ບົດສາມ
ຈົ່ງຍຶດໝັ້ນກັບພະຄຳຂອງພະເຈົ້າ
1. (ກ) ຊາວຍິດສະລາເອນບູຮານໄດ້ປະສົບຄວາມເປັນຈິງແຫ່ງຄຳກ່າວຂອງພະເຈົ້າຢ່າງໃດ? (ຂ) ເປັນຫຍັງເລື່ອງນັ້ນຈຶ່ງເປັນສິ່ງທີ່ໜ້າສົນໃຈສຳລັບພວກເຮົາ?
“ທ່ານທັງຫຼາຍກໍຮູ້ຈັກດ້ວຍສຸດໃຈແລະດ້ວຍສຸດຈິດວ່າ ແຕ່ສັບພະຄຳອັນດີປະເສີດທີ່ພະເຢໂຫວາພະເຈົ້າຂອງທ່ານໄດ້ກ່າວເຖິງທ່ານ ບໍ່ມີຂໍ້ດຽວໄດ້ຕົກລົງ ສາລະພັດໄດ້ບັງເກີດມາແກ່ທ່ານ ບໍ່ມີຂໍ້ດຽວຕົກລົງ [“ໂດຍບໍ່ມີຂໍ້ໃດຂາດຕົກບົກພ່ອງ,” ສະບັບ 1997].” (ໂຢຊວຍ 23:14-16) ນີ້ແມ່ນສິ່ງທີ່ໂຢຊວຍໄດ້ບອກກັບຜູ້ເຖົ້າຜູ້ແກ່ແຫ່ງຊາດຍິດສະລາເອນຫຼັງຈາກທີ່ເຂົາເຈົ້າໄດ້ຕັ້ງຫຼັກປັກຖານໃນແຜ່ນດິນທີ່ພະເຢໂຫວາສັນຍາໄວ້. ແມ່ນແລ້ວ ຄຳສັນຍາຂອງພະເຢໂຫວາເຫັນໄດ້ວ່າໄວ້ວາງໃຈໄດ້. ຂໍ້ຄວາມເຫຼົ່ານັ້ນ ລວມທັງສ່ວນອື່ນໆຂອງຄຳພີໄບເບິນ ໄດ້ມີການເກັບຮັກສາໄວ້ເປັນຢ່າງດີເພື່ອ “ພວກເຮົາຈະມີຄວາມຫວັງ.”—ໂລມ 15:4, ທ.ປ.
2. (ກ) ຄຳວ່າຄຳພີໄບເບິນ “ເປັນດ້ວຍພະວິນຍານຂອງພະເຈົ້າ” ໝາຍຄວາມວ່າຢ່າງໃດ? (ຂ) ການທີ່ຮູ້ວ່າຄຳພີໄບເບິນເປັນດ້ວຍພະວິນຍານຫຼືໄດ້ຮັບການດົນໃຈຈາກພະເຈົ້າເຮັດໃຫ້ເຮົາມີໜ້າທີ່ຮັບຜິດຊອບຫຍັງແດ່?
2 ເຖິງວ່າຄຳພີໄບເບິນໄດ້ຮັບການຂຽນຂຶ້ນໂດຍມະນຸດປະມານ 40 ຄົນກໍຕາມ ແຕ່ພະເຢໂຫວາເອງເປັນຜູ້ປະພັນ. ນີ້ໝາຍຄວາມວ່າພະອົງເປັນຜູ້ຊີ້ນຳມະນຸດໃຫ້ຂຽນທຸກສິ່ງລົງໃນຄຳພີໄບເບິນບໍ? ແມ່ນແລ້ວ. ພະເຢໂຫວາກະທຳສິ່ງນັ້ນໂດຍທາງພະວິນຍານບໍລິສຸດທີ່ມີລິດເດດ ຫຼືພະລັງປະຕິບັດການຂອງພະອົງເອງ. ອັກຄະສາວົກໂປໂລກ່າວຕາມຄວາມເປັນຈິງວ່າ “ພະຄຳພີໝົດສິ້ນເປັນດ້ວຍພະວິນຍານຂອງພະເຈົ້າ . . . ເພື່ອຄົນຂອງພະເຈົ້າຈະເຖິງທີ່ສຳເລັດແລະຊຳນານຈະກະທຳການດີທຸກຢ່າງ.” ຄົນທົ່ວໄປຈາກທີ່ຕ່າງໆຜູ້ເຊິ່ງໝັ້ນໃຈວ່າຄຳພີໄບເບິນມາຈາກພະເຈົ້າ ຕ່າງກໍໃສ່ໃຈຟັງແລະປັບປຸງການດຳເນີນຊີວິດໂດຍນຳໃຊ້ຫຼັກຄຳສອນໃນຄຳພີໄບເບິນ.—2 ຕີໂມເຕ 3:16, 17; 1 ເທຊະໂລນີກ 2:13.
ຈົ່ງຊ່ວຍເຫຼືອຄົນອື່ນໃຫ້ຮູ້ຄຸນຄ່າຄຳພີໄບເບິນ
3. ວິທີດີທີ່ສຸດທີ່ຈະຊ່ວຍເຫຼືອຫຼາຍໆ ຄົນເຊິ່ງຍັງບໍ່ໝັ້ນໃຈວ່າຄຳພີໄບເບິນເປັນພະຄຳຂອງພະເຈົ້າແມ່ນເຮັດແນວໃດ?
3 ບໍ່ຄືກັບພວກເຮົາ ຫຼາຍຄົນທີ່ເຮົາລົມນຳນັ້ນບໍ່ໝັ້ນໃຈວ່າຄຳພີໄບເບິນເປັນພະຄຳຂອງພະເຈົ້າ. ເຮົາຈະຊ່ວຍເຂົາເຈົ້າໄດ້ຢ່າງໃດ? ຫຼາຍເທື່ອ ວິທີທີ່ດີທີ່ສຸດແມ່ນເປີດຄຳພີໄບເບິນ ແລະໃຫ້ເຂົາເຈົ້າເຫັນສິ່ງທີ່ຢູ່ໃນນັ້ນ. “ພະຄຳຂອງພະເຈົ້າປະກອບດ້ວຍຊີວິດແລະດ້ວຍລິດເດດ ແລະເຂົ້າງ່າຍກວ່າດາບທີ່ມີຄົມສອງເບື້ອງທຸກດວງ . . . ແລະເປັນທີ່ຫຼິງເຫັນຄວາມຄຶດແລະຄວາມໝາຍໃນໃຈ.” (ເຫບເລີ 4:12) “ພະຄຳຂອງພະເຈົ້າ” ບໍ່ແມ່ນປຶ້ມປະຫວັດສາດທີ່ຕາຍແລ້ວ; ພະຄຳຂອງພະເຈົ້າມີຊີວິດ! ຄຳສັນຍາຕ່າງໆໃນຄຳພີໄບເບິນມຸ່ງສູ່ຄວາມສຳເລັດສົມຈິງຢ່າງບໍ່ມີສິ່ງໃດຂັດຂວາງໄວ້ໄດ້. ພະລັງຂອງຂ່າວສານໃນຄຳພີໄບເບິນໃຫ້ມີແຮງກະຕຸ້ນອັນແທ້ຈິງໃນຫົວໃຈຂອງຄົນຜູ້ໜຶ່ງດີຍິ່ງກວ່າຄຳເວົ້າໃດໆຂອງຄົນເຮົາ.
4. ຄຳອະທິບາຍຂອງຄວາມຈິງໃນຄຳພີໄບເບິນທີ່ໄດ້ປ່ຽນທັດສະນະຂອງບາງຄົນຕໍ່ຄຳພີໄບເບິນມີຫຍັງແດ່ ແລະເພາະເຫດໃດ?
4 ການເຫັນຊື່ຂອງພະເຈົ້າໃນຄຳພີໄບເບິນເປັນເຫດໃຫ້ຫຼາຍຄົນສົນໃຈຢາກກວດເບິ່ງຄຳພີໄບເບິນຢ່າງຈິງຈັງ. ຄົນອື່ນໆໄດ້ຕັດສິນໃຈສຶກສາຄຳພີໄບເບິນເມື່ອມີຄົນຊີ້ໃຫ້ເຂົາເຈົ້າເຫັນວ່າ ຄຳພີໄບເບິນບອກໃຫ້ຮູ້ກ່ຽວກັບຈຸດມຸ່ງໝາຍຂອງຊີວິດ, ເຫດຜົນທີ່ພະເຈົ້າຍອມໃຫ້ມີຄວາມຊົ່ວ, ມີຄຳອະທິບາຍເຖິງຄວາມໝາຍຂອງເຫດການຕ່າງໆແຫ່ງສະໄໝປັດຈຸບັນ ຫຼືຄວາມຫວັງທີ່ຈະມີຊີວິດຕະຫຼອດໄປເທິງແຜ່ນດິນໂລກໃນສະພາບທີ່ເປັນອຸທິຍານ. ໃນດິນແດນຕ່າງໆເຊິ່ງກິດປະຕິບັດທາງສາສະໜາໄດ້ເຮັດໃຫ້ຜູ້ຄົນຖືກວິນຍານຊົ່ວລົບກວນ ຄຳອະທິບາຍຈາກຄຳພີໄບເບິນກ່ຽວກັບທີ່ມາຂອງສິ່ງນີ້ແລະວິທີທີ່ຈະຮັບການບັນເທົານັ້ນໄດ້ກະຕຸ້ນໃຫ້ຜູ້ຄົນເກີດຄວາມສົນໃຈ. ເຫດໃດເລື່ອງຕ່າງໆນີ້ຈຶ່ງປະທັບໃຈຜູ້ຄົນເຫຼົ່ານັ້ນທີ່ມີຄວາມຈິງໃຈ? ເພາະຄຳພີໄບເບິນເປັນແຫຼ່ງດຽວເທົ່ານັ້ນທີ່ໃຫ້ຂໍ້ມູນສຳຄັນຕ່າງໆເຊິ່ງໄວ້ໃຈໄດ້ໃນເລື່ອງເຊັ່ນນີ້.—ຄຳເພງ 119:130.
5. (ກ) ເມື່ອມີຄົນບອກວ່າເຂົາເຈົ້າບໍ່ເຊື່ອຄຳພີໄບເບິນ ອາດຈະເປັນຍ້ອນສາເຫດໃດ? (ຂ) ເຮົາອາດຈະຊ່ວຍຄົນເຫຼົ່ານີ້ໄດ້ຢ່າງໃດ?
5 ຖ້າບາງຄົນບອກວ່າເຂົາເຈົ້າບໍ່ເຊື່ອຄຳພີໄບເບິນເດ ຊິເຮັດແນວໃດ? ຈະເຊົາການສົນທະນາເລີຍບໍ? ບໍ່ຄວນຈະເຊົາຖ້າຫາກເຂົາເຈົ້າເຕັມໃຈຈະຊັ່ງຊາເຫດຜົນ. ເຂົາເຈົ້າອາດຈະຖືວ່າຄຳພີໄບເບິນເປັນໜັງສືຂອງຄລິດສາສະໜາຈັກ. ປະຫວັດອັນໜ້າຊື່ໃຈຄົດ ແລະການມັກຫຍຸ້ງກ່ຽວກັບການເມືອງ ລວມທັງການແຜ່ເງິນເປັນປະຈຳນັ້ນອາດຈະເປັນເຫດທີ່ເຮັດໃຫ້ເຂົາເຈົ້າບໍ່ມັກຄຳພີໄບເບິນກໍໄດ້. ການທີ່ລອງຖາມວ່າເລື່ອງເຫຼົ່ານີ້ເປັນສາເຫດໃຫ້ເຂົາເຈົ້າຮູ້ສຶກຢ່າງນັ້ນອາດຈະດີແມ່ນບໍ? ການທີ່ຄຳພີໄບເບິນຕິຕຽນແນວທາງແບບໂລກຂອງຄລິດສາສະໜາຈັກ ພ້ອມທັງຊີ້ແຈງເຖິງຄວາມແຕກຕ່າງລະຫວ່າງຄລິດສາສະໜາຈັກກັບຄລິດຕຽນແທ້ ອາດຈະເຮັດໃຫ້ເຂົາເຈົ້າສົນໃຈກໍໄດ້.—ມີເກ 3:11, 12; ມັດທາຍ 15:7-9; ຢາໂກໂບ 4:4.
6. (ກ) ສິ່ງໃດເຮັດໃຫ້ທ່ານແນ່ໃຈວ່າຄຳພີໄບເບິນເປັນພະຄຳຂອງພະເຈົ້າ? (ຂ) ອາດຈະໃຊ້ການຫາເຫດຜົນວິທີໃດອີກເພື່ອຊ່ວຍຄົນອື່ນໃຫ້ເຂົ້າໃຈວ່າຄຳພີໄບເບິນມາຈາກພະເຈົ້າແທ້ໆ?
6 ສຳລັບຄົນອື່ນໆອາດຈະໄດ້ປະໂຫຍດຖ້າພິຈາລະນາຢ່າງກົງໄປກົງມາກ່ຽວກັບຫຼັກຖານທີ່ສະແດງວ່າຄຳພີໄບເບິນມີຂຶ້ນໂດຍການດົນໃຈຈາກພະເຈົ້າ. ຂໍ້ພິສູດທີ່ເຮັດໃຫ້ທ່ານ ແນ່ໃຈວ່າຄຳພີໄບເບິນມາຈາກພະເຢໂຫວາພະເຈົ້າແມ່ນຫຍັງ? ແມ່ນສິ່ງທີ່ຄຳພີໄບເບິນບອກໃຫ້ຮູ້ກ່ຽວກັບຕົ້ນກຳເນີດຂອງຄຳພີໄບເບິນເອງບໍ? ຫຼືຂໍ້ເທັດຈິງທີ່ວ່າໃນຄຳພີໄບເບິນມີຄຳພະຍາກອນຫຼາຍຂໍ້ທີ່ສໍ່ໃຫ້ເຫັນລາຍລະອຽດກ່ຽວກັບຄວາມຮູ້ເລື່ອງອະນາຄົດ ເຊິ່ງຄຳພະຍາກອນເຫຼົ່ານີ້ຕ້ອງມາຈາກແຫຼ່ງທີ່ສູງກວ່າມະນຸດບໍ? (2 ເປໂຕ 1:20, 21) ອາດເປັນເພາະຄຳພີໄບເບິນມີຄວາມສອດຄ່ອງກັນຢ່າງໜ້າງຶດງໍ້ ແມ່ນວ່າມີຜູ້ຂຽນເຖິງ 40 ຄົນຕະຫຼອດເວລາ 1,600 ກວ່າປີບໍ? ຫຼືເພາະຄວາມຖືກຕ້ອງແນ່ນອນທາງວິທະຍາສາດເມື່ອທຽບກັບງານຂຽນອື່ນໆຂອງສະໄໝນັ້ນບໍ? ຫຼືເປັນເພາະຄວາມສັດຊື່ຂອງຜູ້ຂຽນເອງບໍ? ຫຼືການເກັບຮັກສາຄຳພີໄບເບິນໄວ້ທັງໆທີ່ມີການພະຍາຍາມຢ່າງຊົ່ວຮ້າຍເພື່ອຈະທຳລາຍຄຳພີໄບເບິນບໍ? ບໍ່ວ່າຈະເປັນຢ່າງໃດກໍຕາມທີ່ທ່ານຮູ້ສຶກປະທັບໃຈ ກໍສາມາດໃຊ້ເພື່ອຊ່ວຍຄົນອື່ນໄດ້ຄືກັນ.a
ການອ່ານຄຳພີໄບເບິນຂອງເຮົາ
7, 8. (ກ) ເຮົາຄວນຈະເຮັດຫຍັງກັບຄຳພີໄບເບິນ? (ຂ) ນອກຈາກການອ່ານຄຳພີໄບເບິນເປັນສ່ວນຕົວແລ້ວ ເຮົາຍັງຕ້ອງເຮັດຫຍັງອີກ? (ຄ) ໂດຍສ່ວນຕົວແລ້ວ ທ່ານເອງໄດ້ຄວາມເຂົ້າໃຈໃນເລື່ອງພະປະສົງຂອງພະເຢໂຫວາຢ່າງໃດ?
7 ນອກຈາກຈະຊ່ວຍຄົນອື່ນໆໃຫ້ເຊື່ອໃນຄຳພີໄບເບິນ ຕົວເຮົາເອງຕ້ອງຈັດເວລາອ່ານຄຳພີໄບເບິນເປັນປະຈຳ. ທ່ານກຳລັງເຮັດເຊັ່ນນັ້ນຢູ່ບໍ? ໃນບັນດາໜັງສືທີ່ພິມອອກມາ ໜັງສືເຫຼັ້ມນີ້ສຳຄັນທີ່ສຸດ. ແນ່ນອນ ນັ້ນບໍ່ໄດ້ໝາຍຄວາມວ່າເຮົາອ່ານຄຳພີໄບເບິນຄົນດຽວກໍພໍແລ້ວ. ຄຳພີເຕືອນບໍ່ໃຫ້ແຍກຕົວຢູ່ຕ່າງຫາກ. ເຮົາບໍ່ຄວນຄິດວ່າເຮົາຈະຫາຄຳຕອບໂດຍການຄົ້ນຄວ້າດ້ວຍຕົນເອງໄດ້ທຸກເລື່ອງ. ການສຶກສາສ່ວນຕົວພ້ອມທັງການເຂົ້າຮ່ວມປະຊຸມກັບໄພ່ພົນຂອງພະເຈົ້າເປັນປະຈຳແມ່ນສິ່ງຈຳເປັນເພື່ອເຮົາຈະເປັນຄລິດສະຕຽນທີ່ມີຄວາມສົມດຸນ.—ສຸພາສິດ 18:1; ເຫບເລີ 10:24, 25.
8 ໃນເລື່ອງນີ້ ຄຳພີໄບເບິນກ່າວເຖິງເລື່ອງເຈົ້າໜ້າທີ່ລັດຖະການຊາວເອທິໂອປີຜູ້ໜຶ່ງເຊິ່ງກຳລັງອ່ານຄຳພະຍາກອນຂອງເອຊາອີ. ທູດສະຫວັນໄດ້ຊີ້ນຳຟີລິບຜູ້ປະກາດກິດຕິຄຸນໃຫ້ຖາມຜູ້ນັ້ນວ່າ “ອັນທີ່ທ່ານໄດ້ອ່ານນັ້ນທ່ານເຂົ້າໃຈຫຼື?” ດ້ວຍຄວາມຖ່ອມໃຈ ຊາວເອທິໂອປີຄົນນັ້ນຕອບວ່າ “ຖ້າບໍ່ມີຜູ້ໃດຈະແນະນຳໃຫ້ຂ້າພະເຈົ້າ ຂ້າພະເຈົ້າຈະເຂົ້າໃຈໄດ້ຫຼື?” ລາວຂໍໃຫ້ຟີລິບອະທິບາຍຂໍ້ຄວາມໃນພະຄຳພີ. ສ່ວນຟີລິບບໍ່ແມ່ນຜູ້ອ່ານຄຳພີໄບເບິນພຽງແຕ່ລຳພັງຢ່າງບໍ່ເພິ່ງຜູ້ໃດເຊິ່ງໃຫ້ແງ່ຄິດຂອງຕົນເອງກ່ຽວກັບພະຄຳພີ. ລາວຕິດຕໍ່ຢ່າງໃກ້ຊິດກັບອົງການທີ່ປະຈັກແກ່ຕາຂອງພະເຈົ້າ. ສະນັ້ນ ລາວຈຶ່ງສາມາດຊ່ວຍຊາວເອທິໂອປີນັ້ນໃຫ້ຮັບປະໂຫຍດຈາກຄຳສັ່ງສອນເຊິ່ງພະເຢໂຫວາຈັດຕຽມໃຫ້ໂດຍທາງອົງການນັ້ນ. (ກິດຈະການ 6:5, 6; 8:5, 26-35) ທຸກມື້ນີ້ກໍຄືກັນ ບໍ່ມີໃຜເຂົ້າໃຈພະປະສົງຂອງພະເຢໂຫວາຢ່າງຖືກຕ້ອງດ້ວຍຕົນເອງໄດ້. ເຮົາທຸກຄົນຈຳຕ້ອງຮັບຄວາມຊ່ວຍເຫຼືອໂດຍທາງອົງການທີ່ປະຈັກແກ່ຕາເຊິ່ງພະເຢໂຫວາຈັດຕຽມໄວ້ດ້ວຍຄວາມຮັກ.
9. ຕາລາງການອ່ານຄຳພີໄບເບິນແບບໃດຈະເປັນປະໂຫຍດແກ່ເຮົາທຸກຄົນ?
9 ເພື່ອຊ່ວຍເຮົາໃຫ້ເຂົ້າໃຈຄຳພີໄບເບິນ ອົງການຂອງພະເຈົ້າໄດ້ຈັດພິມປຶ້ມຕ່າງໆທີ່ມີເນື້ອໃນເຊິ່ງເປັນປະໂຫຍດຫຼາຍກ່ຽວກັບຄຳພີໄບເບິນ. ນອກຈາກນັ້ນ ຍັງມີກຳນົດການອ່ານຄຳພີໄບເບິນເປັນປະຈຳຢູ່ໃນໂຮງຮຽນການຮັບໃຊ້ຕາມລະບອບການຂອງພະເຈົ້າເຊິ່ງຈັດຂຶ້ນໃນທຸກໆປະຊາຄົມທົ່ວໂລກຂອງພະຍານພະເຢໂຫວາ. ເຮົາອາດໄດ້ປະໂຫຍດຫຼາຍດ້ານຈາກການກວດເບິ່ງພະຄຳພີບໍລິສຸດເປັນສ່ວນຕົວ. (ຄຳເພງ 1:1-3; 19:7, 8) ຈົ່ງພະຍາຍາມເປັນພິເສດເພື່ອອ່ານຄຳພີໄບເບິນເປັນປະຈຳ. ເຖິງວ່າອາດຈະບໍ່ເຂົ້າໃຈໝົດທຸກສິ່ງ ແຕ່ການເຫັນພາບລວມຂອງຄຳພີໄບເບິນຈະມີຄຸນຄ່າຫຼາຍ. ຕົວຢ່າງເຊັ່ນ ຫາກອ່ານພຽງມື້ລະຫ້າຫຼືຫົກໜ້າ ທ່ານຈະອ່ານຄຳພີໄບເບິນຈົບພາຍໃນໜຶ່ງປີ.
10. (ກ) ທ່ານເອງອ່ານຄຳພີໄບເບິນເມື່ອໃດ? (ຂ) ຄວນອ່ານຄຳພີໄບເບິນຮ່ວມກັບຜູ້ໃດແດ່ ແລະເປັນຫຍັງຄວາມສະຫມ່ຳສະເໝີຈຶ່ງສຳຄັນ?
10 ທ່ານຈະອ່ານຄຳພີໄບເບິນໄດ້ເມື່ອໃດ? ຖ້າຈັດເວລາອ່ານພຽງແຕ່ມື້ລະ 10 ຫຼື 15 ນາທີ ທ່ານຈະໄດ້ປະໂຫຍດຫຼາຍ. ຫາກເຮັດບໍ່ໄດ້ຄືແນວນັ້ນ ຢ່າງໜ້ອຍໃຫ້ຈັດເວລາເຮັດເປັນປະຈຳທຸກອາທິດ ແລະຕິດຕາມຕາລາງທີ່ກຳນົດໄວ້ນັ້ນ. ຖ້າແຕ່ງດອງແລ້ວ ທ່ານແລະຄູ່ແຕ່ງດອງຈະເພີດເພີນກັບການອ່ານຄຳພີໄບເບິນແບບອອກສຽງໃຫ້ກັນຟັງ. ຖ້າມີລູກທີ່ໃຫຍ່ພໍອ່ານໄດ້ ເຂົາເຈົ້າອາດຈະຜັດປ່ຽນກັນອ່ານອອກສຽງ. ການອ່ານຄຳພີໄບເບິນຄວນຈະເປັນນິດໄສຕະຫຼອດຊີວິດ ຄືກັບການກິນອາຫານ. ດັ່ງທີ່ເຮົາທຸກຄົນຮູ້ ຫາກຄົນເຮົາມີນິດໄສການກິນທີ່ບໍ່ດີ ກໍຍ່ອມຈະເກີດຜົນເສຍຫາຍຕໍ່ສຸຂະພາບຂອງເຮົາ. ເຊັ່ນດຽວກັນ ສຸຂະພາບຝ່າຍວິນຍານແລະຊີວິດຕະຫຼອດໄປຂອງເຮົາຂຶ້ນຢູ່ກັບການບຳລຸງລ້ຽງເປັນປະຈຳດ້ວຍ “ສັບພະຄຳທີ່ອອກມາແຕ່ປາກແຫ່ງພະເຈົ້າ.”—ມັດທາຍ 4:4.
ເປົ້າໝາຍຂອງເຮົາ
11. ເປົ້າໝາຍຂອງເຮົາໃນການອ່ານຄຳພີໄບເບິນຄວນຈະເປັນຢ່າງໃດ?
11 ສິ່ງໃດຄວນຈະເປັນເປົ້າໝາຍຂອງເຮົາໃນການອ່ານຄຳພີໄບເບິນ? ເປົ້າໝາຍຂອງເຮົາບໍ່ພຽງແຕ່ຈະອ່ານໃຫ້ໄດ້ຈຳນວນໜ້າຕາມຕ້ອງການເທົ່ານັ້ນ. ເຮົາຄວນມີເຈຕະນາຢາກຈະຮູ້ຈັກພະເຈົ້າດີຂຶ້ນເພື່ອຈະຮັກພະອົງຫຼາຍຂຶ້ນ ແລະນະມັດສະການພະອົງຢ່າງທີ່ພະອົງພໍໃຈ. (ໂຢຮັນ 5:39-42) ທັດສະນະຂອງເຮົາຄວນຄືກັບຜູ້ຂຽນຄຳພີໄບເບິນເຊິ່ງກ່າວວ່າ “ໂອ້ພະເຢໂຫວາຂໍໂຜດສອນຂ້ານ້ອຍໃຫ້ຮູ້ຈັກທາງທັງຫຼາຍຂອງພະອົງ ຂໍໂຜດສັ່ງສອນຂ້ານ້ອຍໃຫ້ຮູ້ຈັກຫົນທາງທັງຫຼາຍຂອງພະອົງ.”—ຄຳເພງ 25:4.
12. (ກ) ເປັນຫຍັງການຮັບເອົາ “ຄວາມຮູ້ຖ້ອງແທ້” ຈຶ່ງເປັນສິ່ງຈຳເປັນ ແລະ ເມື່ອອ່ານຕ້ອງພະຍາຍາມເຮັດຫຍັງເພື່ອຈະໄດ້ຄວາມຮູ້ນັ້ນ? (ຂ) ສີ່ແນວຄວາມຄິດທີ່ເປັນປະໂຫຍດໃດແດ່ເຊິ່ງອາດໃຊ້ວິເຄາະເລື່ອງທີ່ເຮົາອ່ານຈາກຄຳພີໄບເບິນໄດ້? (ເບິ່ງໃນຂອບໜ້າ 30.) (ຄ) ຈົ່ງສະແດງໃຫ້ເຫັນແນວຄວາມຄິດເຫຼົ່ານີ້ໂດຍຕອບຄຳຖາມທີ່ຢູ່ໃນວັກນີ້. ຈົ່ງເປີດເບິ່ງຂໍ້ຄຳພີທີ່ອ້າງເຖິງແຕ່ບໍ່ໄດ້ຍົກມາກ່າວ.
12 ເມື່ອເຮົາຮັບເອົາຄຳສັ່ງສອນຈາກພະເຢໂຫວາ ເຮົາຄວນປາຖະໜາທີ່ຈະໄດ້ “ຄວາມຮູ້ຖ້ອງແທ້.” ຫາກບໍ່ມີຄວາມຮູ້ດັ່ງກ່າວ ເຮົາຈະໃຊ້ພະຄຳໃນຊີວິດຢ່າງຖືກຕ້ອງ ຫຼືຈະອະທິບາຍແກ່ຜູ້ອື່ນຢ່າງຖືກຕ້ອງໄດ້ຢ່າງໃດ? (ໂກໂລດ 3:10, ລ.ມ.; 2 ຕີໂມເຕ 2:15) ເພື່ອຈະໄດ້ຄວາມຮູ້ຖ້ອງແທ້ ເຮົາຕ້ອງອ່ານຢ່າງພິນິດພິຈະລະນາ ແລະຖ້າຕອນໃດເລິກເຊິ່ງ ເຮົາອາດຕ້ອງອ່ານຫຼາຍກວ່າເທື່ອດຽວເພື່ອຈະໄດ້ຄວາມໝາຍ. ເຮົາຈະໄດ້ຮັບປະໂຫຍດເຊັ່ນກັນ ຖ້າເຮົາໃຊ້ເວລາຄິດຮ່ຳເພິງເລື່ອງເຫຼົ່ານັ້ນ ໂດຍຄິດຈາກຫຼາຍແງ່ມຸມ. ມີແນວຄວາມຄິດສີ່ຢ່າງທີ່ມີຄຸນຄ່າເຊິ່ງໃຊ້ໃນການວິເຄາະໄດ້ຢູ່ໃນໜ້າ 30. ຫຼາຍສ່ວນໃນພະຄຳພີອາດນຳມາວິເຄາະໃຫ້ເກີດປະໂຫຍດໄດ້ໂດຍໃຊ້ແນວຄວາມຄິດເຫຼົ່ານີ້ໜຶ່ງຫຼືສອງຢ່າງ. ເມື່ອຕອບຄຳຖາມໃນໜ້າຕໍ່ໄປ ເຮົາຈະເຫັນວິທີທີ່ເປັນເຊັ່ນນັ້ນ.
(1) ຫຼາຍເທື່ອ ພະຄຳພີສ່ວນທີ່ເຮົາອ່ານຈະບອກໃຫ້ຮູ້ບາງສິ່ງບາງຢ່າງກ່ຽວກັບພະເຢໂຫວາວ່າພະອົງເປັນບຸກຄົນແບບໃດ. ຕົວຢ່າງເຊັ່ນ ໃນຄຳເພງ 139:13, 14 ເຮົາຮຽນຮູ້ວ່າພະເຢໂຫວາມີຄວາມເປັນຫ່ວງເປັນໃຍຫຼາຍຕໍ່ລູກອ່ອນໃນທ້ອງດັ່ງນີ້: “ພະອົງໄດ້ສ້າງກາຍຂ້ານ້ອຍໃນທ້ອງແມ່ຂ້ານ້ອຍແລ້ວ. ຂ້ານ້ອຍຈະໂມທະນາພະເດດພະຄຸນພະອົງ ເຫດວ່າພະອົງໄດ້ສ້າງກາຍຂ້ານ້ອຍເປັນການອັດສະຈັນໃຈອັນໜ້າຊົມ ກິດຈະການທັງຫຼາຍແຫ່ງພະອົງເປັນການອັດສະຈັນໃຈ ແລະຈິດໃຈຂ້ານ້ອຍກໍຮູ້ຈັກນັ້ນເປັນແທ້.” ງານສ້າງສັນຂອງພະເຢໂຫວາຈັ່ງແມ່ນເປັນຕາງຶດງໍ້ແທ້ໆ! ຮ່າງກາຍມະນຸດເຊິ່ງພະອົງສ້າງເປັນຫຼັກຖານເຖິງຄວາມຮັກອັນຍິ່ງໃຫຍ່ຂອງພະອົງທີ່ມີຕໍ່ພວກເຮົາ.
ໂດຍພິຈາລະນາເຖິງຄຳເວົ້າໃນໂຢຮັນ 14:9, 10 ເມື່ອເຮົາອ່ານກ່ຽວກັບວິທີທີ່ພະເຍຊູປະຕິບັດຕໍ່ຄົນອື່ນໆ ນັ້ນຄືກັບເຮົາໄດ້ເຫັນພະເຢໂຫວາເອງເປັນຜູ້ປະຕິບັດ. ເມື່ອຄຳນຶງເຖິງເລື່ອງນັ້ນ ເຮົາຈະລົງຄວາມເຫັນຢ່າງໃດກ່ຽວກັບພະເຢໂຫວາຈາກເລື່ອງທີ່ບັນທຶກໄວ້ໃນລືກາ 5:12, 13 ແລະ ລືກາ 7:11-15?
(2) ຈົ່ງພິຈາລະນາເຖິງວິທີທີ່ເລື່ອງນັ້ນກ່ຽວຂ້ອງກັບໃຈຄວາມສຳຄັນຂອງຄຳພີໄບເບິນ ໃຈຄວາມສຳຄັນນັ້ນຄື: ການພິສູດຄວາມຖືກຕ້ອງເລື່ອງສິດທິສູງສຸດໃນການປົກຄອງຂອງພະເຢໂຫວາແລະການເຮັດໃຫ້ຊື່ຂອງພະອົງເປັນທີ່ນັບຖືອັນບໍລິສຸດໂດຍທາງລາຊະອານາຈັກຂອງພະຄລິດ ເຊື້ອສາຍແຫ່ງຄຳສັນຍາ.
ເອເຊກຽນແລະດານຽນເນັ້ນໃຈຄວາມສຳຄັນຂອງຄຳພີໄບເບິນຢ່າງໃດ? (ເອເຊກຽນ 38:21-23; ດານຽນ 2:44; 4:17; 7:9-14)
ຄຳພີໄບເບິນລະບຸຕົວພະເຍຊູຢ່າງຊັດເຈນວ່າເປັນເຊື້ອສາຍຕາມທີ່ໄດ້ສັນຍາໄວ້ແນວໃດ? (ຄາລາຊີ 3:16)
ຄຳປາກົດພັນລະນາເຖິງຈຸດສຸດຍອດອັນຍິ່ງໃຫຍ່ຂອງໃຈຄວາມສຳຄັນເລື່ອງລາຊະອານາຈັກໄວ້ຢ່າງໃດ? (ຄຳປາກົດ 11:15; 12:7-10; 17:16-18; 19:11-16; 20:1-3; 21:1-5)
(3) ຈົ່ງຖາມຕົວເອງວ່າ ເຮົາຈະເອົາສິ່ງທີ່ໄດ້ອ່ານມາໃຊ້ກັບຕົນເອງຢ່າງໃດ. ຍົກຕົວຢ່າງ ເມື່ອອ່ານອົບພະຍົບຈົນຮອດພະບັນຍັດເຮົາຈະພົບເລື່ອງການຜິດສິນລະທຳ ແລະການກະບົດຂອງຊາດຍິດສະລາເອນ. ເຮົາຮຽນຮູ້ວ່າເຈຕະຄະຕິ ແລະການກະທຳເຫຼົ່ານັ້ນເກີດຜົນຮ້າຍຕໍ່ເຂົາເຈົ້າ. ດ້ວຍເຫດນີ້ ເຮົາຄວນຈະໄດ້ຮັບການກະຕຸ້ນທີ່ຈະກະທຳໃຫ້ພະເຢໂຫວາພໍໃຈ ໂດຍບໍ່ເຮັດຕາມຕົວຢ່າງອັນບໍ່ດີຂອງຊາດຍິດສະລາເອນ. “ການທັງປວງນີ້ໄດ້ບັງເກີດແກ່ເຂົາເປັນແບບຢ່າງ ແລະຂຽນໄວ້ແລ້ວເພື່ອຈະເຕືອນສະຕິເຮົາທັງຫຼາຍຜູ້ທີ່ໄດ້ເຖິງທີ່ສຸດອາຍຸທັງຫຼາຍ [“ຢູ່ໃນຍຸກສຸດທ້າຍທີ່ຈວນຈະມາເຖິງ,” ທ.ປ.].”—1 ໂກລິນໂທ 10:11.
ເລື່ອງກາອີນຂ້າອາເບນໃຫ້ບົດຮຽນຫຍັງແກ່ເຮົາ? (ຕົ້ນເດີມ 4:3-12; ເຫບເລີ 11:4; 1 ໂຢຮັນ 3:10-15; 4:20, 21)
ຄຳແນະນຳໃນຄຳພີໄບເບິນເຊິ່ງໃຊ້ກັບຄລິດສະຕຽນທີ່ມີຄວາມຫວັງໄປສະຫວັນນັ້ນ ຈະເອົາມາໃຊ້ກັບຜູ້ທີ່ຈະມີຊີວິດຕະຫຼອດໄປເທິງແຜ່ນດິນໂລກໄດ້ບໍ? (ຈົດເຊັນບັນຊີ 15:16; ໂຢຮັນ 10:16)
ເຖິງແມ່ນວ່າເຮົາມີຖານະທີ່ດີໃນປະຊາຄົມຄລິດສະຕຽນແລ້ວ ເຫດໃດເຮົາຈຶ່ງຕ້ອງພິຈາລະນາວິທີທີ່ຈະເອົາຄຳແນະນຳໃນຄຳພີໄບເບິນທີ່ຮູ້ແລ້ວໄປໃຊ້ໃຫ້ຫຼາຍກວ່າເກົ່າ? (2 ໂກລິນໂທ 13:5; 1 ເທຊະໂລນີກ 4:1)
(4) ຈົ່ງຄິດເຖິງວິທີທີ່ເຮົາອາດໃຊ້ສິ່ງທີ່ໄດ້ອ່ານໄປຊ່ວຍຄົນອື່ນ. ທຸກຄົນເປັນຫ່ວງເລື່ອງບັນຫາສຸຂະພາບ. ດັ່ງນັ້ນ ເຮົາອາດຈະອ່ານເລື່ອງທີ່ພະເຍຊູເຄີຍກະທຳເພື່ອສະແດງເຖິງສິ່ງທີ່ພະອົງຈະເຮັດໃນຂອບເຂດທີ່ໃຫຍ່ກວ່ານີ້ເມື່ອພະອົງເປັນກະສັດໃນລາຊະອານາຈັກ: “ຝູງຄົນຫຼາຍຄົນໄດ້ມາຫາພະອົງ ເອົາຄົນຂາເຢກຂາຫ້ານ ຄົນຕາບອດ ຄົນປາກກຶກ ຄົນເສຍອົງຄະ ແລະຄົນພະຍາດຕ່າງໆຫຼາຍຄົນມາ . . . ແລະພະອົງໄດ້ກະທຳໃຫ້ເຂົາດີ.”—ມັດທາຍ 15:30.
ໃຜອາດໄດ້ຮັບການຊ່ວຍເຫຼືອຈາກເລື່ອງການຟື້ນຄືນຈາກຕາຍຂອງລູກສາວຂອງຢາອິລຶດ? (ລືກາ 8:41, 42, 49-56)
13. ການອ່ານແລະສຶກສາຄຳພີໄບເບິນກັບອົງການຂອງພະເຢໂຫວາຢ່າງຕໍ່ເນື່ອງຈະກໍຜົນປະໂຫຍດຫຍັງແດ່?
13 ການອ່ານຄຳພີໄບເບິນເປັນລາງວັນທີ່ລ້ຳຄ່າສ່ຳໃດ ເມື່ອເຮົາພິຈາລະນາແນວຄວາມຄິດສີ່ຢ່າງທີ່ກ່າວເຖິງໃນຕອນຕົ້ນ! ແນ່ນອນ ການອ່ານຄຳພີໄບເບິນເປັນເລື່ອງທ້າທາຍ ແຕ່ເຮົາຈະໄດ້ປະໂຫຍດຕະຫຼອດຊີວິດ ເພາະເມື່ອເຮົາຍິ່ງອ່ານພະຄຳພີຫຼາຍເທົ່າໃດ ເຮົາກໍຍິ່ງແຂງແຮງທາງຝ່າຍວິນຍານຫຼາຍເທົ່ານັ້ນ. ການອ່ານຄຳພີໄບເບິນເປັນປະຈຳຈະໂນ້ມນຳເຮົາໃຫ້ໃກ້ຊິດກັບພະເຢໂຫວາພະບິດາຜູ້ປະກອບດ້ວຍຄວາມຮັກ ແລະພີ່ນ້ອງຄລິດສະຕຽນຂອງເຮົາຫຼາຍຂຶ້ນ. ການອ່ານຄຳພີໄບເບິນຈະຊ່ວຍເຮົາໃຫ້ເອົາໃຈໃສ່ຄຳແນະນຳທີ່ໃຫ້ “ຍຶດໝັ້ນກັບພະຄຳແຫ່ງຊີວິດຕໍ່ໆໄປ.”—ຟີລິບ 2:16, ລ.ມ.
[ຂໍ້ຄວາມໄຂເງື່ອນ]
a ສຳລັບການພິຈາລະນາເຫດຜົນທີ່ເຮົາຄວນຈະສຶກສາຄຳພີໄບເບິນ ເຊີນເບິ່ງຈຸນລະສານ ໜັງສືສຳລັບທຸກຄົນ (ພາສາໄທ) ຈັດພິມໂດຍພະຍານພະເຢໂຫວາ.
ການພິຈາລະນາທົບທວນ
• ເປັນຫຍັງຄຳພີໄບເບິນຈຶ່ງໄດ້ຮັບການບັນທຶກແລະເກັບຮັກສາໄວ້ຈົນຮອດສະໄໝຂອງເຮົາ?
• ເຮົາຈະຊ່ວຍຄົນອື່ນໃຫ້ເຂົ້າໃຈແລະຮູ້ຄຸນຄ່າຄຳພີໄບເບິນໄດ້ຢ່າງໃດ?
• ເປັນຫຍັງການອ່ານຄຳພີໄບເບິນໂດຍສ່ວນຕົວເປັນປະຈຳຈຶ່ງເປັນປະໂຫຍດ? ໃນການວິເຄາະເລື່ອງທີ່ໄດ້ອ່ານ ເຮົາສາມາດໃຊ້ແນວຄິດສີ່ຢ່າງໃດແດ່ທີ່ເປັນປະໂຫຍດ?
[ກອບ/ຮູບພາບໜ້າ 30]
ເມື່ອເຮົາອ່ານສ່ວນໜຶ່ງໃນຄຳພີໄບເບິນ ຈົ່ງພິຈາລະນາວ່າ
ນັ້ນບອກໃຫ້ເຮົາຮູ້ສິ່ງໃດກ່ຽວກັບພະເຢໂຫວາໃນຖານະເປັນບຸກຄົນ
ນັ້ນກ່ຽວຂ້ອງກັບໃຈຄວາມສຳຄັນຂອງຄຳພີໄບເບິນຢ່າງໃດ
ນັ້ນຄວນມີຜົນກະທົບຕໍ່ຊີວິດຂອງເຮົາແນວໃດ
ເຮົາຈະໃຊ້ເລື່ອງນັ້ນຊ່ວຍຄົນອື່ນຢ່າງໃດ