ບົດຄວາມສຶກສາທີ 28
ເພງທີ 88 ຂໍໃຫ້ເຮົາຮູ້ທາງຂອງພະອົງ
ເປັນຫຍັງເຮົາຄວນຊອກຫາຄຳແນະນຳ?
“ສະຕິປັນຍາເປັນຂອງຄົນທີ່ຊອກຫາຄຳແນະນຳ.”—ສພສ. 13:10
ຈຸດສຳຄັນ
ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດເຕັມທີຈາກຄຳແນະນຳທີ່ເຮົາໄດ້ຮັບ.
1. ເຮົາຕ້ອງເຮັດຫຍັງເພື່ອຈະຕັດສິນໃຈຢ່າງຖືກຕ້ອງແລະໃຫ້ແຜນການຂອງເຮົາສຳເລັດ? (ສຸພາສິດ 13:10; 15:22)
ເຮົາທຸກຄົນຢາກຕັດສິນໃຈຢ່າງຖືກຕ້ອງແລະຢາກໃຫ້ແຜນການຂອງເຮົາສຳເລັດ. ຄຳພີໄບເບິນບອກສິ່ງທີ່ເຮົາຕ້ອງເຮັດເພື່ອຈະໄດ້ຕາມເປົ້າໝາຍທັງສອງຢ່າງນີ້.—ອ່ານສຸພາສິດ 13:10; 15:22
2. ພະເຢໂຫວາສັນຍາວ່າຈະເຮັດຫຍັງເພື່ອເຮົາ?
2 ພະເຢໂຫວາເປັນຜູ້ທີ່ສາມາດໃຫ້ຄຳແນະນຳທີ່ດີທີ່ສຸດກັບເຮົາ. ສະນັ້ນ ເຮົາຕ້ອງອະທິດຖານຫາເພິ່ນແລະຂໍສະຕິປັນຍາຈາກເພິ່ນ. ເພິ່ນສັນຍາວ່າຈະຊ່ວຍເຮົາ ເພິ່ນເວົ້າວ່າ: “ເຮົາຈະໃຫ້ຄຳແນະນຳເຈົ້າແລະເບິ່ງແຍງເຈົ້າສະເໝີ.” (ພສ. 32:8) ຄຳເວົ້ານີ້ສະແດງໃຫ້ເຫັນວ່າພະເຢໂຫວາບໍ່ພຽງແຕ່ໃຫ້ຄຳແນະນຳເຮົາເທົ່ານັ້ນ ແຕ່ເພິ່ນສົນໃຈເຮົາເປັນສ່ວນໂຕແລະຊ່ວຍເຮົາໃຫ້ເອົາຄຳແນະນຳຂອງເພິ່ນໄປໃຊ້.
3. ເຮົາຈະຮຽນຫຍັງໃນບົດນີ້?
3 ໃນບົດນີ້ ເຮົາຈະໃຊ້ຄຳພີໄບເບິນເພື່ອຕອບຄຳຖາມ 4 ຂໍ້ຕໍ່ໄປນີ້: (1) ຖ້າຂ້ອຍຢາກໄດ້ຮັບປະໂຫຍດຈາກຄຳແນະນຳທີ່ດີ ຂ້ອຍຕ້ອງມີຄຸນລັກສະນະຫຍັງແດ່? (2) ໃຜຈະໃຫ້ຄຳແນະນຳທີ່ດີກັບຂ້ອຍໄດ້? (3) ຂ້ອຍຈະເປີດໃຈຮັບຟັງຄຳແນະນຳໄດ້ແນວໃດ? ແລະ (4) ເປັນຫຍັງຂ້ອຍບໍ່ຄວນຂໍໃຫ້ຄົນອື່ນຕັດສິນໃຈໃຫ້ຂ້ອຍ?
ຂ້ອຍຕ້ອງມີຄຸນລັກສະນະຫຍັງແດ່?
4. ຖ້າເຮົາຢາກໄດ້ຮັບປະໂຫຍດຈາກຄຳແນະນຳທີ່ດີ ເຮົາຕ້ອງມີຄຸນລັກສະນະຫຍັງແດ່?
4 ເຮົາຕ້ອງເປັນຄົນຖ່ອມແລະຈຽມໂຕເພື່ອຈະໄດ້ຮັບຄຳແນະນຳທີ່ດີ. ເຮົາຕ້ອງຍອມຮັບວ່າເຮົາອາດບໍ່ມີປະສົບການຫຼືບໍ່ມີຄວາມຮູ້ເພື່ອຈະເລືອກຢ່າງຖືກຕ້ອງດ້ວຍໂຕເຮົາເອງ. ຖ້າເຮົາບໍ່ເປັນຄົນຖ່ອມແລະຈຽມໂຕ ພະເຢໂຫວາກໍຊ່ວຍເຮົາບໍ່ໄດ້. ຜົນກໍຄື ເມື່ອອ່ານຄຳພີໄບເບິນເຮົາຈະບໍ່ເຫັນຄວາມຈຳເປັນທີ່ຕ້ອງເອົາຄຳແນະນຳຂອງພະເຢໂຫວາໄປໃຊ້. (ມກ. 6:8; 1ປຕ. 5:5) ແຕ່ຖ້າເຮົາເປັນຄົນຖ່ອມແລະຈຽມໂຕ ເຮົາກໍພ້ອມທີ່ຈະຟັງແລະເອົາຄຳແນະນຳທີ່ມາຈາກຄຳພີໄບເບິນໄປໃຊ້.
5. ກະສັດດາວິດປະສົບຜົນສຳເລັດຫຍັງແດ່ທີ່ອາດເຮັດໃຫ້ລາວກາຍເປັນຄົນຍິ່ງ?
5 ໃຫ້ມາເບິ່ງວ່າເຮົາໄດ້ບົດຮຽນຫຍັງຈາກຕົວຢ່າງຂອງກະສັດດາວິດ. ສິ່ງທີ່ດາວິດເຮັດສຳເລັດສາມາດເຮັດໃຫ້ລາວກາຍເປັນຄົນຍິ່ງໄດ້. ຫຼາຍປີກ່ອນທີ່ດາວິດຈະໄດ້ເປັນກະສັດ ລາວມີຊື່ສຽງວ່າເປັນນັກດົນຕີທີ່ເກັ່ງ. ລາວເຄີຍຖືກເອີ້ນໃຫ້ໄປຫຼິ້ນດົນຕີໃຫ້ກະສັດຟັງ. (1ຊມ. 16:18, 19) ຫຼັງຈາກທີ່ພະເຢໂຫວາເລືອກດາວິດໃຫ້ເປັນກະສັດຄົນຕໍ່ໄປ ເພິ່ນໄດ້ເອົາພະລັງບໍລິສຸດໃຫ້ລາວ. (1ຊມ. 16:11-13) ປະຊາຊົນພາກັນຍ້ອງດາວິດທີ່ຂ້າພວກສັດຕູໄດ້ ເຊິ່ງລວມເຖິງໂກລີອາດຄົນຟີລິດສະຕີນທີ່ສູງໆໃຫຍ່ໆ. (1ຊມ. 17:37, 50; 18:7) ຄົນຍິ່ງທີ່ປະສົບຜົນສຳເລັດຫຼາຍຢ່າງແບບນີ້ອາດຄິດວ່າລາວບໍ່ຈຳເປັນຕ້ອງຟັງຄຳແນະນຳຈາກຄົນອື່ນ. ແຕ່ດາວິດບໍ່ເປັນແບບນັ້ນ.
6. ເຮົາຮູ້ໄດ້ແນວໃດວ່າດາວິດພ້ອມທີ່ຈະຟັງຄຳແນະນຳ? (ເບິ່ງຮູບໜ້າປົກນຳ)
6 ຫຼັງຈາກໄດ້ເປັນກະສັດແລ້ວ ດາວິດກໍຍັງເລືອກເປັນໝູ່ກັບຄົນທີ່ໃຫ້ຄຳແນະນຳລາວ. (1ຂຄ. 27:32-34) ເລື່ອງນີ້ບໍ່ແປກຍ້ອນດາວິດມີຊື່ສຽງວ່າມັກຟັງຄຳແນະນຳທີ່ດີ. ລາວຍອມຮັບຄຳແນະນຳບໍ່ແມ່ນແຕ່ຈາກຜູ້ຊາຍເທົ່ານັ້ນ ແຕ່ຈາກຜູ້ຍິງຊື່ອາບີກາຍນຳ. ອາບີກາຍເປັນເມຍຂອງນາບານທີ່ເປັນຄົນຍິ່ງ ບໍ່ຮູ້ຈັກຂອບໃຈ ແລະບໍ່ມີຄວາມນັບຖືຕໍ່ຄົນອື່ນ. ແຕ່ດາວິດເປັນຄົນຖ່ອມແລະຟັງຄຳແນະນຳທີ່ດີຂອງອາບີກາຍ. ຜົນກໍຄື ລາວບໍ່ໄດ້ເຮັດຜິດຮ້າຍແຮງ.—1ຊມ. 25:2, 3, 21-25, 32-34
ດາວິດຖ່ອມໃຈຍອມຮັບຟັງແລະເຮັດຕາມຄຳແນະນຳຂອງອາບີກາຍ (ເບິ່ງຂໍ້ 6)
7. ເຮົາໄດ້ບົດຮຽນຫຍັງຈາກເລື່ອງຂອງດາວິດ? (ປັນຍາຈານ 4:13) (ເບິ່ງຮູບນຳ)
7 ເຮົາໄດ້ບົດຮຽນບາງຢ່າງຈາກເລື່ອງຂອງດາວິດ. ຕົວຢ່າງເຊັ່ນ: ເຮົາອາດມີພອນສະຫວັນບາງຢ່າງຫຼືເຮົາອາດມີສິດອຳນາດລະດັບໜຶ່ງເໜືອຄົນອື່ນ. ເຖິງຈະເປັນແນວນັ້ນ ເຮົາບໍ່ຄວນຄິດວ່າເຮົາຮູ້ທຸກຢ່າງແລະບໍ່ຈຳເປັນຕ້ອງໄດ້ຮັບຄຳແນະນຳ. ຄືກັບດາວິດ ເຮົາຄວນເຕັມໃຈຮັບຟັງຄຳແນະນຳທີ່ດີ ບໍ່ວ່າຈະມາຈາກໃຜກໍຕາມ. (ອ່ານປັນຍາຈານ 4:13) ເມື່ອເຮັດແບບນີ້ ເຮົາຈະຫຼີກລ່ຽງການເຮັດຜິດຮ້າຍແຮງທີ່ສາມາດເຮັດໃຫ້ເຮົາຫຼືຄົນອື່ນເສຍໃຈຫຼາຍ.
ເຮົາຄວນເຕັມໃຈຮັບຟັງຄຳແນະນຳທີ່ດີບໍ່ວ່າຈະມາຈາກໃຜກໍຕາມ (ເບິ່ງຂໍ້ 7)c
ໃຜຈະໃຫ້ຄຳແນະນຳທີ່ດີໄດ້?
8. ເປັນຫຍັງໂຢນາທານຈຶ່ງສາມາດໃຫ້ຄຳແນະນຳທີ່ດີກັບດາວິດ?
8 ໃຫ້ເບິ່ງອີກບົດຮຽນໜຶ່ງທີ່ເຮົາໄດ້ຈາກຕົວຢ່າງຂອງດາວິດ. ລາວຟັງຄຳແນະນຳຈາກຄົນທີ່ມີສາຍສຳພັນທີ່ໃກ້ຊິດກັບພະເຢໂຫວາແລະທັງເຂົ້າໃຈດີວ່າລາວກຳລັງເຈິບັນຫາຫຍັງ. ຕົວຢ່າງເຊັ່ນ: ຕອນທີ່ດາວິດຢາກຮູ້ວ່າລາວຈະຄືນດີກັບກະສັດຊາອູນໄດ້ບໍ່ ລາວຟັງຄຳແນະນຳຈາກໂຢນາທານລູກຊາຍຂອງຊາອູນ. ເປັນຫຍັງໂຢນາທານຈຶ່ງສາມາດໃຫ້ຄຳແນະນຳທີ່ດີກັບດາວິດ? ຍ້ອນໂຢນາທານມີສາຍສຳພັນທີ່ໃກ້ຊິດກັບພະເຢໂຫວາ ແລະລາວຍັງຮູ້ຈັກຊາອູນດີ. (1ຊມ. 20:9-13) ເຮົາຈະເອົາບົດຮຽນນີ້ມາໃຊ້ແນວໃດ?
9. ຖ້າຢາກໄດ້ຄຳແນະນຳທີ່ດີ ເຮົາຄວນປຶກສາໃຜ? ຂໍໃຫ້ຍົກຕົວຢ່າງ. (ສຸພາສິດ 13:20)
9 ເມື່ອເຮົາຕ້ອງການຄຳແນະນຳ ເຮົາຄວນປຶກສາກັບຄົນທີ່ມີສາຍສຳພັນທີ່ໃກ້ຊິດກັບພະເຢໂຫວາແລະມີປະສົບການໃນເລື່ອງທີ່ເຮົາຕ້ອງການຄວາມຊ່ວຍເຫຼືອ.a (ອ່ານສຸພາສິດ 13:20) ຕົວຢ່າງເຊັ່ນ: ພີ່ນ້ອງຊາຍໜຸ່ມຄົນໜຶ່ງຢາກຊອກຄູ່ທີ່ເໝາະສົມເພື່ອຈະແຕ່ງດອງນຳ. ໃຜຈະໃຫ້ຄຳແນະນຳທີ່ດີກັບລາວໄດ້? ໝູ່ທີ່ເປັນໂສດອາດຊ່ວຍໄດ້ຖ້າລາວໃຫ້ຄຳແນະນຳຕາມຫຼັກການໃນຄຳພີໄບເບິນ. ແຕ່ພີ່ນ້ອງຊາຍໜຸ່ມອາດຈະໄດ້ຮັບຄຳແນະນຳທີ່ກົງຈຸດແລະໃຊ້ໄດ້ແທ້ຖ້າລາວປຶກສາກັບຄູ່ຜົວເມຍທີ່ມີຄວາມເຊື່ອເຂັ້ມແຂງ ໃຊ້ຊີວິດຄູ່ນຳກັນມາດົນຢ່າງມີຄວາມສຸກ ແລະຮູ້ຈັກລາວດີ.
10. ຕອນນີ້ເຮົາຈະຮຽນຫຍັງ?
10 ເຮົາໄດ້ຮຽນແລ້ວວ່າເຮົາຕ້ອງມີຄຸນລັກສະນະ 2 ຢ່າງແລະທັງໄດ້ຮຽນວ່າໃຜທີ່ໃຫ້ຄຳແນະນຳທີ່ດີໄດ້. ຕອນນີ້ ເຮົາຈະຮຽນວ່າເຮົາຈະເປີດໃຈຮັບຟັງຄຳແນະນຳໄດ້ແນວໃດ ແລະເປັນຫຍັງເຮົາບໍ່ຄວນຂໍໃຫ້ຄົນອື່ນຕັດສິນໃຈໃຫ້ເຮົາ.
ເຮົາຈະເປີດໃຈຮັບຟັງຄຳແນະນຳໄດ້ແນວໃດ?
11-12. (ກ) ບາງເທື່ອເຮົາອາດເຮັດຫຍັງ? (ຂ) ເຣໂຮໂບອາມໄດ້ເຮັດຫຍັງເມື່ອຕ້ອງຕັດສິນໃຈໃນເລື່ອງທີ່ສຳຄັນ?
11 ບາງຄົນອາດເບິ່ງຄືວ່າຢາກຊອກຫາຄຳແນະນຳ ແຕ່ທີ່ຈິງແລ້ວລາວພຽງແຕ່ຢາກໃຫ້ຄົນອື່ນເຫັນດີນຳໃນສິ່ງທີ່ລາວໄດ້ຕັດສິນໃຈໄປແລ້ວ. ຄົນແບບນັ້ນບໍ່ໄດ້ເປີດໃຈຮັບຟັງຄຳແນະນຳຈາກຄົນອື່ນ. ຖ້າເປັນຈັ່ງຊັ້ນ ລາວຄວນຮຽນຈາກສິ່ງທີ່ເກີດຂຶ້ນກັບກະສັດເຣໂຮໂບອາມ.
12 ເຣໂຮໂບອາມເປັນກະສັດຂອງອິດສະຣາເອນຫຼັງຈາກໂຊໂລໂມນພໍ່ຂອງລາວຕາຍ. ເຣໂຮໂບອາມເປັນກະສັດຂອງຊາດທີ່ຈະເລີນຮຸ່ງເຮືອງ ແຕ່ປະຊາຊົນຮູ້ສຶກວ່າໂຊໂລໂມນໄດ້ຮຽກຮ້ອງຈາກເຂົາເຈົ້າຫຼາຍໂພດ. ປະຊາຊົນໄດ້ມາຫາເຣໂຮໂບອາມເພື່ອຂໍໃຫ້ລາວເຮັດໃຫ້ພາລະຂອງເຂົາເຈົ້າເບົາລົງ. ເຣໂຮໂບອາມຂໍເວລາຄິດກ່ອນວ່າຈະເຮັດແນວໃດ. ລາວເລີ່ມຕົ້ນດີໂດຍຂໍຄຳແນະນຳຈາກພວກຜູ້ໃຫຍ່ທີ່ເຄີຍເຮັດວຽກໃຫ້ໂຊໂລໂມນ. (1ກສ. 12:2-7) ແຕ່ລາວບໍ່ໄດ້ເຮັດຕາມທີ່ເຂົາເຈົ້າແນະນຳ. ເປັນຫຍັງຈຶ່ງເປັນແນວນັ້ນ? ບາງເທື່ອເຣໂຮໂບອາມໄດ້ຕັດສິນໃຈໄວ້ແລ້ວວ່າຈະເຮັດແນວໃດແລະພຽງແຕ່ຢາກຊອກຄົນທີ່ເຫັນດີນຳ. ຖ້າເປັນແບບນັ້ນ ພວກຄົນໜຸ່ມທີ່ໃຫຍ່ມານຳກັນກໍໃຫ້ຄຳແນະນຳທີ່ຖືກໃຈລາວ. (1ກສ. 12:8-14) ເຣໂຮໂບອາມຕອບປະຊາຊົນຕາມທີ່ໝູ່ຂອງລາວບອກ. ຜົນກໍຄື ຊາດອິດສະຣາເອນຖືກແບ່ງແຍກ ແລະນັບຕັ້ງແຕ່ນັ້ນມາເຣໂຮໂບອາມກໍເຈິບັນຫາຕະຫຼອດ.—1ກສ. 12:16-19
13. ເຮົາຈະຮູ້ໄດ້ແນວໃດວ່າເຮົາເປີດໃຈຮັບຟັງຄຳແນະນຳຫຼືບໍ່?
13 ເຮົາຮຽນຫຍັງຈາກຕົວຢ່າງຂອງເຣໂຮໂບອາມ? ເມື່ອຂໍຄຳແນະນຳຈາກຄົນອື່ນ ເຮົາບໍ່ຄວນຕັດສິນໃຈໄວ້ກ່ອນ. ເຮົາຕ້ອງເຕັມໃຈຮັບຟັງຄຳແນະນຳຈາກເຂົາເຈົ້າ. ໃຫ້ຖາມໂຕເອງວ່າ: ‘ເມື່ອຂໍຄຳແນະນຳຈາກຄົນອື່ນ ຂ້ອຍບໍ່ສົນໃຈຟັງຄຳແນະນຳນັ້ນບໍຍ້ອນມັນບໍ່ຖືກໃຈຂ້ອຍ?’
14. ເມື່ອໄດ້ຮັບຄຳແນະນຳ ເຮົາຕ້ອງຈື່ຫຍັງໄວ້? ຂໍໃຫ້ຍົກຕົວຢ່າງ. (ເບິ່ງຮູບນຳ)
14 ຂໍໃຫ້ເບິ່ງຕົວຢ່າງໜຶ່ງ. ສົມມຸດວ່າມີຄົນສະເໜີວຽກທີ່ໄດ້ເງິນເດືອນຫຼາຍໃຫ້ພີ່ນ້ອງຊາຍຄົນໜຶ່ງ. ກ່ອນຈະຮັບເອົາວຽກນີ້ ລາວຂໍຄຳແນະນຳຈາກຜູ້ເບິ່ງແຍງຄົນໜຶ່ງ. ຜູ້ເບິ່ງແຍງບອກວ່າວຽກນີ້ຈະເຮັດໃຫ້ລາວຢູ່ໄກຈາກຄອບຄົວເລື້ອຍໆເປັນເວລາຫຼາຍອາທິດ. ຜູ້ເບິ່ງແຍງເຕືອນລາວໃຫ້ຄິດເຖິງຫຼັກການໃນຄຳພີໄບເບິນທີ່ບອກວ່າໜ້າທີ່ຫຼັກຂອງລາວແມ່ນເບິ່ງແຍງຄອບຄົວໃຫ້ມີຄວາມເຊື່ອເຂັ້ມແຂງ. (ອຟຊ. 6:4; 1ຕມ. 5:8) ສົມມຸດວ່າລາວບໍ່ເຫັນດີກັບຄຳແນະນຳຂອງຜູ້ເບິ່ງແຍງຄົນນີ້ ລາວຈຶ່ງໄປຂໍຄຳແນະນຳຈາກພີ່ນ້ອງຄົນອື່ນໃນປະຊາຄົມຈົນກວ່າຈະເຈິບາງຄົນທີ່ບອກວ່າລາວສາມາດຮັບເອົາວຽກນັ້ນໄດ້. ພີ່ນ້ອງຊາຍຜູ້ນີ້ກຳລັງຊອກຫາຄຳແນະນຳທີ່ດີແທ້ໆບໍ ຫຼືລາວໄດ້ຕັດສິນໃຈໄວ້ແລ້ວວ່າຈະເຮັດແນວໃດແລະພຽງແຕ່ກຳລັງຊອກຫາຄົນທີ່ເຫັນດີກັບລາວ? ເຮົາຕ້ອງຈື່ໄວ້ວ່າຫົວໃຈເຮົາທໍລະຍົດ. (ຢຣມ. 17:9) ບາງເທື່ອເຮົາອາດໄດ້ຮັບຄຳແນະນຳທີ່ເຮົາບໍ່ມັກ ແຕ່ນັ້ນພັດເປັນຄຳແນະນຳທີ່ດີທີ່ສຸດ.
ເຮົາກຳລັງຊອກຫາຄຳແນະນຳທີ່ດີແທ້ໆບໍຫຼືເຮົາພຽງແຕ່ກຳລັງຊອກຫາຄົນທີ່ເຫັນດີກັບເຮົາ? (ເບິ່ງຂໍ້ 14)
ຂ້ອຍຄວນຂໍໃຫ້ຄົນອື່ນຕັດສິນໃຈໃຫ້ຂ້ອຍບໍ?
15. ເຮົາຕ້ອງລະວັງທີ່ຈະບໍ່ເຮັດຫຍັງ ແລະຍ້ອນຫຍັງ?
15 ເຮົາແຕ່ລະຄົນມີຄວາມຮັບຜິດຊອບທີ່ຈະຕ້ອງຕັດສິນໃຈດ້ວຍໂຕເອງ. (ຄລຕ. 6:4, 5) ຄືກັບທີ່ໄດ້ຮຽນມາແລ້ວ ຄົນສະຫຼາດຈະຊອກຫາຄຳແນະນຳຈາກຄຳພີໄບເບິນແລະຈາກພີ່ນ້ອງທີ່ມີຄວາມເຊື່ອເຂັ້ມແຂງກ່ອນຈະເຮັດສິ່ງໃດສິ່ງໜຶ່ງ. ແຕ່ເຮົາຕ້ອງລະວັງທີ່ຈະບໍ່ຂໍໃຫ້ຄົນອື່ນຕັດສິນໃຈໃຫ້ເຮົາ. ບາງຄົນອາດເຮັດແນວນັ້ນໂດຍຖາມຄົນທີ່ເຂົາເຈົ້າໄວ້ໃຈແບບກົງໆວ່າ: “ຖ້າເຈົ້າເປັນຂ້ອຍ ເຈົ້າຈະເຮັດແນວໃດ?” ສ່ວນບາງຄົນອາດຮຽນແບບການຕັດສິນໃຈຂອງຄົນອື່ນໂດຍທີ່ບໍ່ໄດ້ຄິດຄັກໆກ່ຽວກັບເລື່ອງນັ້ນກ່ອນ.
16. ພີ່ນ້ອງຢູ່ປະຊາຄົມໃນເມືອງໂກຣິນໂທຕ້ອງຕັດສິນໃຈແນວໃດກ່ຽວກັບຊີ້ນທີ່ເອົາໄປບູຊາຮູບບູຊາ ແລະໃຜຕ້ອງຕັດສິນໃຈວ່າຈະກິນຊີ້ນແບບນັ້ນຫຼືບໍ່? (1 ໂກຣິນໂທ 8:7; 10:25, 26)
16 ໃຫ້ຄິດເຖິງສິ່ງທີ່ເກີດຂຶ້ນໃນສະຕະວັດທຳອິດ. ພີ່ນ້ອງຢູ່ປະຊາຄົມໃນເມືອງໂກຣິນໂທຕ້ອງຕັດສິນໃຈເລື່ອງການກິນຊີ້ນທີ່ເອົາໄປບູຊາຮູບບູຊາ. ໂປໂລຂຽນໄປຫາພີ່ນ້ອງເຫຼົ່ານັ້ນວ່າ: “ພວກເຮົາຮູ້ວ່າຮູບບູຊາບໍ່ມີປະໂຫຍດຫຍັງເລີຍ ແລະຮູ້ວ່າມີພະເຈົ້າແຕ່ອົງດຽວເທົ່ານັ້ນ.” (1ກຣ. 8:4) ຈາກສິ່ງທີ່ໂປໂລເວົ້າ ບາງຄົນໃນປະຊາຄົມໄດ້ຕັດສິນໃຈວ່າເຂົາເຈົ້າກິນຊີ້ນທີ່ເອົາໄປບູຊາຮູບບູຊາໄດ້ເຊິ່ງຂາຍຢູ່ຕະຫຼາດ. ສ່ວນບາງຄົນຕັດສິນໃຈວ່າເຂົາເຈົ້າກິນຊີ້ນແບບນັ້ນບໍ່ໄດ້ຍ້ອນມັນລົບກວນໃຈຮູ້ຜິດຮູ້ຖືກຂອງເຂົາເຈົ້າ. (ອ່ານ 1 ໂກຣິນໂທ 8:7; 10:25, 26) ເລື່ອງນີ້ເປັນການຕັດສິນໃຈສ່ວນໂຕ. ໂປໂລບໍ່ເຄີຍແນະນຳພີ່ນ້ອງໃນເມືອງໂກຣິນໂທໃຫ້ຕັດສິນໃຈແທນຄົນອື່ນ ແລະລາວກໍບໍ່ເຄີຍແນະນຳພີ່ນ້ອງໃນເມືອງນັ້ນໃຫ້ຮຽນແບບການຕັດສິນໃຈຂອງຄົນອື່ນ ແຕ່ລາວບອກເຂົາເຈົ້າວ່າ: “ພະເຈົ້າຈະເປັນຜູ້ຕັດສິນພວກເຮົາແຕ່ລະຄົນຕາມການກະທຳຂອງພວກເຮົາ.”—ຣມ. 14:10-12
17. ອາດເກີດຫຍັງຂຶ້ນຖ້າເຮົາຮຽນແບບການຕັດສິນໃຈຂອງຄົນອື່ນ? ຂໍໃຫ້ຍົກຕົວຢ່າງ. (ເບິ່ງຮູບນຳ)
17 ໃນທຸກມື້ນີ້ ເລື່ອງຄ້າຍໆກັນນີ້ອາດເກີດຂຶ້ນໄດ້ແນວໃດ? ຂໍໃຫ້ເບິ່ງເລື່ອງສ່ວນປະກອບຍ່ອຍຂອງເລືອດ. ເຮົາແຕ່ລະຄົນຕ້ອງຕັດສິນໃຈດ້ວຍໂຕເອງວ່າຈະຮັບຫຼືບໍ່ຮັບສ່ວນປະກອບຍ່ອຍຂອງເລືອດຕາມໃຈຮູ້ຜິດຮູ້ຖືກທີ່ໄດ້ຮັບການຝຶກຈາກຫຼັກການໃນຄຳພີໄບເບິນ.b ເຮົາອາດຮູ້ສຶກວ່າຍາກທີ່ຈະເຂົ້າໃຈເລື່ອງນີ້ເຕັມທີ ແຕ່ເຮົາຕ້ອງຕັດສິນໃຈດ້ວຍໂຕເອງໃນເລື່ອງນີ້. (ຣມ. 14:4) ຖ້າເຮົາຮຽນແບບການຕັດສິນໃຈຂອງຄົນອື່ນ ມັນອາດເຮັດໃຫ້ໃຈຮູ້ຜິດຮູ້ຖືກຂອງເຮົາອ່ອນແອລົງ. ເຮົາສາມາດຝຶກແລະເຮັດໃຫ້ໃຈຮູ້ຜິດຮູ້ຖືກຂອງເຮົາເຂັ້ມແຂງຂຶ້ນໂດຍການຝຶກໃຊ້ມັນ. (ຮຣ. 5:14) ຄັນຊັ້ນ ເຮົາຄວນຂໍຄຳແນະນຳຈາກພີ່ນ້ອງທີ່ມີຄວາມເຊື່ອເຂັ້ມແຂງຕອນໃດ? ຫຼັງຈາກທີ່ເຮົາໄດ້ຄົ້ນຄວ້າດ້ວຍໂຕເອງແລ້ວ ແຕ່ຍັງຕ້ອງການໃຫ້ມີຄົນຊ່ວຍໃຫ້ເຂົ້າໃຈວ່າຫຼັກການໃນຄຳພີໄບເບິນກ່ຽວຂ້ອງແນວໃດກັບສະຖານະການຂອງເຮົາ.
ເຮົາຄວນຂໍຄຳແນະນຳຈາກຄົນອື່ນຫຼັງຈາກທີ່ເຮົາໄດ້ຄົ້ນຄວ້າດ້ວຍໂຕເອງແລ້ວ (ເບິ່ງຂໍ້ 17)
ໃຫ້ຊອກຫາຄຳແນະນຳຕໍ່ໆໄປ
18. ພະເຢໂຫວາໄດ້ເຮັດຫຍັງເພື່ອເຮົາ?
18 ພະເຢໂຫວາສະແດງໃຫ້ເຫັນວ່າເພິ່ນໄວ້ໃຈເຮົາຫຼາຍໂດຍໃຫ້ເຮົາຕັດສິນໃຈດ້ວຍໂຕເອງ. ເພິ່ນໃຫ້ເຮົາມີຄຳພີໄບເບິນແລະມີໝູ່ທີ່ສາມາດຊ່ວຍເຮົາໃຫ້ເຂົ້າໃຈວິທີທີ່ຈະເອົາຫຼັກການໃນຄຳພີໄບເບິນໄປໃຊ້. ໂດຍວິທີນີ້ ພະເຢໂຫວາເບິ່ງແຍງເຮົາຄືກັບພໍ່ທີ່ມີຄວາມຮັກ. (ສພສ. 3:21-23) ເຮົາຈະເຮັດແນວໃດເພື່ອສະແດງໃຫ້ເຫັນວ່າເຮົາຂອບໃຈເພິ່ນ?
19. ເຮົາຈະເຮັດໃຫ້ພະເຢໂຫວາມີຄວາມສຸກຕໍ່ໆໄປໄດ້ແນວໃດ?
19 ພໍ່ແມ່ມີຄວາມສຸກຫຼາຍເມື່ອເຫັນລູກໃຫຍ່ຂຶ້ນແລະຮູ້ຈັກຄິດ ເປັນຜູ້ຮັບໃຊ້ຂອງພະເຢໂຫວາທີ່ສະຫຼາດສຸຂຸມ ແລະມັກຊ່ວຍຄົນອື່ນ. ຄ້າຍຄືກັນ ພະເຢໂຫວາກໍມີຄວາມສຸກເມື່ອເພິ່ນເຫັນເຮົາເປັນຜູ້ໃຫຍ່ທາງຄວາມເຊື່ອ ຂໍຄຳແນະນຳຈາກຄົນອື່ນ ແລະຕັດສິນໃຈໃນແບບທີ່ສະແດງໃຫ້ເຫັນວ່າເຮົາຮັກເພິ່ນ.
ເພງທີ 127 ຂ້ອຍຄວນເປັນຄົນແບບໃດ
a ບາງເທື່ອກໍເປັນເລື່ອງທີ່ດີທີ່ເຮົາຈະຂໍຄຳແນະນຳຈາກຄົນທີ່ບໍ່ແມ່ນພະຍານພະເຢໂຫວາໃນເລື່ອງການເງິນ ສຸຂະພາບ ຫຼືເລື່ອງອື່ນໆ.
b ສຳລັບລາຍລະອຽດເພີ່ມເຕີມກ່ຽວກັບຫົວເລື່ອງນີ້ ໃຫ້ເບິ່ງປຶ້ມຊີວິດທີ່ມີຄວາມສຸກຕະຫຼອດໄປ! ບົດທີ 39 ຂໍ້ 5 ແລະສ່ວນ “ເບິ່ງເພີ່ມເຕີມ.”
c ຄຳອະທິບາຍຮູບ: ຜູ້ເບິ່ງແຍງຄົນໜຶ່ງໃຫ້ຄຳແນະນຳຜູ້ເບິ່ງແຍງອີກຄົນໜຶ່ງທີ່ອາຍຸຫຼາຍກວ່າກ່ຽວກັບວິທີທີ່ລາວເວົ້າຢູ່ການປະຊຸມຜູ້ເບິ່ງແຍງ.