ເອຊາຢາ
3 ຖ້າເບິ່ງເດີ້! ພະເຢໂຫວາຜູ້ບັນຊາການກອງທັບແລະຜູ້ເປັນນາຍອົງສູງສຸດ
ກຳລັງຈະຕັດທຸກສິ່ງທຸກຢ່າງທີ່ຄ້ຳຈູນເຢຣູຊາເລັມແລະຢູດາ
ແລະຈະບໍ່ໃຫ້ຄົນຢູ່ຫັ້ນມີເຂົ້າມີນ້ຳກິນ.+
2 ເຮົາຈະບໍ່ໃຫ້ມີພວກທະຫານທີ່ເກັ່ງໆ
ພວກຜູ້ຕັດສິນກັບພວກຜູ້ພະຍາກອນ+ ພວກໝໍມໍກັບພວກຜູ້ນຳ
3 ພວກຫົວໜ້າ*+ ພວກທີ່ມີຕຳແໜ່ງສູງ ພວກທີ່ປຶກສາ
ແລະພວກທີ່ເກັ່ງໃນເລື່ອງຄາຖາອາຄົມກັບພວກໝໍສະເໜ່ທີ່ເກັ່ງໆ.+
4 ເຮົາຈະໃຫ້ເດັກນ້ອຍເປັນເຈົ້ານາຍ
ແລະໃຫ້ຄົນທີ່ບໍ່ມີຫຼັກການ*ປົກຄອງເຂົາເຈົ້າ.
5 ເຖິງວ່າຈະເປັນຄົນຊາດດຽວກັນ
ແຕ່ເຂົາເຈົ້າຈະຂົ່ມເຫງກັນ.+
ເດັກນ້ອຍຈະທຳຮ້າຍຜູ້ເຖົ້າ.
ຄົນທຳມະດາຈະບໍ່ນັບຖືຄົນທີ່ສົມຄວນໄດ້ຮັບຄວາມນັບຖື.+
6 ແຕ່ລະຄົນຈະຈັບແຂນອ້າຍນ້ອງຂອງໂຕເອງໄວ້ຢູ່ເຮືອນພໍ່ຂອງເຂົາເຈົ້າແລະເວົ້າວ່າ:
“ເຈົ້າມີເສື້ອຄຸມ ຂໍໃຫ້ເຈົ້າມາເປັນຜູ້ນຳຂອງພວກເຮົາ.
ຂໍໃຫ້ເຈົ້າມາເບິ່ງແຍງບ່ອນນີ້ທີ່ເປັນຊາກຫັກພັງ.”
7 ແຕ່ລາວຈະບໍ່ຍອມແລະເວົ້າວ່າ:
“ຂ້ອຍເປັນຜູ້ພັນບາດໃຫ້ເຈົ້າບໍ່ໄດ້ດອກ.
ຂ້ອຍເອງກໍບໍ່ມີຂອງກິນແລະບໍ່ມີເຄື່ອງນຸ່ງຢູ່ເຮືອນຊ້ຳ.
ບໍ່ຕ້ອງຕັ້ງຂ້ອຍໃຫ້ເປັນຜູ້ນຳປະຊາຊົນ.”
8 ເຢຣູຊາເລັມສະດຸດແລະລົ້ມລົງແລ້ວ
ແລະຢູດາກໍລົ້ມລົງຄືກັນ
ຍ້ອນເຂົາເຈົ້າຕໍ່ຕ້ານພະເຢໂຫວາທັງທາງຄຳເວົ້າແລະການກະທຳ.
ເຂົາເຈົ້າທ້າທາຍອຳນາດພະເຈົ້າຕໍ່ໜ້າແສງລັດສະໝີຂອງເພິ່ນ.+
9 ສີໜ້າຂອງເຂົາເຈົ້າບອກໃຫ້ຮູ້ວ່າເຂົາເຈົ້າເຮັດສິ່ງທີ່ຊົ່ວ.
ເຂົາເຈົ້າເຮັດຜິດຄືກັບເມືອງໂຊໂດມ+
ແລະບໍ່ໄດ້ເຊື່ອງຄວາມຜິດນັ້ນໄວ້.
ເຂົາເຈົ້າເຮັດໃຫ້ໂຕເອງຕ້ອງຈິບຫາຍ.
10 ໃຫ້ບອກຄົນທີ່ເຮັດດີວ່າເຂົາເຈົ້າຈະໄດ້ຮັບພອນ.
ເຂົາເຈົ້າຈະໄດ້ຮັບລາງວັນສຳລັບຄວາມດີທີ່ເຂົາເຈົ້າເຮັດ.*+
11 ຄົນຊົ່ວຈະຈິບຫາຍ.
ລາວຈະຖືກທຳລາຍ.
ລາວເຮັດບໍ່ດີແບບໃດກັບຄົນອື່ນ ຄົນອື່ນກໍຈະເຮັດແບບນັ້ນໃຫ້ລາວຄືກັນ.
12 ພວກຫົວໜ້າສັ່ງວຽກໄດ້ຂົ່ມເຫງປະຊາຊົນຂອງເຮົາ
ແລະພວກຜູ້ຍິງປົກຄອງເຂົາເຈົ້າ.
ພວກຫົວໜ້າພາປະຊາຊົນຂອງເຮົາຫຼົງທາງ
ແລະເຮັດໃຫ້ເຂົາເຈົ້າບໍ່ຮູ້ວ່າຈະໄປທາງໃດ.+
13 ພະເຢໂຫວາພ້ອມແລ້ວທີ່ຈະສະເໜີຄະດີ.
ເພິ່ນຢືນຢູ່ເພື່ອຕັດສິນຊາດຕ່າງໆ.
14 ພະເຢໂຫວາຈະຕັດສິນພວກຜູ້ນຳແລະພວກເຈົ້ານາຍຂອງປະຊາຊົນຂອງເພິ່ນ.
ເພິ່ນເວົ້າກັບເຂົາເຈົ້າວ່າ: “ພວກເຈົ້າໄດ້ຈູດສວນໝາກລະແຊັງ
ແລະພວກເຈົ້າໄດ້ເອົາທຸກສິ່ງທີ່ລັກມາຈາກຄົນທຸກໄປມ້ຽນໄວ້ຢູ່ເຮືອນຂອງພວກເຈົ້າ.”+
15 ພະເຢໂຫວາຜູ້ບັນຊາການກອງທັບ ພະເຈົ້າຜູ້ຍິ່ງໃຫຍ່ສູງສຸດເວົ້າອີກວ່າ:
“ເປັນຫຍັງພວກເຈົ້າຄືກ້າຂົ່ມເຫງປະຊາຊົນຂອງເຮົາ ແລະກົດຂີ່ຄົນທຸກໜັກປານນີ້?”+
16 ພະເຢໂຫວາເວົ້າວ່າ: “ຜູ້ຍິງເມືອງຊີໂອນຍິ່ງຫຼາຍ.
ເຂົາເຈົ້າຍ່າງໜ້າເບີດຂຶ້ນຟ້າ
ເຮັດຕາສົ້ມຕາຫວານໃສ່ຜູ້ຊາຍ ຍ່າງບິດກົ້ນບິດແອວ
ແລະເຮັດສຽງປະຫຼັກຂາດັງກຸ່ງກິ່ງໆ.
17 ຍ້ອນແນວນີ້ ພະເຢໂຫວາຈະເຮັດໃຫ້ຫົວຂອງພວກຜູ້ຍິງຢູ່ເມືອງຊີໂອນເປັນບາດຕົກເກັດ
ແລະພະເຢໂຫວາຈະເຮັດໃຫ້ເຂົາເຈົ້າຫົວລ້ານ.+
18 ໃນມື້ນັ້ນ ພະເຢໂຫວາຈະເອົາເຄື່ອງເອ້ງາມໆຂອງເຂົາເຈົ້າໄປ.
ເພິ່ນຈະເອົາປະຫຼັກຂາ ຜ້າມັດຫົວ ເຄື່ອງປະດັບທີ່ເປັນຮູບເດືອນ+
19 ຕຸ້ມຫູ* ປະຫຼັກແຂນ ຜ້າປົກຫົວ
20 ເຄື່ອງເອ້ຢູ່ຫົວ ສາຍຂາ ສາຍແອວ*ງາມໆ
ເຄື່ອງປະດັບສຳລັບໃສ່ນ້ຳຫອມ ເຄື່ອງປະດັບທີ່ເຮັດຈາກເປືອກຫອຍ*
21 ແຫວນ ບ້ວງດັງ
22 ເສື້ອຄຸມສຳລັບໄປງານພິເສດ ເສື້ອຄຸມໂຕທາງນອກ ເສື້ອຄຸມອື່ນໆ ກະເປົາ
23 ແວ່ນນ້ອຍ+ ເຄື່ອງນຸ່ງທີ່ເປັນຜ້າລີນິນ*
ຜ້າຄຽນຫົວ ແລະຜ້າປົກຫົວໄປຈາກເຂົາເຈົ້າ.
24 ຕອນນີ້ ເຂົາເຈົ້າຫອມຄືກັບນ້ຳມັນຫອມ+ ແຕ່ໃນມື້ນັ້ນ ເຂົາເຈົ້າຈະມີກິ່ນເໝັນເນົ່າ.
ຕອນນີ້ ເຂົາເຈົ້າໃສ່ສາຍແອວທີ່ງາມໆ ແຕ່ໃນມື້ນັ້ນ ເຂົາເຈົ້າຈະໃສ່ເຊືອກແທນ.
ຕອນນີ້ ເຂົາເຈົ້າມີຊົງຜົມທີ່ງາມໆ ແຕ່ໃນມື້ນັ້ນ ເຂົາເຈົ້າຈະຫົວລ້ານ.+
ຕອນນີ້ ເຂົາເຈົ້າໃສ່ເຄື່ອງນຸ່ງທີ່ແພງໆ ແຕ່ໃນມື້ນັ້ນ ເຂົາເຈົ້າຈະໃສ່ຜ້າເນື້ອຫຍາບ.+
ຕອນນີ້ ເຂົາເຈົ້າງາມຫຼາຍ ແຕ່ໃນມື້ນັ້ນ ເຂົາເຈົ້າຈະມີແປ້ວ*ໝາຍໄວ້.
25 ຄົນຂອງເຈົ້າຈະຖືກຂ້າດ້ວຍດາບ
ແລະທະຫານທີ່ເກັ່ງໆຂອງເຈົ້າຈະຖືກຂ້າໃນສະໜາມຮົບ.+