Tókolisa makoki na biso ya kosakola—Tózala na bato mingi oyo totikelaka bazulunalo mbala na mbala

Mpo na nini ezali na ntina: Bato mingi oyo basepelaka kotánga bazulunalo na biso, balingaka te ete tóyekola na bango Biblia. Ekoki kozala mpo balingaka te kotika lingomba na bango, to mpo bamonaka ete bazali na ntango te ya koyekola. Nzokande, lokola batángaka bazulunalo na biso mbala na mbala, bakoki kokóma na mposa makasi ya Liloba ya Nzambe. (1 Pe. 2:2) Lisolo moko ekoki kosimba motema na bango, to mpe makambo ya bomoi na bango ekoki kobongwana. Soki tozali kozongela bango mbala na mbala na mwa miniti moke, bakokakatana te kosolola na biso mpe ekosalisa biso tóyeba bamposa na bango mpe makambo oyo etungisaka bango. Nsukansuka, tokoki kobanda koyekola na bango Biblia.

Ndenge ya kosala yango:

Sanza nyonso, tyá programɛ ya komemelaka moto yango Linɔ́ngi ya Mosɛnzɛli mpe Lamuká! ya sika. Mbala mosusu, okoki kozongela ye na ngonga mosusu na kati ya sanza mpo na kokolisa mposa na ye ya kotánga lisolo moko oyo ezali na bazulunalo oyo otikelaki ye, to kopesa ye mokanda oyo tozali kokabola sanza wana. Komá makambo oyo ekosalisa yo na mbala ya nsima.—Talá Mosala na biso ya Bokonzi ya sanza ya yambo 2014, lok. 3.
Omibongisa mbala nyonso oyo olingi kozongela moto. Na esika ya kosuka kaka na kotikela ye bazulunalo, bandá nde kosolola na ye mpe salá makasi osala na ye boninga mpo osalisa ye asepela lisusu mingi.
Lukáká mabaku ya kobanda koyekola na bato Biblia. Soki moko ya bato oyo otikelaka bazulunalo atuni yo likanisi ya Biblia na likambo moko boye, memelá ye mokanda oyo toyekolaka na yango bato Biblia, oyo ezali na eyano mpe bósolola. Liboso okende, tikelá ye motuna oyo eyokani na lisolo wana mpe bótalela yango ntango okozongela ye. Soki osololaka na moto mbala na mbala, ata na miniti moke na Biblia to na mokanda moko oyo tosalelaka mpo na koyekola na bato Biblia, ozali kotambwisa boyekoli ya Biblia. Osilá kopesa moto mwa buku Nsango malamu mpe kolakisa ye na mokuse ndenge ya koyekola Biblia? Osilá kolakisa ye video Mpo na nini koyekola Biblia? mpe Boyekoli ya Biblia esalemaka ndenge nini? Ata soki kala moto aboyaki koyekola, makambo ya bomoi ebongwanaka. Soki omeki lisusu, matomba ekomonana te?

Meká kosala boye na boumeli ya sanza:

Salá liste ya bato oyo okoki kotikelaka bazulunalo mbala na mbala. Pesá bango bazulunalo ya sika mpe yebisá bango ete okomemela bango mosusu soki ebimi.