ຄຳນຳຕອນທີ 11
ຕອນທີ 11 ນີ້ຈະເຂົ້າສູ່ພະຄຳພີຄລິດສະຕຽນພາກພາສາກຣີກ. ພະເຢຊູເກີດໃນຄອບຄົວທຸກຍາກທີ່ອາໄສຢູ່ເມືອງນ້ອຍໆ. ເພິ່ນເຮັດວຽກກັບພໍ່ທີ່ເປັນຊ່າງໄມ້. ພະເຢຊູເປັນຄົນທີ່ຈະມາຊ່ວຍມະນຸດໃຫ້ລອດ. ພະເຢໂຫວາເລືອກພະເຢຊູໃຫ້ເປັນກະສັດຢູ່ສະຫວັນ. ຖ້າເຈົ້າເປັນພໍ່ແມ່ ຂໍຊ່ວຍລູກໃຫ້ເຂົ້າໃຈວ່າພະເຢໂຫວາຮັກແລະເປັນຫ່ວງພະເຢຊູຫຼາຍ ເພິ່ນຈຶ່ງສົ່ງພະເຢຊູມາເກີດໃນຄອບຄົວທີ່ຮັກແລະຮັບໃຊ້ເພິ່ນຢ່າງສັດຊື່. ຊ່ວຍໃຫ້ລູກເຫັນວ່າພະເຢໂຫວາປົກປ້ອງພະເຢຊູແນວໃດບໍ່ໃຫ້ຖືກເຮໂຣດຂ້າແລະບໍ່ມີຫຍັງສາມາດຂັດຂວາງຄວາມຕ້ອງການຂອງພະເຢໂຫວາໄດ້. ຊ່ວຍລູກໃຫ້ຮູ້ວ່າພະເຢໂຫວາມອບໝາຍໃຫ້ໂຢຮັນກຽມທາງໄວ້ໃຫ້ພະເຢຊູ ແລະເນັ້ນວ່າພະເຢຊູຮັກຄວາມຮູ້ຂອງພະເຢໂຫວາຫຼາຍສ່ຳໃດຕັ້ງແຕ່ເພິ່ນຍັງເປັນເດັກນ້ອຍ.