ບົດທີ 25
ຄົນທີ່ເຮັດສິ່ງຊົ່ວຮ້າຍສາມາດປ່ຽນແປງແນວທາງຂອງຕົນໄດ້ບໍ?
ຖ້າທຸກຄົນເຮັດແຕ່ສິ່ງທີ່ດີຄົງຈະເປັນເລື່ອງທີ່ດີຫຼາຍແມ່ນບໍ?— ແຕ່ບໍ່ມີໃຜເຮັດສິ່ງທີ່ດີໄດ້ສະເໝີ. ລູກຮູ້ບໍວ່າເປັນຫຍັງບາງຄັ້ງພວກເຮົາທຸກຄົນຈຶ່ງເຮັດສິ່ງທີ່ບໍ່ດີ ເຖິງແມ່ນວ່າເຮົາຢາກເຮັດສິ່ງທີ່ດີກໍຕາມ?— ເນື່ອງຈາກວ່າພວກເຮົາທຸກຄົນເກີດມາເປັນຄົນບາບ. ແຕ່ບາງຄົນເຮັດສິ່ງທີ່ຊົ່ວຮ້າຍຫຼາຍ. ເຂົາເຈົ້າກຽດຊັງແລະເຈຕະນາທຳຮ້າຍຜູ້ອື່ນ. ລູກຄິດວ່າເຂົາເຈົ້າສາມາດປ່ຽນແປງແລະຮຽນຮູ້ທີ່ຈະເຮັດສິ່ງທີ່ດີບໍ?—
ເບິ່ງຊາຍຫນຸ່ມໃນຮູບທີ່ກຳລັງຢືນເຝົ້າເສື້ອຊັ້ນນອກຂອງຜູ້ທີ່ກຳລັງໂຍນກ້ອນຫີນໃສ່ທ່ານເອຕຽນ. ໃນພາສາເຫບເລີຊື່ຂອງລາວແມ່ນໂຊໂລ ແຕ່ໃນພາສາໂລມັນຊື່ຂອງລາວແມ່ນໂປໂລ. ລາວດີໃຈທີ່ເອຕຽນເຊິ່ງເປັນສາວົກຂອງຄູຜູ້ຍິ່ງໃຫຍ່ກຳລັງຖືກຂ້າ. ໃຫ້ມາເບິ່ງນຳກັນວ່າເປັນຫຍັງໂຊໂລຈຶ່ງເຮັດສິ່ງທີ່ຊົ່ວຮ້າຍແບບນັ້ນ.
ໂຊໂລຂຶ້ນກັບກຸ່ມສາສະໜາຢິວທີ່ເອີ້ນວ່າພວກຟາລິຊຽນ. ພວກຟາລິຊຽນມີພະຄຳຂອງພະເຈົ້າ ແຕ່ເຂົາເຈົ້າສົນໃຈຄຳສອນທີ່ຜູ້ນຳສາສະໜາບາງຄົນຂອງຕົນສອນຫຼາຍກວ່າ. ເລື່ອງນີ້ເປັນສາເຫດພາໃຫ້ໂຊໂລເຮັດສິ່ງທີ່ຊົ່ວຮ້າຍ.
ເມື່ອເອຕຽນຖືກຈັບໃນເມືອງເຢຣຶຊາເລມ ໂຊໂລກໍຢູ່ທີ່ນັ້ນ. ເອຕຽນຖືກພາໂຕໄປຂຶ້ນສານ ເຊິ່ງຜູ້ພິພາກສາບາງຄົນເປັນພວກຟາລິຊຽນ. ເຖິງແມ່ນວ່າມີການເວົ້າໃສ່ຮ້າຍປ້າຍສີເອຕຽນ ແຕ່ລາວກໍບໍ່ຢ້ານ. ຕໍ່ໜ້າພວກຜູ້ພິພາກສາລາວເວົ້າຢ່າງກ້າຫານແລະໃຫ້ຄຳພະຍານທີ່ດີກ່ຽວກັບພະເຢໂຫວາພະເຈົ້າແລະພະເຍຊູ.
ແຕ່ພວກຜູ້ພິພາກສາເຫຼົ່ານັ້ນບໍ່ມັກໃນສິ່ງທີ່ພວກຕົນໄດ້ຍິນ. ພວກເຂົາເຈົ້າຮູ້ເລື່ອງພະເຍຊູຫຼາຍຢູ່ແລ້ວ. ທີ່ຈິງ ບໍ່ດົນກ່ອນໜ້ານີ້ ພວກເຂົາເຈົ້າໄດ້ປະຫານຊີວິດພະເຍຊູ! ແຕ່ຫຼັງຈາກນັ້ນບໍ່ດົນ ພະເຢໂຫວານຳເອົາພະເຍຊູກັບຄືນໄປສະຫວັນ. ບັດນີ້ ແທນທີ່ຈະປ່ຽນແປງແນວທາງຂອງຕົນ ຜູ້ພິພາກສາເຫຼົ່ານັ້ນພັດຕໍ່ສູ້ເຫຼົ່າສາວົກຂອງພະເຍຊູ.
ພວກຜູ້ພິພາກສາຈັບເອຕຽນແລະພາລາວອອກໄປນອກເມືອງ. ພວກເຂົາເຈົ້າຕີລາວຈົນລົ້ມລົງແລະໂຍນກ້ອນຫີນໃສ່ລາວ. ແລະດັ່ງທີ່ລູກເຫັນໃນຮູບ ໂຊໂລກຳລັງຢືນເບິ່ງຢູ່. ລາວຄິດວ່າການຂ້າເອຕຽນເປັນສິ່ງທີ່ຖືກຕ້ອງ.
ເປັນຫຍັງທ່ານໂຊໂລຈຶ່ງຄິດວ່າເປັນສິ່ງຖືກຕ້ອງທີ່ຈະຂ້າທ່ານເອຕຽນ?
ລູກຮູ້ບໍວ່າເປັນຫຍັງໂຊໂລຈຶ່ງຄິດເຊັ່ນນັ້ນ?— ທີ່ຈິງ ໂຊໂລເຄີຍເປັນຟາລິຊຽນມາຕະຫຼອດຊີວິດ ແລະລາວຄິດວ່າຄຳສອນຂອງພວກຟາລິຊຽນຖືກຕ້ອງ. ລາວເບິ່ງພວກນັ້ນເປັນແບບຢ່າງ ດັ່ງນັ້ນລາວຈຶ່ງຮຽນແບບພວກເຂົາເຈົ້າ.—ກິດຈະການ 7:54-60.
ຫຼັງຈາກທີ່ເອຕຽນຖືກຂ້າ ໂຊໂລເຮັດຫຍັງ?— ລາວພະຍາຍາມກຳຈັດສາວົກຂອງພະເຍຊູທີ່ເຫຼືອ! ລາວເຂົ້າໄປໃນເຮືອນຂອງຄົນເຫຼົ່ານັ້ນແລະດຶງລາກເອົາທັງຜູ້ຊາຍແລະຜູ້ຍິງອອກມາ. ຈາກນັ້ນກໍຈັບເຂົາເຈົ້າໄປຂັງຄຸກ. ພວກສາວົກຫຼາຍຄົນຕ້ອງໜີອອກຈາກເມືອງເຢຣຶຊາເລມ ແຕ່ພວກເຂົາເຈົ້າບໍ່ໄດ້ເຊົາປະກາດກ່ຽວກັບພະເຍຊູ.—ກິດຈະການ 8:1-4.
ນີ້ເປັນສາເຫດທີ່ເຮັດໃຫ້ໂຊໂລຊັງສາວົກຂອງພະເຍຊູຫຼາຍຂຶ້ນອີກ. ດັ່ງນັ້ນ ລາວຈຶ່ງໄປຫາທ່ານກາອີເຟເຊິ່ງເປັນປະໂລຫິດໃຫຍ່ແລະໄດ້ຮັບອະນຸຍາດໃຫ້ໄປຈັບຄລິດສະຕຽນໃນເມືອງດາມາເຊ. ໂຊໂລຕ້ອງການເອົາຄົນເຫຼົ່ານັ້ນມາເມືອງເຢຣຶຊາເລມໃນຖານະນັກໂທດເພື່ອໃຫ້ເຂົາເຈົ້າຖືກລົງໂທດ. ແຕ່ເມື່ອລາວກຳລັງເດີນທາງໄປເມືອງດາມາເຊ ມີເຫດການແປກປະຫຼາດເກີດຂຶ້ນ.
ໃຜກຳລັງເວົ້າກັບທ່ານໂຊໂລ ແລະພະອົງສົ່ງທ່ານໂຊໂລໃຫ້ໄປເຮັດຫຍັງ?
ມີແສງມາບຈາກສະຫວັນ ແລະມີສຽງກ່າວວ່າ: “ໂຊໂລ ໂຊໂລເອີຍ ເປັນສັນໃດທ່ານຂົ່ມເຫງເຮົາ?” ແມ່ນພະເຍຊູເອງທີ່ເວົ້າຈາກສະຫວັນ! ແສງນັ້ນເຫຼື້ອມແຈ້ງຈົນເຮັດໃຫ້ຕາຂອງໂຊໂລບອດ ແລະຄົນທີ່ໄປກັບໂຊໂລຈຶ່ງຕ້ອງພາລາວໄປເມືອງດາມາເຊ.
ສາມມື້ຕໍ່ມາ ພະເຍຊູໄດ້ປາກົດໃນນິມິດແກ່ສາວົກຄົນໜຶ່ງໃນເມືອງດາມາເຊທີ່ຊື່ວ່າອານາເນຍ. ພະເຍຊູບອກອານາເນຍໃຫ້ໄປຫາໂຊໂລເພື່ອປິ່ນປົວຕາຂອງລາວໃຫ້ເຊົາແລະໃຫ້ເວົ້ານຳລາວ. ເມື່ອອານາເນຍເວົ້າກັບໂຊໂລ ລາວກໍຍອມຮັບຄວາມຈິງເລື່ອງພະເຍຊູ ແລະຕາຂອງລາວກໍເຫັນຮຸ່ງໄດ້ອີກຄັ້ງໜຶ່ງ. ແນວທາງຊີວິດທັງສິ້ນຂອງລາວປ່ຽນແປງ ແລະລາວໄດ້ມາເປັນຜູ້ຮັບໃຊ້ທີ່ສັດຊື່ຂອງພະເຈົ້າ.—ກິດຈະການ 9:1-22.
ຕອນນີ້ລູກເຂົ້າໃຈແລ້ວບໍເປັນຫຍັງໂຊໂລຈຶ່ງເຮັດສິ່ງຊົ່ວຮ້າຍ?— ເປັນຍ້ອນລາວໄດ້ຮັບການສອນແບບຜິດໆ. ລາວຕິດຕາມຄົນທີ່ບໍ່ສັດຊື່ຕໍ່ພະເຈົ້າ. ແລະລາວເຄີຍຢູ່ໃນກຸ່ມຂອງຄົນທີ່ເອົາແນວຄິດຂອງມະນຸດນຳໜ້າພະຄຳຂອງພະເຈົ້າ. ແຕ່ເປັນຫຍັງໂຊໂລຈຶ່ງປ່ຽນແປງແນວທາງຊີວິດຂອງຕົນແລະເລີ່ມຕົ້ນເຮັດສິ່ງທີ່ດີ ເຖິງແມ່ນວ່າພວກຟາລິຊຽນຄົນອື່ນໆຍັງຕໍ່ສູ້ພະເຈົ້າຢູ່?— ກໍຍ້ອນວ່າທີ່ຈິງແລ້ວໂຊໂລບໍ່ໄດ້ກຽດຊັງຄວາມຈິງ. ດັ່ງນັ້ນ ເມື່ອໄດ້ຮັບການຊີ້ແຈງໃນສິ່ງທີ່ຖືກຕ້ອງ ລາວກໍພ້ອມທີ່ຈະປະຕິບັດຕາມ.
ລູກຮູ້ບໍວ່າຕໍ່ມາໂຊໂລໄດ້ກາຍເປັນໃຜ?— ແມ່ນແລ້ວ ລາວກາຍເປັນທີ່ຮູ້ຈັກໃນຖານະອັກຄະສາວົກໂປໂລ ເຊິ່ງເປັນອັກຄະສາວົກຄົນໜຶ່ງຂອງພະເຍຊູ. ແລະຂໍໃຫ້ຈື່ໄວ້ວ່າໂປໂລຂຽນພະທຳຕ່າງໆໃນຄຳພີໄບເບິນຫຼາຍກວ່າທີ່ຄົນອື່ນຂຽນ.
ເຊັ່ນດຽວກັບໂຊໂລ ມີຫຼາຍຄົນທີ່ສາມາດປ່ຽນແປງໄດ້. ແຕ່ມັນບໍ່ງ່າຍເນື່ອງຈາກມີຜູ້ທີ່ພະຍາຍາມຢ່າງໜັກເພື່ອເຮັດໃຫ້ຄົນເຮົາເຮັດສິ່ງທີ່ຊົ່ວຮ້າຍ. ລູກຮູ້ບໍວ່າຜູ້ນັ້ນແມ່ນໃຜ?— ພະເຍຊູເວົ້າເຖິງຜູ້ນັ້ນເມື່ອພະອົງປາກົດແກ່ໂຊໂລໃນລະຫວ່າງທີ່ເດີນທາງໄປເມືອງດາມາເຊ. ຢູ່ທີ່ນັ້ນ ພະເຍຊູເວົ້າກັບໂຊໂລຈາກສະຫວັນວ່າ: “ເຮົາຈະໂຜດທ່ານໃຫ້ . . . ເປີດຕາແຫ່ງເຂົາທັງຫຼາຍ ແລະຈະໃຫ້ເຂົາໄດ້ປິ່ນໜ້າໜີຈາກທີ່ມືດເຂົ້າມາໃນທີ່ແຈ້ງ ແລະອອກຈາກອຳນາດແຫ່ງຊາຕານມາຫາພະເຈົ້າ.”—ກິດຈະການ 26:17, 18.
ແມ່ນແລ້ວ ຊາຕານພະຍາມານນັ້ນເອງທີ່ພະຍາຍາມເຮັດໃຫ້ທຸກຄົນເຮັດສິ່ງທີ່ຊົ່ວຮ້າຍ. ລູກຮູ້ສຶກບໍວ່າບາງຄັ້ງກໍຍາກທີ່ຈະເຮັດສິ່ງທີ່ຖືກຕ້ອງ?— ເຮົາໝົດທຸກຄົນຮູ້ສຶກແບບນັ້ນ. ຊາຕານເປັນຜູ້ເຮັດໃຫ້ມັນຍາກ. ແຕ່ຍັງມີເຫດຜົນອີກຢ່າງໜຶ່ງທີ່ເຮັດໃຫ້ບໍ່ງ່າຍສະເໝີໄປທີ່ຈະເຮັດສິ່ງທີ່ຖືກຕ້ອງ. ລູກຮູ້ເຫດຜົນບໍ?— ກໍຍ້ອນວ່າເຮົາເກີດມາເປັນຄົນບາບ.
ບາບນັ້ນເອງທີ່ມັກເຮັດໃຫ້ເຮົາເຮັດສິ່ງຜິດໄດ້ງ່າຍກວ່າການເຮັດສິ່ງທີ່ຖືກຕ້ອງ. ດັ່ງນັ້ນ ເຮົາຕ້ອງເຮັດຫຍັງ?— ແມ່ນແລ້ວ ເຮົາຕ້ອງຕໍ່ສູ້ເພື່ອຈະເຮັດສິ່ງທີ່ຖືກຕ້ອງ. ເມື່ອເຮົາເຮັດເຊັ່ນນັ້ນ ເຮົາສາມາດໝັ້ນໃຈໄດ້ວ່າພະເຍຊູຜູ້ທີ່ຮັກເຮົາຈະຊ່ວຍເຮົາ.
ເມື່ອພະເຍຊູຢູ່ເທິງແຜ່ນດິນໂລກ ພະອົງຮັກຄົນທີ່ເຄີຍເຮັດສິ່ງຊົ່ວຮ້າຍ ແຕ່ໄດ້ປ່ຽນແປງຕົວເອງ. ພະອົງຮູ້ວ່າມັນຍາກສ່ຳໃດສຳລັບເຂົາເຈົ້າທີ່ຈະປ່ຽນແປງ. ຕົວຢ່າງເຊັ່ນ ມີຜູ້ຍິງທີ່ເຄີຍມີເພດສຳພັນກັບຜູ້ຊາຍຫຼາຍຄົນ. ແນ່ນອນວ່າການເຮັດແບບນັ້ນເປັນສິ່ງບໍ່ດີ. ຄຳພີໄບເບິນເອີ້ນຜູ້ຍິງເຫຼົ່ານີ້ວ່າຍິງແມ່ຈ້າງຫຼືໂສເພນີ.
ເປັນຫຍັງພະເຍຊູຈຶ່ງໃຫ້ອະໄພຜູ້ຍິງຄົນນີ້ທີ່ເຄີຍເຮັດສິ່ງທີ່ບໍ່ດີ?
ຄັ້ງໜຶ່ງ ຜູ້ຍິງທີ່ເຄີຍປະພຶດຕົວແບບນັ້ນໄດ້ຍິນເລື່ອງຂອງພະເຍຊູ ແລະລາວໄດ້ມາທີ່ເຮືອນຂອງຟາລິຊຽນຄົນໜຶ່ງທີ່ພະອົງຢູ່ຫັ້ນ. ລາວເທນ້ຳມັນໃສ່ຕີນຂອງພະເຍຊູແລະເຊັດນ້ຳຕາຂອງລາວທີ່ໄຫຼລົງຕີນຂອງພະອົງດ້ວຍຜົມຂອງຕົນ. ລາວຮູ້ສຶກເສຍໃຈຫຼາຍຕໍ່ບາບຂອງຕົນ ດັ່ງນັ້ນພະເຍຊູຈຶ່ງໃຫ້ອະໄພລາວ. ແຕ່ພວກຟາລິຊຽນຄິດວ່າລາວບໍ່ສົມຄວນຈະໄດ້ຮັບການໃຫ້ອະໄພ.—ລືກາ 7:36-50.
ລູກຮູ້ບໍວ່າພະເຍຊູເວົ້າຫຍັງກັບພວກຟາລິຊຽນບາງຄົນ?— ພະອົງບອກເຂົາເຈົ້າວ່າ: “ພວກຍິງແມ່ຈ້າງກໍລື່ນທ່ານທັງຫຼາຍໃນແຜ່ນດິນຂອງພະເຈົ້າ.” (ມັດທາຍ 21:31) ພະເຍຊູເວົ້າແບບນີ້ກໍເນື່ອງຈາກວ່າພວກຍິງແມ່ຈ້າງເຊື່ອຟັງພະອົງ ແລະເຂົາເຈົ້າໄດ້ປ່ຽນແປງແນວທາງຂອງຕົນ. ແຕ່ພວກຟາລິຊຽນຍັງເຮັດສິ່ງຊົ່ວຮ້າຍຕໍ່ເຫຼົ່າສາວົກຂອງພະເຍຊູຕໍ່ໄປ.
ດັ່ງນັ້ນ ເມື່ອຄຳພີໄບເບິນສະແດງໃຫ້ເຫັນວ່າສິ່ງທີ່ເຮົາກຳລັງເຮັດເປັນສິ່ງທີ່ບໍ່ດີ ເຮົາຄວນເຕັມໃຈປ່ຽນແປງ. ແລະເມື່ອເຮົາຮຽນຮູ້ໃນສິ່ງທີ່ພະເຢໂຫວາຕ້ອງການໃຫ້ເຮົາເຮັດ ເຮົາຄວນເຮັດສິ່ງນັ້ນດ້ວຍຄວາມກະຕືລືລົ້ນ. ແລ້ວພະເຢໂຫວາກໍຈະພໍໃຈໃນຕົວເຮົາແລະຈະປະທານຊີວິດຕະຫຼອດໄປໃຫ້ແກ່ເຮົາ.
ເພື່ອຊ່ວຍພວກເຮົາໃຫ້ຫຼີກລ່ຽງການເຮັດສິ່ງທີ່ບໍ່ດີ ຂໍໃຫ້ອ່ານນຳກັນທີ່ພະທຳຄຳເພງ 119:9-11; ສຸພາສິດ 3:5-7; 12:15.