ບົດທີ 15
ພະເຢໂຫວາບໍ່ເຄີຍລືມໂຢເຊັບ
ຕອນທີ່ໂຢເຊັບຖືກຂັງຢູ່ໃນຄຸກ ຟາໂຣກະສັດຂອງເອຢິບໄດ້ຝັນເລື່ອງທີ່ບໍ່ມີໃຜສາມາດແປຄວາມໝາຍໄດ້. ຄົນຮັບໃຊ້ຄົນໜຶ່ງບອກຟາໂຣວ່າໂຢເຊັບສາມາດແປຄວາມຝັນຂອງລາວໄດ້. ຟາໂຣຈຶ່ງຟ້າວໃຫ້ຄົນໄປພາໂຢເຊັບມາຫາທັນທີ.
ຟາໂຣຖາມໂຢເຊັບວ່າ: ‘ເຈົ້າບອກໄດ້ບໍວ່າຄວາມຝັນຂອງຂ້ອຍໝາຍເຖິງຫຍັງ?’ ໂຢເຊັບຕອບວ່າ: ‘ຢູ່ທົ່ວເອຢິບຈະມີອາຫານອຸດົມສົມບູນຕະຫຼອດ 7 ປີນີ້ ແຕ່ຫຼັງຈາກນັ້ນອີກ 7 ປີຈະເກີດຄວາມອຶດຢາກ. ຂໍໃຫ້ກະສັດເລືອກຄົນໜຶ່ງທີ່ສະຫຼາດແລະແຕ່ງຕັ້ງລາວໃຫ້ລວບລວມອາຫານເພື່ອປະຊາຊົນຈະບໍ່ຕາຍຍ້ອນຄວາມອຶດຢາກ.’ ຟາໂຣກໍເລີຍບອກວ່າ: ‘ຂ້ອຍເລືອກເຈົ້າ! ເຈົ້າຈະມີອຳນາດຫຼາຍທີ່ສຸດເປັນອັນດັບທີສອງໃນເອຢິບ!’ ເປັນຫຍັງໂຢເຊັບແປຄວາມຝັນຂອງຟາໂຣໄດ້? ລາວແປໄດ້ກໍຍ້ອນວ່າພະເຢໂຫວາຊ່ວຍລາວ.
ຕະຫຼອດ 7 ປີ ໂຢເຊັບລວບລວມອາຫານໄດ້ຫຼາຍແທ້ຫຼາຍວ່າ. ແລ້ວຫຼັງຈາກນັ້ນກໍເກີດຄວາມອຶດຢາກໄປທົ່ວໂລກຄືກັບທີ່ໂຢເຊັບເຄີຍບອກໄວ້. ມີຄົນຈາກທົ່ວທຸກບ່ອນມາຊື້ອາຫານນຳໂຢເຊັບ. ເມື່ອຢາໂຄບໄດ້ຍິນວ່າຢູ່ເອຢິບມີອາຫານ ລາວກໍເລີຍໃຫ້ລູກຊາຍ 10 ຄົນໄປຊື້ອາຫານຢູ່ຫັ້ນ.
ພວກລູກຊາຍຂອງຢາໂຄບກໍໄປຫາໂຢເຊັບ. ເມື່ອໂຢເຊັບເຫັນພວກອ້າຍ ລາວກໍຈື່ໄດ້ທັນທີ ແຕ່ພວກອ້າຍຈື່ໂຢເຊັບບໍ່ໄດ້. ເຂົາເຈົ້າໝູບໜ້າລົງພື້ນສະແດງຄວາມນັບຖືໂຢເຊັບຄືກັບທີ່ໂຢເຊັບເຄີຍຝັນຕອນຍັງນ້ອຍ. ໂຢເຊັບຢາກຮູ້ວ່າພວກອ້າຍຍັງມີນິດໄສຄືເກົ່າບໍ່ ລາວຈຶ່ງເວົ້າວ່າ: “ພວກເຈົ້າເປັນຄົນສອດແນມ! ພວກເຈົ້າຊິມາຊອກຫາຈຸດອ່ອນໃນແຜ່ນດິນນີ້ແມ່ນບໍ?” ເຂົາເຈົ້າຕອບວ່າ: ‘ບໍ່ແມ່ນ. ພວກເຮົາມາຈາກການາອານ ພວກເຮົາມີອ້າຍນ້ອງນຳກັນ 12 ຄົນ. ຄົນໜຶ່ງຕາຍແລ້ວແລະນ້ອງຊາຍຫຼ້າຢູ່ນຳພໍ່.’ ແລ້ວໂຢເຊັບບອກເຂົາເຈົ້າວ່າ: ‘ໃຫ້ພານ້ອງຊາຍຫຼ້າມາຫາຂ້ອຍ ຂ້ອຍຈຶ່ງຊິເຊື່ອພວກເຈົ້າ.’ ເຂົາເຈົ້າຈຶ່ງພາກັນກັບບ້ານໄປຫາພໍ່.
ເມື່ອອາຫານໝົດ ຢາໂຄບກໍໃຫ້ພວກລູກຊາຍກັບໄປເອຢິບອີກ. ເທື່ອນີ້ເຂົາເຈົ້າພາເບັນຢາມິນນ້ອງຊາຍຫຼ້າໄປນຳ. ເພື່ອຈະທົດສອບພວກອ້າຍ ໂຢເຊັບໄດ້ລັກເອົາຈອກເງິນໃສ່ເປົາເຂົ້າຂອງເບັນຢາມິນແລະກ່າວຫາວ່າພວກອ້າຍເປັນຄົນລັກ. ເມື່ອຄົນຮັບໃຊ້ຂອງໂຢເຊັບເຈິຈອກເງິນຢູ່ໃນເປົາຂອງເບັນຢາມິນ ພວກອ້າຍກໍຕົກໃຈຫຼາຍ. ເຂົາເຈົ້າຂໍຮ້ອງໂຢເຊັບໃຫ້ລົງໂທດເຂົາເຈົ້າແທນເບັນຢາມິນ.
ຕອນນີ້ໂຢເຊັບຮູ້ວ່າພວກອ້າຍໄດ້ປ່ຽນໄປແລ້ວ. ລາວອົດກັ້ນຄວາມຮູ້ສຶກໄວ້ບໍ່ໄຫວ ລາວຈຶ່ງຮ້ອງໄຫ້ອອກມາບັກດັງໆແລ້ວເວົ້າວ່າ: ‘ຂ້ອຍແມ່ນໂຢເຊັບນ້ອງຊາຍຂອງພວກອ້າຍ. ພໍ່ຍັງມີຊີວິດຢູ່ບໍ?’ ພວກອ້າຍນ້ອງກໍຕົກໃຈຈົນເວົ້າຫຍັງບໍ່ອອກ. ແຕ່ໂຢເຊັບບອກເຂົາເຈົ້າວ່າ: ‘ບໍ່ຕ້ອງເສຍໃຈທີ່ໄດ້ຂາຍຂ້ອຍມານີ້ ເພາະພະເຈົ້າສົ່ງຂ້ອຍມານີ້ກໍເພື່ອຊ່ວຍຊີວິດພວກອ້າຍ. ໃຫ້ພວກອ້າຍຟ້າວພາພໍ່ມາຫາຂ້ອຍຢູ່ນີ້ເດີ້.’
ເຂົາເຈົ້າກັບເມືອບອກຂ່າວດີໃຫ້ພໍ່ຮູ້ແລະພາພໍ່ໄປເອຢິບ. ຫຼັງຈາກໂຢເຊັບບໍ່ໄດ້ເຈິພໍ່ມາຫຼາຍປີ ໃນທີ່ສຸດທັງສອງຄົນກໍໄດ້ກັບມາຢູ່ນຳກັນອີກເທື່ອໜຶ່ງ.
“ຖ້າພວກເຈົ້າບໍ່ຍົກໂທດໃຫ້ຄົນອື່ນ ເພິ່ນກໍຈະບໍ່ຍົກໂທດໃຫ້ພວກເຈົ້າຄືກັນ.”—ມັດທາຍ 6:15