ບົດ 110
ຕີໂມເຕ—ຜູ້ຊ່ວຍຄົນໃໝ່ຂອງໂປໂລ
ຊາຍຫນຸ່ມທີ່ເຈົ້າເຫັນຢູ່ທີ່ນີ້ກັບອັກຄະສາວົກໂປໂລຄືຕີໂມເຕ. ຕີໂມເຕອາໄສຢູ່ກັບຄອບຄົວຂອງເຂົາໃນເມືອງລີສະທາ. ແມ່ເຂົາຊື່ເອິນິດແລະແມ່ເຖົ້າໂລອິດ.
ເທື່ອນີ້ເປັນເທື່ອທີສາມທີ່ໂປໂລໄດ້ມາຢາມລີສະທາ. ກ່ອນໜ້ານີ້ປະມານປີນຶ່ງ ໂປໂລແລະບານາບາໄດ້ເດີນທາງມາປ່າວປະກາດທີ່ນີ້. ແລະບັດນີ້ໂປໂລແລະສີລາເພື່ອນຂອງເພິ່ນໄດ້ກັບມາອີກ.
ເຈົ້າຮູ້ບໍວ່າໂປໂລພວມເວົ້າຫຍັງກັບຕີໂມເຕ? ເພິ່ນຖາມວ່າ: ‘ເຈົ້າພໍໃຈຈະໄປກັບສີລາແລະເຮົາບໍ? ເຈົ້າຈະຊ່ວຍເຮົາໄດ້ໃນການປະກາດແກ່ຜູ້ຄົນໃນດິນແດນທີ່ຢູ່ຫ່າງໄກ.’
ຕີໂມເຕຕອບວ່າ: ‘ຈ້າວ ຂ້າພະເຈົ້າຍິນດີໄປ.’ ດັ່ງນັ້ນບໍ່ດົນຫຼັງຈາກນັ້ນຕີໂມເຕກໍ່ລາຈາກຄອບຄົວຂອງເຂົາໄປກັບໂປໂລແລະສີລາ. ແຕ່ວ່າກ່ອນທີ່ເຮົາຈະຮຽນຮູ້ກ່ຽວກັບການເດີນທາງຂອງພວກເຂົາ ໃຫ້ເຮົາສືບເບິ່ງກ່ຽວກັບສິ່ງທີ່ໄດ້ເກີດຂຶ້ນແກ່ໂປໂລ. ເປັນໄລຍະເວລາປະມານ 17 ປີຕັ້ງແຕ່ພະເຍຊູໄດ້ປາກົດແກ່ເພິ່ນລະຫວ່າງທີ່ເດີນທາງໄປດາມາເຊ.
ເຈົ້າຄົງຈື່ໄດ້ວ່າ ໂປໂລໄປເມືອງດາມາເຊເພື່ອຈະເຮັດຮ້າຍແກ່ເຫຼົ່າສາວົກຂອງພະເຍຊູ ແຕ່ດຽວນີ້ເພິ່ນເອງເປັນສາວົກ! ຕໍ່ມາສັດຕູບາງຄົນວາງແຜນຈະຂ້າເພິ່ນເພາະບໍ່ມັກການສັ່ງສອນຂອງເພິ່ນກ່ຽວກັບພະເຍຊູ. ແຕ່ພວກສາວົກຊ່ວຍໂປໂລໃຫ້ຫຼົບໜີ. ເຂົາໃຫ້ເພິ່ນນັ່ງໃນກະບຸງແລ້ວຢ່ອນເພິ່ນລົງນອກກຳແພງເມືອງ.
ຫຼັງຈາກນັ້ນໂປໂລໄປປະກາດທີ່ເມືອງອັນຕີອົກ. ທີ່ເມືອງນີ້ເອງພວກສາວົກຂອງພະເຍຊູຖືກເອີ້ນວ່າຄລິດສະຕຽນເທື່ອທຳອິດ. ຄັນແລ້ວໂປໂລແລະບານາບາກໍ່ຖືກສົ່ງຈາກອັນຕີອົກໄປປະກາດຕາມປະເທດທີ່ຢູ່ຫ່າງໄກ. ເມືອງນຶ່ງທີ່ເຂົາຢ້ຽມຄືເມືອງລີສະທາຊຶ່ງເປັນບ້ານເກີດຂອງຕີໂມເຕ.
ບັດນີ້ປະມານປີນຶ່ງຫຼັງຈາກການເດີນທາງຮອບທຳອິດ ໂປໂລເດີນທາງກັບໄປເມືອງລີສະທາຮອບທີສອງ. ເມື່ອຕີໂມເຕອອກເດີນທາງກັບໂປໂລແລະສີລານັ້ນ ພວກເຂົາໄປໃສເຈົ້າຮູ້ບໍ? ເບິ່ງແຜນທີ່ແດ່ ແລະໃຫ້ເຮົາຮຽນຮູ້ສະຖານທີ່ຕ່າງໆບາງບ່ອນ.
ຕອນທຳອິດພວກເຂົາໄປອີໂກນີອຸມເມືອງທີ່ຢູ່ໃກ້ໆ ແລ້ວໄປເມືອງທີສອງຊື່ອັນຕີອົກ. ຫຼັງຈາກນັ້ນເຂົາເດີນທາງຂຶ້ນໄປເມືອງໂທອາດ ແລ້ວຂ້າມໄປທີ່ເມືອງຟີລິປີ ເທຊະໂລນີກແລະເບເລ. ເຈົ້າເຫັນເມືອງອາແຖນທີ່ແຜນທີ່ບໍ? ໂປໂລປະກາດທີ່ນັ້ນ. ຫຼັງຈາກນັ້ນເຂົາໃຊ້ເວລາປີເຄິ່ງປະກາດໃນເມືອງໂກລິນໂທ. ໃນທີ່ສຸດເຂົາແວ່ທີ່ເມືອງເອເຟດເປັນເວລາອັນສັ້ນ. ແລ້ວເຂົາກັບມາທາງເຮືອເຖິງເມືອງເຊຊາເຣ ແລະເດີນທາງຂຶ້ນໄປອັນຕີອົກຊຶ່ງເປັນເມືອງທີ່ໂປໂລພັກຢູ່.
ສະນັ້ນຕີໂມເຕຈຶ່ງເດີນທາງຫຼາຍຮ້ອຍກິໂລແມັດຊ່ວຍໂປໂລປະກາດ “ຂ່າວດີ” ແລະເລີ່ມຕັ້ງປະຊາຄົມຄລິດສະຕຽນຫຼາຍແຫ່ງ. ເມື່ອເຈົ້າເຕີບໂຕຂຶ້ນ ເຈົ້າຈະເປັນຜູ້ຮັບໃຊ້ທີ່ສັດຊື່ຂອງພະເຈົ້າຄືຕີໂມເຕບໍ?
ກິດຈະການ 9:19-30; 11:19-26; ບົດ 13 ເຖິງ 17; 18:1-22.