ບົດທີ 100
ໂປໂລກັບຕີໂມທຽວ
ຕີໂມທຽວເປັນພີ່ນ້ອງຊາຍໜຸ່ມໃນປະຊາຄົມລີຊະທາ. ພໍ່ຂອງລາວເປັນຄົນກຣີກແລະແມ່ຂອງລາວເປັນຄົນຢິວ. ຢູນິເກແມ່ຂອງຕີໂມທຽວແລະໂລອີແມ່ຕູ້ຂອງລາວໄດ້ສອນເລື່ອງພະເຢໂຫວາໃຫ້ລາວຕັ້ງແຕ່ລາວຍັງນ້ອຍໆ.
ຕອນທີ່ໂປໂລເດີນທາງໄປປະກາດຮອບທີສອງ ລາວໄດ້ໄປຢາມປະຊາຄົມລີຊະທາແລະສັງເກດເຫັນວ່າຕີໂມທຽວຮັກພີ່ນ້ອງຫຼາຍແທ້ໆແລະມັກຊ່ວຍເຫຼືອພີ່ນ້ອງ ລາວຈຶ່ງຊວນຕີໂມທຽວເດີນທາງໄປນຳ. ແລ້ວໂປໂລກໍຝຶກຕີໂມທຽວໃຫ້ປະກາດແລະສອນຂ່າວດີເກັ່ງຂຶ້ນ.
ພະລັງບໍລິສຸດຂອງພະເຈົ້າໄດ້ຊີ້ນຳໂປໂລແລະຕີໂມທຽວໃຫ້ຮູ້ວ່າຄວນໄປປະກາດຢູ່ໃສ. ຄືນມື້ໜຶ່ງ ໂປໂລເຫັນນິມິດວ່າມີຜູ້ຊາຍຄົນໜຶ່ງມາບອກລາວໃຫ້ໄປຊ່ວຍຢູ່ແຂວງມາເກໂດເນຍ. ໂປໂລ ຕີໂມທຽວ ຊີລາ ແລະລູກາຈຶ່ງໄປປະກາດຢູ່ບ່ອນນັ້ນແລະຕັ້ງປະຊາຄົມຢູ່ຫັ້ນ.
ຢູ່ເມືອງເທຊະໂລນິກແຂວງມາເກໂດເນຍ ມີຜູ້ຊາຍຜູ້ຍິງບັກຫລາຍໆຄົນໄດ້ເຂົ້າມາເປັນຄລິດສະຕຽນ. ແຕ່ຄົນຢິວບາງຄົນໃນເມືອງນັ້ນອິດສາໂປໂລກັບໝູ່ ເຂົາເຈົ້າຈຶ່ງກໍ່ຄວາມວຸ່ນວາຍແລະລາກພີ່ນ້ອງບາງຄົນໄປຫາຜູ້ປົກຄອງເມືອງ ແລະຮ້ອງວ່າ: ‘ພວກນີ້ເປັນສັດຕູກັບລັດຖະບານໂຣມ!’ ໂປໂລກັບຕີໂມທຽວກຳລັງຕົກຢູ່ໃນອັນຕະລາຍ. ເຂົາເຈົ້າຈຶ່ງຟ້າວໜີໄປເມືອງເບເຣຍໃນຄືນມື້ນັ້ນເລີຍ.
ຄົນທີ່ຢູ່ເມືອງເບເຣຍມັກຟັງຂ່າວດີ. ຫຼາຍຄົນໃນເມືອງນີ້ລວມທັງຄົນກຣີກແລະຄົນຢິວໄດ້ເຂົ້າມາເປັນຄລິດສະຕຽນ. ແຕ່ກໍມີຄົນຢິວບາງຄົນທີ່ຢູ່ເມືອງເທຊະໂລນິກໄດ້ນຳມາສ້າງຄວາມວຸ່ນວາຍຢູ່ນີ້. ໂປໂລຈຶ່ງໄປເມືອງອາແຖນ ແຕ່ຕີໂມທຽວກັບຊີລາຍັງຢູ່ເມືອງເບເຣຍຕໍ່ເພື່ອຊ່ວຍພີ່ນ້ອງໃຫ້ມີຄວາມເຊື່ອເຂັ້ມແຂງ. ຕໍ່ມາ ໂປໂລໄດ້ສົ່ງຕີໂມທຽວກັບໄປເມືອງເທຊະໂລນິກເພື່ອຊ່ວຍພີ່ນ້ອງທີ່ຮັບມືກັບການຂົ່ມເຫງຢ່າງໜັກ. ຈາກນັ້ນ ລາວກໍສົ່ງຕີໂມທຽວໄປຢາມປະຊາຄົມອື່ນໆເພື່ອໃຫ້ກຳລັງໃຈພີ່ນ້ອງ.
ໂປໂລບອກຕີໂມທຽວວ່າ: ‘ຄົນທີ່ຢາກຮັບໃຊ້ພະເຢໂຫວາຈະຖືກຂົ່ມເຫງ.’ ຕີໂມທຽວກໍຖືກຂົ່ມເຫງແລະຖືກຂັງຄຸກຍ້ອນຄວາມເຊື່ອ. ແຕ່ລາວກໍມີຄວາມສຸກທີ່ໄດ້ພິສູດໃຫ້ພະເຢໂຫວາເຫັນວ່າລາວພັກດີຕໍ່ເພິ່ນ.
ໂປໂລບອກພີ່ນ້ອງທີ່ຢູ່ເມືອງຟີລິບປອຍວ່າ: ‘ຂ້ອຍຈະສົ່ງຕີໂມທຽວໄປຫາພວກເຈົ້າ. ລາວຈະສອນພວກເຈົ້າໃຫ້ຮັບໃຊ້ພະເຢໂຫວາ ແລະຈະຝຶກພວກເຈົ້າໃຫ້ປະກາດຂ່າວດີ.’ ໂປໂລຮູ້ວ່າລາວສາມາດໄວ້ໃຈຕີໂມທຽວໄດ້ ເພາະເຂົາເຈົ້າເປັນໝູ່ກັນແລະເຮັດວຽກຮັບໃຊ້ນຳກັນມາຫຼາຍປີ.
“ຂ້ອຍບໍ່ມີໃຜເລີຍທີ່ມີນ້ຳໃຈຄືກັບລາວທີ່ຈະຊ່ວຍເບິ່ງແຍງຄວາມຈຳເປັນຂອງພວກເຈົ້າແທ້ໆ. ຄົນອື່ນຄິດເຖິງແຕ່ໂຕເອງແລະບໍ່ໄດ້ສົນໃຈສິ່ງທີ່ພະເຢຊູຄລິດຕ້ອງການ.”—ຟີລິບປອຍ 2:20, 21