ບົດແປດ
‘ການປ້ຳສູ້ກັບວິນຍານອັນຊົ່ວ’
1. ເປັນຫຍັງກິດຈະກຳຂອງພວກວິນຍານຊົ່ວຈຶ່ງເປັນເລື່ອງທີ່ເຮົາຄວນສົນໃຈເປັນພິເສດ?
ຫຼາຍຄົນເຍາະເຍີ້ຍຄວາມຄິດທີ່ວ່າມີວິນຍານຊົ່ວ. ຢ່າງໃດກໍດີ ບັນຫານີ້ບໍ່ແມ່ນເລື່ອງເວົ້າຫຼິ້ນ. ບໍ່ວ່າຄົນເຮົາຈະເຊື່ອຫຼືບໍ່ເຊື່ອກໍຕາມ ວິນຍານຊົ່ວມີແທ້ແລະພວກມັນພະຍາຍາມສ້າງຄວາມກົດດັນໃຫ້ກັບທຸກຄົນ. ເຫຼົ່າຜູ້ນະມັດສະການພະເຢໂຫວາກໍບໍ່ໄດ້ຮັບການຍົກເວັ້ນ. ຫຼາຍກວ່ານັ້ນ ເຂົາເຈົ້າພັດເປັນເປົ້າໝາຍຕົ້ນ. ອັກຄະສາວົກໂປໂລເຕືອນເຮົາກ່ຽວກັບຄວາມຈິງນັ້ນໂດຍກ່າວວ່າ “ເພາະວ່າການເລວເສິກ [“ການປ້ຳສູ້,” ລ.ມ.] ຂອງເຮົາທັງຫຼາຍບໍ່ເປັນຕໍ່ສູ້ເລືອດແລະເນື້ອໜັງ ແຕ່ວ່າຕໍ່ສູ້ເຈົ້ານາຍຜູ້ໃຫຍ່ທັງຫຼາຍ ແລະຕໍ່ສູ້ຜູ້ມີອຳນາດທັງຫຼາຍ ແລະຕໍ່ສູ້ຜູ້ຄຸ້ມຄອງທັງຫຼາຍແຫ່ງທີ່ມືດນີ້ ແລະຕໍ່ສູ້ລິດເດດ ເປັນວິນຍານອັນຊົ່ວທີ່ຢູ່ໃນຟ້າອາກາດ.” (ເອເຟດ 6:12) ໃນສະໄໝຂອງເຮົາ ຄວາມກົດດັນທີ່ມາຈາກວິນຍານຊົ່ວມີຫຼາຍກວ່າສະໄໝອື່ນໃດທັງໝົດ ເນື່ອງຈາກຊາຕານຖືກຂັບໄລ່ອອກຈາກສະຫວັນແລະມີຄວາມຄຽດຮ້າຍຫຼາຍ ເພາະຮູ້ວ່າເວລາຂອງມັນເຫຼືອຢູ່ໜ້ອຍດຽວ.—ຄຳປາກົດ 12:12.
2. ເຮົາຈະເອົາຊະນະໃນການຕໍ່ສູ້ກັບວິນຍານທີ່ມີອຳນາດເໜືອມະນຸດໄດ້ຢ່າງໃດ?
2 ເປັນໄປໄດ້ບໍທີ່ຈະເອົາຊະນະໃນການຕໍ່ສູ້ກັບວິນຍານທີ່ມີອຳນາດເໜືອມະນຸດ? ເປັນໄປໄດ້ແທ້ ແຕ່ວ່າດ້ວຍການໄວ້ວາງໃຈໃນພະເຢໂຫວາຢ່າງເຕັມທີເທົ່ານັ້ນ. ເຮົາຕ້ອງຮັບຟັງແລະປະຕິບັດຕາມພະຄຳຂອງພະອົງ. ໂດຍການເຮັດເຊັ່ນນັ້ນ ເຮົາຈຶ່ງຈະຫຼີກພົ້ນຈາກຄວາມເສຍຫາຍທາງກາຍ, ທາງສິນລະທຳ, ແລະທາງຄວາມຮູ້ສຶກເຊິ່ງຄົນທີ່ຢູ່ພາຍໃຕ້ການຄວບຄຸມຂອງຊາຕານຕ່າງກໍໄດ້ປະສົບ.—ຢາໂກໂບ 4:7.
ຜູ້ຄຸ້ມຄອງໂລກທີ່ຢູ່ໃນຟ້າອາກາດ
3. ຊາຕານຕໍ່ຕ້ານໃຜຢ່າງຮຸນແຮງ ແລະໂດຍວິທີໃດ?
3 ເນື່ອງຈາກພະອົງເບິ່ງເຫັນຈາກຈຸດທີ່ສູງໃນສະຫວັນພະເຢໂຫວາຈຶ່ງພັນລະນາໃຫ້ເຮົາເຫັນສະພາບການຂອງໂລກໄດ້ຢ່າງຊັດເຈນ. ພະອົງໄດ້ໃຫ້ອັກຄະສາວົກໂຢຮັນເຫັນນິມິດເຊິ່ງພັນລະນາເຖິງຊາຕານວ່າເປັນ “ມັງກອນໃຫຍ່ສີແດງ.” ມັນພ້ອມຈະສວບແລະກືນກິນລາຊະອານາຈັກເມຊີຂອງພະເຈົ້າທັນທີທີ່ລາຊະອານາຈັກນັ້ນກຳເນີດຂຶ້ນໃນສະຫວັນເມື່ອປີ 1914. ເມື່ອເຮັດບໍ່ສຳເລັດ ຊາຕານຈຶ່ງຫັນມາຫນ່ຳໂຈມຕີຕົວແທນຂອງລາຊະອານາຈັກທີ່ຢູ່ເທິງແຜ່ນດິນໂລກນີ້ຢ່າງຮຸນແຮງ. (ຄຳປາກົດ 12:3, 4, 13, 17) ຊາຕານເຮັດສົງຄາມນີ້ຢ່າງໃດ? ກໍໂດຍທາງມະນຸດທີ່ເປັນຕົວແທນຂອງມັນ.
4. ໃຜເປັນບໍ່ເກີດແຫ່ງອຳນາດຂອງລັດຖະບານມະນຸດ ແລະເຮົາຮູ້ໄດ້ຢ່າງໃດ?
4 ຕໍ່ຈາກນັ້ນໂຢຮັນໄດ້ເຫັນສັດຮ້າຍທີ່ມີເຈັດຫົວແລະສິບເຂົາ ເຊິ່ງເປັນສັດຮ້າຍທີ່ມີອຳນາດ “ເທິງທຸກຕະກູນແລະທຸກຊາດແລະທຸກພາສາແລະທຸກປະເທດ.” ສັດຮ້າຍນັ້ນເປັນຕົວແທນຂອງລະບົບການເມືອງທັງສິ້ນໃນໂລກ. ໂຢຮັນໄດ້ຮັບການບອກວ່າ “ມັງກອນນັ້ນ [ຊາຕານພະຍາມານ] ໄດ້ປະທານອຳນາດແລະພະທີ່ນັ່ງແຫ່ງຕົນໃຫ້ແກ່ສັດຮ້າຍນັ້ນ.” (ຄຳປາກົດ 13:1, 2, 7) ແມ່ນແລ້ວ ຊາຕານເປັນບໍ່ເກີດແຫ່ງພະລັງແລະອຳນາດຂອງລັດຖະບານມະນຸດ. ສະນັ້ນ ດັ່ງທີ່ອັກຄະສາວົກໂປໂລໄດ້ບັນທຶກໄວ້ “ຜູ້ຄຸ້ມຄອງທັງຫຼາຍ” ຫຼືຜູ້ປົກຄອງໂລກຕົວຈິງແມ່ນ “ວິນຍານອັນຊົ່ວທີ່ຢູ່ໃນຟ້າອາກາດ” ເຊິ່ງຄວບຄຸມລັດຖະບານມະນຸດ. ທຸກຄົນທີ່ຢາກນະມັດສະການພະເຢໂຫວາຈຳເປັນຕ້ອງເຂົ້າໃຈຄວາມໝາຍຂອງເລື່ອງນັ້ນຢ່າງລະອຽດ.—ລືກາ 4:5, 6.
5. ເວລານີ້ຜູ້ປົກຄອງຝ່າຍບ້ານເມືອງກຳລັງຖືກທ້ອນໂຮມໄປສູ່ເຫດການຫຍັງ?
5 ເຖິງແມ່ນວ່າ ຜູ້ປົກຄອງຝ່າຍບ້ານເມືອງຫຼາຍຄົນອ້າງວ່ານັບຖືສາສະໜາ ແຕ່ກໍບໍ່ມີຊາດໃດຍອມຢູ່ໃຕ້ການຊີ້ນຳຂອງພະເຢໂຫວາຫຼືພະເຍຊູຄລິດກະສັດທີ່ໄດ້ຮັບການແຕ່ງຕັ້ງຂອງພະເຈົ້າ. ພວກເຂົາເຈົ້າທຸກຄົນພະຍາຍາມຕໍ່ສູ້ຢ່າງດຸເດືອດເພື່ອຍຶດອຳນາດຂອງຕົນໄວ້. ປັດຈຸບັນນີ້ ຕາມທີ່ສະແດງໃຫ້ເຫັນໃນຂໍ້ຄວາມທີ່ບັນທຶກໄວ້ໃນພະທຳຄຳປາກົດ ການກ່າວດົນໃຈຫຼື ‘ການສຳຄັນທີ່ຜີຮ້າຍກະທຳ’ ກຳລັງທ້ອນໂຮມເອົາເຫຼົ່າຜູ້ປົກຄອງຂອງໂລກໄປສູ່ “ການເສິກໃນວັນອັນໃຫຍ່ຂອງພະເຈົ້າຜູ້ມີລິດເດດອັນໃຫຍ່ທີ່ສຸດ” ໃນສົງຄາມອະລະມະເຄໂດນ.—ຄຳປາກົດ 16:13, 14, 16; 19:17-19.
6. ເປັນຫຍັງຈຶ່ງຕ້ອງລະວັງເພື່ອຈະບໍ່ຖືກຊັກນຳໃຫ້ເຂົ້າຂ້າງລະບົບຂອງຊາຕານ?
6 ໃນແຕ່ລະມື້ ຊີວິດຂອງຄົນເຮົາໄດ້ຮັບຜົນກະທົບຈາກຄວາມຂັດແຍ່ງທາງດ້ານການເມືອງ, ທາງສັງຄົມ, ທາງເສດຖະກິດ, ແລະທາງສາສະໜາເຊິ່ງເຮັດໃຫ້ຄອບຄົວມະນຸດແຕກແຍກກັນ. ໃນຄວາມຂັດແຍ່ງເຫຼົ່ານີ້ ເປັນເລື່ອງທຳມະດາທີ່ຜູ້ຄົນມັກຈະເຂົ້າຂ້າງເຊື້ອຊາດ, ຊົນເຜົ່າ, ກຸ່ມພາສາຫຼືຊົນຊັ້ນທາງສັງຄົມຂອງຕົນເອງ ບໍ່ວ່າທາງຄຳເວົ້າກໍຄືທາງການກະທຳ. ແມ່ນແຕ່ຜູ້ຄົນທີ່ບໍ່ໄດ້ເຂົ້າໄປພົວພັນກັບຄວາມຂັດແຍ່ງໂດຍກົງ ເຂົາເຈົ້າກໍມັກຈະນິຍົມຝ່າຍໃດຝ່າຍໜຶ່ງສະເພາະ. ບໍ່ວ່າເຂົາເຈົ້າຈະເຫັນດີກັບບຸກຄົນຫຼືຫຼັກການໃດກໍຕາມ ໃນຕົວຈິງແລ້ວເຂົາເຈົ້າກຳລັງເຂົ້າຂ້າງຜູ້ໃດຢູ່? ຄຳພີໄບເບິນບອກໄວ້ຢ່າງຊັດເຈນວ່າ “ມະນຸດສະໂລກທັງສິ້ນນອນຢູ່ໃນຜູ້ຮ້າຍນັ້ນ.” (1 ໂຢຮັນ 5:19) ຫາກເປັນເຊັ່ນນັ້ນ ເຮົາຈະຫຼີກລ້ຽງເພື່ອຈະບໍ່ຖືກຊັກນຳໃຫ້ໄປຜິດທາງພ້ອມກັບຄົນອື່ນໆໄດ້ຢ່າງໃດ? ໂດຍທີ່ເຮົາໃຫ້ການສະໜັບສະຫນູນຢ່າງເຕັມທີຕໍ່ລາຊະອານາຈັກຂອງພະເຈົ້າແລະໂດຍການຮັກສາຕົວເປັນກາງຢ່າງແທ້ຈິງຕໍ່ເລື່ອງຄວາມຂັດແຍ່ງຂອງໂລກນີ້ເທົ່ານັ້ນ.—ໂຢຮັນ 17:15, 16.
ກົນອຸບາຍທີ່ເລິກແລບແນບນຽນຂອງຜູ້ຊົ່ວຮ້າຍ
7. ຄວາມສະຫຼາດແກມໂກງຂອງຊາຕານສະແດງອອກໃຫ້ເຫັນໃນການໃຊ້ສາສະໜາປອມຢ່າງໃດ?
7 ທຸກຍຸກທຸກສະໄໝໃນປະຫວັດສາດ ຊາຕານໄດ້ໃຊ້ການຂົ່ມເຫງທັງທາງກາຍແລະທາງວາຈາເພື່ອເຮັດໃຫ້ມະນຸດເຮົາປະຖິ້ມການນະມັດສະການແທ້. ນອກຈາກນັ້ນ ມັນໃຊ້ວິທີການທີ່ສະຫຼາດແກມໂກງກວ່າເກົ່າອີກ ນັ້ນແມ່ນກົນອຸບາຍທີ່ເລິກແລບແນບນຽນ. ມັນໄດ້ກັກຂັງມະນຸດຊາດສ່ວນຫຼາຍໄວ້ໃນຄວາມມືດແບບຫຼອກລວງໂດຍທາງສາສະໜາປອມ ເຊິ່ງເຮັດໃຫ້ເຂົາເຈົ້າຄິດວ່າຕົນເອງກຳລັງຮັບໃຊ້ພະເຈົ້າ. ເມື່ອຂາດຄວາມຮູ້ທີ່ຖ້ອງແທ້ກ່ຽວກັບພະເຈົ້າແລະບໍ່ມີຄວາມຮັກຕໍ່ຄວາມຈິງ ເຂົາເຈົ້າອາດຈະຖືກດຶງດູດໂດຍກິດປະຕິບັດທາງສາສະໜາທີ່ເລິກລັບຕື່ນເຕັ້ນຫຼືປະທັບໃຈໃນການອັດສະຈັນຕ່າງໆ. (2 ເທຊະໂລນີກ 2:9, 10) ແຕ່ເຮົາໄດ້ຮັບຄຳເຕືອນວ່າ ແມ່ນແຕ່ຄົນທີ່ເຄີຍຮ່ວມໃນການນະມັດສະການແທ້ “ຈະມີຜູ້ລາງຄົນທີ່ຈະກະບົດຈາກຄວາມເຊື່ອ . . . ຈະຟັງວິນຍານທີ່ລໍ້ລວງແລະຄຳສອນແຫ່ງຜີຮ້າຍທັງຫຼາຍ.” (1 ຕີໂມເຕ 4:1) ສິ່ງນັ້ນຈະເກີດຂຶ້ນໄດ້ຢ່າງໃດ?
8. ເຖິງແມ່ນວ່າເຮົາກຳລັງນະມັດສະການພະເຢໂຫວາຢູ່ ຊາຕານຍັງສາມາດຫຼອກລວງເຮົາໃຫ້ຫັນເຂົ້າຫາສາສະໜາປອມໄດ້ຢ່າງໃດ?
8 ພະຍາມານສວຍໂອກາດຈາກຄວາມອ່ອນແອຂອງເຮົາໄດ້ຢ່າງເລິກແລບແນບນຽນ. ການຢ້ານມະນຸດຍັງຖ່ວງດຶງເຮົາໄວ້ບໍ? ຖ້າເປັນເຊັ່ນນັ້ນ ເຮົາອາດຍອມຈຳນົນຕໍ່ຄວາມກົດດັນຈາກພີ່ນ້ອງຫຼືເພື່ອນບ້ານທີ່ຕ້ອງການໃຫ້ເຮົາເຂົ້າຮ່ວມໃນກິດປະຕິບັດເຊິ່ງມີຕົ້ນກຳເນີດມາຈາກສາສະໜາປອມ. ເຮົາເປັນຄົນອວດອົ່ງບໍ? ຖ້າແມ່ນ ເຮົາອາດຈະຂຸ່ນເຄືອງໃຈເມື່ອໄດ້ຮັບຄຳແນະນຳ ຫຼືເມື່ອຄົນອື່ນໆບໍ່ຍອມຮັບຄວາມຄິດເຫັນທີ່ເຮົາສະເໜີກໍໄດ້. (ສຸພາສິດ 15:10; 29:25; 1 ຕີໂມເຕ 6:3, 4) ແທນທີ່ຈະປ່ຽນແປງທັດສະນະຂອງເຮົາໃຫ້ກົງກັບຕົວຢ່າງຂອງພະຄລິດ ເຮົາອາດຈະອຽງເອນໄປທາງຜູ້ທີ່ ‘ເວົ້າສິ່ງທີ່ຫູຄັນຂອງເຮົາມັກຟັງ’ ໂດຍກ່າວວ່າ ພຽງແຕ່ອ່ານຄຳພີໄບເບິນແລະດຳເນີນຊີວິດໃຫ້ດີກໍພໍແລ້ວ. (2 ຕີໂມເຕ 4:3, ທ.ປ.) ບໍ່ວ່າເຮົາຈະຮ່ວມຢູ່ໃນກຸ່ມສາສະໜາອື່ນແທ້ໆຫຼືຍຶດໝັ້ນກັບສາສະໜາຂອງຕົນເອງ ຊາຕານບໍ່ໄດ້ຖືວ່າເປັນເລື່ອງສຳຄັນ ຂໍແຕ່ວ່າເຮົາບໍ່ໄດ້ນະມັດສະການພະເຢໂຫວາໃນວິທີທີ່ພະເຈົ້າຊີ້ນຳໂດຍທາງພະຄຳແລະອົງການຂອງພະອົງມັນກໍພໍໃຈແລ້ວ.
9. ຊາຕານໃຊ້ເລື່ອງເພດສຳພັນຢ່າງມີເລ່ຫຼ່ຽມເພື່ອເຮັດໃຫ້ເປົ້າໝາຍຂອງມັນສຳເລັດຢ່າງໃດ?
9 ຊາຕານຍັງໃຊ້ເລ່ກົນເພື່ອດຶງດູດຄົນເຮົາໃຫ້ສະໜອງຄວາມປາຖະໜາຕາມທຳມະຊາດດ້ວຍວິທີທີ່ຜິດ. ມັນເຮັດເຊັ່ນນັ້ນກັບຄວາມປາຖະໜາທີ່ຈະມີເພດສຳພັນ. ໂດຍປະຕິເສດຫຼັກສິນລະທຳຂອງຄຳພີໄບເບິນ ຫຼາຍໆຄົນໃນໂລກນີ້ຖືວ່າເພດສຳພັນລະຫວ່າງຄົນທີ່ຍັງບໍ່ທັນແຕ່ງດອງກັນນັ້ນເປັນຄວາມເພີດເພີນທີ່ບໍ່ຜິດ ຫຼືເປັນວິທີທີ່ພິສູດວ່າເຂົາເຈົ້າເປັນຜູ້ໃຫຍ່ແລ້ວ. ສ່ວນຄົນເຫຼົ່ານັ້ນທີ່ແຕ່ງດອງແລ້ວເດ? ຫຼາຍຄົນຫຼິ້ນຊູ້ ແລະເຖິງວ່າບໍ່ມີການນອກໃຈກັນກໍຕາມ ຄົນຈຳນວນຫຼາຍກໍຍັງຫາທາງປະຮ້າງຫຼືແຍກກັນເພື່ອທີ່ເຂົາເຈົ້າຈະໄປຢູ່ກິນກັບຜູ້ໃໝ່ໄດ້. ດ້ວຍວິທີການທີ່ເລິກແລບແນບນຽນ ຊາຕານໄດ້ມຸ່ງດຶງດູດຜູ້ຄົນໃຫ້ໃຊ້ຊີວິດຢ່າງເພີດເພີນໃນຕອນນີ້ ໂດຍເຮັດໃຫ້ເຂົາເຈົ້າບໍ່ເອົາຫົວຊາຕໍ່ຜົນກະທົບໄລຍະຍາວ ເຊິ່ງບໍ່ພຽງແຕ່ຈະເກີດກັບເຂົາເຈົ້າເອງແລະຄົນອ້ອມຂ້າງເທົ່ານັ້ນ ແຕ່ໂດຍສະເພາະແລ້ວຍັງຈະກະທົບໃສ່ສາຍສຳພັນລະຫວ່າງເຂົາເຈົ້າກັບພະເຢໂຫວາແລະພະບຸດຂອງພະອົງນຳອີກ.—1 ໂກລິນໂທ 6:9, 10; ຄາລາຊີ 6:7, 8.
10. ຊາຕານພະຍາຍາມຈະປ່ຽນທັດສະນະທີ່ເຮົາມີຕໍ່ເລື່ອງການຜິດສິນລະທຳແລະຄວາມຮຸນແຮງໂດຍວິທີໃດ?
10 ຄວາມປາຖະໜາຕາມທຳມະຊາດອີກຢ່າງໜຶ່ງແມ່ນການພັກຜ່ອນຢ່ອນໃຈ. ເມື່ອການພັກຜ່ອນຢ່ອນໃຈນັ້ນເປັນສິ່ງທີ່ດີງາມກໍຍ່ອມຈະໃຫ້ຄວາມສົດຊື່ນທາງຈິດໃຈ, ທາງກາຍ, ແລະທາງອາລົມ. ເຮົາຈະເຮັດຢ່າງໃດເມື່ອຊາຕານສວຍໃຊ້ຍາມພັກຜ່ອນຢ່ອນໃຈຢ່າງສະຫຼາດແກມໂກງເພື່ອພະຍາຍາມທີ່ຈະປ່ຽນຄວາມນຶກຄິດຂອງເຮົາໃຫ້ຕ່າງຈາກຄວາມນຶກຄິດຂອງພະເຈົ້າ? ຕົວຢ່າງເຊັ່ນ ເຮົາຮູ້ວ່າພະເຢໂຫວາກຽດຊັງການຜິດສິນລະທຳທາງເພດແລະຄວາມຮຸນແຮງ. ເມື່ອມີຮູບເງົາ, ລາຍການໂທລະພາບ, ຫຼືການສະແດງເຊິ່ງມີການເນັ້ນເຖິງເລື່ອງເຫຼົ່ານັ້ນ ເຮົາຍັງຈະນັ່ງເບິ່ງຕໍ່ໄປບໍ? ຂໍໃຫ້ເຮົາຕື່ນຕົວຢູ່ສະເໝີວ່າ ຊາຕານແຮ່ງເຮັດໃຫ້ສິ່ງເຫຼົ່ານັ້ນເສື່ອມຊາມລົງຂະນະທີ່ເວລາແຫ່ງການກັກຂັງຂອງມັນໃກ້ເຂົ້າມາ ເນື່ອງຈາກ “ຄົນຊົ່ວແລະຄົນລໍ້ລວງທັງຫຼາຍຈະທຳຊົ່ວຮ້າຍມາກກວ່າຂຶ້ນໄປ. ພວມລໍ້ລວງຄົນອື່ນໃຫ້ຫຼົງ ແລະເຂົາເອງຈະຖືກລໍ້ລວງດ້ວຍ.” (2 ຕີໂມເຕ 3:13; ຄຳປາກົດ 20:1-3) ດັ່ງນັ້ນ ເຮົາຕ້ອງລະວັງແຜນການຂອງຊາຕານຢູ່ສະເໝີ.—ຕົ້ນເດີມ 6:13; ຄຳເພງ 11:5; ໂລມ 1:24-32.
11. ຄົນທີ່ຮູ້ຄວາມຈິງເລື່ອງລັດທິພວກຜີປີສາດແລ້ວກໍອາດຕົກຖືກບ້ວງແຮ້ວໄດ້ຢ່າງໃດຫາກເຂົາເຈົ້າບໍ່ລະວັງຕົວ?
11 ເຮົາຍັງຮູ້ວ່າຜູ້ທີ່ເຂົ້າໄປກ່ຽວຂ້ອງກັບພວກລັດທິຜີປີສາດໃນຮູບແບບໃດກໍຕາມ ເຊັ່ນ ການທຳນາຍອະນາຄົດ, ການໃຊ້ເວດມົນຄາຖາ, ຫຼືການພະຍາຍາມຕິດຕໍ່ກັບຄົນຕາຍ ລ້ວນແຕ່ເປັນຜູ້ທີ່ພະເຢໂຫວາໜ່າຍແໜງ. (ພະບັນຍັດ 18:10-12) ເມື່ອຄຳນຶງເຖິງເລື່ອງນີ້ ເຮົາຄົງຈະບໍ່ຢາກປຶກສາກັບຄົນຊົງ ແລະແນ່ນອນຈະບໍ່ເຊີນເຂົາເຈົ້າເຂົ້າມາເຮັດສິ່ງທີ່ກ່ຽວຂ້ອງກັບພວກຜີປີສາດໃນເຮືອນຂອງເຮົາ. ແລ້ວຖ້າຫາກສິ່ງເຫຼົ່ານັ້ນມາປາກົດທາງໂທລະພາບຫຼືທາງອິນເຕີເນັດ ເຮົາຈະຮັບຊົມຮັບຟັງມັນບໍ? ເຖິງແມ່ນວ່າເຮົາຈະບໍ່ຍອມຮັບການປິ່ນປົວຈາກໝໍຜີ ແຕ່ຈະເອົາສາຍສິນມາມັດແຂນຂອງລູກທີ່ຫາກໍເກີດໂດຍຄິດວ່າສິ່ງນັ້ນຈະຄຸ້ມຄອງເດັກນ້ອຍໃຫ້ພົ້ນຈາກອັນຕະລາຍບໍ? ເມື່ອຮູ້ວ່າຄຳພີໄບເບິນຕຳໜິການເສກເວດມົນຄາຖາໃສ່ຄົນອື່ນ ແລ້ວເຮົາຈະຍອມໃຫ້ນັກສະກົດຈິດຄວບຄຸມຈິດໃຈຂອງເຮົາບໍ?—ຄາລາຊີ 5:19-21.
12. (ກ) ມີການໃຊ້ດົນຕີຢ່າງໃດເພື່ອເຮັດໃຫ້ເຮົາຮັບເອົາແນວຄິດທີ່ເຮົາຮູ້ວ່າຜິດ? (ຂ) ການແຕ່ງກາຍ, ຊົງຜົມ, ຫຼືວາດການເວົ້າອາດບົ່ງບອກຄວາມນິຍົມຊົມຊອບຂອງຄົນເຫຼົ່ານັ້ນເຊິ່ງດຳເນີນຊີວິດໃນແບບທີ່ພະເຢໂຫວາບໍ່ພໍໃຈຢ່າງໃດ? (ຄ) ເຮົາຕ້ອງເຮັດຫຍັງຖ້າບໍ່ຢາກຕົກເປັນເຫຍື່ອຂອງກົນອຸບາຍທີ່ເລິກແລບແນບນຽນຂອງຊາຕານ?
12 ຄຳພີໄບເບິນບອກວ່າ ການຜິດປະເວນີແລະການລາມົກຕ່າງໆບໍ່ຄວນມີການກ່າວເຖິງ (ດ້ວຍເຈຕະນາທີ່ບໍ່ສະອາດ) ໃນທ່າມກາງພວກເຮົາ. (ເອເຟດ 5:3-5) ຈະວ່າຢ່າງໃດຫາກເນື້ອຄວາມແນວນັ້ນປະກອບກັບດົນຕີທີ່ມີທ່ວງທຳນອງມ່ວນຊື່ນ, ຈັງຫວະທີ່ຈັບໃຈ, ຫຼືຈັງຫວະທີ່ກະຕຸ້ນໃຫ້ໃຈຂຶ້ນເດ? ເຮົາຈະເລີ່ມຮ້ອງຕາມເນື້ອເພງທີ່ຍົກຍ້ອງເລື່ອງເພດສຳພັນນອກສາຍສົມລົດ, ການໃຊ້ຢາເສບຕິດເພື່ອຄວາມເພີດເພີນ, ຫຼືການກະທຳທີ່ຜິດບາບຢ່າງອື່ນບໍ? ຫຼືທັງໆທີ່ເຮົາຮູ້ວ່າບໍ່ຄວນຈະຮຽນເອົາແບບຢ່າງການດຳລົງຊີວິດຂອງຄົນເຊິ່ງໝົກມຸ່ນກັບສິ່ງເຫຼົ່ານັ້ນ ແຕ່ເຮົາຊ້ຳພັດມັກຈະສະແດງຕົວວ່າເປັນພວກດຽວກັບເຂົາເຈົ້າໂດຍການຮຽນແບບການແຕ່ງກາຍ, ຊົງຜົມ, ຫຼືວາດການເວົ້າຂອງເຂົາເຈົ້າບໍ? ວິທີການທີ່ຊາຕານໃຊ້ຫຼອກລວງມະນຸດໃຫ້ເຮັດຕາມແນວຄິດອັນຊົ່ວຊ້າຂອງມັນນັ້ນຈັ່ງແມ່ນເລິກແລບແທ້ໆ! (2 ໂກລິນໂທ 4:3, 4) ເພື່ອຈະບໍ່ຕົກເປັນເຫຍື່ອຂອງກົນອຸບາຍທີ່ເລິກແລບແນບນຽນຂອງມັນ ເຮົາຕ້ອງຫຼົບຫຼີກເພື່ອຈະບໍ່ຖືກພັດລອຍໄປມາຕາມກະແສແນວຄິດແລະການກະທຳຂອງໂລກ. ເຮົາຈຳຕ້ອງສຳນຶກຕົວຢູ່ສະເໝີວ່າໃຜແມ່ນ “ຜູ້ຄຸ້ມຄອງທັງຫຼາຍແຫ່ງທີ່ມືດນີ້” ແລະຕ້ອງປ້ຳສູ້ກັບອຳນາດຈູງໃຈຂອງມັນຢ່າງຈິງຈັງ.—1 ເປໂຕ 5:8.
ກຽມພ້ອມເພື່ອເປັນຜູ້ຊະນະ
13. ເປັນໄປໄດ້ຢ່າງໃດທີ່ໃຜກໍຕາມເຊິ່ງເປັນຄົນບໍ່ສົມບູນຈະຊະນະໂລກທີ່ຊາຕານປົກຄອງຢູ່?
13 ກ່ອນພະເຍຊູສິ້ນຊີວິດ ພະອົງບອກເຫຼົ່າອັກຄະສາວົກວ່າ “ຈົ່ງມີໃຈກ້າ ເຮົາໄດ້ແພ້ [ຊະນະ] ໂລກແລ້ວ.” (ໂຢຮັນ 16:33) ເຂົາເຈົ້າກໍຊະນະໂລກໄດ້ຄືກັນ. ປະມານ 60 ປີຕໍ່ມາ ອັກຄະສາວົກໂຢຮັນຂຽນວ່າ “ຜູ້ໃດໄດ້ແພ້ [ຊະນະ] ໂລກ ເທົ່າເວັ້ນໄວ້ຜູ້ນັ້ນທີ່ເຊື່ອວ່າພະເຍຊູເປັນພະບຸດແຫ່ງພະເຈົ້າ?” (1 ໂຢຮັນ 5:5) ຄວາມເຊື່ອເຊັ່ນນີ້ສະແດງອອກໂດຍການເຊື່ອຟັງຄຳສັ່ງຂອງພະເຍຊູແລະໄວ້ວາງໃຈໃນພະຄຳຂອງພະເຈົ້າ ດັ່ງທີ່ພະເຍຊູເຄີຍກະທຳ. ຍັງມີຂໍ້ຮຽກຮ້ອງອື່ນອີກບໍ? ເຮົາຄວນຕິດສະໜິດກັບປະຊາຄົມເຊິ່ງພະອົງເປັນປະມຸກ. ເມື່ອເຮັດຜິດ ເຮົາຕ້ອງປະໃຈເກົ່າເອົາໃຈໃໝ່ຢ່າງແທ້ຈິງແລະສະແຫວງຫາການໃຫ້ອະໄພໂດຍອາໄສເຄື່ອງບູຊາຂອງພະເຍຊູ. ໂດຍວິທີນີ້ ເຖິງແມ່ນວ່າຈະເປັນຄົນບໍ່ສົມບູນແລະເຮັດຜິດ ເຮົາກໍເປັນຜູ້ຊະນະໄດ້ຄືກັນ.—ຄຳເພງ 130:3, 4.
14. ເຊີນອ່ານເອເຟດ 6:13-17 ແລ້ວໃຊ້ຄຳຖາມແລະຂໍ້ພະຄຳພີທີ່ກຽມໄວ້ໃນວັກນີ້ເພື່ອເປັນພື້ນຖານໃນການພິຈາລະນາເຖິງປະໂຫຍດທີ່ຈະໄດ້ຮັບຈາກເຄື່ອງອາວຸດຝ່າຍວິນຍານແຕ່ລະຢ່າງ.
14 ເພື່ອຈະບັນລຸຜົນສຳເລັດ ເຮົາຕ້ອງສຸບ “ເຄື່ອງອາວຸດຂອງພະເຈົ້າທັງສິ້ນ” ບໍ່ຄວນປະສ່ວນໃດສ່ວນໜຶ່ງເລີຍ. ຂໍໃຫ້ເປີດຄຳພີໄບເບິນຂອງຕົວເອງທີ່ເອເຟດ 6:13-17 ແລະອ່ານຄຳອະທິບາຍກ່ຽວກັບເຄື່ອງອາວຸດນັ້ນ. ໂດຍການຕອບຄຳຖາມທີ່ຢູ່ທາງລຸ່ມນີ້ ລອງພິຈາລະນາເບິ່ງວ່າເຮົາຈະໄດ້ປະໂຫຍດຢ່າງໃດຈາກເຄື່ອງອາວຸດແຕ່ລະຢ່າງທີ່ປົກປ້ອງຕົວເຮົາ.
“ເອົາຄວາມຈິງຄາດແອວໄວ້”
ເຖິງແມ່ນວ່າເຮົາອາດຮູ້ຈັກຄວາມຈິງຢູ່ແລ້ວກໍຕາມ ການສຶກສາຢ່າງສະຫມ່ຳສະເໝີ ການຄິດຮ່ຳເພິງເຖິງຄວາມຈິງໃນຄຳພີໄບເບິນ ແລະການເຂົ້າຮ່ວມປະຊຸມຈະປ້ອງກັນເຮົາໄດ້ຢ່າງໃດ? (1 ໂກລິນໂທ 10:12, 13; 2 ໂກລິນໂທ 13:5; ຟີລິບ 4:8, 9)
“ເອົາຄວາມຊອບທຳເປັນເຄື່ອງເຫຼັກອັດປ້ອງເອິກໄວ້”
ມາດຕະຖານແຫ່ງຄວາມຊອບທຳນີ້ແມ່ນຂອງຜູ້ໃດ? (ຄຳປາກົດ 15:3)
ຈົ່ງສະແດງໃຫ້ເຫັນເຖິງການທີ່ບໍ່ຕິດຕາມແນວທາງອັນຊອບທຳຂອງພະເຢໂຫວາຈະເຮັດໃຫ້ເຮົາໄດ້ຮັບຄວາມເສຍຫາຍຝ່າຍວິນຍານ. (ພະບັນຍັດ 7:3, 4; 1 ຊາເມືອນ 15:22, 23)
“ເອົາ . . . ຄຳປະເສີດແຫ່ງຄວາມສຸກສຳລານເປັນເກີບສຸບໃສ່ຕີນ”
ການອອກໄປເວົ້າເຖິງການຈັດຕຽມກ່ຽວກັບສັນຕິສຸກຂອງພະເຈົ້າໃຫ້ຄົນອື່ນໄດ້ຍິນຢ່າງສະຫມ່ຳສະເໝີຈະເປັນການປ້ອງກັນເຮົາຢ່າງໃດ? (ຄຳເພງ 73:2, 3; ໂລມ 10:15; 1 ຕີໂມເຕ 5:13)
“ເອົາຄວາມເຊື່ອເປັນໂລ້”
ຖ້າເຮົາມີຄວາມເຊື່ອທີ່ໝັ້ນຄົງ ເຮົາຈະເຮັດແນວໃດເມື່ອປະເຊີນກັບຄວາມພະຍາຍາມເຊິ່ງມີເປົ້າໝາຍຈະເຮັດໃຫ້ເຮົາສົງໄສຫຼືຢ້ານກົວ? (2 ກະສັດ 6:15-17; 2 ຕີໂມເຕ 1:12)
“ເອົາໝວກເຫຼັກແຫ່ງຄວາມພົ້ນສົບຫົວໄວ້”
ຄວາມຫວັງເລື່ອງຄວາມລອດຈະຊ່ວຍເຮົາໃຫ້ຫຼີກລ້ຽງບ້ວງແຮ້ວທີ່ມາຈາກການເປັນຫ່ວງຫຼາຍເກີນໄປໃນເລື່ອງຊັບສົມບັດຝ່າຍວັດຖຸໄດ້ຢ່າງໃດ? (1 ຕີໂມເຕ 6:7-10, 19)
“ຈົ່ງຖືດາບຂອງພະວິນຍານ”
ເຮົາຄວນຈະເພິ່ງພາສິ່ງໃດສະເໝີເມື່ອຕໍ່ສູ້ກັບການໂຈມຕີຕໍ່ສະພາບຝ່າຍວິນຍານຂອງເຮົາຫຼືຂອງຄົນອື່ນໆ? (ຄຳເພງ 119:98; ສຸພາສິດ 3:5, 6; ມັດທາຍ 4:3, 4)
ແມ່ນຫຍັງອີກທີ່ນັບວ່າສຳຄັນຫຼາຍເພື່ອຈະປະສົບຄວາມສຳເລັດໃນການສູ້ຮົບຝ່າຍວິນຍານ? ຈະເຮັດສິ່ງນັ້ນຈັກເທື່ອ? ເພື່ອຜົນປະໂຫຍດຂອງໃຜ? (ເອເຟດ 6:18, 19)
15. ເຮົາສາມາດບຸກໜ້າໃນການສູ້ຮົບຝ່າຍວິນຍານໄດ້ຢ່າງໃດ?
15 ໃນຖານະທະຫານຂອງພະຄລິດ ເຮົາກໍເປັນສ່ວນໜຶ່ງຂອງກອງທັບໃຫຍ່ໃນການສູ້ຮົບຝ່າຍວິນຍານ. ຖ້າເຮົາຕື່ນຕົວຢູ່ສະເໝີແລະໃຊ້ເຄື່ອງອາວຸດຄົບຊຸດທີ່ມາຈາກພະເຈົ້າໃຫ້ເປັນປະໂຫຍດ ເຮົາຈະບໍ່ເປັນຜູ້ທີ່ເສຍຊີວິດໃນການສູ້ຮົບນີ້. ແທນທີ່ຈະເປັນເຊັ່ນນັ້ນ ເຮົາຈະເປັນສ່ວນເສີມກຳລັງໃຫ້ກັບເພື່ອນຮ່ວມຮັບໃຊ້ພະເຈົ້າ. ເຮົາກຽມພ້ອມແລະຢາກຈະເປັນຝ່າຍບຸກໜ້າໃນການເຜີຍແຜ່ຂ່າວດີເລື່ອງລາຊະອານາຈັກເມຊີຂອງພະເຈົ້າ ເຊິ່ງເປັນລັດຖະບານຝ່າຍສະຫວັນທີ່ຊາຕານຕໍ່ຕ້ານຢ່າງຮຸນແຮງ.
ການພິຈາລະນາທົບທວນ
• ເປັນຫຍັງຜູ້ນະມັດສະການພະເຢໂຫວາຈຶ່ງຮັກສາຄວາມເປັນກາງຢ່າງເຄັ່ງຄັດໃນການຂັດແຍ່ງຂອງໂລກ?
• ເພື່ອເຮັດໃຫ້ຄລິດສະຕຽນເສຍຫາຍທາງຝ່າຍວິນຍານ ຊາຕານໃຊ້ກົນອຸບາຍທີ່ເລິກແລບແນບນຽນແບບໃດແດ່?
• ເຄື່ອງອາວຸດຝ່າຍວິນຍານທີ່ພະເຈົ້າຈັດຕຽມໄວ້ ຈະປ້ອງກັນເຮົາຢ່າງໃດໃນການສູ້ຮົບຝ່າຍວິນຍານ?
[ຮູບພາບໜ້າ 76]
ຊາດຕ່າງໆພວມຖືກທ້ອນໂຮມໄປສູ່ສົງຄາມອະລະມະເຄໂດນ