ເຈົ້າຢາກຮູ້ຄວາມຈິງບໍ?
ຄວາມຈິງກ່ຽວກັບຫຍັງ? ຄວາມຈິງກ່ຽວກັບຄຳຖາມບາງຢ່າງທີ່ມີຄວາມສຳຄັນຫຼາຍທີ່ສຸດເຊິ່ງມະນຸດເຄີຍຖາມກັນ. ບາງທີເຈົ້າອາດຈະເຄີຍສົງໄສແລະຢາກຮູ້ຄຳຕອບສຳລັບຄຳຖາມດັ່ງຕໍ່ໄປນີ້:
ພະເຈົ້າຫ່ວງໃຍພວກເຮົາແທ້ໆບໍ?
ສົງຄາມແລະຄວາມທຸກລຳບາກຈະມີມື້ໝົດໄປບໍ?
ເຮົາຈະເປັນແນວໃດເມື່ອຕາຍໄປ?
ມີຄວາມຫວັງແນວໃດແດ່ສຳລັບຄົນທີ່ຕາຍໄປ?
ຂ້ອຍຈະອະທິດຖານແນວໃດພະເຈົ້າຈຶ່ງຈະຟັງ?
ຂ້ອຍຈະພົບຄວາມສຸກໃນຊີວິດໄດ້ແນວໃດ?
ເຈົ້າຈະຫາຄຳຕອບສຳລັບຄຳຖາມເຫຼົ່ານີ້ໄດ້ຈາກບ່ອນໃດ? ຖ້າເຈົ້າໄປຫາຢູ່ຫ້ອງສະຫມຸດຫຼືຮ້ານຂາຍໜັງສື ເຈົ້າອາດຈະພົບວ່າມີໜັງສືຫຼາຍພັນຫົວອ້າງວ່າມີຄຳຕອບ. ແຕ່ວ່າຄຳແນະນຳຈາກແຕ່ລະຫົວມັກຈະຂັດແຍ້ງກັນ. ຄຳແນະນຳໃນໜັງສືບາງຫົວອາດເບິ່ງຄືວ່າໃຊ້ໄດ້ໃນຕອນນີ້ແຕ່ອີກບໍ່ດົນກໍຫຼ້າສະໄໝ ແລະຕ້ອງປັບປຸງໃໝ່ຫຼືມີຄຳແນະນຳໃໝ່ອອກມາແທນ.
ແນວໃດກໍດີ ມີປຶ້ມຫົວໜຶ່ງທີ່ໃຫ້ຄຳຕອບເຊິ່ງເຊື່ອຖືໄດ້. ປຶ້ມຫົວນີ້ເປັນປຶ້ມທີ່ປະກອບດ້ວຍຄວາມຈິງ. ພະເຍຊູກ່າວໃນຄຳອະທິດຖານເຖິງພະເຈົ້າວ່າ “ພະຄຳຂອງພະເຈົ້າເປັນຄວາມຈິງ.” (ໂຢຮັນ 17:17) ທຸກມື້ນີ້ເຮົາຮູ້ວ່າພະຄຳຂອງພະເຈົ້າແມ່ນຄຳພີໄບເບິນ. ໃນໜ້າຕໍ່ໆໄປ ເຈົ້າຈະເຫັນຄຳຕອບທີ່ສັ້ນແຕ່ຊັດເຈນສຳລັບຄຳຖາມຕ່າງໆທີ່ຢູ່ທາງເທິງນັ້ນ.
ພະເຈົ້າຫ່ວງໃຍພວກເຮົາແທ້ໆບໍ?
ສາເຫດທີ່ເກີດຄຳຖາມນີ້: ເຮົາຢູ່ໃນໂລກທີ່ເຕັມໄປດ້ວຍຄວາມໂຫດຮ້າຍແລະບໍ່ມີຄວາມຍຸຕິທຳ. ຫຼາຍສາສະໜາສອນວ່າຄວາມທຸກລຳບາກທີ່ເຮົາປະສົບຢູ່ນີ້ເປັນສິ່ງທີ່ພະເຈົ້າປະສົງໃຫ້ເປັນ.
ສິ່ງທີ່ຄຳພີໄບເບິນສອນ: ພະເຈົ້າບໍ່ແມ່ນຕົ້ນເຫດຂອງສິ່ງທີ່ຊົ່ວຮ້າຍ. ໂຢບ 34:10 ກ່າວວ່າ “ຄວາມຮ້າຍຢູ່ຫ່າງໄກຈາກພະເຈົ້າແລະຄວາມອະທຳກໍຢູ່ຫ່າງໄກຈາກພະເຈົ້າອົງມີລິດເດດອັນໃຫຍ່ທີ່ສຸດ.” ພະເຈົ້າມີຈຸດມຸ່ງໝາຍທີ່ປ່ຽມດ້ວຍຄວາມຮັກຕໍ່ມະນຸດຊາດ. ນັ້ນຈຶ່ງເປັນເຫດຜົນທີ່ພະເຍຊູສອນເຮົາໃຫ້ອະທິດຖານວ່າ “ພະບິດາຂອງຂ້າພະເຈົ້າທັງຫຼາຍຜູ້ຢູ່ໃນສະຫວັນ . . . ຂໍໃຫ້ແຜ່ນດິນຂອງພະອົງມາຕັ້ງຢູ່. ນ້ຳໃຈຂອງພະອົງສຳເລັດແລ້ວໃນສະຫວັນຢ່າງໃດ ຂໍໃຫ້ສຳເລັດທີ່ແຜ່ນດິນໂລກຢ່າງນັ້ນ.” (ມັດທາຍ 6:9, 10) ພະເຈົ້າຫ່ວງໃຍພວກເຮົາຫຼາຍແທ້ໆຈົນຍອມເສຍສະລະຢ່າງໃຫຍ່ຫຼວງເພື່ອໃຫ້ຈຸດປະສົງຂອງພະອົງສຳເລັດເປັນຈິງຢ່າງແນ່ນອນ.—ໂຢຮັນ 3:16.
ເບິ່ງຕື່ມທີ່ຕົ້ນເດີມ 1:26-28; ຢາໂກໂບ 1:13; ແລະ 1 ເປໂຕ 5:6, 7.
ສົງຄາມແລະຄວາມທຸກລຳບາກຈະມີມື້ໝົດໄປບໍ?
ສາເຫດທີ່ເກີດຄຳຖາມນີ້: ສົງຄາມຍັງລ່າເອົາຊີວິດມະນຸດຈຳນວນນັບບໍ່ຖ້ວນ. ຄວາມທຸກລຳບາກຂອງມະນຸດມີຜົນກະທົບຕໍ່ເຮົາທຸກຄົນ.
ສິ່ງທີ່ຄຳພີໄບເບິນສອນ: ພະເຈົ້າບອກລ່ວງໜ້າເຖິງສະໄໝທີ່ພະອົງຈະເຮັດໃຫ້ເກີດສັນຕິສຸກທົ່ວໂລກ. ເມື່ອລາຊະອານາຈັກຫຼືລັດຖະບານທາງພາກສະຫວັນຂອງພະເຈົ້າປົກຄອງ ມະນຸດຈະບໍ່ “ເຝິກຫັດຮຽນທຳເສິກຕໍ່ໄປ.” ແທນທີ່ຈະເຮັດເສິກ ເຂົາເຈົ້າຈະ “ເອົາດາບທັງຫຼາຍຂອງເຂົາຕີອີກເປັນໝາກສົບ.” (ເອຊາອີ 2:4) ພະເຈົ້າຈະເຮັດໃຫ້ຄວາມບໍ່ຍຸຕິທຳແລະຄວາມທຸກລຳບາກທັງປວງໝົດໄປ. ຄຳສັນຍາໃນຄຳພີໄບເບິນກ່າວວ່າ “ພະເຈົ້າຈະເຊັດນ້ຳຕາທັງຫຼາຍຈາກຕາຂອງເຂົາ ແລະຄວາມຕາຍຈະບໍ່ມີຕໍ່ໄປ ແລະຄວາມທຸກໂສກ ແລະຮ້ອງໄຫ້ ແລະເຈັບປວດຈະບໍ່ມີຕໍ່ໄປ. ເຫດວ່າສິ່ງທັງຫຼາຍທີ່ເປັນເມື່ອກ່ອນນັ້ນ [ລວມທັງຄວາມບໍ່ຍຸຕິທຳແລະຄວາມທຸກລຳບາກໃນທຸກມື້ນີ້] ກໍລ່ວງໄປແລ້ວ.”—ຄຳປາກົດ 21:3, 4.
ເບິ່ງຕື່ມທີ່ຄຳເພງ 37:10, 11; 46:9; ແລະມີເກ 4:1-4.
ເຮົາຈະເປັນແນວໃດເມື່ອຕາຍໄປ?
ສາເຫດທີ່ເກີດຄຳຖາມນີ້: ເກືອບໝົດທຸກສາສະໜາໃນໂລກສອນວ່າບາງສິ່ງໃນຕົວຄົນຍັງຢູ່ຕໍ່ໄປຫຼັງຈາກຄົນເຮົາຕາຍ. ລາງຄົນເຊື່ອວ່າຄົນຕາຍທຳຮ້າຍຄົນເປັນໄດ້ ຫຼືເຊື່ອວ່າພະເຈົ້າຈະລົງໂທດຄົນຊົ່ວໂດຍຕັດສິນໃຫ້ເຂົາເຈົ້າຖືກທໍລະມານຕະຫຼອດໄປໃນໄຟນາລົກ.
ສິ່ງທີ່ຄຳພີໄບເບິນສອນ: ເມື່ອຄົນຜູ້ໜຶ່ງຕາຍ ຄົນນັ້ນກໍດັບສູນໄປ. ຜູ້ເທສະໜາປ່າວປະກາດ 9:5 ກ່າວໄວ້ວ່າ “ຄົນຕາຍແລ້ວບໍ່ຮູ້ຈັກສິ່ງໃດ.” ເນື່ອງຈາກຄົນຕາຍບໍ່ສາມາດຮັບຮູ້ ບໍ່ມີຄວາມຮູ້ສຶກ ຫຼືປະສົບສິ່ງໃດ ເຂົາເຈົ້າຈຶ່ງບໍ່ສາມາດທຳຮ້າຍຫຼືຊ່ວຍຄົນຍັງເປັນໄດ້.—ຄຳເພງ 146:3, 4.
ເບິ່ງຕື່ມທີ່ຕົ້ນເດີມ 3:19 ແລະຜູ້ເທສະໜາປ່າວປະກາດ 9:6, 10.
ມີຄວາມຫວັງແນວໃດແດ່ສຳລັບຄົນທີ່ຕາຍໄປ?
ສາເຫດທີ່ເກີດຄຳຖາມນີ້: ເຮົາຕ້ອງການມີຊີວິດຢູ່ແລະມີຄວາມສຸກຮ່ວມກັບຄົນທີ່ເຮົາຮັກ. ເປັນເລື່ອງທຳມະດາທີ່ເຮົາຢາກພົບຄົນທີ່ເຮົາຮັກເຊິ່ງເສຍຊີວິດໄປແລ້ວ.
ສິ່ງທີ່ຄຳພີໄບເບິນສອນ: ຄົນສ່ວນຫຼາຍທີ່ຕາຍໄປແລ້ວຈະຄືນມາຈາກຕາຍ. ພະເຍຊູສັນຍາວ່າ “ຄົນທັງປວງທີ່ຢູ່ໃນບ່ອນຝັງສົບ . . . ຈະອອກມາ.” (ໂຢຮັນ 5:28, 29) ສອດຄ່ອງກັບຈຸດປະສົງດັ້ງເດີມຂອງພະເຈົ້າ ຄົນເຫຼົ່ານັ້ນທີ່ຄືນມາຈາກຕາຍຈະມີໂອກາດຢູ່ໃນແຜ່ນດິນໂລກທີ່ເປັນອຸທິຍານ. (ລືກາ 23:43) ອະນາຄົດຕາມຄຳສັນຍານີ້ຈະລວມເຖິງສຸຂະພາບທີ່ສົມບູນແລະຊີວິດຕະຫຼອດໄປສຳລັບມະນຸດທີ່ເຊື່ອຟັງ. ຄຳພີໄບເບິນກ່າວວ່າ “ຄົນຊອບທຳທັງຫຼາຍຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.”—ຄຳເພງ 37:29.
ເບິ່ງຕື່ມທີ່ໂຢບ 14:14, 15; ລືກາ 7:11-17; ແລະກິດຈະການ 24:15.
ຂ້ອຍຈະອະທິດຖານແນວໃດພະເຈົ້າຈຶ່ງຈະຟັງ?
ສາເຫດທີ່ເກີດຄຳຖາມນີ້: ເກືອບໝົດທຸກຄົນໃນທຸກສາສະໜາອະທິດຖານ. ແຕ່ຫຼາຍຄົນຮູ້ສຶກວ່າຄຳອະທິດຖານຂອງເຂົາເຈົ້າບໍ່ໄດ້ຮັບຄຳຕອບ.
ສິ່ງທີ່ຄຳພີໄບເບິນສອນ: ເມື່ອອະທິດຖານ ພະເຍຊູສອນເຮົາໃຫ້ຫຼີກລ່ຽງການເລົ່າຄຳເວົ້າທີ່ກຳນົດໄວ້ຊ້ຳແລ້ວຊ້ຳອີກ. ພະອົງກ່າວວ່າ “ເມື່ອທ່ານທັງຫຼາຍອ້ອນວອນ ຢ່າເວົ້າອີກຫຼາຍຄວາມເປົ່າໆເລື້ອຍ.” (ມັດທາຍ 6:7) ຫາກເຮົາຢາກໃຫ້ພະເຈົ້າຟັງຄຳອະທິດຖານຂອງພວກເຮົາ ເຮົາຕ້ອງອະທິດຖານໃນວິທີທີ່ພະອົງຍອມຮັບ. ເພື່ອຈະເຮັດແບບນັ້ນ ເຮົາຕ້ອງຮຽນຮູ້ຈຸດປະສົງຂອງພະເຈົ້າວ່າເປັນແນວໃດແລ້ວຈຶ່ງອະທິດຖານຕາມ. 1 ໂຢຮັນ 5:14 ອະທິບາຍວ່າ “ຖ້າເຮົາທັງຫຼາຍຂໍສິ່ງໜຶ່ງສິ່ງໃດຕາມນ້ຳໃຈແຫ່ງພະອົງ ພະອົງໂຜດຟັງເຮົາທັງຫຼາຍ.”
ເບິ່ງຕື່ມທີ່ຄຳເພງ 65:2; ໂຢຮັນ 14:6, 14; ແລະ 1 ໂຢຮັນ 3:22.
ຂ້ອຍຈະພົບຄວາມສຸກໃນຊີວິດໄດ້ແນວໃດ?
ສາເຫດທີ່ເກີດຄຳຖາມນີ້: ຫຼາຍຄົນເຊື່ອວ່າເງິນຄຳ ຊື່ສຽງ ຫຼືຮູບຮ່າງໜ້າຕາທີ່ຈົບງາມຈະເປັນສິ່ງທີ່ເຮັດໃຫ້ເຂົາເຈົ້າມີຄວາມສຸກ. ດ້ວຍເຫດນີ້ ເຂົາເຈົ້າຈຶ່ງມຸ່ງສະແຫວງຫາສິ່ງເຫຼົ່ານັ້ນ ແຕ່ພັດພົບວ່າຍັງຂາດຄວາມສຸກ.
ສິ່ງທີ່ຄຳພີໄບເບິນສອນ: ພະເຍຊູລະບຸເຖິງວິທີທີ່ຈະໄດ້ຄວາມສຸກເມື່ອພະອົງກ່າວວ່າ “ຄົນທັງຫຼາຍທີ່ສຳນຶກເຖິງຄວາມຈຳເປັນຝ່າຍວິນຍານກໍເປັນສຸກ.” (ມັດທາຍ 5:3, ລ.ມ.) ເຮົາຈະພົບຄວາມສຸກແທ້ໄດ້ກໍຕໍ່ເມື່ອເຮົາລົງມືປະຕິບັດເພື່ອສະໜອງສິ່ງຈຳເປັນທີ່ສຸດຂອງເຮົາ ນັ້ນແມ່ນຄວາມກະຫາຍທີ່ຢາກຮູ້ຄວາມຈິງກ່ຽວກັບພະເຈົ້າແລະຈຸດປະສົງທີ່ພະອົງມີຕໍ່ພວກເຮົາ. ຄວາມຈິງນັ້ນມີຢູ່ໃນຄຳພີໄບເບິນ. ການຮູ້ຈັກຄວາມຈິງນັ້ນຈະຊ່ວຍເຮົາໃຫ້ເບິ່ງອອກວ່າສິ່ງໃດສຳຄັນແທ້ໆ ແລະສິ່ງໃດທີ່ບໍ່ສຳຄັນ. ການຍອມໃຫ້ຄວາມຈິງຈາກຄຳພີໄບເບິນຊີ້ນຳການຕັດສິນໃຈແລະການກະທຳຂອງເຮົາ ຈະນຳເຮົາໄປສູ່ຊີວິດທີ່ມີຄວາມໝາຍຫຼາຍຂຶ້ນ.—ລືກາ 11:28.
ເບິ່ງຕື່ມທີ່ສຸພາສິດ 3:5, 6, 13-18 ແລະ 1 ຕີໂມເຕ 6:9, 10.
ສິ່ງທີ່ກ່າວເຖິງນີ້ເປັນການພິຈາລະນາຄຳຕອບຈາກຄຳພີໄບເບິນສຳລັບຄຳຖາມຫົກຂໍ້ໃນຕອນຕົ້ນຢ່າງຫຍໍ້ໆ. ເຈົ້າຢາກຮູ້ຫຼາຍກວ່ານີ້ບໍ? ຖ້າເຈົ້າເປັນຄົນໜຶ່ງທີ່ “ສຳນຶກເຖິງຄວາມຈຳເປັນຝ່າຍວິນຍານ” ເຈົ້າຄົງຕ້ອງຢາກຮູ້ແນ່ນອນ. ເຈົ້າອາດຈະຍັງມີເລື່ອງອື່ນໆອີກທີ່ສົງໄສຢູ່ ເຊັ່ນວ່າ ‘ຖ້າຫາກພະເຈົ້າຫ່ວງໃຍພວກເຮົາ ເປັນຫຍັງພະອົງຈຶ່ງປ່ອຍໃຫ້ຄວາມຊົ່ວແລະຄວາມທຸກລຳບາກຫຼາຍຢ່າງເຊັ່ນນີ້ເກີດຂຶ້ນຕະຫຼອດປະຫວັດສາດ? ຂ້ອຍຈະປັບປຸງຄຸນະພາບຊີວິດຄອບຄົວໃຫ້ດີຂຶ້ນແນວໃດ? ຄຳພີໄບເບິນໃຫ້ຄຳຕອບທີ່ຄົບຖ້ວນແລະຢ່າງພໍໃຈຕໍ່ຄຳຖາມເຫຼົ່ານີ້ແລະຄຳຖາມອື່ນໆອີກ.
ແນວໃດກໍດີ ປັດຈຸບັນຫຼາຍຄົນລັງເລທີ່ຈະກວດສອບເບິ່ງຄຳພີໄບເບິນ. ເຂົາເຈົ້າເຫັນວ່າເນື້ອໃນຂອງປຶ້ມນີ້ຍືດຍາວແລະລາງເທື່ອກໍເຂົ້າໃຈຍາກ. ເຈົ້າຢາກຮັບການຊ່ວຍເຫຼືອເພື່ອໄດ້ຄຳຕອບຈາກຄຳພີໄບເບິນບໍ? ພະຍານພະເຢໂຫວາຂໍສະເໜີສອງວິທີທີ່ຊ່ວຍເຈົ້າໄດ້.
ວິທີທຳອິດແມ່ນໂດຍທາງປຶ້ມຄຳພີໄບເບິນສອນແນວໃດແທ້ໆ? ປຶ້ມນີ້ພິມອອກເພື່ອຊ່ວຍຄົນທີ່ມີເວລາໜ້ອຍໃຫ້ຄົ້ນຫາຄຳຕອບທີ່ຊັດເຈນຈາກຄຳພີໄບເບິນສຳລັບຄຳຖາມທີ່ສຳຄັນ. ວິທີທີສອງແມ່ນການສອນຄຳພີໄບເບິນຢູ່ເຮືອນໂດຍບໍ່ຕ້ອງຈ່າຍຄ່າໃດໆ. ຜູ້ທີ່ມີຄຸນວຸທິສອນຄຳພີໄບເບິນຈະມາສອນເຈົ້າຢູ່ເຮືອນຫຼືບ່ອນທີ່ເຈົ້າສະດວກ ໃນແຕ່ລະອາທິດເຂົາເຈົ້າຈະໃຊ້ເວລາບໍ່ດົນເພື່ອພິຈາລະນາຄຳພີໄບເບິນນຳເຈົ້າໂດຍບໍ່ຕ້ອງເສຍຄ່າໃຊ້ຈ່າຍໃດໆ. ທົ່ວໂລກມີຫຼາຍລ້ານຄົນໄດ້ຮັບປະໂຫຍດຈາກການສອນແບບນີ້. ຫຼາຍຄົນຕ່າງກໍລົງຄວາມເຫັນຢ່າງຕື່ນເຕັ້ນວ່າ “ຂ້ອຍພົບຄວາມຈິງແລ້ວ!”
ບໍ່ມີສິ່ງໃດມີຄ່າຫຼາຍກວ່າການໄດ້ພົບຄວາມຈິງ. ຄວາມຈິງໃນຄຳພີໄບເບິນປົດປ່ອຍເຮົາໃຫ້ພົ້ນຈາກການເຊື່ອຖືໂຊກລາງ ຄວາມສັບສົນ ຄວາມຫວາດກົວ ແລະຍັງໃຫ້ເຮົາມີຄວາມຫວັງ ມີຈຸດມຸ່ງໝາຍ ແລະມີຄວາມຍິນດີ. ພະເຍຊູກ່າວວ່າ “ພວກທ່ານຈະຮູ້ຈັກຄວາມຈິງແລະຄວາມຈິງຈະໄຖ່ທ່ານໃຫ້ພົ້ນຈາກເປັນທາດ.”—ໂຢຮັນ 8:32.