ບົດທີ 12
ມີການຈັດວຽກງານການປະກາດເລື່ອງລາຊະອານາຈັກແນວໃດ?
ແອັດສະປາຍ
ເບລາຣຸດຊີ
ຮົງກົງ
ເປຣູ
ບໍ່ດົນກ່ອນຈະສິ້ນຊີວິດ ພະເຍຊູແຈ້ງໃຫ້ຮູ້ວ່າ “ຄຳປະເສີດນີ້ແຫ່ງແຜ່ນດິນ [ຂ່າວດີເລື່ອງລາຊະອານາຈັກຂອງພະເຈົ້າ] ຈະເປັນທີ່ເທສະໜາປ່າວປະກາດໄປທົ່ວແຜ່ນດິນໂລກ ເພື່ອຈະເປັນພິຍານແກ່ພວກຕ່າງປະເທດທັງປວງ [ທຸກຊາດ] ແລະເມື່ອນັ້ນທີ່ສຸດຈະມາເຖິງແລ້ວ.” (ມັດທາຍ 24:14) ແຕ່ວຽກງານການປະກາດທົ່ວໂລກຈະສຳເລັດຜົນໄດ້ແນວໃດ? ໂດຍການຕິດຕາມຕົວຢ່າງທີ່ພະເຍຊູວາງໄວ້ຕອນຢູ່ແຜ່ນດິນໂລກ.—ລືກາ 8:1
ພວກເຮົາພະຍາຍາມຕິດຕໍ່ກັບຜູ້ຄົນຢູ່ຕາມບ້ານເຮືອນຂອງເຂົາເຈົ້າ. ພະເຍຊູຝຶກອົບຮົມສາວົກຂອງພະອົງໃຫ້ປະກາດຂ່າວດີຢູ່ຕາມບ້ານເຮືອນ. (ມັດທາຍ 10:11-13; ກິດຈະການ 5:42; 20:20) ບັນດາຜູ້ເຜີຍແຜ່ຂ່າວດີໃນສະຕະວັດທຳອິດຖືກມອບໝາຍເຂດສະເພາະທີ່ຈະປະກາດ. (ມັດທາຍ 10:5, 6; 2 ໂກລິນໂທ 10:13) ໃນທຸກມື້ນີ້ກໍຄ້າຍ ໆ ກັນ ວຽກງານກາດປະກາດຂອງພວກເຮົາມີການຈັດລະບຽບເປັນຢ່າງດີ ແລະມີການມອບໝາຍເຂດຮັບຜິດຊອບໃຫ້ແຕ່ລະປະຊາຄົມ. ໂດຍເຮັດແບບນີ້ ພວກເຮົາສາມາດເຮັດໃຫ້ຄຳສັ່ງຂອງພະເຍຊູສຳເລັດທີ່ວ່າ “ໄປເທສະໜາປ່າວປະກາດແກ່ຄົນທັງຫຼາຍ.”—ກິດຈະການ 10:42
ພວກເຮົາພະຍາຍາມເຂົ້າເຖິງຜູ້ຄົນໃນທຸກຫົນທຸກແຫ່ງ. ພະເຍຊູຍັງວາງຕົວຢ່າງໂດຍການປະກາດກັບຜູ້ຄົນຢູ່ຕາມບ່ອນສາທາລະນະຕ່າງ ໆ ເຊັ່ນ ຕາມແຄມຝັ່ງທະເລ ຫຼືຢູ່ນ້ຳສ້າງລວມຂອງບ້ານ. (ມາລະໂກ 4:1; ໂຢຮັນ 4:5-15) ພວກເຮົາກໍເຊັ່ນກັນ ເວົ້າລົມກັບຜູ້ຄົນກ່ຽວກັບຄຳພີໄບເບິນຢູ່ບ່ອນໃດກໍຕາມທີ່ເຮັດໄດ້ເຊັ່ນ ຕາມຖະໜົນຫົນທາງ ຕະຫຼາດ ສວນສາທາລະນະ ຫຼືທາງໂທລະສັບ. ນອກຈາກນັ້ນ ພວກເຮົາຍັງເວົ້າລົມກັບເພື່ອນບ້ານ ເພື່ອນຮ່ວມງານ ໝູ່ຮຽນໜັງສືນຳກັນ ແລະກັບຍາດພີ່ນ້ອງເມື່ອມີໂອກາດທີ່ເໝາະສົມ. ຄວາມພະຍາຍາມທີ່ກົມກຽວກັນທັງໝົດເຮັດໃຫ້ເປັນໄປໄດ້ສຳລັບຫຼາຍລ້ານຄົນຕະຫຼອດທົ່ວໂລກທີ່ຈະໄດ້ຍິນການ “ປະກາດຄວາມພົ້ນ.”—ຄຳເພງ 96:2
ທ່ານຄຶດພໍ້ຫາສະມາຊິກຄອບຄົວຫຼືຜູ້ໃດຜູ້ໜຶ່ງບໍທີ່ທ່ານຢາກບອກຂ່າວດີເລື່ອງລາຊະອານາຈັກ ແລະສິ່ງທີ່ຂ່າວດີນັ້ນໝາຍເຖິງສຳລັບອະນາຄົດຂອງເຂົາເຈົ້າ? ຢ່າເກັບຂ່າວສານນີ້ທີ່ປະກອບດ້ວຍຄວາມຫວັງໄວ້ກັບຕົວເອງ ຂໍໃຫ້ບອກກັບເຂົາເຈົ້າໃຫ້ໄວເທົ່າທີ່ທ່ານສາມາດເຮັດໄດ້!
“ຂ່າວດີ” ອັນໃດທີ່ຈຳເປັນຕ້ອງໄດ້ປະກາດ?
ພະຍານພະເຢໂຫວາຮຽນເອົາແບບຢ່າງວິທີການປະກາດຂອງພະເຍຊູແນວໃດ?