ບົດສິບຫົກ
“ຈົ່ງຮັກກັນແລະກັນເປັນອັນມາກ”
1. ຄົນໃໝ່ໆ ທີ່ມາການປະຊຸມຂອງພະຍານພະເຢໂຫວາມັກຈະປະທັບໃຈໃນເລື່ອງໃດ?
ຄົນທີ່ມາຮ່ວມການປະຊຸມຂອງພະຍານພະເຢໂຫວາເທື່ອທຳອິດ ມັກຈະປະທັບໃຈໃນຄວາມຮັກທີ່ສະແດງອອກຕໍ່ກັນແລະກັນຢູ່ທີ່ນັ້ນ. ເຂົາເຈົ້າສັງເກດເຫັນຄວາມຮັກນັ້ນໄດ້ຈາກການຕ້ອນຮັບທີ່ເປັນກັນເອງແລະດ້ວຍມິດຕະພາບອັນອົບອຸ່ນ. ຜູ້ທີ່ມາການປະຊຸມພາກຂອງເຮົາກໍສັງເກດເຫັນຄວາມຮັກແບບນີ້ເຊັ່ນກັນ. ນັກຂ່າວຄົນໜຶ່ງຂຽນກ່ຽວກັບສະພາບການຂອງການປະຊຸມພາກວ່າ ‘ບໍ່ມີໃຜກິນເຫຼົ້າເມົາຢາ. ບໍ່ມີການແຜດສຽງຮ້ອງ. ບໍ່ມີການບຽດສຽດ. ບໍ່ມີການປ້ອຍດ່າ. ບໍ່ມີການເວົ້າຕະຫຼົກລາມົກຫຼືການໃຊ້ພາສາທີ່ຫຍາບໆ. ບໍ່ມີຄວັນຢາສູບ. ບໍ່ມີການລັກ. ບໍ່ມີໃຜຖິ້ມຂີ້ເຫຍື້ອຊະຊາຍ. ມັນເປັນເລື່ອງຜິດປົກກະຕິແທ້ໆ.’ ທັງໝົດນີ້ເປັນຫຼັກຖານສະແດງເຖິງຄວາມຮັກໃນແບບທີ່ “ບໍ່ກະທຳເປັນທີ່ໜ້າລະອາຍ ບໍ່ຊອກຫາສ່ວນຂອງຕົນເອງ.”—1 ໂກລິນໂທ 13:4-8.
2. (ກ) ໃນທີ່ສຸດ ສິ່ງໃດຄວນເປັນຫຼັກຖານໃນການສະແດງຄວາມຮັກຂອງເຮົາ? (ຂ) ໃນການຮຽນແບບພະເຍຊູ ເຮົາຄວນຈະປູກຝັງຄວາມຮັກແບບໃດ?
2 ຄວາມຮັກແບບພີ່ນ້ອງເປັນເຄື່ອງໝາຍລະບຸຕົວຄລິດສະຕຽນແທ້. (ໂຢຮັນ 13:35) ເມື່ອເຮົາເຕີບໂຕທາງຝ່າຍວິນຍານ ເຮົາກໍຮຽນຮູ້ທີ່ຈະສະແດງຄວາມຮັກຢ່າງບໍລິບູນຫຼາຍຂຶ້ນ. ອັກຄະສາວົກໂປໂລໄດ້ອະທິດຖານເພື່ອຄວາມຮັກຂອງເພື່ອນຄລິດສະຕຽນຈະ “ຈຳເລີນຂຶ້ນມາກຕໍ່ໄປ.” (ຟີລິບ 1:9) ອັກຄະສາວົກໂຢຮັນສະແດງໃຫ້ເຫັນວ່າຄວາມຮັກຂອງເຮົາຄວນເປັນໃນລັກສະນະທີ່ພ້ອມຈະເສຍສະລະຕົນເອງ ເຊິ່ງລາວຂຽນວ່າ “ດ້ວຍຂໍ້ນີ້ ພວກເຮົາຮູ້ຈັກຄວາມຮັກຄືວ່າ ເພາະ [ພະບຸດຂອງພະເຈົ້າ] ໄດ້ຍອມປົງຊີວິດແຫ່ງພະອົງລົງແທນເຮົາທັງຫຼາຍ ແລະເຮົາທັງຫຼາຍຕ້ອງປົງຊີວິດຂອງເຮົາລົງແທນພວກພີ່ນ້ອງ.” (1 ໂຢຮັນ 3:16; ໂຢຮັນ 15:12, 13) ເຮົາຈະສະລະຊີວິດເພື່ອພີ່ນ້ອງຂອງເຮົາແທ້ໆ ບໍ? ສະຖານະການສ່ວນຫຼາຍບໍ່ໄດ້ຮຽກຮ້ອງໃຫ້ເຮັດແບບນັ້ນ ແຕ່ເຮົາພະຍາຍາມເຖິງຂັ້ນໃດເພື່ອຈະຊ່ວຍເຫຼືອເຂົາເຈົ້າໃນຕອນນີ້ ເຖິງແມ່ນວ່າສະພາບການຂອງເຮົາອາດບໍ່ສະດວກປານໃດກໍຕາມ?
3. (ກ) ເຮົາອາດສະແດງຄວາມຮັກຂອງເຮົາຢ່າງບໍລິບູນຂຶ້ນໂດຍວິທີໃດ? (ຂ) ເປັນຫຍັງຈຶ່ງສຳຄັນທີ່ຈະມີຄວາມຮັກອັນແຮງກ້າຕໍ່ກັນແລະກັນໃນຕອນນີ້?
3 ພ້ອມກັບການກະທຳທີ່ສະທ້ອນເຖິງນ້ຳໃຈເສຍສະລະຕົນເອງ ເຮົາກໍຕ້ອງມີຄວາມຮູ້ສຶກອັນອົບອຸ່ນຢ່າງແທ້ຈິງຕໍ່ພີ່ນ້ອງຂອງເຮົາ. ພະຄຳຂອງພະເຈົ້າແນະນຳເຮົາວ່າ “ຝ່າຍຄວາມຮັກພີ່ນ້ອງນັ້ນ ຈົ່ງຮັກກັນດ້ວຍສຸດໃຈ.” (ໂລມ 12:10) ເຮົາທຸກຄົນອາດຈະຮູ້ສຶກແບບນັ້ນຕໍ່ບາງຄົນ. ເຖິງແນວນັ້ນກໍຕາມ ເຮົາຈະສະແດງຄວາມຮັກແພງເຊັ່ນນັ້ນຕໍ່ຄົນອື່ນໆ ໄດ້ບໍ? ເມື່ອອະວະສານຂອງລະບົບເກົ່ານີ້ພວມຫຍັບໃກ້ເຂົ້າມາ ຈຶ່ງເປັນເລື່ອງສຳຄັນທີ່ພວກເຮົາຈະໃກ້ຊິດກັບເພື່ອນຄລິດສະຕຽນໃຫ້ຫຼາຍຂຶ້ນ. ຄຳພີໄບເບິນກ່າວວ່າ “ທີ່ສຸດແຫ່ງສິ່ງທັງປວງໄດ້ຫຍັບມາໃກ້ແລ້ວ . . . ກ່ອນສັບພະທຸກສິ່ງ ຈົ່ງຮັກກັນແລະກັນເປັນອັນມາກ ເຫດວ່າຄວາມຮັກກໍປົກອັດການຜິດໄວ້ຫຼາຍປະການ.”—1 ເປໂຕ 4:7, 8.
ເມື່ອມີບັນຫາເກີດຂຶ້ນ
4. (ກ) ເປັນຫຍັງບັນຫາຈຶ່ງອາດຈະເກີດຂຶ້ນໄດ້ລະຫວ່າງບັນດາຄລິດສະຕຽນເຊິ່ງຢູ່ໃນປະຊາຄົມດຽວກັນ? (ຂ) ໃນຂະນະທີ່ເຮົາມີທ່າອ່ຽງບໍ່ຢາກເຮັດຕາມຄຳແນະນຳໃນຄຳພີໄບເບິນສະເໝີໄປ ແຕ່ຖ້າເຮົາໃຊ້ຄຳແນະນຳນັ້ນກໍຈະເກີດຜົນດີຢ່າງໃດ?
4 ແນ່ນອນ ຕາບໃດທີ່ເຮົາຍັງເປັນມະນຸດບໍ່ສົມບູນ ບາງຄັ້ງເຮົາອາດຈະເຮັດໃຫ້ຄົນອື່ນຂັດເຄືອງໃຈໄດ້ ແລະພີ່ນ້ອງຂອງເຮົາກໍອາດຈະເຮັດຜິດຕໍ່ເຮົາຫຼາຍຢ່າງຄືກັນ. (1 ໂຢຮັນ 1:8) ຖ້າເຮົາຮູ້ສຶກວ່າຕົວເອງຢູ່ໃນສະພາບການແບບນັ້ນ ເຮົາຈະເຮັດແນວໃດ? ພະຄຳພີມີຄຳແນະນຳສຳລັບເລື່ອງນີ້ ແຕ່ສິ່ງທີ່ແນະນຳໄວ້ນັ້ນພັດອາດບໍ່ກົງກັບສິ່ງທີ່ມະນຸດບໍ່ສົມບູນແບບເຮົາມັກເຮັດ. (ໂລມ 7:21-23) ເຖິງແນວໃດກໍຕາມ ການນຳເອົາຄຳແນະນຳໃນຄຳພີໄບເບິນໄປໃຊ້ຢ່າງຈິງຈັງ ຈຶ່ງເປັນຫຼັກຖານທີ່ສະແດງວ່າເຮົາປາຖະໜາຢ່າງແທ້ຈິງທີ່ຈະເຮັດໃຫ້ພະເຢໂຫວາພໍໃຈ. ພ້ອມນີ້ ການເຮັດເຊັ່ນນັ້ນກໍຍັງເປັນການພັດທະນາຄວາມຮັກທີ່ເຮົາປະຕິບັດຕໍ່ຄົນອື່ນຕື່ມອີກ.
5. ຖ້າບາງຄົນເຮັດໃຫ້ເຮົາຂັດເຄືອງໃຈ ເປັນຫຍັງເຮົາຈຶ່ງບໍ່ຄວນແກ້ແຄ້ນ?
5 ເມື່ອຮູ້ສຶກເຈັບໃຈ ບາງຄັ້ງຄົນເຮົາຈະຫາທາງແກ້ແຄ້ນຜູ້ທີ່ເຮັດໃຫ້ຂັດເຄືອງໃຈ ແຕ່ວ່າການເຮັດແບບນັ້ນແຮ່ງເຮັດໃຫ້ສະຖານະການຮ້າຍແຮງຂຶ້ນໄປອີກ. ຖ້າຈຳເປັນຕ້ອງຕອບແທນຄືນ ເຮົາຄວນປະເລື່ອງນັ້ນໄວ້ກັບພະເຈົ້າ. (ສຸພາສິດ 24:29; ໂລມ 12:17-21) ຄົນອື່ນອາດພະຍາຍາມຫຼີກລ້ຽງການຕິດຕໍ່ພົວພັນກັບຜູ້ທີ່ເຮັດໃຫ້ຕົນເອງຂັດເຄືອງໃຈ ແຕ່ເຮົາບໍ່ຄວນເຮັດແບບນັ້ນກັບເພື່ອນຜູ້ຮ່ວມນະມັດສະການ ເພາະວ່າການນະມັດສະການຂອງເຮົາຈະໄດ້ຮັບການຍອມຮັບຫຼືບໍ່ນັ້ນ ສ່ວນໜຶ່ງແມ່ນຂຶ້ນຢູ່ກັບການທີ່ເຮົາຮັກພີ່ນ້ອງນັ້ນເອງ. (1 ໂຢຮັນ 4:20) ດັ່ງນັ້ນ ໂປໂລຈຶ່ງຂຽນວ່າ “ຈົ່ງອົດກັ້ນໄວ້ກັນແລະກັນ ແລະຍົກໂທດໃຫ້ກັນແລະກັນ ຖ້າແມ່ນຜູ້ໃດມີຂໍ້ຄວາມຟ້ອງຕໍ່ຄົນອື່ນ ພະຄລິດ [“ພະເຢໂຫວາ,” ລ.ມ.] ທັງມວນໄດ້ໂຜດຍົກໂທດຂອງທ່ານທັງຫຼາຍຢ່າງໃດ ທ່ານຈົ່ງກະທຳຢ່າງນັ້ນດ້ວຍ.” (ໂກໂລດ 3:13) ເຮົາເຮັດແບບນັ້ນໄດ້ບໍ?
6. (ກ) ເຮົາຄວນໃຫ້ອະໄພພີ່ນ້ອງຂອງເຮົາຈັກເທື່ອ? (ຂ) ຄວາມເຂົ້າໃຈໃນເລື່ອງໃດຈະຊ່ວຍເຮົາໃຫ້ຮັບມືກັບຄວາມຜິດທີ່ຄົນອື່ນເຮັດຕໍ່ເຮົາ?
6 ຈະວ່າແນວໃດຖ້າບາງຄົນເຮັດຜິດຕໍ່ເຮົາຊ້ຳແລ້ວຊ້ຳອີກ ແຕ່ວ່າບໍ່ແມ່ນຄວາມຜິດທີ່ຮ້າຍແຮງຈົນເຖິງຂັ້ນຖືກຕັດອອກຈາກປະຊາຄົມ? ສຳລັບຄວາມຜິດທີ່ບໍ່ຮ້າຍແຮງແບບນັ້ນ ອັກຄະສາວົກເປໂຕແນະນຳວ່າຄວນໃຫ້ອະໄພ “ເຖິງເຈັດເທື່ອ.” ພະເຍຊູແຮ່ງບອກວ່າ “ບໍ່ໃຊ່ເຖິງເຈັດເທື່ອ ແຕ່ວ່າເຖິງເຈັດສິບເທື່ອເຈັດເທື່ອ [“ເຈັດສິບເຈັດເທື່ອ,” ລ.ມ.] ພະເຍຊູເນັ້ນວ່າເຮົາເປັນໜີ້ພະເຈົ້າຈຳນວນນັບບໍ່ຖ້ວນເມື່ອສົມທຽບກັບໜີ້ທີ່ມະນຸດຄົນໃດຄົນໜຶ່ງອາດຈະຕິດຄ້າງເຮົາ. (ມັດທາຍ 18:21-35) ແຕ່ລະມື້ເຮົາເຮັດຜິດຕໍ່ພະເຈົ້າໃນຫຼາຍໆ ທາງ ບາງເທື່ອອາດຈະເປັນການກະທຳທີ່ເຫັນແກ່ຕົວ, ອາດຈະເປັນສິ່ງທີ່ເຮົາເວົ້າຫຼືຄິດ, ຫຼືອາດຈະບໍ່ໄດ້ເຮັດໃນສິ່ງທີ່ເຮົາຄວນເຮັດ ໂດຍບໍ່ຮູ້ສຶກຕົວຊ້ຳວ່າຕົວເອງກຳລັງເຮັດບາບຢູ່. (ໂລມ 3:23) ແນວໃດກໍຕາມ ພະເຢໂຫວາກໍຍັງເມດຕາສົງສານເຮົາຕໍ່ໆ ໄປ. (ຄຳເພງ 103:10-14; 130:3, 4) ດ້ວຍເຫດນັ້ນ ພະອົງຈຶ່ງຮຽກຮ້ອງໃຫ້ເຮົາປະຕິບັດຕໍ່ກັນແລະກັນໃນແບບທີ່ພະອົງປະຕິບັດກັບເຮົາ. (ມັດທາຍ 6:14, 15; ເອເຟດ 4:1-3) ໂດຍການເຮັດແນວນັ້ນ ເຮົາຈະບັນລຸຄວາມຮັກໃນແບບທີ່ “ບໍ່ມັກຈົດຈຳຄວາມຜິດ.”—1 ໂກລິນໂທ 13:4, 5, ທ.ປ.; 1 ເປໂຕ 3:8, 9.
7. ເຮົາຄວນຈະເຮັດແນວໃດຖ້າພີ່ນ້ອງຄຽດໃຫ້ເຮົາ?
7 ອາດຈະມີບາງຄັ້ງຄາວທີ່ເຮົາບໍ່ມີບັນຫາກັບພີ່ນ້ອງ ແຕ່ເຮົາສັງເກດວ່າລາວພັດຮູ້ສຶກຂັດຂ້ອງໃຈຕໍ່ເຮົາ. ເຮົາອາດເລືອກທີ່ຈະ ‘ປົກອັດການຜິດນັ້ນດ້ວຍຄວາມຮັກ’ ຄືກັບ 1 ເປໂຕ 4:8 ໄດ້ແນະນຳ. ຖ້າບໍ່ດັ່ງນັ້ນ ເຮົາອາດເປັນຝ່າຍເລີ່ມຕົ້ນເວົ້າກັບລາວກ່ອນ ແລະພະຍາຍາມຟື້ນຟູສາຍສຳພັນທີ່ດີຕໍ່ກັນແລະກັນ.—ມັດທາຍ 5:23, 24.
8. ຖ້າເພື່ອນຮ່ວມຄວາມເຊື່ອເຮັດສິ່ງທີ່ເຮັດໃຫ້ເຮົາຮູ້ສຶກບໍ່ສະບາຍໃຈ ເຮົາອາດຈະເຮັດແນວໃດ?
8 ອາດເປັນໄປໄດ້ວ່າເພື່ອນຮ່ວມຄວາມເຊື່ອກຳລັງເຮັດບາງສິ່ງເຊິ່ງບໍ່ມີແຕ່ເຮົາເທົ່ານັ້ນທີ່ບໍ່ສະບາຍໃຈ ແຕ່ຍັງກະທົບໃສ່ຄົນອື່ນຄືກັນ. ບາງເທື່ອອາດຈະດີທີ່ຈະເວົ້ານຳລາວ. ຖ້າເຮົາຊີ້ແຈງບັນຫານັ້ນກັບລາວເປັນສ່ວນຕົວດ້ວຍວິທີທີ່ກະລຸນາ ອາດຈະເກີດຜົນດີກໍໄດ້. ກ່ອນອື່ນເຮົາຄວນຖາມຕົວເອງວ່າ ‘ລາວກຳລັງເຮັດບາງສິ່ງທີ່ຂັດກັບຫຼັກການຂອງພະຄຳພີແທ້ໆ ບໍ? ຫຼືບັນຫາສ່ວນໃຫຍ່ເກີດຂຶ້ນຍ້ອນພູມຫຼັງແລະການລ້ຽງດູທີ່ຕ່າງກັນລະຫວ່າງເຮົາກັບລາວ?’ ຕ້ອງລະວັງທີ່ຈະບໍ່ຕັ້ງມາດຕະຖານຂອງເຮົາເອງ ແລ້ວຕັດສິນຕາມມາດຕະຖານເຫຼົ່ານັ້ນ. (ຢາໂກໂບ 4:11, 12) ພະເຢໂຫວາເອງຍອມຮັບທຸກຄົນໂດຍບໍ່ລຳອຽງບໍ່ວ່າເຂົາເຈົ້າມາຈາກພູມຫຼັງໃດກໍຕາມ ແລະຍັງສະແດງຄວາມອົດທົນເມື່ອເຫັນເຂົາເຈົ້າເຕີບໂຕທາງຝ່າຍວິນຍານ.
9. (ກ) ໃຜຄວນເປັນຜູ້ແກ້ໄຂເມື່ອມີການເຮັດຜິດຮ້າຍແຮງພາຍໃນປະຊາຄົມ? (ຂ) ກໍລະນີໃດເປັນຄວາມຮັບຜິດຊອບຂອງຜູ້ເສຍຫາຍທີ່ຈະເປັນຝ່າຍເລີ່ມຕົ້ນເວົ້າກ່ອນ ແລະພ້ອມດ້ວຍຈຸດປະສົງອັນໃດ?
9 ຖ້າຄົນໃດຄົນໜຶ່ງໃນປະຊາຄົມມີສ່ວນກ່ຽວຂ້ອງກັບການເຮັດຜິດທີ່ຮ້າຍແຮງເຊັ່ນວ່າ ການຜິດສິນລະທຳ ແນ່ນອນເລື່ອງນັ້ນຕ້ອງໄດ້ຮັບການເອົາໃຈໃສ່ທັນທີໂລດ. ໃຜຄວນຈະເປັນຜູ້ແກ້ໄຂໃນເລື່ອງນັ້ນ? ເປັນໜ້າທີ່ຂອງເຫຼົ່າຜູ້ເຖົ້າແກ່. (ຢາໂກໂບ 5:14, 15) ເຖິງແນວນັ້ນກໍຕາມ ຖ້າເປັນການເຮັດຜິດຕໍ່ຜູ້ໃດຜູ້ໜຶ່ງ ອາດເປັນເລື່ອງທຸລະກິດຫຼືການໃຊ້ລີ້ນໃນທາງຜິດ ຜູ້ເສຍຫາຍຄວນພະຍາຍາມເຂົ້າຫາຜູ້ເຮັດຜິດເປັນສ່ວນຕົວກ່ອນ. (ມັດທາຍ 18:15, ທ.ປ.) ຖ້າການເຮັດແນວນັ້ນຍັງບໍ່ຊ່ວຍແກ້ໄຂເລື່ອງດັ່ງກ່າວໄດ້ ຈຳເປັນຕ້ອງໄດ້ດຳເນີນການຂັ້ນຕໍ່ໄປ ຕາມທີ່ບອກໄວ້ໃນມັດທາຍ 18:16, 17. ຄວາມຮັກຕໍ່ພີ່ນ້ອງທີ່ເຮັດຜິດແລະຄວາມປາຖະໜາທີ່ຈະ “ໄດ້ພີ່ນ້ອງຄືນ” ຈະຊ່ວຍເຮົາໃຫ້ຈັດການກັບເລື່ອງນີ້ໃນວິທີທີ່ເຂົ້າເຖິງຫົວໃຈຂອງຄົນຜູ້ນັ້ນ.—ສຸພາສິດ 16:23.
10. ເມື່ອມີບັນຫາເກີດຂຶ້ນ ແມ່ນຫຍັງຈະຊ່ວຍເຮົາໃຫ້ມີທັດສະນະທີ່ເໝາະສົມຕໍ່ເລື່ອງນັ້ນ?
10 ເມື່ອມີບັນຫາເກີດຂຶ້ນ ບໍ່ວ່າບັນຫານັ້ນຈະໃຫຍ່ຫຼືນ້ອຍກໍຕາມ ເຮົາຈະໄດ້ຮັບປະໂຫຍດຖ້າເຮົາພະຍາຍາມເຂົ້າໃຈທັດສະນະຂອງພະເຢໂຫວາຕໍ່ເລື່ອງດັ່ງກ່າວ. ພະເຢໂຫວາບໍ່ພໍໃຈກັບຄວາມຜິດໃນຮູບແບບໃດໆ ທັງໝົດ ແລະເມື່ອເຖິງເວລາກຳນົດ ພະອົງກໍຈະກຳຈັດ ບັນດາຄົນທີ່ເຮັດຜິດຮ້າຍແຮງເຊິ່ງບໍ່ປະໃຈເກົ່າເອົາໃຈໃໝ່ອອກຈາກອົງການຂອງພະອົງ. ເຖິງແນວນັ້ນກໍຕາມ ຢ່າລືມວ່າ ເຮົາໝົດທຸກຄົນເຮັດບາບໃນຫຼາຍທາງທີ່ບໍ່ຮ້າຍແຮງແລະຕ້ອງການໃຫ້ພະອົງສະແດງຄວາມອົດກັ້ນທົນນານແລະຄວາມເມດຕາຕໍ່ເຮົາ. ຍ້ອນແນວນັ້ນ ພະເຢໂຫວາຈຶ່ງວາງຕົວຢ່າງໄວ້ເພື່ອໃຫ້ເຮົາຕິດຕາມເມື່ອຄົນອື່ນເຮັດຜິດຕໍ່ເຮົາ. ທຸກໆ ຄັ້ງທີ່ເຮົາສະແດງຄວາມເມດຕາ ເຮົາກໍກຳລັງສະທ້ອນເຖິງຄວາມຮັກຂອງພະອົງ.—ເອເຟດ 5:1, 2.
ຫາຊ່ອງທາງ “ເປີດໃຈ . . . ອອກໃຫ້ກວ້າງ”
11. ດ້ວຍເຫດໃດໂປໂລຈຶ່ງກະຕຸ້ນໃຫ້ຊາວໂກລິນໂທ “ເປີດໃຈ . . . ອອກໃຫ້ກວ້າງ”?
11 ໂປໂລໃຊ້ເວລາຫຼາຍເດືອນເພື່ອເສີມສ້າງປະຊາຄົມໃນເມືອງໂກລິນໂທ ປະເທດກຣີກ. ລາວເຮັດວຽກໜັກເພື່ອຊ່ວຍພີ່ນ້ອງຢູ່ຫັ້ນ ແລະລາວຮັກເຂົາເຈົ້າ. ເຖິງແນວນັ້ນກໍຕາມ ບາງຄົນບໍ່ຄ່ອຍເປັນມິດກັບລາວແລະຍັງມັກຕຳໜິລາວນຳອີກ. ຍ້ອນແນວນັ້ນ ລາວຈຶ່ງກະຕຸ້ນເຂົາເຈົ້າໃຫ້ “ເປີດໃຈ . . . ອອກໃຫ້ກວ້າງ” ໃນການສະແດງຄວາມຮັກ. (2 ໂກລິນໂທ 6:11-13, ທ.ປ.; 12:15) ນັບວ່າເປັນສິ່ງທີ່ດີທີ່ເຮົາໝົດທຸກຄົນຈະກວດເບິ່ງວ່າຕົນເອງສະແດງຄວາມຮັກຕໍ່ຄົນອື່ນຫຼາຍສ່ຳໃດແລະທັງພະຍາຍາມຫາຊ່ອງທາງທີ່ຈະເປີດໃຈໃຫ້ກວ້າງອອກໄປຕື່ມອີກ.—1 ໂຢຮັນ 3:14.
12. ເຮົາຈະເພີ່ມພູນຄວາມຮັກຕໍ່ໝົດທຸກຄົນໃນປະຊາຄົມໄດ້ຢ່າງໃດ?
12 ມີລາງຄົນໃນປະຊາຄົມທີ່ເຮົາຮູ້ສຶກວ່າເຂົ້າໃກ້ຊິດໄດ້ຍາກບໍ? ຖ້າເຮົາພະຍາຍາມເບິ່ງຂ້າມຂໍ້ແຕກຕ່າງໃດໆ ກໍຕາມທາງດ້ານນິດໄສໃຈຄໍຂອງເຂົາເຈົ້າ ເຊິ່ງກໍເປັນແບບດຽວກັບທີ່ເຮົາຕ້ອງການໃຫ້ເຂົາເຈົ້າປະຕິບັດກັບເຮົາ ເລື່ອງນີ້ສາມາດຊ່ວຍໃຫ້ມີສາຍສຳພັນທີ່ດີຕໍ່ກັນແລະກັນໄດ້. ນອກຈາກນັ້ນ ຄວາມຮູ້ສຶກທີ່ເຮົາມີຕໍ່ເຂົາເຈົ້າກໍຈະດີຂຶ້ນຄືກັນຖ້າເຮົາຊອກຫາຈຸດດີຂອງເຂົາເຈົ້າ ແລະເລັງໃສ່ແຕ່ຈຸດເຫຼົ່ານັ້ນ. ແນ່ນອນວ່າ ສິ່ງນີ້ຈະເຮັດໃຫ້ຄວາມຮັກທີ່ເຮົາມີຕໍ່ເຂົາເຈົ້າເພີ່ມພູນຂຶ້ນຫຼາຍກວ່າເກົ່າ.—ລືກາ 6:32, 33, 36.
13. ເຮົາຈະເປີດໃຈອອກໃຫ້ກວ້າງໃນການສະແດງຄວາມຮັກຕໍ່ຄົນເຫຼົ່ານັ້ນທີ່ຢູ່ໃນປະຊາຄົມຂອງເຮົາໄດ້ຢ່າງໃດ?
13 ເປັນເລື່ອງທີ່ຍອມຮັບກັນວ່າ ສິ່ງທີ່ເຮົາສາມາດເຮັດເພື່ອຄົນອື່ນນັ້ນມີຂີດຈຳກັດ. ບາງທີເຮົາບໍ່ສາມາດຖາມສະບາຍດີໝົດທຸກຄົນໃນການປະຊຸມແຕ່ລະຄັ້ງໄດ້. ອາດເປັນໄປບໍ່ໄດ້ທີ່ຈະເຊີນໝົດທຸກຄົນມາກິນເຂົ້າຢູ່ເຮືອນຂອງເຮົາໄດ້. ແຕ່ວ່າເຮົາຈະເປີດໃຈອອກໃຫ້ກວ້າງໂດຍໃຊ້ເວລາຈັກໜ້ອຍໜຶ່ງເພື່ອທຳຄວາມຮູ້ຈັກຄຸ້ນເຄີຍກັບບາງຄົນໃນປະຊາຄົມຂອງເຮົາໃຫ້ຫຼາຍຂຶ້ນໄດ້ບໍ? ໃນບາງໂອກາດເຮົາອາດຊວນຜູ້ທີ່ເຮົາບໍ່ສະໜິດປານໃດໄປປະກາດກັບເຮົາໄດ້ບໍ?
14. ເມື່ອຢູ່ທ່າມກາງຄລິດສະຕຽນທີ່ເຮົາບໍ່ເຄີຍພົບເຫັນມາກ່ອນ ເຮົາຈະສະແດງຄວາມຮັກອັນແຮງກ້າຕໍ່ກັນແລະກັນໄດ້ຢ່າງໃດ?
14 ການປະຊຸມພາກຂອງຄລິດສະຕຽນເປີດໂອກາດອັນດີເພື່ອເປີດຄວາມຮັກຂອງເຮົາໃຫ້ກວ້າງອອກໄປ. ອາດຈະມີຫຼາຍພັນຄົນເຂົ້າຮ່ວມ. ເຖິງແມ່ນວ່າເຮົາບໍ່ສາມາດພົບເຂົາເຈົ້າໝົດທຸກຄົນ ເຮົາສາມາດປະພຶດໃນແບບທີ່ສະແດງໃຫ້ເຫັນວ່າເຮົາຄິດເຖິງຄວາມສຸກຂອງເຂົາເຈົ້າຫຼາຍກວ່າຄວາມສະດວກສະບາຍຂອງເຮົາເອງ. ໃນລະຫວ່າງການຢຸດພັກ ເຮົາອາດສະແດງຄວາມສົນໃຈເປັນສ່ວນຕົວໂດຍເລີ່ມທັກທາຍຄົນທີ່ຢູ່ອ້ອມຂ້າງເຮົາ. ໃນວັນຂ້າງໜ້າໝົດທຸກຄົນທີ່ອາໄສຢູ່ເທິງແຜ່ນດິນໂລກນີ້ຈະເປັນພີ່ນ້ອງກັນ ແລະຈະມີຄວາມເປັນນ້ຳໜຶ່ງໃຈດຽວກັນໃນການນະມັດສະການພະເຈົ້າທ່ຽງແທ້ແຕ່ອົງດຽວ ເຊິ່ງພະອົງຈະເປັນພະບິດາຂອງເຮົາທຸກຄົນ. ຖືເປັນຄວາມຍິນດີແທ້ໆ ທີ່ຈະໄດ້ມາຮູ້ຈັກກັນແລະກັນ! ຄວາມຮັກອັນແຮງກ້າຈະກະຕຸ້ນໃຫ້ເຮົາຢາກເຮັດແບບນັ້ນ. ເປັນຫຍັງບໍ່ເລີ່ມຕົ້ນຕັ້ງແຕ່ດຽວນີ້?
ການພິຈາລະນາທົບທວນ
• ເມື່ອມີບັນຫາເກີດຂຶ້ນລະຫວ່າງຜູ້ທີ່ເປັນຄລິດສະຕຽນ ຄວນຈະມີການແກ້ໄຂບັນຫາເຫຼົ່ານັ້ນຢ່າງໃດ ແລະເພາະເຫດໃດ?
• ໃນຂະນະທີ່ເຮົາເຕີບໂຕທາງຝ່າຍວິນຍານ ຄວາມຮັກຂອງເຮົາກໍຄວນຈະເພີ່ມຂຶ້ນໃນທາງໃດ?
• ເປັນໄປໄດ້ແນວໃດທີ່ຈະສະແດງຄວາມຮັກອັນແຮງກ້າບໍ່ພຽງແຕ່ກັບກຸ່ມຫມູ່ເພື່ອນທີ່ສະໜິດສະໜົມເທົ່ານັ້ນ?
[ຮູບພາບໜ້າ 148]
ຄວາມຮັກແບບຄລິດສະຕຽນ ສະແດງອອກໄດ້ໃນຫຼາຍທາງ ເຊັ່ນ ໃນການປະຊຸມຕ່າງໆ ຂອງປະຊາຄົມ