ບົດທີ 2
ຈົດໝາຍຈາກພະເຈົ້າຜູ້ປ່ຽມດ້ວຍຄວາມຮັກ
ບອກພໍ່ແມ່ເບິ່ງດູວ່າ ປຶ້ມຫົວໃດທີ່ລູກມັກຫຼາຍທີ່ສຸດ?— ເດັກນ້ອຍບາງຄົນຈະເລືອກປຶ້ມທີ່ກ່ຽວກັບສັດຕ່າງໆ. ສ່ວນອີກພວກໜຶ່ງຈະເລືອກປຶ້ມທີ່ມີຮູບພາບຫຼາຍໆ. ປຶ້ມເຫຼົ່ານີ້ອ່ານແລ້ວອາດຈະມ່ວນດີ.
ແຕ່ປຶ້ມທີ່ດີທີ່ສຸດໃນໂລກແມ່ນປຶ້ມທີ່ບອກເຮົາໃຫ້ຮູ້ຄວາມຈິງເລື່ອງພະເຈົ້າ. ໃນປຶ້ມເຫຼົ່ານີ້ມີປຶ້ມຫົວດຽວທີ່ມີຄ່າຫຼາຍກວ່າຫມູ່ໝົດ ລູກຮູ້ບໍວ່າແມ່ນປຶ້ມຫົວໃດ?— ແມ່ນຄຳພີໄບເບິນນັ້ນແຫຼະ.
ເປັນຫຍັງຄຳພີໄບເບິນຈຶ່ງສຳຄັນຫຼາຍ?— ເພາະເປັນປຶ້ມທີ່ມາຈາກພະເຈົ້າ. ປຶ້ມນີ້ບອກເຮົາກ່ຽວກັບພະເຈົ້າແລະສິ່ງດີໆທີ່ພະອົງເຮັດເພື່ອເຮົາ. ແລະສະແດງໃຫ້ເຮົາເຫັນເຖິງສິ່ງທີ່ເຮົາຄວນເຮັດເພື່ອໃຫ້ພະເຈົ້າພໍໃຈ. ປຶ້ມນີ້ເປັນຄືຈົດໝາຍທີ່ມາຈາກພະເຈົ້າ.
ເອົາລະ ພະເຈົ້າຈະຂຽນຄຳພີໄບເບິນທັງໝົດໃນສະຫວັນແລ້ວຈຶ່ງໃຫ້ແກ່ມະນຸດກໍໄດ້. ແຕ່ພະອົງບໍ່ໄດ້ເຮັດເຊັ່ນນັ້ນ. ເຖິງວ່າຄວາມຄິດຕ່າງໆມາຈາກພະເຈົ້າ ພະອົງໄດ້ໃຊ້ຜູ້ຮັບໃຊ້ຂອງພະອົງເທິງແຜ່ນດິນໂລກນີ້ຂຽນຄຳພີໄບເບິນສ່ວນຫຼາຍ.
ພະເຈົ້າເຮັດແບບນັ້ນຢ່າງໃດ?— ເພື່ອຈະເຂົ້າໃຈວ່າພະອົງເຮັດຢ່າງໃດ ໃຫ້ເຮົາມາພິຈາລະນາເລື່ອງນີ້. ເມື່ອເຮົາໄດ້ຍິນສຽງຄົນຈາກວິທະຍຸ ສຽງນັ້ນອາດຈະມາຈາກໃຜຄົນໜຶ່ງທີ່ຢູ່ທາງໄກ. ເມື່ອເຮົາເບິ່ງໂທລະພາບ ເຮົາຍັງສາມາດເຫັນພາບຂອງຄົນເຫຼົ່ານັ້ນທີ່ຢູ່ປະເທດອື່ນໆໃນໂລກ ແລະເຮົາໄດ້ຍິນສິ່ງທີ່ເຂົາເຈົ້າກຳລັງເວົ້າຢູ່.
ມະນຸດຍັງເດີນທາງໄປເຖິງດວງຈັນໂດຍຍານອະວະກາດໄດ້ ແລະເຂົາເຈົ້າຍັງສົ່ງຂ່າວຈາກດວງຈັນກັບມາແຜ່ນດິນໂລກ. ລູກເຄີຍໄດ້ຍິນເລື່ອງນັ້ນບໍ?— ຖ້າວ່າມະນຸດສາມາດເຮັດເຊັ່ນນັ້ນໄດ້ ແລ້ວພະເຈົ້າຈະສົ່ງຂໍ້ຄວາມຈາກສະຫວັນໄດ້ບໍ?— ແນ່ນອນ ພະອົງຕ້ອງເຮັດໄດ້! ແລະພະອົງເຮັດແບບນັ້ນດົນນານກ່ອນມະນຸດຈະໄດ້ມີວິທະຍຸຫຼືໂທລະພາບອີກ.
ເຮົາຮູ້ໄດ້ແນວໃດວ່າພະເຈົ້າເວົ້າກັບເຮົາຈາກບ່ອນທີ່ຫ່າງໄກໄດ້?
ໂມເຊເປັນຄົນໜຶ່ງທີ່ເຄີຍໄດ້ຍິນພະເຈົ້າເວົ້າ. ໂມເຊບໍ່ສາມາດເຫັນພະເຈົ້າ ແຕ່ລາວໄດ້ຍິນສຽງເວົ້າຂອງພະອົງ. ມີຫຼາຍລ້ານຄົນຢູ່ທີ່ນັ້ນເມື່ອເຫດການນັ້ນເກີດຂຶ້ນ. ທີ່ຈິງ ໃນມື້ນັ້ນພະເຈົ້າໄດ້ເຮັດໃຫ້ພູໜ່ວຍໜຶ່ງສັ່ນສະເທືອນໄປທົ່ວ ແລະມີຟ້າຮ້ອງແລະຟ້າແມບ. ຜູ້ຄົນຮູ້ວ່າເປັນສຽງພະເຈົ້າເວົ້າ ແຕ່ເຂົາເຈົ້າຢ້ານຫຼາຍ. ດັ່ງນັ້ນ ເຂົາເຈົ້າບອກໂມເຊວ່າ: “ຢ່າໃຫ້ພະເຈົ້າປາກກັບພວກເຮົາຢ້ານວ່າເຮົາທັງຫຼາຍຈະຕາຍໄປ.” ຕໍ່ມາໂມເຊໄດ້ຂຽນສິ່ງຕ່າງໆທີ່ພະເຈົ້າເວົ້າ. ແລະສິ່ງທີ່ໂມເຊຂຽນກໍຢູ່ໃນຄຳພີໄບເບິນ.—ອົບພະຍົບ 20:18-21.
ໂມເຊຂຽນຄຳພີໄບເບິນຫ້າພະທຳທຳອິດ. ແຕ່ບໍ່ແມ່ນໂມເຊຜູ້ດຽວທີ່ໄດ້ຂຽນຄຳພີໄບເບິນ. ພະເຈົ້າໃຊ້ປະມານ 40 ຄົນຂຽນສ່ວນຕ່າງໆຂອງຄຳພີໄບເບິນ. ຄົນເຫຼົ່ານີ້ມີຊີວິດດົນນານມາແລ້ວ ແລະໃຊ້ເວລາຫຼາຍປີຈຶ່ງໄດ້ຂຽນຄຳພີໄບເບິນໃຫ້ສຳເລັດ. ແມ່ນແລ້ວ ຕ້ອງໃຊ້ເວລາປະມານ 1.600 ປີ! ສິ່ງທີ່ເປັນຕາງຶດແມ່ນ ຄົນເຫຼົ່ານັ້ນບາງຄົນບໍ່ເຄີຍພົບກັນເລີຍ ແຕ່ສິ່ງທີ່ເຂົາເຈົ້າຂຽນສອດຄ່ອງກັນທັງໝົດ.
ຜູ້ທີ່ຂຽນຄຳພີໄບເບິນເຫຼົ່ານີ້ມີຊື່ວ່າແນວໃດແດ່?
ບາງຄົນທີ່ພະເຈົ້າໃຊ້ຂຽນຄຳພີໄບເບິນເປັນຄົນມີຊື່ສຽງ. ແມ່ນຢູ່ວ່າໂມເຊເຄີຍເປັນຄົນລ້ຽງແກະ ແຕ່ລາວກາຍເປັນຜູ້ນຳພາຊາດອິດສະລາແອນ. ຊາໂລໂມນເປັນກະສັດທີ່ທັງສະຫຼາດທີ່ສຸດແລະຮັ່ງມີທີ່ສຸດໃນໂລກ. ແຕ່ຜູ້ຂຽນຄົນອື່ນໆບໍ່ໄດ້ໂດດເດັ່ນຂະໜາດນັ້ນ. ອາໂມດເປັນຄົນບົວລະບັດຕົ້ນໝາກເດື່ອເທດ.
ນອກຈາກນັ້ນ ຜູ້ຂຽນຄຳພີໄບເບິນຄົນໜຶ່ງເປັນໝໍ. ລູກຮູ້ຈັກຊື່ຂອງລາວບໍ?— ລາວຊື່ວ່າລືກາ. ຜູ້ຂຽນອີກຄົນໜຶ່ງເຄີຍເປັນຄົນເກັບພາສີ. ລາວຊື່ມັດທາຍ. ຍັງມີອີກຄົນໜຶ່ງເຄີຍເປັນທະນາຍຄວາມ ເປັນຜູ້ຊ່ຽວຊານທາງກົດໝາຍຂອງສາສະໜາຢິວ. ລາວຂຽນພະທຳຕ່າງໆໃນຄຳພີໄບເບິນຫຼາຍກວ່າຄົນອື່ນ. ລູກຮູ້ຊື່ຂອງລາວບໍ?— ຜູ້ນັ້ນຊື່ວ່າໂປໂລ. ເປໂຕແລະໂຢຮັນສາວົກຂອງພະເຍຊູເປັນຜູ້ຂຽນຄຳພີໄບເບິນຄືກັນ ເຂົາເຈົ້າເຄີຍເປັນຄົນຫາປາ.
ຜູ້ຂຽນຄຳພີໄບເບິນຫຼາຍຄົນໄດ້ຂຽນສິ່ງຕ່າງໆທີ່ພະເຈົ້າຈະເຮັດໃນອະນາຄົດ. ເຂົາເຈົ້າຮູ້ເລື່ອງທີ່ຍັງບໍ່ທັນເກີດຂຶ້ນໄດ້ແນວໃດ?— ພະເຈົ້າບອກຂໍ້ມູນເຫຼົ່ານັ້ນກັບເຂົາເຈົ້າ. ພະອົງບອກເຂົາເຈົ້າໃຫ້ຮູ້ສິ່ງທີ່ຈະເກີດຂຶ້ນ.
ຕອນທີ່ພະເຍຊູຄູສອນຜູ້ຍິ່ງໃຫຍ່ຢູ່ເທິງແຜ່ນດິນໂລກ ຄຳພີໄບເບິນສ່ວນຫຼາຍຂຽນແລ້ວໆ. ໃຫ້ລູກຈື່ໄວ້ວ່າ ຄູສອນຜູ້ຍິ່ງໃຫຍ່ເຄີຍຢູ່ໃນສະຫວັນ. ພະອົງຮູ້ສິ່ງທີ່ພະເຈົ້າໄດ້ເຮັດ. ພະເຍຊູເຊື່ອວ່າຄຳພີໄບເບິນມາຈາກພະເຈົ້າບໍ?— ແມ່ນແລ້ວ ພະອົງເຊື່ອ.
ເມື່ອພະເຍຊູເວົ້າກັບຄົນອື່ນກ່ຽວກັບສິ່ງທີ່ພະເຈົ້າໄດ້ເຮັດ ພະອົງອ່ານຈາກຄຳພີໄບເບິນ. ລາງເທື່ອພະອົງບອກຕາມສິ່ງທີ່ພະອົງຈື່ໄດ້. ພະເຍຊູຍັງໃຫ້ຄວາມຮູ້ທີ່ພະອົງໄດ້ຮັບຈາກພະເຈົ້າແກ່ພວກເຮົາອີກ. ພະເຍຊູກ່າວວ່າ: “ສິ່ງທັງຫຼາຍທີ່ເຮົາໄດ້ຍິນແຕ່ພະເຈົ້າ ສິ່ງນັ້ນເຮົາໄດ້ກ່າວແກ່ມະນຸດສະໂລກ.” (ໂຢຮັນ 8:26) ພະເຍຊູເຄີຍໄດ້ຍິນຫຼາຍສິ່ງຈາກພະເຈົ້າເພາະວ່າພະອົງເຄີຍຢູ່ກັບພະເຈົ້າ. ແລ້ວເຮົາຈະອ່ານສິ່ງເຫຼົ່ານັ້ນທີ່ພະເຍຊູກ່າວຈາກໃສ?— ໃນຄຳພີໄບເບິນ. ທຸກສິ່ງໄດ້ຂຽນໄວ້ແລ້ວເພື່ອໃຫ້ເຮົາອ່ານ.
ແນ່ນອນ ເມື່ອພະເຈົ້າໃຊ້ມະນຸດຂຽນ ເຂົາເຈົ້າຈະຕ້ອງຂຽນເປັນພາສາທີ່ເຂົາເຈົ້າໃຊ້ກັນເປັນປະຈຳ. ດັ່ງນັ້ນ ຄຳພີໄບເບິນສ່ວນຫຼາຍຂຽນເປັນພາສາເຫບເລີ ບາງສ່ວນເປັນພາສາອາລາເມອິກ ອີກຫຼາຍສ່ວນເປັນພາສາເກັຣກ. ເນື່ອງຈາກຄົນສ່ວນຫຼາຍໃນທຸກມື້ນີ້ອ່ານພາສາເຫຼົ່ານີ້ບໍ່ໄດ້ ຈຶ່ງມີການແປຄຳພີໄບເບິນເປັນພາສາອື່ນໆ. ປັດຈຸບັນສ່ວນຕ່າງໆຂອງຄຳພີໄບເບິນຊອກຫາອ່ານໄດ້ໃນຫຼາຍກວ່າ 2.260 ພາສາ. ໃຫ້ລອງຄິດເບິ່ງດູ! ຄຳພີໄບເບິນເປັນຈົດໝາຍທີ່ພະເຈົ້າໃຫ້ກັບມະນຸດທຸກຫົນທຸກແຫ່ງ. ບໍ່ວ່າຈະອັດສຳເນົາຈັກເທື່ອ ຂ່າວສານກໍມາຈາກພະເຈົ້າ.
ສິ່ງທີ່ຄຳພີໄບເບິນບອກມີຄວາມສຳຄັນຕໍ່ພວກເຮົາ. ມີການຂຽນຄຳພີໄບເບິນໄວ້ດົນນານມາແລ້ວ. ແຕ່ກໍໄດ້ບອກເຖິງສິ່ງຕ່າງໆທີ່ກຳລັງເກີດຂຶ້ນໃນປັດຈຸບັນ. ແລະຍັງໄດ້ບອກເຖິງສິ່ງທີ່ພະເຈົ້າຈະກະທຳໃນອີກບໍ່ດົນ. ສິ່ງທີ່ຄຳພີໄບເບິນກ່າວເຖິງເປັນຕາຕື່ນເຕັ້ນ! ນີ້ເຮັດໃຫ້ພວກເຮົາມີຄວາມຫວັງທີ່ດີເລີດ.
ລູກຮຽນຮູ້ສິ່ງໃດຈາກການອ່ານຄຳພີໄບເບິນ?
ນອກຈາກນັ້ນ ຄຳພີໄບເບິນຍັງບອກເຮົາວ່າພະເຈົ້າຕ້ອງການໃຫ້ເຮົາຢູ່ຢ່າງໃດ. ຄຳພີໄບເບິນບອກເຮົາວ່າສິ່ງໃດຖືກແລະສິ່ງໃດຜິດ. ລູກຕ້ອງໄດ້ຮູ້ເລື່ອງນີ້ ແລະພໍ່ (ແມ່) ກໍຕ້ອງຮູ້ຄືກັນ. ຄຳພີໄບເບິນບອກເຮົາກ່ຽວກັບຄົນທີ່ເຮັດສິ່ງທີ່ບໍ່ດີແລະຜົນທີ່ໄດ້ເກີດຂຶ້ນກັບເຂົາເຈົ້າ ເພື່ອເຮົາບໍ່ຕ້ອງຮັບຄວາມເດືອດຮ້ອນແບບທີ່ເຂົາເຈົ້າໄດ້ຮັບ. ຄຳພີໄບເບິນຍັງບອກໃຫ້ຮູ້ກ່ຽວກັບຄົນທີ່ເຮັດສິ່ງທີ່ຖືກຕ້ອງແລະຜົນດີທີ່ເຂົາເຈົ້າໄດ້ຮັບ. ເລື່ອງທັງໝົດນີ້ຂຽນໄວ້ເພື່ອປະໂຫຍດຂອງເຮົາ.
ແຕ່ເພື່ອຈະໄດ້ຜົນປະໂຫຍດຫຼາຍທີ່ສຸດຈາກຄຳພີໄບເບິນ ເຮົາຕ້ອງຮູ້ຄຳຕອບຂອງຄຳຖາມຂໍ້ໜຶ່ງ. ຄຳຖາມນີ້ແມ່ນ: ໃຜໃຫ້ຄຳພີໄບເບິນກັບເຮົາ? ລູກຈະຕອບແນວໃດ?— ແມ່ນແລ້ວ ຄຳພີໄບເບິນທຸກຕອນມາຈາກພະເຈົ້າ. ຄັນແລ້ວ ເຮົາຈະເຮັດແນວໃດເພື່ອໃຫ້ເຫັນວ່າເຮົາເປັນຄົນສະຫຼາດແທ້ໆ?— ເຮົາຄວນຈະຟັງພະເຈົ້າແລະເຮັດຕາມສິ່ງທີ່ພະອົງບອກ.
ດັ່ງນັ້ນ ເຮົາຈະຕ້ອງຫາເວລາອ່ານຄຳພີໄບເບິນນຳກັນ. ເມື່ອເຮົາຮັບຈົດໝາຍຈາກຄົນທີ່ເຮົາຮັກຫຼາຍ ເຮົາຈະອ່ານແລ້ວອ່ານອີກ. ຈົດໝາຍນັ້ນມີຄ່າຫຼາຍຕໍ່ເຮົາ. ຄຳພີໄບເບິນຄວນຈະມີຄ່າສຳລັບເຮົາແນວນັ້ນ ເພາະວ່າເປັນຈົດໝາຍທີ່ມາຈາກຜູ້ທີ່ຮັກເຮົາຫຼາຍທີ່ສຸດ. ຄຳພີໄບເບິນເປັນຈົດໝາຍມາຈາກພະເຈົ້າຜູ້ປ່ຽມດ້ວຍຄວາມຮັກ.
ຕອນນີ້ໃຫ້ເຮົາໃຊ້ເວລາອີກຈັກສອງສາມນາທີເພື່ອອ່ານຂໍ້ຄຳພີຕໍ່ໄປນີ້ທີ່ສະແດງວ່າຄຳພີໄບເບິນເປັນຖ້ອຍຄຳຂອງພະເຈົ້າແທ້ໆ ເຊິ່ງໄດ້ຂຽນຂຶ້ນເພື່ອປະໂຫຍດຂອງເຮົາ: ໂລມ 15:4; 2 ຕີໂມເຕ 3:16, 17; ແລະ 2 ເປໂຕ 1:20, 21.