ບົດຄວາມສຶກສາທີ 32
ຜູ້ທີ່ຍັງໜຸ່ມ ຂໍໃຫ້ເປັນຜູ້ໃຫຍ່ທາງຄວາມເຊື່ອຫຼັງຈາກຮັບບັບເຕມາ
“ໃຫ້ . . . ສະແດງຄວາມຮັກ ແລ້ວພວກເຮົາກໍຈະເຕີບໂຕເປັນຜູ້ໃຫຍ່ໃນທຸກດ້ານ.”—ອຟຊ. 4:15
ເພງ 56 ເຮັດໃຫ້ຄວາມຈິງເປັນຂອງເຈົ້າເອງ
ໃຈຄວາມສຳຄັນa
1. ຜູ້ທີ່ຍັງໜຸ່ມຫຼາຍຄົນໄດ້ເຮັດສິ່ງທີ່ດີຫຍັງແດ່ແລ້ວ?
ໃນແຕ່ລະປີ ມີຜູ້ທີ່ຍັງໜຸ່ມຫຼາຍພັນຄົນຮັບບັບເຕມາ. ເຈົ້າເປັນໜຶ່ງໃນນັ້ນບໍ? ຖ້າແມ່ນ ພະເຢໂຫວາແລະພີ່ນ້ອງໃນປະຊາຄົມກໍດີໃຈແລະມີຄວາມສຸກຫຼາຍ! (ສຸພາ. 27:11) ລອງຄິດເຖິງສິ່ງດີໆທີ່ເຈົ້າໄດ້ເຮັດມາແລ້ວ. ເຈົ້າໄດ້ສຶກສາຄຳພີໄບເບິນເຊິ່ງອາດຈະຕ້ອງໃຊ້ເວລາຫຼາຍປີ ແລ້ວເຈົ້າກໍໝັ້ນໃຈວ່າຄຳພີໄບເບິນເປັນປຶ້ມທີ່ມາຈາກພະເຈົ້າ. ແລະທີ່ສຳຄັນກວ່ານັ້ນ ເຈົ້າໄດ້ເລີ່ມຮູ້ຈັກແລະຮັກພະເຢໂຫວາຜູ້ທີ່ໃຫ້ຄຳພີໄບເບິນ. ເມື່ອເຈົ້າຮັກເພິ່ນຫຼາຍຂຶ້ນ ເຈົ້າກໍໄດ້ອຸທິດຕົວແລະຮັບບັບເຕມາ ເຂົ້າມາເປັນຜູ້ຮັບໃຊ້ຂອງເພິ່ນ. ນີ້ເປັນສິ່ງທີ່ດີຫຼາຍແທ້ໆ!
2. ເຮົາຈະຮຽນຫຍັງໃນບົດຄວາມນີ້?
2 ກ່ອນທີ່ເຈົ້າຈະຮັບບັບເຕມາ ເຈົ້າໄດ້ເຈິບັນຫາຫຼາຍຢ່າງທີ່ເຮັດໃຫ້ຍາກທີ່ຈະສັດຊື່ຕໍ່ພະເຢໂຫວາ. ແຕ່ເມື່ອເວລາຜ່ານໄປ ເຈົ້າຍັງຈະເຈິບັນຫາຫຼາຍກວ່ານີ້ອີກ. ຊາຕານຈະພະຍາຍາມເຮັດໃຫ້ເຈົ້າເຊົາຮັກແລະຮັບໃຊ້ພະເຢໂຫວາ. (ອຟຊ. 4:14) ແຕ່ຂໍໃຫ້ເຈົ້າຢ່າຍອມໃຫ້ເປັນແບບນັ້ນ. ແລ້ວສິ່ງໃດຈະຊ່ວຍເຈົ້າໃຫ້ສັດຊື່ຕໍ່ພະເຢໂຫວາແລະເຮັດຕາມສິ່ງທີ່ໄດ້ສັນຍາຕອນທີ່ອຸທິດຕົວ? ສິ່ງທີ່ຊ່ວຍໄດ້ກໍຄື ເຈົ້າຕ້ອງ “ກ້າວໜ້າ” ຕໍ່ໆໄປເພື່ອຈະເປັນຜູ້ໃຫຍ່ທາງດ້ານຄວາມເຊື່ອ. (ຮຣ. 6:1) ແລ້ວເຈົ້າຈະເຮັດແບບນັ້ນໄດ້ແນວໃດ?
ເຈົ້າຈະເປັນຜູ້ໃຫຍ່ທາງຄວາມເຊື່ອໄດ້ແນວໃດ?
3. ຄລິດສະຕຽນທຸກຄົນຄວນເຮັດຫຍັງຫຼັງຈາກທີ່ຮັບບັບເຕມາແລ້ວ?
3 ຫຼັງຈາກທີ່ຮັບບັບເຕມາແລ້ວ ເຮົາທຸກຄົນຕ້ອງເຮັດຕາມຄຳແນະນຳຂອງໂປໂລທີ່ໃຫ້ກັບພີ່ນ້ອງໃນເມືອງເອເຟໂຊ. ໂປໂລໄດ້ກະຕຸ້ນໃຫ້ເຂົາເຈົ້າເປັນຄລິດສະຕຽນທີ່ “ເຕີບໂຕຢ່າງເຕັມທີ” ຈົນເປັນຜູ້ໃຫຍ່. (ອຟຊ. 4:13) ນີ້ໝາຍຄວາມວ່າເຂົາເຈົ້າຕ້ອງກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ. ເຮົາເຂົ້າໃຈສິ່ງທີ່ໂປໂລເວົ້າຫຼາຍຂຶ້ນເມື່ອລາວສົມທຽບການເປັນຜູ້ໃຫຍ່ທາງຄວາມເຊື່ອຄືກັບການເຕີບໃຫຍ່ຂອງເດັກນ້ອຍ. ເມື່ອແອນ້ອຍເກີດມາ ພໍ່ແມ່ຈະດີໃຈແລະພູມໃຈຫຼາຍ. ແຕ່ແອນ້ອຍຈະບໍ່ໄດ້ເປັນເດັກນ້ອຍຢູ່ຕະຫຼອດ. ລາວຕ້ອງໄດ້ເຕີບໃຫຍ່ ແລະຕໍ່ມາກໍຈະເຊົາ “ເຮັດຄືເດັກນ້ອຍ.” (1 ກຣ. 13:11) ການເປັນຄລິດສະຕຽນກໍຄ້າຍຄືກັນ ຫຼັງຈາກທີ່ຮັບບັບເຕມາແລ້ວ ເຮົາຕ້ອງໄດ້ກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ. ຕອນນີ້ໃຫ້ເຮົາມາເບິ່ງຄຳແນະນຳບາງຢ່າງທີ່ຈະຊ່ວຍເຮົາໃຫ້ເປັນຜູ້ໃຫຍ່ທາງຄວາມເຊື່ອໄດ້.
4. ຄຸນລັກສະນະໃດທີ່ຈະຊ່ວຍເຈົ້າໃຫ້ເປັນຜູ້ໃຫຍ່ທາງຄວາມເຊື່ອ? ຂໍໃຫ້ອະທິບາຍ. (ຟີລິບປອຍ 1:9)
4 ໃຫ້ຮັກພະເຢໂຫວາຫຼາຍຂຶ້ນ. ເຮົາຮັກພະເຢໂຫວາຫຼາຍຢູ່ແລ້ວ ແຕ່ເຮົາສາມາດຮັກເພິ່ນຫຼາຍກວ່ານີ້ໄດ້. ເຮົາຈະເຮັດແບບນັ້ນໄດ້ແນວໃດ? ອັກຄະສາວົກໂປໂລເວົ້າເຖິງວິທີໜຶ່ງທີ່ຢູ່ໃນຟີລິບປອຍ 1:9 (ອ່ານ) ລາວອະທິດຖານຂໍໃຫ້ພີ່ນ້ອງໃນເມືອງຟີລິບປອຍ “ມີຄວາມຮັກຫຼາຍຂຶ້ນເລື້ອຍໆ.” ນີ້ສະແດງວ່າເຮົາສາມາດຮັກພະເຢໂຫວາຫຼາຍຂຶ້ນໄດ້ໂດຍ “ມີຄວາມຮູ້ທີ່ຖືກຕ້ອງແລະຄວາມເຂົ້າໃຈທີ່ເລິກເຊິ່ງ.” ເມື່ອເຮົາຮູ້ຈັກພະເຢໂຫວາຫຼາຍເທົ່າໃດ ເຮົາກໍແຮ່ງຈະຮັກເພິ່ນແລະເຫັນຄ່າສິ່ງດີໆທີ່ເພິ່ນເຮັດເພື່ອເຮົາ. ນອກຈາກນັ້ນ ເຮົາຍັງຈະເຮັດທຸກສິ່ງທີ່ເຮັດໃຫ້ເພິ່ນພໍໃຈແລະບໍ່ຢາກເຮັດໃຫ້ເພິ່ນຜິດຫວັງ. ແລະເຮົາຈະພະຍາຍາມຮູ້ວ່າພະເຢໂຫວາຢາກໃຫ້ເຮົາເຮັດຫຍັງແລະຄວນເຮັດແນວໃດ.
5-6. ເຮົາຈະຮັກພະເຢໂຫວາຫຼາຍຂຶ້ນໄດ້ແນວໃດ? ຂໍໃຫ້ອະທິບາຍ.
5 ອີກສິ່ງໜຶ່ງທີ່ຊ່ວຍເຮົາໃຫ້ຮັກພະເຢໂຫວາຫຼາຍຂຶ້ນແມ່ນ ການຮຽນຮູ້ກ່ຽວກັບພະເຢຊູຜູ້ທີ່ຮຽນແບບພະເຢໂຫວາໄດ້ເປັນຢ່າງດີ. (ຮຣ. 1:3) ແລະວິທີທີ່ດີທີ່ສຸດທີ່ເຮົາຈະຮູ້ຈັກພະເຢຊູກໍຄືການສຶກສາປຶ້ມຂ່າວດີສີ່ເຫຼັ້ມ. ຖ້າເຈົ້າຍັງບໍ່ໄດ້ອ່ານຄຳພີໄບເບິນທຸກມື້ ເຈົ້າອາດຈະເລີ່ມອ່ານເລື່ອງຂອງພະເຢຊູຈາກປຶ້ມສີ່ເຫຼັ້ມນີ້. ເມື່ອເຈົ້າອ່ານເລື່ອງຂອງພະເຢຊູ ຂໍໃຫ້ເຈົ້າສັງເກດຄຸນລັກສະນະຕ່າງໆຂອງເພິ່ນ. ເພິ່ນເປັນຄົນທີ່ເຂົ້າຫາໄດ້ງ່າຍແລະໃຜໆກໍຢາກຢູ່ໃກ້ເພິ່ນ. ແລະເມື່ອມີເດັກນ້ອຍມາຫາເພິ່ນ ເພິ່ນກໍສະແດງຄວາມຮັກຕໍ່ເຂົາເຈົ້າໂດຍກອດເຂົາເຈົ້າ. (ມຣກ. 10:13-16) ພະເຢຊູໄດ້ເຮັດແບບນີ້ກັບພວກລູກສິດຄືກັນ. ນີ້ຈຶ່ງເຮັດໃຫ້ພວກລູກສິດຮູ້ສຶກສະດວກໃຈທີ່ຈະລົມກັບເພິ່ນແລະບອກຄວາມຮູ້ສຶກໃຫ້ເພິ່ນຟັງ. (ມທ. 16:22) ຍ້ອນພະເຢຊູຮຽນແບບພະເຢໂຫວາພໍ່ຂອງເພິ່ນ ເຮົາຈຶ່ງຮູ້ວ່າພະເຢໂຫວາກໍແຮ່ງເປັນຜູ້ທີ່ເຂົ້າຫາໄດ້ງ່າຍ. ດັ່ງນັ້ນ ເມື່ອເຮົາອະທິດຖານລະບາຍຄວາມຮູ້ສຶກຕໍ່ພະເຢໂຫວາ ເຮົາກໍໝັ້ນໃຈໄດ້ເລີຍວ່າເພິ່ນຈະບໍ່ລຳຄານເຮົາຫຼືເວົ້າໃຫ້ເຮົາເພາະເພິ່ນຮັກແລະເປັນຫ່ວງເຮົາຫຼາຍ.—1 ປຕ. 5:7
6 ພະເຢຊູເຫັນອົກເຫັນໃຈຄົນອື່ນ. ອັກຄະສາວົກມັດທາຍບອກວ່າ: “ເມື່ອເຫັນຜູ້ຄົນຈຳນວນຫຼາຍ ພະເຢຊູຮູ້ສຶກອີ່ຕົນເພາະພວກເຂົາຖືກຂູດຮີດແລະຖືກປະຖິ້ມຄືກັບແກະທີ່ບໍ່ມີຄົນລ້ຽງ.” (ມທ. 9:36) ແລ້ວພະເຢໂຫວາຮູ້ສຶກແນວໃດ? ພະເຢຊູບອກວ່າ: “ພໍ່ຂອງຂ້ອຍທີ່ຢູ່ໃນສະຫວັນ . . . ບໍ່ຢາກໃຫ້ຄົນທີ່ຕ່ຳຕ້ອຍເຫຼົ່ານີ້ແມ່ນແຕ່ຄົນດຽວຕ້ອງຫາຍສາບສູນໄປ.” (ມທ. 18:14) ຄຳເວົ້ານີ້ເຮັດໃຫ້ເຮົາຮູ້ສຶກອົບອຸ່ນໃຈຫຼາຍເພາະສະແດງໃຫ້ເຫັນວ່າພະເຢໂຫວາຮັກເຮົາຫຼາຍແທ້ໆ! ດັ່ງນັ້ນ ເມື່ອເຮົາຮູ້ຈັກພະເຢຊູເປັນຢ່າງດີ ເຮົາກໍຈະຮູ້ຈັກແລະຮັກພະເຢໂຫວາຫຼາຍຂຶ້ນ.
7. ການຄົບຫາກັບພີ່ນ້ອງທີ່ມີຄວາມເຊື່ອເຂັ້ມແຂງຈະຊ່ວຍເຮົາແນວໃດ?
7 ເມື່ອເຮົາຄົບຫາກັບພີ່ນ້ອງທີ່ມີຄວາມເຊື່ອເຂັ້ມແຂງ ເຮົາກໍຈະຮັກຄົນອື່ນຫຼາຍຂຶ້ນແລະເປັນຜູ້ໃຫຍ່ທາງຄວາມເຊື່ອ. ຂໍໃຫ້ເຮົາຄິດເບິ່ງວ່າພີ່ນ້ອງເຫຼົ່ານັ້ນມີຄວາມສຸກຫຼາຍສ່ຳໃດທີ່ໄດ້ຮັບໃຊ້ພະເຢໂຫວາ ແລະເຂົາເຈົ້າບໍ່ເສຍໃຈເລີຍທີ່ຕັດສິນໃຈແບບນີ້. ເຈົ້າອາດຈະຖາມເຂົາເຈົ້າວ່າ ເຂົາເຈົ້າມີປະສົບການແນວໃດໃນການຮັບໃຊ້ພະເຢໂຫວາ ແລະເມື່ອຕ້ອງຕັດສິນໃຈເລື່ອງທີ່ສຳຄັນ ກໍໃຫ້ຂໍຄຳແນະນຳຈາກເຂົາເຈົ້າ. ຂໍໃຫ້ຈື່ໄວ້ວ່າ: “ຖ້າມີທີ່ປຶກສາຫຼາຍຄົນກໍປະສົບຄວາມສຳເລັດ.”—ສຸພາ. 11:14, ລ.ມ.
ເມື່ອຢູ່ໂຮງຮຽນສອນເລື່ອງວິວັດທະນາການ ເຈົ້າຈະກຽມຕົວແນວໃດ? (ເບິ່ງຂໍ້ 8-9)
8. ເຈົ້າຈະເຮັດແນວໃດຖ້າເຈົ້າສົງໄສສິ່ງທີ່ຄຳພີໄບເບິນສອນ?
8 ແກ້ໄຂຂໍ້ສົງໄສ. ຕາມທີ່ເຮົາໄດ້ຮຽນໃນຂໍ້ 2 ຊາຕານຈະພະຍາຍາມຂັດຂວາງເຮົາບໍ່ໃຫ້ເປັນຜູ້ໃຫຍ່ທາງຄວາມເຊື່ອ. ແລະວິທີໜຶ່ງທີ່ມັນເຮັດກໍຄື ເຮັດໃຫ້ເຮົາສົງໄສຄວາມຈິງທີ່ຢູ່ໃນຄຳພີໄບເບິນ. ຕົວຢ່າງເຊັ່ນ: ມື້ໃດມື້ໜຶ່ງເຮົາອາດຈະໄດ້ຮຽນທິດສະດີວິວັດທະນາການ. ຕອນຍັງນ້ອຍ ເຮົາອາດຈະບໍ່ໄດ້ຄິດຫຼາຍກ່ຽວກັບເລື່ອງນີ້. ແຕ່ເມື່ອໃຫຍ່ຂຶ້ນມາ ເຮົາອາດຈະສົງໄສແລະຄິດວ່າສິ່ງທີ່ອາຈານສອນມີເຫດຜົນແລະໜ້າເຊື່ອຖື. ແຕ່ອາຈານອາດຈະບໍ່ເຄີຍເຫັນຫຼັກຖານວ່າມີພະເຈົ້າທີ່ເປັນຜູ້ສ້າງ. ຂໍໃຫ້ເຮົາຄິດເຖິງຫຼັກການທີ່ຢູ່ໃນສຸພາສິດ 18:17, ລ.ມ. ທີ່ວ່າ: “ຄົນທີ່ໃຫ້ການກ່ອນ ເບິ່ງຄືເປັນຝ່າຍຖືກ ຈົນກວ່າອີກຝ່າຍໜຶ່ງຈະມາຊັກຖາມລາວ.” ແທນທີ່ເຮົາຈະຍອມຮັບຄວາມຄິດແລະສິ່ງທີ່ໄດ້ຮຽນຢູ່ໂຮງຮຽນໂດຍບໍ່ເບິ່ງຫຼັກຖານ ຂໍໃຫ້ເຮົາສຶກສາຄົ້ນຄວ້າຄວາມຈິງທີ່ຢູ່ໃນຄຳພີໄບເບິນແລະປຶ້ມຕ່າງໆຂອງອົງການ. ໃຫ້ລົມກັບພີ່ນ້ອງທີ່ເຄີຍເຊື່ອເລື່ອງວິວັດທະນາການ ແລະຖາມເຂົາເຈົ້າວ່າເປັນຫຍັງເຂົາເຈົ້າຈຶ່ງເຊື່ອວ່າມີຜູ້ສ້າງທີ່ຮັກເຮົາ. ການເຮັດແບບນີ້ຈະຊ່ວຍເຮົາໃຫ້ເຫັນຄວາມຈິງທີ່ວ່າ ພະເຢໂຫວາເປັນຜູ້ສ້າງສິ່ງຕ່າງໆ.
9. ເຈົ້າໄດ້ຮຽນຫຍັງຈາກເລື່ອງຂອງເມລີຊາ?
9 ພີ່ນ້ອງຍິງທີ່ຊື່ເມລີຊາb ໄດ້ຮັບປະໂຫຍດຈາກການຄົ້ນຄວ້າເລື່ອງມີຜູ້ສ້າງສິ່ງທີ່ມີຊີວິດ. ລາວບອກວ່າ: “ຕອນຢູ່ໂຮງຮຽນອາຈານໄດ້ອະທິບາຍເລື່ອງວິວັດທະນາການທີ່ເຮັດໃຫ້ເບິ່ງຄືວ່າເລື່ອງນັ້ນເປັນຄວາມຈິງ. ຕອນທຳອິດ ຂ້ອຍບໍ່ຢາກຄົ້ນຄວ້າເລື່ອງນີ້ເລີຍ ເພາະຢ້ານວ່າສິ່ງທີ່ຂ້ອຍເຊື່ອຈະບໍ່ມີຫຼັກຖານພຽງພໍ. ແຕ່ຂ້ອຍກໍຄິດໄດ້ວ່າ ພະເຢໂຫວາຢາກໃຫ້ເຮົາເຊື່ອເພິ່ນແບບມີເຫດຜົນ. ດັ່ງນັ້ນ ຂ້ອຍຈຶ່ງເລີ່ມຄົ້ນຄວ້າໂດຍອ່ານປຶ້ມພະຜູ້ສ້າງຜູ້ໄຝ່ພະໄທໃນຕົວເຈົ້າມີບໍ? ມີຜູ້ສ້າງສິ່ງທີ່ມີຊີວິດບໍ? ຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ. ເສຍດາຍທີ່ຂ້ອຍບໍ່ໄດ້ອ່ານປຶ້ມເຫຼົ່ານີ້ກ່ອນໜ້ານັ້ນ ເພາະມັນຊ່ວຍໄດ້ຫຼາຍແທ້ໆ!”
10-11. ສິ່ງໃດຈະຊ່ວຍເຮົາໃຫ້ເປັນຄົນສະອາດທາງດ້ານສິນລະທຳ? (1 ເທຊະໂລນິກ 4:3, 4)
10 ບໍ່ເຮັດສິ່ງທີ່ບໍ່ດີ. ເມື່ອເຈົ້າເລີ່ມເປັນໄວລຸ້ນ ຄວາມຕ້ອງການທາງເພດຈະມີຫຼາຍ ແລະເຈົ້າອາດຈະຖືກກົດດັນໃຫ້ເຮັດຜິດສິນລະທຳທາງເພດ. ຊາຕານຢາກໃຫ້ເຈົ້າເຮັດແບບນັ້ນ. ແລ້ວສິ່ງໃດຈະຊ່ວຍເຈົ້າໃຫ້ຕ້ານທານການລໍ້ໃຈໄດ້? (ອ່ານ 1 ເທຊະໂລນິກ 4:3, 4) ເມື່ອອະທິດຖານ ຂໍໃຫ້ເຈົ້າລະບາຍຄວາມຮູ້ສຶກນີ້ກັບພະເຢໂຫວາ. ບອກໃຫ້ເພິ່ນຮູ້ວ່າເຈົ້າຮູ້ສຶກແນວໃດ ແລະຂໍໃຫ້ເພິ່ນຊ່ວຍເຈົ້າໃຫ້ມີກຳລັງທີ່ຈະອົດທົນໄດ້. (ມທ. 6:13) ຂໍໃຫ້ຈື່ໄວ້ວ່າ ພະເຢໂຫວາຢາກຊ່ວຍເຈົ້າແລະບໍ່ໄດ້ຕຳໜິເຈົ້າ. (ເພງ. 103:13, 14) ແລະການອ່ານຄຳພີໄບເບິນກໍຈະຊ່ວຍເຈົ້າໄດ້ຄືກັນ. ພີ່ນ້ອງເມລີຊາທີ່ເວົ້າເຖິງກ່ອນໜ້ານີ້ຮູ້ສຶກວ່າຍາກທີ່ຈະຕ້ານທານຄວາມຄິດທີ່ບໍ່ສະອາດ. ລາວບອກວ່າ: “ການອ່ານຄຳພີໄບເບິນທຸກມື້ຊ່ວຍຂ້ອຍບໍ່ໃຫ້ຍອມແພ້ຕໍ່ຄວາມຕ້ອງການນີ້ ແລະຊ່ວຍຂ້ອຍໃຫ້ຈື່ວ່າຊີວິດຂ້ອຍເປັນຂອງພະເຢໂຫວາແລະຂ້ອຍກໍຢາກເຮັດຕາມສິ່ງທີ່ເພິ່ນຕ້ອງການ.”—ເພງ. 119:9
11 ຢ່າພະຍາຍາມແກ້ໄຂບັນຫາດ້ວຍຕົວເອງ. ໃຫ້ລົມກັບພໍ່ແມ່ກ່ຽວກັບບັນຫາທີ່ເຈົ້າມີ. ເຖິງວ່າຈະບໍ່ແມ່ນເລື່ອງງ່າຍທີ່ຈະເວົ້າບັນຫາສ່ວນຕົວໃຫ້ຄົນອື່ນຟັງ ແຕ່ມັນກໍເປັນເລື່ອງທີ່ສຳຄັນຫຼາຍ. ເມລີຊາບອກວ່າ: “ຂ້ອຍອະທິດຖານຂໍຄວາມກ້າຈາກພະເຢໂຫວາແລະລົມກັບພໍ່ກ່ຽວກັບບັນຫາຂອງຂ້ອຍ. ຫຼັງຈາກນັ້ນ ຂ້ອຍກໍຮູ້ສຶກດີຂຶ້ນແລະຮູ້ວ່າພະເຢໂຫວາພູມໃຈໃນໂຕຂ້ອຍ.”
12. ເຈົ້າຈະເຮັດແນວໃດເພື່ອຈະຕັດສິນໃຈໄດ້ດີ?
12 ໃຫ້ຫຼັກການໃນຄຳພີໄບເບິນຊີ້ນຳເຈົ້າ. ເມື່ອເຮົາໃຫຍ່ຂຶ້ນ ພໍ່ແມ່ກໍໃຫ້ເຮົາມີອິດສະຫຼະທີ່ຈະຕັດສິນໃຈເອົາເອງຫຼາຍຂຶ້ນ. ແຕ່ເຮົາຍັງບໍ່ມີປະສົບການຫຼາຍປານໃດ. ຄັນຊັ້ນ ເຮົາຈະຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ? (ສຸພາ. 22:3) ພີ່ນ້ອງຍິງຄົນໜຶ່ງທີ່ຊື່ຄາຣີໄດ້ເວົ້າເຖິງສິ່ງທີ່ຊ່ວຍລາວໃຫ້ຕັດສິນໃຈໄດ້ດີ. ລາວຮູ້ວ່າຜູ້ທີ່ເປັນຜູ້ໃຫຍ່ທາງຄວາມເຊື່ອບໍ່ຈຳເປັນຕ້ອງມີກົດສຳລັບທຸກເລື່ອງ. ລາວບອກວ່າ: “ຂ້ອຍພະຍາຍາມທີ່ຈະເຂົ້າໃຈວ່າພະເຢໂຫວາຄິດແນວໃດຕໍ່ເລື່ອງຕ່າງໆ ບໍ່ແມ່ນຈະເຮັດແຕ່ຕາມກົດເທົ່ານັ້ນ.” ດັ່ງນັ້ນ ເມື່ອເຮົາອ່ານຄຳພີໄບເບິນ ຂໍໃຫ້ເຮົາຖາມຕົວເອງວ່າ ‘ເລື່ອງນີ້ຊ່ວຍຂ້ອຍໃຫ້ຮູ້ວ່າພະເຢໂຫວາຄິດແນວໃດ? ເລື່ອງນີ້ຊ່ວຍຂ້ອຍໃຫ້ເຮັດສິ່ງທີ່ຖືກຕ້ອງບໍ? ຖ້າແມ່ນ ຂ້ອຍຈະໄດ້ຮັບປະໂຫຍດແນວໃດເມື່ອເຮັດຕາມຄຳສອນນີ້?’ (ເພງ. 19:7; ເອຊາ. 48:17, 18) ເມື່ອເຮົາອ່ານແລະຄິດຕຶກຕອງເຖິງຫຼັກການໃນຄຳພີໄບເບິນ ມັນກໍງ່າຍຂຶ້ນທີ່ເຮົາຈະຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ. ແລະເມື່ອເຮົາເປັນຜູ້ໃຫຍ່ທາງຄວາມເຊື່ອ ເຮົາກໍຈະເຫັນວ່າບໍ່ຈຳເປັນຕ້ອງມີກົດສຳລັບທຸກຢ່າງ ເພາະເຮົາຮູ້ແລ້ວວ່າພະເຢໂຫວາຄິດແນວໃດຕໍ່ເລື່ອງນັ້ນ.
ພີ່ນ້ອງຍິງຄົນໜຶ່ງຄົບຫາກັບໝູ່ແບບໃດ? (ເບິ່ງຂໍ້ 13)
13. ໝູ່ທີ່ດີຈະຊ່ວຍເຮົາແນວໃດ? (ສຸພາສິດ 13:20)
13 ເລືອກໝູ່ທີ່ຮັກພະເຢໂຫວາ. ຄືກັບທີ່ເຮົາໄດ້ຮຽນມາແລ້ວວ່າ ການເລືອກໝູ່ຈະຊ່ວຍເຮົາໃຫ້ເປັນຜູ້ໃຫຍ່ທາງຄວາມເຊື່ອໄດ້. (ອ່ານສຸພາສິດ 13:20) ພີ່ນ້ອງຍິງທີ່ຊື່ຊາຣາເລີ່ມຮູ້ສຶກບໍ່ມີຄວາມສຸກ. ແຕ່ມີບາງຢ່າງທີ່ຊ່ວຍລາວໃຫ້ກັບມາມີຄວາມສຸກໄດ້ອີກເທື່ອໜຶ່ງ. ລາວບອກວ່າ: “ຂ້ອຍມີໝູ່ທີ່ດີໃນເວລາທີ່ຕ້ອງການພໍດີ. ຂ້ອຍກັບພີ່ນ້ອງຍິງຄົນໜຶ່ງໄດ້ສຶກສາຫໍສັງເກດການ ນຳກັນທຸກອາທິດ. ແລະພີ່ນ້ອງອີກຄົນໜຶ່ງກໍຊ່ວຍຂ້ອຍໃຫ້ເລີ່ມອອກຄວາມຄິດເຫັນໃນການປະຊຸມ. ຍ້ອນໝູ່ໄດ້ຊ່ວຍຂ້ອຍ ຂ້ອຍຈຶ່ງໄດ້ເລີ່ມສຶກສາສ່ວນຕົວແລະອະທິດຖານຈາກໃຈຫຼາຍຂຶ້ນ. ນີ້ເຮັດໃຫ້ຂ້ອຍສະໜິດກັບພະເຢໂຫວາຫຼາຍຂຶ້ນແລະມີຄວາມສຸກໄດ້ອີກເທື່ອໜຶ່ງ.”
14. ຈູລຽນມີໝູ່ທີ່ດີໄດ້ແນວໃດ?
14 ເຮົາຈະມີໝູ່ທີ່ດີໄດ້ແນວໃດ? ພີ່ນ້ອງຈູລຽນເຊິ່ງຕອນນີ້ເປັນຜູ້ດູແລບອກວ່າ: “ຕອນທີ່ຂ້ອຍຍັງໜຸ່ມ ຂ້ອຍໄດ້ໝູ່ທີ່ດີຫຼາຍຄົນເມື່ອໄປປະກາດ. ເຂົາເຈົ້າເປັນຄົນທີ່ຫ້າວຫັນແລະຊ່ວຍຂ້ອຍໃຫ້ມ່ວນກັບວຽກປະກາດ. ຂ້ອຍຈຶ່ງເລີ່ມຕັ້ງເປົ້າໝາຍທີ່ຈະຮັບໃຊ້ເຕັມເວລາ. ຂ້ອຍສັງເກດເຫັນວ່າ ການຄົບຫາແຕ່ໝູ່ລຸ້ນດຽວກັນບໍ່ໄດ້ເປີດໂອກາດໃຫ້ຂ້ອຍເຈິໝູ່ທີ່ດີຫຼາຍຄົນ. ຕໍ່ມາຂ້ອຍກໍມີໝູ່ທີ່ດີຫຼາຍຄົນຢູ່ເບເທນ. ຕົວຢ່າງຂອງເຂົາເຈົ້າຊ່ວຍຂ້ອຍໃຫ້ເລືອກການພັກຜ່ອນຢ່ອນໃຈທີ່ດີ. ນີ້ຈຶ່ງເຮັດໃຫ້ຂ້ອຍສະໜິດກັບພະເຢໂຫວາຫຼາຍຂຶ້ນ.”
15. ໂປໂລໄດ້ເຕືອນຕີໂມທຽວແນວໃດໃນເລື່ອງການຄົບຫາ? (2 ຕີໂມທຽວ 2:20-22)
15 ຖ້າເຮົາເຫັນວ່າການຄົບຫາກັບບາງຄົນໃນປະຊາຄົມຈະສົ່ງຜົນທີ່ບໍ່ດີຕໍ່ເຮົາ ເຮົາຈະເຮັດແນວໃດ? ໂປໂລຮູ້ວ່າບາງຄົນໃນປະຊາຄົມບໍ່ໄດ້ໃຊ້ຊີວິດແບບຄລິດສະຕຽນ. ລາວຈຶ່ງເຕືອນຕີໂມທຽວໃຫ້ຢູ່ຫ່າງໆຈາກຄົນແບບນັ້ນ. (ອ່ານ 2 ຕີໂມທຽວ 2:20-22) ສາຍສຳພັນຂອງເຮົາກັບພະເຢໂຫວາມີຄ່າຫຼາຍ ແລະເຮົາກໍພະຍາຍາມຫຼາຍແທ້ໆເພື່ອຈະສະໜິດກັບເພິ່ນ. ດັ່ງນັ້ນ ເຮົາບໍ່ຄວນຍອມໃຫ້ໃຜກໍຕາມມາທຳລາຍສາຍສຳພັນຂອງເຮົາກັບພະເຢໂຫວາ.—ເພງ. 26:4
ການຕັ້ງເປົ້າໝາຍຈະຊ່ວຍເຮົາແນວໃດໃຫ້ເປັນຜູ້ໃຫຍ່ທາງຄວາມເຊື່ອ?
16. ເຈົ້າຄວນຕັ້ງເປົ້າໝາຍແນວໃດ?
16 ຕັ້ງເປົ້າໝາຍທີ່ດີ. ໃຫ້ຕັ້ງເປົ້າໝາຍທີ່ຈະຊ່ວຍໃຫ້ເຈົ້າມີຄວາມເຊື່ອເຂັ້ມແຂງແລະເປັນຜູ້ໃຫຍ່ທາງຄວາມເຊື່ອຫຼາຍຂຶ້ນ. (ອຟຊ. 3:16) ຕົວຢ່າງເຊັ່ນ: ເຈົ້າອາດຈະປັບປຸງການອ່ານຄຳພີໄບເບິນແລະການສຶກສາສ່ວນຕົວ. (ເພງ. 1:2, 3) ຫຼືເຈົ້າອາດຈະພະຍາຍາມອະທິດຖານຈາກໃຈແລະອະທິດຖານໃຫ້ຫຼາຍຂຶ້ນ. ຫຼືເຈົ້າອາດຈະເລືອກດີໆວ່າຈະພັກຜ່ອນຢ່ອນໃຈແນວໃດແລະໃຊ້ເວລາຫຼາຍສ່ຳໃດ. (ອຟຊ. 5:15, 16) ເມື່ອພະເຢໂຫວາເຫັນວ່າເຈົ້າພະຍາຍາມກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ ເພິ່ນກໍຈະພໍໃຈເຈົ້າ.
ພີ່ນ້ອງຍິງຄົນໜຶ່ງໄດ້ຕັ້ງເປົ້າໝາຍຫຍັງ? (ເບິ່ງຂໍ້ 17)
17. ເຈົ້າຈະໄດ້ຮັບປະໂຫຍດແນວໃດຈາກການຊ່ວຍເຫຼືອຄົນອື່ນ?
17 ເຈົ້າຈະເປັນຜູ້ໃຫຍ່ທາງຄວາມເຊື່ອຫຼາຍຂຶ້ນເມື່ອເຈົ້າຊ່ວຍເຫຼືອຄົນອື່ນ. ພະເຢຊູບອກວ່າ: “ການໃຫ້ເຮັດໃຫ້ມີຄວາມສຸກຫຼາຍກວ່າການຮັບ.” (ກຈກ. 20:35) ເຈົ້າຈະໄດ້ຮັບປະໂຫຍດຫຼາຍຢ່າງຖ້າເຈົ້າໃຊ້ເວລາແລະກຳລັງເພື່ອຊ່ວຍຄົນອື່ນ. ຕົວຢ່າງເຊັ່ນ: ເຈົ້າອາດຕັ້ງເປົ້າໝາຍທີ່ຈະຊ່ວຍເຫຼືອພີ່ນ້ອງທີ່ສູງອາຍຸແລະພີ່ນ້ອງທີ່ເຈັບປ່ວຍໃນປະຊາຄົມ. ເຈົ້າສາມາດໄປຊ່ວຍຊື້ເຄື່ອງຫຼືຊ່ວຍເຂົາເຈົ້າໃຫ້ຮູ້ວິທີໃຊ້ເຄື່ອງເອເລັກໂຕຣນິກ. ຖ້າເຈົ້າເປັນພີ່ນ້ອງຊາຍ ເຈົ້າອາດຈະຕັ້ງເປົ້າໝາຍເປັນຜູ້ຊ່ວຍວຽກຮັບໃຊ້ແລະຊ່ວຍເຫຼືອພີ່ນ້ອງໃຫ້ຫຼາຍຂຶ້ນ. (ຟລປ. 2:4) ນອກຈາກນັ້ນ ເຈົ້າຍັງສາມາດສະແດງຄວາມຮັກຕໍ່ຄົນອື່ນໂດຍບອກເຂົາເຈົ້າໃຫ້ຮູ້ຈັກຂ່າວດີເລື່ອງການປົກຄອງຂອງພະເຈົ້າ. (ມທ. 9:36, 37) ຖ້າເປັນໄປໄດ້ ໃຫ້ເຈົ້າຕັ້ງເປົ້າໝາຍທີ່ຈະຮັບໃຊ້ເຕັມເວລາ.
18. ການຮັບໃຊ້ເຕັມເວລາຈະຊ່ວຍເຈົ້າໃຫ້ສະໜິດກັບພະເຢໂຫວາຫຼາຍຂຶ້ນແນວໃດ?
18 ຖ້າເຮົາຮັບໃຊ້ເຕັມເວລາ ເຮົາກໍຈະສະໜິດກັບພະເຢໂຫວາຫຼາຍຂຶ້ນ. ການເປັນໄພໂອເນຍຈະເປີດໂອກາດໃຫ້ເຈົ້າໄດ້ເຂົ້າໂຮງຮຽນຜູ້ປະກາດລາຊະອານາຈັກ ແລະເຈົ້າອາດຈະໄດ້ຮັບໃຊ້ຢູ່ເບເທນຫຼືຊ່ວຍວຽກໃນໂຄງການກໍ່ສ້າງ. ພີ່ນ້ອງຍິງຄົນໜຶ່ງທີ່ຊື່ເກດລິນເຊິ່ງເປັນໄພໂອເນຍບອກວ່າ: “ການໄປປະກາດກັບພີ່ນ້ອງທີ່ມີປະສົບການຊ່ວຍຂ້ອຍໃຫ້ສະໜິດກັບພະເຢໂຫວາຫຼາຍຂຶ້ນຫຼັງຈາກທີ່ຮັບບັບເຕມາ. ຕົວຢ່າງຂອງເຂົາເຈົ້າເຮັດໃຫ້ຂ້ອຍຢາກປັບປຸງການສອນແລະສຶກສາຄຳພີໄບເບິນໃຫ້ເລິກເຊິ່ງຫຼາຍຂຶ້ນ.”
19. ເຈົ້າຈະໄດ້ຮັບສິ່ງດີໆຫຍັງແດ່ເມື່ອເຈົ້າກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ?
19 ເມື່ອເຈົ້າກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ ພະເຢໂຫວາກໍຈະໃຫ້ສິ່ງດີໆຫຼາຍຢ່າງກັບເຈົ້າ. ເຈົ້າຈະບໍ່ຕ້ອງເສຍເວລາແລະກຳລັງຕອນທີ່ຍັງໜຸ່ມໄປກັບສິ່ງທີ່ບໍ່ມີຄ່າ. (1 ຢຮ. 2:17) ແລະເຈົ້າຈະບໍ່ຕ້ອງເຈັບປວດໃຈຈາກການຕັດສິນໃຈທີ່ບໍ່ດີ ແຕ່ເຈົ້າຈະປະສົບຄວາມສຳເລັດແລະມີຄວາມສຸກແທ້. (ສຸພາ. 16:3) ຕົວຢ່າງທີ່ດີຂອງເຈົ້າຈະໃຫ້ກຳລັງໃຈພີ່ນ້ອງທຸກຄົນທັງຜູ້ທີ່ຍັງໜຸ່ມແລະຜູ້ສູງອາຍຸ. (1 ຕມ. 4:12) ແລະທີ່ສຳຄັນທີ່ສຸດ ເຈົ້າຈະມີຄວາມສຸກແລະຄວາມອີ່ມໃຈພໍໃຈຈາກການທີ່ເຮັດໃຫ້ພະເຢໂຫວາພໍໃຈແລະການມີສາຍສຳພັນທີ່ໃກ້ຊິດກັບເພິ່ນ.—ສຸພາ. 23:15, 16
ເພງ 88 ຂໍໃຫ້ເຮົາຮູ້ທາງຂອງພະອົງ
a ຜູ້ຮັບໃຊ້ຂອງພະເຢໂຫວາທຸກຄົນດີໃຈຫຼາຍເມື່ອເຫັນຜູ້ທີ່ຍັງໜຸ່ມຮັບບັບເຕມາ. ແຕ່ຫຼັງຈາກທີ່ເຂົາເຈົ້າຮັບບັບເຕມາແລ້ວ ເຂົາເຈົ້າກໍຕ້ອງພະຍາຍາມກ້າວໜ້າຕໍ່ໆໄປເພື່ອຈະເປັນຜູ້ໃຫຍ່ທາງຄວາມເຊື່ອ. ເຖິງວ່າບົດຄວາມນີ້ຈະເວົ້າເຖິງວິທີທີ່ຜູ້ທີ່ຍັງໜຸ່ມເຊິ່ງຫາກໍຮັບບັບເຕມາຈະເປັນຜູ້ໃຫຍ່ທາງຄວາມເຊື່ອ ແຕ່ເຮົາທຸກຄົນກໍຈະໄດ້ຮັບປະໂຫຍດຈາກບົດຄວາມນີ້ຄືກັນ.
b ຊື່ສົມມຸດ