ບົດ 38
ໂຍຮັນຂາດຄວາມເຊື່ອບໍ?
ໂຍຮັນຜູ້ໃຫ້ບັບເຕມາເຊິ່ງຕອນນີ້ຖືກຄຸກເກືອບໜຶ່ງປີແລ້ວ ໄດ້ຂ່າວການຟື້ນຄືນຈາກຕາຍຂອງລູກຊາຍຍິງໝ້າຍຢູ່ເມືອງນາອີນ. ເຖິງແນວນັ້ນກໍຕາມໂຍຮັນຢາກໄດ້ຂ່າວຈາກພະເຍຊູໂດຍກົງເຖິງຄວາມໝາຍກ່ຽວກັບເຫດການນັ້ນ ດັ່ງນັ້ນທ່ານຈຶ່ງໃຊ້ລູກສິດສອງຄົນໄປຖາມວ່າ “ພະອົງເປັນຜູ້ທີ່ຈະມາຫຼື ຫຼືພວກຂ້າພະເຈົ້າຕ້ອງຈະຄອງຫາຜູ້ໜຶ່ງອີກ”?
ນັ້ນອາດຈະເປັນຄຳຖາມທີ່ຟັງແລ້ວແປກໆ ໂດຍສະເພາະໂຍຮັນທີ່ເຄີຍເຫັນພະວິນຍານຂອງພະເຈົ້າລົງມາສະຖິດກັບພະເຍຊູ ພ້ອມທັງໄດ້ຍິນສຽງຂອງພະເຈົ້າສະແດງຄວາມໂປດປານເມື່ອທ່ານໃຫ້ພະເຍຊູຮັບບັບເຕມາເກືອບສອງປີແລ້ວ. ຄຳຖາມຂອງໂຍຮັນອາດເຮັດໃຫ້ບາງຄົນລົງຄວາມເຫັນວ່າຄວາມເຊື່ອຂອງທ່ານພວມອ່ອນລົງ, ແຕ່ບໍ່ເປັນເຊັ່ນນັ້ນ. ຖ້າໂຍຮັນເລີ່ມເກີດຄວາມສົງໄສ ພະເຍຊູຄົງຈະບໍ່ຍົກຍ້ອງໂຍຮັນ ດັ່ງຄືພະອົງກ່າວໃນໂອກາດນີ້. ສະນັ້ນ ຍ້ອນຫຍັງໂຍຮັນຈຶ່ງຖາມແບບນີ້?
ໂຍຮັນອາດຈະຢາກໄດ້ການຢືນຢັນຈາກພະເຍຊູວ່າພະອົງເປັນເມຊີເທົ່ານັ້ນ. ສິ່ງນີ້ຈະເປັນການຫນູນໃຈຫຼາຍແກ່ໂຍຮັນໃນເວລາທີ່ທ່ານຫງອຍເຫງົາຢູ່ໃນຄຸກ. ເຖິງແນວນັ້ນກໍຕາມເບິ່ງຄືວ່າຄຳຖາມຂອງໂຍຮັນໝາຍເຖິງຫຼາຍກວ່ານັ້ນອີກ. ເຫັນໄດ້ແຈ້ງວ່າທ່ານຕ້ອງການຮູ້ວ່າຈະມີຄົນໃດອີກມາສືບຕຳແໜ່ງ ເຊິ່ງຈະເຮັດໃຫ້ທຸກສິ່ງສຳເລັດເປັນຈິງຕາມທີ່ພະຍາກອນໄວ້ວ່າຈະສຳເລັດໃນຕົວພະເມຊີ.
ຕາມຄຳພະຍາກອນໃນຄຳພີໄບເບິນທີ່ໂຍຮັນຮູ້ຈັກດີວ່າ ຜູ້ຖືກເຈີມຂອງພະເຈົ້າຈະໄດ້ເປັນກະສັດ ເປັນຜູ້ຊ່ວຍໃຫ້ລອດ, ແຕ່ໂຍຮັນຍັງຕິດຄຸກຢູ່ ເຖິງວ່າພະເຍຊູຮັບບັບເຕມາໄດ້ຫຼາຍເດືອນແລ້ວ. ດັ່ງນັ້ນໂຍຮັນຄົງຈະຖາມພະເຍຊູວ່າ ‘ພະອົງເປັນທ່ານຜູ້ນັ້ນທີ່ຈະຕັ້ງລາຊະອານາຈັກຂອງພະເຈົ້າດ້ວຍລິດອຳນາດແທ້ໆ ຫຼືຈະມີອີກຜູ້ໜຶ່ງມາສືບຕຳແໜ່ງເຊິ່ງພວກເຮົາຄວນຄອງຫາໃຫ້ສຳເລັດຕາມຄຳພະຍາກອນອັນເລີດລ້ຳທີ່ກຳນົດໄວ້ກ່ຽວກັບສະຫງ່າລາສີຂອງພະເມຊີບໍ?’
ແທນທີ່ພະເຍຊູຈະບອກລູກສິດຂອງໂຍຮັນວ່າ ‘ແນ່ນອນ ເຮົາເປັນຜູ້ນັ້ນທີ່ຈະມາ!’ ໃນຕອນນັ້ນແຫຼະ ພະອົງໄດ້ສະແດງການອັດສະຈັນໂດຍການປົວຄົນເຈັບປ່ວຍຫຼາຍຄົນໃຫ້ດີຈາກພະຍາດຕ່າງໆ ຫຼາຍຢ່າງ. ແລ້ວພະອົງບອກລູກສິດສອງຄົນນັ້ນວ່າ “ທ່ານຈົ່ງໄປເລົ່າເລື່ອງການທັງຫຼາຍທີ່ທ່ານໄດ້ຍິນແລະໄດ້ເຫັນໃຫ້ທ່ານໂຍຮັນຟັງ. ຄືວ່າຫມູ່ຄົນຕາບອດກໍເຫັນຮຸ່ງມາອີກ ແລະຫມູ່ຄົນຂາເຢກຂາຫ້ານກໍຍ່າງໄປ ຫມູ່ຄົນຂີ້ທູດເປັນດີສະອາດແລ້ວ ແລະຫມູ່ຄົນຫູໜວກກໍຍິນໄດ້ ແລະຄົນຕາຍແລ້ວກໍຄືນມາຈາກຕາຍ ແລະຄຳປະເສີດເປັນທີ່ເທສະໜາແກ່ຄົນທຸກຍາກທັງຫຼາຍ.”
ອັນນີ້ໝາຍຄວາມວ່າ ຄຳຖາມຂອງໂຍຮັນສໍ່ວ່າທ່ານຄາດໝາຍຈະເຫັນພະເຍຊູທຳການອັດສະຈັນຫຼາຍກວ່າພະອົງໄດ້ທຳຢູ່ ຫຼືອາດຈະປົດປ່ອຍໂຍຮັນໃຫ້ເປັນອິດສະຫຼະ. ຢ່າງໃດກໍຕາມ ພະເຍຊູບອກໂຍຮັນບໍ່ໃຫ້ຄາດໝາຍຍິ່ງກວ່າການອັດສະຈັນທີ່ກະທຳຢູ່ແລ້ວ.
ເມື່ອລູກສິດຂອງໂຍຮັນຈາກໄປ ພະເຍຊູປິ່ນໄປກ່າວກັບຝູງຊົນວ່າໂຍຮັນເປັນ “ຜູ້ຮັບໃຊ້” ຂອງພະເຢໂຫວາ ຕາມທີ່ກ່າວໄວ້ລ່ວງໜ້າໃນມາລາກີ 3:1 ແລະເປັນຜູ້ພະຍາກອນເອລີດັ່ງທີ່ໄດ້ບອກໄວ້ໃນມາລາກີ 4:5, 6. ດັ່ງນັ້ນພະອົງໄດ້ຍົກຍ້ອງໂຍຮັນໃຫ້ເທົ່າກັບຜູ້ພະຍາກອນອື່ນໆ ທີ່ເຄີຍຢູ່ກ່ອນທ່ານ ໂດຍຊີ້ແຈງວ່າ “ຈິງແທ້ ເຮົາກ່າວແກ່ທ່ານທັງຫຼາຍວ່າ ໃນທ່າມກາງຄົນທັງຫຼາຍທີ່ໄດ້ເກີດແຕ່ຜູ້ຍິງທ່ານໃຫຍ່ກວ່າທ່ານໂຍຮັນບັບຕິດໂຕ ກໍບໍ່ເກີດມາສັກເທື່ອ ແຕ່ວ່າຄົນເລັກນ້ອຍທີ່ສຸດໃນແຜ່ນດິນສະຫວັນກໍໃຫຍ່ກວ່າທ່ານໂຍຮັນອີກ. ແຕ່ວ່າຕັ້ງແຕ່ເວລາວັນແຫ່ງທ່ານໂຍຮັນບັບຕິດໂຕຈົນເຖິງທຸກວັນນີ້ ແຜ່ນດິນສະຫວັນເປັນທີ່ຊີງເອົາ ແລະຜູ້ທີ່ເປັນຄົນຊີງກໍຍາດເອົາແຜ່ນດິນນັ້ນ.”
ໃນຂໍ້ຄວາມນີ້ ພະເຍຊູສະແດງວ່າໂຍຮັນຈະບໍ່ຢູ່ໃນລາຊະອານາຈັກຝ່າຍສະຫວັນ ເນື່ອງຈາກຜູ້ນ້ອຍທີ່ສຸດໃນແຜ່ນດິນສະຫວັນກໍໃຫຍ່ກວ່າໂຍຮັນອີກ. ໂຍຮັນກຽມທາງໄວ້ໃຫ້ພະເຍຊູແຕ່ທ່ານເອງໄດ້ຕາຍກ່ອນພະຄລິດປະທັບຕາຄຳສັນຍາໄມຕີຫຼືຂໍ້ຕົກລົງກັບພວກສາວົກຂອງພະອົງ ເພື່ອໃຫ້ເຂົາຮ່ວມປົກຄອງກັບພະອົງໃນລາຊະອານາຈັກ. ນັ້ນເປັນເຫດທີ່ພະເຍຊູກ່າວວ່າໂຍຮັນຈະບໍ່ຢູ່ໃນລາຊະອານາຈັກຝ່າຍສະຫວັນ. ດັ່ງນັ້ນທ່ານໂຍຮັນຈະເປັນພົນລະເມືອງຂອງແຜ່ນດິນໂລກພາຍໃຕ້ລາຊະອານາຈັກຂອງພະເຈົ້າ. ລຶກາ 7:18-30; ມັດທາຽ 11:2-15.
▪ ຍ້ອນຫຍັງໂຍຮັນຈຶ່ງຖາມວ່າພະເຍຊູເປັນຜູ້ນັ້ນທີ່ຈະມາຫຼືບໍ່ ຫຼືຄວນຈະຄອງຫາອີກຜູ້ໜຶ່ງ?
▪ ພະເຍຊູກ່າວເຖິງຄຳພະຍາກອນໃດທີ່ສຳເລັດສົມຈິງກັບໂຍຮັນ?
▪ ເປັນຫຍັງໂຍຮັນຜູ້ໃຫ້ບັບເຕມາຈະບໍ່ຢູ່ໃນສະຫວັນກັບພະເຍຊູ?