ບົດທີ 63
ໂຕໜັງສືທີ່ຂຽນຢູ່ເທິງຝາ
ຕໍ່ມາ ເບນຊັດຊາເຣກໍໄດ້ເປັນກະສັດຂອງບາບີໂລນ. ມີຄືນໜຶ່ງລາວເຊີນຄົນສຳຄັນໃນບາບີໂລນ 1.000 ຄົນມາງານລ້ຽງຂອງລາວ. ເບນຊັດຊາເຣສັ່ງໃຫ້ຄົນຮັບໃຊ້ເອົາຈອກຄຳທີ່ເນບູກາດເນັດຊາພໍ່ຂອງລາວເອົາມາຈາກວິຫານຂອງພະເຢໂຫວາອອກມາ ແລ້ວລາວກັບແຂກກໍເອົາຈອກເຫຼົ່ານັ້ນໃສ່ເຫຼົ້າແວງກິນແລະສັນລະເສີນພະເຈົ້າຂອງເຂົາເຈົ້າ. ທັນໃດນັ້ນກໍມີມືຄົນປາກົດຂຶ້ນມາແລະເລີ່ມຂຽນໂຕໜັງສືເລິກລັບໃສ່ຝາຫ້ອງທີ່ຈັດງານລ້ຽງ.
ເບນຊັດຊາເຣຢ້ານຫຼາຍ ລາວຈຶ່ງເອີ້ນພວກໝໍຄາຖາອາຄົມໃຫ້ມາຫາແລະສັນຍາກັບເຂົາເຈົ້າວ່າ: ‘ຖ້າໃຜແປຄວາມໝາຍຂອງໂຕໜັງສືເຫຼົ່ານີ້ໄດ້ ຂ້ອຍຈະໃຫ້ລາວເປັນຜູ້ປົກຄອງອັນດັບທີ 3 ໃນບາບີໂລນ.’ ເຂົາເຈົ້າພະຍາຍາມອະທິບາຍໂຕໜັງສືເຫຼົ່ານັ້ນ ແຕ່ກໍບໍ່ມີໃຜແປຄວາມໝາຍໄດ້. ແລ້ວລາຊີນີກໍເຂົ້າມາແລະເວົ້າວ່າ: ‘ມີຜູ້ຊາຍຄົນໜຶ່ງຊື່ດານີເອນ ລາວເຄີຍອະທິບາຍເລື່ອງຍາກໆໃຫ້ເນບູກາດເນັດຊາພໍ່ຂອງທ່ານໄດ້ ລາວກໍຄືຊິແປຄວາມໝາຍຂອງໂຕໜັງສືເຫຼົ່ານີ້ໃຫ້ທ່ານໄດ້ຄືກັນ.’
ດານີເອນມາຫາກະສັດເບນຊັດຊາເຣ. ກະສັດເວົ້າກັບລາວວ່າ: ‘ຖ້າເຈົ້າອ່ານແລະແປຄວາມໝາຍໂຕໜັງສືເຫຼົ່ານີ້ໃຫ້ຂ້ອຍໄດ້ ຂ້ອຍຈະເອົາສາຍຄໍຄຳໃຫ້ເຈົ້າແລະຈະໃຫ້ເຈົ້າເປັນຜູ້ປົກຄອງອັນດັບທີ 3 ໃນບາບີໂລນ.’ ດານີເອນຕອບກະສັດວ່າ: ‘ຂ້ອຍບໍ່ຢາກໄດ້ຂອງຂວັນເຫຼົ່ານີ້ ແຕ່ຂ້ອຍຈະແປຄວາມໝາຍໂຕໜັງສືເຫຼົ່ານີ້ໃຫ້ທ່ານ. ເນບູກາດເນັດຊາພໍ່ຂອງທ່ານເປັນຄົນຍິ່ງແລະພະເຢໂຫວາໄດ້ເຮັດໃຫ້ລາວຖ່ອມໂຕລົງ. ທ່ານຮູ້ທຸກເລື່ອງທີ່ເກີດຂຶ້ນກັບພໍ່ຂອງທ່ານ ແຕ່ທ່ານກໍຍັງບໍ່ນັບຖືພະເຢໂຫວາໂດຍເອົາຈອກຄຳທີ່ຢູ່ໃນວິຫານຂອງເພິ່ນມາໃສ່ເຫຼົ້າແວງກິນ. ພະເຈົ້າຈຶ່ງຂຽນໂຕໜັງສືເຫຼົ່ານີ້ທີ່ອ່ານວ່າ: ເມເນ ເມເນ ເທເຄນ ແລະປາສິນ ເຊິ່ງມີຄວາມໝາຍວ່າເມເດຍກັບເປີເຊຍຈະເອົາຊະນະບາບີໂລນ ແລະທ່ານຈະບໍ່ໄດ້ເປັນກະສັດອີກຕໍ່ໄປ.’
ແຕ່ເບິ່ງຄືວ່າບໍ່ມີໃຜຈະເອົາຊະນະບາບີໂລນໄດ້ ຍ້ອນເມືອງນີ້ມີກຳແພງແໜ້ນໜາແລະມີແມ່ນ້ຳເລິກອ້ອມເມືອງຢູ່. ແຕ່ໃນຄືນນັ້ນ ພວກເມເດຍແລະເປີເຊຍກໍມາໂຈມຕີບາບີໂລນ. ໄຊຣັດກະສັດຂອງເປີເຊຍໄດ້ເຮັດໃຫ້ແມ່ນ້ຳທີ່ອ້ອມເມືອງນັ້ນໄຫຼໄປທາງອື່ນ ເພື່ອໃຫ້ທະຫານຂອງລາວຍ່າງເຂົ້າໄປຮອດປະຕູເມືອງໄດ້. ຕອນທີ່ເຂົາເຈົ້າໄປຮອດ ປະຕູເມືອງກໍເປີດຢູ່! ກອງທັບຂອງໄຊຣັດຈຶ່ງບຸກເຂົ້າໄປ ເຂົາເຈົ້າເອົາຊະນະແລະຂ້າກະສັດໄດ້. ແລ້ວໄຊຣັດກໍໄດ້ມາເປັນຜູ້ປົກຄອງບາບີໂລນ.
ພາຍໃນໜຶ່ງປີ ໄຊຣັດປະກາດວ່າ: ‘ພະເຢໂຫວາບອກໃຫ້ຂ້ອຍສ້າງວິຫານຂອງເພິ່ນໃນເມືອງເຢຣູຊາເລັມຄືນໃໝ່. ຖ້າປະຊາຊົນຂອງພະເຈົ້າຄົນໃດຢາກຊ່ວຍສ້າງວິຫານກໍກັບເມືອໄດ້.’ ແລ້ວກໍເປັນໄປຕາມທີ່ພະເຢໂຫວາສັນຍາໄວ້ ຄົນຢິວໄດ້ກັບເມືອບ້ານເກີດຂອງໂຕເອງຫຼັງຈາກຄົບ 70 ປີທີ່ເມືອງເຢຣູຊາເລັມຖືກທຳລາຍ. ໄຊຣັດຍັງສັ່ງໃຫ້ເອົາຈອກເງິນ ຈອກຄຳ ແລະເຄື່ອງໃຊ້ຕ່າງໆທີ່ເນບູກາດເນັດຊາໄດ້ເອົາມາຈາກວິຫານກັບໄປນຳ. ເຈົ້າເຫັນບໍວ່າພະເຢໂຫວາໃຊ້ໄຊຣັດໃຫ້ຊ່ວຍປະຊາຊົນຂອງເພິ່ນແນວໃດ?
“ເມືອງນີ້ຫຼົ້ມຈົມແລ້ວ! ບາບີໂລນໃຫຍ່ຫຼົ້ມຈົມແລ້ວ! ເມືອງນີ້ກາຍເປັນບ່ອນຢູ່ຂອງພວກປີສາດ.”—ພະນິມິດ 18:2