ລະບຽບພວກເລວີ
8 ພະເຢໂຫວາເວົ້າກັບໂມເຊອີກວ່າ: 2 “ໃຫ້ພາອາໂຣນກັບພວກລູກຊາຍຂອງລາວມາ.+ ໃຫ້ເອົາຊຸດປະໂລຫິດຂອງເຂົາເຈົ້າ+ ນ້ຳມັນທີ່ໃຊ້ເພື່ອແຕ່ງຕັ້ງ+ ງົວໂຕຜູ້ທີ່ຈະໃຊ້ເປັນເຄື່ອງບູຊາໄຖ່ບາບ ແກະໂຕຜູ້ 2 ໂຕ ກັບກະດົ້ງທີ່ໃສ່ເຂົ້າຈີ່ບໍ່ມີເຊື້ອ+ມານຳ 3 ແລະໃຫ້ເອີ້ນພວກອິດສະຣາເອນມາປະຊຸມກັນຢູ່ທາງເຂົ້າເຕັ້ນສັກສິດ.”*
4 ໂມເຊກໍເຮັດຕາມທີ່ພະເຢໂຫວາສັ່ງ ແລະພວກອິດສະຣາເອນໄດ້ມາລວມໂຕກັນຢູ່ທາງເຂົ້າເຕັ້ນສັກສິດ. 5 ໂມເຊເວົ້າກັບພວກອິດສະຣາເອນວ່າ: “ພະເຢໂຫວາສັ່ງໃຫ້ພວກເຮົາເຮັດແນວນີ້.” 6 ໂມເຊໃຫ້ອາໂຣນກັບພວກລູກຊາຍມາຢູ່ໃກ້ໆລາວ ແລະເອົານ້ຳ+ລ້າງໂຕໃຫ້ເຂົາເຈົ້າ. 7 ຫຼັງຈາກນັ້ນ ໂມເຊກໍເອົາຊຸດຍາວ+ນຸ່ງໃຫ້ອາໂຣນ ເອົາຜ້າມັດແອວ+ມັດໃຫ້ ນຸ່ງເສື້ອແຂນກິ້ນ+ໃຫ້ ໃສ່ເອໂຟດ*+ໃຫ້ ແລະເອົາຜ້າມັດແອວ+ທີ່ໃຊ້ມັດເອໂຟດມັດໃຫ້ລາວເພື່ອໃຫ້ເອໂຟດຢູ່ດີ. 8 ຈາກນັ້ນ ໂມເຊກໍເອົາແຜ່ນປົກເອິກ+ມາໃສ່ໃຫ້ລາວ ແລະເອົາອູຣີມກັບທູມມີມ*+ໃສ່ໃນແຜ່ນປົກເອິກ. 9 ແລ້ວກໍເອົາຜ້າ+ມາຄຽນຫົວໃຫ້ລາວ ແລະເອົາແຜ່ນຄຳເຫຼື້ອມງາມເຊິ່ງເປັນເຄື່ອງໝາຍບໍລິສຸດທີ່ສະແດງເຖິງການອຸທິດໂຕ+ໃຫ້ພະເຈົ້າມາມັດຕິດຢູ່ທາງໜ້າຂອງຜ້າຄຽນຫົວຕາມທີ່ພະເຢໂຫວາໄດ້ສັ່ງໂມເຊ.
10 ແລ້ວໂມເຊກໍເອົານ້ຳມັນທີ່ໃຊ້ເພື່ອແຕ່ງຕັ້ງມາທາໃສ່ເຕັ້ນສັກສິດກັບທຸກຢ່າງທີ່ຢູ່ໃນເຕັ້ນ+ ເພື່ອເຮັດໃຫ້ສິ່ງເຫຼົ່ານັ້ນເປັນສິ່ງທີ່ຖືວ່າບໍລິສຸດ. 11 ຫຼັງຈາກນັ້ນ ລາວເອົານ້ຳມັນສ່ວນໜຶ່ງມາຊິດ 7 ເທື່ອໃສ່ແທ່ນບູຊາກັບເຄື່ອງໃຊ້ທຸກຢ່າງທີ່ໃຊ້ສຳລັບແທ່ນນັ້ນ ແລະຊິດໃສ່ອ່າງກັບຂາຕັ້ງອ່າງເພື່ອເຮັດໃຫ້ສິ່ງເຫຼົ່ານັ້ນເປັນສິ່ງທີ່ຖືວ່າບໍລິສຸດ. 12 ສຸດທ້າຍ ໂມເຊກໍເອົານ້ຳມັນທີ່ໃຊ້ເພື່ອແຕ່ງຕັ້ງສ່ວນໜຶ່ງເທໃສ່ຫົວຂອງອາໂຣນເພື່ອແຕ່ງຕັ້ງລາວ ແລະແຍກລາວໄວ້ຕ່າງຫາກສຳລັບວຽກບໍລິສຸດ.+
13 ແລ້ວໂມເຊກໍໃຫ້ພວກລູກຊາຍຂອງອາໂຣນມາຢູ່ໃກ້ໆລາວ. ຈາກນັ້ນ ລາວກໍເອົາຊຸດຍາວນຸ່ງໃຫ້ເຂົາເຈົ້າ ເອົາຜ້າມັດແອວມັດໃຫ້ ແລະໃສ່ໝວກໃຫ້ເຂົາເຈົ້າ+ຕາມທີ່ພະເຢໂຫວາໄດ້ສັ່ງໂມເຊ.
14 ຫຼັງຈາກນັ້ນ ໂມເຊເອົາງົວໂຕຜູ້ທີ່ຈະໃຊ້ເປັນເຄື່ອງບູຊາໄຖ່ບາບມາ ແລະອາໂຣນກັບພວກລູກຊາຍກໍເອົາມືວາງເທິງຫົວງົວໂຕນັ້ນ.+ 15 ໂມເຊຂ້າງົວໂຕນັ້ນ ແລ້ວເອົານິ້ວມືຈຸ່ມເລືອດ+ ແລະເອົາໄປຕ້ວຍໃສ່ເຂົາທີ່ຢູ່ແທ່ນບູຊາ. ລາວເຮັດໃຫ້ແທ່ນບູຊານັ້ນເປັນສິ່ງທີ່ຖືວ່າບໍລິສຸດ.* ແຕ່ເລືອດສ່ວນທີ່ເຫຼືອ ລາວເອົາໄປເທໃສ່ທາງລຸ່ມຂອງແທ່ນບູຊາ. ຍ້ອນແນວນີ້ໂມເຊໄດ້ເຮັດໃຫ້ແທ່ນບູຊານັ້ນບໍລິສຸດ ແລະຈະເອົາເຄື່ອງບູຊາໄຖ່ຄວາມຜິດຕ່າງໆໄປເຜົາເທິງແທ່ນນັ້ນໄດ້. 16 ຈາກນັ້ນ ໂມເຊກໍເອົານ້ຳມັນທັງໝົດທີ່ຕິດຢູ່ໄສ້ ນ້ຳມັນທີ່ຕິດຢູ່ຕັບ ໝາກໄຂ່ຫຼັງ 2 ໜ່ວຍກັບນ້ຳມັນທີ່ຕິດຢູ່ຫັ້ນອອກມາ ແລະເອົາສ່ວນເຫຼົ່ານີ້ໄປເຜົາເທິງແທ່ນ.+ 17 ແລ້ວລາວເອົາໜັງ ຊີ້ນ ຂີ້ກັບສ່ວນທີ່ເຫຼືອຂອງງົວໂຕນັ້ນໄປຈູດຢູ່ນອກຄ້າຍ+ຕາມທີ່ພະເຢໂຫວາໄດ້ສັ່ງໂມເຊ.
18 ໂມເຊເອົາແກະໂຕຜູ້ທີ່ຈະໃຊ້ເປັນເຄື່ອງບູຊາເຜົາມາ ແລະໃຫ້ອາໂຣນກັບພວກລູກຊາຍຂອງລາວເອົາມືວາງເທິງຫົວແກະໂຕນັ້ນ.+ 19 ຈາກນັ້ນ ໂມເຊກໍຂ້າມັນ ແລະເອົາເລືອດໄປຊິດໃສ່ແຕ່ລະຂ້າງຂອງແທ່ນບູຊາ. 20 ໂມເຊຕັດແກະໂຕນັ້ນເປັນຕ່ອນໆ ແລ້ວເອົາຫົວກັບຕ່ອນທີ່ຕັດ ແລະນ້ຳມັນທີ່ຕິດຢູ່ໝາກໄຂ່ຫຼັງໄປລຽນຢູ່ໄຟເທິງແທ່ນບູຊາ. 21 ລາວລ້າງໄສ້ກັບຂາ* ແລະເອົາສ່ວນຕ່າງໆທັງໝົດຂອງແກະໂຕນັ້ນໄປເຜົາເທິງແທ່ນບູຊາ. ນີ້ແມ່ນເຄື່ອງບູຊາເຜົາທີ່ມີກິ່ນຫອມທີ່ເຮັດໃຫ້ພໍໃຈ* ແລະແມ່ນເຄື່ອງບູຊາດ້ວຍໄຟໃຫ້ພະເຢໂຫວາຕາມທີ່ພະເຢໂຫວາໄດ້ສັ່ງໂມເຊ.
22 ແລ້ວໂມເຊກໍເອົາແກະໂຕຜູ້ໂຕທີ 2 ມາ ເພື່ອຈະໃຊ້ເປັນເຄື່ອງບູຊາແຕ່ງຕັ້ງ+ ແລະອາໂຣນກັບພວກລູກຊາຍກໍວາງມືເທິງຫົວແກະໂຕນັ້ນ.+ 23 ໂມເຊຂ້າແກະໂຕນັ້ນ ແລະເອົາເລືອດສ່ວນໜຶ່ງຂອງມັນມາຈ້ຳໃສ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາກັບນິ້ວໂປ້ຕີນເບື້ອງຂວາຂອງອາໂຣນ. 24 ຈາກນັ້ນ ໂມເຊໃຫ້ພວກລູກຊາຍຂອງອາໂຣນຫຍັບອອກມາທາງໜ້າ ແລະເອົາເລືອດສ່ວນໜຶ່ງມາຈ້ຳໃສ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາກັບນິ້ວໂປ້ຕີນເບື້ອງຂວາຂອງເຂົາເຈົ້າ ແລ້ວໂມເຊກໍເອົາເລືອດສ່ວນທີ່ເຫຼືອໄປຊິດໃສ່ແຕ່ລະຂ້າງຂອງແທ່ນບູຊາ.+
25 ແລ້ວໂມເຊກໍເອົານ້ຳມັນທັງໝົດຂອງແກະໂຕນັ້ນອອກຄື: ຫາງທີ່ມີນ້ຳມັນ* ນ້ຳມັນທັງໝົດທີ່ຕິດຢູ່ໄສ້ ນ້ຳມັນທີ່ຕິດຢູ່ຕັບ ໝາກໄຂ່ຫຼັງ 2 ໜ່ວຍກັບນ້ຳມັນທີ່ຕິດຢູ່ຫັ້ນ ແລະຕັດຂາຫຼັງເບື້ອງຂວາຂອງມັນອອກນຳ.+ 26 ລາວເອົາເຂົ້າຈີ່ບໍ່ມີເຊື້ອອອກຈາກກະດົ້ງທີ່ຢູ່ຕໍ່ໜ້າພະເຢໂຫວາຄື: ເຂົ້າຈີ່ບໍ່ມີເຊື້ອຮູບວົງມົນ*+ 1 ອັນ ເຂົ້າຈີ່ຮູບວົງມົນທີ່ທານ້ຳມັນ 1 ອັນ+ ແລະເຂົ້າຈີ່ແຜ່ນບາງໆ 1 ອັນ. ແລ້ວລາວກໍເອົາເຂົ້າຈີ່ເຫຼົ່ານັ້ນໄປຢອງຢູ່ເທິງນ້ຳມັນກັບຂາຫຼັງເບື້ອງຂວາຂອງແກະໂຕນັ້ນ. 27 ຈາກນັ້ນ ລາວກໍເອົາທຸກຢ່າງໃສ່ມືຂອງອາໂຣນກັບມືຂອງພວກລູກຊາຍ ແລ້ວເຂົາເຈົ້າກໍເລີ່ມເອົາເຄື່ອງນັ້ນຊູໄປຊູມາເປັນເຄື່ອງບູຊາຊູໄປມາຕໍ່ໜ້າພະເຢໂຫວາ. 28 ແລ້ວໂມເຊກໍເອົາທຸກຢ່າງຈາກມືຂອງເຂົາເຈົ້າໄປຢອງຢູ່ເທິງເຄື່ອງບູຊາເຜົາ ແລະເຜົາຢູ່ເທິງແທ່ນ. ນີ້ແມ່ນເຄື່ອງບູຊາແຕ່ງຕັ້ງທີ່ມີກິ່ນຫອມທີ່ເຮັດໃຫ້ພໍໃຈ ແລະແມ່ນເຄື່ອງບູຊາດ້ວຍໄຟໃຫ້ພະເຢໂຫວາ.
29 ໂມເຊເອົາຊີ້ນສ່ວນເອິກຊູໄປຊູມາເປັນເຄື່ອງບູຊາຊູໄປມາຕໍ່ໜ້າພະເຢໂຫວາ.+ ສ່ວນນີ້ຂອງແກະທີ່ໃຊ້ເປັນເຄື່ອງບູຊາແຕ່ງຕັ້ງເປັນສ່ວນແບ່ງຂອງໂມເຊຕາມທີ່ພະເຢໂຫວາໄດ້ສັ່ງລາວ.+
30 ໂມເຊໄດ້ເອົາສ່ວນໜຶ່ງຂອງນ້ຳມັນທີ່ໃຊ້ເພື່ອແຕ່ງຕັ້ງ+ ແລະເອົາສ່ວນໜຶ່ງຂອງເລືອດທີ່ຢູ່ເທິງແທ່ນບູຊາມາຊິດໃສ່ອາໂຣນກັບເຄື່ອງນຸ່ງຂອງລາວ ແລ້ວຊິດໃສ່ພວກລູກຊາຍຂອງອາໂຣນ+ກັບເຄື່ອງນຸ່ງຂອງເຂົາເຈົ້າ.+ ຍ້ອນແນວນີ້ ໂມເຊໄດ້ແຍກອາໂຣນກັບເຄື່ອງນຸ່ງຂອງລາວ ແລະໄດ້ແຍກພວກລູກຊາຍຂອງອາໂຣນກັບເຄື່ອງນຸ່ງຂອງເຂົາເຈົ້າໄວ້ຕ່າງຫາກສຳລັບວຽກບໍລິສຸດ.
31 ຈາກນັ້ນ ໂມເຊເວົ້າກັບອາໂຣນແລະພວກລູກຊາຍຂອງລາວວ່າ: “ໃຫ້ພວກເຈົ້າຕົ້ມ+ຊີ້ນຢູ່ທາງເຂົ້າເຕັ້ນສັກສິດ. ພວກເຈົ້າຕ້ອງກິນຊີ້ນນັ້ນກັບເຂົ້າຈີ່ທີ່ໃຊ້ແຕ່ງຕັ້ງເຊິ່ງຢູ່ໃນກະດົ້ງ ຄືກັບທີ່ພະເຈົ້າໄດ້ບອກຂ້ອຍວ່າ ‘ອາໂຣນກັບພວກລູກຊາຍຂອງລາວຈະກິນສ່ວນເຫຼົ່ານັ້ນ.’+ 32 ຊີ້ນກັບເຂົ້າຈີ່ທີ່ເຫຼືອ ພວກເຈົ້າຕ້ອງເຜົາຖິ້ມໃຫ້ໝົດ.+ 33 ພວກເຈົ້າຕ້ອງຢູ່ໃກ້ໆທາງເຂົ້າເຕັ້ນສັກສິດ 7 ມື້ຈົນຮອດມື້ທີ່ການແຕ່ງຕັ້ງແລ້ວໆ ເພາະຕ້ອງໃຊ້ເວລາ 7 ມື້ເພື່ອແຕ່ງຕັ້ງພວກເຈົ້າເປັນປະໂລຫິດ.*+ 34 ພະເຢໂຫວາສັ່ງພວກເຮົາໃຫ້ເຮັດສິ່ງທີ່ພວກເຮົາໄດ້ເຮັດໃນມື້ນີ້ ເພື່ອຈະໄຖ່ຄວາມຜິດໃຫ້ພວກເຈົ້າ.+ 35 ພວກເຈົ້າຕ້ອງຢູ່ໃກ້ໆທາງເຂົ້າເຕັ້ນສັກສິດທັງກາງເວັນແລະກາງຄືນຕະຫຼອດ 7 ມື້.+ ພວກເຈົ້າຕ້ອງລະວັງທີ່ຈະບໍ່ເຮັດຜິດກົດໝາຍຂອງພະເຢໂຫວາ+ເພື່ອພວກເຈົ້າຈະບໍ່ຕາຍ. ເພິ່ນສັ່ງຂ້ອຍມາແນວນີ້.”
36 ອາໂຣນກັບພວກລູກຊາຍຂອງລາວໄດ້ເຮັດທຸກຢ່າງຕາມທີ່ພະເຢໂຫວາສັ່ງໄວ້ຜ່ານທາງໂມເຊ.