ບົດທີ 11

ເຈົ້າຈະໄດ້ຮັບປະໂຫຍດເຕັມທີຈາກການອ່ານຄຳພີໄບເບິນ

ສະບັບພິມ

ເຈົ້າເຄີຍຮູ້ສຶກແບບນີ້ບໍ ບາງເທື່ອເຈົ້າຄິດຈະເຮັດຫຍັງບາງຢ່າງ ແຕ່ຄິດຊື່ໆກໍທໍ້ໃຈແລ້ວ? ເພື່ອຈະເຮັດໃຫ້ສຳເລັດ ເຈົ້າອາດຈະຕ້ອງຄ່ອຍໆເຮັດໄປເທື່ອລະໜ້ອຍ. ເຈົ້າອາດຈະຮູ້ສຶກແບບນັ້ນກັບການອ່ານຄຳພີໄບເບິນຄືກັນແລະຄິດວ່າ ‘ຂ້ອຍຈະເລີ່ມແນວໃດດີ?’ ໃນບົດນີ້ ເຮົາຈະເບິ່ງວ່າເຮັດແນວໃດເຈົ້າຈຶ່ງຈະມັກອ່ານແລະມັກຮຽນຄຳພີໄບເບິນຫຼາຍຂຶ້ນ.

1. ເປັນຫຍັງເຮົາຕ້ອງອ່ານຄຳພີໄບເບິນເປັນປະຈຳ?

ຄົນທີ່ອ່ານຄຳພີໄບເບິນ ຫຼື “ກົດໝາຍຂອງພະເຢໂຫວາ” ເປັນປະຈຳຈະມີຄວາມສຸກແລະບໍ່ວ່າລາວຈະເຮັດຫຍັງກໍຈະສຳເລັດ. (ອ່ານເພງສັນລະເສີນ 1:1-3) ໃນຕອນທຳອິດ ເຈົ້າອາດຈະລອງອ່ານຄຳພີໄບເບິນພຽງແຕ່ມື້ລະບໍ່ເທົ່າໃດນາທີກໍໄດ້. ແລ້ວເມື່ອອ່ານໄປເລື້ອຍໆເຈົ້າກໍຈະມັກອ່ານຄຳພີໄບເບິນຫຼາຍຂຶ້ນ.

2. ເພື່ອຈະໄດ້ຮັບປະໂຫຍດແທ້ໆເຈົ້າຕ້ອງເຮັດຫຍັງຕອນທີ່ອ່ານຄຳພີໄບເບິນ?

ຖ້າຢາກໄດ້ຮັບປະໂຫຍດຈາກການອ່ານຄຳພີໄບເບິນ ເຮົາຕ້ອງອ່ານແລະ “ຄິດຕຶກຕອງ.” (ໂຢຊວຍ 1:8) ຕອນທີ່ອ່ານ ເຮົາຕ້ອງຢຸດເປັນໄລຍະໆແລະຄິດໄປນຳ ແລ້ວໃຫ້ຖາມໂຕເອງວ່າ: ‘ເລື່ອງທີ່ຂ້ອຍອ່ານສອນວ່າພະເຢໂຫວາເປັນພະເຈົ້າແບບໃດ? ຂ້ອຍຈະເອົາເລື່ອງທີ່ອ່ານໄປໃຊ້ໄດ້ແນວໃດ? ຂ້ອຍຈະເອົາເລື່ອງນີ້ໄປຊ່ວຍຄົນອື່ນໄດ້ແນວໃດ?’

3. ເຈົ້າຈະອ່ານຄຳພີໄບເບິນຕອນໃດ?

ເຈົ້າເຄີຍຮູ້ສຶກບໍວ່າຢາກອ່ານຄຳພີໄບເບິນຢູ່ແຕ່ກໍບໍ່ມີເວລາ. ຫຼາຍຄົນຮູ້ສຶກແບບນັ້ນ. ຄຳພີໄບເບິນບອກວ່າເຮົາຄວນຈະ “ໃຊ້ເວລາໃຫ້ເປັນປະໂຫຍດຫຼາຍທີ່ສຸດ.” (ເອເຟໂຊ 5:16) ຖ້າຢາກເຮັດແບບນັ້ນກໍຕ້ອງຄິດໄວ້ກ່ອນວ່າຈະອ່ານຄຳພີໄບເບິນຕອນໃດໃນແຕ່ລະມື້. ບາງຄົນອ່ານຕອນເຊົ້າ ບາງຄົນອາດຈະອ່ານຕອນທ່ຽງ ຫຼືບາງຄົນກໍອ່ານກ່ອນນອນ. ແລ້ວເຈົ້າເດ ເຈົ້າຢາກຈະອ່ານຄຳພີໄບເບິນຕອນໃດ?

ຮຽນຮູ້ຫຼາຍຂຶ້ນ

ເຮັດແນວໃດໃຫ້ການອ່ານຄຳພີໄບເບິນບໍ່ໜ້າເບື່ອ. ກ່ອນຈະຮຽນຄຳພີໄບເບິນເຈົ້າຕ້ອງກຽມລ່ວງໜ້າແນວໃດຈຶ່ງຈະໄດ້ຮັບປະໂຫຍດແທ້ໆ.

ຮູບ: ເພື່ອເດັກນ້ອຍຜູ້ຊາຍຄົນໜຶ່ງຈະມັກອາຫານບາງຢ່າງກໍຕ້ອງໃຊ້ເວລາ. 1. ເດັກນ້ອຍຄົນນີ້ບໍ່ມັກແລະບໍ່ຢາກກິນອາຫານບາງຢ່າງ. 2. ຕໍ່ມາ ລາວກໍກິນ. 3. ເມື່ອລາວໃຫຍ່ຂຶ້ນ ລາວກໍມັກກິນອາຫານນັ້ນ. — ຕອນທຳອິດເຮົາອາດບໍ່ມັກກິນອາຫານບາງຢ່າງ ແຕ່ຕໍ່ມາເຮົາອາດຈະມັກກໍໄດ້ ການອ່ານຄຳພີໄບເບິນກໍຄືກັນ ເຮົາຈະມັກອ່ານຄຳພີໄບເບິນຖ້າເຮົາອ່ານເປັນປະຈຳທຸກມື້

4. ເຮັດແນວໃດເຈົ້າຈຶ່ງຈະມັກອ່ານຄຳພີໄບເບິນ?

ມັນອາດບໍ່ງ່າຍທີ່ຈະເລີ່ມອ່ານຄຳພີໄບເບິນ. ແຕ່ເຮົາສາມາດເຮັດໃຫ້ໂຕເອງ “ຢາກໄດ້ຖ້ອຍຄຳບໍລິສຸດຂອງພະເຈົ້າ” ຫຼາຍຂຶ້ນໄດ້. ຄືກັບອາຫານທີ່ເຮົາບໍ່ເຄີຍກິນມາກ່ອນ ຕອນກິນເທື່ອທຳອິດເຮົາອາດບໍ່ມັກ ແຕ່ຕໍ່ມາເຮົາອາດຈະມັກກໍໄດ້. ອ່ານ 1 ເປໂຕ 2:2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຈົ້າໄດ້ອ່ານຄຳພີໄບເບິນທຸກມື້ ເຈົ້າຄິດວ່າຈະມັກແລະຢາກອ່ານຫຼາຍຂຶ້ນບໍ?

ເປີດວິດີໂອເພື່ອເບິ່ງວ່າເປັນຫຍັງບາງຄົນຈຶ່ງມັກອ່ານຄຳພີໄບເບິນ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ໄວລຸ້ນຮຽນຮູ້ທີ່ຈະຮັກຄຳຂອງພະເຈົ້າ (5:33)

ຈາກວິດີໂອ ໄວລຸ້ນບາງຄົນບອກວ່າເປັນຫຍັງຈຶ່ງບໍ່ງ່າຍທີ່ຈະອ່ານຄຳພີໄບເບິນ?
ເຂົາເຈົ້າຕ້ອງເຮັດຫຍັງແດ່ເພື່ອຈະອ່ານຄຳພີໄບເບິນເປັນປະຈຳ?
ເຂົາເຈົ້າໄດ້ເຮັດຫຍັງແດ່ເພື່ອໃຫ້ການອ່ານຄຳພີໄບເບິນບໍ່ໜ້າເບື່ອ?

ເຄັດລັບທີ່ຊ່ວຍໄດ້:

ເລືອກອ່ານສະບັບທີ່ແປຢ່າງຖືກຕ້ອງແລະໃຊ້ພາສາທີ່ເຂົ້າໃຈງ່າຍ. ຖ້າມີສະບັບແປໂລກໃໝ່ ໃນພາສາຂອງເຈົ້າ ກໍລອງອ່ານສະບັບນັ້ນເບິ່ງ.
ໃຫ້ອ່ານເລື່ອງທີ່ເຈົ້າມັກຫຼາຍທີ່ສຸດກ່ອນ. ເພື່ອຈະເບິ່ງວ່າມີເລື່ອງໃດແດ່ທີ່ໜ້າສົນໃຈໃຫ້ເບິ່ງໃນຫົວຂໍ້ “ເລີ່ມອ່ານຄຳພີໄບເບິນ.”
ເຮັດເຄື່ອງໝາຍວ່າເຈົ້າໄດ້ອ່ານຫຍັງໄປແດ່ແລ້ວ. ໃຊ້ “ຕາຕະລາງການອ່ານຄຳພີໄບເບິນຂອງເຈົ້າ” ທີ່ຢູ່ໃນປຶ້ມຫົວນີ້.
ໃຊ້ແອັບ JW Library®. ເຈົ້າຈະອ່ານຫຼືຟັງຄຳພີໄບເບິນຢູ່ໃສກໍໄດ້ ໂດຍໃຊ້ໂທລະສັບມືຖືຫຼືອຸປະກອນອື່ນໆ.
ເບິ່ງພາກຜະໜວກໃນ ຄຳພີໄບເບິນສະບັບແປໂລກໃໝ່. ພາກຜະໜວກນີ້ມີທັງແຜນທີ່ ແຜນພາບ ແລະສ່ວນອະທິບາຍຄຳສັບທີ່ຈະເຮັດໃຫ້ການອ່ານຄຳພີໄບເບິນຂອງເຈົ້າບໍ່ໜ້າເບື່ອ.

5. ກຽມລ່ວງໜ້າກ່ອນຮຽນຄຳພີໄບເບິນ

ອ່ານເພງສັນລະເສີນ 119:34 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຈຶ່ງດີທີ່ຈະອະທິດຖານກ່ອນອ່ານຄຳພີໄບເບິນຫຼືກຽມບົດຮຽນທີ່ຈະຮຽນ?

ເຈົ້າຈະເຮັດແນວໃດເພື່ອຈະໄດ້ຮັບປະໂຫຍດແທ້ໆຈາກການຮຽນຄຳພີໄບເບິນໃນແຕ່ລະເທື່ອ? ຕອນທີ່ເຈົ້າກຽມບົດຮຽນທີ່ຈະຮຽນ ໃຫ້ລອງເຮັດແບບນີ້ເບິ່ງ:

(ກ) ອ່ານເນື້ອໃນທີ່ຢູ່ໃນໜ້າທຳອິດຂອງບົດ.
(ຂ) ອ່ານຂໍ້ຄຳພີ ແລະເບິ່ງວ່າຂໍ້ຄຳພີນັ້ນກ່ຽວຂ້ອງກັບເນື້ອໃນແນວໃດ.
(ຄ) ຂີດກ້ອງຄຳຕອບຫຼືຂີດສະເພາະຄຳທີ່ສຳຄັນ. ຖ້າເຮັດແບບນີ້ເຈົ້າກໍຈະເຂົ້າໃຈງ່າຍຂຶ້ນຕອນທີ່ຮຽນກັບຄົນທີ່ມາສອນ.

ຮູບ: ຜູ້ຍິງຄົນໜຶ່ງກຳລັງກຽມໂຕສຳລັບຮຽນຄຳພີໄບເບິນ. ກ. ລາວອ່ານໜ້າທຳອິດຂອງບົດຮຽນ. ຂ. ລາວອ່ານຂໍ້ຄຳພີທີ່ຍົກມາຈາກຄຳພີໄບເບິນ. ຄ. ລາວຂີດກ້ອງຄຳຕອບຫຼືຄຳທີ່ສຳຄັນ.

ເຈົ້າຮູ້ບໍ?

ພະຍານພະເຢໂຫວາເຄີຍໃຊ້ຄຳພີໄບເບິນສະບັບແປຕ່າງໆມາແລ້ວຫຼາຍສະບັບ. ແຕ່ສະບັບທີ່ເຮົາມັກໃຊ້ແມ່ນ ຄຳພີໄບເບິນສະບັບແປໂລກໃໝ່ ຍ້ອນມີເນື້ອໃນທີ່ຖືກຕ້ອງ ເຂົ້າໃຈງ່າຍ ແລະມີຊື່ຂອງພະເຈົ້າຢູ່ນຳ.—ເບິ່ງບົດຄວາມໃນເວັບໄຊ “ແທ້ບໍທີ່ພະຍານພະເຢໂຫວາໃຊ້ແຕ່ຄຳພີໄບເບິນຂອງເຂົາເຈົ້າເອງເທົ່ານັ້ນ?”

ບາງຄົນເວົ້າວ່າ: “ຮຽນຄຳພີໄບເບິນມັນຫຍຸ້ງຍາກໂພດ. ຂ້ອຍບໍ່ມີເວລາຮຽນດອກຂ້ອຍເມື່ອຍ.”