ບົດຄວາມສຶກສາທີ 8
ເພງທີ 130 ເຮົາຕ້ອງໃຫ້ອະໄພກັນ
ເຈົ້າຈະຮຽນແບບພະເຢໂຫວາແນວໃດໃນການໃຫ້ອະໄພ?
“ພວກເຈົ້າຕ້ອງເຕັມໃຈໃຫ້ອະໄພໃຫ້ກັນຄືກັບທີ່ພະເຢໂຫວາເຕັມໃຈໃຫ້ອະໄພໃຫ້ພວກເຈົ້າ.”—ກລຊ. 3:13
ຈຸດສຳຄັນ
ໃນບົດນີ້ ເຮົາຈະເບິ່ງ 3 ຂັ້ນຕອນທີ່ຈະຊ່ວຍເຮົາໃຫ້ອະໄພຄົນທີ່ເຮັດໃຫ້ເຮົາເຈັບ.
1-2. (ກ) ຕອນໃດທີ່ເຮົາຮູ້ສຶກວ່າຍາກຫຼາຍທີ່ຈະໃຫ້ອະໄພຄົນອື່ນ? (ຂ) ເດນິດສ໌ໃຫ້ອະໄພຄົນອື່ນແນວໃດ?
ເຈົ້າຮູ້ສຶກວ່າຍາກບໍທີ່ຈະໃຫ້ອະໄພຄົນອື່ນ? ພວກເຮົາຫຼາຍຄົນຮູ້ສຶກວ່າຍາກ ໂດຍສະເພາະຖ້າມີໃຜເວົ້າຫຼືເຮັດບາງຢ່າງທີ່ເຮັດໃຫ້ເຮົາເຈັບຫຼາຍ. ແຕ່ເຮົາສາມາດເອົາຊະນະຄວາມຮູ້ສຶກແບບນັ້ນແລະໃຫ້ອະໄພຄົນອື່ນໄດ້ແທ້ໆ. ໃຫ້ເຮົາມາເບິ່ງເລື່ອງຂອງພີ່ນ້ອງເດນິດສ໌.a ໃນປີ 2017 ເດນິດສ໌ກັບຄອບຄົວໄປຢ້ຽມຊົມສຳນັກງານໃຫຍ່ຂອງພະຍານພະເຢໂຫວາທີ່ຫາກໍເປີດໃໝ່. ຕອນທີ່ເມືອເຮືອນ ມີລົດຄັນໜຶ່ງເສຍຫຼັກມາຕຳລົດຂອງເຂົາເຈົ້າບັກແຮງໆ. ເດນິດສ໌ສະຫຼົບ ແລະເມື່ອລາວຟື້ນ ລາວໄດ້ຮູ້ວ່າພວກລູກເຈັບໜັກ ແຕ່ໄບຣອັ້ນຜົວຂອງລາວຕາຍ. ເມື່ອຄິດເຖິງເຫດການນັ້ນ ລາວເວົ້າວ່າ: “ຂ້ອຍຕົກໃຈແລະເສຍໃຈຫຼາຍຈົນເຮັດຫຍັງບໍ່ຖືກ.” ຕໍ່ມາ ລາວໄດ້ຮູ້ວ່າມັນເປັນອຸບັດຕິເຫດ. ຄົນຂັບລົດບໍ່ໄດ້ເມົາເຫຼົ້າຫຼືເມົາຢາເສບຕິດ ແລະບໍ່ໄດ້ເກິເບິ່ງໂທລະສັບຫຼືແນວອື່ນ. ເດນິດສ໌ອະທິດຖານຂໍພະເຢໂຫວາຊ່ວຍລາວໃຫ້ມີຄວາມສະຫງົບໃຈເພື່ອລາວຈະບໍ່ໃຈຮ້າຍໃຫ້ຜູ້ຊາຍຄົນນັ້ນທີ່ເຮັດໃຫ້ຜົວລາວຕາຍ.
2 ຄົນຂັບລົດຖືກຈັບແລະຕ້ອງຂຶ້ນສານໂດຍຖືກຕັ້ງຂໍ້ຫາວ່າເຮັດໃຫ້ຜູ້ອື່ນຕາຍໂດຍບໍ່ຕັ້ງໃຈ. ຖ້າສານຕັດສິນວ່າຜູ້ຊາຍຄົນນີ້ມີຄວາມຜິດ ລາວຈະຕ້ອງຕິດຄຸກ. ສານບອກເດນິດສ໌ວ່າ ຄຳຕັດສິນຈະອອກມາເປັນແບບໃດກໍຂຶ້ນຢູ່ກັບຄຳໃຫ້ການຂອງລາວ. ເດນິດສ໌ເວົ້າວ່າ: “ເມື່ອຂ້ອຍຕ້ອງເວົ້າເຖິງເຫດການທີ່ໂຫດຮ້າຍທີ່ສຸດໃນຊີວິດຂອງຂ້ອຍຄືນອີກ ຂ້ອຍຮູ້ສຶກຄືກັບວ່າມີຄົນຕັດໄໝຫຍິບບາດຂອງຂ້ອຍແລະຜີ່ບາດອອກ ແລ້ວເອົາເກືອຄຸໃຫຍ່ໆຖອກໃສ່ບາດນັ້ນ.” ສອງສາມອາທິດຕໍ່ມາ ເດນິດສ໌ນັ່ງຢູ່ໃນສານແລະກຽມຊິໃຫ້ການຕໍ່ໜ້າຜູ້ຊາຍທີ່ເຮັດໃຫ້ຄອບຄົວຂອງລາວຕ້ອງເຈັບປວດຫຼາຍ. ຕອນນັ້ນເດນິດສ໌ເວົ້າຫຍັງ? ລາວຂໍຮ້ອງສານໃຫ້ເມດຕາຜູ້ຊາຍຄົນນັ້ນ.b ເມື່ອເດນິດສ໌ເວົ້າຈົບ ຜູ້ພິພາກສາກໍໄຫ້. ລາວເວົ້າວ່າ: “ຂ້ອຍເປັນຜູ້ພິພາກສາມາ 25 ປີ. ຂ້ອຍບໍ່ເຄີຍໄດ້ຍິນເລື່ອງແບບນີ້ມາກ່ອນ. ຂ້ອຍບໍ່ເຄີຍໄດ້ຍິນຜູ້ທີ່ໄດ້ຮັບຄວາມເສຍຫາຍອ້ອນວອນຂໍຄວາມເມດຕາໃຫ້ຜູ້ທີ່ເຮັດຜິດ. ຂ້ອຍບໍ່ເຄີຍໄດ້ຍິນຄຳເວົ້າທີ່ສະແດງເຖິງຄວາມຮັກແລະການໃຫ້ອະໄພແບບນີ້ມາກ່ອນ.”
3. ສິ່ງໃດຊ່ວຍເດນິດສ໌ໃຫ້ອະໄພຄົນອື່ນ?
3 ສິ່ງໃດຊ່ວຍເດນິດສ໌ໃຫ້ອະໄພຄົນອື່ນ? ລາວຄິດເຖິງການໃຫ້ອະໄພຂອງພະເຢໂຫວາ. (ມກ. 7:18) ເມື່ອເຮົາເຫັນຄ່າທີ່ພະເຢໂຫວາໃຫ້ອະໄພເຮົາ ມັນກໍຈະກະຕຸ້ນເຮົາໃຫ້ຢາກໃຫ້ອະໄພຄົນອື່ນ.
4. ພະເຢໂຫວາຢາກໃຫ້ເຮົາເຮັດຫຍັງ? (ເອເຟໂຊ 4:32)
4 ພະເຢໂຫວາຢາກໃຫ້ເຮົາໃຫ້ອະໄພຄົນອື່ນຢ່າງໃຈກວ້າງຄືກັບທີ່ເພິ່ນໃຫ້ອະໄພເຮົາ. (ອ່ານເອເຟໂຊ 4:32) ເພິ່ນຄາດໝາຍໃຫ້ເຮົາພ້ອມທີ່ຈະໃຫ້ອະໄພຄົນທີ່ເຮັດໃຫ້ເຮົາເຈັບ. (ພສ. 86:5; ລກ. 17:4) ໃນບົດນີ້ ເຮົາຈະເບິ່ງ 3 ຂັ້ນຕອນທີ່ຈະຊ່ວຍເຮົາໃຫ້ອະໄພຄົນອື່ນຫຼາຍຂຶ້ນ.
ຢ່າເກັບຄວາມຮູ້ສຶກຂອງເຈົ້າໄວ້
5. ຕາມສຸພາສິດ 12:18 ເຮົາອາດຮູ້ສຶກແນວໃດເມື່ອມີຄົນເຮັດໃຫ້ເຮົາເຈັບ?
5 ເຮົາອາດຮູ້ສຶກເຈັບຫຼາຍຍ້ອນສິ່ງທີ່ຄົນອື່ນເວົ້າຫຼືເຮັດກັບເຮົາ ໂດຍສະເພາະຖ້າຜູ້ນັ້ນເປັນໝູ່ສະໜິດຫຼືຄົນໃນຄອບຄົວຂອງເຮົາ. (ພສ. 55:12-14) ບາງເທື່ອເຮົາອາດໃຈຮ້າຍຫຼາຍຫຼືຮູ້ສຶກເຈັບຄືກັບຖືກມີດແທງ. (ອ່ານສຸພາສິດ 12:18) ເຮົາອາດພະຍາຍາມເກັບຄວາມຮູ້ສຶກເຈັບປວດໄວ້ຫຼືເຮັດຄືກັບວ່າບໍ່ມີຫຍັງເກີດຂຶ້ນ ແຕ່ການເຮັດແບບນີ້ອາດເປັນຄືກັບວ່າເຮົາຖືກມີດແທງແລະປ່ອຍໃຫ້ມີດຄາຢູ່ຫັ້ນ. ຄ້າຍຄືກັນ ເຮົາບໍ່ສາມາດຄາດໝາຍໃຫ້ຄວາມຮູ້ສຶກເຈັບປວດດີຂຶ້ນຖ້າເຮົາເກັບຄວາມຮູ້ສຶກນັ້ນໄວ້ແລະບໍ່ຍອມກຳຈັດມັນ.
6. ເມື່ອມີຄົນເຮັດໃຫ້ເຮົາເຈັບ ເຮົາອາດຮູ້ສຶກແນວໃດ?
6 ເມື່ອມີຄົນເຮັດໃຫ້ເຮົາເຈັບ ຄວາມຮູ້ສຶກທຳອິດແມ່ນເຮົາອາດຈະໃຈຮ້າຍ. ຄຳພີໄບເບິນຍອມຮັບວ່າເຮົາໃຈຮ້າຍໄດ້ ແຕ່ກໍເຕືອນນຳວ່າຢ່າໃຫ້ຄວາມໃຈຮ້າຍຄວບຄຸມເຮົາ. (ພສ. 4:4; ອຟຊ. 4:26) ຍ້ອນຫຍັງ? ຍ້ອນວ່າເມື່ອເຮົາຮູ້ສຶກແນວໃດ ເຮົາກໍມັກຈະເຮັດແນວນັ້ນ ແລະຄວາມໃຈຮ້າຍບໍ່ໄດ້ຊ່ວຍເຮົາໃຫ້ເຮັດສິ່ງທີ່ຖືກຕ້ອງ. (ຢກບ. 1:20) ໃຫ້ຈື່ໄວ້ວ່າເຮົາໃຈຮ້າຍໄດ້ ແຕ່ເຮົາຈະໃຈຮ້າຍຕໍ່ໄປຫຼືບໍ່ແມ່ນຂຶ້ນຢູ່ກັບເຮົາ.
ໃຫ້ຈື່ໄວ້ວ່າເຮົາໃຈຮ້າຍໄດ້ ແຕ່ເຮົາຈະໃຈຮ້າຍຕໍ່ໄປຫຼືບໍ່ແມ່ນຂຶ້ນຢູ່ກັບເຮົາ
7. ເມື່ອມີຄົນເຮັດໃຫ້ເຮົາເຈັບ ເຮົາອາດຮູ້ສຶກແບບໃດອີກ?
7 ເມື່ອມີຄົນເຮັດບໍ່ດີກັບເຮົາ ເຮົາອາດມີຄວາມຮູ້ສຶກແບບອື່ນນຳ. ຕົວຢ່າງເຊັ່ນ: ພີ່ນ້ອງຍິງຊື່ແອນເວົ້າວ່າ: “ຕອນຂ້ອຍຍັງນ້ອຍ ພໍ່ຖິ້ມແມ່ໄປແຕ່ງດອງກັບເອື້ອຍລ້ຽງຂອງຂ້ອຍ. ຂ້ອຍຮູ້ສຶກຖືກປະຖິ້ມ. ເມື່ອເຂົາເຈົ້າມີລູກ ຂ້ອຍກໍຮູ້ສຶກວ່າມີຄົນມາແທນບ່ອນຂ້ອຍ. ຂ້ອຍໃຫຍ່ຂຶ້ນມາພ້ອມກັບຄວາມຮູ້ສຶກທີ່ວ່າບໍ່ມີໃຜຮັກແລະບໍ່ມີໃຜຕ້ອງການ.” ພີ່ນ້ອງຍິງຊື່ຈໍເຈັດເວົ້າເຖິງຄວາມຮູ້ສຶກຕອນທີ່ຜົວຂອງລາວນອກໃຈ. ລາວເວົ້າວ່າ: “ຂ້ອຍກັບຜົວເປັນໝູ່ກັນຕັ້ງແຕ່ນ້ອຍແລະເປັນໄພໂອເນຍນຳກັນ. ເມື່ອລາວເຮັດແບບນີ້ ຫົວໃຈຂ້ອຍກໍແຕກສະຫຼາຍ.” ໃນທີ່ສຸດ ເຂົາເຈົ້າກໍປະກັນ. ພີ່ນ້ອງຍິງຊື່ນາໂອມິເວົ້າວ່າ: “ຂ້ອຍບໍ່ເຄີຍຄິດມາກ່ອນວ່າຜົວຈະເຮັດໃຫ້ຂ້ອຍເສຍໃຈຫຼາຍປານນີ້. ຕອນທີ່ລາວບອກວ່າລາວລັກເບິ່ງສື່ລາມົກ ຂ້ອຍຮູ້ສຶກຄືກັບວ່າຖືກຕົວະແລະຖືກທໍລະຍົດ.”
8. (ກ) ມີເຫດຜົນຫຍັງແດ່ທີ່ເຮົາຄວນໃຫ້ອະໄພຄົນອື່ນ? (ຂ) ເຮົາໄດ້ຮັບປະໂຫຍດຫຍັງເມື່ອໃຫ້ອະໄພຄົນອື່ນ? (ເບິ່ງຂອບ “ຖ້າມີຄົນເຮັດໃຫ້ເຈົ້າເຈັບຈົນຝັງໃຈເດ?”)
8 ເຮົາບໍ່ສາມາດຄວບຄຸມສິ່ງທີ່ຄົນອື່ນເວົ້າຫຼືເຮັດ ແຕ່ເຮົາສາມາດຄວບຄຸມໂຕເອງໄດ້. ວິທີທີ່ດີທີ່ສຸດທີ່ເຮົາເຮັດໄດ້ແມ່ນ ໃຫ້ອະໄພ. ຍ້ອນຫຍັງ? ຍ້ອນເຮົາຮັກພະເຢໂຫວາ ແລະເພິ່ນຢາກໃຫ້ເຮົາໃຫ້ອະໄພຄົນອື່ນ. ຖ້າເຮົາໃຈຮ້າຍບໍ່ເຊົາແລະບໍ່ຍອມໃຫ້ອະໄພ ເຮົາອາດຈະເຮັດບາງຢ່າງທີ່ບໍ່ສະຫຼາດແລະອາດເຖິງຂັ້ນທຳລາຍສຸຂະພາບໂຕເອງ. (ສພສ. 14:17, 29, 30) ໃຫ້ເບິ່ງຕົວຢ່າງຂອງຄລິດສະຕິນ. ລາວເວົ້າວ່າ: “ຍາມຂ້ອຍໃຈຮ້າຍຫຼາຍ ຂ້ອຍຈະບໍ່ຍິ້ມ ແລ້ວກໍກິນແນວທີ່ບໍ່ມີປະໂຫຍດ ນອນບໍ່ພໍ ແລະຄວບຄຸມອາລົມບໍ່ໄດ້ ເຊິ່ງເຮັດໃຫ້ຂ້ອຍເຮັດບໍ່ດີຕໍ່ຜົວແລະຕໍ່ຄົນອື່ນ.”
9. ເປັນຫຍັງເຮົາບໍ່ຄວນເກັບຄວາມໃຈຮ້າຍໄວ້?
9 ເຖິງວ່າຄົນທີ່ເຮັດໃຫ້ເຮົາເຈັບບໍ່ເຄີຍຂໍໂທດເຮົາ ແຕ່ເຮົາສາມາດເຮັດບາງຢ່າງເພື່ອເຮັດໃຫ້ໂຕເອງຮູ້ສຶກດີຂຶ້ນ. ເຮົາຈະເຮັດແນວໃດ? ຈໍເຈັດທີ່ເວົ້າເຖິງກ່ອນໜ້ານີ້ເວົ້າວ່າ: “ຂ້ອຍຕ້ອງໃຊ້ເວລາດົນເຕີບເພື່ອຈະເຊົາໃຈຮ້າຍໃຫ້ຜົວເກົ່າໄດ້. ເມື່ອເຮັດແບບນັ້ນ ຂ້ອຍກໍຮູ້ສຶກສະຫງົບໃຈຫຼາຍແທ້ໆ.” ເມື່ອເຮົາບໍ່ເກັບຄວາມໃຈຮ້າຍໄວ້ໃນໃຈ ເຮົາກໍຈະບໍ່ເປັນຄົນທີ່ມີແຕ່ຄວາມຂົມຂື່ນ. ນອກຈາກນັ້ນ ເຮົາຍັງເຮັດສິ່ງທີ່ດີສຳລັບໂຕເອງນຳ ນັ້ນຄື ເຮົາສາມາດໃຊ້ຊີວິດຢ່າງມີຄວາມສຸກຕໍ່ໄປໄດ້. (ສພສ. 11:17) ຖ້າເຈົ້າເຮັດສິ່ງເຫຼົ່ານີ້ແລ້ວ ແຕ່ຍັງຮູ້ສຶກວ່າບໍ່ພ້ອມທີ່ຈະໃຫ້ອະໄພ ເຈົ້າຈະເຮັດແນວໃດ?
ຮັບມືກັບຄວາມຮູ້ສຶກຂອງໂຕເອງ
10. ເປັນຫຍັງເຮົາຄວນໃຫ້ເວລາໂຕເອງເພື່ອຟື້ນຟູສະພາບຈິດໃຈ? (ເບິ່ງຮູບນຳ)
10 ເຈົ້າຈະເຊົາໃຈຮ້າຍແລ້ວກັບມາມີຄວາມສຸກໄດ້ອີກແນວໃດ? ວິທີໜຶ່ງທີ່ເຮັດໄດ້ແມ່ນ ໃຫ້ເວລາໂຕເອງເພື່ອຟື້ນຟູສະພາບຈິດໃຈ. ຄືກັບຄົນທີ່ບາດເຈັບສາຫັດຕ້ອງໃຊ້ເວລາຟື້ນຟູຮ່າງກາຍ ເຮົາກໍຕ້ອງໃຊ້ເວລາປິ່ນປົວຈິດໃຈກ່ອນຈະໃຫ້ອະໄພຄົນອື່ນຈາກໃຈໄດ້ແທ້ໆ.—ປຍຈ. 3:3; 1ປຕ. 1:22
ຄືກັບຄົນທີ່ບາດເຈັບສາຫັດຕ້ອງໃຊ້ເວລາຟື້ນຟູຮ່າງກາຍ ເຮົາກໍຕ້ອງໃຊ້ເວລາເພື່ອປິ່ນປົວຈິດໃຈ (ເບິ່ງຂໍ້ 10)
11. ການອະທິດຖານຊ່ວຍເຈົ້າແນວໃດເພື່ອໃຫ້ອະໄພຄົນອື່ນ?
11 ໃຫ້ອະທິດຖານຫາພະເຢໂຫວາເພື່ອຂໍເພິ່ນຊ່ວຍເຈົ້າໃຫ້ອະໄພຄົນອື່ນ.c ແອນທີ່ເວົ້າເຖິງກ່ອນໜ້ານີ້ເວົ້າວ່າ ການອະທິດຖານຊ່ວຍລາວໄດ້ຫຼາຍ. ລາວເວົ້າວ່າ: “ຂ້ອຍຂໍພະເຢໂຫວາໃຫ້ອະໄພພວກເຮົາແຕ່ລະຄົນໃນຄອບຄົວທີ່ເວົ້າຫຼືເຮັດສິ່ງທີ່ບໍ່ຖືກຕ້ອງ. ຈາກນັ້ນ ຂ້ອຍກໍຂຽນຈົດໝາຍໄປຫາພໍ່ກັບແມ່ນ້າແລະບອກພວກເພິ່ນວ່າຂ້ອຍຍົກໂທດໃຫ້ພວກເພິ່ນແລ້ວ.” ແອນຍອມຮັບວ່າການເຮັດແບບນີ້ຍາກແທ້ໆແຕ່ລາວເວົ້າວ່າ: “ຂ້ອຍຫວັງວ່າການທີ່ຂ້ອຍພະຍາຍາມຮຽນແບບພະເຢໂຫວາໃນການໃຫ້ອະໄພອາດກະຕຸ້ນພໍ່ກັບແມ່ນ້າໃຫ້ຢາກຮຽນຮູ້ກ່ຽວກັບພະເຢໂຫວາຫຼາຍຂຶ້ນ.”
12. ເປັນຫຍັງເຮົາຄວນໄວ້ໃຈພະເຢໂຫວາແທນທີ່ຈະໄວ້ໃຈຄວາມຮູ້ສຶກຂອງໂຕເອງ? (ສຸພາສິດ 3:5, 6)
12 ໃຫ້ໄວ້ໃຈພະເຢໂຫວາແທນທີ່ຈະໄວ້ໃຈຄວາມຮູ້ສຶກຂອງໂຕເອງ. (ອ່ານສຸພາສິດ 3:5, 6) ພະເຢໂຫວາຮູ້ວ່າອັນໃດດີທີ່ສຸດສຳລັບເຮົາ. (ອຊຢ. 55:8, 9) ເພິ່ນຈະບໍ່ມີທາງຂໍໃຫ້ເຮົາເຮັດສິ່ງທີ່ບໍ່ດີຕໍ່ໂຕເອງ. ດັ່ງນັ້ນ ເມື່ອເພິ່ນຂໍໃຫ້ເຮົາໃຫ້ອະໄພຄົນອື່ນ ເຮົາກໍໝັ້ນໃຈໄດ້ວ່າຖ້າເຮົາເຮັດແບບນັ້ນຈະເປັນປະໂຫຍດຕໍ່ເຮົາແນ່ນອນ. (ພສ. 40:4; ອຊຢ. 48:17, 18) ແຕ່ຖ້າເຮົາໄວ້ໃຈຄວາມຮູ້ສຶກຂອງໂຕເອງ ເຮົາອາດໃຫ້ອະໄພຄົນອື່ນບໍ່ໄດ້. (ສພສ. 14:12; ຢຣມ. 17:9) ນາໂອມິທີ່ເວົ້າເຖິງກ່ອນໜ້ານີ້ເວົ້າວ່າ: “ທຳອິດ ຂ້ອຍຮູ້ສຶກວ່າບໍ່ຕ້ອງໃຫ້ອະໄພຜົວກໍໄດ້ທີ່ເບິ່ງສື່ລາມົກຍ້ອນຂ້ອຍຢ້ານວ່າລາວຈະເຮັດໃຫ້ຂ້ອຍເສຍໃຈອີກ ແລະຢ້ານວ່າລາວຈະລືມວ່າລາວເຮັດໃຫ້ຂ້ອຍເສຍໃຈຫຼາຍສ່ຳໃດ. ຂ້ອຍຫາເຫດຜົນວ່າ ພະເຢໂຫວາເຂົ້າໃຈຄວາມຮູ້ສຶກຂອງຂ້ອຍ. ແຕ່ຕໍ່ມາຂ້ອຍກໍສຳນຶກວ່າ ແມ່ນຢູ່ວ່າພະເຢໂຫວາເຂົ້າໃຈຄວາມຮູ້ສຶກຂອງຂ້ອຍ ແຕ່ກໍບໍ່ໄດ້ໝາຍຄວາມວ່າເພິ່ນເຫັນດີກັບຄວາມຄິດຂອງຂ້ອຍ. ເພິ່ນຮູ້ວ່າຂ້ອຍຮູ້ສຶກແນວໃດແລະຕ້ອງໃຊ້ເວລາເພື່ອຈະຮູ້ສຶກດີຂຶ້ນ ແຕ່ເພິ່ນກໍຢາກໃຫ້ຂ້ອຍໃຫ້ອະໄພຄົນອື່ນນຳ.”d
ສ້າງຄວາມຮູ້ສຶກທີ່ດີ
13. ຕາມໂຣມ 12:18-21 ເຮົາຕ້ອງເຮັດຫຍັງ?
13 ເມື່ອເຮົາໃຫ້ອະໄພຄົນທີ່ເຮັດໃຫ້ເຮົາເຈັບຫຼາຍ ເຮົາຕ້ອງເຮັດຫຼາຍກວ່າການປ່ອຍໃຫ້ເລື່ອງນັ້ນຜ່ານໄປຊື່ໆ. ເປົ້າໝາຍຂອງເຮົາແມ່ນຢາກຄືນດີກັບລາວ ໂດຍສະເພາະຖ້າຜູ້ນັ້ນເປັນພີ່ນ້ອງຮ່ວມຄວາມເຊື່ອຂອງເຮົາ. (ມທ. 5:23, 24) ແທນທີ່ຈະຮູ້ສຶກໃຈຮ້າຍ ເຮົາຢາກສະແດງຄວາມເມດຕາແລະໃຫ້ອະໄພລາວ. (ອ່ານໂຣມ 12:18-21; 1ປຕ. 3:9) ອັນໃດຈະຊ່ວຍເຮົາໃຫ້ເຮັດແບບນັ້ນໄດ້?
14. ເຮົາຄວນພະຍາຍາມເຮັດຫຍັງ ແລະຍ້ອນຫຍັງ?
14 ພະເຢໂຫວາເລືອກທີ່ຈະເບິ່ງສິ່ງທີ່ດີໃນໂຕຄົນອື່ນ. ເຮົາກໍຄວນພະຍາຍາມຮຽນແບບພະເຢໂຫວາແລະເບິ່ງຄົນທີ່ເຮັດຜິດຕໍ່ເຮົາຄືກັບທີ່ພະເຢໂຫວາເບິ່ງ. (2ຂຄ. 16:9; ພສ. 130:3) ປົກກະຕິແລ້ວເຮົາເລືອກໄດ້ວ່າຈະເບິ່ງຄົນອື່ນແນວໃດ ເຮົາຈະເບິ່ງຈຸດດີຫຼືວ່າຈຸດທີ່ບໍ່ດີຂອງເຂົາເຈົ້າ. ຖ້າເຮົາເບິ່ງຈຸດດີໃນໂຕຄົນອື່ນ ມັນກໍງ່າຍຂຶ້ນທີ່ເຮົາຈະໃຫ້ອະໄພເຂົາເຈົ້າ. ພີ່ນ້ອງຊາຍຊື່ຈາຣັອດເວົ້າວ່າ: “ຖ້າຂ້ອຍເບິ່ງຈຸດດີຂອງພີ່ນ້ອງທີ່ມີຫຼາຍກວ່າຈຸດທີ່ບໍ່ດີ ມັນຈະຊ່ວຍຂ້ອຍໃຫ້ອະໄພລາວໄດ້ງ່າຍຂຶ້ນ.”
15. ເປັນຫຍັງການເວົ້າຄຳວ່າໃຫ້ອະໄພຈຶ່ງເປັນສິ່ງທີ່ດີຫຼາຍ?
15 ສິ່ງທີ່ສຳຄັນອີກຢ່າງໜຶ່ງແມ່ນ ການບອກຄົນທີ່ເຮັດຜິດຕໍ່ເຈົ້າວ່າເຈົ້າໃຫ້ອະໄພລາວແລ້ວ. ເປັນຫຍັງເລື່ອງນີ້ຈຶ່ງສຳຄັນ? ນາໂອມິທີ່ເວົ້າເຖິງກ່ອນໜ້ານີ້ເວົ້າວ່າ: “ມີເທື່ອໜຶ່ງຜົວຖາມຂ້ອຍວ່າ ‘ເຈົ້າໃຫ້ອະໄພຂ້ອຍແລ້ວບໍ?’ ຕອນທີ່ຂ້ອຍກຳລັງອ້າປາກຊິບອກລາວວ່າ ‘ຂ້ອຍໃຫ້ອະໄພເຈົ້າ’ ຂ້ອຍພັດເວົ້າບໍ່ອອກ. ຂ້ອຍຮູ້ເລີຍວ່າຂ້ອຍຍັງບໍ່ໄດ້ໃຫ້ອະໄພລາວຈາກໃຈແທ້ໆ. ເມື່ອເວລາຜ່ານໄປ ຂ້ອຍກໍສາມາດເວົ້າຄຳວ່າ ‘ຂ້ອຍໃຫ້ອະໄພເຈົ້າ’ ເຊິ່ງເປັນຄຳເວົ້າທີ່ມີພະລັງຫຼາຍ. ເມື່ອຜົວໄດ້ຍິນຂ້ອຍເວົ້າແບບນີ້ ລາວກໍໄຫ້. ຂ້ອຍບໍ່ຢາກເຊື່ອເລີຍວ່າຄຳເວົ້າຂອງຂ້ອຍຈະເຮັດໃຫ້ລາວຮູ້ສຶກໂລ່ງໃຈປານນີ້ ແລະເມື່ອຂ້ອຍໃຫ້ອະໄພລາວແລ້ວ ຂ້ອຍກໍຮູ້ສຶກດີຂຶ້ນແທ້ໆ. ຫຼັງຈາກນັ້ນ ຂ້ອຍກໍກັບມາໄວ້ໃຈລາວໄດ້ອີກ ແລະເຮົາກໍກັບມາເປັນໝູ່ສະໜິດກັນຄືເກົ່າ.”
16. ເຈົ້າໄດ້ຮຽນຫຍັງກ່ຽວກັບການໃຫ້ອະໄພ?
16 ພະເຢໂຫວາຢາກໃຫ້ເຮົາໃຫ້ອະໄພກັນ. (ກລຊ. 3:13) ເຖິງຈະເປັນແນວນັ້ນ ເຮົາອາດຮູ້ສຶກວ່າຍາກທີ່ຈະໃຫ້ອະໄພຄົນອື່ນ. ແຕ່ເຮົາກໍສາມາດໃຫ້ອະໄພຄົນອື່ນໄດ້ ຖ້າເຮົາບໍ່ເກັບຄວາມຮູ້ສຶກຂອງໂຕເອງໄວ້ ຮັບມືກັບຄວາມຮູ້ສຶກຂອງໂຕເອງ ແລະຈາກນັ້ນກໍສ້າງຄວາມຮູ້ສຶກທີ່ດີຂຶ້ນມາ.—ເບິ່ງຂອບ “ສາມຂັ້ນຕອນທີ່ຈະຊ່ວຍເຮົາໃຫ້ອະໄພ”
ຄິດເຖິງປະໂຫຍດຂອງການໃຫ້ອະໄພ
17. ການໃຫ້ອະໄພມີປະໂຫຍດຕໍ່ເຮົາແນວໃດ?
17 ເຮົາມີເຫດຜົນຫຼາຍຢ່າງທີ່ຈະໃຫ້ອະໄພ. ໃຫ້ເຮົາເບິ່ງບາງເຫດຜົນນຳກັນ. ເຫດຜົນທຳອິດ ເຮົາຮຽນແບບພະເຢໂຫວາພໍ່ທີ່ມີຄວາມອີ່ຕົນແລະເຮັດໃຫ້ເພິ່ນພໍໃຈ. (ລກ. 6:36) ເຫດຜົນທີ 2 ເຮົາສະແດງໃຫ້ເຫັນວ່າເຮົາຂອບໃຈທີ່ພະເຢໂຫວາໃຫ້ອະໄພເຮົາ. (ມທ. 6:12) ເຫດຜົນທີ 3 ເຮົາຈະມີສຸຂະພາບທີ່ດີຂຶ້ນແລະສາມາດຮັກສາສາຍສຳພັນທີ່ດີກັບຄົນອື່ນ.
18-19. ເມື່ອເຮົາໃຫ້ອະໄພ ຜົນອາດເປັນແນວໃດ?
18 ເມື່ອເຮົາໃຫ້ອະໄພຄົນອື່ນ ເຮົາອາດໄດ້ເຫັນສິ່ງດີໆທີ່ເຮົາບໍ່ຄາດຄິດ. ຕົວຢ່າງເຊັ່ນ: ໃຫ້ເຮົາເບິ່ງສິ່ງທີ່ເກີດຂຶ້ນກັບເດນິດສ໌ທີ່ເວົ້າເຖິງກ່ອນໜ້ານີ້. ໃນຕອນນັ້ນ ເດນິດສ໌ບໍ່ຮູ້ເລີຍວ່າຜູ້ຊາຍທີ່ຂັບລົດຕຳລາວໄດ້ວາງແຜນຈະຂ້າໂຕຕາຍຫຼັງຈາກໄປຂຶ້ນສານ. ແຕ່ຍ້ອນເດນິດສ໌ໃຫ້ອະໄພລາວ ລາວຈຶ່ງປະທັບໃຈຫຼາຍຈົນເລີ່ມຮຽນຄຳພີໄບເບິນກັບພະຍານພະເຢໂຫວາ.
19 ເຮົາອາດຮູ້ສຶກວ່າການໃຫ້ອະໄພຜູ້ໃດຜູ້ໜຶ່ງເປັນເລື່ອງໜຶ່ງທີ່ຍາກທີ່ສຸດ ແຕ່ມັນກໍຄຸ້ມຄ່າແທ້ໆທີ່ຈະເຮັດແບບນັ້ນ! (ມທ. 5:7) ດັ່ງນັ້ນ ໃຫ້ເຮົາທຸກຄົນພະຍາຍາມເຕັມທີທີ່ຈະຮຽນແບບພະເຢໂຫວາໃນການໃຫ້ອະໄພ.
ເພງທີ 125 ຄົນທີ່ເມດຕາກໍມີຄວາມສຸກ
a ຊື່ສົມມຸດ.
b ໃນກໍລະນີແບບນີ້ ແຕ່ລະຄົນຕ້ອງຕັດສິນໃຈເອົາເອງວ່າຈະເຮັດແນວໃດ.
c ເບິ່ງມິວສິກວິດີໂອໃນເວັບໄຊ jw.org ເພງ “ໃຫ້ອະໄພກັນແລະລືມສະ” “ເຕັມໃຈໃຫ້ອະໄພ” ແລະ “ເປັນເພື່ອນດັ່ງເດີມ” (ພາສາໄທ)
d ເຖິງວ່າການເບິ່ງສື່ລາມົກເປັນການເຮັດຜິດແລະເຮັດໃຫ້ຄູ່ຂອງໂຕເອງເຈັບປວດໃຈຫຼາຍ ແຕ່ມັນກໍບໍ່ແມ່ນເຫດຜົນສຳລັບຝ່າຍທີ່ບໍ່ໄດ້ເຮັດຜິດທີ່ຈະຢ່າຮ້າງຕາມຫຼັກການໃນພະຄຳພີ.