ບົດທີ 33
ພະເຍຊູປົກປ້ອງຄຸ້ມຄອງເຮົາໄດ້
ລູກຄິດວ່າພະເຍຊູເປັນແນວໃດ ເປັນກະສັດທີ່ມີລິດເດດຫຼືເປັນແອນ້ອຍທີ່ຊ່ວຍເຫຼືອຕົນເອງບໍ່ໄດ້?
ເມື່ອພະເຍຊູໃຫຍ່ຂຶ້ນແລະຮູ້ວ່າຕົນເອງໄດ້ຮັບການປົກປ້ອງຄຸ້ມຄອງແນວໃດຕອນເປັນເດັກນ້ອຍ ລູກຄິດວ່າພະເຍຊູໄດ້ອະທິດຖານເຖິງພະເຢໂຫວາແລະຂອບໃຈພະອົງບໍ?— ລູກຄິດວ່າໃນເວລາຕໍ່ມາພະເຍຊູອາດຈະບອກຫຍັງກັບນາງມາລີແລະທ້າວໂຢເຊບເມື່ອພະອົງຮູ້ວ່າທັງສອງເຄີຍຊ່ວຍຊີວິດພະອົງໂດຍພາໜີໄປຢູ່ປະເທດເອຢິບ?—
ແມ່ນແລ້ວ ພະເຍຊູບໍ່ແມ່ນແອນ້ອຍອີກຕໍ່ໄປ. ພະອົງແມ່ນແຕ່ບໍ່ໄດ້ຢູ່ເທິງແຜ່ນດິນໂລກຄືກັບທີ່ພະອົງເຄີຍຢູ່. ແຕ່ລູກເຄີຍສັງເກດບໍວ່າປັດຈຸບັນນີ້ເບິ່ງຄືວ່າບາງຄົນຄິດວ່າພະເຍຊູເປັນພຽງແອນ້ອຍຢູ່ໃນຮາງຫຍ້າ?— ເປັນຈິງເຊັ່ນນັ້ນໃນຍາມບຸນໂນແອນ ເຊິ່ງຫຼາຍບ່ອນໄດ້ມີການຈັດການສະແດງຮູບພາບພະເຍຊູວ່າເປັນແອນ້ອຍ.
ເຖິງແມ່ນວ່າພະເຍຊູບໍ່ໄດ້ຢູ່ເທິງແຜ່ນດິນໂລກອີກຕໍ່ໄປແລ້ວກໍຕາມ ແຕ່ລູກເຊື່ອວ່າພະອົງຍັງມີຊີວິດຢູ່ບໍ?— ແມ່ນແລ້ວ ພະອົງຖືກປຸກໃຫ້ຟື້ນຄືນມາຈາກຕາຍແລະຕອນນີ້ພະອົງເປັນກະສັດທີ່ມີລິດເດດໃນສະຫວັນ. ລູກຄິດວ່າພະອົງສາມາດເຮັດຫຍັງໄດ້ແດ່ເພື່ອປົກປ້ອງຄຸ້ມຄອງຜູ້ຮັບໃຊ້ຂອງພະອົງ?— ທີ່ຈິງ ເມື່ອພະເຍຊູຢູ່ເທິງແຜ່ນດິນໂລກພະອົງສະແດງໃຫ້ເຫັນວ່າພະອົງສາມາດປົກປ້ອງຜູ້ທີ່ຮັກພະອົງ. ໃຫ້ເຮົາມາເບິ່ງວ່າໃນມື້ໜຶ່ງພະອົງໄດ້ເຮັດແນວໃດເມື່ອຢູ່ໃນເຮືອກັບພວກສາວົກ.
ຕອນນັ້ນໃກ້ຈະແລງແລ້ວ. ພະເຍຊູໄດ້ສັ່ງສອນໝົດມື້ຢູ່ໃກ້ໆກັບທະເລຄາລິເລ ເຊິ່ງເປັນທະເລສາບທີ່ໃຫຍ່ ມີຄວາມຍາວປະມານ 20 ກິໂລແມັດແລະມີຄວາມກວ້າງ 12 ກິໂລແມັດ. ພະອົງເວົ້າກັບເຫຼົ່າສາວົກວ່າ: “ພວກເຮົາຈົ່ງຂວ້າມນ້ຳທະເລເຖີ້ນ.” ດັ່ງນັ້ນ ເຂົາເຈົ້າຈຶ່ງພາກັນຂຶ້ນເຮືອແລະເລີ່ມຕົ້ນອອກເດີນທາງ. ພະເຍຊູເມື່ອຍຫຼາຍ ດັ່ງນັ້ນພະອົງຈຶ່ງໄປນອນຫມູນໝອນຢູ່ທ້າຍເຮືອ. ບໍ່ດົນພະອົງກໍຫຼັບສະໜິດ.
ພະເຍຊູເວົ້າກັບລົມແລະຄື້ນວ່າແນວໃດ?
ພວກສາວົກບໍ່ໄດ້ນອນເພາະຕ້ອງເຝົ້າເບິ່ງເຮືອໃຫ້ແລ່ນໄປຕາມເສັ້ນທາງ. ທຸກຢ່າງດຳເນີນໄປດ້ວຍດີໃນໄລຍະໜຶ່ງ ແຕ່ແລ້ວກໍເກີດມີລົມແຮງ. ລົມພັດແຮງຂຶ້ນແຮງຂຶ້ນ ແລະຄື້ນກໍໃຫຍ່ຂຶ້ນເລື້ອຍໆ. ຄື້ນເລີ່ມຊັດເຂົ້າມາໃນເຮືອຈົນນ້ຳເລີ່ມຈະເຕັມເຮືອແລ້ວ.
ພວກສາວົກພາກັນຢ້ານວ່າຕົນເອງກຳລັງຈະຈົມນ້ຳ ແຕ່ພະເຍຊູບໍ່ຢ້ານ. ພະອົງຍັງນອນຫຼັບຢູ່ທີ່ທ້າຍເຮືອ. ໃນທີ່ສຸດພວກສາວົກພາກັນປຸກພະອົງແລະເວົ້າວ່າ: ‘ພະຜູ້ເປັນນາຍເຈົ້າຂ້າ ພະຜູ້ເປັນນາຍເຈົ້າຂ້າ ຊ່ວຍພວກເຮົາດ້ວຍເຖີ້ນ ພວກເຮົາກຳລັງຈະຕາຍຍ້ອນພາຍຸນີ້.’ ດັ່ງນັ້ນ ພະເຍຊູຈຶ່ງລຸກຂຶ້ນແລະເວົ້າກັບລົມແລະຄື້ນ. ພະອົງກ່າວວ່າ: “ຈົ່ງເຊົາ ຈົ່ງມິດຢູ່ເຖີ້ນ.”
ທັນໃດນັ້ນລົມກໍຢຸດຊະງັກ ແລະທະເລສາບກໍງຽບສະຫງົບ. ພວກສາວົກພາກັນປະຫຼາດໃຈ. ເຂົາເຈົ້າບໍ່ເຄີຍເຫັນສິ່ງແບບນີ້ມາກ່ອນ. ເຂົາເຈົ້າເລີ່ມເວົ້າກັນວ່າ: “ພະອົງນີ້ເປັນຜູ້ໃດທີ່ສັ່ງແກ່ລົມແລະນ້ຳແລະເຂົາຍອມຟັງພະອົງ?”—ລືກາ 8:22-25; ມາລະໂກ 4:35-41.
ລູກຮູ້ບໍວ່າພະເຍຊູແມ່ນໃຜ?— ລູກຮູ້ບໍວ່າພະອົງໄດ້ລິດເດດອັນຍິ່ງໃຫຍ່ມາຈາກໃສ?— ພວກສາວົກບໍ່ຄວນຢ້ານເມື່ອພະເຍຊູຢູ່ກັບເຂົາເຈົ້າ ເພາະພະເຍຊູບໍ່ແມ່ນບຸກຄົນທຳມະດາ. ພະອົງສາມາດເຮັດສິ່ງທີ່ວິເສດຫຼາຍຢ່າງເຊິ່ງບໍ່ມີໃຜເຮັດໄດ້. ພໍ່ (ແມ່) ຈະເລົ່າໃຫ້ລູກຟັງກ່ຽວກັບສິ່ງອື່ນອີກທີ່ພະອົງເຮັດຕອນທີ່ເກີດພາຍຸໃນທະເລ.
ຕໍ່ມາໃນມື້ໜຶ່ງ. ເມື່ອຮອດເວລາຕອນແລງ ພະເຍຊູບອກສາວົກຂອງພະອົງໃຫ້ຂຶ້ນເຮືອແລະຂ້າມໄປອີກຟາກໜຶ່ງຂອງທະເລກ່ອນພະອົງ. ຈາກນັ້ນພະເຍຊູຂຶ້ນໄປເທິງພູເຂົາໂດຍລຳພັງ. ນັ້ນເປັນສະຖານທີ່ທີ່ງຽບສະຫງົບເຊິ່ງພະອົງສາມາດອະທິດຖານເຖິງພະເຢໂຫວາພະເຈົ້າພໍ່ຂອງພະອົງ.
ພວກສາວົກພາກັນຂຶ້ນເຮືອແລະເລີ່ມອອກເດີນທາງຂ້າມທະເລ. ແຕ່ວ່າບໍ່ດົນກໍເລີ່ມມີລົມພັດມາ. ມັນພັດແຮງຂຶ້ນແຮງຂຶ້ນ. ໃນຂະນະນັ້ນເປັນເວລາຕອນຄ່ຳ. ພວກສາວົກເອົາໃບເຮືອລົງແລະເລີ່ມຕົ້ນພາຍເຮືອ ແຕ່ກໍໄປບໍ່ໄດ້ໄກເພາະຖືກລົມແຮງພັດຕ້ານເຂົາເຈົ້າ. ເຮືອກຳລັງສັ່ນໄກວໄປໄກວມາໃນຄື້ນ ແລະນ້ຳກຳລັງສາດເຂົ້າມາໃນເຮືອ. ພວກເຂົາເຈົ້າພາກັນພາຍເຮືອແບບເອົາເປັນເອົາຕາຍເພື່ອໃຫ້ໄປຮອດຕາຝັ່ງ ແຕ່ກໍເຮັດບໍ່ສຳເລັດ.
ພະເຍຊູຍັງຄົງຢູ່ຕາມລຳພັງເທິງພູເຂົາ. ພະອົງຢູ່ທີ່ນັ້ນເປັນເວລາດົນນານແລ້ວ. ແຕ່ຕອນນີ້ພະອົງເຫັນວ່າພວກສາວົກກຳລັງຕົກຢູ່ໃນອັນຕະລາຍທ່າມກາງຄື້ນໃຫຍ່. ດັ່ງນັ້ນ ພະອົງຈຶ່ງລົງມາຈາກພູເຂົາແລ້ວໄປທີ່ແຄມຕາຝັ່ງ. ພະເຍຊູຕ້ອງການຊ່ວຍພວກສາວົກຂອງພະອົງ ພະອົງຈຶ່ງເລີ່ມຍ່າງອອກໄປຫາເຂົາເຈົ້າເທິງໜ້າທະເລທີ່ກຳລັງເກີດພາຍຸ!
ຈະເກີດຫຍັງຂຶ້ນຖ້າລູກພະຍາຍາມຍ່າງຢູ່ເທິງໜ້ານ້ຳ?— ລູກຈະຈົມນ້ຳແລະອາດຕາຍໄດ້. ແຕ່ພະເຍຊູບໍ່ຈົມນ້ຳ. ພະອົງມີລິດເດດພິເສດ. ພະເຍຊູຍ່າງດົນເຕີບຈຶ່ງຮອດເຮືອ. ດັ່ງນັ້ນເກືອບຈະແຈ້ງແລ້ວເມື່ອພວກສາວົກເຫັນພະເຍຊູກຳລັງຍ່າງຢູ່ເທິງໜ້ານ້ຳມາຫາເຂົາເຈົ້າ. ແຕ່ພວກເຂົາເຈົ້າບໍ່ເຊື່ອໃນສິ່ງທີ່ພວກຕົນເຫັນ. ເຂົາເຈົ້າພາກັນຢ້ານ ແລະຮ້ອງອອກມາດ້ວຍຄວາມຢ້ານ. ຈາກນັ້ນພະເຍຊູໄດ້ເວົ້າກັບເຂົາເຈົ້າວ່າ: “ທ່ານທັງຫຼາຍຈົ່ງຊື່ນໃຈເຖີ້ນ ເປັນຕົນເຮົາເອງ ຢ່າຊູ່ຢ້ານເຖີ້ນ.”
ເປັນຫຍັງພະເຍຊູຈຶ່ງເຮັດການອັດສະຈັນ?
ທັນທີທີ່ພະເຍຊູຂຶ້ນເຮືອ ພາຍຸກໍເຊົາ. ພວກສາວົກພາກັນປະຫຼາດໃຈອີກ. ເຂົາເຈົ້າຄູ້ເຂົ່າລົງຕໍ່ໜ້າພະເຍຊູແລະເວົ້າວ່າ: “ຈິງແທ້ພະອົງເປັນພະບຸດຂອງພະເຈົ້າ.”—ມັດທາຍ 14:22-33; ໂຢຮັນ 6:16-21.
ຄົງຈະວິເສດແມ່ນບໍຖ້າໄດ້ມີຊີວິດຢູ່ໃນສະໄໝນັ້ນແລະໄດ້ເຫັນພະເຍຊູເຮັດສິ່ງຕ່າງໆເຊັ່ນນັ້ນ?— ລູກຮູ້ບໍວ່າເປັນຫຍັງພະເຍຊູເຮັດການອັດສະຈັນຕ່າງໆ?— ພະອົງເຮັດສິ່ງເຫຼົ່ານັ້ນເພາະພະອົງຮັກພວກສາວົກແລະຕ້ອງການຊ່ວຍເຂົາເຈົ້າ. ແຕ່ພະອົງຍັງເຮັດສິ່ງເຫຼົ່ານັ້ນເພື່ອສະແດງເຖິງລິດເດດອັນຍິ່ງໃຫຍ່ທີ່ພະອົງມີແລະຈະໃຊ້ລິດເດດນັ້ນໃນອະນາຄົດໃນຖານະເປັນຜູ້ປົກຄອງແຫ່ງລາຊະອານາຈັກຂອງພະເຈົ້າ.
ພະເຍຊູປົກປ້ອງຄຸ້ມຄອງຜູ້ທີ່ຕິດຕາມພະອົງແນວໃດໃນປັດຈຸບັນນີ້?
ແມ່ນແຕ່ໃນເວລານີ້ ຫຼາຍຄັ້ງພະເຍຊູໄດ້ໃຊ້ລິດເດດເພື່ອປົກປ້ອງຄຸ້ມຄອງຜູ້ທີ່ຕິດຕາມພະອົງໃຫ້ພົ້ນຈາກຊາຕານເຊິ່ງພະຍາຍາມຈະຢຸດຢັ້ງເຂົາເຈົ້າບໍ່ໃຫ້ບອກຄົນອື່ນກ່ຽວກັບລາຊະອານາຈັກຂອງພະເຈົ້າ. ແຕ່ພະເຍຊູບໍ່ໄດ້ໃຊ້ລິດເດດຂອງພະອົງເພື່ອປົກປ້ອງຄຸ້ມຄອງພວກສາວົກຂອງພະອົງຈາກການເຈັບປ່ວຍຫຼືປິ່ນປົວເຂົາເຈົ້າເມື່ອເຈັບປ່ວຍ. ແມ່ນແຕ່ພວກອັກຄະສາວົກຂອງພະເຍຊູ ໃນທີ່ສຸດກໍຕາຍໝົດທຸກຄົນ. ຢາໂກໂບອ້າຍຂອງໂຢຮັນໄດ້ຖືກຂ້າ ແລະສ່ວນໂຢຮັນເອງກໍຖືກຄຸກ.—ກິດຈະການ 12:2; ຄຳປາກົດ 1:9.
ໃນປັດຈຸບັນນີ້ກໍຄ້າຍຄືກັນ. ບໍ່ວ່າຜູ້ຄົນຈະຮັບໃຊ້ພະເຢໂຫວາຫຼືບໍ່ກໍຕາມ ເຂົາເຈົ້າທຸກຄົນເຈັບປ່ວຍແລະຕາຍ. ແຕ່ວ່າອີກບໍ່ດົນ ລະຫວ່າງການປົກຄອງຂອງພະເຍຊູໃນຖານະກະສັດແຫ່ງລັດຖະບານຂອງພະເຈົ້າ ສິ່ງຕ່າງໆຈະບໍ່ເປັນແບບນີ້. ເວລານັ້ນຈະບໍ່ມີໃຜຮູ້ສຶກຢ້ານກົວອີກຕໍ່ໄປ ເພາະວ່າພະເຍຊູຈະໃຊ້ລິດເດດຂອງພະອົງເພື່ອທຸກຄົນທີ່ເຊື່ອຟັງຈະໄດ້ຮັບການອວຍພອນ.—ເອຊາອີ 9:6, 7.
ຂໍ້ພະຄຳພີອື່ນທີ່ສະແດງເຖິງລິດເດດອັນຍິ່ງໃຫຍ່ຂອງພະເຍຊູຜູ້ທີ່ພະເຈົ້າຕັ້ງໃຫ້ເປັນຜູ້ປົກຄອງໃນລາຊະອານາຈັກຂອງພະເຈົ້າຄື ດານຽນ 7:13, 14; ມັດທາຍ 28:18; ແລະເອເຟດ 1:20-22.