ລະບຽບພວກເລວີ
6 ພະເຢໂຫວາເວົ້າກັບໂມເຊອີກວ່າ: 2 “ຖ້າຜູ້ໃດເຮັດຜິດແລະບໍ່ສັດຊື່ຕໍ່ພະເຢໂຫວາ+ ໂດຍຕົວະເພື່ອນບ້ານກ່ຽວກັບສິ່ງທີ່ເພື່ອນບ້ານຝາກໃຫ້ເບິ່ງແຍງ+ ຫຼືໄປລັກ ຫຼືສໍ້ໂກງເອົາບາງສິ່ງຂອງເພື່ອນບ້ານມາ 3 ຫຼືເຫັນເຄື່ອງທີ່ຄົນອື່ນເຮັດເສຍແລ້ວຕົວະວ່າເປັນຂອງໂຕເອງ ແຕ່ພັດສາບານວ່າບໍ່ໄດ້ເຮັດຜິດອັນໃດອັນໜຶ່ງທີ່ເວົ້າມານັ້ນ+ ລາວຕ້ອງເຮັດແນວນີ້. 4 ຖ້າລາວໄດ້ເຮັດແທ້ແລະມີຄວາມຜິດ ລາວຕ້ອງເອົາສິ່ງນັ້ນສົ່ງຄືນໃຫ້ເຈົ້າຂອງ ບໍ່ວ່າຈະເປັນສິ່ງທີ່ລາວລັກມາ ຍາດມາ ສໍ້ໂກງມາ ສິ່ງທີ່ຄົນອື່ນຝາກໃຫ້ລາວເບິ່ງແຍງ ສິ່ງທີ່ຄົນອື່ນເຮັດເສຍເຊິ່ງລາວເອົາໄວ້ 5 ຫຼືສິ່ງໃດກໍຕາມທີ່ລາວໄດ້ສາບານຕົວະໄວ້. ລາວຕ້ອງຈ່າຍຄ່າຊົດໄຊ້ໃນລາຄາເຕັມ+ ແລະເອົາ 1 ສ່ວນ 5 ຂອງມູນຄ່າສິ່ງເຫຼົ່ານັ້ນຕື່ມໃຫ້ອີກ. ລາວຕ້ອງເອົາທັງໝົດນີ້ໃຫ້ເຈົ້າຂອງໃນມື້ທີ່ລາວຖືກຕັດສິນວ່າມີຄວາມຜິດ. 6 ລາວຕ້ອງເອົາເຄື່ອງບູຊາໄຖ່ຄວາມຜິດມາໃຫ້ພະເຢໂຫວານຳ. ລາວຕ້ອງເອົາແກະໂຕຜູ້ທີ່ຕຸ້ຍພີດີງາມ ເຊິ່ງມີລາຄາຕາມມາດຕະຖານມາໃຫ້ປະໂລຫິດ ເພື່ອເປັນເຄື່ອງບູຊາໄຖ່ຄວາມຜິດ.+ 7 ປະໂລຫິດຈະໄຖ່ຄວາມຜິດໃຫ້ລາວຕໍ່ໜ້າພະເຢໂຫວາ ແລະບໍ່ວ່າລາວຈະເຮັດຜິດອັນໃດອັນໜຶ່ງໃນເລື່ອງທີ່ເວົ້າມານັ້ນ ລາວຈະໄດ້ຮັບການຍົກໂທດ.”+
8 ພະເຢໂຫວາເວົ້າກັບໂມເຊອີກວ່າ: 9 “ໃຫ້ບອກອາໂຣນກັບພວກລູກຊາຍຂອງລາວວ່າ ‘ກົດໝາຍເລື່ອງເຄື່ອງບູຊາເຜົາເປັນແນວນີ້.+ ເຄື່ອງບູຊາເຜົາຈະຕ້ອງຢູ່ເທິງແທ່ນໝົດຄືນຈົນຮອດເຊົ້າ ແລະໄຟຢູ່ເທິງແທ່ນຕ້ອງລຸກຢູ່ຕະຫຼອດ. 10 ປະໂລຫິດຈະໃສ່ຊຸດເຮັດວຽກຂອງລາວທີ່ເຮັດດ້ວຍຜ້າລີນິນ+ ແລະນຸ່ງໂສ້ງຊ້ອນ+ທີ່ເຮັດດ້ວຍຜ້າລີນິນ. ລາວຈະເອົາຂີ້ເທົ່າ*+ຂອງເຄື່ອງບູຊາເຜົາທີ່ຢູ່ເທິງແທ່ນບູຊາໄປໄວ້ຢູ່ທາງຂ້າງຂອງແທ່ນ. 11 ຫຼັງຈາກນັ້ນ ລາວຈະປ່ຽນເຄື່ອງນຸ່ງ+ ແລະເອົາຂີ້ເທົ່າໄປຖິ້ມຢູ່ນອກຄ້າຍບ່ອນທີ່ຈັດໄວ້ຕ່າງຫາກ.+ 12 ໄຟຢູ່ເທິງແທ່ນບູຊາຕ້ອງລຸກຢູ່ຕະຫຼອດ. ຫ້າມບໍ່ໃຫ້ມັນມອດ. ທຸກໆເຊົ້າ ປະໂລຫິດຈະເອົາຟືນມາໃສ່ໄຟ+ ແລະລຽນເຄື່ອງບູຊາເຜົາເທິງໄຟນັ້ນ. ລາວຈະເອົານ້ຳມັນຂອງເຄື່ອງບູຊາສ້າງຄວາມສະຫງົບສຸກໄປເຜົາໃນໄຟນັ້ນ.+ 13 ໄຟຢູ່ເທິງແທ່ນບູຊາຕ້ອງລຸກຢູ່ຕະຫຼອດ. ຫ້າມບໍ່ໃຫ້ມັນມອດ.
14 ກົດໝາຍເລື່ອງເຄື່ອງບູຊາທີ່ເຮັດຈາກເມັດເຂົ້າເປັນແນວນີ້.+ ພວກລູກຊາຍຂອງອາໂຣນຕ້ອງເອົາເຄື່ອງບູຊານີ້ໄປທີ່ແທ່ນບູຊາຕໍ່ໜ້າພະເຢໂຫວາ. 15 ປະໂລຫິດຄົນໜຶ່ງຈະເອົາແປ້ງລະອຽດ 1 ກຳມື ແລະນ້ຳມັນກັບກຳຍານ* ເຊິ່ງເປັນສ່ວນໜຶ່ງຂອງເຄື່ອງບູຊາທີ່ເຮັດຈາກເມັດເຂົ້າໄປເຜົາເທິງແທ່ນ ເປັນເຄື່ອງບູຊາເພື່ອລະນຶກເຖິງ* ເຊິ່ງມີກິ່ນຫອມທີ່ເຮັດໃຫ້ພະເຢໂຫວາພໍໃຈ.*+ 16 ອາໂຣນກັບພວກລູກຊາຍຈະກິນສ່ວນທີ່ເຫຼືອຂອງເຄື່ອງບູຊາທີ່ເຮັດຈາກເມັດເຂົ້າ.+ ເຂົາເຈົ້າຈະເອົາໄປເຮັດເປັນເຂົ້າຈີ່ບໍ່ມີເຊື້ອ ແລ້ວກິນຢູ່ບ່ອນບໍລິສຸດ. ເຂົາເຈົ້າຈະກິນເຂົ້າຈີ່ນັ້ນຢູ່ເດີ່ນຂອງເຕັ້ນສັກສິດ.*+ 17 ເຂົ້າຈີ່ທີ່ເຂົາເຈົ້າເຮັດນັ້ນບໍ່ຄວນໃສ່ເຊື້ອ.+ ເຮົາແບ່ງສ່ວນນີ້ໃຫ້ເຂົາເຈົ້າຈາກເຄື່ອງບູຊາດ້ວຍໄຟ+ໃຫ້ເຮົາ. ນີ້ແມ່ນສິ່ງທີ່ບໍລິສຸດແທ້ໆ+ ຄືກັບເຄື່ອງບູຊາໄຖ່ບາບແລະເຄື່ອງບູຊາໄຖ່ຄວາມຜິດ. 18 ຜູ້ຊາຍທຸກຄົນທີ່ເປັນລູກຫຼານຂອງອາໂຣນຈະກິນເຂົ້າຈີ່ນັ້ນ.+ ສ່ວນແບ່ງນີ້ຈາກເຄື່ອງບູຊາດ້ວຍໄຟໃຫ້ພະເຢໂຫວາ+ຈະເປັນຂອງເຂົາເຈົ້າຈົນຮອດລຸ້ນລູກລຸ້ນຫຼານຕໍ່ໆໄປ. ທຸກຢ່າງທີ່ໃຊ້ກັບເຄື່ອງບູຊານີ້ຈະຖືວ່າເປັນສິ່ງບໍລິສຸດ.’”
19 ພະເຢໂຫວາເວົ້າກັບໂມເຊອີກວ່າ: 20 “ຕໍ່ໄປນີ້ແມ່ນເຄື່ອງບູຊາທີ່ອາໂຣນກັບພວກລູກຊາຍຂອງລາວຕ້ອງເອົາມາໃຫ້ພະເຢໂຫວາສະເໝີ ໃນມື້ທີ່ເຂົາເຈົ້າຖືກແຕ່ງຕັ້ງ.+ ເຂົາເຈົ້າຕ້ອງເອົາແປ້ງລະອຽດ 1 ສ່ວນ 10 ເອຟາ*+ມາເປັນເຄື່ອງບູຊາທີ່ເຮັດຈາກເມັດເຂົ້າ.+ ເຄິ່ງໜຶ່ງຕ້ອງໃຫ້ຕອນເຊົ້າ ແລະອີກເຄິ່ງໜຶ່ງຕ້ອງໃຫ້ຕອນແລງ. 21 ເຂົາເຈົ້າຈະເອົາເຄື່ອງບູຊານີ້ປະສົມກັບນ້ຳມັນ ແລ້ວເອົາໄປຂາງຢູ່ໝໍ້.+ ເຂົາເຈົ້າຕ້ອງເອົານ້ຳມັນມາປະສົມກັບເຄື່ອງບູຊານີ້ໃຫ້ເຂົ້າກັນດີ ແລ້ວເອົາໄປເຮັດເປັນເຂົ້າຈີ່ ແລະຫັກເປັນປ່ຽງໆ. ນີ້ແມ່ນເຄື່ອງບູຊາທີ່ເຮັດຈາກເມັດເຂົ້າທີ່ມີກິ່ນຫອມທີ່ເຮັດໃຫ້ພະເຢໂຫວາພໍໃຈ. 22 ລູກຫຼານຂອງອາໂຣນຄົນໜຶ່ງທີ່ຈະຖືກແຕ່ງຕັ້ງໃຫ້ເປັນປະໂລຫິດໃຫຍ່ແທນລາວ+ຈະເປັນຄົນເຮັດເຄື່ອງບູຊານີ້. ເຄື່ອງບູຊານີ້ທັງໝົດຈະຖືກເຜົາໃຫ້ພະເຢໂຫວາ. ນີ້ແມ່ນກົດໝາຍທີ່ພວກເຈົ້າຕ້ອງເຮັດຕາມຕະຫຼອດໄປ. 23 ເຄື່ອງບູຊາທີ່ເຮັດຈາກເມັດເຂົ້າທີ່ໃຊ້ສຳລັບປະໂລຫິດ ບໍ່ວ່າຈະເປັນຊະນິດໃດກໍຕາມຕ້ອງເຜົາໃຫ້ໝົດ. ຫ້າມບໍ່ໃຫ້ຜູ້ໃດກິນ.”
24 ພະເຢໂຫວາເວົ້າກັບໂມເຊອີກວ່າ: 25 “ໃຫ້ບອກອາໂຣນກັບພວກລູກຊາຍຂອງລາວວ່າ ‘ກົດໝາຍເລື່ອງເຄື່ອງບູຊາໄຖ່ບາບເປັນແນວນີ້.+ ເຂົາເຈົ້າຕ້ອງຂ້າ+ສັດທີ່ໃຊ້ເປັນເຄື່ອງບູຊາໄຖ່ບາບ ຢູ່ບ່ອນດຽວກັນກັບບ່ອນທີ່ຂ້າສັດທີ່ໃຊ້ເປັນເຄື່ອງບູຊາເຜົາ ເຊິ່ງຢູ່ຕໍ່ໜ້າພະເຢໂຫວາ. ນີ້ແມ່ນສິ່ງທີ່ບໍລິສຸດແທ້ໆ. 26 ປະໂລຫິດທີ່ເປັນຄົນເຮັດໜ້າທີ່ໃຫ້ເຄື່ອງບູຊາໄຖ່ບາບນີ້ຈະກິນສ່ວນຂອງລາວໄດ້.+ ລາວຈະກິນເຄື່ອງບູຊານີ້ຢູ່ບ່ອນບໍລິສຸດ ເຊິ່ງກໍຄືເດີ່ນຂອງເຕັ້ນສັກສິດ.+
27 ທຸກຢ່າງທີ່ໃຊ້ກັບສັດນີ້ຈະຖືວ່າເປັນສິ່ງບໍລິສຸດ. ຖ້າເລືອດສັດນັ້ນຟົ້ງຖືກເຄື່ອງນຸ່ງຂອງຜູ້ໃດ ຜູ້ນັ້ນຕ້ອງເອົາເຄື່ອງນຸ່ງໄປຊັກຢູ່ບ່ອນບໍລິສຸດ. 28 ຖ້າເຄື່ອງໃຊ້ທີ່ເຂົາເຈົ້າເອົາມາຕົ້ມຊີ້ນສັດນັ້ນເຮັດຈາກດິນ ກໍຕ້ອງທຸບໃຫ້ແຕກ. ແຕ່ຖ້າເຄື່ອງໃຊ້ທີ່ເຂົາເຈົ້າເອົາມາຕົ້ມຊີ້ນສັດນັ້ນເຮັດຈາກທອງແດງ ກໍຕ້ອງຂັດແລະລ້າງນ້ຳໃຫ້ສະອາດ.
29 ຜູ້ຊາຍທຸກຄົນທີ່ເປັນປະໂລຫິດຈະກິນສ່ວນຂອງເຂົາເຈົ້າໄດ້.+ ນີ້ແມ່ນສິ່ງທີ່ບໍລິສຸດແທ້ໆ.+ 30 ແຕ່ຖ້າປະໂລຫິດເອົາເລືອດສ່ວນໜຶ່ງເຂົ້າໄປໃນເຕັ້ນສັກສິດແລະໄຖ່ຄວາມຜິດຢູ່ບ່ອນບໍລິສຸດ+ ຫ້າມບໍ່ໃຫ້ຜູ້ໃດກິນຊີ້ນທີ່ເປັນເຄື່ອງບູຊາໄຖ່ບາບນັ້ນ ໃຫ້ເອົາໄປເຜົາໄຟໃຫ້ໝົດ.’”