ບົດທີ 62
ການປົກຄອງທີ່ເປັນຄືກັບຕົ້ນໄມ້ໃຫຍ່
ມີຄືນໜຶ່ງ ເນບູກາດເນັດຊາຝັນແປກໆເລື່ອງໜຶ່ງ ລາວຈຶ່ງເອີ້ນພວກທີ່ປຶກສາໃຫ້ມາຫາເພື່ອແປຄວາມຝັນໃຫ້ລາວ ແຕ່ເຂົາເຈົ້າແປບໍ່ໄດ້ຈັກຄົນ. ສຸດທ້າຍກະສັດຈຶ່ງຖາມດານີເອນ.
ເນບູກາດເນັດຊາບອກດານີເອນວ່າ: ‘ຂ້ອຍຝັນເຫັນຕົ້ນໄມ້ຕົ້ນໜຶ່ງ ຕົ້ນໄມ້ນີ້ໃຫຍ່ຂຶ້ນແລະສູງຈົນຮອດຟ້າ ຄົນຢູ່ທຸກຈອກທຸກແຈໃນໂລກກໍແນມເຫັນໄດ້. ໃບຂອງມັນງາມແລະໝາກຂອງມັນກໍດົກ. ສັດຕ່າງໆໄປອາໄສຢູ່ກ້ອງຮົ່ມຕົ້ນໄມ້ນັ້ນແລະນົກກໍເຮັດຮັງຢູ່ງ່າຂອງມັນ. ແລ້ວກໍມີທູດສະຫວັນອົງໜຶ່ງລົງມາຈາກຟ້າ ລາວຮ້ອງວ່າ: “ຕັດຕົ້ນໄມ້ນີ້ໃຫ້ລົ້ມລົງແລະຕັດງ່າມັນອອກ ໃຫ້ຈົ່ງແຕ່ຕໍກັບຮາກໄວ້. ແລ້ວເອົາປອກເຫຼັກກັບປອກທອງແດງມາຮັດໄວ້. ໃຫ້ໃຈຂອງມັນທີ່ເປັນໃຈຄົນປ່ຽນເປັນໃຈຂອງສັດປ່າ ແລະໃຫ້ເປັນແບບນີ້ 7 ປີເພື່ອໃຫ້ທຸກຄົນຮູ້ວ່າພະເຈົ້າເປັນຜູ້ປົກຄອງ. ເພິ່ນຈະເອົາອຳນາດການປົກຄອງໃຫ້ໃຜກໍໄດ້ຕາມທີ່ເພິ່ນຕ້ອງການ.”’
ພະເຢໂຫວາຊ່ວຍໃຫ້ດານີເອນຮູ້ວ່າຄວາມຝັນຂອງກະສັດໝາຍເຖິງຫຍັງ. ເມື່ອດານີເອນຮູ້ຄວາມໝາຍຂອງຄວາມຝັນ ລາວກໍຢ້ານຫຼາຍ. ລາວບອກກະສັດວ່າ: ‘ກະສັດເອີ້ຍ ຂ້ອຍຫວັງວ່າຄວາມຝັນນີ້ຈະເກີດຂຶ້ນກັບສັດຕູຂອງທ່ານ ແຕ່ຄວາມຝັນນີ້ພັດກ່ຽວກັບໂຕທ່ານ. ຕົ້ນໄມ້ໃຫຍ່ທີ່ຖືກຕັດໝາຍເຖິງທ່ານ. ທ່ານຈະສູນເສຍອານາຈັກຂອງທ່ານແລະທ່ານຈະກິນຫຍ້າຢູ່ທົ່ງຫຍ້າຄືກັບສັດປ່າ. ແຕ່ຍ້ອນທູດສະຫວັນບອກໃຫ້ຈົ່ງຕໍກັບຮາກໄວ້ ນີ້ໝາຍຄວາມວ່າທ່ານຈະໄດ້ກັບມາເປັນກະສັດອີກ.’
ໜຶ່ງປີຕໍ່ມາ ຕອນທີ່ເນບູກາດເນັດຊາຍ່າງຢູ່ເທິງດາດຟ້າໃນວັງຂອງລາວ ລາວແນມເບິ່ງເມືອງບາບີໂລນດ້ວຍຄວາມພູມໃຈແລະເວົ້າວ່າ: ‘ເບິ່ງເມືອງງາມໆນີ້ທີ່ຂ້ອຍສ້າງແມ້. ເຫັນບໍວ່າຂ້ອຍຍິ່ງໃຫຍ່ຫຼາຍສ່ຳໃດ!’ ລາວເວົ້າຍັງບໍ່ທັນສຸດຄວາມ ກໍມີສຽງມາຈາກຟ້າວ່າ: ‘ເນບູກາດເນັດຊາ! ອານາຈັກຂອງທ່ານຖືກຍຶດໄປຈາກທ່ານແລ້ວ.’
ໃນຕອນນັ້ນ ເນບູກາດເນັດຊາເສຍສະຕິແລະເປັນຄືກັບສັດປ່າ. ລາວຕ້ອງອອກຈາກວັງໄປຢູ່ກັບສັດປ່າໃນທົ່ງຫຍ້າ. ຜົມຂອງລາວຍາວຄືກັບຂົນຂອງນົກອິນຊີແລະເລັບຂອງລາວກໍຍາວຄືກັບເລັບຂອງນົກ.
ຫຼັງຈາກ 7 ປີຜ່ານໄປ ເນບູກາດເນັດຊາກໍກັບມາເປັນຄົນປົກກະຕິແລະພະເຢໂຫວາໃຫ້ລາວກັບມາເປັນກະສັດຂອງບາບີໂລນອີກ. ເນບູກາດເນັດຊາເວົ້າວ່າ: ‘ຂ້ອຍຂໍສັນລະເສີນພະເຢໂຫວາກະສັດທີ່ຢູ່ໃນສະຫວັນ. ຕອນນີ້ຂ້ອຍຮູ້ແລ້ວວ່າພະເຢໂຫວາເປັນຜູ້ປົກຄອງສູງສຸດ. ເພິ່ນເຮັດໃຫ້ຄົນຍິ່ງຖ່ອມໂຕລົງ ແລະເພິ່ນຈະເອົາອຳນາດການປົກຄອງໃຫ້ໃຜກໍໄດ້ຕາມທີ່ເພິ່ນຕ້ອງການ.’
“ຄວາມຍິ່ງເຮັດໃຫ້ຖືກທຳລາຍ ແລະຄວາມຈອງຫອງເຮັດໃຫ້ລົ້ມລົງ.”—ສຸພາສິດ 16:18