Kotikela bato bazulunalo mbala na mbala esalisaka mpo na kobanda koyekola na bango Biblia
1. Mpo na nini banda kala ebongiseli ya Yehova elendisaka basakoli ete bátikelaka bato bazulunalo mbala na mbala?
1 Bato mingi basepelaka te koyekola Biblia elongo na biso, kasi basepelaka kotánga bazulunalo na biso. Yango wana banda kala, ebongiseli ya Yehova elendisaka basakoli ete bátikelaka bato bazulunalo mbala na mbala. Mbala mingi, soki bato bazali kotánga bazulunalo na biso mbala na mbala, bakómaka na mposa makasi ya Liloba ya Nzambe. (1 Pe. 2:2) Nsukansuka, likambo moko oyo batángi ekoki kosepelisa bango mpe kotinda bango bándima koyekola Biblia.
2. Ndenge nini tokoki kosala mpo moto oyo totikelaka bazulunalo mbala na mbala asepela lisusu mingi?
2 Bwaká mai na mboto ya solo: Na esika ya kosuka kaka na kotikela moto bazulunalo mpe kokende, bandá nde kosolola na ye mpe salá makasi osala na ye boninga. Yango ekosalisa yo oyeba makambo ya bomoi na ye, makambo oyo esepelisaka ye mpe bindimeli na ye. Koyeba makambo wana, ekosalisa yo osalela mayele ya kososola ntango ozali koloba. (Mas. 16:23) Omibongisaka mbala nyonso oyo olingi kozongela ye. Soki likoki ezali, lobelá na mokuse likambo moko mpe vɛrsɛ oyo eyokani na yango, ndenge ezali na zulunalo. Kosala bongo ezali kobwaka mai na mboto ya solo oyo elonami na motema na ye. (1 Ko. 3:6) Mbala nyonso oyo ozongeli ye, komá mokanda oyo otikeli ye, lisolo oyo bosololi mpe bavɛrsɛ oyo bolobeli.
3. Mbala boni tosengeli kozongela bato oyo totikelaka bazulunalo mbala na mbala?
3 Mbala boni osengeli kozongela bango? Osengeli kozongela bango mbala moko na sanza mpo na kopesa bango bazulunalo ya sika. Nzokande, na kotalela programɛ na yo mpe soki moto yango azali kosepela mingi, okoki kopona kokende mbala na mbala. Na ndakisa, pɔsɔ moko to mibale nsima ya kotikela moto bazulunalo, okoki kozongela ye mpe koloba boye: “Nayei mpo na mwa miniti moke kolakisa yo likambo moko na bazulunalo oyo natikelaki yo.” Yango ekopesa moto yango mposa ya kotánga lisolo yango. Soki asilaki kotánga yango, okoki kotuna ye soki akanisi nini na lisolo yango mpe kolobela yango na mokuse. To mpe, soki moto yango asepelaka kotánga mikanda na biso, okoki kozongela ye mpe kopesa ye trakte, mwa buku to buku oyo tozali kokabola na sanza wana.
4. Tokoki kosala nini mbala na mbala, mpo na koyeba soki moto oyo totikelaka bazulunalo akosepela koyekola Biblia?
4 Kozela te ete moto yango nde asɛnga yo mpo obanda koyekola na ye Biblia. Yo nde sɛngá ye. Ata soki moto yango aboyaki liboso koyekola Biblia, okoki mbala na mbala kolakisa ye masolo “Biyano na mituna ya Biblia” oyo ebimaka na Linɔ́ngi ya Mosɛnzɛli mpe kotala soki akosepela osolola yango elongo na ye. Ntango mosusu, okoki kobanda koyekola na ye ata liboso ya porte (na bisika oyo yango esalemaka). Kasi, soki likoki ya kobanda koyekola na ye ezali te, okoki kokoba komemela ye bazulunalo mpo asepela lisusu mingi.