ບົດຄວາມສຶກສາທີ 20
ເພງທີ 7 ພະເຢໂຫວາເປັນກຳລັງຂອງເຮົາ
ໃຫ້ເພິ່ງພະເຢໂຫວາເພື່ອຈະໄດ້ກຳລັງໃຈ
“ຂໍໃຫ້ພະເຈົ້າ . . . ໄດ້ຮັບການຍ້ອງຍໍສັນລະເສີນ. ເພິ່ນເປັນພໍ່ທີ່ມີຄວາມເມດຕາແລະເປັນພະເຈົ້າທີ່ໃຫ້ກຳລັງໃຈໃນທຸກສະຖານະການ.”—2ກຣ. 1:3
ຈຸດສຳຄັນ
ເຮົາຈະຮຽນວ່າພະເຢໂຫວາໃຫ້ກຳລັງໃຈຄົນຢິວທີ່ເປັນຊະເລີຍຢູ່ບາບີໂລນແນວໃດ ແລະເຮົາຈະໄດ້ຮັບປະໂຫຍດຫຍັງຈາກເລື່ອງນີ້.
1. ຊີວິດຂອງຄົນຢິວທີ່ເປັນຊະເລີຍຢູ່ບາບີໂລນເປັນແນວໃດ?
ເປັນເວລາຫຼາຍປີທີ່ຄົນຢິວບໍ່ເຊື່ອຟັງພະເຢໂຫວາ. ຍ້ອນແນວນີ້ເພິ່ນຈຶ່ງໃຫ້ພວກບາບີໂລນມາທຳລາຍບ້ານເກີດເມືອງນອນຂອງເຂົາເຈົ້າ ແລະເອົາເຂົາເຈົ້າໄປເປັນຊະເລີຍຢູ່ບາບີໂລນ. (2ຂຄ. 36:15, 16, 20, 21) ຊີວິດຂອງຄົນຢິວຢູ່ຫັ້ນເປັນແນວໃດ? ເຂົາເຈົ້າໃຊ້ຊີວິດຕາມປົກກະຕິ. (ຢຣມ. 29:4-7) ແຕ່ຊີວິດຢູ່ຫັ້ນກໍບໍ່ງ່າຍ ແລະຖ້າເລືອກໄດ້ເຂົາເຈົ້າຄືຊິບໍ່ເລືອກຢູ່ຫັ້ນ. ເຂົາເຈົ້າຮູ້ສຶກແນວໃດຕໍ່ກັບສະພາບການຂອງໂຕເອງ? ຂໍໃຫ້ສັງເກດເບິ່ງຄຳເວົ້າຂອງຄົນຢິວຜູ້ໜຶ່ງທີ່ເວົ້າວ່າ: “ພວກເຮົານັ່ງຢູ່ແຄມແມ່ນ້ຳຂອງເມືອງບາບີໂລນ. ພວກເຮົາຮ້ອງໄຫ້ຕອນທີ່ຄິດຮອດຊີໂອນ.” (ພສ. 137:1) ເຫັນໄດ້ແຈ້ງວ່າຄົນຢິວເສົ້າໃຈຫຼາຍແລະຕ້ອງການກຳລັງໃຈແທ້ໆ. ແຕ່ເຂົາເຈົ້າຈະໄດ້ກຳລັງໃຈຈາກໃສ?
2-3. (ກ) ພະເຢໂຫວາໄດ້ເຮັດຫຍັງເພື່ອຄົນຢິວທີ່ເປັນຊະເລີຍຢູ່ບາບີໂລນ? (ຂ) ເຮົາຈະຮຽນຫຍັງໃນບົດນີ້?
2 ພະເຢໂຫວາເປັນ “ພະເຈົ້າທີ່ໃຫ້ກຳລັງໃຈໃນທຸກສະຖານະການ.” (2ກຣ. 1:3) ເພິ່ນຮັກຜູ້ຮັບໃຊ້ຂອງເພິ່ນທຸກຄົນແລະຢາກໃຫ້ກຳລັງໃຈເຂົາເຈົ້າ. ພະເຢໂຫວາຮູ້ວ່າຊະເລີຍບາງຄົນຈະຍອມຮັບການສອນຈາກເພິ່ນແລະກັບມາຫາເພິ່ນ. (ອຊຢ. 59:20) ຫຼາຍຮ້ອຍປີກ່ອນທີ່ຄົນຢິວຈະໄປເປັນຊະເລີຍຢູ່ບາບີໂລນ ພະເຢໂຫວາໄດ້ໃຫ້ຜູ້ພະຍາກອນເອຊາຢາຂຽນປຶ້ມຫົວໜຶ່ງທີ່ເປັນຊື່ຂອງລາວ. ຍ້ອນຫຍັງຈຶ່ງໃຫ້ຂຽນ? ເອຊາຢາບອກວ່າ: “ພະເຈົ້າຂອງພວກເຈົ້າເວົ້າວ່າ: ‘ໃຫ້ປອບໂຍນປະຊາຊົນຂອງເຮົາ.’” (ອຊຢ. 40:1) ພະເຢໂຫວາຢາກໃຫ້ກຳລັງໃຈຄົນຢິວທີ່ເປັນຊະເລີຍຜ່ານທາງສິ່ງທີ່ເອຊາຢາຂຽນ.
3 ຄົນຢິວທີ່ເປັນຊະເລີຍຢູ່ບາບີໂລນຕ້ອງການກຳລັງໃຈ ພວກເຮົາໃນທຸກມື້ນີ້ກໍຕ້ອງການກຳລັງໃຈຄືກັນ. ໃນບົດນີ້ ເຮົາຈະເບິ່ງ 3 ວິທີທີ່ພະເຢໂຫວາໃຫ້ກຳລັງໃຈຄົນຢິວເຫຼົ່ານັ້ນ (1) ເພິ່ນສັນຍາວ່າຈະໃຫ້ອະໄພຄົນທີ່ກັບໃຈ (2) ເພິ່ນໃຫ້ເຂົາເຈົ້າມີຄວາມຫວັງ ແລະ (3) ເພິ່ນຊ່ວຍເຂົາເຈົ້າບໍ່ໃຫ້ຢ້ານ. ຕອນທີ່ເບິ່ງຈຸດເຫຼົ່ານີ້ໃຫ້ສັງເກດວ່າພະເຢໂຫວາໃຫ້ກຳລັງໃຈເຮົາແບບດຽວກັນນັ້ນແນວໃດໃນທຸກມື້ນີ້.
ພະເຢໂຫວາເມດຕາແລະໃຫ້ອະໄພເຮົາ
4. ພະເຢໂຫວາສະແດງໃຫ້ເຫັນແນວໃດວ່າເພິ່ນເປັນພະເຈົ້າທີ່ເມດຕາ? (ເອຊາຢາ 55:7)
4 ພະເຢໂຫວາເປັນ “ພໍ່ທີ່ມີຄວາມເມດຕາ.” (2ກຣ. 1:3) ເພິ່ນສະແດງໃຫ້ເຫັນຄຸນລັກສະນະນີ້ຕອນທີ່ເພິ່ນສັນຍາວ່າຈະໃຫ້ອະໄພຄົນຢິວທີ່ກັບໃຈ. (ອ່ານເອຊາຢາ 55:7) ເພິ່ນບອກວ່າ: “ຍ້ອນເຮົາມີຄວາມຮັກທີ່ໝັ້ນຄົງຕະຫຼອດໄປ ເຮົາຈຶ່ງອີ່ຕົນເຈົ້າ.” (ອຊຢ. 54:8) ພະເຢໂຫວາສະແດງຄວາມເມດຕາແນວໃດ? ເຖິງວ່າຄົນຢິວຍັງຕ້ອງຮັບຜົນຈາກການກະທຳຂອງໂຕເອງ ແຕ່ພະເຢໂຫວາກໍສັນຍາວ່າເຂົາເຈົ້າຈະບໍ່ໄດ້ເປັນຊະເລີຍຢູ່ບາບີໂລນຕະຫຼອດໄປ. (ອຊຢ. 40:2) ຄຳເວົ້ານີ້ຕ້ອງເຮັດໃຫ້ຄົນຢິວທີ່ກັບໃຈໄດ້ກຳລັງໃຈແທ້ໆ!
5. ເປັນຫຍັງເຮົາຈຶ່ງມີເຫດຜົນທີ່ຈະໝັ້ນໃຈຫຼາຍກວ່າຄົນຢິວທີ່ເປັນຊະເລີຍວ່າພະເຢໂຫວາເມດຕາແທ້ໆ?
5 ເຮົາໄດ້ບົດຮຽນຫຍັງ? ພະເຢໂຫວາເຕັມໃຈໃຫ້ອະໄພຜູ້ຮັບໃຊ້ຂອງເພິ່ນຢ່າງໃຈກວ້າງ. ໃນທຸກມື້ນີ້ ເຮົາມີເຫດຜົນທີ່ຈະໝັ້ນໃຈຫຼາຍກວ່າຄົນຢິວເຫຼົ່ານັ້ນທີ່ເປັນຊະເລີຍ. ຍ້ອນຫຍັງ? ຍ້ອນເຮົາຮູ້ວ່າພະເຢໂຫວາໄດ້ເຮັດຫຍັງແດ່ແລ້ວເພື່ອຈະໃຫ້ອະໄພເຮົາ. ປະມານ 700 ປີຫຼັງຈາກທີ່ເອຊາຢາໄດ້ເວົ້າກ່ຽວກັບການໃຫ້ອະໄພຂອງພະເຢໂຫວາ ພະເຢໂຫວາກໍໄດ້ສົ່ງລູກຊາຍທີ່ເພິ່ນຮັກຫຼາຍມາໂລກນີ້ເພື່ອເປັນຄ່າໄຖ່ໃຫ້ຄົນບາບທຸກຄົນທີ່ກັບໃຈ ແລະຄ່າໄຖ່ນີ້ຊ່ວຍ “ລົບລ້າງ” ຄວາມຜິດໄດ້ຢ່າງຄົບຖ້ວນ. (ກຈກ. 3:19; ອຊຢ. 1:18; ອຟຊ. 1:7) ເຫັນໄດ້ແຈ້ງວ່າພະເຢໂຫວາເປັນພະເຈົ້າທີ່ເມດຕາແລະໃຫ້ອະໄພແທ້ໆ!
6. ເຮົາໄດ້ປະໂຫຍດຫຍັງເມື່ອຄິດເຖິງຄວາມເມດຕາຂອງພະເຢໂຫວາ? (ເບິ່ງຮູບນຳ)
6 ຄຳເວົ້າຂອງພະເຢໂຫວາໃນເອຊາຢາ 55:7 ໃຫ້ກຳລັງໃຈເຮົາຖ້າເຮົາຍັງຮູ້ສຶກຜິດຢູ່ເຖິງວ່າຈະກັບໃຈແລ້ວ. ເຮົາອາດຍັງຮູ້ສຶກຜິດຢູ່ໂດຍສະເພາະຕອນທີ່ຍັງຕ້ອງຮັບຜົນຈາກສິ່ງທີ່ໂຕເອງເຮັດ. ແຕ່ຖ້າເຮົາສາລະພາບຄວາມຜິດແລະເຊົາເຮັດສິ່ງທີ່ບໍ່ດີ ເຮົາກໍໝັ້ນໃຈໄດ້ວ່າພະເຢໂຫວາຈະໃຫ້ອະໄພເຮົາ. ເມື່ອພະເຢໂຫວາໃຫ້ອະໄພແລ້ວ ເພິ່ນຈະບໍ່ຈື່ຄວາມຜິດຂອງເຮົາອີກຕໍ່ໄປ. (ສົມທຽບກັບເຢເຣມີຢາ 31:34) ດັ່ງນັ້ນ ຖ້າພະເຢໂຫວາບໍ່ຈື່ຄວາມຜິດທີ່ເຮົາເຮັດໃນອະດີດ ເຮົາກໍບໍ່ຄວນຈື່ຄືກັນ. ສຳລັບພະເຢໂຫວາ ຄວາມຜິດໃນອະດີດບໍ່ແມ່ນເລື່ອງສຳຄັນ ເພິ່ນສົນໃຈສິ່ງທີ່ເຮົາກຳລັງເຮັດໃນຕອນນີ້ຫຼາຍກວ່າ. (ອຊກ. 33:14-16) ໃນໂລກໃໝ່ທີ່ໃກ້ຈະມາຮອດ ພະເຢໂຫວາພໍ່ທີ່ມີຄວາມເມດຕາຈະກຳຈັດຄວາມທຸກໃຈທີ່ເກີດຈາກຄວາມຜິດທີ່ເຮົາເຮັດໃຫ້ໝົດໄປ.
ສຳລັບພະເຢໂຫວາ ຄວາມຜິດໃນອະດີດບໍ່ແມ່ນເລື່ອງສຳຄັນ. ເພິ່ນສົນໃຈສິ່ງທີ່ເຮົາກຳລັງເຮັດໃນຕອນນີ້ຫຼາຍກວ່າ. (ເບິ່ງຂໍ້ 6)
7. ຖ້າເຮົາເຮັດຜິດຮ້າຍແຮງ ອັນໃດເຮັດໃຫ້ເຮົາຢາກໄປບອກຜູ້ເບິ່ງແຍງ?
7 ເຮົາຄວນເຮັດຫຍັງຖ້າເຮົາຮູ້ສຶກຜິດຍ້ອນເຮັດຜິດຮ້າຍແຮງແລະພະຍາຍາມປິດບັງໄວ້ບໍ່ໃຫ້ໃຜຮູ້? ຄຳພີໄບເບິນບອກເຮົາໃຫ້ຂໍຄວາມຊ່ວຍເຫຼືອຈາກຜູ້ເບິ່ງແຍງ. (ຢກບ. 5:14, 15) ມັນອາດບໍ່ງ່າຍທີ່ຈະບອກຜູ້ເບິ່ງແຍງວ່າເຮົາເຮັດຜິດ. ແຕ່ໃຫ້ເຮົາຈື່ໄວ້ວ່າພະເຢໂຫວາໃຊ້ເຂົາເຈົ້າເພື່ອຊ່ວຍເຮົາ ແລະໃຫ້ເຮົາຈື່ໄວ້ວ່າເຂົາເຈົ້າຮັກແລະເມດຕາເຮົາຄືກັບພະເຢໂຫວາ. ຖ້າເຮົາຈື່ເລື່ອງນີ້ໄວ້ແລະຖ້າເຮົາກັບໃຈແທ້ໆເຮົາກໍຢາກບອກໃຫ້ເຂົາເຈົ້າຮູ້. ໃຫ້ເຮົາມາເບິ່ງຕົວຢ່າງຂອງພີ່ນ້ອງອາເທີ້aທີ່ຮູ້ສຶກຜິດຫຼາຍໃນສິ່ງທີ່ລາວໄດ້ເຮັດ ພະເຢໂຫວາຈຶ່ງໃຊ້ຜູ້ເບິ່ງແຍງໃຫ້ຊ່ວຍລາວເຊິ່ງເຮັດໃຫ້ລາວໄດ້ກຳລັງໃຈຫຼາຍ. ອາເທີ້ເວົ້າວ່າ: “ຂ້ອຍເບິ່ງສື່ລາມົກປະມານປີໜຶ່ງ. ແຕ່ເມື່ອໄດ້ຟັງຄຳບັນລະຍາຍເລື່ອງໃຈຮູ້ຜິດຮູ້ຖືກ ຂ້ອຍກໍບອກເມຍກັບຜູ້ເບິ່ງແຍງໃນສິ່ງທີ່ຂ້ອຍໄດ້ເຮັດ. ເມື່ອເຮັດແບບນີ້ ຂ້ອຍກໍຮູ້ສຶກໂລ່ງໃຈແທ້ໆແຕ່ຂ້ອຍຍັງຮູ້ສຶກຜິດຫຼາຍໃນສິ່ງທີ່ໄດ້ເຮັດ. ຜູ້ເບິ່ງແຍງໃຫ້ກຳລັງໃຈຂ້ອຍວ່າພະເຢໂຫວາບໍ່ໄດ້ປະຖິ້ມຂ້ອຍ. ເພິ່ນສັ່ງສອນຂ້ອຍຍ້ອນເພິ່ນຮັກຂ້ອຍ. ຄຳເວົ້າທີ່ໃຫ້ກຳລັງໃຈຈາກຜູ້ເບິ່ງແຍງເຮັດໃຫ້ຂ້ອຍໝັ້ນໃຈແລະຊ່ວຍຂ້ອຍໃຫ້ເບິ່ງໂຕເອງຄືກັບທີ່ພະເຢໂຫວາເບິ່ງ.” ປັດຈຸບັນນີ້ອາເທີ້ເປັນໄພໂອເນຍປະຈຳແລະເປັນຜູ້ຊ່ວຍວຽກຮັບໃຊ້. ເຮົາໄດ້ກຳລັງໃຈແທ້ໆທີ່ຮູ້ວ່າຖ້າເຮົາເຮັດຜິດແລະກັບໃຈ ພະເຢໂຫວາຈະເມດຕາແລະພ້ອມທີ່ຈະໃຫ້ອະໄພເຮົາສະເໝີ.
ພະເຢໂຫວາໃຫ້ເຮົາມີຄວາມຫວັງ
8. (ກ) ພະເຢໂຫວາໃຫ້ຄວາມຫວັງຫຍັງກັບຄົນຢິວທີ່ເປັນຊະເລີຍຢູ່ບາບີໂລນ? (ຂ) ຕາມເອຊາຢາ 40:29-31 ຄວາມຫວັງມີຜົນແນວໃດຕໍ່ຄົນຢິວທີ່ກັບໃຈ?
8 ຄົນຢິວທີ່ເປັນຊະເລີຍຢູ່ບາບີໂລນອາດຄິດວ່າບໍ່ມີຄວາມຫວັງແລ້ວທີ່ຈະໄດ້ກັບໄປບ້ານເກີດເມືອງນອນຂອງໂຕເອງ. ບາບີໂລນເຊິ່ງເປັນມະຫາອຳນາດໂລກໃນຕອນນັ້ນເປັນທີ່ຮູ້ຈັກກັນວ່າບໍ່ເຄີຍປ່ອຍຊະເລີຍທີ່ເຂົາເຈົ້າຈັບມາ. (ອຊຢ. 14:17) ເຖິງຈະເປັນແນວນັ້ນ ພະເຢໂຫວາກໍໃຫ້ປະຊາຊົນຂອງເພິ່ນມີຄວາມຫວັງ. ເພິ່ນສັນຍາວ່າຈະປົດປ່ອຍເຂົາເຈົ້າຈາກການເປັນຊະເລີຍແລະໃຫ້ເຂົາເຈົ້າໄດ້ກັບໄປບ້ານເກີດເມືອງນອນຂອງໂຕເອງ. ບໍ່ມີຫຍັງສາມາດຂັດຂວາງພະເຢໂຫວາຈາກການເຮັດໃຫ້ຄຳສັນຍານີ້ເກີດຂຶ້ນແທ້. (ອຊຢ. 44:26; 55:12) ສຳລັບພະເຢໂຫວາ ບາບີໂລນເປັນຄືກັບຂີ້ຝຸ່ນບາງໆມີແຕ່ເປົ່າຄ່ອຍໆກໍປິວໄປ. (ອຊຢ. 40:15) ພະເຢໂຫວາຈະປົດປ່ອຍປະຊາຊົນຂອງເພິ່ນອອກຈາກບາບີໂລນງ່າຍໆແບບນີ້ແຫຼະ. ຄວາມຫວັງນີ້ຊ່ວຍຄົນຢິວແນວໃດ? ມັນໃຫ້ກຳລັງໃຈເຂົາເຈົ້າແທ້ໆ. ແຕ່ຄວາມຫວັງນີ້ຊ່ວຍເຂົາເຈົ້າຫຼາຍກວ່ານັ້ນອີກ. ເອຊາຢາຂຽນວ່າ: “ຄົນທີ່ເພິ່ງພະເຢໂຫວາຈະກັບມາມີແຮງອີກ.” (ອ່ານເອຊາຢາ 40:29-31) ແມ່ນແລ້ວ ຄວາມຫວັງເຮັດໃຫ້ເຂົາເຈົ້າມີກຳລັງ ເຂົາເຈົ້າຈະ “ບິນໄດ້ສູງໆຄືກັບນົກອິນຊີ.”
9. ຄົນຢິວທີ່ເປັນຊະເລີຍມີເຫດຜົນຫຍັງທີ່ຈະໝັ້ນໃຈໃນຄຳສັນຍາຂອງພະເຢໂຫວາ?
9 ພະເຢໂຫວາຍັງໃຫ້ເຫດຜົນເພື່ອຊ່ວຍຄົນຢິວໃຫ້ໝັ້ນໃຈວ່າຄຳສັນຍາຂອງເພິ່ນຈະເກີດຂຶ້ນແທ້. ເພິ່ນໃຫ້ເຂົາເຈົ້າເຫັນຫຼັກຖານຫຍັງແດ່? ໃຫ້ຄິດເຖິງຄຳພະຍາກອນທີ່ເກີດຂຶ້ນແທ້ແລ້ວ. ຕົວຢ່າງເຊັ່ນ: ເຂົາເຈົ້າຮູ້ວ່າອັດຊີເຣຍເອົາຊະນະອານາຈັກ 10 ຕະກູນທາງເໜືອຂອງອິດສະຣາເອນແລະຈັບຄົນຢູ່ຫັ້ນໄປເປັນຊະເລີຍ. (ອຊຢ. 8:4) ເຂົາເຈົ້າຍັງໄດ້ເຫັນຄົນບາບີໂລນມາທຳລາຍເມືອງເຢຣູຊາເລັມແລະຈັບຄົນໃນເມືອງນັ້ນໄປເປັນຊະເລີຍຄືກັນ. (ອຊຢ. 39:5-7) ນອກຈາກນັ້ນ ເຂົາເຈົ້າກໍຮູ້ວ່າກະສັດບາບີໂລນເຮັດໃຫ້ກະສັດເຊເດກີຢາຕາບອດແລະຈັບລາວໄປບາບີໂລນ. (ຢຣມ. 39:7; ອຊກ. 12:12, 13) ທຸກສິ່ງທີ່ພະເຢໂຫວາບອກໄວ້ລ່ວງໜ້າໄດ້ເກີດຂຶ້ນແທ້. (ອຊຢ. 42:9; 46:10) ເລື່ອງທັງໝົດນີ້ຕ້ອງເຮັດໃຫ້ຄົນຢິວໝັ້ນໃຈວ່າຄຳສັນຍາຂອງພະເຢໂຫວາທີ່ຈະປົດປ່ອຍເຂົາເຈົ້າໃຫ້ເປັນອິດສະຫຼະຈະເກີດຂຶ້ນແທ້ຄືກັນ!
10. ໃນສະໄໝສຸດທ້າຍ ອັນໃດຈະຊ່ວຍໃຫ້ຄວາມຫວັງຂອງເຮົາຊັດເຈນຢູ່ສະເໝີ?
10 ເຮົາໄດ້ບົດຮຽນຫຍັງ? ຕອນທີ່ເຮົາຮູ້ສຶກທໍ້ໃຈ ຄວາມຫວັງສາມາດເຮັດໃຫ້ເຮົາມີກຳລັງໃຈແລະຊ່ວຍເຮົາໃຫ້ກັບມາມີແຮງອີກ. ເຮົາມີຊີວິດຢູ່ໃນໂລກທີ່ມີແຕ່ຄວາມຫຍຸ້ງຍາກລຳບາກ ແລະເຮົາຍັງຕ້ອງຕໍ່ສູ້ກັບສັດຕູຂອງພະເຈົ້າທີ່ມີກຳລັງຫຼາຍທີ່ຕໍ່ຕ້ານເຮົາ. ເຖິງວ່າຈະເຈິແບບນີ້ ແຕ່ເຮົາກໍບໍ່ຕ້ອງທໍ້ໃຈຫຼາຍເກີນໄປຍ້ອນພະເຢໂຫວາສັນຍາວ່າເຮົາຈະມີຊີວິດຕະຫຼອດໄປໃນໂລກທີ່ງາມໆ. ຢູ່ຫັ້ນ ເຮົາຈະມີຊີວິດທີ່ສະຫງົບສຸກແລະປອດໄພແທ້ໆ. ເຮົາຕ້ອງເຮັດໃຫ້ຄວາມຫວັງນີ້ຊັດເຈນຢູ່ສະເໝີ. ຄັນບໍ່ຊັ້ນ ຄວາມຫວັງຂອງເຮົາອາດເປັນຄືກັບວິວທີ່ງາມໆແຕ່ພັດມົວຍ້ອນເຮົາເບິ່ງຜ່ານກະຈົກທີ່ເປື້ອນ. ເຮົາຈະເຮັດໃຫ້ກະຈົກສະອາດເຊິ່ງກໍຄືເຮັດໃຫ້ຄວາມຫວັງຂອງເຮົາຊັດເຈນຢູ່ສະເໝີໄດ້ແນວໃດ? ເຮົາເຮັດໄດ້ໂດຍຈັດເວລາເປັນປະຈຳເພື່ອຈິນຕະນາການວ່າຊີວິດຂອງເຮົາໃນໂລກໃໝ່ຈະເປັນແນວໃດ. ເຮົາສາມາດອ່ານບົດຄວາມ ເບິ່ງວິດີໂອ ແລະຟັງເພງທີ່ເວົ້າກ່ຽວກັບຄວາມຫວັງຂອງເຮົາ ແລະເຮົາສາມາດອະທິດຖານບອກພະເຢໂຫວາວ່າເຮົາລໍຖ້າໃຫ້ຄຳສັນຍາຂອງເພິ່ນເກີດຂຶ້ນແທ້.
11. ອັນໃດຊ່ວຍພີ່ນ້ອງຍິງຄົນໜຶ່ງທີ່ເຈັບປ່ວຍຮ້າຍແຮງໃຫ້ມີກຳລັງທີ່ຈະອົດທົນໄດ້?
11 ໃຫ້ເບິ່ງປະສົບການຂອງພີ່ນ້ອງຍິງຄົນໜຶ່ງທີ່ຊື່ຈອຍ. ລາວເຈັບປ່ວຍຮ້າຍແຮງ ແຕ່ຄວາມຫວັງກໍເຮັດໃຫ້ລາວມີກຳລັງໃຈແລະອົດທົນກັບບັນຫາໄດ້. ລາວເວົ້າວ່າ: “ຕອນທີ່ຂ້ອຍເຈິບັນຫາຫຼາຍຢ່າງຈົນຮູ້ສຶກວ່າຮັບມືບໍ່ໄຫວ ຂ້ອຍລະບາຍຄວາມຮູ້ສຶກທຸກຢ່າງກັບພະເຢໂຫວາຍ້ອນຂ້ອຍຮູ້ວ່າເພິ່ນເຂົ້າໃຈຂ້ອຍ ແລະພະເຢໂຫວາກໍໃຫ້ຂ້ອຍມີ ‘ກຳລັງທີ່ຫຼາຍກວ່າປົກກະຕິ.’” (2ກຣ. 4:7) ນອກຈາກນັ້ນ ຈອຍຍັງນຶກພາບໂຕເອງໃນໂລກໃໝ່ເຊິ່ງຢູ່ຫັ້ນຈະ “ບໍ່ມີໃຜເວົ້າວ່າ: ‘ຂ້ອຍບໍ່ສະບາຍ.’” (ອຊຢ. 33:24) ເຮົາກໍຄືກັນ ຖ້າເຮົາລະບາຍຄວາມຮູ້ສຶກທຸກຢ່າງກັບພະເຢໂຫວາແລະຄິດເຖິງຄວາມຫວັງຂອງເຮົາຢູ່ສະເໝີ ເຮົາກໍຈະມີກຳລັງທີ່ຈະອົດທົນກັບບັນຫາຕ່າງໆໄດ້.
12. ມີເຫດຜົນຫຍັງແດ່ທີ່ເຮັດໃຫ້ເຮົາໝັ້ນໃຈໃນຄຳສັນຍາຂອງພະເຢໂຫວາ? (ເບິ່ງຮູບນຳ)
12 ຄືກັບທີ່ພະເຢໂຫວາຊ່ວຍຄົນຢິວທີ່ເປັນຊະເລີຍຢູ່ບາບີໂລນໃຫ້ໝັ້ນໃຈໃນຄຳສັນຍາຂອງເພິ່ນ ພະເຢໂຫວາກໍຈະຊ່ວຍເຮົາໃຫ້ໝັ້ນໃຈໃນຄຳສັນຍາຂອງເພິ່ນຄືກັນ. ໃຫ້ຄິດເຖິງຄຳພະຍາກອນຕ່າງໆທີ່ກຳລັງເກີດຂຶ້ນແທ້ໃນຕອນນີ້. ຕົວຢ່າງເຊັ່ນ: ເຮົາເຫັນມະຫາອຳນາດໂລກອັງກິດ-ອາເມຣິກາມີ “ສ່ວນທີ່ເຂັ້ມແຂງແລະມີສ່ວນທີ່ອ່ອນແອ.” (ດນອ. 2:42, 43) ເຮົາຍັງໄດ້ຍິນຂ່າວວ່າ “ມີແຜ່ນດິນໄຫວໃນບ່ອນຕ່າງໆ” ແລະເຮົາກຳລັງປະກາດຂ່າວດີກັບ “ຄົນທຸກຊາດ.” (ມທ. 24:7, 14) ຍ້ອນເຮົາເຫັນຄຳພະຍາກອນເຫຼົ່ານີ້ແລະຄຳພະຍາກອນອື່ນໆກຳລັງເກີດຂຶ້ນແທ້ ເຮົາຈຶ່ງໝັ້ນໃຈວ່າທຸກສິ່ງທີ່ພະເຢໂຫວາສັນຍາໄວ້ກໍຈະເກີດຂຶ້ນແທ້ຄືກັນ.
ຄຳພະຍາກອນຕ່າງໆທີ່ເກີດຂຶ້ນແທ້ໃນທຸກມື້ນີ້ເຮັດໃຫ້ເຮົາໝັ້ນໃຈໃນຄຳສັນຍາຂອງພະເຢໂຫວາ (ເບິ່ງຂໍ້ 12)
ພະເຢໂຫວາຊ່ວຍເຮົາບໍ່ໃຫ້ຢ້ານ
13. (ກ) ຄົນຢິວເຈິບັນຫາຫຍັງຕອນທີ່ເຂົາເຈົ້າໃກ້ຈະຖືກປ່ອຍຈາກການເປັນຊະເລີຍ? (ຂ) ຕາມເອຊາຢາ 41:10-13 ພະເຢໂຫວາໃຫ້ກຳລັງໃຈຄົນຢິວທີ່ເປັນຊະເລີຍແນວໃດ?
13 ພະເຢໂຫວາໃຫ້ຄວາມຫວັງທີ່ດີແທ້ໆກັບຄົນຢິວທີ່ເປັນຊະເລີຍຢູ່ບາບີໂລນວ່າເຂົາເຈົ້າຈະຖືກປົດປ່ອຍໃຫ້ເປັນອິດສະຫຼະ. ແຕ່ເພິ່ນກໍຮູ້ວ່າເມື່ອໃກ້ຈະຮອດຕອນນັ້ນ ມັນຈະເປັນເວລາທີ່ຍາກຫຼາຍສຳລັບເຂົາເຈົ້າ. ພະເຢໂຫວາບອກລ່ວງໜ້າວ່າຈະມີກະສັດອົງໜຶ່ງທີ່ມີອຳນາດຫຼາຍມາໂຈມຕີແລະເອົາຊະນະຊາດຕ່າງໆທີ່ຢູ່ອ້ອມຂ້າງບາບີໂລນ ແລ້ວຈາກນັ້ນກໍຈະໂຈມຕີບາບີໂລນ. (ອຊຢ. 41:2-5) ຄົນຢິວຕ້ອງຢ້ານບໍ? ຫຼາຍປີກ່ອນທີ່ເລື່ອງນີ້ຈະເກີດຂຶ້ນ ພະເຢໂຫວາໄດ້ໃຫ້ກຳລັງໃຈເຂົາເຈົ້າໂດຍບອກວ່າ: “ບໍ່ຕ້ອງຢ້ານ ຍ້ອນວ່າເຮົາຢູ່ນຳເຈົ້າ. ບໍ່ຕ້ອງອຸກໃຈ ຍ້ອນວ່າເຮົາເປັນພະເຈົ້າຂອງເຈົ້າ.” (ອ່ານເອຊາຢາ 41:10-13) ພະເຢໂຫວາໝາຍຄວາມວ່າແນວໃດເມື່ອເພິ່ນເວົ້າວ່າ: “ເຮົາເປັນພະເຈົ້າຂອງເຈົ້າ”? ເພິ່ນບໍ່ໄດ້ໝາຍຄວາມວ່າຈະໃຫ້ຄົນຢິວມານະມັດສະການເພິ່ນ ຍ້ອນເຂົາເຈົ້າຮູ້ຢູ່ແລ້ວວ່າຕ້ອງເຮັດແບບນັ້ນ. ແຕ່ພະເຢໂຫວາກຳລັງບອກໃຫ້ເຂົາເຈົ້າຮູ້ວ່າເພິ່ນຢູ່ຝ່າຍເຂົາເຈົ້າແລະພ້ອມທີ່ຈະຊ່ວຍເຂົາເຈົ້າສະເໝີ.—ພສ. 118:6
14. ພະເຢໂຫວາໄດ້ເຮັດຫຍັງອີກເພື່ອຊ່ວຍຄົນຢິວທີ່ເປັນຊະເລີຍບໍ່ໃຫ້ຢ້ານ?
14 ພະເຢໂຫວາຍັງຊ່ວຍຄົນຢິວທີ່ເປັນຊະເລີຍບໍ່ໃຫ້ຢ້ານໂດຍໃຫ້ເຂົາເຈົ້າຄິດເຖິງລິດເດດແລະສະຕິປັນຍາຂອງເພິ່ນທີ່ບໍ່ມີຂີດຈຳກັດ. ເພິ່ນບອກເຂົາເຈົ້າໃຫ້ແນມເບິ່ງດາວທີ່ຢູ່ເທິງຟ້າ. ເພິ່ນບອກເຂົາເຈົ້າວ່າເພິ່ນບໍ່ພຽງແຕ່ສ້າງດາວເຫຼົ່ານັ້ນ ແຕ່ເພິ່ນຍັງຮູ້ຈັກຊື່ຂອງດາວທຸກດວງນຳ. (ອຊຢ. 40:25-28) ຖ້າພະເຢໂຫວາຮູ້ຈັກຊື່ຂອງດາວແຕ່ລະດວງ ເພິ່ນກໍຕ້ອງຮູ້ຈັກຊື່ຂອງຜູ້ຮັບໃຊ້ຂອງເພິ່ນທຸກຄົນ. ຖ້າພະເຢໂຫວາມີລິດເດດສ້າງດາວເຫຼົ່ານັ້ນ ເພິ່ນກໍຕ້ອງມີລິດເດດທີ່ຈະຊ່ວຍເຫຼືອປະຊາຊົນຂອງເພິ່ນໄດ້ແທ້ໆ. ດັ່ງນັ້ນ ຄົນຢິວທີ່ເປັນຊະເລີຍບໍ່ມີເຫດຜົນທີ່ຈະຕ້ອງຢ້ານ.
15. ພະເຢໂຫວາໄດ້ກຽມປະຊາຊົນຂອງເພິ່ນແນວໃດໃຫ້ພ້ອມສຳລັບສິ່ງທີ່ຈະເກີດຂຶ້ນໃນອະນາຄົດ?
15 ພະເຢໂຫວາຍັງໄດ້ກຽມປະຊາຊົນຂອງເພິ່ນໃຫ້ພ້ອມສຳລັບສິ່ງທີ່ຈະເກີດຂຶ້ນໃນອະນາຄົດ. ໃນປຶ້ມເອຊາຢາ ພະເຢໂຫວາບອກເຂົາເຈົ້າວ່າ: “ໃຫ້ພວກເຈົ້າເຂົ້າໄປຫ້ອງທາງໃນແລະອັດປະຕູໄວ້ແມ້. ເຂົ້າໄປລີ້ຢູ່ຫັ້ນບຶດໜຶ່ງຈົນກວ່າເຮົາຈະເຊົາໃຈຮ້າຍ.” (ອຊຢ. 26:20) ຄົນຢິວອາດເຮັດຕາມຄຳແນະນຳນີ້ຕອນທີ່ກະສັດໄຊຣັດມາໂຈມຕີບາບີໂລນ. ນັກປະຫວັດສາດຄົນກຣີກຜູ້ໜຶ່ງເວົ້າວ່າ ຕອນທີ່ໄຊຣັດມາໂຈມຕີບາບີໂລນ ລາວ “ສັ່ງໃຫ້ [ທະຫານຂອງລາວ] ຂ້າທຸກຄົນທີ່ຢູ່ນອກເຮືອນ.” ໃຫ້ຄິດເບິ່ງວ່າຄົນທີ່ຢູ່ບາບີໂລນຈະຢ້ານຫຼາຍສ່ຳໃດ! ແຕ່ເບິ່ງຄືວ່າຄົນຢິວທີ່ເປັນຊະເລີຍລອດຊີວິດຍ້ອນເຊື່ອຟັງຄຳສັ່ງຂອງພະເຢໂຫວາ.
16. ເປັນຫຍັງເຮົາບໍ່ຕ້ອງຢ້ານສິ່ງທີ່ຈະເກີດຂຶ້ນໃນໄລຍະຄວາມທຸກລຳບາກຄັ້ງໃຫຍ່? (ເບິ່ງຮູບນຳ)
16 ເຮົາໄດ້ບົດຮຽນຫຍັງ? ອີກບໍ່ດົນ ເຮົາຈະຕ້ອງເຈິກັບຄວາມທຸກລຳບາກຄັ້ງໃຫຍ່ເຊິ່ງເປັນໄລຍະເວລາທີ່ຮ້າຍແຮງທີ່ສຸດທີ່ເຄີຍເກີດຂຶ້ນໃນໂລກ. ເມື່ອຮອດຕອນນັ້ນ ຄົນທົ່ວໄປໃນໂລກຈະສັບສົນແລະຢ້ານຫຼາຍ ແຕ່ປະຊາຊົນຂອງພະເຢໂຫວາຈະບໍ່ເປັນແບບນັ້ນ. ເຮົາຮູ້ວ່າພະເຢໂຫວາເປັນພະເຈົ້າຂອງເຮົາ ເຮົາຈຶ່ງກ້າຫານຍ້ອນເຮົາຮູ້ວ່າເພິ່ນ “ຈະມາຊ່ວຍ [ພວກເຮົາ] ໃຫ້ລອດ.” (ລກ. 21:28) ແມ່ນແຕ່ຕອນທີ່ກຸ່ມຊາດຕ່າງໆມາໂຈມຕີເຮົາ ເຮົາກໍຈະຍັງໝັ້ນໃຈໃນພະເຢໂຫວາສະເໝີ. ພະເຢໂຫວາຈະໃຊ້ທູດສະຫວັນໃຫ້ປົກປ້ອງເຮົາແລະໃຫ້ຄຳແນະນຳທີ່ຊ່ວຍເຮົາໃຫ້ລອດຊີວິດ. ເຮົາຈະໄດ້ຮັບຄຳແນະນຳເຫຼົ່ານັ້ນແນວໃດ? ເຮົາຕ້ອງຖ້າເບິ່ງຕໍ່ໄປ ແຕ່ເປັນໄປໄດ້ທີ່ເຮົາຈະໄດ້ຮັບຄຳແນະນຳເຫຼົ່ານັ້ນຜ່ານທາງປະຊາຄົມເຊິ່ງອາດເປັນຄືກັບ “ຫ້ອງທາງໃນ” ທີ່ຈະປົກປ້ອງເຮົາໃຫ້ປອດໄພ. ເຮົາຈະກຽມພ້ອມສຳລັບສິ່ງທີ່ຈະເກີດຂຶ້ນໃນອະນາຄົດໄດ້ແນວໃດ? ເຮົາຕ້ອງສະໜິດກັບພີ່ນ້ອງ ເຕັມໃຈເຊື່ອຟັງຄຳແນະນຳຈາກອົງການ ແລະໝັ້ນໃຈວ່າພະເຢໂຫວາກຳລັງຊີ້ນຳອົງການນີ້ຢູ່.—ຮຣ. 10:24, 25; 13:17
ຖ້າເຮົາຈື່ໄວ້ວ່າພະເຢໂຫວາມີລິດເດດແລະສາມາດປົກປ້ອງເຮົາໄດ້ ເຮົາກໍຈະບໍ່ຢ້ານຫຼາຍເກີນໄປໃນໄລຍະຄວາມທຸກລຳບາກຄັ້ງໃຫຍ່ (ເບິ່ງຂໍ້ 16)b
17. ເຈົ້າຕ້ອງເຮັດຫຍັງເພື່ອສະແດງວ່າເຈົ້າເພິ່ງພະເຢໂຫວາເພື່ອຈະໄດ້ກຳລັງໃຈ?
17 ເຖິງວ່າຄົນຢິວທີ່ເປັນຊະເລີຍຕ້ອງເຈິກັບສະພາບການທີ່ຍາກລຳບາກ ແຕ່ພະເຢໂຫວາກໍໃຫ້ກຳລັງໃຈເຂົາເຈົ້າ. ເພິ່ນຈະໃຫ້ກຳລັງໃຈເຮົາແບບນັ້ນຄືກັນ. ດັ່ງນັ້ນ ບໍ່ວ່າຈະເກີດຫຍັງຂຶ້ນໃນອະນາຄົດ ໃຫ້ເຈົ້າເພິ່ງພະເຢໂຫວາຕໍ່ໆໄປເພື່ອຈະໄດ້ກຳລັງໃຈ. ໃຫ້ເຈົ້າໝັ້ນໃຈໃນຄວາມເມດຕາທີ່ຍິ່ງໃຫຍ່ຂອງພະເຢໂຫວາ ແລະເຮັດໃຫ້ຄວາມຫວັງຂອງເຈົ້າຊັດເຈນຢູ່ສະເໝີ. ໃຫ້ຈື່ໄວ້ວ່າ ຍ້ອນເຈົ້າມີພະເຢໂຫວາເປັນພະເຈົ້າຂອງເຈົ້າ ເຈົ້າກໍບໍ່ຕ້ອງຢ້ານຫຍັງ.
ເພງທີ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
a ຊື່ສົມມຸດ.
b ຄຳອະທິບາຍຮູບ: ພີ່ນ້ອງກຸ່ມນ້ອຍໆມາຢູ່ນຳກັນ. ເຂົາເຈົ້າໝັ້ນໃຈວ່າພະເຢໂຫວາມີລິດເດດແລະສາມາດປົກປ້ອງເຂົາເຈົ້າໄດ້ບໍ່ວ່າເຂົາເຈົ້າຈະຢູ່ບ່ອນໃດໃນໂລກນີ້.