ບົດຄວາມສຶກສາທີ 8
ສ້າງສັນຕິສຸກໂດຍເອົາຊະນະຄວາມຄິດທີ່ອິດສາ
“ໃຫ້ພວກເຮົາຕັ້ງໃຈເຮັດສິ່ງທີ່ສ້າງສັນຕິສຸກແລະສິ່ງທີ່ສົ່ງເສີມກັນໃຫ້ເຂັ້ມແຂງຂຶ້ນ.”—ຣມ. 14:19
ເພງ 113 ສັນຕິສຸກຂອງພວກເຮົາ
ໃຈຄວາມສຳຄັນa
1. ຄວາມອິດສາເຮັດໃຫ້ຄອບຄົວຂອງໂຢເຊັບເປັນແນວໃດ?
ຢາໂຄບຮັກລູກຊາຍທຸກຄົນ ແຕ່ລາວຮັກໂຢເຊັບຫຼາຍເປັນພິເສດເຊິ່ງຕອນນັ້ນໂຢເຊັບອາຍຸ 17 ປີ. ພວກອ້າຍຂອງໂຢເຊັບຮູ້ສຶກແນວໃດ? ພວກເຂົາອິດສາໂຢເຊັບແລະຄວາມອິດສານີ້ເຮັດໃຫ້ພວກເຂົາເລີ່ມຊັງລາວ. ໂຢເຊັບບໍ່ໄດ້ເຮັດສິ່ງໃດທີ່ເຮັດໃຫ້ພວກອ້າຍຮູ້ສຶກຊັງລາວເລີຍ. ແຕ່ໃນທີ່ສຸດພວກອ້າຍກໍໄດ້ຂາຍໂຢເຊັບໃຫ້ເປັນທາດ ແລະຕົວະພໍ່ວ່າສັດຮ້າຍໄດ້ຂ້າລູກຊາຍທີ່ພໍ່ຮັກແລ້ວ. ຄວາມອິດສາເຮັດໃຫ້ພວກເຂົາທຳລາຍສັນຕິສຸກໃນຄອບຄົວ ແລະເຮັດໃຫ້ພໍ່ເສຍໃຈຫຼາຍ.—ຕົ້ນ. 37:3, 4, 27-34
2. ຕາມຄາລາເຕຍ 5:19-21 ເປັນຫຍັງຄວາມອິດສາຈຶ່ງເປັນອັນຕະລາຍ?
2 ໃນຄຳພີໄບເບິນ ຄວາມອິດສາbເປັນໜຶ່ງໃນ “ການກະທຳທີ່ເກີດຈາກຄວາມຕ້ອງການຂອງຮ່າງກາຍທີ່ມີບາບ” ເຊິ່ງເຮັດໃຫ້ບໍ່ໄດ້ມີສ່ວນໃນການປົກຄອງຂອງພະເຈົ້າ. (ອ່ານຄາລາເຕຍ 5:19-21) ຄວາມອິດສາມັກຈະເປັນສາເຫດທີ່ເຮັດໃຫ້ເກີດສິ່ງທີ່ບໍ່ດີຫຼາຍຢ່າງເຊັ່ນ: ການເປັນສັດຕູກັນ ການຜິດຖຽງກັນ ການໃຈຮ້າຍໃຫ້ກັນ.
3. ເຮົາຈະພິຈາລະນາຫຍັງໃນບົດຄວາມນີ້?
3 ຕົວຢ່າງຂອງພວກອ້າຍຂອງໂຢເຊັບສະແດງໃຫ້ເຫັນວ່າຄວາມອິດສາສາມາດທຳລາຍສາຍສຳພັນແລະສັນຕິສຸກໃນຄອບຄົວ. ເຖິງວ່າເຮົາຈະບໍ່ມີວັນເຮັດສິ່ງທີ່ບໍ່ດີຄືກັບພວກອ້າຍຂອງໂຢເຊັບ ແຕ່ເຮົາທຸກຄົນກໍເປັນມະນຸດບໍ່ສົມບູນແບບແລະມີຫົວໃຈທີ່ທໍລະຍົດ. (ຢເຣ. 17:9) ນັ້ນເປັນສາເຫດທີ່ບາງຄັ້ງເຮົາອາດອິດສາຄົນອື່ນ. ໃຫ້ເຮົາມາພິຈາລະນາຕົວຢ່າງເຕືອນໃຈບາງເລື່ອງໃນຄຳພີໄບເບິນທີ່ຈະຊ່ວຍເຮົາໃຫ້ຮູ້ວ່າເປັນຫຍັງຄວາມອິດສາອາດຝັງເລິກຢູ່ໃນຫົວໃຈຂອງເຮົາ ແລະເຮົາຍັງຈະມາເບິ່ງວິທີທີ່ເຮົາຈະເອົາຊະນະຄວາມອິດສາແລະມີສ່ວນຊ່ວຍສ້າງສັນຕິສຸກ.
ສິ່ງທີ່ເຮັດໃຫ້ເກີດຄວາມອິດສາ
4. ເປັນຫຍັງຊາວຟີລີດຕີນຈຶ່ງອິດສາອີຊາກ?
4 ເມື່ອເຫັນຄົນອື່ນຮັ່ງມີ. ອີຊາກເປັນຄົນຮັ່ງມີ ຊາວຟີລີດຕີນກໍເລີຍອິດສາລາວ. (ຕົ້ນ. 26:12-14) ພວກເຂົາເຖິງຂັ້ນເອົາຂີ້ດິນມາຖົມນ້ຳສ້າງທີ່ອີຊາກຕ້ອງໃຊ້ເພື່ອລ້ຽງຝູງສັດ. (ຕົ້ນ. 26:15, 16, 27) ຄືກັບຊາວຟີລີດຕີນ ບາງຄົນໃນທຸກມື້ນີ້ໄດ້ອິດສາຄົນທີ່ລວຍກວ່າຕົວເອງ. ພວກເຂົາບໍ່ພຽງແຕ່ຢາກມີໃນສິ່ງທີ່ຄົນອື່ນມີ ແຕ່ຍັງຢາກຄົນນັ້ນສູນເສຍສິ່ງທີ່ມີ.
5. ເປັນຫຍັງພວກຜູ້ນຳສາສະໜາຈຶ່ງອິດສາພະເຢຊູ?
5 ເມື່ອເຫັນຄົນອື່ນຖືກຍ້ອງຍໍ. ຜູ້ນຳສາສະໜາຊາວຢິວອິດສາພະເຢຊູເພາະມີຫຼາຍຄົນມັກເພິ່ນຫຼາຍ. (ມທ. 7:28, 29) ພະເຢຊູເປັນຕົວແທນຂອງພະເຈົ້າແລະເພິ່ນສອນຄວາມຈິງ. ແຕ່ພວກຜູ້ນຳສາສະໜາໄດ້ແຜ່ຄຳຕົວະແລະໃສ່ຮ້າຍພະເຢຊູເພື່ອໃຫ້ເພິ່ນເສຍຊື່ສຽງ. (ມຣກ. 15:10; ຢຮ. 11:47, 48; 12:12, 13, 19) ເຮົາໄດ້ບົດຮຽນຫຍັງຈາກເລື່ອງນີ້? ເຮົາຕ້ອງເຮັດໃຫ້ແນ່ໃຈວ່າເຮົາຈະບໍ່ອິດສາຄົນທີ່ມີຂໍ້ດີບາງຢ່າງທີ່ເຮັດໃຫ້ພີ່ນ້ອງໃນປະຊາຄົມຮັກລາວ ແຕ່ເຮົາຄວນຈະພະຍາຍາມຮຽນແບບຂໍ້ດີຂອງລາວ.—1 ກຣ. 11:1; 3 ຢຮ. 11
6. ດີໂອເທເຟໄດ້ເຮັດຫຍັງທີ່ສະແດງວ່າລາວອິດສາຄົນອື່ນ?
6 ເມື່ອເຫັນຄົນອື່ນໄດ້ຮັບສິດທິພິເສດ. ໃນສະຕະວັດທຳອິດ ດີໂອເທເຟໄດ້ອິດສາຄົນທີ່ນຳໜ້າໃນປະຊາຄົມຄລິດສະຕຽນ. ລາວຢາກ “ເປັນໃຫຍ່ໃນທ່າມກາງພວກພີ່ນ້ອງ” ດັ່ງນັ້ນ ລາວຈຶ່ງເວົ້າໃຫ້ອັກຄະສາວົກໂຢຮັນແລະພີ່ນ້ອງທີ່ນຳໜ້າໃນແບບເສື່ອມເສຍ. (3 ຢຮ. 9, 10) ເຖິງເຮົາຈະບໍ່ໄດ້ເປັນຄືກັບດີໂອເທເຟ ແຕ່ເຮົາກໍອາດຈະເລີ່ມອິດສາພີ່ນ້ອງທີ່ໄດ້ຮັບສິດທິພິເສດທີ່ເຮົາຢາກໄດ້ ໂດຍສະເພາະເມື່ອເຮົາຮູ້ສຶກວ່າເຮົາເຮັດໜ້າທີ່ນັ້ນໄດ້ດີຄືກັນຫຼືອາດຈະເຮັດໄດ້ດີກວ່າຄົນນັ້ນ.
ຫົວໃຈຂອງເຮົາປຽບຄືກັບດິນ ແລະຄຸນລັກສະນະທີ່ດີຂອງເຮົາປຽບຄືກັບດອກໄມ້ທີ່ງາມ. ແຕ່ຄວາມອິດສາປຽບຄືກັບຫຍ້າ. ຄວາມອິດສາເຮັດໃຫ້ຄຸນລັກສະນະທີ່ດີ ເຊັ່ນ: ຄວາມຮັກ ຄວາມເຫັນອົກເຫັນໃຈ ແລະຄວາມກະລຸນາບໍ່ພັດທະນາ (ເບິ່ງຂໍ້ 7)
7. ຄວາມອິດສາສົ່ງຜົນຕໍ່ເຮົາແນວໃດ?
7 ຄວາມອິດສາເປັນຄືກັບຫຍ້າ. ເມື່ອມັນປົ່ງຮາກຢູ່ໃນຫົວໃຈຂອງເຮົາ ມັນກໍກຳຈັດໄດ້ຍາກ. ນິດໄສທີ່ບໍ່ດີຢ່າງອື່ນເຊັ່ນ: ການລະແວງກັນ ຄວາມຍິ່ງແລະຄວາມເຫັນແກ່ຕົວກໍຈະເລັ່ງໃຫ້ຄວາມອິດສາເຕີບໃຫຍ່ຂຶ້ນ. ຄືກັບຫຍ້າທີ່ປົ່ງກ້ຽວດອກໄມ້ບໍ່ໃຫ້ມັນບານງາມ ຄວາມອິດສາກໍເຮັດໃຫ້ເຮົາບໍ່ສາມາດພັດທະນາຄຸນລັກສະນະທີ່ດີເຊັ່ນ: ຄວາມຮັກ ຄວາມເຫັນອົກເຫັນໃຈ ແລະຄວາມກະລຸນາ. ເມື່ອເຮົາເຫັນຄວາມອິດສາເລີ່ມປົ່ງຮາກຢູ່ໃນຫົວໃຈຂອງເຮົາ ເຮົາຕ້ອງຮີບຖອນຮາກຖິ້ມໃຫ້ໄວທີ່ສຸດເທົ່າທີ່ເປັນໄປໄດ້. ແລ້ວເຮົາຈະກຳຈັດແລະເອົາຊະນະຄວາມອິດສາໄດ້ແນວໃດ?
ປູກຝັງຄວາມຖ່ອມແລະພໍໃຈໃນສິ່ງທີ່ມີຢູ່
ເຮົາຈະເອົາຊະນະຄວາມອິດສາທີ່ເປັນຄືກັບຫຍ້າໄດ້ແນວໃດ? ພະລັງບໍລິສຸດສາມາດຊ່ວຍເຮົາໃຫ້ກຳຈັດຄວາມອິດສາຄືກັບຫຼົກຫຍ້າແລະປູກຝັງຄວາມຖ່ອມຕົວແລະຄວາມພໍໃຈໃນສິ່ງທີ່ມີ (ເບິ່ງຂໍ້ 8-9)
8. ມີຄຸນລັກສະນະຫຍັງແດ່ທີ່ຊ່ວຍເຮົາໃຫ້ເອົາຊະນະຄວາມອິດສາ?
8 ເຮົາຈະເອົາຊະນະຄວາມອິດສາໂດຍປູກຝັງຄວາມຖ່ອມແລະພໍໃຈໃນສິ່ງທີ່ມີຢູ່. ເມື່ອຫົວໃຈຂອງເຮົາເຕັມໄປດ້ວຍຄຸນລັກສະນະທີ່ດີເຫຼົ່ານີ້ ມັນກໍຈະບໍ່ມີບ່ອນວ່າງໃຫ້ກັບຄວາມອິດສາ. ຄວາມຖ່ອມຈະຊ່ວຍເຮົາບໍ່ໃຫ້ຄິດເຖິງຕົວເອງຫຼາຍເກີນໄປ. ຄົນຖ່ອມຕົວຈະບໍ່ຄິດວ່າຕົວເອງສົມຄວນໄດ້ຮັບສິ່ງຕ່າງໆຫຼາຍກວ່າຄົນອື່ນ. (ຄລຕ. 6:3, 4) ສ່ວນຄົນທີ່ພໍໃຈໃນສິ່ງທີ່ມີຢູ່ຈະບໍ່ປຽບທຽບຕົວເອງກັບຄົນອື່ນ. (1 ຕມ. 6:7, 8) ຄົນທີ່ຖ່ອມຕົວແລະພໍໃຈໃນສິ່ງທີ່ມີຢູ່ຈະມີຄວາມສຸກເມື່ອເຫັນຄົນອື່ນໄດ້ຮັບສິ່ງທີ່ດີ.
9. ຕາມຄາລາເຕຍ 5:16 ແລະຟີລິບປອຍ 2:3, 4 ພະລັງບໍລິສຸດຊ່ວຍເຮົາໃຫ້ເຮັດຫຍັງ?
9 ເຮົາຈຳເປັນຕ້ອງມີພະລັງບໍລິສຸດຂອງພະເຈົ້າເພື່ອຈະຊ່ວຍເຮົາບໍ່ໃຫ້ເປັນຄົນມັກອິດສາ ແລະຊ່ວຍເຮົາໃຫ້ເປັນຄົນຖ່ອມຕົວແລະພໍໃຈໃນສິ່ງທີ່ມີຢູ່. (ອ່ານຄາລາເຕຍ 5:16; ຟີລິບປອຍ 2:3, 4) ພະລັງບໍລິສຸດຂອງພະເຢໂຫວາສາມາດຊ່ວຍເຮົາໃຫ້ກວດເບິ່ງຄວາມຄິດແລະຄວາມຮູ້ສຶກເລິກໆຂອງເຮົາ. ພະເຈົ້າສາມາດຊ່ວຍເຮົາໃຫ້ເອົາຄວາມຄິດແລະຄວາມຮູ້ສຶກທີ່ບໍ່ດີອອກໄປ ແລ້ວໃສ່ຄວາມຄິດແລະຄວາມຮູ້ສຶກທີ່ດີເຂົ້າມາແທນໄດ້. (ເພງ. 26:2; 51:10) ຂໍໃຫ້ພິຈາລະນາຕົວຢ່າງຂອງໂມເຊແລະໂປໂລເຊິ່ງພວກເຂົາໄດ້ເອົາຊະນະຄວາມຮູ້ສຶກອິດສາມາແລ້ວ.
ຊາຍໜຸ່ມອິດສະຣາເອນຄົນໜຶ່ງແລ່ນມາບອກໂມເຊແລະໂຢຊວຍວ່າ ມີຜູ້ຊາຍສອງຄົນທີ່ຢູ່ໃນຄ້າຍພັກກຳລັງເຮັດທ່າທາງຄືຜູ້ພະຍາກອນ. ໂຢຊວຍບອກໂມເຊໃຫ້ຫ້າມພວກເຂົາ ແຕ່ໂມເຊບໍ່ເຮັດ ລາວບອກໂຢຊວຍວ່າ ລາວດີໃຈທີ່ພະເຢໂຫວາໃຫ້ພະລັງບໍລິສຸດຂອງພະອົງຢູ່ກັບ 2 ຄົນນັ້ນ (ເບິ່ງຂໍ້ 10)
10. ມີເຫດການຫຍັງເກີດຂຶ້ນທີ່ອາດເຮັດໃຫ້ໂມເຊຮູ້ສຶກອິດສາ? (ເບິ່ງຮູບໜ້າປົກ)
10 ໂມເຊ ມີອຳນາດເໜືອປະຊາຊົນຂອງພະເຈົ້າ ແຕ່ລາວກໍບໍ່ໄດ້ຂັດຂວາງຄົນອື່ນບໍ່ໃຫ້ໄດ້ຮັບສິດທິພິເສດ. ຕົວຢ່າງ: ມີເທື່ອໜຶ່ງ ພະເຢໂຫວາໄດ້ເອົາພະລັງບໍລິສຸດບາງສ່ວນທີ່ໃຫ້ໂມເຊໄປໃຫ້ກັບພວກຜູ້ນຳອິດສະຣາເອນທີ່ຢືນຢູ່ໃກ້ເຕັ້ນສັກສິດ. ຫຼັງຈາກນັ້ນບໍ່ດົນໂມເຊກໍໄດ້ຍິນວ່າ ມີຜູ້ນຳສອງຄົນທີ່ບໍ່ໄດ້ໄປເຕັ້ນສັກສິດກໍໄດ້ຮັບພະລັງບໍລິສຸດຄືກັນແລະເລີ່ມເຮັດທ່າທາງຄືຜູ້ພະຍາກອນ. ໂຢຊວຍບອກໂມເຊໃຫ້ຫ້າມພວກເຂົາ ແຕ່ໂມເຊມີທ່າທີແນວໃດ? ໂມເຊບໍ່ໄດ້ອິດສາສອງຄົນນັ້ນທີ່ພະເຢໂຫວາໃສ່ໃຈເປັນພິເສດ. ແຕ່ລາວຖ່ອມຕົວແລະດີໃຈທີ່ພວກເຂົາໄດ້ຮັບສິດທິພິເສດ. (ຈົດເຊັນ. 11:24-29) ເຮົາໄດ້ຮຽນຫຍັງຈາກຕົວຢ່າງຂອງໂມເຊ?
ຜູ້ດູແລຈະຮຽນແບບຄວາມຖ່ອມຕົວຂອງໂມເຊໄດ້ແນວໃດ? (ເບິ່ງຂໍ້ 11-12)c
11. ຜູ້ດູແລສາມາດຮຽນແບບໂມເຊແນວໃດ?
11 ຖ້າເຈົ້າເປັນຜູ້ດູແລ ເຈົ້າເຄີຍຖືກຂໍໃຫ້ຝຶກຄົນອື່ນໃຫ້ເຮັດວຽກທີ່ເຈົ້າມັກເປັນພິເສດໃນປະຊາຄົມບໍ? ຕົວຢ່າງ: ເຈົ້າອາດມັກສິດທິພິເສດທີ່ໄດ້ນຳການສຶກສາຫໍສັງເກດການ ແຕ່ລະອາທິດ. ຖ້າເຈົ້າຖ່ອມຕົວຄືໂມເຊ ເຈົ້າຈະບໍ່ຄິດວ່າຕົວເອງສູນເສຍສິດທິພິເສດເມື່ອຖືກຂໍໃຫ້ຝຶກພີ່ນ້ອງຊາຍຈົນລາວສາມາດເຮັດວຽກນີ້ໄດ້. ແຕ່ເຈົ້າຈະດີໃຈທີ່ໄດ້ຊ່ວຍພີ່ນ້ອງຂອງເຈົ້າ.
12. ຄລິດສະຕຽນຫຼາຍຄົນໃນທຸກມື້ນີ້ສະແດງຄວາມຖ່ອມແລະຄວາມພໍໃຈໃນສິ່ງທີ່ມີຢູ່ແນວໃດ?
12 ຂໍໃຫ້ເຮົາມາເບິ່ງສະຖານະການຂອງພີ່ນ້ອງຊາຍທີ່ມີອາຍຸຫຼາຍແລ້ວ. ຫຼາຍຄົນຮັບໃຊ້ເປັນຜູ້ປະສານງານຄະນະຜູ້ດູແລໄດ້ຫຼາຍປີແລ້ວ ເມື່ອຮອດອາຍຸ 80 ປີພວກເຂົາກໍເຕັມໃຈເຊົາເຮັດວຽກນັ້ນ. ສ່ວນຜູ້ດູແລໝວດເມື່ອຮອດອາຍຸ 70 ປີພວກເຂົາກໍຖ່ອມຕົວຍອມຮັບເອົາວຽກມອບໝາຍອື່ນ. ນອກຈາກນັ້ນ ໃນບໍ່ເທົ່າໃດປີມານີ້ ສະມາຊິກຄອບຄົວເບເທນຫຼາຍຄົນກໍໄດ້ຮັບວຽກມອບໝາຍໃໝ່ໃນເຂດປະກາດ. ພີ່ນ້ອງຊາຍຍິງທີ່ສັດຊື່ເຫຼົ່ານີ້ບໍ່ໄດ້ຮູ້ສຶກຄຽດຫຼືບໍ່ພໍໃຈຜູ້ທີ່ເຮັດວຽກມອບໝາຍແທນພວກເຂົາ.
13. ອັນໃດອາດເຮັດໃຫ້ໂປໂລອິດສາອັກຄະສາວົກ 12 ຄົນ?
13 ອັກຄະສາວົກໂປໂລ ເປັນອີກຄົນໜຶ່ງທີ່ເປັນຕົວຢ່າງທີ່ດີໃນການເປັນຄົນຖ່ອມຕົວແລະພໍໃຈກັບສິ່ງທີ່ມີ. ໂປໂລບໍ່ຍອມໃຫ້ຄວາມອິດສາເຕີບໃຫຍ່ຂຶ້ນໃນຫົວໃຈ. ເຖິງວ່າລາວຈະເຮັດວຽກໜັກຫຼາຍໃນວຽກຮັບໃຊ້ ແຕ່ລາວກໍຍັງເວົ້າຢ່າງຖ່ອມຕົວວ່າ: “ຂ້ອຍຕ່ຳຕ້ອຍທີ່ສຸດໃນພວກອັກຄະສາວົກ ແລະບໍ່ເໝາະສົມທີ່ຈະຖືກເອີ້ນວ່າອັກຄະສາວົກດ້ວຍຊ້ຳ.” (1 ກຣ. 15:9, 10) ອັກຄະສາວົກ 12 ຄົນໄດ້ໃກ້ຊິດກັບພະເຢຊູຕອນທີ່ເພິ່ນຢູ່ເທິງໂລກ ແຕ່ຕອນນັ້ນໂປໂລຍັງບໍ່ໄດ້ເຂົ້າມາເປັນຄລິດສະຕຽນຈົນຫຼັງຈາກພະເຢຊູຕາຍແລະຄືນມາຈາກຕາຍ. ຕໍ່ມາໂປໂລກໍໄດ້ຮັບການແຕ່ງຕັ້ງໃຫ້ເປັນ “ອັກຄະສາວົກທີ່ຖືກສົ່ງໄປຫາຄົນຕ່າງຊາດ” ແຕ່ລາວກໍບໍ່ໄດ້ຮັບສິດທິພິເສດໃຫ້ເປັນໜຶ່ງໃນອັກຄະສາວົກ 12 ຄົນ. (ຣມ. 11:13; ກຈກ. 1:21-26) ແທນທີ່ຈະອິດສາອັກຄະສາວົກ 12 ຄົນທີ່ໄດ້ໃກ້ຊິດພະເຢຊູ ໂປໂລກໍພໍໃຈກັບຖານະທີ່ລາວມີ.
14. ເຮົາຈະເຮັດຫຍັງຖ້າເຮົາຖ່ອມຕົວແລະພໍໃຈໃນສິ່ງທີ່ມີ?
14 ຖ້າເຮົາເປັນຄົນຖ່ອມຕົວແລະພໍໃຈໃນສິ່ງທີ່ມີ ເຮົາຈະເປັນຄືກັບໂປໂລແລະນັບຖືຄົນທີ່ພະເຢໂຫວາໃຫ້ອຳນາດ. (ກຈກ. 21:20-26) ພະເຢໂຫວາແຕ່ງຕັ້ງຜູ້ຊາຍໃຫ້ນຳໜ້າປະຊາຄົມຄລິດສະຕຽນ. ເຖິງວ່າພວກເຂົາຈະບໍ່ສົມບູນແບບ ແຕ່ພະອົງກໍຖືວ່າພວກເຂົາເປັນ “ຂອງຂວັນທີ່ເປັນມະນຸດ.” (ອຟຊ. 4:8, 11) ເມື່ອພວກເຮົານັບຖືຜູ້ຊາຍທີ່ໄດ້ຮັບການແຕ່ງຕັ້ງເຫຼົ່ານີ້ແລະຖ່ອມຕົວເຮັດຕາມການຊີ້ນຳຂອງພວກເຂົາ ເຮົາກໍຈະໃກ້ຊິດພະເຢໂຫວາສະເໝີແລະມີສັນຕິສຸກກັບພີ່ນ້ອງຮ່ວມຄວາມເຊື່ອ.
“ຕັ້ງໃຈເຮັດສິ່ງທີ່ສ້າງສັນຕິສຸກ”
15. ເຮົາຕ້ອງເຮັດຫຍັງ?
15 ຖ້າເຮົາອິດສາຄົນອື່ນຫຼືຄົນອື່ນອິດສາເຮົາ ເຮົາກໍຈະບໍ່ມີສັນຕິສຸກ. ເຮົາຕ້ອງກຳຈັດຄວາມອິດສາອອກຈາກຫົວໃຈຄືກັບຫຼົກຫຍ້າຖິ້ມ ແລະຫຼີກລ່ຽງທີ່ຈະບໍ່ເຮັດສິ່ງທີ່ເຮັດໃຫ້ຄົນອື່ນອິດສາ. ເຮົາຕ້ອງເຮັດສອງຢ່າງນັ້ນເພື່ອຈະເຊື່ອຟັງຄຳສັ່ງຂອງພະເຢໂຫວາທີ່ໃຫ້ “ເຮັດສິ່ງທີ່ສ້າງສັນຕິສຸກແລະສິ່ງທີ່ສົ່ງເສີມກັນໃຫ້ເຂັ້ມແຂງຂຶ້ນ.” (ຣມ. 14:19) ເຮົາຈະເຮັດຫຍັງໄດ້ແດ່ເພື່ອຊ່ວຍຄົນອື່ນໃຫ້ເອົາຊະນະຄວາມອິດສາ ແລະເຮົາຈະຊ່ວຍສ້າງສັນຕິສຸກໄດ້ແນວໃດ?
16. ເຮົາຈະຊ່ວຍຄົນອື່ນໃຫ້ເອົາຊະນະຄວາມອິດສາໄດ້ແນວໃດ?
16 ຄວາມຄິດແລະການກະທຳຂອງເຮົາສົ່ງຜົນຕໍ່ຄົນອື່ນໄດ້. ໂລກນີ້ຢາກໃຫ້ເຮົາ “ໂອ້ອວດ” ສິ່ງຂອງທີ່ເຮົາມີ. (1 ຢຮ. 2:16) ແຕ່ຄວາມຄິດແບບນັ້ນເຮັດໃຫ້ເກີດຄວາມອິດສາ. ເພື່ອເຮົາຈະບໍ່ເຮັດໃຫ້ຄົນອື່ນມີຄວາມອິດສາ ເຮົາຕ້ອງບໍ່ເວົ້າເລື້ອຍໆກ່ຽວກັບສິ່ງທີ່ເຮົາມີຫຼືສິ່ງທີ່ເຮົາວາງແຜນຈະຊື້. ແລະອີກວິທີໜຶ່ງກໍຄືເຮົາຕ້ອງຈຽມຕົວເມື່ອໄດ້ຮັບສິດທິພິເສດໃນປະຊາຄົມ. ຖ້າເຮົາເວົ້າເລື່ອງສິດທິພິເສດຂອງຕົວເອງຕະຫຼອດ ກໍສ່ຳກັບວ່າເຮົາກຳລັງກຽມດິນໃຫ້ຄວາມອິດສາເຕີບໃຫຍ່. ແຕ່ຖ້າເຮົາສົນໃຈຄົນອື່ນແທ້ໆແລະຊົມເຊີຍສິ່ງດີໆທີ່ພວກເຂົາເຮັດ ເຮົາກໍຈະຊ່ວຍພວກເຂົາໃຫ້ພໍໃຈໃນສິ່ງທີ່ມີແລະເຮົາກໍກຳລັງສ້າງສັນຕິສຸກແລະຄວາມເປັນນ້ຳໜຶ່ງໃຈດຽວໃນປະຊາຄົມ.
17. ໃນທີ່ສຸດພວກອ້າຍຂອງໂຢເຊັບສາມາດເຮັດຫຍັງໄດ້ ແລະຍ້ອນຫຍັງ?
17 ເຮົາສາມາດເອົາຊະນະຄວາມອິດສາໄດ້! ໃຫ້ເຮົາມາເບິ່ງຕົວຢ່າງຂອງພວກອ້າຍໂຢເຊັບອີກເທື່ອໜຶ່ງ. ຫຼາຍປີຫຼັງຈາກທີ່ພວກອ້າຍເຮັດບໍ່ດີຕໍ່ໂຢເຊັບ ພວກເຂົາກໍພົບໂຢເຊັບອີກຢູ່ເອຢິບ. ກ່ອນທີ່ໂຢເຊັບຈະບອກວ່າລາວແມ່ນໃຜ ລາວໄດ້ລອງໃຈພວກອ້າຍເບິ່ງວ່າພວກເຂົາໄດ້ປ່ຽນແປງຕົວເອງຫຼືບໍ. ລາວໄດ້ຈັດໂອກາດກິນເຂົ້າກັບອ້າຍນ້ອງຂອງລາວ ແລະໃຫ້ເບນຢາມີນນ້ອງຊາຍຫຼ້າໄດ້ອາຫານຫຼາຍກວ່າໝູ່. (ຕົ້ນ. 43:33, 34) ແຕ່ພວກອ້າຍບໍ່ໄດ້ອິດສາເບນຢາມີນຈັກໜ້ອຍ. ແທນທີ່ຈະເປັນແນວນັ້ນ ພວກເຂົາຮັກແລະເປັນຫ່ວງເບນຢາມີນແລະຢາໂຄບພໍ່ຂອງພວກເຂົາແທ້ໆ. (ຕົ້ນ. 44:30-34) ຍ້ອນພວກອ້າຍຂອງໂຢເຊັບບໍ່ມີຄວາມອິດສາແລ້ວ ພວກເຂົາຈຶ່ງເຮັດໃຫ້ຄອບຄົວກັບມາມີຄວາມສຸກແລະສັນຕິສຸກອີກເທື່ອໜຶ່ງ. (ຕົ້ນ. 45:4, 15) ຄ້າຍຄືກັນ ຖ້າເຮົາກຳຈັດຄວາມຮູ້ສຶກອິດສາອອກໄປຈາກໃຈຂອງເຮົາ ເຮົາກໍຈະຊ່ວຍຄອບຄົວແລະປະຊາຄົມໃຫ້ມີຄວາມສຸກແລະສັນຕິສຸກສະເໝີ.
18. ຕາມຢາໂກໂບ 3:17, 18 ຈະເກີດຫຍັງຂຶ້ນ ຖ້າເຮົາພະຍາຍາມສ້າງສັນຕິສຸກ?
18 ພະເຢໂຫວາຢາກໃຫ້ເຮົາເອົາຊະນະຄວາມອິດສາແລະສ້າງສັນຕິສຸກ. ເພື່ອຈະເຮັດສອງຢ່າງນີ້ໄດ້ເຮົາຕ້ອງອອກຄວາມພະຍາຍາມຫຼາຍແທ້ໆ. ຄືກັບທີ່ເຮົາໄດ້ຮຽນມາແລ້ວ ເປັນໄປໄດ້ທີ່ເຮົາຈະຮູ້ສຶກອິດສາ. (ຢກບ. 4:5) ເຮົາຢູ່ໃນໂລກທີ່ຜູ້ຄົນສົ່ງເສີມໃຫ້ເຮົາເປັນຄົນທີ່ອິດສາ. ແຕ່ຖ້າເຮົາປູກຝັງຄວາມຖ່ອມ ຄວາມພໍໃຈໃນສິ່ງທີ່ມີ ແລະຮູ້ຈັກຂອບໃຈ ເຮົາກໍຈະບໍ່ເປັນຄົນຂີ້ອິດສາ ແລະເຮົາກໍຈະຊ່ວຍສ້າງສັນຕິສຸກເຊິ່ງຈະເຮັດໃຫ້ເກີດຜົນເປັນຄວາມຖືກຕ້ອງຊອບທຳ.—ອ່ານຢາໂກໂບ 3:17, 18
ເພງ 130 ເຮົາຕ້ອງໃຫ້ອະໄພກັນ
a ອົງການຂອງພະເຢໂຫວາເປັນອົງການທີ່ມີສັນຕິສຸກ. ແຕ່ຖ້າເຮົາອິດສາຄົນອື່ນ ເຮົາກໍຈະທຳລາຍສັນຕິສຸກໃນອົງການ. ໃນບົດຄວາມນີ້ ເຮົາຈະພິຈາລະນາວ່າສິ່ງໃດທີ່ເຮັດໃຫ້ເກີດຄວາມອິດສາ ເຮົາຈະເອົາຊະນະນິດໄສທີ່ບໍ່ດີນີ້ໄດ້ແນວໃດ ແລະເຮົາຈະມີສ່ວນຊ່ວຍສ້າງສັນຕິສຸກໄດ້ແນວໃດ?
b ການອະທິບາຍສຳນວນ: ຕາມທີ່ບອກໄວ້ໃນຄຳພີໄບເບິນ ຄວາມອິດສາເຮັດໃຫ້ຄົນເຮົາບໍ່ພຽງແຕ່ຢາກມີໃນສິ່ງທີ່ຄົນອື່ນມີ ແຕ່ຢາກໃຫ້ຄົນນັ້ນສູນເສຍສິ່ງທີ່ມີນຳ.
c ຄຳອະທິບາຍຮູບພາບ: ໃນການປະຊຸມຂອງຄະນະຜູ້ດູແລ ຜູ້ດູແລສູງອາຍຸຄົນໜຶ່ງເຊິ່ງເປັນຜູ້ນຳການສຶກສາຫໍສັງເກດການຖືກຂໍໃຫ້ຝຶກຜູ້ດູແລທີ່ອາຍຸນ້ອຍກວ່າ. ເຖິງວ່າຜູ້ດູແລສູງອາຍຸຈະມັກນຳການສຶກສາຫໍສັງເກດການຫຼາຍ ແຕ່ລາວກໍພ້ອມທີ່ຈະເຮັດຕາມການຕັດສິນໃຈຂອງຄະນະຜູ້ດູແລໂດຍໃຫ້ຄຳແນະນຳທີ່ມີປະໂຫຍດແລະຊົມເຊີຍຜູ້ດູແລທີ່ອາຍຸນ້ອຍກວ່າຈາກໃຈ.