ບົດທີ 35
ຮັນນາອະທິດຖານຂໍລູກຊາຍ
ມີຄົນອິດສະຣາເອນຄົນໜຶ່ງຊື່ເອນການາ ລາວມີເມຍ 2 ຄົນຊື່ຮັນນາແລະເປນິນນາ ແຕ່ລາວຮັກຮັນນາຫຼາຍກວ່າ. ເປນິນນາມີລູກຫຼາຍຄົນ ລາວຈຶ່ງເຍາະເຍີ້ຍຮັນນາຕະຫຼອດຍ້ອນຮັນນາບໍ່ມີລູກຈັກຄົນ. ແຕ່ລະປີເອນການາຈະພາຄອບຄົວໄປນະມັດສະການພະເຢໂຫວາຢູ່ເຕັ້ນສັກສິດໃນເມືອງຊີໂລ. ມີເທື່ອໜຶ່ງຕອນທີ່ເຂົາເຈົ້າໄປຫັ້ນ ເອນການາສັງເກດເຫັນວ່າຮັນນາເມຍທີ່ຮັກຂອງລາວທຸກໃຈຫຼາຍ. ລາວຈຶ່ງປອບໃຈຮັນນາວ່າ: ‘ບໍ່ຕ້ອງໄຫ້ເດີ້ຮັນນາ. ເຈົ້າຍັງມີຂ້ອຍ ແລະຂ້ອຍກໍຮັກເຈົ້າຫຼາຍເດີ້.’
ແລ້ວຮັນນາກໍໄປອະທິດຖານຄົນດຽວ. ລາວຮ້ອງໄຫ້ສະອຶກສະອື້ນແລະອ້ອນວອນພະເຢໂຫວາໃຫ້ຊ່ວຍລາວ. ຮັນນາສັນຍາກັບພະເຢໂຫວາວ່າ: ‘ຖ້າພະອົງໃຫ້ລູກມີລູກຊາຍຄົນໜຶ່ງ ລູກຈະມອບລາວໃຫ້ຮັບໃຊ້ພະອົງຕະຫຼອດຊີວິດ.’
ປະໂລຫິດໃຫຍ່ເອລີເຫັນຮັນນາຮ້ອງໄຫ້ສະອຶກສະອື້ນ ລາວຈຶ່ງຄິດວ່າຮັນນາເມົາເຫຼົ້າ. ຮັນນາບອກລາວວ່າ: ‘ບໍ່ ທ່ານເອີ້ຍ ຂ້ອຍບໍ່ໄດ້ເມົາ. ຂ້ອຍມີເລື່ອງທຸກໃຈຫຼາຍ ແລະກຳລັງລົມກັບພະເຢໂຫວາກ່ຽວກັບເລື່ອງນີ້ຢູ່.’ ເມື່ອເອລີຮູ້ວ່າລາວເຂົ້າໃຈຜິດ ລາວເລີຍບອກຮັນນາວ່າ: ‘ຖ້າເຈົ້າອະທິດຖານຂໍຫຍັງຈາກພະເຈົ້າກໍຂໍໃຫ້ໄດ້ຕາມນັ້ນ.’ ຮັນນາຮູ້ສຶກດີຂຶ້ນແລະກໍກັບເມືອເຮືອນ. ບໍ່ຮອດໜຶ່ງປີ ຮັນນາກໍມີລູກຊາຍແລະຕັ້ງຊື່ວ່າຊາມູເອນ. ເຈົ້ານຶກພາບອອກບໍວ່າຮັນນາຄືຊິມີຄວາມສຸກຫຼາຍສ່ຳໃດ?
ຮັນນາບໍ່ລືມວ່າລາວໄດ້ສັນຍາຫຍັງໄວ້ກັບພະເຢໂຫວາ. ເມື່ອຊາມູເອນເຊົານົມແລ້ວ ລາວກໍພາຊາມູເອນໄປຮັບໃຊ້ຢູ່ເຕັ້ນສັກສິດ. ລາວບອກເອລີວ່າ: ‘ຂ້ອຍໄດ້ອະທິດຖານຂໍລູກຊາຍຄົນນີ້. ຂ້ອຍຈຶ່ງພາລາວມາມອບໃຫ້ພະເຢໂຫວາແລະລາວຈະເປັນຂອງພະເຢໂຫວາຕະຫຼອດຊີວິດຂອງລາວ.’ ເອນການາແລະຮັນນາໄປຢາມຊາມູເອນທຸກປີແລະຈະເອົາເສື້ອແຂນກິ້ນໂຕໃໝ່ໄປໃຫ້ລາວນຳ. ພະເຢໂຫວາໃຫ້ຮັນນາມີລູກຊາຍອີກ 3 ຄົນ ແລະລູກສາວອີກ 2 ຄົນ.
“ໃຫ້ຂໍຕໍ່ໆໄປແລ້ວພວກເຈົ້າຈະໄດ້ຮັບ ໃຫ້ຊອກຕໍ່ໆໄປແລ້ວພວກເຈົ້າຈະເຫັນ.”—ມັດທາຍ 7:7