ລະບຽບພວກເລວີ
14 ພະເຢໂຫວາເວົ້າກັບໂມເຊອີກວ່າ: 2 “ນີ້ແມ່ນກົດໝາຍກ່ຽວກັບຄົນຂີ້ທູດ. ໃນມື້ທີ່ຈະປະກາດວ່າລາວສະອາດ ຕ້ອງພາລາວໄປຫາປະໂລຫິດແລະເຮັດຕາມນີ້.+ 3 ປະໂລຫິດຕ້ອງອອກໄປຫາຄົນຂີ້ທູດຢູ່ນອກຄ້າຍພັກແລະກວດເບິ່ງລາວ. ຖ້າລາວເຊົາເປັນຂີ້ທູດແລ້ວ 4 ປະໂລຫິດຈະສັ່ງໃຫ້ລາວເອົານົກທີ່ຖືວ່າສະອາດມາ 2 ໂຕ ພ້ອມກັບງ່າໄມ້ຊີດ້າ* ຜ້າສີແດງສົດ ແລະຕົ້ນຫູສົບ ເພື່ອເຮັດໃຫ້ໂຕລາວສະອາດ.+ 5 ປະໂລຫິດຈະສັ່ງໃຫ້ເອົານົກໂຕໜຶ່ງໄປຂ້າໃນໝໍ້ດິນເຊິ່ງມີນ້ຳທີ່ຕັກມາຈາກນ້ຳທີ່ໄຫຼ. 6 ແຕ່ລາວຈະເອົານົກໂຕທີ່ຍັງມີຊີວິດຢູ່ ພ້ອມກັບງ່າໄມ້ຊີດ້າ ຜ້າສີແດງສົດ ແລະຕົ້ນຫູສົບ ຈຸ່ມລົງໃນເລືອດຂອງນົກທີ່ຂ້າໃນໝໍ້ເຊິ່ງມີນ້ຳທີ່ຕັກມາຈາກນ້ຳທີ່ໄຫຼ. 7 ປະໂລຫິດຈະເອົາເລືອດນັ້ນໄປຊິດທັງໝົດ 7 ເທື່ອໃສ່ຄົນທີ່ເຄີຍເປັນຂີ້ທູດ ແລະຈະປະກາດວ່າຜູ້ນັ້ນສະອາດແລ້ວ. ຫຼັງຈາກນັ້ນ ປະໂລຫິດຈະປ່ອຍນົກໂຕທີ່ຍັງມີຊີວິດຢູ່ອອກໄປນອກຄ້າຍ.+
8 ຄົນທີ່ເຄີຍເປັນຂີ້ທູດຕ້ອງຊັກເຄື່ອງນຸ່ງຂອງໂຕເອງ ແຖຫົວກັບແຖຂົນທີ່ຢູ່ຕາມຕົນໂຕອອກໃຫ້ໝົດແລະອາບນ້ຳ ແລ້ວຈະຖືວ່າລາວສະອາດ. ຫຼັງຈາກນັ້ນ ລາວຈະເຂົ້າມາໃນຄ້າຍໄດ້ ແຕ່ຕ້ອງຢູ່ນອກເຕັ້ນຂອງໂຕເອງ 7 ມື້. 9 ເມື່ອຮອດມື້ທີ 7 ລາວຕ້ອງແຖຫົວ ແຖໜວດເຄົາ ແລະແຖຄິ້ວ. ຈາກນັ້ນ ລາວຕ້ອງແຖຂົນທີ່ຢູ່ຕາມຕົນໂຕອອກໃຫ້ໝົດ ຊັກເຄື່ອງນຸ່ງຂອງໂຕເອງແລະອາບນ້ຳ ແລ້ວຈະຖືວ່າລາວສະອາດ.
10 ໃນມື້ທີ 8 ລາວຈະຕ້ອງເອົາສິ່ງເຫຼົ່ານີ້ມາຄື: ແກະໂຕຜູ້ທີ່ຕຸ້ຍພີດີງາມ 2 ໂຕ ແກະໂຕແມ່ທີ່ຕຸ້ຍພີດີງາມ+ອາຍຸບໍ່ກາຍ 1 ປີໂຕໜຶ່ງ ແປ້ງລະອຽດ 3 ສ່ວນ 10 ເອຟາ*ທີ່ນວດໃສ່ນ້ຳມັນເພື່ອເປັນເຄື່ອງບູຊາທີ່ເຮັດຈາກເມັດເຂົ້າ+ ແລະນ້ຳມັນ 1 ລ໋ອກ.*+ 11 ປະໂລຫິດຜູ້ທີ່ປະກາດວ່າຄົນທີ່ເຄີຍເປັນຂີ້ທູດສະອາດແລ້ວ ຈະພາຜູ້ນັ້ນພ້ອມກັບເອົາເຄື່ອງບູຊາທັງໝົດມາຕໍ່ໜ້າພະເຢໂຫວາຢູ່ທາງເຂົ້າເຕັ້ນສັກສິດ.* 12 ປະໂລຫິດຈະເອົາແກະໂຕຜູ້ໂຕທຳອິດມາເປັນເຄື່ອງບູຊາໄຖ່ຄວາມຜິດ+ພ້ອມກັບນ້ຳມັນ 1 ລ໋ອກ.* ລາວຈະເອົາເຄື່ອງທັງໝົດນັ້ນຊູໄປຊູມາເປັນເຄື່ອງບູຊາຊູໄປມາຕໍ່ໜ້າພະເຢໂຫວາ.+ 13 ລາວຈະຂ້າແກະໂຕຜູ້ໂຕນັ້ນຢູ່ບ່ອນຂ້າສັດທີ່ໃຊ້ເປັນເຄື່ອງບູຊາໄຖ່ບາບແລະເຄື່ອງບູຊາເຜົາ.+ ລາວຕ້ອງຂ້າຢູ່ບ່ອນບໍລິສຸດນັ້ນ ຍ້ອນເຄື່ອງບູຊາໄຖ່ຄວາມຜິດເປັນສ່ວນແບ່ງຂອງປະໂລຫິດ ຄືກັນກັບເຄື່ອງບູຊາໄຖ່ບາບ.+ ເຄື່ອງບູຊານີ້ເປັນສິ່ງທີ່ບໍລິສຸດແທ້ໆ.+
14 ຈາກນັ້ນ ປະໂລຫິດຈະເອົາເລືອດສ່ວນໜຶ່ງຈາກເຄື່ອງບູຊາໄຖ່ຄວາມຜິດໄປຈ້ຳໃສ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາ ແລະນິ້ວໂປ້ຕີນເບື້ອງຂວາຂອງຄົນທີ່ເຄີຍເປັນຂີ້ທູດ. 15 ປະໂລຫິດຈະເອົານ້ຳມັນສ່ວນໜຶ່ງຈາກນ້ຳມັນ 1 ລ໋ອກ*+ ເທໃສ່ອົ້ງມືເບື້ອງຊ້າຍຂອງໂຕເອງ. 16 ລາວຈະເອົານິ້ວມືເບື້ອງຂວາຈຸ່ມນ້ຳມັນທີ່ຢູ່ອົ້ງມືເບື້ອງຊ້າຍ ແລ້ວຊິດທັງໝົດ 7 ເທື່ອຕໍ່ໜ້າພະເຢໂຫວາ. 17 ຈາກນັ້ນ ປະໂລຫິດຈະເອົານິ້ວມືຈຸ່ມລົງນ້ຳມັນທີ່ເຫຼືອຢູ່ອົ້ງມື ແລ້ວໄປຈ້ຳທັບຮອຍເລືອດຈາກເຄື່ອງບູຊາໄຖ່ຄວາມຜິດທີ່ຢູ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາ ແລະນິ້ວໂປ້ຕີນເບື້ອງຂວາຂອງຄົນທີ່ເຄີຍເປັນຂີ້ທູດ. 18 ແລ້ວເອົານ້ຳມັນທີ່ຍັງຢູ່ອົ້ງມືໄປລູບໃສ່ຫົວຂອງຄົນທີ່ເຄີຍເປັນຂີ້ທູດ ແລະປະໂລຫິດຈະໄຖ່ຄວາມຜິດໃຫ້ລາວຕໍ່ໜ້າພະເຢໂຫວາ.+
19 ປະໂລຫິດຈະເອົາເຄື່ອງບູຊາໄຖ່ບາບມາ+ ແລະໄຖ່ຄວາມຜິດໃຫ້ຄົນທີ່ເຄີຍເປັນຂີ້ທູດ. ຫຼັງຈາກນັ້ນ ລາວຈະຂ້າສັດທີ່ໃຊ້ເປັນເຄື່ອງບູຊາເຜົາ. 20 ປະໂລຫິດຈະເອົາເຄື່ອງບູຊາເຜົາ ແລະເຄື່ອງບູຊາທີ່ເຮັດຈາກເມັດເຂົ້າ+ໄປເຜົາເທິງແທ່ນບູຊາ. ແລ້ວປະໂລຫິດຈະໄຖ່ຄວາມຜິດໃຫ້ຄົນທີ່ເຄີຍເປັນຂີ້ທູດ+ ແລະຈະຖືວ່າລາວສະອາດ.+
21 ແຕ່ຖ້າຜູ້ນັ້ນເປັນຄົນທຸກແລະມີເງິນບໍ່ພໍ ລາວຈະຕ້ອງເອົາສິ່ງເຫຼົ່ານີ້ມາຄື: ແກະໂຕຜູ້ໂຕໜຶ່ງທີ່ຈະໃຊ້ເປັນເຄື່ອງບູຊາໄຖ່ຄວາມຜິດ ເພື່ອໃຫ້ປະໂລຫິດຊູໄປຊູມາແລະໄຖ່ຄວາມຜິດໃຫ້ລາວ ກັບແປ້ງລະອຽດ 1 ສ່ວນ 10 ເອຟາ*ທີ່ນວດໃສ່ນ້ຳມັນເພື່ອເປັນເຄື່ອງບູຊາທີ່ເຮັດຈາກເມັດເຂົ້າ ນ້ຳມັນ 1 ລ໋ອກ* 22 ແລະນົກເຂົາ 2 ໂຕ ຫຼືນົກກາງແກ 2 ໂຕຕາມທີ່ລາວມີເງິນພໍຈະຊື້ໄດ້. ໂຕໜຶ່ງເປັນເຄື່ອງບູຊາໄຖ່ບາບ ແລະອີກໂຕໜຶ່ງເປັນເຄື່ອງບູຊາເຜົາ.+ 23 ໃນມື້ທີ 8+ ລາວຈະເອົາສິ່ງເຫຼົ່ານີ້ມາໃຫ້ປະໂລຫິດຢູ່ທາງເຂົ້າເຕັ້ນສັກສິດ ເພື່ອເຮັດໃຫ້ໂຕເອງສະອາດຕໍ່ໜ້າພະເຢໂຫວາ.+
24 ປະໂລຫິດຈະເອົາແກະໂຕຜູ້ທີ່ເປັນເຄື່ອງບູຊາໄຖ່ຄວາມຜິດ+ ກັບນ້ຳມັນ 1 ລ໋ອກ*ຊູໄປຊູມາເປັນເຄື່ອງບູຊາຊູໄປມາຕໍ່ໜ້າພະເຢໂຫວາ.+ 25 ລາວຈະຂ້າແກະໂຕຜູ້ທີ່ເປັນເຄື່ອງບູຊາໄຖ່ຄວາມຜິດ. ຈາກນັ້ນ ປະໂລຫິດຈະເອົາເລືອດສ່ວນໜຶ່ງຈາກເຄື່ອງບູຊາໄຖ່ຄວາມຜິດໄປຈ້ຳໃສ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາ ແລະນິ້ວໂປ້ຕີນເບື້ອງຂວາຂອງຄົນທີ່ເຄີຍເປັນຂີ້ທູດ.+ 26 ປະໂລຫິດຈະເອົານ້ຳມັນສ່ວນໜຶ່ງເທໃສ່ອົ້ງມືເບື້ອງຊ້າຍຂອງໂຕເອງ.+ 27 ລາວຈະເອົານິ້ວມືເບື້ອງຂວາຈຸ່ມນ້ຳມັນທີ່ຢູ່ອົ້ງມືເບື້ອງຊ້າຍ ແລ້ວຊິດທັງໝົດ 7 ເທື່ອຕໍ່ໜ້າພະເຢໂຫວາ. 28 ຈາກນັ້ນ ປະໂລຫິດຈະເອົານິ້ວມືຈຸ່ມລົງນ້ຳມັນທີ່ເຫຼືອຢູ່ອົ້ງມື ແລ້ວໄປຈ້ຳທັບຮອຍເລືອດຈາກເຄື່ອງບູຊາໄຖ່ຄວາມຜິດທີ່ຢູ່ຕິ່ງຫູເບື້ອງຂວາ ນິ້ວໂປ້ມືເບື້ອງຂວາ ແລະນິ້ວໂປ້ຕີນເບື້ອງຂວາຂອງຄົນທີ່ເຄີຍເປັນຂີ້ທູດ. 29 ແລ້ວປະໂລຫິດຈະເອົານ້ຳມັນທີ່ຍັງຢູ່ອົ້ງມືໄປລູບໃສ່ຫົວຂອງຄົນທີ່ເຄີຍເປັນຂີ້ທູດ ແລະໄຖ່ຄວາມຜິດໃຫ້ລາວຕໍ່ໜ້າພະເຢໂຫວາ.
30 ປະໂລຫິດຈະໃຊ້ນົກເຂົາຫຼືນົກກາງແກ 1 ໃນ 2 ໂຕເປັນເຄື່ອງບູຊາເຜົາ ຕາມທີ່ຄົນທີ່ເຄີຍເປັນຂີ້ທູດນັ້ນມີເງິນພໍຈະຊື້ໄດ້.+ 31 ນົກ 2 ໂຕທີ່ລາວຊື້ໄດ້ນັ້ນ ໂຕໜຶ່ງຈະເປັນເຄື່ອງບູຊາໄຖ່ບາບ ແລະອີກໂຕໜຶ່ງຈະເປັນເຄື່ອງບູຊາເຜົາ.+ ລາວຕ້ອງເອົາເຄື່ອງບູຊາທີ່ເຮັດຈາກເມັດເຂົ້າມານຳ ແລ້ວປະໂລຫິດຈະໄຖ່ຄວາມຜິດໃຫ້ຄົນທີ່ເຄີຍເປັນຂີ້ທູດນັ້ນຕໍ່ໜ້າພະເຢໂຫວາ.+
32 ນີ້ແມ່ນກົດໝາຍກ່ຽວກັບຄົນທີ່ເຄີຍເປັນຂີ້ທູດທີ່ຕ້ອງເຮັດໂຕໃຫ້ສະອາດ ແຕ່ມີເງິນບໍ່ພໍ.”
33 ຈາກນັ້ນ ພະເຢໂຫວາບອກໂມເຊກັບອາໂຣນຕື່ມອີກວ່າ: 34 “ເມື່ອພວກເຈົ້າເຂົ້າໄປໃນແຜ່ນດິນການາອານ+ທີ່ເຮົາຈະເອົາໃຫ້ພວກເຈົ້າ+ ແລະເຮົາຍອມໃຫ້ມີເຊື້ອຂີ້ທູດຢູ່ເຮືອນຫຼັງໃດຫຼັງໜຶ່ງຂອງພວກເຈົ້າ+ 35 ເຈົ້າຂອງເຮືອນຫຼັງນັ້ນຕ້ອງໄປຫາປະໂລຫິດ ແລະບອກວ່າ ‘ເຮືອນຂອງຂ້ອຍມີຮອຍເປື້ອນເຊື້ອຫຍັງກໍບໍ່ຮູ້.’ 36 ກ່ອນທີ່ປະໂລຫິດຈະໄປກວດເບິ່ງຮອຍເປື້ອນ ລາວຈະສັ່ງໃຫ້ຂົນເຄື່ອງທັງໝົດອອກຈາກເຮືອນ ເພື່ອລາວຈະບໍ່ຕ້ອງປະກາດວ່າທຸກສິ່ງຢູ່ໃນເຮືອນນັ້ນຖືວ່າບໍ່ສະອາດ. ຫຼັງຈາກນັ້ນ ປະໂລຫິດຈະເຂົ້າໄປກວດເບິ່ງ. 37 ລາວຈະກວດເບິ່ງບ່ອນທີ່ມີຮອຍເປື້ອນເຊື້ອ. ຖ້າຝາເຮືອນມີຮອຍເປື້ອນເຊື້ອສີເຫຼືອງໆຂຽວໆ ຫຼືສີແດງໆ ແລະເບິ່ງຄືວ່າຮອຍເປື້ອນເຊື້ອນັ້ນເລິກເຂົ້າໄປໃນຝາ 38 ປະໂລຫິດຕ້ອງອອກຈາກເຮືອນນັ້ນ ແລະປິດເຮືອນໄວ້ 7 ມື້.+
39 ເມື່ອຮອດມື້ທີ 7 ປະໂລຫິດກໍຈະໄປກວດເບິ່ງອີກເທື່ອໜຶ່ງ. ຖ້າຮອຍເປື້ອນເຊື້ອນັ້ນລາມໄປຕາມຝາເຮືອນ 40 ປະໂລຫິດຈະສັ່ງໃຫ້ເອົາຫີນທຸກກ້ອນທີ່ມີຮອຍເປື້ອນເຊື້ອໄປຖິ້ມຢູ່ນອກເມືອງ ບ່ອນທີ່ຖິ້ມສິ່ງທີ່ບໍ່ສະອາດ. 41 ລາວຈະສັ່ງໃຫ້ຂູດທາງໃນຂອງເຮືອນຈົນທົ່ວທຸກບ່ອນ ແລະສິ່ງທີ່ຂູດອອກມາທັງໝົດຕ້ອງເອົາໄປຖິ້ມຢູ່ນອກເມືອງ ບ່ອນທີ່ຖິ້ມສິ່ງທີ່ບໍ່ສະອາດ. 42 ເຂົາເຈົ້າຈະເອົາຫີນກ້ອນໃໝ່ມາໃສ່ແທນກ້ອນທີ່ເຂົາເຈົ້າເອົາອອກໄປ ແລະເອົາແນວທີ່ເຮັດໃຫ້ກ້ອນຫີນຕິດກັນມາໃສ່ໃໝ່ ແລ້ວໂບກຝາເຮືອນໃໝ່.
43 ຖ້າປ່ຽນຫີນກ້ອນໃໝ່ ຂູດທາງໃນຂອງເຮືອນ ແລະໂບກຝາເຮືອນໃໝ່ແລ້ວ ແຕ່ຮອຍເປື້ອນເຊື້ອນັ້ນກັບມາມີອີກ 44 ປະໂລຫິດຈະເຂົ້າໄປແລະກວດເບິ່ງເຮືອນນັ້ນ. ຖ້າຫາກວ່າຮອຍເປື້ອນເຊື້ອນັ້ນແພ່ໄປບ່ອນອື່ນໃນເຮືອນ ສະແດງວ່າມັນເປັນເຊື້ອຂີ້ທູດທີ່ຕິດຕໍ່ໃສ່ຄົນອື່ນໄດ້+ ຈະຕ້ອງຖືວ່າເຮືອນນັ້ນບໍ່ສະອາດ. 45 ລາວຈະສັ່ງໃຫ້ທຸບເຮືອນນັ້ນຖິ້ມ ແລະເອົາກ້ອນຫີນ ໄມ້ ແນວທີ່ເຮັດໃຫ້ກ້ອນຫີນຕິດກັນ ແລະແນວທີ່ໃຊ້ໂບກຝາເຮືອນໄປຖິ້ມຢູ່ນອກເມືອງ ບ່ອນທີ່ຖິ້ມສິ່ງທີ່ບໍ່ສະອາດ.+ 46 ໃນໄລຍະທີ່ປິດເຮືອນໄວ້+ ຖ້າຜູ້ໃດເຂົ້າໄປໃນເຮືອນນັ້ນຕ້ອງຖືວ່າຜູ້ນັ້ນບໍ່ສະອາດຈົນຮອດຄ່ຳ.+ 47 ຖ້າຜູ້ໃດເຂົ້າໄປນອນຢູ່ໃນເຮືອນນັ້ນກໍຕ້ອງຊັກເຄື່ອງນຸ່ງຂອງໂຕເອງ ແລະຖ້າຜູ້ໃດໄປກິນເຂົ້າຢູ່ໃນເຮືອນນັ້ນກໍຕ້ອງຊັກເຄື່ອງນຸ່ງຂອງໂຕເອງ.
48 ແຕ່ຫຼັງຈາກໂບກຝາເຮືອນໃໝ່ແລ້ວ ຖ້າປະໂລຫິດມາກວດເບິ່ງແລະເຫັນວ່າບໍ່ມີຮອຍເປື້ອນເຊື້ອຢູ່ບ່ອນໃດເລີຍ ລາວຈະປະກາດວ່າເຮືອນນັ້ນສະອາດ ເພາະຮອຍເປື້ອນເຊື້ອນັ້ນບໍ່ມີແລ້ວ. 49 ລາວຕ້ອງເອົານົກ 2 ໂຕ ງ່າໄມ້ຊີດ້າ ຜ້າສີແດງສົດ ແລະຕົ້ນຫູສົບມາເພື່ອເຮັດໃຫ້ເຮືອນນັ້ນສະອາດ.+ 50 ລາວຈະຂ້ານົກໂຕໜຶ່ງໃນໝໍ້ດິນເຊິ່ງມີນ້ຳທີ່ຕັກມາຈາກນ້ຳທີ່ໄຫຼ. 51 ລາວຈະເອົາງ່າໄມ້ຊີດ້າ ຕົ້ນຫູສົບ ຜ້າສີແດງສົດ ແລະນົກໂຕທີ່ຍັງມີຊີວິດຢູ່ຈຸ່ມລົງໃນເລືອດຂອງນົກທີ່ຖືກຂ້າໃນໝໍ້ເຊິ່ງມີນ້ຳທີ່ຕັກມາຈາກນ້ຳທີ່ໄຫຼ ແລ້ວລາວຈະຊິດເລືອດໄປທາງເຮືອນນັ້ນ 7 ເທື່ອ.+ 52 ລາວຈະໃຊ້ເລືອດນົກ ນ້ຳທີ່ຕັກມາຈາກນ້ຳທີ່ໄຫຼ ນົກໂຕທີ່ຍັງມີຊີວິດຢູ່ ງ່າໄມ້ຊີດ້າ ຕົ້ນຫູສົບ ແລະຜ້າສີແດງສົດເພື່ອເຮັດໃຫ້ເຮືອນນັ້ນສະອາດ. 53 ລາວຈະປ່ອຍນົກໂຕທີ່ຍັງມີຊີວິດຢູ່ອອກໄປນອກຄ້າຍ. ຍ້ອນແນວນີ້ ລາວຈະເອົາສິ່ງທີ່ບໍ່ສະອາດອອກໄປຈາກເຮືອນ* ແລ້ວຈະຖືວ່າເຮືອນນັ້ນສະອາດ.
54 ນີ້ແມ່ນກົດໝາຍກ່ຽວກັບພະຍາດຂີ້ທູດທຸກຊະນິດ ທັງການຕິດເຊື້ອຢູ່ໜັງຫົວ ຫຼືຢູ່ໜວດເຄົາ+ 55 ເຊື້ອຂີ້ທູດທີ່ຢູ່ເຄື່ອງນຸ່ງ+ ຫຼືຢູ່ໃນເຮືອນ+ 56 ເຊື້ອຂີ້ທູດຈາກການບວມ ຕົກເກັດ ແລະຮອຍດ່າງ.+ 57 ກົດໝາຍນີ້ຈະຊ່ວຍໃຫ້ຮູ້ວ່າສິ່ງໃດຖືວ່າສະອາດແລະສິ່ງໃດຖືວ່າບໍ່ສະອາດ.+ ນີ້ແມ່ນກົດໝາຍກ່ຽວກັບພະຍາດຂີ້ທູດ.”+