ບົດຄວາມສຶກສາທີ 7
ເຮົາຮັກພະເຢໂຫວາພໍ່ຂອງເຮົາຫຼາຍແທ້ໆ
“ພວກເຮົາສະແດງຄວາມຮັກກໍຍ້ອນພະອົງຮັກພວກເຮົາກ່ອນ.”—1 ຢຮ. 4:19
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
ໃຈຄວາມສຳຄັນa
1-2. ເປັນຫຍັງພະເຢໂຫວາຈຶ່ງເປີດໂອກາດໃຫ້ເຮົາເຂົ້າມາເປັນສ່ວນໜຶ່ງຂອງຄອບຄົວພະອົງ ແລະພະອົງເປີດໂອກາດນີ້ແນວໃດ?
ພະເຢໂຫວາຊວນເຮົາໃຫ້ເຂົ້າມາເປັນສ່ວນໜຶ່ງຂອງຄອບຄົວພະອົງ ເຊິ່ງເປັນການເຊີນທີ່ພິເສດແທ້ໆ. ສະມາຊິກຂອງຄອບຄົວນີ້ແມ່ນຄົນທີ່ອຸທິດຕົວໃຫ້ພະເຈົ້າແລະສະແດງຄວາມເຊື່ອໃນຄ່າໄຖ່ຂອງພະເຢຊູ. ພວກເຮົາເປັນຄອບຄົວທີ່ມີຄວາມສຸກ. ພວກເຮົາມີຊີວິດທີ່ດີໃນຕອນນີ້ແລະມີຄວາມຫວັງຈະມີຊີວິດຕະຫຼອດໄປບໍ່ວ່າຈະຢູ່ເທິງສະຫວັນຫຼືເທິງແຜ່ນດິນໂລກທີ່ເປັນອຸທິຍານ.
2 ຍ້ອນພະເຢໂຫວາຮັກເຮົາຫຼາຍ ພະອົງຈຶ່ງເປີດທາງໃຫ້ເຮົາເຂົ້າມາເປັນສ່ວນໜຶ່ງຂອງຄອບຄົວພະອົງ. ແຕ່ເພື່ອຈະເຮັດແບບນັ້ນ ພະອົງຕ້ອງເສຍສະລະຫຼາຍແທ້ໆ. (ຢຮ. 3:16) ພະອົງໄດ້ ‘ຊື້ເຮົາໄວ້ດ້ວຍລາຄາສູງ.’ (1 ກຣ. 6:20) ໂດຍທາງຄ່າໄຖ່ ພະເຢໂຫວາໄດ້ເຮັດໃຫ້ເຮົາມີສາຍສຳພັນທີ່ໃກ້ຊິດກັບພະອົງ. ເຮົາຮູ້ສຶກເປັນກຽດຫຼາຍແທ້ໆທີ່ສາມາດເອີ້ນຜູ້ທີ່ຍິ່ງໃຫຍ່ທີ່ສຸດໃນເອກະພົບວ່າພໍ່. ແລະພະເຢໂຫວາເປັນພໍ່ທີ່ດີທີ່ສຸດດັ່ງທີ່ເຮົາໄດ້ຮຽນໃນບົດຄວາມກ່ອນ.
3. ເຮົາອາດຖາມຕົວເອງແນວໃດ? (ເບິ່ງຂອບ “ພະເຢໂຫວາຮູ້ຈັກຂ້ອຍເປັນສ່ວນຕົວບໍ?”)
3 ເຮົາອາດຖາມຕົວເອງຄືກັບຜູ້ຂຽນຄຳພີໄບເບິນຄົນໜຶ່ງວ່າ: “ຂ້ອຍຈະເອົາສິ່ງໃດໄປຕອບຄຸນແກ່ພະເຢໂຫວາແທນການດີທັງຫຼາຍທີ່ພະອົງໄດ້ກະທຳແກ່ຂ້ອຍ?” (ເພງ. 116:12) ຄຳຕອບຄືເຮົາບໍ່ສາມາດຕອບແທນພະເຢໂຫວາໄດ້ທັງໝົດ. ແຕ່ເຮົາກໍສາມາດຮັກພະອົງໄດ້. ອັກຄະສາວົກໂຢຮັນຂຽນວ່າ: “ພວກເຮົາສະແດງຄວາມຮັກກໍຍ້ອນພະອົງຮັກພວກເຮົາກ່ອນ.” (1 ຢຮ. 4:19) ເຮົາຈະສະແດງໃຫ້ພະເຢໂຫວາເຫັນແນວໃດວ່າເຮົາຮັກພະອົງ?
ໃຫ້ໃກ້ຊິດກັບພະເຢໂຫວາສະເໝີ
ເຮົາສະແດງວ່າເຮົາຮັກພະເຢໂຫວາພໍ່ຂອງເຮົາໃນສະຫວັນຫຼາຍໂດຍອະທິດຖານເຖິງພະອົງ ເຊື່ອຟັງພະອົງ ແລະຊ່ວຍຄົນອື່ນໃຫ້ຮັກພະອົງ (ເບິ່ງຂໍ້ 4-14)
4. ຕາມຢາໂກໂບ 4:8 ເປັນຫຍັງເຮົາຄວນພະຍາຍາມທີ່ຈະໃກ້ຊິດກັບພະເຢໂຫວາ?
4 ພະເຢໂຫວາຢາກໃຫ້ເຮົາໃກ້ຊິດກັບພະອົງແລະລົມກັບພະອົງ. (ອ່ານຢາໂກໂບ 4:8) ພະອົງຢາກໃຫ້ເຮົາ “ອະທິດຖານເລື້ອຍໆ” ແລະພະອົງພ້ອມທີ່ຈະຟັງເຮົາສະເໝີ. (ຣມ. 12:12) ພະອົງບໍ່ເຄີຍຫຍຸ້ງຫຼືເມື່ອຍເກີນໄປຈົນບໍ່ຢາກຟັງເຮົາ. ສ່ວນເຮົາກໍຟັງພະອົງໂດຍອ່ານຄຳພີໄບເບິນແລະໜັງສືຕ່າງໆທີ່ຊ່ວຍເຮົາໃຫ້ເຂົ້າໃຈຄຳພີໄບເບິນຫຼາຍຂຶ້ນ. ນອກຈາກນັ້ນ ເຮົາກໍຍັງຟັງພະອົງໂດຍເຂົ້າຮ່ວມການປະຊຸມເປັນປະຈຳ. ການລົມກັນເປັນປະຈຳຈະຊ່ວຍໃຫ້ລູກໃກ້ຊິດກັບພໍ່ແມ່ສະເໝີ ຄ້າຍຄືກັນ ຖ້າເຮົາລົມກັບພະເຢໂຫວາເປັນປະຈຳເຮົາກໍຈະໃກ້ຊິດກັບພະອົງສະເໝີ.
ເບິ່ງຂໍ້ 5
5. ເຮົາຈະປັບປຸງຄຳອະທິດຖານຂອງເຮົາແນວໃດ?
5 ຂໍໃຫ້ຄິດກ່ຽວກັບສິ່ງທີ່ເຈົ້າເວົ້າກັບພະເຢໂຫວາ. ພະເຢໂຫວາຢາກໃຫ້ເຮົາລະບາຍຄວາມໃນໃຈທັງໝົດກັບພະອົງໃນຄຳອະທິດຖານ. (ເພງ. 62:8) ເຮົາຄວນຖາມຕົວເອງວ່າ: ‘ຂ້ອຍອະທິດຖານພໍແຕ່ເປັນພິທີແລະເວົ້າຊ້ຳຄືກັບເລົ່າບົດທ່ອງເອົາບໍ ຫຼືຂ້ອຍອະທິດຖານຈາກໃຈແທ້ໆຄືກັບຈົດໝາຍທີ່ຕັ້ງໃຈຂຽນ?’ ແນ່ນອນວ່າ ເຈົ້າຮັກພະເຢໂຫວາແລະຢາກຮັກສາສາຍສຳພັນກັບພະອົງໃຫ້ເຂັ້ມແຂງຫຼາຍຂຶ້ນແທ້ໆ. ເພື່ອຈະເປັນແບບນັ້ນ ເຈົ້າຕ້ອງລົມກັບພະອົງເປັນປະຈຳ ບອກຄວາມຮູ້ສຶກຂອງເຈົ້າ ເລົ່າໃຫ້ພະອົງຟັງບໍ່ວ່າຈະເປັນຄວາມສຸກຫຼືສິ່ງທີ່ເຮັດໃຫ້ເຈົ້າທຸກໃຈ. ຂໍໃຫ້ໝັ້ນໃຈວ່າເຈົ້າສາມາດຂໍຄວາມຊ່ວຍເຫຼືອຈາກພະອົງໄດ້.
6. ເຮົາຕ້ອງເຮັດຫຍັງເພື່ອຈະໃກ້ຊິດພະເຢໂຫວາພໍ່ໃນສະຫວັນສະເໝີ?
6 ເພື່ອຈະໃກ້ຊິດພະເຢໂຫວາພໍ່ໃນສະຫວັນ ເຮົາຕ້ອງສຳນຶກບຸນຄຸນພະອົງສະເໝີ. ເຮົາເຫັນດີກັບຜູ້ຂຽນຄຳເພງທີ່ບອກວ່າ: “ພະເຢໂຫວາພະເຈົ້າຂອງຂ້ອຍ ພະອົງເຮັດສິ່ງທີ່ມະຫັດສະຈັນຫຼາຍຢ່າງແລະມີໂຄງການມາກມາຍສຳລັບພວກເຮົາ ບໍ່ມີໃຜທຽບພະອົງໄດ້ ຖ້າຂ້ອຍຈະເວົ້າເຖິງສິ່ງເຫຼົ່ານີ້ກໍຄົງເວົ້າໄດ້ບໍ່ໝົດ.” (ເພງ. 40:5, ລ.ມ.) ເຮົາບໍ່ພຽງແຕ່ຮູ້ສຶກ ສຳນຶກບຸນຄຸນພະເຢໂຫວາ ແຕ່ເຮົາຕ້ອງສະແດງອອກ ໂດຍທາງຄຳເວົ້າແລະການກະທຳຂອງເຮົານຳ. ເລື່ອງນີ້ເຮັດໃຫ້ເຮົາແຕກຕ່າງຈາກຜູ້ຄົນໃນປັດຈຸບັນ. ເຮົາຢູ່ໃນສະໄໝທີ່ຜູ້ຄົນສ່ວນຫຼາຍບໍ່ຮູ້ຈັກສຳນຶກບຸນຄຸນພະເຈົ້າໃນສິ່ງທີ່ພະອົງເຮັດເພື່ອພວກເຂົາ. ທີ່ຈິງ ສິ່ງໜຶ່ງທີ່ສະແດງໃຫ້ເຫັນຢ່າງຈະແຈ້ງວ່າເຮົາກຳລັງຢູ່ “ໃນສະໄໝສຸດທ້າຍ” ກໍຄືຜູ້ຄົນເປັນຄົນອະກະຕັນຍູ. (2 ຕມ. 3:1, 2) ຂໍໃຫ້ເຮົາຢ່າເປັນຄົນແບບນັ້ນເດີ້!
7. ພະເຢໂຫວາຢາກໃຫ້ເຮົາເຮັດຫຍັງ ແລະຍ້ອນຫຍັງ?
7 ພໍ່ແມ່ບໍ່ຢາກໃຫ້ລູກຜິດກັນແຕ່ຢາກໃຫ້ລູກຮັກກັນ. ຄ້າຍກັນ ພະເຢໂຫວາກໍຢາກໃຫ້ລູກຂອງພະອົງທຸກຄົນຮັກກັນແລະກັນ. ທີ່ຈິງຄວາມຮັກທີ່ເຮົາມີຕໍ່ກັນສະແດງໃຫ້ເຫັນວ່າເຮົາເປັນຄລິດສະຕຽນແທ້. (ຢຮ. 13:35) ເຮົາເຫັນດີກັບຜູ້ຂຽນຄຳເພງທີ່ບອກວ່າ: “ເມື່ອພີ່ນ້ອງທັງຫຼາຍຕັ້ງຢູ່ນຳກັນ ຕິດພັນຢູ່ນຳກັນເປັນການດີການຊອບໃຈຫຼາຍແທ້ໆ.” (ເພງ. 133:1) ເມື່ອເຮົາຮັກພີ່ນ້ອງ ເຮົາກໍພິສູດວ່າເຮົາຮັກພະເຢໂຫວາ. (1 ຢຮ. 4:20) ເຮົາຮູ້ສຶກອົບອຸ່ນໃຈແທ້ໆທີ່ໄດ້ຢູ່ໃນຄອບຄົວທີ່ “ກະລຸນາຕໍ່ກັນ ເຫັນອົກເຫັນໃຈກັນ”!—ອຟຊ. 4:32
ສະແດງຄວາມຮັກໂດຍການເຊື່ອຟັງ
ເບິ່ງຂໍ້ 8
8. ຕາມ 1 ໂຢຮັນ 5:3 ອັນໃດເປັນເຫດຜົນສຳຄັນທີ່ສຸດທີ່ເຮົາເຊື່ອຟັງພະເຢໂຫວາ?
8 ພະເຢໂຫວາຄາດໝາຍໃຫ້ລູກເຊື່ອຟັງພໍ່ແມ່ແລະພະອົງກໍຄາດໝາຍໃຫ້ເຮົາເຊື່ອຟັງພະອົງຄືກັນ. (ອຟຊ. 6:1) ເຮົາຄວນເຊື່ອຟັງພະອົງຍ້ອນພະອົງເປັນຜູ້ສ້າງເປັນຜູ້ໃຫ້ຊີວິດເຮົາແລະພະອົງກໍເປັນພໍ່ທີ່ສະຫຼາດຫຼາຍກວ່າພໍ່ທີ່ເປັນມະນຸດທຸກຄົນ. ແຕ່ເຫດຜົນສຳຄັນທີ່ສຸດທີ່ເຮົາຄວນເຊື່ອຟັງພະອົງກໍຄື ເຮົາຮັກພະອົງ. (ອ່ານ 1 ໂຢຮັນ 5:3) ເຖິງວ່າຈະມີຫຼາຍເຫດຜົນທີ່ເຮົາຄວນເຊື່ອຟັງພະເຢໂຫວາ ແຕ່ພະອົງກໍບໍ່ໄດ້ບັງຄັບເຮົາ. ພະເຢໂຫວາໃຫ້ເຮົາມີອິດສະຫຼະທີ່ຈະເລືອກ ດັ່ງນັ້ນ ພະອົງມີຄວາມສຸກຫຼາຍເມື່ອເຮົາເຊື່ອຟັງຍ້ອນວ່າຮັກພະອົງ.
9-10. ເປັນຫຍັງຈຶ່ງສຳຄັນທີ່ເຮົາຕ້ອງຮູ້ແລະເຮັດຕາມການຊີ້ນຳຂອງພະເຈົ້າ?
9 ພໍ່ແມ່ຢາກໃຫ້ລູກປອດໄພ ນີ້ເປັນເຫດຜົນທີ່ພວກເຂົາຕັ້ງກົດເພື່ອປົກປ້ອງລູກ. ເມື່ອລູກເຊື່ອຟັງກໍສະແດງວ່າລູກໄວ້ໃຈແລະນັບຖືພໍ່ແມ່. ດັ່ງນັ້ນກໍແຮ່ງເປັນເລື່ອງສຳຄັນຫຼາຍທີ່ເຮົາຈະຮູ້ແລະເຮັດຕາມການຊີ້ນຳຂອງພະເຢໂຫວາພໍ່ໃນສະຫວັນ. ເມື່ອເຮົາເຮັດແບບນັ້ນ ເຮົາກໍສະແດງໃຫ້ພະເຢໂຫວາເຫັນວ່າເຮົາຮັກແລະນັບຖືພະອົງ ແລະນັ້ນຍັງເປັນປະໂຫຍດຕໍ່ເຮົານຳອີກ. (ເອຊາ. 48:17, 18) ແຕ່ຄົນທີ່ປະຕິເສດພະເຢໂຫວາແລະບໍ່ເຮັດຕາມການຊີ້ນຳຂອງພະອົງກໍຈະໄດ້ຮັບຜົນເສຍຫາຍ.—ຄລຕ. 6:7, 8
10 ເມື່ອເຮົາໃຊ້ຊີວິດໃນແບບທີ່ພະເຢໂຫວາພໍໃຈ ເຮົາກໍຈະໄດ້ຮັບການປົກປ້ອງຈາກຫຼາຍສິ່ງທີ່ຈະກໍ່ຜົນເສຍຫາຍຕໍ່ຮ່າງກາຍ ຈິດໃຈ ແລະສາຍສຳພັນຂອງເຮົາກັບພະເຢໂຫວາ. ພະເຢໂຫວາຮູ້ວ່າສິ່ງໃດດີທີ່ສຸດສຳລັບເຮົາ. ອາຣໍຣະເຊິ່ງຢູ່ສະຫະລັດອາເມຣິກາບອກວ່າ “ຂ້ອຍຮູ້ວ່າການເຊື່ອຟັງພະເຢໂຫວາຈະເຮັດໃຫ້ມີຊີວິດທີ່ດີທີ່ສຸດ.” ເລື່ອງນີ້ເປັນຈິງກັບເຮົາທຸກຄົນ. ແລ້ວເຈົ້າເດ ເຈົ້າໄດ້ຮັບປະໂຫຍດແນວໃດຈາກຄຳແນະນຳທີ່ມາຈາກຄວາມຮັກຂອງພະເຢໂຫວາ?
11. ການອະທິດຖານຊ່ວຍເຮົາແນວໃດ?
11 ການອະທິດຖານຊ່ວຍເຮົາໃຫ້ເຊື່ອຟັງພະເຢໂຫວາເຖິງວ່າຈະຍາກລຳບາກ. ບາງເທື່ອເຮົາອາດຮູ້ສຶກວ່າຍາກທີ່ຈະເຊື່ອຟັງພະອົງ ແຕ່ເຮົາຕ້ອງຕໍ່ສູ້ຕໍ່ໆໄປກັບທ່າອ່ຽງທີ່ຈະເຮັດບາບ. ຜູ້ຂຽນຄຳເພງອ້ອນວອນພະເຈົ້າວ່າ: “ຂໍຊ່ວຍຂ້ອຍໃຫ້ເຕັມໃຈເຊື່ອຟັງພະອົງ.” (ເພງ. 51:12, ລ.ມ.) ເດັນນີດສ໌ເຊິ່ງເປັນໄພໂອເນຍປະຈຳບອກວ່າ: “ເມື່ອໃດທີ່ຂ້ອຍຮູ້ສຶກວ່າຍາກທີ່ຈະເຮັດຕາມຄຳແນະນຳບາງຢ່າງຂອງພະເຢໂຫວາ ຂ້ອຍຈະອະທິດຖານຂໍກຳລັງເພື່ອເຮັດສິ່ງທີ່ຖືກຕ້ອງ.” ເຮົາສາມາດໝັ້ນໃຈໄດ້ວ່າ ພະເຢໂຫວາຈະຕອບຄຳອະທິດຖານແບບນີ້ສະເໝີ.—ລກ. 11:9-13
ຊ່ວຍຄົນອື່ນໃຫ້ຮັກພະເຢໂຫວາພໍ່ຂອງເຮົາ
12. ຕາມເອເຟໂຊ 5:1 ເຮົາຄວນເຮັດຫຍັງ?
12 ອ່ານເອເຟໂຊ 5:1. ເນື່ອງຈາກເຮົາເປັນ “ລູກທີ່ຮັກ” ຂອງພະເຢໂຫວາ ເຮົາຈຶ່ງຢາກຮຽນແບບພະອົງໃຫ້ຫຼາຍທີ່ສຸດ. ເຮົາຮຽນແບບຄຸນລັກສະນະຕ່າງໆຂອງພະອົງເຊັ່ນ: ຄວາມຮັກ ຄວາມກະລຸນາ ແລະການໃຫ້ອະໄພຄົນອື່ນ. ເມື່ອຄົນທີ່ບໍ່ຮູ້ຈັກພະເຈົ້າເຫັນການປະພຶດທີ່ດີຂອງເຮົາ ພວກເຂົາອາດຢາກຮຽນຮູ້ເລື່ອງພະເຢໂຫວາຫຼາຍຂຶ້ນ. (1 ປຕ. 2:12) ພໍ່ແມ່ທີ່ເປັນຄລິດສະຕຽນຄວນພະຍາຍາມຮຽນແບບພະເຢໂຫວາເມື່ອປະຕິບັດກັບລູກ. ເພາະການເຮັດແບບນັ້ນອາດເຮັດໃຫ້ລູກຢາກສະໜິດກັບພະເຢໂຫວາພໍ່ໃນສະຫວັນຄືກັນ.
ເບິ່ງຂໍ້ 13
13. ເຮົາຕ້ອງເຮັດຫຍັງເພື່ອຈະກ້າຫານ?
13 ຄືກັບລູກທີ່ພູມໃຈໃນໂຕພໍ່ແລະມີຄວາມສຸກທີ່ໄດ້ເວົ້າເລື່ອງພໍ່ໃຫ້ຄົນອື່ນຟັງ ເຮົາກໍພູມໃຈໃນພະເຢໂຫວາພໍ່ຂອງເຮົາແລະຢາກໃຫ້ຄົນອື່ນຮູ້ເລື່ອງຂອງພະອົງຄືກັນ. ເຮົາຮູ້ສຶກຄືກັບກະສັດດາວິດທີ່ຂຽນວ່າ: ‘ຂ້ານ້ອຍຈະອວດເລື່ອງພະເຢໂຫວາ.’ (ເພງ. 34:2) ແຕ່ຖ້າເຮົາເປັນຄົນຂີ້ອາຍ ເຮົາຈະກ້າຫານໄດ້ແນວໃດ? ເຮົາຈະກ້າຫານຫຼາຍຂຶ້ນຖ້າເຮົາເບິ່ງວ່າພະເຢໂຫວາຈະມີຄວາມສຸກຫຼາຍສ່ຳໃດແລະຄົນອື່ນຈະໄດ້ຮັບປະໂຫຍດຫຼາຍສ່ຳໃດທີ່ໄດ້ຮຽນຮູ້ເລື່ອງຂອງພະອົງ. ພະເຢໂຫວາຈະໃຫ້ເຮົາມີຄວາມກ້າທີ່ຈຳເປັນຕ້ອງມີ. ພະອົງເຄີຍຊ່ວຍພີ່ນ້ອງໃນສະຕະວັດທຳອິດໃຫ້ມີຄວາມກ້າມາແລ້ວ ພະອົງກໍຈະຊ່ວຍເຮົາຄືກັນ.—1 ທຊ. 2:2
14. ການປະກາດສຳຄັນແນວໃດ?
14 ພະເຢໂຫວາບໍ່ລຳອຽງ ແລະພະອົງມີຄວາມສຸກທີ່ເຫັນເຮົາສະແດງຄວາມຮັກຕໍ່ທຸກຄົນບໍ່ວ່າພວກເຂົາຈະມາຈາກໃສກໍຕາມ. (ກຈກ. 10:34, 35) ວິທີໜຶ່ງທີ່ສຳຄັນທີ່ເຮົາຈະສະແດງຄວາມຮັກຕໍ່ຄົນອື່ນກໍຄືປະກາດຂ່າວດີໃຫ້ພວກເຂົາຟັງ. (ມທ. 28:19, 20) ການປະກາດຂ່າວດີມີຜົນແນວໃດ? ຄົນທີ່ຟັງເຮົາສາມາດປັບປຸງຊີວິດໃຫ້ດີຂຶ້ນໃນຕອນນີ້ແລະມີຄວາມຫວັງທີ່ຈະມີຊີວິດຕະຫຼອດໄປໃນອະນາຄົດ.—1 ຕມ. 4:16
ຮັກພະເຢໂຫວາພໍ່ຂອງເຮົາແລະມີຄວາມສຸກ
15-16. ສິ່ງໃດເຮັດໃຫ້ເຈົ້າມີຄວາມສຸກ?
15 ພະເຢໂຫວາເປັນພໍ່ທີ່ຮັກລູກ ພະອົງຢາກໃຫ້ຄອບຄົວມີຄວາມສຸກ. (ເອຊາ. 65:14) ມີຫຼາຍເຫດຜົນທີ່ເຮັດໃຫ້ເຮົາມີຄວາມສຸກໃນຕອນນີ້ເຖິງວ່າເຮົາຈະປະສົບບັນຫາຫຼາຍຢ່າງ. ຕົວຢ່າງ: ເຮົາໝັ້ນໃຈໄດ້ວ່າພະເຢໂຫວາພໍ່ໃນສະຫວັນຮັກເຮົາຫຼາຍແທ້ໆ ແລະເຮົາມີຄວາມຮູ້ທີ່ຖືກຕ້ອງກ່ຽວກັບຄຳພີໄບເບິນ. (ຢເຣ. 15:16) ນອກຈາກນັ້ນ ເຮົາຍັງໄດ້ຢູ່ໃນຄອບຄົວທີ່ພິເສດເຊິ່ງມີແຕ່ຄົນທີ່ຮັກພະເຢໂຫວາ ຮັກມາດຕະຖານດ້ານສິນລະທຳຂອງພະອົງ ແລະຮັກກັນແລະກັນ.—ເພງ. 106:4, 5
16 ເຮົາສາມາດມີຄວາມສຸກສະເໝີເພາະເຮົາໝັ້ນໃຈວ່າຊີວິດໃນອະນາຄົດຈະດີຂຶ້ນ. ເຮົາຮູ້ວ່າອີກບໍ່ດົນພະເຢໂຫວາຈະທຳລາຍຄວາມຊົ່ວທັງໝົດ ແລະການປົກຄອງຂອງພະເຈົ້າຈະເຮັດໃຫ້ໂລກນີ້ເປັນສວນອຸທິຍານອີກເທື່ອໜຶ່ງ. ເຮົາຍັງມີຄວາມຫວັງທີ່ດີເລີດອີກວ່າຄົນທີ່ຕາຍແລ້ວຈະຄືນມາຈາກຕາຍແລະຈະມີຊີວິດຢູ່ກັບເຮົາອີກ. (ຢຮ. 5:28, 29) ເຮົາຄືຊິມີຄວາມສຸກຫຼາຍໃນຕອນນັ້ນ ແລະສຳຄັນທີ່ສຸດ ເຮົາໝັ້ນໃຈວ່າອີກບໍ່ດົນທຸກຄົນທີ່ຢູ່ໃນສະຫວັນແລະຢູ່ເທິງໂລກຈະໃຫ້ກຽດ ຍົກຍ້ອງສັນລະເສີນ ແລະນະມັດສະການພະເຢໂຫວາພໍ່ຂອງເຮົາໃນສະຫວັນຕາມທີ່ພະອົງສົມຄວນໄດ້ຮັບ.
ເພງ 12 ພະເຢໂຫວາພະເຈົ້າອົງຍິ່ງໃຫຍ່
a ເຮົາຮູ້ວ່າພະເຢໂຫວາພໍ່ຂອງເຮົາຮັກເຮົາຫຼາຍແທ້ໆແລະເຮັດໃຫ້ເຮົາເຂົ້າມາເປັນສ່ວນໜຶ່ງຂອງຄອບຄົວພະອົງ. ຍ້ອນແນວນີ້ ເຮົາຈຶ່ງຮັກພະອົງ. ແລ້ວເຮົາຈະສະແດງຄວາມຮັກຕໍ່ພະເຢໂຫວາພໍ່ຂອງເຮົາໄດ້ແນວໃດ? ບົດຄວາມນີ້ຈະພິຈາລະນາບາງສິ່ງທີ່ເຮົາເຮັດໄດ້ເພື່ອສະແດງຄວາມຮັກຕໍ່ພະອົງ.