ບົດຄວາມສຶກສາທີ 34
ເຮົາຕ້ອງເຮັດແນວໃດເພື່ອຈະ “ຊີມແລະເຫັນ” ວ່າພະເຢໂຫວາດີ?
“ຈົ່ງຊີມແລະເຫັນວ່າພະເຢໂຫວາດີ. ຄົນທີ່ປົງໃຈໃນພະອົງກໍເປັນສຸກຫຼາຍ.”—ເພງ. 34:8
ເພງ 117 ປູກຝັງຄວາມດີແບບພະເຈົ້າ
ໃຈຄວາມສຳຄັນa
1-2. ຕາມຄຳເພງ 34:8 ເຮົາຕ້ອງເຮັດຫຍັງເພື່ອຈະຮູ້ວ່າພະເຢໂຫວາດີ?
ໃຫ້ນຶກພາບວ່າ ເຈົ້າກຳລັງຈະຊີມອາຫານທີ່ບໍ່ເຄີຍກິນມາກ່ອນ. ເຈົ້າອາດຈະຢາກຮູ້ວ່າ ອາຫານນັ້ນໜ້າຕາເປັນແນວໃດ ມີກິ່ນແບບໃດ ມີສ່ວນປະສົມຫຍັງແດ່ ຫຼືເຈົ້າອາດຈະຖາມຄົນທີ່ມັກກິນອາຫານນັ້ນວ່າມັນແຊບບໍ? ແຕ່ຖ້າເຈົ້າຢາກຮູ້ວ່າອາຫານນັ້ນມີລົດຊາດແນວໃດເຈົ້າກໍຕ້ອງຊີມເອົາເອງ.
2 ເມື່ອເຮົາອ່ານຄຳພີໄບເບິນແລະປຶ້ມຕ່າງໆຂອງອົງການລວມທັງຟັງປະສົບການຂອງຄົນອື່ນທີ່ເວົ້າກ່ຽວກັບສິ່ງດີໆທີ່ເຂົາເຈົ້າໄດ້ຮັບຈາກພະເຢໂຫວາ ເຮົາກໍໄດ້ຮູ້ວ່າພະເຢໂຫວາດີ. ແຕ່ເພື່ອເຮົາຈະຮູ້ວ່າພະເຢໂຫວາດີສ່ຳໃດ ເຮົາກໍຕ້ອງ “ຊີມ” ດ້ວຍຕົວເອງ. (ອ່ານຄຳເພງ 34:8) ໃຫ້ເຮົາມາເບິ່ງສິ່ງໜຶ່ງທີ່ເຮົາເຮັດໄດ້ເພື່ອຈະຮູ້ວ່າພະເຢໂຫວາດີ. ສົມມຸດວ່າເຮົາຢາກຮັບໃຊ້ພະເຢໂຫວາເຕັມເວລາ ແຕ່ເພື່ອຈະເຮັດແບບນັ້ນໄດ້ເຮົາກໍຕ້ອງໃຊ້ຊີວິດແບບຮຽບງ່າຍ. ເຮົາອາດຈະອ່ານຄຳສັນຍາຂອງພະເຢຊູຫຼາຍເທື່ອທີ່ບອກວ່າ ຖ້າເຮົາໃຫ້ການປົກຄອງຂອງພະເຈົ້າເປັນສິ່ງສຳຄັນທີ່ສຸດໃນຊີວິດ ພະເຢໂຫວາກໍຈະໃຫ້ສິ່ງຈຳເປັນກັບເຮົາ. ແຕ່ເຮົາອາດຈະບໍ່ເຄີຍເຈິເລື່ອງນີ້ດ້ວຍຕົວເອງ. (ມທ. 6:33) ແຕ່ຍ້ອນເຮົາເຊື່ອໃນຄຳສັນຍາຂອງພະເຢຊູ ເຮົາຈຶ່ງພະຍາຍາມໃຊ້ຈ່າຍໜ້ອຍລົງແລະປັບປ່ຽນວຽກອາຊີບເພື່ອຈະມີເວລາປະກາດຫຼາຍຂຶ້ນ. ເມື່ອເຮົາເຮັດແບບນີ້ ເຮົາກໍຈະເຫັນວ່າພະເຢໂຫວາເບິ່ງແຍງເຮົາໃຫ້ມີສິ່ງຈຳເປັນແທ້ໆ ແລະເຮົາກໍຈະໄດ້ “ຊີມ” ດ້ວຍຕົວເອງວ່າພະເຢໂຫວາດີ.
3. ຕາມຄຳເພງ 31:19 ມີໃຜແດ່ທີ່ໄດ້ຮັບສິ່ງດີໆຈາກພະເຢໂຫວາ?
3 ພະເຢໂຫວາ ‘ດີຕໍ່ທຸກຄົນ’ ແມ່ນແຕ່ຄົນທີ່ບໍ່ຮູ້ຈັກເພິ່ນ. (ເພງ. 145:9, ລ.ມ.; ມທ. 5:45) ແຕ່ເພິ່ນຈະໃຫ້ສິ່ງດີໆເປັນພິເສດກັບຜູ້ທີ່ຮັກແລະຮັບໃຊ້ເພິ່ນສຸດຫົວໃຈ. (ອ່ານຄຳເພງ 31:19) ໃຫ້ເຮົາມາເບິ່ງວ່າພະເຢໂຫວາໄດ້ໃຫ້ສິ່ງດີໆຫຍັງແດ່ກັບເຮົາ.
4. ພະເຢໂຫວາໃຫ້ສິ່ງດີໆຫຍັງແດ່ກັບຜູ້ທີ່ຢາກໃກ້ຊິດກັບເພິ່ນ?
4 ທຸກເທື່ອທີ່ເຮົາໃຊ້ຫຼັກການຂອງພະເຢໂຫວາ ເຮົາກໍຈະເຫັນຜົນດີໃນຊີວິດ. ຕົວຢ່າງເຊັ່ນ: ເມື່ອເຮົາໄດ້ມາຮູ້ຈັກແລະຮັກພະເຢໂຫວາ ເພິ່ນກໍຊ່ວຍເຮົາໃຫ້ປ່ຽນແປງຄວາມຄິດທີ່ບໍ່ດີແລະເຊົາເຮັດສິ່ງທີ່ເພິ່ນບໍ່ມັກ. (ກລຊ. 1:21) ແລະເມື່ອເຮົາອຸທິດຕົວໃຫ້ພະເຢໂຫວາແລະຮັບບັບເຕມາ ເພິ່ນກໍແຮ່ງຈະໃຫ້ສິ່ງດີໆກັບເຮົາໂດຍຊ່ວຍເຮົາບໍ່ໃຫ້ຮູ້ສຶກຜິດກັບສິ່ງທີ່ເຄີຍເຮັດແລະໃກ້ຊິດກັບເພິ່ນຫຼາຍຂຶ້ນ.—1 ປຕ. 3:21
5. ເມື່ອເຮົາເຮັດວຽກປະກາດ ເຮົາໄດ້ເຫັນສິ່ງດີໆຫຍັງແດ່ຈາກພະເຢໂຫວາ?
5 ເຮົາຍັງຈະໄດ້ເຫັນສິ່ງດີໆຈາກພະເຢໂຫວາເມື່ອເຮົາເຮັດວຽກປະກາດ. ເຈົ້າເປັນຄົນຂີ້ອາຍບໍ? ພະຍານພະເຢໂຫວາຫຼາຍຄົນກໍເປັນແບບນັ້ນ. ກ່ອນທີ່ເຈົ້າຈະເຂົ້າມາເປັນພະຍານພະເຢໂຫວາ ເຈົ້າອາດຈະບໍ່ເຄີຍຄິດວ່າເຈົ້າຈະໄດ້ໄປປະກາດຕາມບ້ານແລະລົມເລື່ອງຄຳພີໄບເບິນກັບຄົນທີ່ເຈົ້າບໍ່ຮູ້ຈັກ. ແຕ່ຕອນນີ້ເຈົ້າກໍໄດ້ເຮັດແບບນັ້ນເປັນປະຈຳ. ແລະຍ້ອນພະເຢໂຫວາຊ່ວຍເຮົາ ເຮົາຈຶ່ງມີຄວາມສຸກໃນວຽກປະກາດ. ພະເຢໂຫວາຊ່ວຍເຮົາໃນຫຼາຍໆດ້ານ ເຊັ່ນ: ເພິ່ນຊ່ວຍເຮົາໃຫ້ໃຈເຢັນໆເມື່ອມີຄົນຕໍ່ຕ້ານເຮົາ ເພິ່ນຊ່ວຍເຮົາໃຫ້ຈື່ຂໍ້ພະຄຳພີເພື່ອຈະໃຊ້ລົມກັບຜູ້ທີ່ສົນໃຈ ແລະເພິ່ນຍັງຊ່ວຍເຮົາໃຫ້ອົດທົນທີ່ຈະປະກາດຕໍ່ໆໄປເຖິງວ່າຄົນໃນເຂດຈະບໍ່ສົນໃຈ.—ຢເຣ. 20:7-9
6. ການຝຶກອົບຮົມທີ່ເຮົາໄດ້ຮັບສະແດງເຖິງຄວາມດີຂອງພະເຢໂຫວາແນວໃດ?
6 ພະເຢໂຫວາຍັງສະແດງຄວາມດີຕໍ່ເຮົາໂດຍຝຶກເຮົາໃນວຽກປະກາດ. (ຢຮ. 6:45) ໃນການປະຊຸມກາງອາທິດ ເຮົາໄດ້ເຫັນການສາທິດທີ່ດີຂອງພີ່ນ້ອງແລະເຮົາກໍສາມາດເອົາວິທີນັ້ນມາໃຊ້ໃນວຽກປະກາດ. ທຳອິດເຮົາອາດຈະບໍ່ກ້າລອງໃຊ້ວິທີປະກາດແບບໃໝ່ ແຕ່ເມື່ອເຮົາເຮັດເຮົາກໍອາດຈະເຫັນວ່າມັນເກີດຜົນດີແທ້ໆ. ໃນການປະຊຸມໃຫຍ່ຕ່າງໆເຮົາຍັງຈະໄດ້ເຫັນວິທີການປະກາດແບບໃໝ່ທີ່ເຮົາບໍ່ເຄີຍເຮັດມາກ່ອນ ແລະເຮົາອາດຈະບໍ່ກ້າເຮັດຕາມວິທີນັ້ນ. ແຕ່ຖ້າເຮົາເຮັດ ພະເຢໂຫວາກໍຈະອວຍພອນເຮົາ. ໃຫ້ເຮົາມາເບິ່ງວ່າ ເຮົາຈະໄດ້ຮັບສິ່ງດີໆຫຍັງແດ່ເມື່ອເຮົາວາງໃຈພະເຢໂຫວາແລະພະຍາຍາມປະກາດຫຼາຍວິທີ ບໍ່ວ່າສະພາບການຂອງເຮົາຈະເປັນແນວໃດກໍຕາມ. ແລະເຮົາຍັງຈະເບິ່ງວ່າ ເຮົາຈະຮັບໃຊ້ພະເຢໂຫວາຫຼາຍຂຶ້ນໄດ້ແນວໃດ.
ພະເຢໂຫວາໃຫ້ສິ່ງດີໆກັບຜູ້ທີ່ໄວ້ວາງໃຈເພິ່ນ
7. ຖ້າເຮົາພະຍາຍາມຮັບໃຊ້ພະເຢໂຫວາຫຼາຍຂຶ້ນ ເຮົາຈະໄດ້ຮັບສິ່ງດີໆຫຍັງແດ່?
7 ເຮົາຈະໃກ້ຊິດພະເຢໂຫວາຫຼາຍຂຶ້ນ. ໃຫ້ເຮົາມາເບິ່ງເລື່ອງຂອງຜູ້ດູແລຄົນໜຶ່ງທີ່ຊື່ຊາມູເອນb ເຊິ່ງລາວກັບເມຍຮັບໃຊ້ຢູ່ໂກລົມບີ. ເຂົາເຈົ້າມີຄວາມສຸກທີ່ໄດ້ເປັນໄພໂອເນຍຢູ່ໃນປະຊາຄົມເກົ່າ ແຕ່ເຂົາເຈົ້າຢາກເຮັດວຽກຮັບໃຊ້ຫຼາຍຂຶ້ນໂດຍໄປຊ່ວຍໃນປະຊາຄົມທີ່ມີຄວາມຈຳເປັນຫຼາຍກວ່າ. ແຕ່ເພື່ອຈະເຮັດແບບນັ້ນໄດ້ ເຂົາເຈົ້າຕ້ອງເສຍສະລະບາງຢ່າງ. ຊາມູເອນເວົ້າວ່າ: “ພວກເຮົາເຮັດຕາມຫຼັກການໃນມັດທາຍ 6:33 ແລະເຊົາຊື້ສິ່ງທີ່ບໍ່ຈຳເປັນ. ແຕ່ສິ່ງທີ່ຍາກທີ່ສຸດແມ່ນການອອກຈາກອາພາດເມັນທີ່ເຮົາມັກ ເພາະເຮົາເປັນເຈົ້າຂອງອາພາດເມັນນີ້.” ເມື່ອຍ້າຍມາປະຊາຄົມໃໝ່ ເຂົາເຈົ້າກໍສາມາດຢູ່ໄດ້ເຖິງວ່າຈະມີລາຍໄດ້ພຽງແຕ່ 1 ສ່ວນ 6 ຂອງລາຍໄດ້ທີ່ເຄີຍໄດ້ຮັບ. ຊາມູເອນເວົ້າວ່າ: “ເຮົາໄດ້ເຫັນວິທີທີ່ພະເຢໂຫວາຊີ້ນຳເຮົາແລະຕອບຄຳອະທິດຖານຂອງເຮົາ. ເຮົາຮູ້ສຶກວ່າພະເຢໂຫວາຮັກເຮົາ ພໍໃຈເຮົາແລະຊ່ວຍເຫຼືອເຮົາໃນແບບທີ່ບໍ່ເຄີຍເຫັນມາກ່ອນ.” ເຈົ້າຈະຮັບໃຊ້ພະເຢໂຫວາຫຼາຍຂຶ້ນໄດ້ບໍ? ຖ້າເຈົ້າເຮັດແບບນັ້ນ ເຈົ້າກໍໝັ້ນໃຈໄດ້ວ່າ ເຈົ້າຈະໃກ້ຊິດກັບພະເຢໂຫວາຫຼາຍຂຶ້ນ ແລະເພິ່ນກໍຈະເບິ່ງແຍງເຈົ້າ.—ເພງ. 18:25
8. ເຮົາໄດ້ບົດຮຽນຫຍັງຈາກເລື່ອງຂອງອີວານແລະວິກຕໍເຣຍ?
8 ເຮົາຈະມີຄວາມສຸກໃນວຽກຮັບໃຊ້. ໃຫ້ເຮົາມາເບິ່ງເລື່ອງຂອງຄູ່ຜົວເມຍໜຶ່ງທີ່ຊື່ອີວານແລະວິກຕໍເຣຍເຊິ່ງເປັນໄພໂອເນຍຢູ່ກຽກກີດສະຖານ. ເຂົາເຈົ້າໃຊ້ຊີວິດແບບພໍພຽງເພື່ອຈະເປັນອາສາສະໝັກຊ່ວຍວຽກຮັບໃຊ້ຮູບແບບອື່ນເຊິ່ງລວມເຖິງຊ່ວຍໃນວຽກໂຄງການກໍ່ສ້າງ. ອີວານເວົ້າວ່າ: “ພວກເຮົາເຮັດວຽກມອບໝາຍທຸກຢ່າງສຸດຄວາມສາມາດ. ເຖິງວ່າເຮົາຈະເມື່ອຍຫຼາຍເມື່ອເຮັດວຽກມາໝົດມື້ ແຕ່ເຮົາກໍມີຄວາມສຸກທີ່ໄດ້ຮູ້ວ່າເຮົາເຮັດວຽກຮັບໃຊ້ພະເຢໂຫວາສຸດກຳລັງຂອງເຮົາ ແລະເຮົາຍັງມີຄວາມສຸກທີ່ໄດ້ໝູ່ໃໝ່ຫຼາຍຄົນແລະໄດ້ປະສົບການທີ່ດີນຳອີກ.”—ມຣກ. 10:29, 30
9. ພີ່ນ້ອງຍິງຄົນໜຶ່ງທີ່ມີບັນຫາໄດ້ເຮັດແນວໃດເພື່ອຈະປະກາດຫຼາຍຂຶ້ນ ແລະຜົນເປັນແນວໃດ?
9 ເຖິງວ່າເຮົາຈະມີບັນຫາ ແຕ່ເຮົາກໍມີຄວາມສຸກທີ່ໄດ້ເຮັດວຽກຮັບໃຊ້ພະເຢໂຫວາ. ໃຫ້ເຮົາມາເບິ່ງເລື່ອງຂອງມີຣາທີ່ເປັນແມ່ໝ້າຍອາຍຸຫຼາຍແລ້ວທີ່ຢູ່ທາງພາກຕາເວັນຕົກຂອງອາຝຼິກກາ. ລາວເຮັດວຽກເປັນທ່ານໝໍ ແຕ່ເມື່ອລາວອາຍຸກະສຽນແລ້ວລາວກໍເລີ່ມເປັນໄພໂອເນຍ. ມີຣາມີບັນຫາເລື່ອງຂໍ້ອັກເສບຂັ້ນຮຸນແຮງ ແລະຍ່າງໄປປະກາດຕາມບ້ານໄດ້ແຕ່ມື້ລະຊົ່ວໂມງ ແຕ່ລາວກໍປະກາດໄດ້ຫຼາຍຂຶ້ນໂດຍການປະກາດສາທາລະນະ. ລາວມີລາຍຢ້ຽມແລະນັກສຶກສາຫຼາຍຄົນ ແລະບາງຄົນກໍໄດ້ຈາກການປະກາດທາງໂທລະສັບ. ເປັນຫຍັງມີຣາຈຶ່ງຢາກຮັບໃຊ້ພະເຢໂຫວາຫຼາຍຂຶ້ນ? ລາວບອກວ່າ: “ຂ້ອຍຮັກພະເຢໂຫວາແລະພະເຢຊູຄລິດຫຼາຍແທ້ໆ. ຂ້ອຍອະທິດຖານເລື້ອຍໆວ່າຂໍພະເຢໂຫວາຊ່ວຍຂ້ອຍໃຫ້ເຮັດວຽກຮັບໃຊ້ເພິ່ນໃຫ້ຫຼາຍເທົ່າທີ່ຂ້ອຍເຮັດໄດ້.”—ມທ. 22:36, 37
10. ຕາມ 1 ເປໂຕ 5:10 ຜູ້ທີ່ພະຍາຍາມຮັບໃຊ້ພະເຢໂຫວາຫຼາຍຂຶ້ນໄດ້ຮັບຫຍັງຈາກເພິ່ນ?
10 ເຮົາໄດ້ຮັບການຝຶກຈາກພະເຢໂຫວາ. ເຄັນນີທີ່ເປັນໄພໂອເນຍຢູ່ເກາະໂມຣິດໄດ້ຮັບການຝຶກຈາກພະເຢໂຫວາ. ເມື່ອລາວໄດ້ຮຽນຮູ້ຄວາມຈິງ ລາວກໍອອກຈາກມະຫາວິທະຍາໄລແລະຮັບບັບເຕມາ ຈາກນັ້ນ ກໍຮັບໃຊ້ເຕັມເວລາ. ລາວບອກວ່າ: “ຂ້ອຍພະຍາຍາມເຮັດຕາມຄຳເວົ້າຂອງຜູ້ພະຍາກອນເອຊາຢາທີ່ບອກວ່າ: ‘ຂ້ານ້ອຍຢູ່ທີ່ນີ້ ເຊີນພະອົງໃຊ້ຂ້ານ້ອຍໄປ.’” (ເອຊາ. 6:8) ເຄັນນີໄດ້ເຮັດວຽກຢູ່ໂຄງການກໍ່ສ້າງແລະຍັງໄດ້ຊ່ວຍແປປຶ້ມຕ່າງໆຂອງອົງການເປັນພາສາຂອງລາວເອງ. ລາວບອກວ່າ: “ການຝຶກອົບຮົມຊ່ວຍຂ້ອຍໃຫ້ມີຄວາມສາມາດທີ່ຈະເຮັດວຽກມອບໝາຍຕ່າງໆໄດ້ສຳເລັດ.” ລາວບໍ່ພຽງແຕ່ໄດ້ຮຽນຮູ້ວິທີການເຮັດວຽກເທົ່ານັ້ນ ລາວເວົ້າຕື່ມວ່າ: “ຂ້ອຍຍັງໄດ້ຮຽນຮູ້ວ່າຕົວເອງມີຂີດຈຳກັດຫຍັງແດ່ ແລະມີຄຸນລັກສະນະຫຍັງແດ່ທີ່ຂ້ອຍຕ້ອງພັດທະນາເພື່ອຈະເປັນຜູ້ຮັບໃຊ້ທີ່ດີຂອງພະເຢໂຫວາ.” (ອ່ານ 1 ເປໂຕ 5:10) ເຈົ້າກໍອາດຈະປັບສະພາບການຂອງຕົວເອງໄດ້ຄືກັນເພື່ອໃຫ້ໄດ້ຮັບການຝຶກຈາກພະເຢໂຫວາຫຼາຍຂຶ້ນ.
ພີ່ນ້ອງຜົວເມຍຄູ່ໜຶ່ງປະກາດໃນເຂດທີ່ຕ້ອງການຜູ້ປະກາດຫຼາຍກວ່າ. ພີ່ນ້ອງຍິງທີ່ຍັງໜຸ່ມຊ່ວຍວຽກໃນໂຄງການກໍ່ສ້າງຫໍປະຊຸມ. ພີ່ນ້ອງສູງອາຍຸຄູ່ໜຶ່ງປະກາດທາງໂທລະສັບ. ເຂົາເຈົ້າທຸກຄົນມີຄວາມສຸກຫຼາຍໃນການຮັບໃຊ້ພະເຢໂຫວາ. (ເບິ່ງຂໍ້ 11)
11. ພີ່ນ້ອງຍິງທີ່ສູງອາຍຸໃນເກົາຫຼີໃຕ້ໄດ້ພະຍາຍາມເຮັດຫຍັງເພື່ອຈະມີສ່ວນຮ່ວມໃນວຽກປະກາດ ແລະຜົນເປັນແນວໃດ? (ເບິ່ງຮູບໜ້າປົກ)
11 ເຖິງວ່າເຮົາຈະມີປະສົບການໃນການປະກາດ ແຕ່ເຮົາກໍຍັງຕ້ອງໄດ້ຮັບການຝຶກເມື່ອມີການປະກາດຮູບແບບໃໝ່. ໃນລະຫວ່າງທີ່ມີການລະບາດຂອງພະຍາດໂຄວິດ-19 ຜູ້ດູແລໃນເກົາຫຼີໃຕ້ເວົ້າວ່າ: “ພີ່ນ້ອງບາງຄົນຄິດວ່າ ເຂົາເຈົ້າບໍ່ສາມາດມີສ່ວນຮ່ວມໃນການປະກາດຍ້ອນບັນຫາສຸຂະພາບ ແຕ່ຕອນນີ້ເຂົາເຈົ້າສາມາດເຮັດໄດ້ໂດຍໃຊ້ວິດີໂອທາງໄກ. ພີ່ນ້ອງຍິງ 3 ຄົນທີ່ອາຍຸ 80 ປາຍປີໄດ້ຮຽນຮູ້ທີ່ຈະໃຊ້ຄອມພິວເຕີ ແລະຕອນນີ້ເຂົາເຈົ້າກໍເຂົ້າຮ່ວມວຽກປະກາດເກືອບທຸກມື້.” (ເພງ. 92:14, 15) ເຈົ້າຢາກຈະເຮັດວຽກຮັບໃຊ້ຫຼາຍຂຶ້ນບໍເພື່ອຈະຊີມເບິ່ງວ່າພະເຢໂຫວາດີສ່ຳໃດ? ໃຫ້ເຮົາມາເບິ່ງບາງສິ່ງທີ່ເຮົາເຮັດໄດ້ເພື່ອຈະຮັບໃຊ້ພະເຢໂຫວາຫຼາຍຂຶ້ນ.
ເຈົ້າຈະຮັບໃຊ້ພະເຢໂຫວາຫຼາຍຂຶ້ນໄດ້ແນວໃດ
12. ພະເຢໂຫວາໄດ້ສັນຍາຫຍັງກັບຜູ້ທີ່ໄວ້ວາງໃຈເພິ່ນ?
12 ໃຫ້ໝາຍເພິ່ງພະເຢໂຫວາ. ພະເຢໂຫວາສັນຍາວ່າຈະອວຍພອນເຮົາຖ້າເຮົາໄວ້ວາງໃຈເພິ່ນແລະໃຫ້ສິ່ງທີ່ດີທີ່ສຸດກັບເພິ່ນ. (ມລກີ. 3:10) ພີ່ນ້ອງຍິງຄົນໜຶ່ງຊື່ຟາບີໂອລາເຊິ່ງຢູ່ໂກລົມບີໄດ້ເຫັນວ່າຄຳສັນຍານີ້ເປັນຈິງກັບລາວແທ້ໆ. ລາວຢາກເປັນໄພໂອເນຍປະຈຳຫຼັງຈາກທີ່ຮັບບັບເຕມາແລ້ວ ແຕ່ລາວຕ້ອງເຮັດວຽກເພື່ອຊ່ວຍເຫຼືອຄອບຄົວ. ດັ່ງນັ້ນ ເມື່ອລາວກະສຽນອາຍຸ ລາວຈຶ່ງໄດ້ຂໍຄວາມຊ່ວຍເຫຼືອຈາກພະເຢໂຫວາ. ລາວບອກວ່າ: “ປົກກະຕິແລ້ວຕ້ອງໃຊ້ເວລາດົນຊົ່ວຊິໄດ້ເງິນບຳນານ ແຕ່ຂ້ອຍໃຊ້ເວລາພຽງແຕ່ໜຶ່ງເດືອນກໍໄດ້ຮັບເງິນບຳນານແລ້ວ. ມັນເປັນຄືກັບການອັດສະຈັນແທ້ໆ!” ສອງເດືອນຕໍ່ມາ ລາວໄດ້ເລີ່ມເປັນໄພໂອເນຍ. ຕອນນີ້ລາວອາຍຸ 70 ປາຍປີແລ້ວແລະລາວກໍເປັນໄພໂອເນຍຫຼາຍກວ່າ 20 ປີ. ລາວໄດ້ຊ່ວຍ 8 ຄົນໃຫ້ຮັບບັບເຕມາ. ລາວບອກວ່າ: “ເຖິງວ່າບາງເທື່ອຂ້ອຍຈະຮູ້ສຶກເມື່ອຍແລະທໍ້ໃຈ ແຕ່ພະເຢໂຫວາກໍຊ່ວຍຂ້ອຍທຸກມື້ເພື່ອໃຫ້ຂ້ອຍເປັນໄພໂອເນຍໄດ້ຕໍ່ໄປ.”
ອັບຣາຮາມ ຊາຣາ ຢາໂຄບ ແລະພວກປະໂລຫິດທີ່ຂ້າມແມ່ນ້ຳຈໍແດນສະແດງໃຫ້ເຫັນແນວໃດວ່າໄວ້ວາງໃຈພະເຢໂຫວາ? (ເບິ່ງຂໍ້ 13)
13-14. ມີເລື່ອງຂອງໃຜແດ່ທີ່ຊ່ວຍເຮົາໃຫ້ໄວ້ວາງໃຈພະເຢໂຫວາແລະຢາກເຮັດວຽກຮັບໃຊ້ຫຼາຍຂຶ້ນ?
13 ຮຽນຈາກເລື່ອງຂອງຄົນທີ່ໄວ້ວາງໃຈພະເຢໂຫວາ. ໃນຄຳພີໄບເບິນມີເລື່ອງຂອງຫຼາຍຄົນທີ່ໄວ້ວາງໃຈພະເຢໂຫວາ ແລະຫຼາຍເທື່ອເຮົາກໍເຫັນວ່າພະເຢໂຫວາໄດ້ອວຍພອນເຂົາເຈົ້າຫຼັງຈາກທີ່ເຂົາເຈົ້າໄດ້ເຮັດບາງສິ່ງທີ່ສະແດງວ່າໄວ້ວາງໃຈເພິ່ນ. ຕົວຢ່າງເຊັ່ນ: ພະເຢໂຫວາໄດ້ອວຍພອນອັບລາຮາມຫຼັງຈາກທີ່ລາວເຕັມໃຈອອກຈາກບ້ານ ‘ທັງໆທີ່ຍັງບໍ່ຮູ້ວ່າຈະໄປໃສ’ (ຮຣ. 11:8) ຢາໂຄບກໍຄືກັນ ຫຼັງຈາກທີ່ລາວປ້ຳສູ້ກັບທູດສະຫວັນແລ້ວລາວກໍໄດ້ຮັບພອນ. (ຕົ້ນ. 32:24-30) ແລະຊາວອິດສະຣາເອນກໍສາມາດເຂົ້າໄປໃນແຜ່ນດິນທີ່ພະເຈົ້າສັນຍາໄດ້ຫຼັງຈາກທີ່ພວກປະໂລຫິດຢຽບລົງໄປໃນແມ່ນ້ຳຈໍແດນ.—ຢຊວຍ. 3:14-16
14 ເຮົາຍັງຈະໄດ້ບົດຮຽນຈາກເລື່ອງຂອງຄົນໃນທຸກມື້ນີ້ທີ່ໄວ້ວາງໃຈພະເຢໂຫວາແລະຮັບໃຊ້ເພິ່ນຫຼາຍຂຶ້ນ. ຕົວຢ່າງເຊັ່ນ: ພີ່ນ້ອງຜົວເມຍຄູ່ໜຶ່ງທີ່ຊື່ເປຕັນແລະໄດອານາ ໄດ້ຮັບປະໂຫຍດຈາກການອ່ານປະສົບການຂອງພີ່ນ້ອງທີ່ຮັບໃຊ້ພະເຢໂຫວາຫຼາຍຂຶ້ນເຊິ່ງຢູ່ໃນບົດຄວາມທີ່ຊື່ວ່າ: “ພວກເຂົາເຕັມໃຈໄປຮັບໃຊ້.”c ເປຕັນບອກວ່າ: “ເມື່ອເຮົາອ່ານປະສົບການຂອງພີ່ນ້ອງ ເຮົາກໍຮູ້ສຶກຄືກັບວ່າກຳລັງເບິ່ງຄົນທີ່ກິນອາຫານທີ່ແຊບໆຢູ່. ແຮ່ງເຮົາເບິ່ງຫຼາຍເທົ່າໃດ ເຮົາກໍແຮ່ງຢາກຈະ ‘ລອງຊີມເພື່ອຈະຮູ້ວ່າພະເຢໂຫວາດີ.’” ໃນທີ່ສຸດ ເປຕັນກັບໄດອານາກໍໄດ້ຍ້າຍໄປຮັບໃຊ້ໃນເຂດທີ່ມີຄວາມຈຳເປັນຫຼາຍກວ່າ. ເຈົ້າເດ ໄດ້ອ່ານບົດຄວາມເຫຼົ່ານີ້ແລ້ວບໍ? ແລະເຈົ້າໄດ້ເບິ່ງວິດີໂອນີ້ແລ້ວບໍ ທີ່ຊື່ວ່າ: ການປະກາດໃນເຂດທີ່ຫ່າງໄກຂອງອົດສະຕຣາລີ (ພາສາໄທ) ແລະ ການປະກາດໃນເຂດທີ່ຫ່າງໄກຂອງອຽກລັງ (ພາສາໄທ) ທີ່ຢູ່ໃນເວັບໄຊ jw.org? ຂໍ້ມູນເຫຼົ່ານີ້ອາດຊ່ວຍເຈົ້າໃຫ້ຊອກຫາວິທີທີ່ຈະຮັບໃຊ້ພະເຢໂຫວາໃຫ້ຫຼາຍຂຶ້ນ.
15. ການຄົບຫາທີ່ດີຊ່ວຍເຮົາແນວໃດ?
15 ການຄົບຫາທີ່ດີ. ເຮົາຢາກຈະລອງກິນອາຫານແບບໃໝ່ຖ້າເຮົາຫຼິ້ນກັບໝູ່ທີ່ມັກກິນອາຫານນັ້ນ. ຄ້າຍຄືກັນ ຖ້າເຮົາຫຼິ້ນກັບໝູ່ຜູ້ທີ່ໃຫ້ການຮັບໃຊ້ພະເຢໂຫວາມາເປັນສິ່ງສຳຄັນທີ່ສຸດໃນຊີວິດ ເຮົາກໍຢາກຈະຮັບໃຊ້ພະເຢໂຫວາຫຼາຍຂຶ້ນ. ພີ່ນ້ອງຜົວເມຍຄູ່ໜຶ່ງທີ່ຊື່ເຄັນແລະເວໂຣນິກາກໍເຫັນວ່າເລື່ອງນີ້ເປັນຄວາມຈິງ. ເຄັນບອກວ່າ: “ຄອບຄົວແລະໝູ່ເພື່ອນກະຕຸ້ນໃຫ້ເຮົາລອງຮັບໃຊ້ຮູບແບບໃໝ່. ການຄົບຫາກັບຄົນທີ່ໃຫ້ການປົກຄອງຂອງພະເຢໂຫວາມາກ່ອນຊ່ວຍໃຫ້ເຮົາກ້າທີ່ຈະຮັບໃຊ້ຮູບແບບໃໝ່ຫຼາຍຂຶ້ນ.” ຕອນນີ້ເຄັນແລະເວໂຣນິກາຮັບໃຊ້ເປັນໄພໂອເນຍພິເສດຢູ່ເຊີເບຍ.
16. ຕົວຢ່າງປຽບທຽບຂອງພະເຢຊູທີ່ຢູ່ໃນລູກາ 12:16-21 ເປັນຫຍັງເຮົາຄວນເຕັມໃຈເສຍສະລະ?
16 ເສຍສະລະເພື່ອພະເຢໂຫວາ. ເຮົາບໍ່ຈຳເປັນຕ້ອງເສຍສະລະຄວາມສະດວກສະບາຍທຸກຢ່າງເພື່ອຈະເຮັດໃຫ້ພະເຢໂຫວາພໍໃຈ. (ຜູ້ປ. 5:19, 20) ແຕ່ຖ້າເຮົາຢາກຮັບໃຊ້ພະເຢໂຫວາຫຼາຍຂຶ້ນ ເຮົາກໍຕ້ອງເສຍສະລະໜ້ອຍໜຶ່ງແມ່ນບໍ ເພາະຖ້າເຮົາບໍ່ເສຍສະລະຫຍັງເລີຍ ເຮົາກໍຈະເປັນຄືກັບຜູ້ຊາຍທີ່ຢູ່ໃນຕົວຢ່າງປຽບທຽບຂອງພະເຢຊູທີ່ຄິດເຖິງແຕ່ຕົວເອງຈົນບໍ່ຄິດເຖິງພະເຈົ້າ. (ອ່ານລູກາ 12:16-21) ພີ່ນ້ອງຊາຍຄົນໜຶ່ງທີ່ຊື່ຄລິດສະຕຽນທີ່ຢູ່ຝຣັ່ງເວົ້າວ່າ: “ຂ້ອຍບໍ່ໄດ້ໃຫ້ເວລາແລະກຳລັງຢ່າງເຕັມທີກັບພະເຢໂຫວາແລະຄອບຄົວຂອງຂ້ອຍ.” ລາວກັບເມຍໄດ້ຕັດສິນໃຈເປັນໄພໂອເນຍ. ແຕ່ເພື່ອຈະເຮັດແບບນັ້ນໄດ້ ເຂົາເຈົ້າຕ້ອງອອກຈາກວຽກແລ້ວໄປຮັບເຮັດວຽກອະນາໄມ. ແລະເຖິງວ່າເຂົາເຈົ້າຈະໄດ້ເງິນແຕ່ໜ້ອຍດຽວ ເຂົາເຈົ້າກໍອີ່ມໃຈພໍໃຈກັບສິ່ງທີ່ມີ. ການເສຍສະລະແບບນີ້ຄຸ້ມຄ່າບໍ? ພີ່ນ້ອງຄລິດສະຕຽນບອກວ່າ “ຕອນນີ້ເຮົາມີຄວາມສຸກກັບວຽກປະກາດ ແລະດີໃຈຫຼາຍທີ່ເຫັນວ່າລາຍຢ້ຽມກັບນັກສຶກສາໄດ້ຮຽນຮູ້ເລື່ອງຂອງພະເຢໂຫວາ.”
17. ສິ່ງໃດຊ່ວຍພີ່ນ້ອງຍິງຄົນໜຶ່ງໃຫ້ກ້າທີ່ຈະປະກາດແບບໃໝ່?
17 ພ້ອມທີ່ຈະລອງປະກາດແບບໃໝ່. (ກຈກ. 17:16, 17; 20:20, 21) ພີ່ນ້ອງເຊີລີທີ່ເປັນໄພໂອເນຍຢູ່ສະຫະລັດອາເມຣິກາໄດ້ພະຍາຍາມປັບປ່ຽນວິທີປະກາດໃນຊ່ວງການແຜ່ລະບາດຂອງພະຍາດໂຄວິດ-19. ທຳອິດລາວກໍບໍ່ກ້າປະກາດທາງໂທລະສັບ. ແຕ່ຫຼັງຈາກທີ່ລາວໄດ້ຮັບການຝຶກອົບຮົມໃນຊ່ວງທີ່ຜູ້ດູແລໝວດມາຢ້ຽມຢາມ ລາວກໍກ້າແລະເລີ່ມທີ່ຈະປະກາດທາງໂທລະສັບເປັນປະຈຳ. ລາວບອກວ່າ: “ຕອນທຳອິດ ຂ້ອຍຮູ້ສຶກຢ້ານ ແຕ່ຕອນນີ້ຂ້ອຍຮູ້ສຶກມ່ວນກັບການປະກາດແບບນີ້ຫຼາຍແທ້ໆ. ເຮົາສາມາດເຂົ້າເຖິງຜູ້ຄົນໄດ້ຫຼາຍກວ່າຕອນທີ່ເຮົາໄປປະກາດຕາມບ້ານດ້ວຍຊ້ຳ!”
18. ສິ່ງໃດຈະຊ່ວຍເຮົາໃຫ້ຮັບໃຊ້ຫຼາຍຂຶ້ນໄດ້ເມື່ອມີບັນຫາ?
18 ວາງແຜນແລະລົງມືເຮັດຕາມ. ເມື່ອມີບັນຫາ ໃຫ້ອະທິດຖານຂໍພະເຢໂຫວາຊ່ວຍເຮົາໃຫ້ຮູ້ວິທີແກ້ໄຂບັນຫາໄດ້. (ສຸພາ. 3:21) ພີ່ນ້ອງຊອນຢາທີ່ຮັບໃຊ້ເປັນໄພໂອເນຍປະຈຳໃນກຸ່ມພາສາຣູມານີໃນເອີຣົບບອກວ່າ: “ຂ້ອຍມັກຈະຂຽນແຜນການໃສ່ເຈ້ຍແລ້ວກໍຕິດໄວ້ບ່ອນທີ່ເຫັນໄດ້. ຂ້ອຍມີຮູບແຕ້ມເສັ້ນທາງສອງເສັ້ນທີ່ແຍກໄປຄົນລະທາງຢູ່ເທິງໂຕະ ແລະເມື່ອຂ້ອຍຕ້ອງຕັດສິນໃຈ ຂ້ອຍກໍຈະເບິ່ງຮູບແຕ້ມນັ້ນແລະຄິດວ່າທາງໃດຈະຊ່ວຍຂ້ອຍໃຫ້ໄປເຖິງເປົ້າໝາຍທີ່ຂ້ອຍຕັ້ງໄວ້.” ຊອນຢາພະຍາຍາມຄິດໃນແງ່ບວກສະເໝີເມື່ອລາວມີບັນຫາ. ລາວບອກວ່າ: “ທຸກໆບັນຫາທີ່ຂ້ອຍເຈິ ຂ້ອຍມັກຈະສົມທຽບວ່າມັນເປັນຄືກັບກຳແພງທີ່ຕັນຂ້ອຍໄວ້ບໍ ຫຼືເປັນຂົວຕໍ່ທີ່ຊ່ວຍຂ້ອຍໃຫ້ໄປເຖິງເປົ້າໝາຍ.”
19. ເຮົາຄວນຕັ້ງໃຈທີ່ຈະເຮັດຫຍັງ?
19 ພະເຢໂຫວາໃຫ້ສິ່ງດີໆກັບເຮົາຫຼາຍຢ່າງ. ເຮົາຢາກສະແດງໃຫ້ເຫັນວ່າເຮົາເຫັນຄ່າສິ່ງຕ່າງໆທີ່ພະເຢໂຫວາໃຫ້ເຮົາໂດຍພະຍາຍາມເຮັດທຸກສິ່ງເພື່ອຍົກຍ້ອງສັນລະເສີນເພິ່ນ. (ຮຣ. 13:15) ເຮົາອາດຈະຮັບໃຊ້ພະເຢໂຫວາຫຼາຍຂຶ້ນໃນຮູບແບບໃໝ່ໆ ແລ້ວເພິ່ນກໍຈະໃຫ້ສິ່ງດີໆກັບເຮົາຫຼາຍຢ່າງ. ໃນແຕ່ລະມື້ໃຫ້ເຮົາຊອກຫາວິທີທີ່ຈະ ‘ຊີມແລະເຫັນວ່າພະເຢໂຫວາດີ’ ແລ້ວເຮົາກໍຈະເປັນຄືກັບພະເຢຊູທີ່ເວົ້າວ່າ: “ອາຫານຂອງຂ້ອຍຄືການເຮັດຕາມຄວາມຕ້ອງການຂອງຜູ້ທີ່ໃຊ້ຂ້ອຍມາ ແລະເຮັດວຽກຂອງພະອົງໃຫ້ສຳເລັດ.”—ຢຮ. 4:34
ເພງ 80 “ລອງຊີມແລ້ວຈະຮູ້ວ່າພະເຢໂຫວາດີ”
a ສິ່ງດີໆທຸກຢ່າງມາຈາກພະເຢໂຫວາ. ເພິ່ນໃຫ້ສິ່ງດີໆກັບທຸກຄົນ ແມ່ນແຕ່ຄົນຊົ່ວ. ແຕ່ເພິ່ນຈະໃຫ້ສິ່ງດີໆກັບຜູ້ທີ່ນະມັດສະການເພິ່ນຫຼາຍກວ່າ. ໃນບົດນີ້ ເຮົາຈະມາເບິ່ງວ່າພະເຢໂຫວາໄດ້ໃຫ້ສິ່ງດີໆຫຍັງແດ່ກັບຜູ້ຮັບໃຊ້ຂອງເພິ່ນ. ແລະເຮົາຍັງຈະມາເບິ່ງວ່າຜູ້ທີ່ຮັບໃຊ້ພະເຢໂຫວາຫຼາຍຂຶ້ນອາດໄດ້ຮັບສິ່ງດີໆໃນແບບທີ່ພິເສດແນວໃດ.
b ຊື່ສົມມຸດ.
c ບົດຄວາມຊຸດນີ້ແຕ່ກີ້ມີຢູ່ໃນຫໍສັງເກດການ ແຕ່ຕອນນີ້ມີຢູ່ໃນເວັບໄຊ jw.org. ໄປທີ່ກ່ຽວກັບເຮົາ > ປະສົບການ > ບັນລຸເປົ້າໝາຍໃນການຮັບໃຊ້ພະເຢໂຫວາ. (ພາສາໄທ)