɔkɔ na mosala ya kotonga bakoki komonisa ete bazali na bokatikati?
5 Zalá na bokatikati: Mosala ya kosakola ezali mosala oyo eleki ntina mpo na biso baklisto. (Mko. 13:10) Yango wana, babiro oyo etambwisaka misala ya kotonga esalaka programɛ ya malamu mpo bandeko oyo bandimi kosala kuna bátikaka masangá na bango mpambampamba te. Ndenge moko mpe, bandeko oyo bandimi kopesa mabɔkɔ na misala ya kotonga, basalaka nyonso mpo bákokisa malamu mikumba oyo bapesi bango. Lisusu, soki bamoni ete bakozala te, basalaka nyonso mpo moto mosusu akokisa mokumba oyo lisangá epesi bango. Babongisi-nzela ya sanza na sanza basengeli kotya likebi mingi na mokumba na bango: mosala ya kosakola. Nzokande, bakoki mpe kopesa mabɔkɔ na mosala ya kotonga soki basali programɛ ya kolekisaka mwa ntango na mosala yango.
6. Nini emonanaka soki bandeko nyonso ya lisangá bazali kosala na bomoko mpo losambo ya solo ekende liboso?
6 Ntango ntoma Paulo alobelaki ndenge oyo bandeko bazali kosala na bomoko, alobaki ete bazali “kopesa mabɔkɔ na bokoli ya nzoto mpo na kotongama na yango moko na kati ya bolingo.” (Ef. 4:16) Soki tolingaka Yehova mpe losambo ya solo, tokosala na bomoko mpo na kosakola nsango malamu mpe kopesa mabɔkɔ na misala ya kotonga oyo etali Bokonzi.