ບົດທີ 14
ທາດຄົນໜຶ່ງເຊື່ອຟັງພະເຈົ້າ
ໂຢເຊັບເປັນລູກຊາຍທີ່ຢາໂຄບຮັກຫຼາຍທີ່ສຸດ. ເຈົ້າຄິດວ່າພວກອ້າຍຂອງໂຢເຊັບຊິຮູ້ສຶກແນວໃດ? ເຂົາເຈົ້າອິດສາແລະຊັງໂຢເຊັບຫຼາຍ. ເມື່ອໂຢເຊັບຝັນແປກໆ ລາວກໍໄປເລົ່າສູ່ພວກອ້າຍຟັງ. ແລ້ວພວກອ້າຍກໍຕີຄວາມໝາຍວ່າ ມື້ໜຶ່ງເຂົາເຈົ້າຈະຕ້ອງກົ້ມລົງສະແດງຄວາມນັບຖືໂຢເຊັບ. ນີ້ແຮ່ງເຮັດໃຫ້ເຂົາເຈົ້າຊັງໂຢເຊັບຫຼາຍກວ່າເກົ່າ!
ມີມື້ໜຶ່ງ ພວກອ້າຍຂອງໂຢເຊັບໄປລ້ຽງແກະຢູ່ໃກ້ເມືອງເຊເຄັມ. ຢາໂຄບບອກໂຢເຊັບໃຫ້ໄປເບິ່ງພວກອ້າຍວ່າເປັນແນວໃດ. ເມື່ອພວກອ້າຍແນມເຫັນໂຢເຊັບແຕ່ໄກໆ ເຂົາເຈົ້າກໍລົມກັນວ່າ: ‘ເບິ່ງແມ້! ບັກນັກຝັນໃຫຍ່ມັນມາແລ້ວ. ໄປ໋ ພວກເຮົາຂ້າມັນຖິ້ມ!’ ເຂົາເຈົ້າຈັບໂຢເຊັບ ແລ້ວໂຍນລາວລົງຂຸມເລິກ. ແຕ່ອ້າຍທີ່ຊື່ຢູດາບອກວ່າ: ‘ບໍ່ຕ້ອງຂ້າມັນດອກ! ຂາຍມັນໃຫ້ໄປເປັນທາດດີກວ່າ.’ ເຂົາເຈົ້າກໍເລີຍຂາຍໂຢເຊັບໃຫ້ພວກພໍ່ຄ້າຄົນມີດີອານທີ່ກຳລັງເດີນທາງໄປເອຢິບເປັນເງິນໜັກ 20 ເຊເກນ.
ຫຼັງຈາກນັ້ນ ພວກອ້າຍກໍເອົາເສື້ອຂອງໂຢເຊັບໄປຈຸ່ມໃສ່ເລືອດແບ້ ແລ້ວເອົາໄປໃຫ້ພໍ່ເບິ່ງແລະຖາມພໍ່ວ່າ: ‘ເສື້ອໂຕນີ້ແມ່ນເສື້ອລູກຊາຍພໍ່ບໍ?’ ຢາໂຄບກໍເລີຍຄິດວ່າໂຢເຊັບຖືກສັດປ່າຂ້າຕາຍແລ້ວ. ລາວເສຍໃຈເອົາແທ້ເອົາວ່າ ແລະບໍ່ມີໃຜສາມາດປອບໃຈລາວໄດ້.
ຢູ່ເອຢິບ ໂຢເຊັບຖືກຂາຍໄປເປັນທາດຂອງຂ້າລາຊະການທີ່ສຳຄັນຄົນໜຶ່ງຊື່ວ່າໂປຕີຟາ. ແຕ່ພະເຢໂຫວາກໍຍັງຢູ່ນຳໂຢເຊັບ. ໂປຕີຟາເຫັນວ່າໂຢເຊັບເຮັດວຽກເກັ່ງຫຼາຍແລະເປັນຄົນທີ່ໄວ້ໃຈໄດ້. ບໍ່ດົນ ໂປຕີຟາກໍແຕ່ງຕັ້ງໂຢເຊັບໃຫ້ເບິ່ງແຍງຊັບສົມບັດທັງໝົດຂອງລາວ.
ເມື່ອເມຍໂປຕີຟາເຫັນວ່າໂຢເຊັບເປັນຄົນຫຼໍ່ແລະຫຸ່ນດີ ລາວກໍເລີຍຊວນໂຢເຊັບທຸກມື້ໆໃຫ້ມານອນນຳ. ແລ້ວໂຢເຊັບຈະເຮັດແນວໃດ? ໂຢເຊັບປະຕິເສດແລະເວົ້າວ່າ: ‘ບໍ່! ມັນຜິດ. ນາຍຂອງຂ້ອຍໄວ້ໃຈຂ້ອຍຫຼາຍແລະເຈົ້າກໍເປັນເມຍຂອງນາຍ. ຖ້າຂ້ອຍນອນນຳເຈົ້າ ຂ້ອຍກໍເຮັດບາບຕໍ່ພະເຈົ້າ!’
ມີມື້ໜຶ່ງ ເມຍໂປຕີຟາພະຍາຍາມບັງຄັບໂຢເຊັບໃຫ້ນອນນຳ. ລາວດຶງເສື້ອໂຢເຊັບໄວ້ ແຕ່ໂຢເຊັບກໍໜີໄປໄດ້. ເມື່ອໂປຕີຟາຜົວຂອງລາວກັບມາຮອດເຮືອນ ລາວກໍເວົ້າຕົວະຜົວວ່າໂຢເຊັບພະຍາຍາມປ້ຳລາວ. ໂປຕີຟາຈຶ່ງໃຈຮ້າຍຫຼາຍແລະຈັບໂຢເຊັບໄປຂັງຄຸກ. ແຕ່ພະເຢໂຫວາບໍ່ໄດ້ລືມໂຢເຊັບ.
“ດັ່ງນັ້ນ ໃຫ້ຖ່ອມໂຕລົງຕໍ່ພະເຈົ້າຜູ້ມີລິດເດດຍິ່ງໃຫຍ່ ເພື່ອເພິ່ນຈະໃຫ້ກຽດພວກເຈົ້າເມື່ອຮອດເວລາ.”—1 ເປໂຕ 5:6