ບົດທີ 36
ຂ້ອຍຕິດອຸປະກອນເອເລັກໂຕຣນິກບໍ?
“ຂ້ອຍມັກສົ່ງຂໍ້ຄວາມເອົາແທ້ເອົາວ່າ! ຂ້ອຍຄິດວ່າເປັນສິ່ງຄັກທີ່ສຸດທີ່ເຄີຍມີ. ເຈົ້າຄົງເດົາໄດ້ວ່າມັນຄວບຄຸມຊີວິດຂ້ອຍໄວ້ແລ້ວ.”—ທ້າວ ອາລັນ.
ໃນສະໄໝທີ່ພໍ່ແມ່ເປັນໄວຮຸ່ນ ໂທລະພາບແລະວິທະຍຸຖືວ່າເປັນອຸປະກອນເອເລັກໂຕຣນິກທີ່ຫຼັກໆ. ສະໄໝນັ້ນ ໂທລະສັບກໍເປັນພຽງແຕ່ໂທລະສັບ ຄືໃຊ້ເວົ້າລົມກັນເທົ່ານັ້ນ ແລະຕ້ອງເກາະຕິດໃສ່ຝາ. ຟັງເບິ່ງຄືວ່າຫຼ້າສະໄໝຫຼາຍບໍ? ຍິງສາວຊື່ແອນນາຄົງຈະຄິດແບບນັ້ນ. ແອນນາເວົ້າວ່າ: “ພໍ່ແມ່ເຕີບໃຫຍ່ຂຶ້ນມາໃນຍຸກມືດທາງດ້ານເຕັກໂນໂລຊີ. ພໍ່ແມ່ຫາກໍຮູ້ວິທີທີ່ຈະໃຊ້ປະໂຫຍດບາງຢ່າງຈາກໂທລະສັບມືຖືຂອງຕົນເອງ!”
ປັດຈຸບັນນີ້ ເຈົ້າສາມາດຮັບສາຍໂທລະສັບ ຟັງເພງ ຊົມການສະແດງ ຫຼິ້ນເກມ ສົ່ງອີເມວໃຫ້ໝູ່ເພື່ອນ ຖ່າຍຮູບ ແລະຫຼິ້ນອິນເຕີເນັດ ໂດຍໃຊ້ອຸປະກອນຢ່າງດຽວທີ່ຖືໄປມາໃນກະເປົ໋າໄດ້. ເນື່ອງຈາກເຈົ້າເຕີບໃຫຍ່ຂຶ້ນມາພ້ອມກັບຄອມພິວເຕີ ໂທລະສັບມືຖື ໂທລະພາບ ແລະອິນເຕີເນັດ ເຈົ້າອາດຄິດວ່າການໃຊ້ອຸປະກອນເຫຼົ່ານີ້ຕະຫຼອດເວລາບໍ່ມີຜົນເສຍຫາຍອັນໃດ. ແຕ່ພໍ່ແມ່ອາດຄິດວ່າເຈົ້າຕິດສິ່ງເຫຼົ່ານີ້. ຖ້າພໍ່ແມ່ເຕືອນດ້ວຍຄວາມເປັນຫ່ວງ ຢ່າເມີນເສີຍຕໍ່ຄຳເວົ້າເຫຼົ່ານັ້ນໂດຍຄິດວ່າພວກເພິ່ນບໍ່ທັນສະໄໝ. ກະສັດຊາໂລໂມນຜູ້ສະຫຼາດສຸຂຸມເວົ້າວ່າ: “ຕອບຄວາມກ່ອນໄດ້ຍິນກໍເປັນການບ້າ.”—ສຸພາສິດ 18:13.
ເຈົ້າຮູ້ບໍວ່າເປັນຫຍັງພໍ່ແມ່ຈຶ່ງເປັນຫ່ວງເລື່ອງນີ້? ຈົ່ງເຮັດບົດທົດສອບຕໍ່ໄປນີ້ແລ້ວເບິ່ງວ່າເຈົ້າມີທ່າອ່ຽງຕິດອຸປະກອນເອເລັກໂຕຣນິກບາງຮູບແບບຫຼືບໍ່.
ທົດສອບຕົວເອງ—‘ຂ້ອຍເປັນຄົນຕິດອຸປະກອນເອເລັກໂຕຣນິກບໍ?’
ປຶ້ມກ່ຽວກັບຄວາມຮູ້ອ້ອມຕົວເຫຼັ້ມໜຶ່ງນິຍາມການຕິດວ່າເປັນ “ພຶດຕິກຳກາຍຂອບເຂດທີ່ເຮັດເປັນນິດໄສເຊິ່ງຄົນນັ້ນເຊົາບໍ່ໄດ້ຫຼືເຕັມໃຈທີ່ຈະບໍ່ເຊົາ ເຖິງແມ່ນວ່າຈະມີຜົນເສຍຫາຍຕິດຕາມມາ.” ໃຫ້ເຮົາມາພິຈາລະນາຄຳນິຍາມນີ້ເປັນສ່ວນໆຂ້າງລຸ່ມ. ອ່ານຄຳເວົ້າທີ່ຍົກຂຶ້ນມາ ແລະເບິ່ງວ່າເຈົ້າເອງໄດ້ເວົ້າຫຼືໄດ້ເຮັດສິ່ງທີ່ຄ້າຍໆກັນນັ້ນຫຼືບໍ່. ຈາກນັ້ນໃຫ້ຂຽນຄຳຕອບໃສ່ໃນບ່ອນຫວ່າງ.
ພຶດຕິກຳກາຍຂອບເຂດ. “ຂ້ອຍໃຊ້ເວລາຫຼາຍຊົ່ວໂມງຫຼິ້ນເກມເອເລັກໂຕຣນິກ. ເກມເຫຼົ່ານັ້ນຍາດເອົາເວລານອນໄປ ແລະເມື່ອເວົ້າລົມກັບຄົນອື່ນຂ້ອຍກໍມີແຕ່ຢາກເວົ້າລົມໃນເລື່ອງນີ້. ຂ້ອຍແຍກອອກຈາກຄອບຄົວແລະຫຼົງໄປຢູ່ໃນໂລກຂອງການຈິນຕະນາການກ່ຽວກັບເກມຕ່າງໆທີ່ຫຼິ້ນ.”—ທ້າວ ແອນດຣູ.
ເຈົ້າຄິດວ່າຄວນໃຊ້ເວລາຫຼິ້ນກັບອຸປະກອນເອເລັກໂຕຣນິກມື້ລະຈັກຊົ່ວໂມງຈຶ່ງຈະຖືວ່າສົມເຫດສົມຜົນ? ․․․․․
ພໍ່ແມ່ຄິດວ່າເຈົ້າຄວນໃຊ້ເວລາຫຼາຍສ່ຳໃດ? ․․․․․
ເຈົ້າໃຊ້ເວລາສົ່ງຂໍ້ຄວາມ ເບິ່ງໂທລະພາບ ເອົາຮູບພາບໄປໃສ່ໃນເວັບໄຊແລະສະແດງຄຳຄິດຄຳເຫັນໃນເວັບໄຊ ຫຼິ້ນເກມເອເລັກໂຕຣນິກ ແລະອື່ນໆອີກ ລວມທັງໝົດ ຈັກຊົ່ວໂມງ? ․․․․․
ຫຼັງຈາກທີ່ເບິ່ງຄຳຕອບຢູ່ຂ້າງເທິງແລ້ວ ເຈົ້າຄິດວ່າເຈົ້າໃຊ້ເວລາກັບອຸປະກອນເອເລັກໂຕຣນິກກາຍຂອບເຂດບໍ?
◻ ແມ່ນ ◻ ບໍ່ແມ່ນ
ເຊົາບໍ່ໄດ້ຫຼືເຕັມໃຈທີ່ຈະບໍ່ເຊົາ. “ພໍ່ແມ່ເຫັນຂ້ອຍສົ່ງຂໍ້ຄວາມຕະຫຼອດເວລາແລະບອກວ່າຂ້ອຍໃຊ້ເວລາຫຼາຍເກີນໄປກັບມັນ. ແຕ່ເມື່ອສົມທຽບກັບຄົນໃນໄວດຽວກັນ ຂ້ອຍສົ່ງຂໍ້ຄວາມໜ້ອຍກວ່າ. ຂ້ອຍໝາຍຄວາມວ່າ ຖ້າສົມທຽບກັບພໍ່ແມ່ ແນ່ນອນວ່າຂ້ອຍສົ່ງຂໍ້ຄວາມຫຼາຍກວ່າພວກເພິ່ນ. ແຕ່ມັນເປັນຄືກັບການສົມທຽບໝາກແອັບເປິນກັບໝາກກ້ຽງ ນັ້ນຄືພໍ່ແມ່ອາຍຸ 40 ປີ ແລະຂ້ອຍອາຍຸ 15 ປີ.”—ທ້າວ ອາເລນ.
ພໍ່ແມ່ຫຼືໝູ່ເວົ້າບໍວ່າເຈົ້າໃຊ້ເວລາຫຼາຍໂພດກັບອຸປະກອນເອເລັກໂຕຣນິກ?
◻ ແມ່ນ ◻ ບໍ່ແມ່ນ
ເຈົ້າເອງບໍ່ເຕັມໃຈຫຼືບໍ່ສາມາດຄວບຄຸມການໃຊ້ອຸປະກອນເອເລັກໂຕຣນິກປະເພດນີ້ບໍ?
◻ ແມ່ນ ◻ ບໍ່ແມ່ນ
ຜົນເສຍຫາຍຕິດຕາມມາ. “ໝູ່ຂອງຂ້ອຍສົ່ງຂໍ້ຄວາມຕະຫຼອດເວລາແມ່ນແຕ່ຕອນທີ່ກຳລັງຂັບລົດ. ນັ້ນບໍ່ປອດໄພເລີຍ!”—ນາງ ຈູເລຍ.
“ຕອນທີ່ໄດ້ໂທລະສັບເປັນຄັ້ງທຳອິດ ຂ້ອຍມັກຈະໂທຫຼືສົ່ງຂໍ້ຄວາມໄປຫາຄົນອື່ນຕະຫຼອດ. ຂ້ອຍເກືອບບໍ່ໄດ້ເຮັດແນວອື່ນເລີຍ. ມັນທຳລາຍສາຍສຳພັນຂອງຂ້ອຍກັບຄອບຄົວແລະແມ່ນແຕ່ກັບໝູ່ບາງຄົນ. ຕອນນີ້ຂ້ອຍສັງເກດວ່າເວລາອອກໄປຫຼິ້ນນຳໝູ່ຫຼືເວົ້າລົມກັບເຂົາເຈົ້າ ເຂົາເຈົ້າມັກຈະເວົ້າແຊກຂຶ້ນມາວ່າ: ‘ບຶດດຽວໆ ຂ້ອຍຕ້ອງຕອບຂໍ້ຄວາມກ່ອນ.’ ນັ້ນກໍເປັນເຫດຜົນໜຶ່ງທີ່ຂ້ອຍບໍ່ສະໜິດກັບໝູ່ເຫຼົ່ານັ້ນ.”—ນາງ ເຊີລີ.
ເຈົ້າເຄີຍອ່ານຫຼືສົ່ງຂໍ້ຄວາມເມື່ອກຳລັງຂັບລົດ ເມື່ອຢູ່ໃນຫ້ອງຮຽນ ຫຼືເມື່ອຢູ່ໃນການປະຊຸມຂອງຄລິດສະຕຽນບໍ?
◻ ເຄີຍ ◻ ບໍ່ເຄີຍ
ເມື່ອເວົ້າລົມກັບຄົນໃນຄອບຄົວຫຼືໝູ່ເພື່ອນ ເຈົ້າຂັດຈັງຫວະເຂົາເຈົ້າບໍດ້ວຍການຕອບອີເມວ ຮັບໂທລະສັບ ຫຼືສົ່ງຂໍ້ຄວາມ?
◻ ແມ່ນ ◻ ບໍ່ແມ່ນ
ການໃຊ້ອຸປະກອນເອເລັກໂຕຣນິກຍາດເອົາເວລານອນຫຼືລົບກວນການຮຽນໜັງສືຂອງເຈົ້າບໍ?
◻ ແມ່ນ ◻ ບໍ່ແມ່ນ
ເຈົ້າເຫັນຄວາມຈຳເປັນທີ່ຈະເຮັດການປ່ຽນແປງບໍ? ຖ້າແມ່ນ ຂໍໃຫ້ພິຈາລະນາຄຳແນະນຳຕໍ່ໄປນີ້.
ວິທີໃຊ້ທີ່ສົມດຸນ
ຖ້າເຈົ້າໃຊ້ອຸປະກອນເອເລັກໂຕຣນິກບາງປະເພດ ບໍ່ວ່າຈະເປັນຄອມພິວເຕີ ໂທລະສັບມືຖື ຫຼືອຸປະກອນອື່ນໆ ຂໍໃຫ້ຖາມຕົວເອງດ້ວຍຄຳຖາມສີ່ຂໍ້ທາງລຸ່ມນີ້. ການໃຊ້ຄຳແນະນຳທີ່ໄດ້ຈາກຄຳພີໄບເບິນເປັນຫຼັກແລະປະຕິບັດຕາມການຊີ້ນຳງ່າຍໆທີ່ວ່າ ອັນໃດຄວນເຮັດແລະອັນໃດບໍ່ຄວນເຮັດຈະຊ່ວຍໃຫ້ເຈົ້າປອດໄພແລະຄວບຄຸມອຸປະກອນເຫຼົ່ານັ້ນໄດ້.
• ເນື້ອໃນເປັນແນວໃດ? “ສິ່ງທັງຫຼາຍທີ່ເປັນສັດຊື່ [“ເປັນຈິງ,” ລ.ມ.] ສິ່ງທັງຫຼາຍທີ່ເປັນທີ່ນັບຖື ສິ່ງທັງຫຼາຍທີ່ເປັນຊອບທຳ ສິ່ງທັງຫຼາຍທີ່ເປັນບໍລິສຸດ ສິ່ງທັງຫຼາຍທີ່ເປັນທີ່ຮັກ ສິ່ງທັງຫຼາຍທີ່ມີຊື່ສຽງດີ ຖ້າມີການດີປະການໃດ ແລະຖ້າມີການສັນລະເສີນສິ່ງໃດ ຈົ່ງຄຶດຢູ່ເຖິງສິ່ງທັງປວງນັ້ນ.”—ຟີລິບ 4:8.
✔ ຄວນ ຕິດຕໍ່ສື່ຄວາມກັບໝູ່ເພື່ອນແລະຄອບຄົວສະເໝີ ບອກເລົ່າຂ່າວຄາວແລະທັດສະນະທີ່ເສີມສ້າງ.—ສຸພາສິດ 25:25; ເອເຟດ 4:29.
x ບໍ່ຄວນ ແຜ່ຄຳຊຸບຊິບນິນທາທີ່ສ້າງຄວາມເສຍຫາຍ ສົ່ງຂໍ້ຄວາມຫຼືພາບທີ່ຜິດສິລະທຳ ເບິ່ງວິດີໂອສັ້ນໆຫຼືລາຍການໂທລະພາບທີ່ຜິດສິລະທຳ.—ໂກໂລດ 3:5; 1 ເປໂຕ 4:15.
• ຂ້ອຍໃຊ້ມັນເມື່ອໃດ? “ມີເວລາກຳນົດສຳລັບການງານທຸກຢ່າງ.”—ຜູ້ເທສະໜາປ່າວປະກາດ 3:1.
✔ ຄວນ ກຳນົດເວລາວ່າຄວນໃຊ້ຫຼາຍສ່ຳໃດສຳລັບການໃຊ້ໂທລະສັບແລະການສົ່ງຂໍ້ຄວາມ ເບິ່ງໂທລະພາບ ຫຼືຫຼິ້ນເກມ.
x ບໍ່ຄວນ ຍອມໃຫ້ອຸປະກອນເອເລັກໂຕຣນິກຂັດຈັງຫວະໃນເວລາທີ່ເຈົ້າຕັ້ງໃຈຈະຢູ່ກັບໝູ່ເພື່ອນແລະຄອບຄົວ ການສຶກສາ ຫຼືເຮັດກິດຈະກຳເພື່ອການນະມັດສະການ.—ເອເຟດ 5:15-17; ຟີລິບ 2:4.
• ຂ້ອຍກຳລັງຄົບຫາກັບຜູ້ໃດ? “ຢ່າຖືກລໍ້ລວງ. ການທີ່ຈະຄົບຫາກັນກັບຄົນຊົ່ວນັ້ນຈະກະທຳໃຫ້ທຳນຽມອັນດີກາຍເປັນຊົ່ວໄປດ້ວຍ.”—1 ໂກລິນໂທ 15:33.
✔ ຄວນ ໃຊ້ອຸປະກອນເອເລັກໂຕຣນິກເພື່ອເສີມສ້າງສາຍສຳພັນທີ່ເຈົ້າມີກັບຜູ້ທີ່ສະໜັບສະໜູນເຈົ້າໃຫ້ພັດທະນານິດໄສທີ່ດີ.—ສຸພາສິດ 22:17.
x ບໍ່ຄວນ ຫຼອກຕົວເອງ ເພາະເຈົ້າຈະຮັບເອົາມາດຕະຖານ ພາສາ ແລະວິທີຄິດຂອງຄົນທີ່ເຈົ້າເລືອກຈະຄົບຫານຳຜ່ານທາງອີເມວ ຂໍ້ຄວາມ ໂທລະພາບ ວິດີໂອ ຫຼືອິນເຕີເນັດ.—ສຸພາສິດ 13:20.
• ຂ້ອຍໃຊ້ເວລາຫຼາຍເທົ່າໃດ? “ໃຫ້ທ່ານທັງຫຼາຍກວດເບິ່ງໃຫ້ແນ່ໃຈວ່າສິ່ງໃດສຳຄັນກວ່າ.”—ຟີລິບ 1:10, ລ.ມ.
✔ ຄວນ ຈົດບັນທຶກໄວ້ວ່າເຈົ້າໃຊ້ເວລາກັບອຸປະກອນເອເລັກໂຕຣນິກຫຼາຍສ່ຳໃດ.
x ບໍ່ຄວນ ເບິ່ງຂ້າມຄວາມຄິດເຫັນໂດຍກົງຂອງໝູ່ຫຼືຄຳແນະນຳຂອງພໍ່ແມ່ ຖ້າເຂົາເຈົ້າບອກວ່າເຈົ້າໃຊ້ເວລາຫຼາຍເກີນໄປກັບອຸປະກອນບາງປະເພດ.—ສຸພາສິດ 26:12.
ທ້າວແອນດຣູທີ່ກ່າວເຖິງຂ້າງເທິງນັ້ນ ເວົ້າເຖິງການໃຊ້ອຸປະກອນເອເລັກໂຕຣນິກຢ່າງສົມດຸນແລະສະຫລຸບຢ່າງດີວ່າ: “ເຄື່ອງເອເລັກໂຕຣນິກເປັນອຸປະກອນທີ່ມ່ວນ ແຕ່ສຳລັບໄລຍະເວລາສັ້ນໆເທົ່ານັ້ນ. ຂ້ອຍໄດ້ຮຽນຮູ້ທີ່ຈະບໍ່ຍອມໃຫ້ເຕັກໂນໂລຊີແຍກຂ້ອຍຈາກຄອບຄົວແລະໝູ່ເພື່ອນ.”
ສາມາດອ່ານເພີ່ມເຕີມກ່ຽວກັບຫົວເລື່ອງນີ້ໃນບົດທີ 30 ຂອງເຫຼັ້ມທີ 2
ເຈົ້າຈະໂນ້ມນ້າວພໍ່ແມ່ແນວໃດເພື່ອປ່ອຍໃຫ້ເຈົ້າມີຄວາມມ່ວນຊື່ນແດ່?
ຂໍ້ພະຄຳພີຫຼັກ
“ຢ່າເປັນຄົນປັນຍາແກ່ຕາເອງ. ຈົ່ງຢ້ານຢຳພະເຢໂຫວາແລະຈົ່ງຖອຍໜີຈາກການຊົ່ວ.”—ສຸພາສິດ 3:7.
ຄຳແນະນຳ
ເພື່ອຄວບຄຸມການໃຊ້ໂທລະສັບຂອງເຈົ້າ ບອກໃຫ້ໝູ່ເພື່ອນຮູ້ວ່າຖ້າເຈົ້າບໍ່ໄດ້ຕອບຂໍ້ຄວາມ ອີເມວ ຫຼືໂທລະສັບໂດຍທັນທີ ນັ້ນສະແດງວ່າເຈົ້າບໍ່ຕ້ອງການໃຫ້ຕິດຕໍ່.
ເຈົ້າຮູ້ບໍ . . .?
ຮູບພາບໃດໆກໍຕາມກ່ຽວກັບຕົວເຈົ້າຫຼືຄຳຄິດເຫັນໃດໆກໍຕາມກ່ຽວກັບກິດຈະກຳຕ່າງໆທີ່ເຈົ້າເຮັດເຊິ່ງລົງໃນເວັບໄຊໃນຕອນນີ້ ຜູ້ທີ່ອາດຈະເປັນນາຍຈ້າງໃນອະນາຄົດແລະຄົນອື່ນໆອາດຈະຍັງເຂົ້າໄປເບິ່ງໄດ້ໃນອີກຫຼາຍປີນັບຈາກນີ້.
ແຜນພາກປະຕິບັດ!
ຖ້າມີບັນຫາເລື່ອງການຄວບຄຸມການໃຊ້ ․․․․․ ຂ້ອຍຈະແກ້ບັນຫາໂດຍໃຊ້ເວລາພຽງແຕ່ ․․․․․ ຕໍ່ອາທິດໃນການໃຊ້ເຄື່ອງສື່ສານປະເພດນີ້.
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງອາດເປັນເລື່ອງຍາກທີ່ຈະເຫັນວ່າຕົນເອງຕິດອຸປະກອນເອເລັກໂຕຣນິກບາງປະເພດ?
• ອັນໃດອາດເກີດຂຶ້ນຖ້າເຈົ້າບໍ່ໄດ້ຄວບຄຸມການໃຊ້ອຸປະກອນເອເລັກໂຕຣນິກ?
[ຈຸດເດັ່ນໜ້າ 262]
“ຫຼາຍສິ່ງໄດ້ຊ່ວຍຂ້ອຍໃຫ້ເອົາຊະນະນິດໄສຕິດໂທລະພາບ. ຂ້ອຍບັງຄັບຕົວເອງໃຫ້ກຳນົດເວລາທີ່ໃຊ້ເບິ່ງໂທລະພາບ. ຂ້ອຍເວົ້າລົມກັບແມ່ເລື້ອຍໆກ່ຽວກັບບັນຫາຂອງຂ້ອຍ. ແລະກໍອະທິດຖານຫຼາຍເຊັ່ນກັນ.”—ນາງ ເຄັດລິນ
[ຮູບພາບໜ້າ 263]
ເຈົ້າຄວບຄຸມອຸປະກອນເອເລັກໂຕຣນິກຫຼືປ່ອຍໃຫ້ມັນຄວບຄຸມເຈົ້າ?