ຂ້ອຍຈະຈັດເວລາໄດ້ແນວໃດ? — ຫ້ອງສະໝຸດອອນລາຍຂອງວັອດສ໌ທາວເວີ້

ບົດທີ 21

ຂ້ອຍຈະຈັດເວລາໄດ້ແນວໃດ?

ເຈົ້າຢາກມີເວລາເພີ່ມຂຶ້ນມື້ລະຈັກຊົ່ວໂມງ? ․․․․․

ເຈົ້າຈະໃຊ້ເວລາທີ່ເພີ່ມຂຶ້ນເພື່ອເຮັດຫຍັງ?

◻ ໃຊ້ເວລາກັບໝູ່

◻ ຮຽນໜັງສື

◻ ນອນ

◻ ອື່ນໆ ․․․․․

ເວລາເປັນຄືກັບມ້າທີ່ດຸເດືອດ ຖ້າມັນຈະໃຊ້ການໄດ້ສຳລັບເຈົ້າ ເຈົ້າຕ້ອງຮຽນຮູ້ທີ່ຈະຄວບຄຸມມັນ. ຄວບຄຸມເວລາຂອງເຈົ້າ ແລະເປັນໄປໄດ້ທີ່ເຈົ້າຈະຫລຸດຜ່ອນຄວາມເຄັ່ງຕຶງຂອງຕົວເອງ ເຮັດໃຫ້ຄະແນນດີຂຶ້ນ ແລະໄດ້ຮັບຄວາມໄວ້ເນື້ອເຊື່ອໃຈຈາກພໍ່ແມ່ຕື່ມອີກ. ເຈົ້າເວົ້າວ່າ: “ນັ້ນເປັນສິ່ງທີ່ຄັກຫຼາຍ ການເວົ້າແມ່ນງ່າຍແຕ່ພັດປະຕິບັດໄດ້ຍາກ!” ແນ່ນອນວ່າເຈົ້າຈະປະເຊີນກັບຂໍ້ທ້າທາຍຕ່າງໆ. ແຕ່ເຈົ້າສາມາດເອົາຊະນະມັນໄດ້. ຂໍໃຫ້ພິຈາລະນາບາງຕົວຢ່າງ.

ຂໍ້ທ້າທາຍທີ 1: ການເຮັດຕາຕະລາງເວລາ

ສິ່ງທີ່ອາດເປັນອຸປະສັກ. ພຽງແຕ່ຄຶດເຖິງການເຮັດຕາຕະລາງເວລາ ກໍເຮັດໃຫ້ຮູ້ສຶກຄືກັບວ່າຖືກຄວບຄຸມ! ເຈົ້າຢາກເຮັດສິ່ງຕ່າງໆຕາມໃຈ ແລະບໍ່ຢາກຖືກຄວບຄຸມດ້ວຍຕາຕະລາງເວລາ.

ເຫດຜົນທີ່ຄວນເຮັດ. ກະສັດຊາໂລໂມນຂຽນວ່າ: “ຄວາມຄຶດ [“ແຜນການ,” ລ.ມ.] ທັງຫຼາຍຂອງຄົນອຸດສາກໍນຳໄປເຖິງຄວາມບໍລິບູນ.” (ສຸພາສິດ 21:5) ຊາໂລໂມນກໍເປັນບຸກຄົນທີ່ມີວຽກຫຍຸ້ງຫຼາຍ. ລາວເປັນຜົວ ເປັນພໍ່ ແລະເປັນກະສັດ. ແລະເບິ່ງຄືວ່າຊີວິດມີວຽກຫຍຸ້ງຫຼາຍຂຶ້ນເມື່ອລາວອາຍຸເພີ່ມຂຶ້ນ. ຄ້າຍຄືກັນ ຊີວິດຂອງເຈົ້າມີວຽກຫຍຸ້ງໃນຕອນນີ້. ແຕ່ມັນແຮ່ງອາດຈະຫຍຸ້ງຫຼາຍຂຶ້ນຕື່ມອີກເມື່ອອາຍຸຫຼາຍຂຶ້ນ. ການທີ່ຈະຈັດລະບຽບໃນຕອນນີ້ດີກວ່າຈະເຮັດໃນພາຍຫຼັງ!

ສິ່ງທີ່ຄົນໃນໄວດຽວກັນກັບເຈົ້າເວົ້າ. “ໄດ້ປະມານຫົກເດືອນແລ້ວທີ່ຂ້ອຍເລີ່ມເຮັດຕາຕະລາງເວລາເປັນປະຈຳ. ຂ້ອຍພະຍາຍາມເຮັດໃຫ້ສິ່ງຕ່າງໆງ່າຍຂຶ້ນ ແລະການມີຕາຕະລາງເວລາເບິ່ງຄືວ່າຊ່ວຍໄດ້ຫຼາຍແທ້ໆ!”—ທ້າວ ໂຈອີ.

“ເຮັດລາຍການບັນຊີສິ່ງທີ່ຕ້ອງເຮັດຊ່ວຍຂ້ອຍໃຫ້ຕິດຕາມຕາຕະລາງເວລາໄດ້. ເມື່ອຂ້ອຍມີວຽກຕື່ມອີກທີ່ຕ້ອງເຮັດ ແມ່ແລະຂ້ອຍຈະຂຽນລາຍລະອຽດທັງໝົດແລະເບິ່ງວ່າຈະຊ່ວຍກັນແນວໃດເພື່ອບັນລຸເປົ້າໝາຍຂອງເຮົາ.”—ນາງ ມໍລໍຣີ.

ສິ່ງທີ່ຊ່ວຍເຈົ້າໄດ້. ໃຫ້ລອງຄິດໃນທຳນອງນີ້ ສົມມຸດວ່າເຈົ້າກຳລັງອອກເດີນທາງ. ສະມາຊິກຄອບຄົວແຕ່ລະຄົນພາກັນໂຍນກະເປົ໋າຂອງຕົວເອງໄວ້ທ້າຍລົດ. ຕອນນີ້ເບິ່ງຄືວ່າບໍ່ມີບ່ອນຫວ່າງພໍທີ່ຈະໃສ່ເຄື່ອງທັງໝົດໄດ້. ເຈົ້າອາດເຮັດຫຍັງໄດ້? ເຈົ້າຕ້ອງເອົາເຄື່ອງທັງໝົດອອກແລ້ວຈັດໃໝ່ ໂດຍໃສ່ກະເປົ໋າໜ່ວຍໃຫຍ່ທີ່ສຸດກ່ອນ ແລ້ວຈຶ່ງເອົາກະເປົ໋າໜ່ວຍນ້ອຍກວ່າໃສ່ໃນບ່ອນຫວ່າງທີ່ເຫຼືອ.

ວິທີການແບບດຽວກັນນີ້ສາມາດໃຊ້ໄດ້ກັບການຈັດຊີວິດຂອງເຈົ້າ. ຖ້າເລີ່ມໃຊ້ເວລາກັບສິ່ງທີ່ບໍ່ສຳຄັນ ເຈົ້າກໍສ່ຽງຕໍ່ການທີ່ບໍ່ສາມາດເຮັດສິ່ງທີ່ສຳຄັນກວ່າ. ຈົ່ງຈັດບ່ອນຫວ່າງໃຫ້ກັບສິ່ງທີ່ສຳຄັນກວ່າ ແລະເຈົ້າຈະແປກໃຈທີ່ມີເວລາຫຼາຍກວ່າສຳລັບສ່ວນທີ່ເຫຼືອ!—ຟີລິບ 1:10.

ສິ່ງສຳຄັນທີ່ສຸດທີ່ຈຳເປັນຕ້ອງໄດ້ເຮັດມີຫຍັງແດ່?

․․․․․

ຕອນນີ້ໃຫ້ກັບໄປໝາຍຕົວເລກໃນສິ່ງທີ່ເຈົ້າຕ້ອງເຮັດຕາມລຳດັບຄວາມສຳຄັນ. ຖ້າເຮັດສິ່ງທີ່ສຳຄັນກວ່າກ່ອນ ເຈົ້າຈະແປກໃຈທີ່ມີເວລາເຫຼືອອີກຫຼາຍທີ່ຈະເອົາໃຈໃສ່ສິ່ງທີ່ສຳຄັນໜ້ອຍກວ່າ.

ສິ່ງທີ່ເຈົ້າເຮັດໄດ້. ໃຫ້ຊອກປຶ້ມວາງແຜນປະຈຳວັນທີ່ຖືໄປມານຳໄດ້ແລະຈັດລຳດັບຄວາມສຳຄັນຂອງສິ່ງທີ່ຕ້ອງເຮັດ. ໃນອີກດ້ານໜຶ່ງ ບາງທີໜຶ່ງໃນທາງເລືອກຕໍ່ໄປນີ້ອາດເໝາະກັບເຈົ້າກໍໄດ້.

◻ ປະຕິທິນໃນໂທລະສັບມືຖື

◻ ປຶ້ມຈົດບັນທຶກນ້ອຍໆ

◻ ປະຕິທິນໃນຄອມພິວເຕີ

◻ ປະຕິທິນຕັ້ງໂຕະ

ຂໍ້ທ້າທາຍທີ 2: ການເຮັດຕາມຕາຕະລາງເວລາ

ສິ່ງທີ່ອາດເປັນອຸປະສັກ. ຫຼັງຈາກເລີກໂຮງຮຽນເຈົ້າກໍມີແຕ່ຢາກຜ່ອນຄາຍແລະເບິ່ງໂທລະພາບຈັກບຶດໜຶ່ງ. ຫຼືເຈົ້າວາງແຜນຈະຮຽນໜັງສືສຳລັບກຽມສອບເສັງ ແຕ່ໄດ້ຮັບຂໍ້ຄວາມຊວນໄປເບິ່ງພາບພະຍົນ. ເວລາເບິ່ງພາບພະຍົນປ່ຽນແປງບໍ່ໄດ້ແຕ່ສາມາດ ເລື່ອນເວລາເຮັດວຽກບ້ານໄປເປັນຕອນກາງຄືນ. ເຈົ້າບອກກັບຕົວເອງວ່າ ‘ອີກຢ່າງໜຶ່ງ ເບິ່ງຄືວ່າຂ້ອຍເຮັດວຽກໄດ້ດີກວ່າພາຍໃຕ້ຄວາມກົດດັນ.’

ເຫດຜົນທີ່ຄວນເຮັດ. ເຈົ້າອາດໄດ້ຄະແນນດີຂຶ້ນຖ້າຮຽນໜັງສືຕອນຄວາມຄຶດແຈ່ມໃສ. ນອກຈາກນັ້ນ ເຈົ້າກໍມີຄວາມກົດດັນຫຼາຍພໍຢູ່ແລ້ວບໍ່ແມ່ນບໍ? ເປັນຫຍັງຈຶ່ງເພີ່ມຄວາມກົດດັນໂດຍເລັ່ງຮຽນໜັງສືຈົນຮອດເດິກກ່ອນສອບເສັງ? ເຊົ້າມື້ຕໍ່ມາຈະເປັນແນວໃດ? ອາດນອນຕື່ນສວຍ ເຄັ່ງຕຶງຫຼາຍກວ່າເກົ່າ ຟ້າວຟັ່ງອອກຈາກເຮືອນ ແລະອາດຈະໄປໂຮງຮຽນຊ້າ.—ສຸພາສິດ 6:10, 11.

ສິ່ງທີ່ຄົນໃນໄວດຽວກັນກັບເຈົ້າເວົ້າ. “ຂ້ອຍມັກເບິ່ງໂທລະພາບ ຫຼິ້ນກິຕ້າ ແລະຢູ່ກັບໝູ່ເພື່ອນ. ສິ່ງເຫຼົ່ານີ້ບໍ່ຜິດ ແຕ່ບາງຄັ້ງມັນເຮັດໃຫ້ສິ່ງທີ່ສຳຄັນກວ່າຕົກໄປ ແລະສົ່ງຜົນໃຫ້ຂ້ອຍຟ້າວຟັ່ງໂດຍບໍ່ຈຳເປັນ.”—ທ້າວ ຈູລຽນ.

ສິ່ງທີ່ຊ່ວຍເຈົ້າໄດ້. ຢ່າມີແຕ່ຈັດຕາຕະລາງເວລາສຳລັບສິ່ງທີ່ຕ້ອງເຮັດ ແຕ່ໃຫ້ຈັດຕາຕະລາງເວລາສຳລັບສິ່ງທີ່ມັກ ເຮັດນຳ. ຈູລຽນບອກວ່າ: “ງ່າຍກວ່າທີ່ຈະເຮັດໃນສິ່ງທີ່ຕ້ອງເຮັດ ໂດຍຮູ້ວ່າຂ້ອຍມີສິ່ງທີ່ມ່ວນໃຫ້ເຮັດຕາມຫຼັງ.” ຄວາມຄິດອີກຢ່າງໜຶ່ງຄືໃຫ້ມີເປົ້າໝາຍທີ່ໃຫຍ່ແລະໃຫ້ຕັ້ງເປົ້າໝາຍນ້ອຍໆໄປພ້ອມກັນເພື່ອໃຫ້ແນ່ໃຈວ່າເຈົ້າຍັງຕິດຕາມເປົ້າໝາຍນັ້ນຢູ່.

ສິ່ງທີ່ເຈົ້າເຮັດໄດ້. ອັນໃດເປັນເປົ້າໝາຍໜຶ່ງຫຼືສອງຢ່າງເຊິ່ງກົງກັບຄວາມເປັນຈິງທີ່ເຈົ້າສາມາດບັນລຸໄດ້ພາຍໃນເວລາຫົກເດືອນ?

․․․․․

ອັນໃດເປັນເປົ້າໝາຍທີ່ກົງກັບຄວາມເປັນຈິງທີ່ສາມາດບັນລຸໄດ້ພາຍໃນສອງປີຂ້າງໜ້າ ແລະຕ້ອງເລີ່ມເຮັດຫຍັງໃນຕອນນີ້ເພື່ອຈະບັນລຸເປົ້າໝາຍນັ້ນ?a

․․․․․

ຂໍ້ທ້າທາຍທີ 3: ການເປັນຄົນສະອາດແລະມີລະບຽບ

ສິ່ງທີ່ອາດເປັນອຸປະສັກ. ເຈົ້າບໍ່ແນ່ໃຈວ່າການເປັນຄົນສະອາດແລະມີລະບຽບຈະກ່ຽວຂ້ອງແນວໃດກັບການຈັດເວລາໃຫ້ດີຂຶ້ນ. ນອກຈາກນັ້ນ ການເປັນຄົນບໍ່ມີລະບຽບເບິ່ງຄືວ່າງ່າຍກວ່າຫຼາຍ. ການອະນາໄມຫ້ອງນອນເຮັດໄດ້ໃນມື້ອື່ນ ຫຼືບໍ່ຕ້ອງເຮັດເລີຍກໍໄດ້! ເຈົ້າບໍ່ມີບັນຫາຫຍັງກັບການຮົກຊະຊາຍ ດັ່ງນັ້ນມັນຈຶ່ງບໍ່ເປັນເລື່ອງໃຫຍ່ເລີຍ. ຫຼືວ່າມັນເປັນ ເລື່ອງໃຫຍ່?

ເຫດຜົນທີ່ຄວນເຮັດ. ການຈັດໃຫ້ທຸກສິ່ງສະອາດແລະເປັນລະບຽບຈະປະຢັດເວລາໃນການຊອກຫາເຄື່ອງຂອງ. ການເຮັດແບບນີ້ຍັງເຮັດໃຫ້ສະບາຍໃຈໄດ້ຫຼາຍ.—1 ໂກລິນໂທ 14:40.

ສິ່ງທີ່ຄົນໃນໄວດຽວກັນກັບເຈົ້າເວົ້າ. “ບາງຄັ້ງເມື່ອຂ້ອຍບໍ່ມີເວລາມ້ຽນເຄື່ອງນຸ່ງ ສິ່ງຂອງທີ່ຕ້ອງການກໍມັກເສຍຢູ່ໃນກອງເຄື່ອງນຸ່ງນັ້ນ!”—ນາງ ແມນດີ້.

“ຂ້ອຍຊອກກະເປົ໋າເງິນບໍ່ເຫັນເປັນອາທິດ. ຂ້ອຍຮູ້ສຶກເຄັ່ງຕຶງໃນເລື່ອງນັ້ນ. ໃນທີ່ສຸດກໍເຫັນກະເປົ໋າເງິນເມື່ອມ້ຽນຫ້ອງນອນ.”—ທ້າວ ແຟັງ.

ສິ່ງທີ່ຊ່ວຍເຈົ້າໄດ້. ພະຍາຍາມມ້ຽນເຄື່ອງຄືນໃນບ່ອນຂອງມັນທັນທີທີ່ເຮັດໄດ້. ໃຫ້ມ້ຽນເຄື່ອງເປັນປະຈຳແທນທີ່ຈະຖ້າຈົນກວ່າເຄື່ອງຮົກຊະຊາຍ.

ສິ່ງທີ່ເຈົ້າເຮັດໄດ້. ພະຍາຍາມສ້າງນິດໄສເລື່ອງຄວາມເປັນລະບຽບຮຽບຮ້ອຍ. ຮັກສາທຸກສິ່ງໃຫ້ເປັນລະບຽບແລະໃຫ້ເບິ່ງດູວ່າຊີວິດຈະງ່າຍຂຶ້ນບໍ.

ເວລາເປັນສິ່ງທີ່ມີຄ່າທີ່ເຈົ້າ ໝູ່ໄວດຽວກັນກັບເຈົ້າ ແລະພໍ່ແມ່ຂອງເຈົ້າມີຈຳນວນເທົ່າກັນໃນແຕ່ລະມື້. ຖ້າເຈົ້າສູນເສຍສິ່ງທີ່ມີຄ່ານີ້ ເຈົ້າຈະມີບັນຫາ. ແຕ່ຖ້າຈັດເວລາຢ່າງສຸຂຸມ ເຈົ້າຈະເກັບກ່ຽວລາງວັນ. ການເລືອກແມ່ນຂຶ້ນກັບເຈົ້າ.

ໃນບົດຕໍ່ໄປ

ເຈົ້າເປັນລູກທີ່ມີພໍ່ແມ່ເປັນຄົນຍ້າຍຖິ່ນຖານບໍ? ເຈົ້າຮູ້ສຶກວ່າເຂົ້າບໍ່ໄດ້ກັບໝູ່ຢູ່ໂຮງຮຽນແລະທັງກັບຄົນຢູ່ເຮືອນບໍ? ຂໍໃຫ້ຮຽນຮູ້ວິທີທີ່ຈະປ່ຽນສະພາບການຂອງເຈົ້າໃຫ້ເປັນປະໂຫຍດຕໍ່ເຈົ້າ.

[ຂໍ້ຄວາມໄຂເງື່ອນ]

a ສຳລັບຂໍ້ມູນເພີ່ມເຕີມຂໍໃຫ້ເບິ່ງບົດທີ 39 ຂອງປຶ້ມຫົວນີ້.

ຂໍ້ພະຄຳພີຫຼັກ

“ໃຫ້ທ່ານທັງຫຼາຍກວດເບິ່ງໃຫ້ແນ່ໃຈວ່າສິ່ງໃດສຳຄັນກວ່າ.”—ຟີລິບ 1:10, ລ.ມ.

ຄຳແນະນຳ

ຢ່າພະຍາຍາມໃຊ້ຄຳແນະນຳໃນບົດນີ້ບາດດຽວທັງໝົດ. ແທນທີ່ຈະເຮັດແນວນັ້ນ ໃນລະຫວ່າງເດືອນໜ້າໃຫ້ໃຊ້ພຽງຄຳແນະນຳດຽວໃນຈຳນວນຄຳແນະນຳເຫຼົ່ານັ້ນ. ເມື່ອຊຳນານໃນທັກສະນັ້ນ ໃຫ້ເລືອກເຮັດຕາມຄຳແນະນຳອື່ນ.

ເຈົ້າຮູ້ບໍ . . .?

ການຈັດເວລາເຮັດຫຼາຍໆສິ່ງໃນແຕ່ລະມື້ຈະພາໃຫ້ກົດດັນ. ຖ້າຈັດລຳດັບຄວາມສຳຄັນ ເຈົ້າຈະຮູ້ວ່າສິ່ງໃດທີ່ຄວນເຮັດແລະສິ່ງໃດທີ່ບໍ່ຄວນເຮັດ.

ແຜນພາກປະຕິບັດ!

ກິດຈະກຳທີ່ຂ້ອຍສາມາດໃຊ້ເວລານຳໜ້ອຍກວ່າແມ່ນ ․․․․․

ຂ້ອຍຈະໃຊ້ເວລາທີ່ຈະໄດ້ຕື່ມອີກເພື່ອເຮັດສິ່ງຕໍ່ໄປນີ້ ․․․․․

ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․

ເຈົ້າຄິດວ່າແນວໃດ?

• ການຮຽນຮູ້ທີ່ຈະເຮັດຕາຕະລາງເວລາເອົາເອງໃນຕອນນີ້ຈະຊ່ວຍເຈົ້າແນວໃດໃຫ້ປະຕິບັດຕາມໜ້າທີ່ຮັບຜິດຊອບຕ່າງໆເມື່ອຢູ່ດ້ວຍຕົວເອງໃນອະນາຄົດ?

• ບົດຮຽນອັນໃດກ່ຽວກັບການຈັດເວລາທີ່ເຈົ້າສາມາດຮຽນໄດ້ຈາກພໍ່ແມ່?

• ຖ້າເຈົ້າໃຊ້ຕາຕະລາງເວລາຢູ່ແລ້ວ ເຈົ້າອາດຕ້ອງປັບປຸງອັນໃດແດ່ເພື່ອໃຫ້ເກີດຜົນຫຼາຍກວ່າເກົ່າ?

[ຈຸດເດັ່ນໜ້າ 154]

“ຂ້ອຍໄດ້ຍິນບາງຄົນເວົ້າຕະຫຼົກວ່າຖ້າຕ້ອງການໃຫ້ຂ້ອຍໄປຫາຢູ່ບ່ອນໃດບ່ອນໜຶ່ງເວລາສີ່ໂມງແລງ ກໍຄວນບອກໃຫ້ຂ້ອຍໄປບ່ອນນັ້ນຕອນສາມໂມງແລງ. ນັ້ນເປັນຕອນທີ່ຂ້ອຍສຳນຶກວ່າຈຳເປັນຕ້ອງບໍລິຫານເວລາໃຫ້ດີຂຶ້ນ.”—ທ້າວ ຣິກກີ

[ກອບໜ້າ 155]

ເວລາຂອງຂ້ອຍເສຍໄປໃສ?

ໂດຍທົ່ວໄປແລ້ວໃນເວລາໜຶ່ງອາທິດ ຄົນໄວໜຸ່ມອາຍຸລະຫວ່າງ 8 ປີ ຫາ 18 ປີໃຊ້ເວລາດັ່ງນີ້

17 ຊົ່ວໂມງ

ກັບພໍ່ແມ່

30 ຊົ່ວໂມງ

ຢູ່ໂຮງຮຽນ

44 ຊົ່ວໂມງ

ເບິ່ງໂທລະພາບ ຫຼິ້ນວິດີໂອເກມ ສົ່ງຕອບຂໍ້ຄວາມທັນທີໂລດ ແລະຟັງເພງ

ໃຫ້ນັບຈຳນວນຊົ່ວໂມງທີ່ໃຊ້ໃນແຕ່ລະອາທິດ

ເບິ່ງໂທລະພາບ ․․․․․

ຫຼິ້ນວິດີໂອເກມ ․․․․․

ໃຊ້ອິນເຕີເນັດ ․․․․․

ຟັງເພງ ․․․․․

ລວມ ․․․․․

ມີຫຼາຍຊົ່ວໂມງທີ່ຂ້ອຍຍາດມາໄດ້ຈາກສິ່ງທີ່ບໍ່ສຳຄັນປານໃດເພື່ອເຮັດສິ່ງທີ່ສຳຄັນກວ່າ ․․․․․

[ຮູບພາບໜ້າ 153]

ເວລາເປັນຄືມ້າທີ່ດຸເດືອດ ເຈົ້າຕ້ອງຮຽນຮູ້ທີ່ຈະຄວບຄຸມມັນ