ບົດທີ 7
ລິດເດດໃນການປົກປ້ອງຂອງພະເຈົ້າ‘ຜູ້ເປັນບ່ອນລີ້ໄພຂອງພວກເຮົາ’
1, 2. ໃນປີ 1513 ກ່ອນ ຄ.ສ ພວກອິດສະຣາເອນເຈິອັນຕະລາຍຫຍັງຕອນທີ່ກຳລັງເຂົ້າແຜ່ນດິນທີ່ພະເຈົ້າສັນຍາ ແລະພະເຢໂຫວາເຮັດໃຫ້ເຂົາເຈົ້າໝັ້ນໃຈຫຼາຍຂຶ້ນແນວໃດ?
ໃນຕົ້ນປີ 1513 ກ່ອນຄລິດຕະສັກກະຫຼາດ (ກ່ອນ ຄ.ສ) ພວກອິດສະຣາເອນຕົກຢູ່ໃນອັນຕະລາຍ ຕອນນັ້ນເຂົາເຈົ້າກຳລັງຈະເຂົ້າໄປແຜ່ນດິນທີ່ພະເຈົ້າສັນຍາ. ເຂົາເຈົ້າຕ້ອງຜ່ານເຂດທີ່ເປັນ “ບ່ອນກັນດານທີ່ກວ້າງໃຫຍ່ແລະເປັນຕາຢ້ານ ທີ່ເຕັມແຕ່ງູພິດກັບແມງງອດ.” (ພະບັນຍັດ 8:15) ເຂົາເຈົ້າຍັງອາດຈະຖືກຊາດຕ່າງໆທີ່ເປັນສັດຕູມາໂຈມຕີນຳອີກ. ພະເຢໂຫວາເປັນຜູ້ພາປະຊາຊົນຂອງເພິ່ນມາເຈິສະຖານະການແບບນີ້. ໃນຖານະເປັນພະເຈົ້າຂອງເຂົາເຈົ້າ ເພິ່ນຈະປົກປ້ອງເຂົາເຈົ້າໄດ້ບໍ?
2 ພະເຢໂຫວາເຮັດໃຫ້ເຂົາເຈົ້າໝັ້ນໃຈຫຼາຍຂຶ້ນໂດຍບອກວ່າ: “ພວກເຈົ້າກໍເຫັນແລ້ວວ່າເຮົາໄດ້ເຮັດຫຍັງໃຫ້ພວກເອຢິບ ເພື່ອໃຫ້ພວກເຈົ້າມາຢູ່ກັບເຮົາຄືກັບນົກອິນຊີໃຊ້ປີກຕຸ້ມລູກໄວ້.” (ອົບພະຍົບ 19:4) ພະເຢໂຫວາບອກປະຊາຊົນຫຼາຍເທື່ອວ່າເພິ່ນເຄີຍຊ່ວຍເຂົາເຈົ້າໃຫ້ລອດຈາກການເປັນທາດໃນເອຢີບ. ເພິ່ນໃຊ້ນົກອິນຊີເພື່ອເປັນພາບປຽບທຽບທີ່ພາເຂົາເຈົ້າໄປບ່ອນທີ່ປອດໄພ. ຍັງມີເຫດຜົນອື່ນໆອີກທີ່ ‘ປີກຂອງນົກອິນຊີ’ ເປັນຕົວຢ່າງທີ່ເໝາະສົມທີ່ສະແດງເຖິງການປົກປ້ອງຈາກພະເຈົ້າ.
3. ເປັນຫຍັງຈຶ່ງໃຊ້ ‘ປີກຂອງນົກອິນຊີ’ ປຽບທຽບກັບການປົກປ້ອງຂອງພະເຈົ້າ?
3 ນົກອິນຊີບໍ່ພຽງແຕ່ໃຊ້ປີກທີ່ໃຫຍ່ແລະແຂງແຮງເພື່ອບິນຂຶ້ນສູງເທົ່ານັ້ນ. ແຕ່ໃນຕອນທີ່ຮ້ອນໆ ແມ່ນົກອິນຊີຈະພືປີກທັງສອງຂ້າງອອກເພື່ອເປັນຮົ່ມປົກປ້ອງລູກນ້ອຍເພື່ອບໍ່ໃຫ້ແດດໄໝ້ ຖ້າຢຽດປີກທັງສອງຂ້າງອອກອາດຈະຍາວກວ່າ 2 ແມັດ. ຕອນທີ່ອາກາດໜາວ ນົກອິນຊີຈະໃຊ້ປີກຕຸ້ມລູກນ້ອຍໄວ້ເພື່ອບໍ່ໃຫ້ລູກມັນໜາວ. ຄືກັບທີ່ນົກອິນຊີປົກປ້ອງລູກນ້ອຍ ພະເຢໂຫວາໄດ້ປົກປ້ອງແລະເບິ່ງແຍງພວກອິດສະຣາເອນທີ່ຂາດປະສົບການນຳ. ຕອນທີ່ຢູ່ບ່ອນກັນດານ ເຂົາເຈົ້າກໍຈະມີບ່ອນລີ້ໄພຢູ່ກ້ອງຮົ່ມປີກທີ່ມີພະລັງຂອງເພິ່ນຕໍ່ໆໄປຖ້າເຂົາເຈົ້າຍັງສັດຊື່ຕໍ່ເພິ່ນສະເໝີ. (ພະບັນຍັດ 32:9-11; ເພງສັນລະເສີນ 36:7) ແຕ່ໃນທຸກມື້ນີ້ພະເຢໂຫວາຍັງປົກປ້ອງຄົນຂອງເພິ່ນຢູ່ບໍ?
ພະເຢໂຫວາສັນຍາວ່າຈະປົກປ້ອງຜູ້ຮັບໃຊ້ຂອງເພິ່ນ
4, 5. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຈົ້າຈະປົກປ້ອງເຮົາ?
4 ພະເຢໂຫວາສາມາດປົກປ້ອງຜູ້ຮັບໃຊ້ຂອງເພິ່ນໄດ້ແທ້ໆ. ເພິ່ນເປັນ “ພະເຈົ້າຜູ້ມີລິດເດດສູງສຸດ” ເຊິ່ງໝາຍຄວາມວ່າເພິ່ນມີລິດເດດຫຼາຍ ແລະບໍ່ມີໃຜຈະຂັດຂວາງເພິ່ນບໍ່ໃຫ້ເຮັດຕາມຄວາມຕ້ອງການຂອງເພິ່ນໄດ້. (ປະຖົມມະການ 17:1) ຄືກັບທີ່ບໍ່ມີໃຜຫ້າມຄື້ນຢູ່ທະເລບໍ່ໃຫ້ມັນຢຸດໄດ້ ຖ້າພະເຢໂຫວາຕ້ອງການຈະເຮັດຫຍັງກໍຈະບໍ່ມີໃຜຢຸດເພິ່ນໄດ້ຄືກັນ. ເມື່ອພະເຢໂຫວາເຮັດຫຍັງກໍໄດ້ຕາມທີ່ເພິ່ນຕ້ອງການ ເຮົາອາດສົງໄສວ່າ ‘ເພິ່ນຢາກໃຊ້ລິດເດດເພື່ອປົກປ້ອງຄົນຂອງເພິ່ນບໍ?’
5 ຄຳຕອບແມ່ນເພິ່ນຢາກຊ່ວຍແທ້! ພະເຢໂຫວາສັນຍາວ່າຈະປົກປ້ອງຄົນຂອງເພິ່ນ. ເພງສັນລະເສີນ 46:1 ບອກວ່າ: “ພະເຈົ້າເປັນບ່ອນລີ້ໄພແລະເປັນກຳລັງຂອງພວກເຮົາ ເພິ່ນຊ່ວຍພວກເຮົາສະເໝີຕອນທີ່ພວກເຮົາທຸກຍາກລຳບາກ.” ຍ້ອນພະເຈົ້າ “ເວົ້າຕົວະບໍ່ໄດ້” ເຮົາຈຶ່ງໝັ້ນໃຈໄດ້ແທ້ໆວ່າເພິ່ນຈະປົກປ້ອງພວກເຮົາ. (ຕີໂຕ 1:2) ໃຫ້ເຮົາມາເບິ່ງວ່າພະເຢໂຫວາໃຊ້ຕົວຢ່າງປຽບທຽບຫຍັງເພື່ອປົກປ້ອງຜູ້ຮັບໃຊ້ຂອງເພິ່ນ.
6, 7. (ກ) ຜູ້ລ້ຽງແກະໃນສະໄໝຄຳພີໄບເບິນປົກປ້ອງແກະຂອງລາວແນວໃດ? (ຂ) ຄຳພີໄບເບິນໃຊ້ພາບປຽບທຽບຫຍັງທີ່ສະແດງວ່າພະເຢໂຫວາຢາກປົກປ້ອງເຮົາແທ້ໆ?
6 ພະເຢໂຫວາເປັນຜູ້ລ້ຽງເຮົາ ແລະ “ພວກເຮົາເປັນປະຊາຊົນຂອງເພິ່ນແລະເປັນແກະຢູ່ໃນທົ່ງຫຍ້າຂອງເພິ່ນ.” (ເພງສັນລະເສີນ 23:1; 100:3) ແກະຕ້ອງໄດ້ຮັບການປົກປ້ອງຫຼາຍແທ້ໆ ແລະໃນຄຳພີໄບເບິນບອກໃຫ້ເຮົາຮູ້ວ່າຜູ້ລ້ຽງແກະຕ້ອງກ້າຫານຫຼາຍເພື່ອຈະປົກປ້ອງແກະບໍ່ໃຫ້ສິງ ໝາປ່າ ກັບໝີມາທຳຮ້າຍ ແລະບໍ່ໃຫ້ຄົນຂີ້ລັກມາລັກໄດ້. (1 ຊາມູເອນ 17:34, 35; ໂຢຮັນ 10:12, 13) ແຕ່ບາງເທື່ອຜູ້ລ້ຽງແກະຕ້ອງອ່ອນໂຍນກັບແກະນຳ. ຕອນທີ່ແກະເກີດລູກແລະຢູ່ໄກຈາກໝູ່ ຜູ້ລ້ຽງແກະຈະເບິ່ງແຍງແລະປົກປ້ອງແກະໂຕແມ່ຕອນທີ່ມັນຍັງຊ່ວຍໂຕເອງບໍ່ໄດ້ ແລ້ວລາວກໍຈະອູ້ມແກະນ້ອຍທີ່ຫາກໍເກີດໄປໄວ້ໃນຄອກ.
“ເພິ່ນຈະອູ້ມພວກມັນແລະກອດໄວ້ຢູ່ເອິກ”
7 ພະເຢໂຫວາປຽບທຽບເພິ່ນເອງເປັນຜູ້ລ້ຽງແກະ ເພິ່ນເຮັດໃຫ້ພວກເຮົາໝັ້ນໃຈວ່າເພິ່ນຢາກຈະປົກປ້ອງພວກເຮົາແທ້ໆ. (ເອເຊກຽນ 34:11-16) ໃນບົດທີ 2 ຂອງປຶ້ມນີ້ໄດ້ອະທິບາຍກ່ຽວກັບພະເຢໂຫວາໂດຍໃຊ້ເອຊາຢາ 40:11 ທີ່ບອກວ່າ: “ເພິ່ນຈະເບິ່ງແຍງແກະຂອງເພິ່ນຄືກັບຄົນລ້ຽງແກະ. ເພິ່ນຈະຕ້ອນແກະຂອງເພິ່ນໃຫ້ມາຢູ່ນຳກັນ. ເພິ່ນຈະອູ້ມພວກມັນແລະກອດໄວ້ຢູ່ເອິກ. ເພິ່ນຈະຄ່ອຍໆພາແກະແມ່ລູກອ່ອນໄປ.” ແກະນ້ອຍມາຢູ່ “ເອິກ” ຂອງຜູ້ລ້ຽງແກະໄດ້ແນວໃດ? ແກະນ້ອຍຕ້ອງເຂົ້າມາໃກ້ໆຜູ້ລ້ຽງ ແລ້ວເອົາຫົວດຸດຂາລາວຄ່ອຍໆ. ສ່ວນຜູ້ລ້ຽງແກະກໍຕ້ອງກົ້ມລົງອູ້ມເອົາແກະນ້ອຍຂຶ້ນມາ ແລ້ວຄ່ອຍໆເອົາເສື້ອຊັ້ນນອກຫໍ່ແລະກອດມັນໄວ້ຢ່າງນຸ້ມນວນ. ພາບປຽບທຽບທີ່ໜ້າປະທັບໃຈນີ້ສະແດງໃຫ້ເຫັນວ່າພະເຢໂຫວາຜູ້ລ້ຽງແກະອົງຍິ່ງໃຫຍ່ຢາກຈະປົກປ້ອງເຮົາແທ້ໆ.
8. (ກ) ພະເຈົ້າສັນຍາວ່າຈະປົກປ້ອງໃຜ ແລະສຸພາສິດ 18:10 ບອກຫຍັງເຮົາໃນເລື່ອງນີ້? (ຂ) ເຮົາຕ້ອງເຮັດຫຍັງເພື່ອຈະຊອກຫາບ່ອນລີ້ໄພໃນຊື່ຂອງພະເຈົ້າ?
8 ແຕ່ພະເຈົ້າສັນຍາວ່າຈະປົກປ້ອງສະເພາະແຕ່ຜູ້ທີ່ໃກ້ຊິດກັບເພິ່ນເທົ່ານັ້ນ. ສຸພາສິດ 18:10 ບອກວ່າ: “ຊື່ຂອງພະເຢໂຫວາເປັນປ້ອມທີ່ແຂງແຮງ. ຄົນທີ່ເຮັດສິ່ງທີ່ຖືກຕ້ອງແລ່ນເຂົ້າໄປໃນຫັ້ນແລະໄດ້ຮັບການປົກປ້ອງ.” ໃນສະໄໝທີ່ຂຽນຄຳພີໄບເບິນ ບາງເທື່ອມີການສ້າງປ້ອມຕ່າງໆໄວ້ໃນບ່ອນກັນດານເພື່ອເປັນບ່ອນທີ່ຫຼົບໄພ. ແຕ່ຜູ້ທີ່ຕົກຢູ່ໃນອັນຕະລາຍຕ້ອງໄດ້ແລ່ນເຂົ້າໄປໃນປ້ອມນັ້ນຈຶ່ງຈະປອດໄພ. ຄ້າຍຄືກັນ ການໃຫ້ຊື່ຂອງພະເຢໂຫວາເປັນປ້ອມສຳລັບເຮົາບໍ່ໄດ້ໝາຍຄວາມວ່າ ເຮົາເວົ້າຊື່ຂອງພະເຈົ້າຊ້ຳໆກັນຫຼາຍເທື່ອ ຍ້ອນຊື່ຂອງພະເຈົ້າບໍ່ແມ່ນຄາຖາອາຄົມ. ແຕ່ເຮົາຕ້ອງຮູ້ຈັກແລະໄວ້ໃຈພະເຢໂຫວາຜູ້ທີ່ເປັນເຈົ້າຂອງຊື່ນັ້ນ ແລະຕ້ອງໃຊ້ຊີວິດຕາມມາດຕະຖານທີ່ຖືກຕ້ອງຂອງເພິ່ນ. ພະເຢໂຫວາເມດຕາເຮົາຫຼາຍແທ້ໆທີ່ສັນຍາກັບເຮົາວ່າຖ້າເຮົາໄວ້ໃຈເພິ່ນ ເພິ່ນກໍຈະປົກປ້ອງເຮົາຄືກັບວ່າເຮົາຢູ່ໃນປ້ອມທີ່ແຂງແຮງ!
“ພະເຈົ້າ . . . ຈະຊ່ວຍພວກເຮົາໃຫ້ລອດ”
9. ພະເຢໂຫວາມີແຕ່ສັນຍາວ່າຈະປົກປ້ອງເຮົາເທົ່ານັ້ນບໍ?
9 ພະເຢໂຫວາເຮັດຫຼາຍກວ່າສັນຍາວ່າຈະປົກປ້ອງເຮົາ. ໃນສະໄໝທີ່ຂຽນຄຳພີໄບເບິນ ເພິ່ນເຮັດການອັດສະຈັນເພື່ອສະແດງໃຫ້ເຫັນວ່າເພິ່ນປົກປ້ອງຄົນຂອງເພິ່ນໄດ້. ຕົວຢ່າງເຊັ່ນ ຫຼາຍເທື່ອພະເຢໂຫວາໃຊ້ລິດເດດຂອງເພິ່ນເພື່ອປົກປ້ອງຊາດອິດສະຣາເອນຈາກພວກສັດຕູທີ່ມີກອງກຳລັງຫຼາຍ. (ອົບພະຍົບ 7:4) ນອກຈາກນັ້ນ ພະເຢໂຫວາຍັງໃຊ້ລິດເດດເພື່ອປົກປ້ອງຜູ້ຮັບໃຊ້ຂອງເພິ່ນແຕ່ລະຄົນນຳ.
10, 11. ຕົວຢ່າງຂອງໃຜແດ່ໃນຄຳພີໄບເບິນທີ່ພະເຢໂຫວາເຄີຍໃຊ້ລິດເດດຂອງເພິ່ນປົກປ້ອງເຂົາເຈົ້າ?
10 ຕອນທີ່ພວກຊາຍໜຸ່ມຄົນເຮັບເຣີ 3 ຄົນທີ່ຊື່ຊາດຣາກ ເມຊາກ ແລະເອເບດເນໂກບໍ່ຍອມກົ້ມກາບຮູບປັ້ນຄຳທີ່ກະສັດເນບູກາດເນັດຊາເຮັດຂຶ້ນມາ ກະສັດຈຶ່ງໃຈຮ້າຍຫຼາຍແລະຂູ່ວ່າຈະໂຍນເຂົາເຈົ້າເຂົ້າໄປໃນເຕົາໄຟທີ່ຮ້ອນໆ. ກະສັດເນບູກາດເນັດຊາຜູ້ມີອຳນາດຫຼາຍທີ່ສຸດໃນໂລກໄດ້ທ້າວ່າ: “ລອງເບິ່ງດຸ ຊິມີພະເຈົ້າອົງໃດບໍທີ່ຊ່ວຍພວກເຈົ້າໃຫ້ລອດຈາກມືຂ້ອຍໄດ້?” (ດານີເອນ 3:15) ຊາຍໜຸ່ມທັງສາມຄົນໝັ້ນໃຈແທ້ໆວ່າພະເຈົ້າມີລິດເດດທີ່ຈະປົກປ້ອງເຂົາເຈົ້າໄດ້ ແຕ່ເຂົາເຈົ້າກໍບໍ່ໄດ້ຄິດວ່າພະເຈົ້າຈະຕ້ອງປົກປ້ອງເຂົາເຈົ້າ. ດັ່ງນັ້ນ ເຂົາເຈົ້າຈຶ່ງຕອບວ່າ: “ຖ້າພວກເຮົາຖືກໂຍນເຂົ້າໄປໃນເຕົາໄຟແທ້ໆ ພະເຈົ້າທີ່ພວກເຮົານະມັດສະການກໍຈະຊ່ວຍພວກເຮົາໃຫ້ລອດ.” (ດານີເອນ 3:17) ເຖິງວ່າເຕົາໄຟນັ້ນຮ້ອນກວ່າປົກກະຕິເຖິງ 7 ເທົ່າ ແຕ່ກໍບໍ່ໄດ້ເປັນບັນຫາຫຍັງສຳລັບພະເຈົ້າຜູ້ມີລິດເດດສູງສຸດຂອງເຂົາເຈົ້າ. ເພິ່ນປົກປ້ອງເຂົາເຈົ້າ ແລະກະສັດຕ້ອງຈຳໃຈຍອມຮັບວ່າ: “ບໍ່ມີພະເຈົ້າອົງໃດສາມາດຊ່ວຍໃຫ້ລອດໄດ້ຄືກັບພະເຈົ້າອົງນີ້.”—ດານີເອນ 3:29
11 ພະເຢໂຫວາຍັງໄດ້ໃຊ້ລິດເດດໃນການປົກປ້ອງຂອງເພິ່ນໃນແບບທີ່ເປັນຕາງຶດຕອນທີ່ຍ້າຍຊີວິດລູກຊາຍຜູ້ດຽວທີ່ເພິ່ນໄດ້ສ້າງໃຫ້ໄປຢູ່ໃນທ້ອງຂອງສາວບໍລິສຸດຄົນຢິວທີ່ຊື່ມາຣີອາ. ທູດສະຫວັນບອກມາຣີອາວ່າລາວຈະ “ຖືພາແລະເກີດລູກຊາຍ.” ທູດສະຫວັນໄດ້ບອກຕື່ມອີກວ່າ: “ເຈົ້າຈະໄດ້ຮັບພະລັງບໍລິສຸດ ແລະລິດເດດຂອງພະເຈົ້າສູງສຸດຈະປົກປ້ອງເຈົ້າໄວ້.” (ລູກາ 1:31, 35) ຕອນນັ້ນ ລູກຊາຍຂອງພະເຈົ້າຕ້ອງໄດ້ຮັບການປົກປ້ອງເປັນພິເສດ. ບາບແລະຄວາມບໍ່ສົມບູນແບບຂອງແມ່ຈະສົ່ງຜົນບໍ່ດີຕໍ່ລູກໃນທ້ອງບໍ? ຊາຕານອາດຈະເຮັດອັນຕະລາຍຫຼືຂ້າລູກໃນທ້ອງກ່ອນຈະເກີດມາໄດ້ບໍ? ບໍ່ໄດ້! ພະເຢໂຫວາໄດ້ປົກປ້ອງມາຣີອາດີແທ້ໆ ບໍ່ມີໃຜແລະບໍ່ມີຫຍັງເຮັດໃຫ້ລູກໃນທ້ອງລາວຖືກອັນຕະລາຍໄດ້. ພະເຢໂຫວາຍັງປົກປ້ອງພະເຢຊູຕໍ່ໄປໃນຕອນທີ່ເປັນໄວລຸ້ນ. (ມັດທາຍ 2:1-15) ຖ້າຍັງບໍ່ຮອດເວລາທີ່ພະເຈົ້າກຳນົດ ເພິ່ນຈະບໍ່ໃຫ້ໃຜທຳຮ້າຍລູກສຸດທີ່ຮັກຂອງເພິ່ນໄດ້.
12. ເປັນຫຍັງພະເຢໂຫວາຈຶ່ງເຮັດການອັດສະຈັນເພື່ອປົກປ້ອງບາງຄົນໃນສະໄໝທີ່ຂຽນຄຳພີໄບເບິນ?
12 ເປັນຫຍັງບາງເທື່ອພະເຢໂຫວາຈຶ່ງເຮັດການອັດສະຈັນເພື່ອປົກປ້ອງຜູ້ຮັບໃຊ້ບາງຄົນຂອງເພິ່ນ? ມີຫຼາຍກໍລະນີທີ່ພະເຢໂຫວາໄດ້ປົກປ້ອງບາງຄົນກໍເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້. ຕົວຢ່າງເຊັ່ນ ເປັນເລື່ອງສຳຄັນແທ້ໆທີ່ພະເຢໂຫວາຕ້ອງປົກປ້ອງພະເຢຊູເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້ແລະເພື່ອມະນຸດຈະມີຊີວິດຕະຫຼອດໄປໄດ້. ມີຫຼາຍເຫດການໃນຄຳພີໄບເບິນທີ່ສະແດງໃຫ້ເຫັນວ່າພະເຢໂຫວາໃຊ້ລິດເດດເພື່ອປົກປ້ອງຄົນຂອງເພິ່ນ ແລະເຫດການເຫຼົ່ານັ້ນ “ຂຽນໄວ້ເພື່ອສອນພວກເຮົາ. ຍ້ອນພະຄຳພີຊ່ວຍພວກເຮົາໃຫ້ອົດທົນແລະມີກຳລັງໃຈ ພວກເຮົາຈຶ່ງມີຄວາມຫວັງໄດ້.” (ໂຣມ 15:4) ແມ່ນແລ້ວ ຕົວຢ່າງເຫຼົ່ານີ້ເຮັດໃຫ້ເຮົາໝັ້ນໃຈຫຼາຍຂຶ້ນໃນພະເຈົ້າຜູ້ມີລິດເດດສູງສຸດ. ແຕ່ໃນທຸກມື້ນີ້ພະເຈົ້າຍັງປົກປ້ອງເຮົາແນວໃດແດ່?
ພະເຈົ້າບໍ່ໄດ້ປົກປ້ອງເຮົາຈາກສິ່ງທີ່ບໍ່ດີທຸກຢ່າງ
13. ພະເຢໂຫວາຕ້ອງເຮັດການອັດສະຈັນເພື່ອປົກປ້ອງເຮົາບໍ? ຂໍໃຫ້ອະທິບາຍ.
13 ຄຳສັນຍາຂອງພະເຈົ້າເລື່ອງການປົກປ້ອງບໍ່ໄດ້ໝາຍຄວາມວ່າພະເຢໂຫວາພະເຈົ້າຕ້ອງເຮັດການອັດສະຈັນເພື່ອປົກປ້ອງເຮົາ. ພະເຈົ້າບໍ່ໄດ້ຮັບປະກັນວ່າຊີວິດເຮົາຈະບໍ່ມີບັນຫາຫຍັງໃນຕອນນີ້. ຜູ້ຮັບໃຊ້ທີ່ສັດຊື່ຂອງພະເຢໂຫວາຫຼາຍຄົນຕ້ອງເຈິບັນຫາຫຼາຍຢ່າງ. ເຂົາເຈົ້າເຈິຄວາມທຸກຍາກ ສົງຄາມ ຄວາມເຈັບປ່ວຍ ແລະຄວາມຕາຍ. ພະເຢຊູເວົ້າວ່າລູກສິດຂອງເພິ່ນບາງຄົນອາດຈະຖືກຂ້າຍ້ອນຄວາມເຊື່ອ. ດັ່ງນັ້ນ ພະເຢຊູຈຶ່ງເນັ້ນວ່າພວກເຮົາຕ້ອງອົດທົນຈົນເຖິງທີ່ສຸດ. (ມັດທາຍ 24:9, 13) ຖ້າພະເຢໂຫວາໃຊ້ລິດເດດຂອງເພິ່ນເຮັດການອັດສະຈັນເພື່ອປົກປ້ອງພວກເຮົາທຸກໆກໍລະນີ ຊາຕານກໍຈະເຍາະເຍີ້ຍພະເຢໂຫວາແລະກ່າວຫາວ່າເຮົາຮັບໃຊ້ເພິ່ນຍ້ອນເພິ່ນປົກປ້ອງເຮົາ ບໍ່ແມ່ນຍ້ອນວ່າເຮົາຮັກເພິ່ນ.—ໂຢບ 1:9, 10
14. ມີຕົວຢ່າງຂອງໃຜແດ່ທີ່ສະແດງວ່າພະເຢໂຫວາບໍ່ໄດ້ປົກປ້ອງຜູ້ຮັບໃຊ້ຂອງເພິ່ນທຸກຄົນໃນແບບດຽວກັນ?
14 ແມ່ນແຕ່ໃນສະໄໝທີ່ຂຽນຄຳພີໄບເບິນ ພະເຢໂຫວາກໍບໍ່ໄດ້ໃຊ້ລິດເດດເພື່ອປົກປ້ອງຜູ້ຮັບໃຊ້ຂອງເພິ່ນທຸກຄົນບໍ່ໃຫ້ຖືກຂ້າ. ຕົວຢ່າງເຊັ່ນ ປະມານປີ 44 ເຮໂຣດສັ່ງຄົນໃຫ້ຂ້າອັກຄະສາວົກຢາໂກໂບ. ແຕ່ຫຼັງຈາກນັ້ນບໍ່ດົນ ເປໂຕພັດຖືກຊ່ວຍ “ໃຫ້ລອດຈາກເຮໂຣດ.” (ກິດຈະການ 12:1-11) ສ່ວນໂຢຮັນນ້ອງຊາຍຂອງຢາໂກໂບມີຊີວິດຍືນກວ່າເປໂຕແລະຢາໂກໂບ. ເຫັນໄດ້ແຈ້ງວ່າ ເຮົາບໍ່ຄວນຄາດໝາຍໃຫ້ພະເຈົ້າປົກປ້ອງຜູ້ຮັບໃຊ້ຂອງເພິ່ນທຸກຄົນໃນແບບດຽວກັນ. ຄຳພີໄບເບິນຍັງບອກວ່າ: ‘ເວລາແລະເຫດການທີ່ບໍ່ຄາດຄິດເກີດຂຶ້ນກັບພວກເຮົາທຸກຄົນໄດ້.’ (ປັນຍາຈານ 9:11) ຖ້າຈັ່ງຊັ້ນ ພະເຢໂຫວາປົກປ້ອງເຮົາໃນທຸກມື້ນີ້ແນວໃດ?
ພະເຢໂຫວາປົກປ້ອງຊີວິດເຮົາ
15, 16. (ກ) ມີຫຍັງທີ່ສະແດງວ່າພະເຢໂຫວາໄດ້ປົກປ້ອງຜູ້ນະມັດສະການຂອງເພິ່ນແບບເປັນກຸ່ມທາງດ້ານຮ່າງກາຍ? (ຂ) ເປັນຫຍັງເຮົາໝັ້ນໃຈວ່າພະເຢໂຫວາຈະປົກປ້ອງຜູ້ຮັບໃຊ້ຂອງເພິ່ນໃນທຸກມື້ນີ້ແລະຕອນທີ່ມີ “ຄວາມທຸກລຳບາກຄັ້ງໃຫຍ່”?
15 ທຳອິດ ຂໍໃຫ້ເຮົາມາເບິ່ງວ່າພະເຢໂຫວາປົກປ້ອງຊີວິດເຮົາແນວໃດ. ພວກເຮົາທີ່ນະມັດສະການພະເຢໂຫວາຄາດໝາຍໄດ້ວ່າເພິ່ນຈະປົກປ້ອງເຮົາເປັນກຸ່ມ. ຖ້າບໍ່ຈັ່ງຊັ້ນ ເຮົາກໍຈະເປັນເຫຍື່ອຂອງຊາຕານໄດ້ງ່າຍໆ. ຂໍໃຫ້ຄິດເບິ່ງວ່າຊາຕານເປັນ “ຜູ້ປົກຄອງໂລກນີ້” ມັນຢາກກຳຈັດຜູ້ນະມັດສະການແທ້ທຸກຄົນໃຫ້ໝົດອີ່ຫຼີ. ຖ້າພະເຢໂຫວາບໍ່ໄດ້ປົກປ້ອງເຮົາ ຊາຕານກໍຈະທຳລາຍເຮົາໄດ້. (ໂຢຮັນ 12:31; ພະນິມິດ 12:17) ບາງລັດຖະບານທີ່ມີອຳນາດໃນໂລກໄດ້ສັ່ງຫ້າມວຽກປະກາດຂອງເຮົາແລະພະຍາຍາມກຳຈັດພວກເຮົາໃຫ້ໝົດໄປ ແຕ່ຄົນຂອງພະເຢໂຫວາກໍຍັງປະກາດຢ່າງສັດຊື່ຕໍ່ໆໄປ! ເປັນຫຍັງຊາດຕ່າງໆຈຶ່ງບໍ່ສາມາດຢຸດວຽກປະກາດຂອງຄລິດສະຕຽນກຸ່ມນ້ອຍໆທີ່ເບິ່ງຄືວ່າປົກປ້ອງໂຕເອງບໍ່ໄດ້? ກໍຍ້ອນພະເຢໂຫວາປົກປ້ອງເຮົາດ້ວຍປີກທີ່ມີລິດເດດຂອງເພິ່ນ!—ເພງສັນລະເສີນ 17:7, 8
16 ພະເຢໂຫວາຈະປົກປ້ອງຊີວິດເຮົາຕອນທີ່ມີ “ຄວາມທຸກລຳບາກຄັ້ງໃຫຍ່” ບໍ? ເຮົາບໍ່ຕ້ອງຢ້ານຕອນທີ່ພະເຈົ້າມາຕັດສິນຄົນຊົ່ວ ຍ້ອນຄຳພີໄບເບິນບອກວ່າ: “ພະເຢໂຫວາຮູ້ວິທີຊ່ວຍຄົນທີ່ຢ້ານຢຳເພິ່ນໃຫ້ຜ່ານການທົດສອບ ແຕ່ເພິ່ນຈົ່ງຄົນຊົ່ວໄວ້ເພື່ອທຳລາຍໃນມື້ຕັດສິນ.” (ພະນິມິດ 7:14; 2 ເປໂຕ 2:9) ກ່ອນທີ່ຈະຮອດຕອນນັ້ນ ເຮົາໝັ້ນໃຈໃນ 2 ເລື່ອງໄດ້ສະເໝີ. ເລື່ອງທຳອິດ ພະເຢໂຫວາຈະບໍ່ຍອມໃຫ້ຊາຕານກຳຈັດຜູ້ຮັບໃຊ້ທີ່ສັດຊື່ຂອງເພິ່ນໃຫ້ໝົດໄປຈາກໂລກ. ເລື່ອງທີ 2 ເພິ່ນຈະໃຫ້ຄົນທີ່ສັດຊື່ຕໍ່ເພິ່ນໄດ້ຊີວິດຕະຫຼອດໄປໃນໂລກໃໝ່. ຖ້າເຂົາເຈົ້າຕາຍກ່ອນ ເພິ່ນກໍຈະປຸກເຂົາເຈົ້າໃຫ້ຄືນມາມີຊີວິດອີກຍ້ອນເພິ່ນບໍ່ລືມເຂົາເຈົ້າ.—ໂຢຮັນ 5:28, 29
17. ພະເຢໂຫວາປົກປ້ອງເຮົາໂດຍທາງຖ້ອຍຄຳຂອງເພິ່ນແນວໃດ?
17 ພະເຢໂຫວາຍັງປົກປ້ອງເຮົາໃນຕອນນີ້ໂດຍທາງ “ຖ້ອຍຄຳ” ຂອງເພິ່ນ. ຄຳພີໄບເບິນຊ່ວຍເຮົາໃຫ້ປ່ຽນຊີວິດໂຕເອງໄປໃນທາງທີ່ດີຂຶ້ນແລະມີຄວາມສຸກຫຼາຍຂຶ້ນ. (ເຮັບເຣີ 4:12) ຖ້າເຮົາເຮັດຕາມຫຼັກການໃນຄຳພີໄບເບິນ ເຮົາກໍຈະໄດ້ຮັບການປົກປ້ອງຈາກສິ່ງທີ່ເປັນອັນຕະລາຍຕໍ່ຊີວິດຂອງເຮົາ. ເອຊາຢາ 48:17 ບອກວ່າ: “ເຮົາເຢໂຫວາ . . . ເຮົາສອນເຈົ້າເພື່ອປະໂຫຍດຂອງເຈົ້າ.” ການໃຊ້ຊີວິດຕາມຄຳສອນຂອງພະເຈົ້າເຮັດໃຫ້ເຮົາມີສຸຂະພາບດີຂຶ້ນແລະມີຊີວິດທີ່ຍືນຍາວ. ຕົວຢ່າງເຊັ່ນ ຍ້ອນເຮົາເຮັດຕາມຄຳແນະນຳໃນຄຳພີໄບເບິນ ເຮົາຈຶ່ງບໍ່ເຮັດຜິດສິນລະທຳທາງເພດ ບໍ່ເສບຢາ ຫຼືສູບຢາທີ່ມີຜົນເສຍຫາຍຕໍ່ຮ່າງກາຍແລະຊີວິດຄືກັບຄົນທີ່ບໍ່ເຊື່ອຟັງພະເຈົ້າໄດ້ເຮັດ. (ກິດຈະການ 15:29; 2 ໂກຣິນໂທ 7:1) ເຮົາຮູ້ສຶກຂອບໃຈພະເຈົ້າແທ້ໆທີ່ປົກປ້ອງເຮົາໂດຍທາງຖ້ອຍຄຳຂອງເພິ່ນ!
ພະເຢໂຫວາປົກປ້ອງເຮົາທາງດ້ານຄວາມເຊື່ອ
18. ພະເຢໂຫວາປົກປ້ອງເຮົາທາງດ້ານຄວາມເຊື່ອແນວໃດ?
18 ສິ່ງສຳຄັນທີ່ສຸດແມ່ນພະເຢໂຫວາປົກປ້ອງເຮົາທາງດ້ານຄວາມເຊື່ອ. ເພິ່ນເຮັດແນວນັ້ນໂດຍຊ່ວຍເຮົາໃຫ້ມີສິ່ງຈຳເປັນເພື່ອເຮົາຈະອົດທົນກັບບັນຫາຕ່າງໆແລະເປັນໝູ່ກັບເພິ່ນຕໍ່ໄປໄດ້. ພະເຢໂຫວາປົກປ້ອງຊີວິດເຮົາບໍ່ແມ່ນແຕ່ສອງສາມປີເທົ່ານັ້ນ ແຕ່ຕະຫຼອດໄປເລີຍ. ຂໍໃຫ້ເຮົາມາເບິ່ງວ່າພະເຢໂຫວາຊ່ວຍເຮົາແນວໃດເພື່ອໃຫ້ເຮົາສະໜິດກັບເພິ່ນ?
19. ພະລັງບໍລິສຸດຂອງພະເຢໂຫວາຈະຊ່ວຍເຮົາແນວໃດໃຫ້ຮັບມືກັບການທົດສອບທີ່ເຮົາກຳລັງເຈິ?
19 ພະເຢໂຫວາເປັນ “ຜູ້ຟັງຄຳອະທິດຖານ.” (ເພງສັນລະເສີນ 65:2) ຖ້າເຮົາເຈິບັນຫາໃນຊີວິດຫຼາຍຂຶ້ນເລື້ອຍໆແລະຮັບມືບໍ່ໄຫວ ເຮົາຈະຮູ້ສຶກດີຂຶ້ນເມື່ອເຮົາລະບາຍຄວາມຮູ້ສຶກໃນໃຈຂອງເຮົາກັບພະເຢໂຫວາ. (ຟີລິບປອຍ 4:6, 7) ເພິ່ນບໍ່ໄດ້ເຮັດການອັດສະຈັນເພື່ອໃຫ້ບັນຫາຂອງເຮົາໝົດໄປ ແຕ່ເພິ່ນຈະຕອບຄຳອະທິດຖານຂອງເຮົາໂດຍໃຫ້ສະຕິປັນຍາເພື່ອຫາທາງແກ້ໄຂບັນຫາໄດ້. (ຢາໂກໂບ 1:5, 6) ນອກຈາກນັ້ນ ພະເຢໂຫວາຈະໃຫ້ພະລັງບໍລິສຸດກັບທຸກຄົນທີ່ຂໍນຳເພິ່ນ. (ລູກາ 11:13) ພະລັງບໍລິສຸດຈະຊ່ວຍເຮົາໃຫ້ຮັບມືກັບການທົດສອບຫຼືບັນຫາຕ່າງໆທີ່ເຮົາກຳລັງເຈິໄດ້ ແລະຈະເຮັດໃຫ້ເຮົາມີ “ກຳລັງທີ່ຫຼາຍກວ່າປົກກະຕິ” ເພື່ອຈະອົດທົນໄດ້ຈົນກວ່າໂລກໃໝ່ຈະມາຮອດ. ພະເຢໂຫວາຈະກຳຈັດບັນຫາທຸກຢ່າງໃຫ້ໝົດໄປໃນອີກບໍ່ດົນ.—2 ໂກຣິນໂທ 4:7
20. ພະເຢໂຫວາໃຊ້ພີ່ນ້ອງຮ່ວມຄວາມເຊື່ອປົກປ້ອງເຮົາແນວໃດ?
20 ບາງເທື່ອພະເຢໂຫວາກໍໃຊ້ພີ່ນ້ອງຮ່ວມຄວາມເຊື່ອເພື່ອປົກປ້ອງເຮົາ. ພະເຢໂຫວາໄດ້ຊີ້ນຳຄົນຂອງເພິ່ນທົ່ວໂລກໃຫ້ມາເປັນ “ພີ່ນ້ອງ” ກັນ. (1 ເປໂຕ 2:17; ໂຢຮັນ 6:44) ຄວາມຮັກແບບພີ່ນ້ອງທີ່ເຂົາເຈົ້າສະແດງອອກມາເຮັດໃຫ້ເຫັນວ່າພະລັງບໍລິສຸດຂອງພະເຈົ້າກະຕຸ້ນຄົນເຮົາໃຫ້ເຮັດສິ່ງທີ່ດີ. ພະລັງບໍລິສຸດຊ່ວຍເຮົາໃຫ້ມີຄຸນລັກສະນະທີ່ດີຫຼາຍຢ່າງ ເຊັ່ນ: ຄວາມຮັກ ຄວາມເມດຕາ ແລະຄວາມດີ. (ຄາລາເຕຍ 5:22, 23) ເມື່ອເຮົາຮູ້ສຶກທໍ້ໃຈແລະພີ່ນ້ອງຮ່ວມຄວາມເຊື່ອໄດ້ໃຫ້ຄຳແນະນຳທີ່ເປັນປະໂຫຍດຫຼືເວົ້າໃຫ້ກຳລັງໃຈເຮົາ ເຮົາຄວນຂອບໃຈພະເຢໂຫວາແທ້ໆທີ່ເພິ່ນປົກປ້ອງແລະເບິ່ງແຍງເຮົາໂດຍທາງພີ່ນ້ອງຮ່ວມຄວາມເຊື່ອ.
21. (ກ) ພະເຢໂຫວາໃຫ້ “ທາດທີ່ສັດຊື່ແລະສຸຂຸມ” ກຽມຄວາມຮູ້ຕາມເວລາທີ່ເໝາະສົມຫຍັງແດ່ທີ່ເຮັດໃຫ້ຄວາມເຊື່ອຂອງເຮົາເຂັ້ມແຂງ? (ຂ) ເຈົ້າໄດ້ຮັບປະໂຫຍດຫຍັງແດ່ຈາກສິ່ງທີ່ພະເຢໂຫວາກຽມໄວ້ເພື່ອປົກປ້ອງເຮົາທາງດ້ານຄວາມເຊື່ອ?
21 ພະເຢໂຫວາຍັງປົກປ້ອງເຮົາໃນວິທີອື່ນນຳໂດຍທາງຄວາມຮູ້ທີ່ເຮັດຄວາມເຊື່ອຂອງເຮົາເຂັ້ມແຂງ. ພະເຢໂຫວາມອບໝາຍ “ທາດທີ່ສັດຊື່ແລະສຸຂຸມ” ໃຫ້ແຈກຢາຍຄວາມຮູ້ເພື່ອຊ່ວຍເຮົາໃຫ້ໄດ້ຮັບກຳລັງຈາກຖ້ອຍຄຳຂອງເພິ່ນ. ທາດສັດຊື່ໃຊ້ປຶ້ມແລະສື່ຕ່າງໆ ເຊັ່ນ: ວາລະສານຫໍສັງເກດການແລະຕື່ນເຖີດ! (ພາສາໄທ) ເວັບໄຊ jw.org ລວມທັງການປະຊຸມປະຈຳອາທິດ ການປະຊຸມໝວດ ແລະການປະຊຸມພາກ ເພື່ອ “ແຈກຢາຍອາຫານ . . . ຕາມເວລາທີ່ເໝາະສົມ” ທີ່ເຮົາຈຳເປັນໃນເວລາທີ່ເຮົາຕ້ອງການ. (ມັດທາຍ 24:45) ເຈົ້າເຄີຍໄດ້ຍິນຫຍັງແດ່ຢູ່ການປະຊຸມຄລິດສະຕຽນທີ່ເຮັດໃຫ້ເຈົ້າໄດ້ກຳລັງໃຈ ເຊັ່ນ: ການອອກຄວາມຄິດເຫັນ ຄຳບັນລະຍາຍ ຫຼືຄຳອະທິດຖານ? ມີບົດຄວາມເລື່ອງໃດບໍຈາກປຶ້ມຫຼືສື່ຕ່າງໆຂອງເຮົາທີ່ເຮັດໃຫ້ເຈົ້າໄດ້ຮັບປະໂຫຍດເປັນພິເສດ? ຂໍໃຫ້ຈື່ວ່າພະເຢໂຫວາກຽມສິ່ງເຫຼົ່ານີ້ເພື່ອປົກປ້ອງເຮົາທາງດ້ານຄວາມເຊື່ອ.
22. ພະເຢໂຫວາໃຊ້ລິດເດດຂອງເພິ່ນແນວໃດ ແລະເປັນຫຍັງການເຮັດແນວນັ້ນຈຶ່ງເປັນປະໂຫຍດຕໍ່ເຮົາ?
22 ພະເຢໂຫວາເປັນໂລ້ “ສຳລັບທຸກຄົນທີ່ໄປລີ້ໄພຢູ່ນຳເພິ່ນ.” (ເພງສັນລະເສີນ 18:30) ເຮົາເຂົ້າໃຈວ່າເພິ່ນບໍ່ໄດ້ໃຊ້ລິດເດດເພື່ອປົກປ້ອງເຮົາບໍ່ໃຫ້ເຈິຄວາມຫຍຸ້ງຍາກທຸກຢ່າງໃນຕອນນີ້. ແຕ່ເພິ່ນໃຊ້ລິດເດດເພື່ອເຮັດໃຫ້ຄວາມຕ້ອງການຂອງເພິ່ນເກີດຂຶ້ນແທ້ສະເໝີ ແລະສິ່ງທີ່ເພິ່ນເຮັດນັ້ນຈະຊ່ວຍໃຫ້ຄົນຂອງເພິ່ນມີຊີວິດທີ່ດີທີ່ສຸດເທົ່າທີ່ຈະມີໄດ້. ຖ້າເຮົາໃກ້ຊິດກັບພະເຢໂຫວາ ຮັກແລະເຊື່ອຟັງເພິ່ນຕໍ່ໆໄປ ເພິ່ນກໍຈະໃຫ້ເຮົາມີຊີວິດທີ່ມີຄວາມສຸກຕະຫຼອດໄປ. ເມື່ອທຽບກັບສິ່ງເຫຼົ່ານັ້ນ ເຮົາຖືວ່າຄວາມທຸກຕ່າງໆໃນຕອນນີ້ “ຈະຢູ່ແຕ່ໄລຍະສັ້ນໆແລະບໍ່ໜັກ.”—2 ໂກຣິນໂທ 4:17