ບົດ 50
ຕຽມປະເຊີນໜ້າການຂົ່ມເຫງ
ຫຼັງຈາກທີ່ໄດ້ສອນບັນດາສາວົກກ່ຽວກັບວິທີປະຕິບັດງານປະກາດແລ້ວ ພະເຍຊູຈຶ່ງເຕືອນເຂົາເຈົ້າໃຫ້ຮູ້ໄດ້ເຖິງຜູ້ຕໍ່ຕ້ານ. ພະອົງກ່າວວ່າ “ຈົ່ງເບິ່ງຝ່າຍເຮົາໆ ໃຊ້ທ່ານທັງຫຼາຍໄປເໝືອນເປັນແພະ [“ແກະ,” ລ.ມ.] ໃນທ່າມກາງຝູງໝາໄນ . . . ແລະຈົ່ງລະວັງໃຫ້ດີດ້ວຍຄົນທັງຫຼາຍ ເພາະວ່າເຂົາຈະມອບທ່ານທັງຫຼາຍໄວ້ລົງສານຕະລາການ ແລະເຂົາຈະຂ້ຽນທ່ານທັງຫຼາຍໃນໂຮງທຳແຫ່ງເຂົາ. ແລະເຂົາຈະເອົາທ່ານທັງຫຼາຍໄປຕໍ່ໜ້າຜູ້ຄຸ້ມຄອງແລະກະສັດທັງຫຼາຍ.”
ເຖິງວ່າສາວົກຂອງພະອົງຈະປະເຊີນໜ້າກັບການຂົ່ມເຫງຢ່າງແສນສາຫັດກໍຕາມ ພະເຍຊູໄດ້ໃຫ້ຄຳສັນຍາທີ່ໃຫ້ກຳລັງໃຈວ່າ “ເມື່ອເຂົາຈະມອບທ່ານທັງຫຼາຍໄວ້ນັ້ນ ຢ່າຄຶດອຸກໃຈວ່າຈະປາກຢ່າງໃດແລະຈະເວົ້າສິ່ງໃດ ດ້ວຍວ່າສິ່ງນັ້ນທີ່ທ່ານທັງຫຼາຍຕ້ອງເວົ້າ ກໍຈະເປັນທີ່ປະທານໃຫ້ແກ່ທ່ານໃນເວລາໂມງນັ້ນ. ເພາະວ່າທ່ານທັງຫຼາຍຈະບໍ່ເປັນຜູ້ປາກ ແຕ່ວ່າເປັນພະວິນຍານແຫ່ງພະບິດາຂອງທ່ານທັງຫຼາຍທີ່ປາກໃນທ່ານທັງຫຼາຍ.”
ພະເຍຊູກ່າວຕໍ່ໄປວ່າ “ອ້າຍຈະມອບນ້ອງໄວ້ໃຫ້ຕາຍ ແລະພໍ່ຈະມອບໄວ້ລູກ ແລະລູກຈະຢືນຂຶ້ນຕໍ່ພໍ່ແມ່ແລະຈະໃຫ້ເຂົາຕາຍເສຍ.” ພະອົງກ່າວເສີມອີກວ່າ “ຄົນທັງປວງຈະກຽດຊັງທ່ານທັງຫຼາຍເພາະເຫັນແກ່ນາມຊື່ຂອງເຮົາ ແຕ່ວ່າຜູ້ທີ່ຈະອົດທົນເຖິງທີ່ສຸດ ຜູ້ນັ້ນຈະໄດ້ພົ້ນ.”
ການປະກາດເປັນວຽກງານສຳຄັນທີ່ສຸດ. ສະນັ້ນ ພະເຍຊູຈຶ່ງເນັ້ນເຖິງຄວາມຈຳເປັນທີ່ຕ້ອງຮອບຄອບເພື່ອຈະດຳເນີນງານນັ້ນໄດ້ຢ່າງສະດວກ. ພະອົງກ່າວວ່າ “ເມື່ອເຂົາຈະຂົ່ມເຫງທ່ານທັງຫຼາຍໃນເມືອງນີ້ ຈົ່ງປົບໜີໄປໃນເມືອງນັ້ນ ເຫດວ່າ ຈິງແທ້ເຮົາກ່າວແກ່ທ່ານທັງຫຼາຍວ່າ ທ່ານທັງຫຼາຍຈະບໍ່ທັນໄປທົ່ວເມືອງທັງຫຼາຍແຫ່ງພວກຍິດສະລາເອນກ່ອນບຸດມະນຸດຈະມາແລ້ວ.”
ແມ່ນຢູ່ພະເຍຊູໃຫ້ຄຳແນະນຳ ຄຳເຕືອນ ແລະຄຳຫນູນໃຈນີ້ແກ່ອັກຄະສາວົກ 12 ຄົນຂອງພະອົງກໍຈິງ ແຕ່ມັນຫາກມີຄວາມໝາຍຕໍ່ບັນດາຄົນທີ່ມີສ່ວນຮ່ວມໃນການປະກາດທົ່ວໂລກ ພາຍຫຼັງທີ່ພະອົງສິ້ນພະຊົນແລ້ວຄືນຈາກຕາຍ. ນີ້ປາກົດໃນຄຳກ່າວຂອງພະອົງທີ່ວ່າ “ຄົນທັງປວງຈະກຽດຊັງ” ສາວົກຂອງພະອົງ ບໍ່ພຽງແຕ່ຊາດຍິດສະລາເອນທີ່ພວກອັກຄະສາວົກປະກາດນຳ. ນອກຈາກນັ້ນ ຕອນທີ່ພະເຍຊູສົ່ງເຫຼົ່າອັກຄະສາວົກອອກໄປປະກາດໄລຍະສັ້ນ ເຂົາບໍ່ໄດ້ຖືກຟ້ອງຮ້ອງຕໍ່ໜ້າເຈົ້າເມືອງແລະກະສັດ. ອີກອັນໜຶ່ງ ຜູ້ມີຄວາມເຊື່ອສະໄໝນັ້ນ ບໍ່ໄດ້ຖືກສະມາຊິກໃນຄອບຄົວມອບເຂົາໄວ້ໃຫ້ເຖິງແກ່ຄວາມຕາຍ.
ດັ່ງນັ້ນແລ້ວ ເມື່ອພະອົງກ່າວຕໍ່ສາວົກທັງຫຼາຍໃຫ້ຮູ້ວ່າເຂົາເຈົ້າຈະບໍ່ທັນປະກາດໄປທົ່ວເຖິງ “ກ່ອນບຸດມະນຸດຈະມາແລ້ວ” ນັ້ນ ພະເຍຊູກ່າວເຊີງພະຍາກອນໃຫ້ເຮົາຮູ້ວ່າ ພວກສາວົກຄົງຈະບໍ່ທັນປະກາດຂ່າວການຈັດຕັ້ງລາຊະອານາຈັກຂອງພະເຈົ້າໄປທົ່ວແຜ່ນດິນໂລກໃຫ້ທົ່ວເຖິງກ່ອນພະເຍຊູຄລິດກະສັດອົງສະຫງ່າລາສີຈະມາໃນຖານະຜູ້ພິພາກສາໂທດຂອງພະເຢໂຫວາໃນອາຣ໌ມາເກດອນ.
ພະເຍຊູໃຫ້ຄຳຊີ້ແນະກ່ຽວກັບການປະກາດຕໍ່ໄປວ່າ “ລູກສິດບໍ່ໃຫຍ່ກວ່ານາຍຄູແຫ່ງຕົນ ແລະຂ້າໃຊ້ບໍ່ໃຫຍ່ກວ່າເຈົ້ານາຍແຫ່ງຕົນ.” ສະນັ້ນ ສາວົກຂອງພະເຍຊູຕ້ອງຄາດໝາຍວ່າ ຈະໄດ້ຮັບການປະຕິບັດຢ່າງຊົ່ວຮ້າຍ ແລະຖືກຂົ່ມເຫງເໝືອນດັ່ງພະອົງໄດ້ຮັບເນື່ອງຈາກການປະກາດເຖິງລາຊະອານາຈັກຂອງພະເຈົ້າ. ເຖິງແນວນັ້ນກໍຕາມ ພະອົງເຕືອນວ່າ “ຢ່າຊູຢ້ານຄົນທັງຫຼາຍທີ່ຂ້າຕົວຄົນ ແຕ່ວ່າອາດຂ້າຈິດໃຈ [“ຈິດວິນຍານ,” ລ.ມ.] ກໍບໍ່ໄດ້ ແຕ່ວ່າດີກວ່າຈະຢ້ານພະອົງຜູ້ມີອຳນາດຈະໃຫ້ທັງຈິດໃຈ [“ຈິດວິນຍານ,” ລ.ມ.] ກັບກາຍຈິບຫາຍໄປໃນໝໍ້ນາລົກ [“ກີເຮນນາ,” ລ.ມ.] ໄດ້.”
ພະເຍຊູວາງຕົວຢ່າງໃນເລື່ອງນີ້ໄວ້. ພະອົງກ້າຫານແລະອົດທົນຈົນກະທັ່ງຕາຍ ແທນທີ່ຈະເລີກຈົງຮັກພັກດີຕໍ່ພະເຢໂຫວາພະເຈົ້າຜູ້ມີລິດທານຸພາບທຸກປະການ. ແມ່ນແລ້ວ ພະເຢໂຫວາສາມາດທຳລາຍ “ຈິດວິນຍານ” ຂອງຄົນເຮົາ (ໃນກໍລະນີນີ້ໝາຍເຖິງຄວາມຫວັງໃນອະນາຄົດຂອງຄົນເຮົາໃນຖານະເປັນຈິດວິນຍານທີ່ມີຊີວິດຢູ່) ຫຼືປຸກຄົນໃຫ້ຟື້ນຈາກຕາຍໄດ້ ເພື່ອເຂົາຈະຊື່ນຊົມກັບຊີວິດຕະຫຼອດໄປ. ຖືວ່າ ພະເຢໂຫວາຊ່າງເປັນພະບິດາທາງພາກສະຫວັນທີ່ປ່ຽມດ້ວຍຄວາມຮັກແລະຄວາມເມດຕາແທ້ໆ!
ຖັດຈາກນັ້ນ ພະເຍຊູໃຫ້ກຳລັງໃຈເຫຼົ່າສາວົກດ້ວຍຄຳອຸປະມາທີ່ເນັ້ນເຖິງການໃຝ່ໃຈທີ່ປ່ຽມດ້ວຍຄວາມຮັກເຊິ່ງພະເຢໂຫວາມີຕໍ່ເຂົາເຈົ້າ. ພະອົງຖາມວ່າ “ນົກຈອກສອງຕົວ ເຂົາຂາຍລົດໜຶ່ງ [“ອັດໜຶ່ງ,” ປ.ມ.] ບໍ່ໃຊ່ຫຼື ແລະແຕ່ນົກນັ້ນຕົວດຽວຈະຕົກທີ່ດິນກໍບໍ່ໄດ້ຖ້າບໍ່ແມ່ນນ້ຳໃຈແຫ່ງພະບິດາຂອງທ່ານທັງຫຼາຍ ແລະຝ່າຍທ່ານທັງຫຼາຍແມ່ນຜົມທີ່ຫົວຂອງທ່ານເປັນທີ່ນັບໄວ້ແລ້ວທຸກເສັ້ນ. ເຫດສັນນີ້ ຢ່າຊູຢ້ານ ທ່ານທັງຫຼາຍປະເສີດກວ່ານົກຈອກຫຼາຍຕົວ.”
ຂ່າວສານເລື່ອງລາຊະອານາຈັກທີ່ພະເຍຊູມອບໝາຍໃຫ້ສາວົກຂອງພະອົງປະກາດນັ້ນ ໄດ້ແບ່ງແຍກຄົນໃນຄອບຄົວ ເພາະລາງຄົນໃນຄອບຄົວໄດ້ຮັບເອົາຂ່າວສານນັ້ນ ແລະມີລາງຄົນໄດ້ປະຕິເສດ. ພະອົງຊີ້ແຈງວ່າ “ຢ່າຄຶດວ່າ ເຮົາໄດ້ເອົາຄວາມສຸກສຳລານມາໃຊ້ທີ່ແຜ່ນດິນໂລກ ເຮົາໄດ້ເອົາບໍ່ໃຊ່ຄວາມສຸກສຳລານ ແຕ່ວ່າ ດາບມາໃຊ້.” ດ້ວຍເຫດນີ້ ຫາກສະມາຊິກຄົນໃດໃນຄອບຄົວຍຶດເອົາຄວາມຈິງຈາກຄຳພີໄບເບິນ ຈະຕ້ອງເປັນຄົນກ້າຫານ. ພະເຍຊູກ່າວວ່າ “ຜູ້ທີ່ຮັກພໍ່ຫຼືແມ່ຫຼາຍກວ່າຮັກເຮົາກໍບໍ່ສົມຄວນກັບເຮົາ ແລະຜູ້ທີ່ຮັກລູກຊາຍຫຼືລູກຍິງຫຼາຍກວ່າຮັກເຮົາກໍບໍ່ສົມຄວນກັບເຮົາ.”
ຕອນທ້າຍຂອງຄວາມແນະນຳ ພະເຍຊູຊີ້ແຈງວ່າຄົນເຫຼົ່ານັ້ນທີ່ຮັບເອົາສາວົກຂອງພະອົງກໍຮັບເອົາພະອົງໄປນຳ. “ຄົນທຸກຄົນທີ່ຈະເອົານ້ຳເຢັນແຕ່ຈອກດຽວໃຫ້ກິນແກ່ຜູ້ໜຶ່ງໃນຄົນເລັກນ້ອຍຫມູ່ນີ້ ເພາະເຫດເປັນລູກສິດ ຈິງແທ້ ເຮົາກ່າວແກ່ທ່ານທັງຫຼາຍວ່າ ຜູ້ນັ້ນຈະບໍ່ເສຍບຳເໜັດແຫ່ງຕົນ.” ມັດທາຽ 10:16-42.
▪ ພະເຍຊູໃຫ້ຄຳເຕືອນຫຍັງແກ່ພວກສາວົກຂອງພະອົງ?
▪ ພະອົງຫນູນກຳລັງໃຈແລະປອບໂຍນເຂົາຢ່າງໃດ?
▪ ຍ້ອນເຫດຜົນຫຍັງຄຳແນະນຳຂອງພະເຍຊູຈຶ່ງໃຊ້ໄດ້ກັບຄລິດສະຕຽນໃນສະໄໝປັດຈຸບັນນຳອີກ?
▪ ສາວົກຂອງພະເຍຊູບໍ່ໃຫຍ່ກວ່າຄູຂອງຕົນໃນຄວາມໝາຍໃດ?