ບົດທີ 1
ມາຮູ້ຈັກກັບພະເຈົ້າ
1, 2. ມີຄຳຖາມຫຍັງແດ່ທີ່ຄົນເຮົາມັກຖາມ?
ເດັກນ້ອຍມັກຖາມນັ້ນຖາມນີ້. ເຖິງວ່າເຈົ້າຕອບແລ້ວ ພວກເຂົາກໍຍັງຖາມວ່າ “ເປັນຫຍັງ?” ແລະເມື່ອເຈົ້າພະຍາຍາມອະທິບາຍໃຫ້ເຂົ້າໃຈ ພວກເຂົາອາດຈະຖາມອີກວ່າ ‘ເປັນຫຍັງຄືເປັນແບບນັ້ນ?’
2 ບໍ່ວ່າເຮົາຈະອາຍຸເທົ່າໃດກໍມີບາງຢ່າງທີ່ເຮົາບໍ່ຮູ້ ແລະແມ່ນແຕ່ເລື່ອງເລັກໆນ້ອຍໆບາງເທື່ອເຮົາກໍຍັງຕ້ອງຖາມ ເຊັ່ນ: ຖາມທາງ ຖາມເວລາ. ນອກຈາກນັ້ນຍັງມີເລື່ອງທີ່ສຳຄັນກ່ຽວກັບຊີວິດທີ່ເຮົາຢາກຮູ້ ເຊັ່ນ: ຂ້ອຍຈະໃຊ້ຊີວິດແນວໃດ ຈະມີຫຍັງເກີດຂຶ້ນໃນອະນາຄົດ. ແຕ່ເມື່ອບໍ່ໄດ້ຄຳຕອບທີ່ເຮົາພໍໃຈ ເຮົາອາດເຊົາຊອກຫາຄຳຕອບ.
3. ເປັນຫຍັງຫຼາຍຄົນຄິດວ່າຍາກທີ່ຈະຮູ້ຄຳຕອບຂອງຄຳຖາມທີ່ສຳຄັນກ່ຽວກັບຊີວິດ?
3 ມີທາງທີ່ເຮົາຈະຮູ້ຄຳຕອບຂອງຄຳຖາມທີ່ສຳຄັນເຫຼົ່ານີ້ບໍ? ບາງຄົນຄິດວ່າຄືຊິມີ ແຕ່ບໍ່ຮູ້ຈະໄປຊອກຄຳຕອບຢູ່ໃສ. ບາງຄົນຄິດວ່າມີແຕ່ຄູອາຈານ ຫຼືຄົນທີ່ສຶກສາເລື່ອງສາສະໜາຢ່າງຈິງຈັງ ເຊັ່ນ: ຄູບາ ຄຸນພໍ່ ຫຼືຜູ້ນຳສາສະໜາເທົ່ານັ້ນທີ່ຮູ້ຄຳຕອບ. ບາງຄົນຄິດວ່າຄຳພີໄບເບິນອາດຈະມີຄຳຕອບ ແຕ່ກໍຮູ້ສຶກວ່າຄຳພີໄບເບິນເຂົ້າໃຈຍາກ. ສ່ວນບາງຄົນກໍອາຍຈຶ່ງບໍ່ກ້າຖາມ. ແລ້ວເຈົ້າເດຄິດແນວໃດກ່ຽວກັບເລື່ອງນີ້?
4, 5. ມີຄຳຖາມທີ່ສຳຄັນຫຍັງແດ່ທີ່ເຈົ້າຢາກຮູ້ຄຳຕອບ? ຖ້າຕອນນີ້ເຈົ້າຍັງບໍ່ຮູ້ຄຳຕອບ ເປັນຫຍັງເຈົ້າຄວນຊອກຫາຕໍ່ໄປເລື້ອຍໆ?
4 ເຈົ້າຄືຊິຢາກຮູ້ຄຳຕອບຂອງຄຳຖາມທີ່ສຳຄັນ. ຕົວຢ່າງເຊັ່ນ: ເປັນຫຍັງເຮົາຈຶ່ງເກີດມາ? ຕາຍແລ້ວໄປໃສ? ເຮັດແນວໃດຊີວິດຈຶ່ງຈະມີຄວາມສຸກແທ້? ພະເຈົ້າມີແທ້ບໍ? ແລະຖ້າມີແທ້ພະອົງເປັນພະເຈົ້າແບບໃດ? ພະເຢຊູຄູສອນທີ່ມີຊື່ສຽງບອກວ່າ: “ຂໍຕໍ່ໄປເລື້ອຍໆແລ້ວພວກເຈົ້າຈະໄດ້ຮັບ ຊອກຫາຕໍ່ໄປເລື້ອຍໆແລ້ວພວກເຈົ້າຈະພົບ ເຄາະຕໍ່ໄປເລື້ອຍໆແລ້ວປະຕູຈະເປີດອອກສຳລັບພວກເຈົ້າ.” (ມັດທາຍ 7:7) ຢ່າຍອມແພ້ຈົນກວ່າເຈົ້າຈະພົບຄຳຕອບທີ່ເຈົ້າໝັ້ນໃຈວ່າເປັນຄວາມຈິງ.
5 ຖ້າເຈົ້າ “ຊອກຫາຕໍ່ໄປເລື້ອຍໆ” ໃນຄຳພີໄບເບິນ ເຈົ້າຈະໄດ້ຄຳຕອບແນ່ນອນ. (ສຸພາສິດ 2:1-5) ຄຳຕອບເຫຼົ່ານີ້ເຂົ້າໃຈໄດ້ບໍ່ຍາກ. ຖ້າເຈົ້າຮູ້ຄຳຕອບ ເຈົ້າກໍຈະມີຊີວິດທີ່ມີຄວາມສຸກໃນຕອນນີ້ແລະມີຄວາມຫວັງທີ່ດີເລີດໃນອະນາຄົດນຳອີກ. ຕອນນີ້ໃຫ້ເຮົາມາເບິ່ງຄຳຖາມທີ່ຫຼາຍຄົນສົງໄສ.
ພະເຈົ້າເປັນຫ່ວງເຮົາບໍ ຫຼືພະອົງເປັນພະເຈົ້າທີ່ໂຫດຮ້າຍ?
6. ເປັນຫຍັງຫຼາຍຄົນຄິດວ່າພະເຈົ້າບໍ່ສົນໃຈເຮົາ?
6 ຫຼາຍຄົນຄິດວ່າພະເຈົ້າບໍ່ສົນໃຈເຮົາ ເພາະຖ້າພະເຈົ້າສົນໃຈແລະເປັນຫ່ວງເຮົາແທ້ໆໂລກຄືຊິບໍ່ເປັນແບບນີ້. ຕອນນີ້ມີສົງຄາມ ຄວາມກຽດຊັງ ແລະຄວາມທຸກຢູ່ທຸກຫົນທຸກແຫ່ງ ແລະຄົນເຮົາຍັງເຈັບປ່ວຍ ທຸກທໍລະມານແລະຕາຍ. ບາງຄົນຈຶ່ງສົງໄສວ່າ ‘ຖ້າພະເຈົ້າເປັນຫ່ວງເຮົາ ເປັນຫຍັງພະອົງຈຶ່ງບໍ່ເຮັດໃຫ້ຄວາມທຸກໝົດໄປ?’
7. (ກ) ເປັນຫຍັງຄົນເຮົາຈຶ່ງຄິດວ່າພະເຈົ້າບໍ່ເມດຕາແລະບໍ່ເຫັນອົກເຫັນໃຈ? (ຂ) ເປັນຫຍັງເຮົາໝັ້ນໃຈວ່າພະເຈົ້າບໍ່ໄດ້ເຮັດໃຫ້ຄວາມຊົ່ວເກີດຂຶ້ນ?
7 ບາງເທື່ອຜູ້ສອນສາສະໜາເຮັດໃຫ້ຄົນເຮົາເຊື່ອວ່າພະເຈົ້າບໍ່ເມດຕາ ບໍ່ເຫັນອົກເຫັນໃຈ. ເມື່ອມີເລື່ອງບໍ່ດີເກີດຂຶ້ນ ພວກເຂົາກໍຈະບອກວ່າ ນີ້ເປັນຄວາມຕ້ອງການຂອງພະເຈົ້າ ພະອົງຢາກໃຫ້ເປັນແບບນີ້. ການເວົ້າແນວນີ້ກໍເທົ່າກັບວ່າພວກເຂົາກຳລັງໂທດພະເຈົ້າ. ແຕ່ຄຳພີໄບເບິນບອກວ່າພະເຈົ້າບໍ່ໄດ້ເປັນຕົ້ນເຫດຂອງຄວາມຊົ່ວ. ຢາໂກໂບ 1:13 ບອກວ່າ: “ເມື່ອເຈິຄວາມຍາກລຳບາກຢ່າເວົ້າວ່າ: ‘ພະເຈົ້າທົດລອງຂ້ອຍ.’ ເພາະພະອົງບໍ່ເຄີຍທົດລອງຜູ້ໃດດ້ວຍຄວາມຊົ່ວແລະບໍ່ມີຜູ້ໃດທົດລອງພະເຈົ້າດ້ວຍຄວາມຊົ່ວໄດ້.” ນີ້ໝາຍຄວາມວ່າພະອົງບໍ່ໄດ້ເຮັດໃຫ້ຄວາມຊົ່ວເກີດຂຶ້ນ ແລະພະອົງກໍບໍ່ເຄີຍເຮັດໃຫ້ສິ່ງທີ່ບໍ່ດີເກີດຂຶ້ນກັບເຮົາເພື່ອທົດລອງຫຼືລອງໃຈເຮົາ. (ອ່ານໂຢບ 34:10) ໃຫ້ມາເບິ່ງຕົວຢ່າງນີ້ນຳກັນ.
8, 9. ເມື່ອເຮົາມີບັນຫາຫຍຸ້ງຍາກໃນຊີວິດ ເປັນຫຍັງເຮົາບໍ່ຄວນໂທດພະເຈົ້າ? ຂໍໃຫ້ຍົກຕົວຢ່າງ.
8 ໃຫ້ນຶກພາບວ່າມີລູກຄົນໜຶ່ງທີ່ອາໄສຢູ່ນຳພໍ່ແມ່. ພໍ່ຮັກລາວຫຼາຍແລະພະຍາຍາມສອນລາວໃຫ້ເປັນຄົນດີ. ແຕ່ລູກຄົນນີ້ດື້ດ້ານບໍ່ເຊື່ອຟັງແລະຢາກອອກໄປຢູ່ຕ່າງຫາກທັງໆທີ່ພໍ່ຫ້າມແລ້ວແຕ່ລາວກໍບໍ່ຟັງ. ໃນທີ່ສຸດລາວກໍຍ້າຍອອກຈາກເຮືອນແລະເຮັດສິ່ງທີ່ບໍ່ດີຫຼາຍຢ່າງຈົນຊີວິດມີແຕ່ບັນຫາ. ເຈົ້າຈະໂທດພໍ່ບໍວ່າເປັນຫຍັງປ່ອຍໃຫ້ລູກເປັນແບບນີ້? ເຈົ້າຈະບໍ່ໂທດພໍ່ຂອງລາວດອກ! (ລູກາ 15:11-13) ພະເຈົ້າກໍເປັນຄືກັບພໍ່ຄົນນີ້ ພະອົງເຕືອນແລະສອນເຮົາ ແຕ່ພະອົງກໍໃຫ້ເຮົາເລືອກເອງວ່າຈະເຊື່ອຟັງຫຼືບໍ່ເຊື່ອຟັງພະອົງ. ດັ່ງນັ້ນ ເມື່ອມີເລື່ອງບໍ່ດີເກີດຂຶ້ນ ເຮົາຄວນຈື່ໄວ້ສະເໝີວ່າພະເຈົ້າບໍ່ໄດ້ເຮັດໃຫ້ເລື່ອງແບບນີ້ເກີດຂຶ້ນ. ບໍ່ຍຸຕິທຳແທ້ໆທີ່ຈະໂທດພະເຈົ້າ.
9 ພະເຈົ້າຕ້ອງມີເຫດຜົນແທ້ໆທີ່ຍອມໃຫ້ເລື່ອງບໍ່ດີເກີດຂຶ້ນ. ເຈົ້າຈະຮູ້ເຫດຜົນນັ້ນໃນບົດທີ 11 ແຕ່ເຮົາໝັ້ນໃຈໄດ້ວ່າພະເຈົ້າຮັກເຮົາແລະພະອົງບໍ່ໄດ້ເຮັດໃຫ້ເລື່ອງທີ່ຮ້າຍໆເກີດຂຶ້ນກັບເຮົາ. ທີ່ຈິງ ພະອົງເປັນຜູ້ດຽວທີ່ສາມາດແກ້ໄຂບັນຫາທັງໝົດນີ້ໄດ້.—ເອຊາອີ 33:2
10. ເປັນຫຍັງເຮົາໝັ້ນໃຈວ່າພະເຈົ້າຈະກຳຈັດຄວາມເສຍຫາຍທຸກຢ່າງທີ່ຄົນຊົ່ວໄດ້ເຮັດໄວ້?
10 ພະເຈົ້າບໍ່ຄືກັບມະນຸດທີ່ມັກເຮັດຜິດ ດັ່ງນັ້ນ ເຮົາຈຶ່ງວາງໃຈພະອົງໄດ້. ພະເຈົ້າບໍລິສຸດ. (ເອຊາອີ 6:3) ພະອົງເຮັດແຕ່ສິ່ງທີ່ດີງາມ ເຮົາຈຶ່ງໝັ້ນໃຈໄດ້ວ່າພະອົງຈະຈັດການກັບຄວາມຊົ່ວແນ່ນອນ. ນອກຈາກນັ້ນ ພະອົງມີອຳນາດ ພະອົງຈະຈັດການກັບຄວາມເສຍຫາຍທຸກຢ່າງທີ່ຄົນຊົ່ວໄດ້ເຮັດໄວ້. ແມ່ນແຕ່ຄົນທີ່ມີອຳນາດແລະຖືວ່າສັດຊື່ທີ່ສຸດກໍບໍ່ສາມາດກຳຈັດຄວາມເສຍຫາຍທີ່ເກີດຈາກຄົນຊົ່ວໄດ້. ແຕ່ພະເຈົ້າມີອຳນາດບໍ່ຈຳກັດ ພະອົງຈະກຳຈັດຄວາມຊົ່ວຮ້າຍໃຫ້ໝົດໄປຕະຫຼອດການ.—ອ່ານຄຳເພງ 37:9-11
ພະເຈົ້າຮູ້ສຶກແນວໃດເມື່ອເຫັນຄົນເຮົາມີຄວາມທຸກ?
11. ພະເຈົ້າຮູ້ສຶກແນວໃດເມື່ອເຈົ້າມີຄວາມທຸກ?
11 ພະເຈົ້າຮູ້ສຶກແນວໃດເມື່ອເຫັນສິ່ງທີ່ເກີດຂຶ້ນໃນໂລກແລະສິ່ງທີ່ເກີດຂຶ້ນກັບເຮົາ? ຄຳພີໄບເບິນບອກວ່າ ພະເຈົ້າ “ຮັກຄວາມຍຸຕິທຳ.” (ຄຳເພງ 37:28, ລ.ມ.) ພະອົງຮັກຄວາມຖືກຕ້ອງ ພະອົງຈຶ່ງບໍ່ມັກແລະບໍ່ຢາກເຫັນຄົນເຮົາຖືກເອົາປຽບແລະມີຄວາມທຸກ. ໃນອະດີດເມື່ອພະອົງເຫັນໂລກທີ່ເຕັມແຕ່ຄວາມຊົ່ວ ຄຳພີໄບເບິນບອກວ່າພະອົງ “ມີຄວາມທຸກໃຈ.” (ຕົ້ນເດີມ 6:5, 6) ຕອນນີ້ພະອົງກໍຍັງຮູ້ສຶກຄືເກົ່າບໍ່ເຄີຍປ່ຽນ. (ມາລາກີ 3:6) ຄຳພີໄບເບິນບອກວ່າພະເຈົ້າເປັນຫ່ວງເຈົ້າແທ້ໆ.—ອ່ານ 1 ເປໂຕ 5:7
ຄຳພີໄບເບິນສອນວ່າພະເຢໂຫວາເປັນຜູ້ສ້າງເອກະພົບທີ່ມີຄວາມຮັກ
12, 13. (ກ) ເປັນຫຍັງເຮົາຈຶ່ງຮັກແລະເປັນຫ່ວງຄົນອື່ນ? (ຂ) ເຮົາຮູ້ສຶກແນວໃດເມື່ອເຫັນຄວາມທຸກໃນໂລກ? (ຄ) ເປັນຫຍັງເຮົາໝັ້ນໃຈໄດ້ວ່າພະເຈົ້າຈະເຮັດໃຫ້ຄວາມທຸກແລະຄວາມບໍ່ຍຸຕິທຳໝົດໄປ?
12 ຄຳພີໄບເບິນຍັງບອກອີກວ່າພະເຈົ້າສ້າງເຮົາຕາມແບບຂອງພະອົງ. (ຕົ້ນເດີມ 1:26) ນີ້ໝາຍຄວາມວ່າພະເຈົ້າສ້າງເຮົາໃຫ້ມີຄຸນລັກສະນະທີ່ດີຄືກັບພະອົງ ເຮົາຈຶ່ງຮັກແລະເປັນຫ່ວງຄົນອື່ນ. ດັ່ງນັ້ນ ຖ້າເຈົ້າບໍ່ມັກເມື່ອເຫັນຄົນບໍລິສຸດຕ້ອງທົນທຸກ ພະເຈົ້າກໍແຮ່ງບໍ່ມັກຫຼາຍກວ່ານັ້ນອີກ.
13 ເຮົາຮູ້ໄດ້ແນວໃດວ່າພະເຈົ້າບໍ່ມັກເມື່ອເຫັນຄົນເຮົາມີຄວາມທຸກ? ຄຳພີໄບເບິນສອນເຮົາວ່າ “ພະເຈົ້າເປັນຄວາມຮັກ.” (1 ໂຢຮັນ 4:8) ທຸກສິ່ງທີ່ພະເຈົ້າເຮັດແມ່ນເຮັດຍ້ອນຄວາມຮັກ. ເຮົາມີຄວາມຮູ້ສຶກຮັກກໍຍ້ອນພະເຈົ້າມີຄວາມຮູ້ສຶກນີ້. ລອງຄິດເບິ່ງ ຖ້າເຈົ້າມີອຳນາດເຈົ້າຈະເຮັດໃຫ້ຄວາມທຸກແລະຄວາມບໍ່ຍຸຕິທຳໝົດໄປຈາກໂລກບໍ? ແນ່ນອນວ່າເຈົ້າຈະເຮັດ ເພາະເຈົ້າຮັກຄົນອື່ນ. ແລ້ວພະເຈົ້າເດ? ພະອົງມີທັງອຳນາດແລະຮັກພວກເຮົາຫຼາຍ ພະອົງຈະເຮັດໃຫ້ຄວາມທຸກແລະຄວາມບໍ່ຍຸຕິທຳໝົດໄປຢ່າງແນ່ນອນ. ເຈົ້າໝັ້ນໃຈໄດ້ເລີຍວ່າຄຳສັນຍາທຸກຢ່າງທີ່ບອກໄວ້ໃນໜ້າທຳອິດຂອງປຶ້ມຫົວນີ້ຈະຕ້ອງເກີດຂຶ້ນແທ້! ແຕ່ເພື່ອຈະເຊື່ອໝັ້ນໄດ້ ເຈົ້າຕ້ອງຮູ້ຈັກພະເຈົ້າໃຫ້ຫຼາຍຂຶ້ນ.
ພະເຈົ້າຢາກໃຫ້ເຈົ້າຮູ້ຈັກພະອົງ
ຖ້າເຈົ້າຢາກເປັນໝູ່ກັບຜູ້ໃດຜູ້ໜຶ່ງ ເຈົ້າກໍບອກຊື່ຂອງເຈົ້າກ່ອນ. ພະເຈົ້າກໍບອກຊື່ຂອງພະອົງໄວ້ໃນຄຳພີໄບເບິນ
14. ພະເຈົ້າຊື່ຫຍັງ ແລະເຮົາຮູ້ໄດ້ແນວໃດວ່າພະເຈົ້າຢາກໃຫ້ເຮົາໃຊ້ຊື່ຂອງພະອົງ?
14 ຖ້າເຈົ້າຢາກເປັນໝູ່ກັບຜູ້ໃດຜູ້ໜຶ່ງ ຕອນທີ່ແນະນຳຕົວເອງເຈົ້າຈະບອກຫຍັງກ່ອນ ເຈົ້າຈະບອກຊື່ຂອງເຈົ້າແມ່ນບໍ? ແລ້ວພະເຈົ້າເດພະອົງມີຊື່ບໍ? ຫຼາຍສາສະໜາສອນວ່າພະອົງຊື່ “ພະເຈົ້າ” ຫຼື “ອົງພະຜູ້ເປັນເຈົ້າ” ເຊິ່ງນັ້ນບໍ່ແມ່ນຊື່ແຕ່ເປັນຕຳແໜ່ງ ຄືກັບຄຳວ່າ “ກະສັດ” ຫຼື “ປະທານປະເທດ” ກໍເປັນຄຳບອກຕຳແໜ່ງບໍ່ແມ່ນຊື່. ພະເຈົ້າບອກເຮົາວ່າພະອົງຊື່ເຢໂຫວາ. ຄຳເພງ 83:18 ບອກວ່າ: “ໃຫ້ເຂົາຮູ້ຈັກວ່າພະເຈົ້າຜູ້ມີນາມຊື່ວ່າພະເຢໂຫວາ ອົງດຽວເປັນພະເຈົ້າອົງສູງສຸດເທິງແຜ່ນດິນທັງສິ້ນ.” ພະເຢໂຫວາໃຫ້ຂຽນຊື່ຂອງພະອົງໄວ້ໃນຄຳພີໄບເບິນຫຼາຍພັນເທື່ອ ນີ້ສະແດງວ່າພະເຢໂຫວາຢາກໃຫ້ເຈົ້າຮູ້ຈັກຊື່ຂອງພະອົງແລະໃຊ້ຊື່ນັ້ນເມື່ອເວົ້າເຖິງພະອົງ. ພະອົງບອກຊື່ໃຫ້ເຈົ້າຮູ້ກໍຍ້ອນພະອົງຢາກເປັນໝູ່ກັບເຈົ້າ.
15. ຊື່ເຢໂຫວາມີຄວາມໝາຍວ່າແນວໃດ?
15 ເຢໂຫວາເປັນຊື່ທີ່ມີຄວາມໝາຍເລິກເຊິ່ງ. ຊື່ນີ້ໝາຍຄວາມວ່າ ພະອົງເຮັດຕາມທີ່ສັນຍາໄດ້ທຸກຢ່າງແລະສາມາດເຮັດໃຫ້ທຸກສິ່ງທີ່ພະອົງຕັ້ງໃຈໄວ້ເກີດຂຶ້ນແທ້. ບໍ່ມີຫຍັງຈະຢຸດພະອົງໄດ້ ມີແຕ່ພະເຢໂຫວາເທົ່ານັ້ນທີ່ເໝາະສົມກັບຊື່ນີ້.a
16, 17. ຕຳແໜ່ງຕໍ່ໄປນີ້ໝາຍຄວາມວ່າແນວໃດ (ກ) “ຜູ້ມີລິດເດດສູງສຸດ”? (ຂ) “ກະສັດຕະຫຼອດໄປ”? (ຄ) “ຜູ້ສ້າງ”?
16 ໃນຄຳເພງ 83:18 ບອກກ່ຽວກັບພະເຢໂຫວາວ່າ: “ພະເຢໂຫວາ ອົງດຽວເປັນພະເຈົ້າອົງສູງສຸດ.” ນອກຈາກນັ້ນ ໃນຄຳພີໄບເບິນຍັງເວົ້າເຖິງຕຳແໜ່ງອື່ນອີກທີ່ມີແຕ່ພະເຢໂຫວາອົງດຽວເທົ່ານັ້ນທີ່ໃຊ້ໄດ້ ເຊັ່ນ: “ຜູ້ມີລິດເດດສູງສຸດ.” ພະນິມິດ 15:3 ບອກວ່າ: “ພະເຢໂຫວາພະເຈົ້າຜູ້ມີລິດເດດສູງສຸດ ສິ່ງທີ່ພະອົງເຮັດນັ້ນຍິ່ງໃຫຍ່ແລະອັດສະຈັນ ພະອົງເປັນກະສັດຕະຫຼອດໄປ ແນວທາງຂອງພະອົງຖືກຕ້ອງຊອບທຳແລະເປັນຄວາມຈິງ.” ຄຳວ່າ “ຜູ້ມີລິດເດດສູງສຸດ” ໝາຍຄວາມວ່າແນວໃດ? ຕຳແໜ່ງນີ້ໝາຍຄວາມວ່າ ພະອົງມີລິດເດດຫຼາຍທີ່ສຸດໃນເອກະພົບ ແລະຂໍ້ນີ້ຍັງບອກອີກວ່າພະອົງເປັນ “ກະສັດຕະຫຼອດໄປ” ເຊິ່ງໝາຍຄວາມວ່າ ພະອົງມີຊີວິດຢູ່ຕະຫຼອດມາບໍ່ວ່າເວລາຈະຜ່ານໄປຈັກຍຸກຈັກສະໄໝກໍຕາມ. ຄຳເພງ 90:2 ອະທິບາຍເລື່ອງນີ້ວ່າ ພະອົງເປັນພະເຈົ້າຕັ້ງແຕ່ອະດີດຈົນເຖິງຕະຫຼອດການ ນີ້ເປັນເລື່ອງທີ່ໜ້າງຶດແທ້ໆ!
17 ພະເຢໂຫວາອົງດຽວທີ່ເປັນຜູ້ສ້າງ. ພະນິມິດ 4:11 ບອກວ່າ: “ພະເຢໂຫວາພະເຈົ້າຂອງພວກເຮົາ ພະອົງສົມຄວນໄດ້ຮັບການຍົກຍ້ອງສັນລະເສີນ ຄວາມນັບຖື ແລະລິດເດດເພາະພະອົງໄດ້ສ້າງທຸກສິ່ງ ທຸກສິ່ງມີຢູ່ແລະຖືກສ້າງຕາມຄວາມຕ້ອງການຂອງພະອົງ.” ພະເຢໂຫວາສ້າງທຸກສິ່ງທຸກຢ່າງນັບຕັ້ງແຕ່ທູດສະຫວັນທີ່ຢູ່ສະຫວັນ ດວງດາວທີ່ຢູ່ເທິງຟ້າ ໝາກໄມ້ ຕົ້ນໄມ້ ແລະສັດຕ່າງໆ.
ເຈົ້າຈະເປັນໝູ່ກັບພະເຢໂຫວາໄດ້ບໍ?
18. ເປັນຫຍັງບາງຄົນຄິດວ່າບໍ່ມີທາງເປັນໝູ່ກັບພະເຈົ້າໄດ້? ແຕ່ຄຳພີໄບເບິນບອກວ່າແນວໃດ?
18 ເມື່ອບາງຄົນອ່ານກ່ຽວກັບຄຸນລັກສະນະທີ່ໜ້າງຶດງໍ້ຂອງພະເຢໂຫວາ ພວກເຂົາກໍຮູ້ສຶກຢ້ານແລະຄິດວ່າ ‘ພະເຈົ້າມີລິດເດດຫຼາຍ ຍິ່ງໃຫຍ່ຫຼາຍ ສູງສົ່ງຫຼາຍ ແລະຢູ່ໄກແສນໄກ ແລ້ວພະອົງຈະເປັນຫ່ວງແລະສົນໃຈພວກເຮົາເຮັດຫຍັງ?’ ນອກຈາກນັ້ນ ຫຼາຍຄົນຍັງຮູ້ສຶກວ່າຖ້າຄົນເຮົາເປັນໝູ່ກັບພະເຈົ້າກໍເທົ່າກັບວ່າຕີໂຕສະເໝີພະເຈົ້າ ເຊິ່ງຖືວ່າບໍ່ໄດ້ໃຫ້ກຽດແລະບໍ່ນັບຖືພະອົງ. ແຕ່ພະເຈົ້າຢາກໃຫ້ເຮົາຄິດແບບນັ້ນບໍ? ບໍ່. ພະເຢໂຫວາຢາກໃກ້ຊິດກັບເຮົາ. ນອກຈາກນັ້ນ ຄຳພີໄບເບິນບອກວ່າ ພະເຈົ້າ “ບໍ່ໄດ້ຢູ່ໄກຈາກພວກເຮົາແຕ່ລະຄົນເລີຍ.” (ກິດຈະການ 17:27) ພະເຈົ້າຢາກໃຫ້ເຈົ້າໃກ້ຊິດກັບພະອົງ ແລະພະອົງສັນຍາວ່າ ‘ຈະເຂົ້າມາໃກ້ຊິດກັບເຈົ້າ.’—ຢາໂກໂບ 4:8
19. (ກ) ເຈົ້າຈະເປັນໝູ່ກັບພະເຈົ້າໄດ້ແນວໃດ? (ຂ) ເຈົ້າມັກຄຸນລັກສະນະໃດຂອງພະເຢໂຫວາຫຼາຍທີ່ສຸດ?
19 ເຈົ້າຈະເປັນໝູ່ກັບພະເຈົ້າໄດ້ແນວໃດ? ພະເຢຊູບອກວ່າ: “ຜູ້ທີ່ຈະໄດ້ຊີວິດຕະຫຼອດໄປຕ້ອງຮູ້ຈັກພະອົງທີ່ເປັນພະເຈົ້າທ່ຽງແທ້ອົງດຽວ ແລະຮູ້ຈັກຜູ້ທີ່ພະອົງໃຊ້ມາ ຜູ້ນັ້ນແມ່ນເຢຊູຄລິດ.” (ໂຢຮັນ 17:3) ໂດຍຮຽນຮູ້ຕໍ່ໆໄປ ເຈົ້າຈະຮູ້ຈັກພະເຢໂຫວາແລະພະເຢຊູ ແລ້ວຈາກນັ້ນເຈົ້າກໍຈະໄດ້ຊີວິດຕະຫຼອດໄປ. ເຮົາໄດ້ຮຽນແລ້ວວ່າ “ພະເຈົ້າເປັນຄວາມຮັກ.” (1 ໂຢຮັນ 4:16) ແຕ່ພະອົງກໍຍັງມີຄຸນລັກສະນະທີ່ດີເລີດຢ່າງອື່ນອີກ ເຊັ່ນ: ຄຳພີໄບເບິນບອກວ່າ ພະເຢໂຫວາເປັນ “ພະເຈົ້າທີ່ເມດຕາ ສົງສານ ບໍ່ໃຈຮ້າຍງ່າຍ ຮັກໃຜກໍຮັກໝັ້ນຄົງ ແລະຮັກສາຄຳເວົ້າສະເໝີ.” (ອົບພະຍົບ 34:6, ລ.ມ.) ພະເຢໂຫວາ “ພະອົງດີ ພະອົງມີໃຈພ້ອມຈະຍົກຜິດ.” (ຄຳເພງ 86:5) ພະເຈົ້າມີຄວາມອົດທົນອົດກັ້ນແລະສັດຊື່ພັກດີ. (2 ເປໂຕ 3:9; ພະນິມິດ 15:4) ຖ້າເຈົ້າອ່ານຄຳພີໄບເບິນ ເຈົ້າຈະໄດ້ຮຽນຮູ້ຄຸນລັກສະນະທີ່ດີເລີດຢ່າງອື່ນຂອງພະອົງນຳອີກ.
20-22. (ກ) ເຮົາຈະໃກ້ຊິດແລະສະໜິດກັບພະເຈົ້າໄດ້ແນວໃດເຖິງວ່າເຮົາບໍ່ເຫັນພະອົງ? (ຂ) ເຈົ້າຈະເຮັດແນວໃດຖ້າມີບາງຄົນຢາກໃຫ້ເຈົ້າເຊົາຮຽນຄຳພີໄບເບິນ?
20 ເຈົ້າຈະໃກ້ຊິດແລະສະໜິດກັບພະເຈົ້າໄດ້ແນວໃດທັງໆທີ່ເຈົ້າບໍ່ເຫັນພະອົງ? (ໂຢຮັນ 1:18; 4:24; 1 ຕີໂມທຽວ 1:17) ເມື່ອເຈົ້າອ່ານເລື່ອງຂອງພະເຢໂຫວາໃນຄຳພີໄບເບິນ ເຈົ້າຈະຮູ້ຈັກພະອົງ ຮູ້ວ່າພະອົງມີຕົວຕົນແທ້ໆ ແລະໄດ້ເຫັນຄຸນລັກສະນະຕ່າງໆຂອງພະອົງ. (ຄຳເພງ 27:4; ໂຣມ 1:20) ເມື່ອເຈົ້າຮູ້ຈັກພະເຢໂຫວາຫຼາຍເທົ່າໃດ ເຈົ້າກໍຈະຮັກພະອົງຫຼາຍເທົ່ານັ້ນແລະຮູ້ສຶກໃກ້ຊິດກັບພະອົງຫຼາຍຂຶ້ນນຳອີກ.
ພໍ່ທຸກຄົນຮັກລູກ ແຕ່ພໍ່ຂອງເຮົາທີ່ຢູ່ໃນສະຫວັນຮັກເຮົາຫຼາຍກວ່ານັ້ນອີກ
21 ເຈົ້າຈະໄດ້ຮູ້ວ່າພະເຢໂຫວາເປັນຄືກັບພໍ່ຂອງເຮົາ. (ມັດທາຍ 6:9) ພະອົງໃຫ້ຊີວິດເຮົາ ພະອົງເປັນຄືກັບພໍ່ທີ່ຮັກລູກແລະຢາກໃຫ້ລູກມີຊີວິດທີ່ດີທີ່ສຸດ. (ຄຳເພງ 36:9) ຄຳພີໄບເບິນສອນວ່າ ເຈົ້າເປັນໝູ່ກັບພະເຢໂຫວາໄດ້. (ຢາໂກໂບ 2:23) ລອງນຶກພາບເບິ່ງແມ້ ພະເຢໂຫວາຜູ້ສ້າງເອກະພົບຢາກເປັນໝູ່ກັບເຈົ້າ!
22 ອາດມີບາງຄົນຢາກໃຫ້ເຈົ້າເຊົາຮຽນຄຳພີໄບເບິນເພາະຢ້ານວ່າເຈົ້າຈະປ່ຽນສາສະໜາ. ແຕ່ຢ່າໃຫ້ຜູ້ໃດເຮັດໃຫ້ເຈົ້າເຊົາເປັນໝູ່ກັບພະເຢໂຫວາ ເພາະພະອົງຈະເປັນໝູ່ທີ່ດີທີ່ສຸດຂອງເຈົ້າ.
23, 24. (ກ) ຖ້າມີບາງຢ່າງທີ່ເຈົ້າບໍ່ເຂົ້າໃຈ ເປັນຫຍັງເຈົ້າຄວນຖາມ? (ຂ) ເຮົາຈະຮຽນຫຍັງໃນບົດຕໍ່ໄປ?
23 ຕອນທີ່ຮຽນຄຳພີໄບເບິນອາດມີບາງຢ່າງທີ່ເຈົ້າບໍ່ເຂົ້າໃຈ ໃຫ້ຖາມໂລດບໍ່ຕ້ອງອາຍ. ພະເຢຊູບອກວ່າເຮົາຄວນເປັນຄືເດັກນ້ອຍທີ່ຖ່ອມຕົວ ພວກເຂົາຢາກຮູ້ຫຍັງກໍຈະຖາມ. (ມັດທາຍ 18:2-4) ພະເຈົ້າຢາກໃຫ້ເຈົ້າໄດ້ຄຳຕອບ. ດັ່ງນັ້ນ ຂໍໃຫ້ເຈົ້າຕັ້ງໃຈຮຽນຄຳພີໄບເບິນເພື່ອເຈົ້າຈະໝັ້ນໃຈໄດ້ວ່າເລື່ອງທີ່ຮຽນນັ້ນເປັນຄວາມຈິງ.—ອ່ານກິດຈະການ 17:11
24 ວິທີດີທີ່ສຸດທີ່ຈະຮູ້ຈັກພະເຢໂຫວາແມ່ນການຮຽນຄຳພີໄບເບິນ. ໃນບົດຕໍ່ໄປ ເຮົາຈະຮູ້ວ່າຄຳພີໄບເບິນພິເສດກວ່າປຶ້ມອື່ນໆແນວໃດ.
a ຖ້າຄຳພີໄບເບິນຂອງເຈົ້າບໍ່ມີຊື່ເຢໂຫວາ ຫຼືຖ້າເຈົ້າຢາກຮູ້ຂໍ້ມູນຕື່ມອີກກ່ຽວກັບຄວາມໝາຍແລະວິທີອອກສຽງຊື່ຂອງພະເຈົ້າ ອ່ານໃນຄຳອະທິບາຍເພີ່ມເຕີມ 1.