ບົດທີ 2
ພະເຈົ້າສ້າງຜູ້ຊາຍແລະຜູ້ຍິງຄູ່ທຳອິດ
ພະເຢໂຫວາສ້າງສວນໜຶ່ງຊື່ວ່າ ເອເດັນ. ສວນນີ້ເຕັມໄປດ້ວຍດອກໄມ້ ຕົ້ນໄມ້ ແລະສັດບັກຫຼາຍໆຊະນິດ. ຕໍ່ມາ ພະເຈົ້າກໍສ້າງອາດາມຜູ້ຊາຍຄົນທຳອິດຈາກຂີ້ດິນແລະເປົ່າລົມໃສ່ຮູດັງຂອງລາວ. ແລ້ວມີຫຍັງເກີດຂຶ້ນ? ຜູ້ຊາຍຄົນນີ້ກໍມີຊີວິດຂຶ້ນມາ! ພະເຢໂຫວາໃຫ້ອາດາມເບິ່ງແຍງສວນເອເດັນແລະໃຫ້ລາວຕັ້ງຊື່ສັດທຸກຊະນິດ.
ພະເຢໂຫວາໄດ້ຕັ້ງກົດທີ່ສຳຄັນຂໍ້ໜຶ່ງໃຫ້ກັບອາດາມ. ເພິ່ນບອກລາວວ່າ: ‘ເຈົ້າຊິກິນໝາກໄມ້ຕົ້ນໃດກໍໄດ້ໃນສວນນີ້ ຍົກເວັ້ນຕົ້ນດຽວທີ່ຫ້າມກິນ. ຖ້າເຈົ້າກິນ ເຈົ້າຈະຕາຍ.’
ຕໍ່ມາ ພະເຢໂຫວາເວົ້າວ່າ: ‘ເຮົາຈະສ້າງຜູ້ຊ່ວຍຄົນໜຶ່ງໃຫ້ອາດາມ.’ ພະເຢໂຫວາຈຶ່ງເຮັດໃຫ້ອາດາມນອນຫຼັບແບບບໍ່ຮູ້ສຶກໂຕ ແລ້ວເອົາກະດູກຂ້າງອັນໜຶ່ງຂອງອາດາມມາສ້າງເປັນເມຍໃຫ້ລາວ. ຜູ້ຍິງຄົນນີ້ຊື່ວ່າ ເອວາ. ອາດາມກັບເອວາເປັນຄອບຄົວທຳອິດ. ອາດາມຮູ້ສຶກແນວໃດຕໍ່ເມຍຂອງລາວ? ລາວມີຄວາມສຸກຫຼາຍຈົນເວົ້າອອກມາວ່າ: ‘ເບິ່ງຜູ້ຍິງທີ່ພະເຢໂຫວາສ້າງຈາກກະດູກຂ້າງຂອງຂ້ອຍແມ້! ລາວເປັນຄົນຄືກັບຂ້ອຍເລີຍ.’
ພະເຢໂຫວາບອກອາດາມກັບເອວາໃຫ້ມີລູກມີຫຼານຈົນເຕັມໂລກ. ເພິ່ນຢາກໃຫ້ເຂົາເຈົ້າເຮັດວຽກນຳກັນຢ່າງມີຄວາມສຸກແລະຊ່ວຍກັນເຮັດໃຫ້ໂລກເປັນສວນອຸທິຍານ ຫຼືສວນທີ່ງາມໆຄືກັບສວນເອເດັນ. ແຕ່ສິ່ງຕ່າງໆກໍບໍ່ໄດ້ເປັນໄປຕາມທີ່ພະເຢໂຫວາຕັ້ງໃຈໄວ້. ຍ້ອນຫຍັງ? ເຮົາຈະຮູ້ຄຳຕອບໃນບົດຕໍ່ໄປ.
“ໃນຕອນທຳອິດ ພະເຈົ້າໄດ້ສ້າງມະນຸດເປັນຜູ້ຊາຍແລະຜູ້ຍິງ.”—ມັດທາຍ 19:4