ບົດຄວາມສຶກສາທີ 33
ເພງທີ 4 “ພະເຢໂຫວາເປັນຜູ້ລ້ຽງຂ້ອຍ”
ຂໍໃຫ້ໝັ້ນໃຈວ່າພະເຢໂຫວາຮັກເຈົ້າ
“ເຮົາຊັກນຳເຈົ້າມາຫາເຮົາດ້ວຍຄວາມຮັກທີ່ໝັ້ນຄົງ.”—ຢຣມ. 31:3, ໄຂເງື່ອນ
ຈຸດສຳຄັນ
ເຮົາຈະຮຽນວ່າເປັນຫຍັງເຮົາຕ້ອງໝັ້ນໃຈວ່າພະເຢໂຫວາຮັກເຮົາ ແລະເຮົາຕ້ອງເຮັດຫຍັງເພື່ອຈະໝັ້ນໃຈຫຼາຍຂຶ້ນວ່າເພິ່ນຮັກເຮົາ.
1. ເປັນຫຍັງເຈົ້າຈຶ່ງອຸທິດໂຕໃຫ້ພະເຢໂຫວາ? (ເບິ່ງຮູບນຳ)
ເຈົ້າຈື່ຕອນທີ່ເຈົ້າອຸທິດໂຕໃຫ້ພະເຢໂຫວາໄດ້ບໍ? ເຈົ້າຕັດສິນໃຈແບບນັ້ນຍ້ອນເຈົ້າໄດ້ຮູ້ຈັກແລະຮັກເພິ່ນ. ເຈົ້າໄດ້ສັນຍາວ່າຈະໃຫ້ຄວາມຕ້ອງການຂອງພະເຢໂຫວາເປັນສິ່ງສຳຄັນທີ່ສຸດໃນຊີວິດ ແລະເຈົ້າຈະຮັກເພິ່ນສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຈົ້າ. (ມຣກ. 12:30) ຕັ້ງແຕ່ນັ້ນມາເຈົ້າກໍຮັກພະເຢໂຫວາຫຼາຍຂຶ້ນເລື້ອຍໆ. ຖ້າມີຄົນຖາມເຈົ້າວ່າ: “ເຈົ້າຮັກພະເຢໂຫວາແທ້ໆບໍ?” ເຈົ້າຈະຕອບໂດຍບໍ່ລັງເລວ່າ: “ຂ້ອຍຮັກພະເຢໂຫວາຫຼາຍທີ່ສຸດ!”
ເຈົ້າຈື່ບໍວ່າເຈົ້າຮັກພະເຢໂຫວາຫຼາຍສ່ຳໃດຕອນທີ່ເຈົ້າອຸທິດໂຕໃຫ້ເພິ່ນແລະຮັບບັບເຕມາ? (ເບິ່ງຂໍ້ 1)
2-3. ພະເຢໂຫວາຢາກໃຫ້ເຮົາໝັ້ນໃຈໃນເລື່ອງໃດ ແລະເຮົາຈະຮຽນຫຍັງໃນບົດນີ້? (ເຢເຣມີຢາ 31:3)
2 ແຕ່ເຈົ້າຈະຕອບແນວໃດຖ້າມີຄົນຖາມວ່າ: “ເຈົ້າໝັ້ນໃຈບໍວ່າພະເຢໂຫວາຮັກເຈົ້າ?” ເຈົ້າລັງເລທີ່ຈະຕອບບໍຍ້ອນຄິດວ່າເຈົ້າບໍ່ສົມຄວນໄດ້ຮັບຄວາມຮັກຈາກພະເຢໂຫວາ? ພີ່ນ້ອງຍິງຄົນໜຶ່ງທີ່ຕອນຍັງນ້ອຍບໍ່ໄດ້ຮັບຄວາມຮັກຈາກຄອບຄົວເວົ້າວ່າ: “ຂ້ອຍຮັກພະເຢໂຫວາສຸດຫົວໃຈ ແລະຂ້ອຍໝັ້ນໃຈໃນເລື່ອງນີ້. ແຕ່ຂ້ອຍກໍສົງໄສຕະຫຼອດວ່າພະເຢໂຫວາຮັກຂ້ອຍຫຼືບໍ່?” ຖ້າເປັນແນວນີ້ ອັນໃດຈະຊ່ວຍເຈົ້າໃຫ້ຮູ້ວ່າພະເຢໂຫວາຮູ້ສຶກແນວໃດກັບເຈົ້າແທ້ໆ?
3 ພະເຢໂຫວາຢາກໃຫ້ເຈົ້າໝັ້ນໃຈວ່າເພິ່ນຮັກເຈົ້າ. (ອ່ານເຢເຣມີຢາ 31:3) ເພິ່ນຈຶ່ງຊັກນຳເຈົ້າໃຫ້ເຂົ້າມາຫາເພິ່ນ. ເມື່ອເຈົ້າອຸທິດໂຕໃຫ້ພະເຢໂຫວາແລະຮັບບັບເຕມາ ເພິ່ນກໍໄດ້ໃຫ້ສິ່ງໜຶ່ງທີ່ມີຄ່າຫຼາຍກັບເຈົ້າ ນັ້ນຄືຄວາມຮັກທີ່ໝັ້ນຄົງ. ຄວາມຮັກນີ້ເປັນຄວາມຜູກພັນທີ່ເລິກເຊິ່ງແລະຢູ່ຕະຫຼອດໄປ. ຍ້ອນພະເຢໂຫວາມີຄວາມຮັກທີ່ໝັ້ນຄົງຕໍ່ຜູ້ຮັບໃຊ້ທີ່ສັດຊື່ຂອງເພິ່ນ ເພິ່ນຈຶ່ງເບິ່ງເຂົາເຈົ້າແລະລວມເຖິງເຈົ້ານຳວ່າເປັນ “ຊັບສົມບັດທີ່ມີຄ່າ.” (ມລກ. 3:17, ໄຂເງື່ອນ) ພະເຢໂຫວາຢາກໃຫ້ເຈົ້າໝັ້ນໃຈວ່າເພິ່ນຮັກເຈົ້າຄືກັບທີ່ເພິ່ນຮັກໂປໂລ. ໂປໂລໝັ້ນໃຈໃນເລື່ອງນີ້ຈົນຂຽນວ່າ: “ຂ້ອຍໝັ້ນໃຈວ່າຈະບໍ່ມີຫຍັງສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ ບໍ່ວ່າຈະເປັນຄວາມຕາຍ ຫຼືຊີວິດ ຫຼືທູດສະຫວັນ ຫຼືລັດຖະບານ ຫຼືສິ່ງທີ່ມີຢູ່ຕອນນີ້ ຫຼືສິ່ງທີ່ຈະມາໃນອະນາຄົດ ຫຼືອຳນາດ ຫຼືຄວາມສູງ ຫຼືຄວາມເລິກ ຫຼືສິ່ງອື່ນໆທີ່ຖືກສ້າງຂຶ້ນມາ ບໍ່ມີຫຍັງຈະສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ.” (ຣມ. 8:38, 39) ໃນບົດນີ້ເຮົາຈະຮຽນວ່າເປັນຫຍັງເຮົາຕ້ອງໝັ້ນໃຈວ່າພະເຢໂຫວາຮັກເຮົາ ແລະເຮົາຕ້ອງເຮັດຫຍັງເພື່ອຈະໝັ້ນໃຈໃນເລື່ອງນີ້.
ເປັນຫຍັງເຮົາຕ້ອງໝັ້ນໃຈວ່າພະເຢໂຫວາຮັກເຮົາ
4. ຄຳຕົວະຫຍັງທີ່ຊາຕານຢາກໃຫ້ເຮົາເຊື່ອ ແລະເຮົາຈະຕໍ່ຕ້ານຊາຕານໄດ້ແນວໃດ?
4 ຖ້າເຮົາໝັ້ນໃຈວ່າພະເຢໂຫວາຮັກເຮົາ ເຮົາກໍຈະ “ຢືນຢັດຕໍ່ສູ້ກັບກົນອຸບາຍ” ຂອງຊາຕານໄດ້. (ອຟຊ. 6:11) ຊາຕານຢາກໃຫ້ເຮົາເຊົາຮັບໃຊ້ພະເຢໂຫວາ. ມັນຈະພະຍາຍາມເຮັດທຸກຢ່າງເພື່ອໃຫ້ເປົ້າໝາຍຂອງມັນສຳເລັດ. ວິທີໜຶ່ງທີ່ມັນພະຍາຍາມເຮັດແມ່ນເຮັດໃຫ້ເຮົາຄິດວ່າພະເຢໂຫວາບໍ່ຮັກເຮົາເຊິ່ງການເຮັດແບບນັ້ນເປັນຄຳຕົວະທີ່ຊົ່ວຮ້າຍຫຼາຍ. ຄຳພີໄບເບິນສົມທຽບຊາຕານວ່າເປັນຄືກັບໂຕສິງ. (1ປຕ. 5:8, 9) ສິງມັກໂຈມຕີສັດທີ່ອ່ອນແອແລະປົກປ້ອງໂຕເອງບໍ່ໄດ້. ຄ້າຍຄືກັນ ຊາຕານມັກໂຈມຕີເຮົາຕອນທີ່ເຮົາຮູ້ສຶກອ່ອນແອ ຮູ້ສຶກເມື່ອຍ ຫຼືໂສກເສົ້າຍ້ອນເຈິເລື່ອງທີ່ເຮັດໃຫ້ເຈັບປວດໃຈໃນອະດີດ ກຳລັງເຈິກັບບັນຫາໃນຕອນນີ້ ຫຼືຢ້ານສິ່ງທີ່ຈະເກີດຂຶ້ນໃນອະນາຄົດ. (ສພສ. 24:10) ຊາຕານຫວັງວ່າມັນຈະເຮັດໃຫ້ເຮົາອ່ອນແອຈົນເຊົາຮັບໃຊ້ພະເຢໂຫວາ ແຕ່ເຮົາສາມາດ “ຕໍ່ຕ້ານມານຮ້າຍ” ແລະການໂຈມຕີຂອງມັນໄດ້ໂດຍເຮັດທຸກສິ່ງທີ່ເຮັດໄດ້ເພື່ອຈະໝັ້ນໃຈແທ້ໆວ່າພະເຢໂຫວາຮັກເຮົາ.—ຢກບ. 4:7
5. ເປັນຫຍັງເຮົາຕ້ອງໝັ້ນໃຈວ່າພະເຢໂຫວາຮັກແລະເຫັນຄ່າເຮົາ?
5 ຖ້າເຮົາໝັ້ນໃຈວ່າພະເຢໂຫວາຮັກເຮົາ ເຮົາກໍຈະສະໜິດກັບເພິ່ນຫຼາຍຂຶ້ນ. ເປັນຫຍັງເຮົາຈຶ່ງເວົ້າແບບນັ້ນ? ພະເຢໂຫວາສ້າງເຮົາໃຫ້ຢາກສະແດງຄວາມຮັກຕໍ່ຄົນອື່ນແລະຢາກໄດ້ຮັບຄວາມຮັກຈາກຄົນອື່ນຄືກັນ. ເມື່ອບາງຄົນສະແດງຄວາມຮັກຕໍ່ເຮົາ ມັນກະຕຸ້ນເຮົາໃຫ້ຢາກສະແດງຄວາມຮັກຕໍ່ລາວຄືນ. ສະນັ້ນ ແຮ່ງເຮົາໝັ້ນໃຈວ່າພະເຢໂຫວາຮັກແລະເຫັນຄ່າເຮົາ ເຮົາກໍແຮ່ງຈະຮັກເພິ່ນຫຼາຍຂຶ້ນ. (1ຢຮ. 4:19) ແຮ່ງເຮົາຮັກເພິ່ນຫຼາຍເທົ່າໃດ ຄວາມຮັກທີ່ເພິ່ນມີຕໍ່ເຮົາກໍຈະຫຼາຍຂຶ້ນເທົ່ານັ້ນ. ຄຳພີໄບເບິນບອກວ່າ: “ໃຫ້ໃກ້ຊິດກັບພະເຈົ້າ ແລ້ວເພິ່ນຈະໃກ້ຊິດກັບພວກເຈົ້າ.” (ຢກບ. 4:8) ແຕ່ເຮົາຕ້ອງເຮັດຫຍັງເພື່ອຈະໝັ້ນໃຈວ່າພະເຢໂຫວາຮັກເຮົາ?
ເຮົາຕ້ອງເຮັດຫຍັງເພື່ອຈະໝັ້ນໃຈວ່າພະເຢໂຫວາຮັກເຮົາ?
6. ເຈົ້າຄວນເຮັດແນວໃດຖ້າບໍ່ໝັ້ນໃຈວ່າພະເຢໂຫວາຮັກເຈົ້າ?
6 ອະທິດຖານຂໍໃຫ້ພະເຢໂຫວາຊ່ວຍເຈົ້າໃຫ້ເຫັນວ່າເພິ່ນຮັກເຈົ້າແລະອະທິດຖານກ່ຽວກັບເລື່ອງນີ້ເລື້ອຍໆ. (ລກ. 18:1; ຣມ. 12:12) ເຈົ້າອາດຕ້ອງອະທິດຖານຫາພະເຢໂຫວາຫຼາຍໆເທື່ອໃນແຕ່ລະມື້ເພື່ອຊ່ວຍເຈົ້າໃຫ້ເຫັນໂຕເອງໃນແບບທີ່ເພິ່ນເຫັນ. ບາງເທື່ອເຈົ້າອາດຮູ້ສຶກບໍ່ດີກັບໂຕເອງເອົາແທ້ເອົາວ່າຈົນເຮັດໃຫ້ຍາກທີ່ຈະເຊື່ອວ່າພະເຢໂຫວາຮັກເຈົ້າ. ແຕ່ຂໍໃຫ້ຈື່ໄວ້ວ່າພະເຢໂຫວາຮູ້ຈັກເຈົ້າດີກວ່າທີ່ເຈົ້າຮູ້ຈັກໂຕເອງ. (1ຢຮ. 3:19, 20) ເພິ່ນເຫັນສິ່ງດີໆໃນໂຕເຈົ້າທີ່ເຈົ້າອາດເບິ່ງບໍ່ເຫັນ. (1ຊມ. 16:7; 2ຂຄ. 6:30) ສະນັ້ນ ບໍ່ຕ້ອງລັງເລທີ່ຈະ “ລະບາຍ” ຄວາມຮູ້ສຶກກັບພະເຢໂຫວາແລະຂໍໃຫ້ເພິ່ນຊ່ວຍເຈົ້າໃຫ້ໝັ້ນໃຈວ່າເພິ່ນຮັກເຈົ້າ. (ພສ. 62:8) ຈາກນັ້ນ ໃຫ້ເຈົ້າເຮັດສອດຄ່ອງກັບຄຳອະທິດຖານໂດຍເຮັດຕາມຄຳແນະນຳຕໍ່ໄປນີ້.
7-8. ປຶ້ມເພງສັນລະເສີນຊ່ວຍເຮົາແນວໃດໃຫ້ໝັ້ນໃຈວ່າພະເຢໂຫວາຮັກເຮົາ?
7 ໃຫ້ເຊື່ອສິ່ງທີ່ພະເຢໂຫວາເວົ້າໃນຄຳພີໄບເບິນ. ພະເຢໂຫວາດົນໃຈຜູ້ຂຽນຄຳພີໄບເບິນໃຫ້ເວົ້າກ່ຽວກັບເພິ່ນຕາມທີ່ເພິ່ນເປັນ. ໃຫ້ເຮົາມາເບິ່ງຄຳເວົ້າຂອງດາວິດໃນປຶ້ມເພງສັນລະເສີນ. ລາວເວົ້າເຖິງພະເຢໂຫວາຢ່າງອົບອຸ່ນວ່າ: “ພະເຢໂຫວາຢູ່ໃກ້ຄົນທີ່ຫົວໃຈແຕກສະຫຼາຍ ເພິ່ນຊ່ວຍຄົນທີ່ທໍ້ໃຈແຮງ.” (ພສ. 34:18) ຕອນທີ່ທໍ້ໃຈ ເຈົ້າອາດຮູ້ສຶກວ່າບໍ່ມີໃຜເຂົ້າໃຈເຈົ້າຫຼືບໍ່ມີໃຜຊ່ວຍເຈົ້າໄດ້. ແຕ່ພະເຢໂຫວາສັນຍາວ່າໃນເວລາແບບນັ້ນເພິ່ນຈະຢູ່ກັບເຈົ້າຍ້ອນເພິ່ນຮູ້ວ່າເຈົ້າຕ້ອງການຄວາມຊ່ວຍເຫຼືອ. ໃນເພງສັນລະເສີນອີກບົດໜຶ່ງ ດາວິດຂຽນວ່າ: “ຂໍພະອົງເກັບນ້ຳຕາຂອງລູກໄວ້ໃນຖົງໜັງຂອງພະອົງ.” (ພສ. 56:8) ພະເຢໂຫວາເຫັນຕອນທີ່ເຈົ້າທຸກໃຈ. ເພິ່ນເປັນຫ່ວງເຈົ້າຫຼາຍແລະຮູ້ວ່າເຈົ້າເຈັບປວດໃຈ. ນ້ຳຕາຂອງເຈົ້າມີຄ່າຕໍ່ພະເຢໂຫວາຄືກັບທີ່ນ້ຳແຕ່ລະຢົດໃນຖົງໜັງມີຄ່າຕໍ່ນັກເດີນທາງຕອນທີ່ເຂົາເຈົ້າຢູ່ທະເລຊາຍ. ໃນເພງສັນລະເສີນ 139:3 ດາວິດເວົ້າວ່າ: ‘ພະອົງສັງເກດເບິ່ງລູກ. ພະອົງຮູ້ທຸກຢ່າງທີ່ລູກເຮັດ.’ ພະເຢໂຫວາເຫັນທຸກສິ່ງທີ່ເຈົ້າເຮັດ ແຕ່ເພິ່ນສົນໃຈສະເພາະສິ່ງດີໆທີ່ເຈົ້າເຮັດ. (ຮຣ. 6:10) ຍ້ອນຫຍັງ? ຍ້ອນເພິ່ນເຫັນຄ່າທຸກສິ່ງທີ່ເຈົ້າພະຍາຍາມເຮັດເພື່ອໃຫ້ເພິ່ນພໍໃຈ.a
8 ໂດຍທາງຂໍ້ຄຳພີເຫຼົ່ານີ້ທີ່ໃຫ້ກຳລັງໃຈ ພະເຢໂຫວາກຳລັງບອກວ່າ: “ພໍ່ຢາກໃຫ້ລູກຮູ້ວ່າພໍ່ຮັກແລະເປັນຫ່ວງລູກຫຼາຍ.” ແຕ່ຄືກັບທີ່ໄດ້ຮຽນໃນຕອນຕົ້ນຂອງບົດນີ້ ຊາຕານຢາກໃຫ້ເຈົ້າເຊື່ອວ່າພະເຢໂຫວາບໍ່ຮັກເຈົ້າ. ສະນັ້ນ ຖ້າບາງເທື່ອເຈົ້າສົງໄສວ່າພະເຢໂຫວາຮັກເຈົ້າຫຼືບໍ່ ໃຫ້ຢຸດຄິດແລະຖາມໂຕເອງວ່າ: ‘ຂ້ອຍຈະເຊື່ອໃຜລະຫວ່າງຊາຕານທີ່ເປັນ “ພໍ່ຂອງການຕົວະ” ກັບພະເຢໂຫວາທີ່ເປັນ “ພະເຈົ້າທີ່ເວົ້າແຕ່ຄວາມຈິງ”?’—ຢຮ. 8:44; ພສ. 31:5
9. ພະເຢໂຫວາສັນຍາຫຍັງກັບຄົນທີ່ຮັກເພິ່ນ? (ອົບພະຍົບ 20:5, 6)
9 ໃຫ້ຄິດຕຶກຕອງວ່າພະເຢໂຫວາຮູ້ສຶກແນວໃດຕໍ່ຄົນທີ່ຮັກເພິ່ນ. ໃຫ້ເຮົາມາເບິ່ງວ່າພະເຢໂຫວາເວົ້າຫຍັງກັບໂມເຊແລະຄົນອິດສະຣາເອນ. (ອ່ານອົບພະຍົບ 20:5, 6) ພະເຢໂຫວາສັນຍາວ່າເພິ່ນຈະສະແດງຄວາມຮັກທີ່ໝັ້ນຄົງຕໍ່ຄົນທີ່ຮັກເພິ່ນ. ຄຳເວົ້ານີ້ເຮັດໃຫ້ເຮົາໝັ້ນໃຈວ່າເປັນໄປບໍ່ໄດ້ທີ່ພະເຢໂຫວາຈະບໍ່ສະແດງຄວາມຮັກຕໍ່ຄົນທີ່ຮັກເພິ່ນ. (ນຮຢ. 1:5) ສະນັ້ນ ຖ້າບາງເທື່ອເຈົ້າຢາກໝັ້ນໃຈວ່າພະເຢໂຫວາຮັກເຈົ້າບໍ ໃຫ້ຢຸດຄິດແລະຖາມໂຕເອງວ່າ: ‘ຂ້ອຍຮັກພະເຢໂຫວາບໍ?’ ຈາກນັ້ນໃຫ້ຄິດແບບນີ້: ຖ້າເຈົ້າຮັກພະເຢໂຫວາແລະພະຍາຍາມເຕັມທີເພື່ອຈະເຮັດໃຫ້ເພິ່ນພໍໃຈ ເຈົ້າກໍໝັ້ນໃຈໄດ້ວ່າພະເຢໂຫວາຮັກເຈົ້າຫຼາຍແທ້ໆ. (ດນອ. 9:4; 1ກຣ. 8:3) ເວົ້າອີກຢ່າງໜຶ່ງກໍຄື ຖ້າເຈົ້າໝັ້ນໃຈວ່າເຈົ້າຮັກພະເຢໂຫວາ ເຈົ້າກໍບໍ່ຕ້ອງສົງໄສວ່າເພິ່ນຮັກເຈົ້າບໍ? ເຈົ້າໝັ້ນໃຈໄດ້ເລີຍວ່າພະເຢໂຫວາຈະຮັກເຈົ້າສະເໝີແລະຈະບໍ່ມີວັນປະຖິ້ມເຈົ້າ.
10-11. ພະເຢໂຫວາຢາກໃຫ້ເຈົ້າເບິ່ງຄ່າໄຖ່ແນວໃດ? (ຄາລາເຕຍ 2:20)
10 ໃຫ້ຄິດຕຶກຕອງກ່ຽວກັບຄ່າໄຖ່. ຄ່າໄຖ່ຂອງພະເຢຊູເປັນຂອງຂວັນທີ່ມີຄ່າຫຼາຍທີ່ສຸດທີ່ພະເຢໂຫວາໃຫ້ມະນຸດ. (ຢຮ. 3:16) ແຕ່ມັນເປັນຂອງຂວັນສຳລັບເຈົ້ານຳບໍ? ແມ່ນແລ້ວ! ຂໍໃຫ້ເບິ່ງເລື່ອງຂອງໂປໂລ. ລາວເຄີຍເຮັດຜິດຮ້າຍແຮງບາງຢ່າງກ່ອນເຂົ້າມາເປັນຄລິດສະຕຽນ ແລະເມື່ອເຂົ້າມາເປັນຄລິດສະຕຽນແລ້ວລາວຍັງຕ້ອງຕໍ່ສູ້ກັບຂໍ້ອ່ອນແອຂອງໂຕເອງຕໍ່ໆໄປ. (ຣມ. 7:24, 25; 1ຕມ. 1:12-14) ເຖິງຈະເປັນແບບນັ້ນ ແຕ່ໂປໂລກໍເບິ່ງວ່າຄ່າໄຖ່ເປັນຂອງຂວັນທີ່ພະເຢໂຫວາໃຫ້ລາວເປັນສ່ວນໂຕ. (ອ່ານຄາລາເຕຍ 2:20) ຂໍໃຫ້ຈື່ໄວ້ວ່າພະເຢໂຫວາໄດ້ໃຫ້ໂປໂລຂຽນເລື່ອງນີ້ໄວ້ໃນຄຳພີໄບເບິນແລະທຸກສິ່ງທີ່ຢູ່ໃນນັ້ນກໍຂຽນໄວ້ເພື່ອສອນເຮົາ. (ຣມ. 15:4) ຄຳເວົ້າຂອງໂປໂລເຮັດໃຫ້ເຫັນວ່າພະເຢໂຫວາຢາກໃຫ້ເຈົ້າເບິ່ງວ່າຄ່າໄຖ່ເປັນຂອງຂວັນທີ່ເພິ່ນໃຫ້ເຈົ້າເປັນສ່ວນໂຕ. ເມື່ອເຈົ້າເບິ່ງຄ່າໄຖ່ແບບນີ້ ເຈົ້າກໍຈະໝັ້ນໃຈຫຼາຍຂຶ້ນວ່າພະເຢໂຫວາຮັກເຈົ້າ.
11 ເຮົາຂອບໃຈພະເຢໂຫວາແທ້ໆທີ່ສົ່ງພະເຢຊູມາໂລກນີ້ໃຫ້ມາຕາຍເພື່ອເຮົາ. ແຕ່ອີກເຫດຜົນໜຶ່ງທີ່ພະເຢຊູມາໂລກນີ້ກໍເພື່ອບອກຄວາມຈິງກ່ຽວກັບພະເຢໂຫວາໃຫ້ຄົນອື່ນຮູ້. (ຢຮ. 18:37) ຄວາມຈິງນັ້ນຍັງລວມເຖິງເລື່ອງທີ່ວ່າພະເຢໂຫວາຮັກເຮົາທີ່ເປັນລູກຂອງເພິ່ນ.
ພະເຢຊູຊ່ວຍເຮົາແນວໃດໃຫ້ໝັ້ນໃຈວ່າພະເຢໂຫວາຮັກເຮົາ
12. ເປັນຫຍັງເຮົາຈຶ່ງເຊື່ອສິ່ງທີ່ພະເຢຊູເວົ້າກ່ຽວກັບພະເຢໂຫວາ?
12 ຕອນທີ່ພະເຢຊູຢູ່ໃນໂລກນີ້ ເພິ່ນມີຄວາມສຸກທີ່ໄດ້ບອກຄົນອື່ນໃຫ້ຮູ້ວ່າພະເຢໂຫວາເປັນພະເຈົ້າແບບໃດ. (ລກ. 10:22) ເຮົາເຊື່ອວ່າສິ່ງທີ່ພະເຢຊູເວົ້າກ່ຽວກັບພະເຢໂຫວາເປັນຄວາມຈິງ. ຍ້ອນຫຍັງ? ຍ້ອນພະເຢຊູຢູ່ກັບພະເຢໂຫວາໃນສະຫວັນຫຼາຍພັນລ້ານປີກ່ອນທີ່ເພິ່ນຈະມາໂລກນີ້. (ກລຊ. 1:15) ພະເຢຊູຮູ້ວ່າພະເຢໂຫວາຮັກເພິ່ນຫຼາຍ ແລະເພິ່ນຍັງໄດ້ເຫັນດ້ວຍໂຕເອງວ່າພະເຢໂຫວາຮັກພວກທູດສະຫວັນທີ່ສັດຊື່ແລະຮັກຜູ້ຮັບໃຊ້ຊາຍຍິງທີ່ສັດຊື່ໃນໂລກນີ້ນຳ. ພະເຢຊູຊ່ວຍເຮົາແນວໃດໃຫ້ໝັ້ນໃຈວ່າພະເຢໂຫວາຮັກເຮົາ?
13. ພະເຢຊູຢາກໃຫ້ເຮົາເບິ່ງພະເຢໂຫວາແນວໃດ?
13 ພະເຢຊູຢາກໃຫ້ເຮົາເບິ່ງພະເຢໂຫວາຄືກັບທີ່ເພິ່ນເບິ່ງ. ໃນປຶ້ມຂ່າວດີກ່ຽວກັບຊີວິດຂອງພະເຢຊູ ເພິ່ນເອີ້ນພະເຢໂຫວາວ່າ “ພໍ່” ຫຼາຍກວ່າ 160 ເທື່ອ. ຕອນທີ່ພະເຢຊູເວົ້າກັບພວກລູກສິດ ເພິ່ນໃຊ້ຄຳວ່າ “ພະເຈົ້າພໍ່ຂອງພວກເຈົ້າ” ຫຼື “ພະເຈົ້າພໍ່ຂອງພວກເຈົ້າໃນສະຫວັນ.” (ມທ. 5:16; 6:26) ກ່ອນພະເຢຊູມາໂລກນີ້ ຜູ້ຮັບໃຊ້ທີ່ສັດຊື່ຂອງພະເຢໂຫວາເອີ້ນພະເຢໂຫວາວ່າ “ພະເຈົ້າຜູ້ມີລິດເດດສູງສຸດ” “ພະເຈົ້າສູງສຸດ” “ຜູ້ສ້າງທີ່ຍິ່ງໃຫຍ່” ແລະຕຳແໜ່ງອື່ນໆທີ່ຄ້າຍໆກັນນີ້. ແຕ່ພະເຢຊູມັກເອີ້ນພະເຢໂຫວາວ່າ “ພໍ່.” ການທີ່ພະເຢຊູເອີ້ນພະເຢໂຫວາແບບນີ້ສະແດງໃຫ້ເຫັນວ່າພະເຢໂຫວາຢາກໃຫ້ຜູ້ຮັບໃຊ້ຂອງເພິ່ນຮູ້ສຶກໃກ້ຊິດກັບເພິ່ນຄືກັບທີ່ລູກຮູ້ສຶກໃກ້ຊິດກັບພໍ່ທີ່ມີຄວາມຮັກ. ເຫັນໄດ້ແຈ້ງວ່າພະເຢຊູຢາກໃຫ້ເຮົາເບິ່ງພະເຢໂຫວາຄືກັບທີ່ເພິ່ນເບິ່ງ ນັ້ນຄືພະເຢໂຫວາເປັນພໍ່ທີ່ມີຄວາມຮັກທີ່ຮັກພວກລູກຂອງເພິ່ນຫຼາຍ. ເຮົາຈະມາເບິ່ງຕົວຢ່າງ 2 ເລື່ອງທີ່ພະເຢຊູໃຊ້ຄຳວ່າ “ພໍ່.”
14. ພະເຢຊູສະແດງໃຫ້ເຫັນແນວໃດວ່າເຮົາແຕ່ລະຄົນມີຄ່າຕໍ່ພະເຢໂຫວາ? (ມັດທາຍ 10:29-31) (ເບິ່ງຮູບນຳ)
14 ທຳອິດ ໃຫ້ເຮົາມາເບິ່ງສິ່ງທີ່ພະເຢຊູເວົ້າໃນມັດທາຍ 10:29-31. (ອ່ານ) ເຖິງວ່ານົກກະຈອກໂຕນ້ອຍໆບໍ່ໄດ້ຮັກແລະບໍ່ໄດ້ນະມັດສະການພະເຢໂຫວາ ແຕ່ເມື່ອມີໂຕດຽວຕົກລົງດິນເພິ່ນກໍຮູ້. ຖ້າພະເຢໂຫວາສົນໃຈແລະເຫັນຄ່ານົກໂຕນ້ອຍໆຫຼາຍປານນັ້ນ ເພິ່ນກໍແຮ່ງສົນໃຈແລະເຫັນຄ່າເຮົາແຕ່ລະຄົນຫຼາຍກວ່ານັ້ນອີກຍ້ອນເຮົາຮັກແລະນະມັດສະການເພິ່ນ. ພະເຢຊູຍັງເວົ້າວ່າ: “ຂະໜາດຜົມຂອງພວກເຈົ້າເພິ່ນກໍນັບໄວ້ແລ້ວທຸກເສັ້ນ.” ການທີ່ພະເຢໂຫວາຮູ້ລາຍລະອຽດເລັກໆນ້ອຍໆແບບນີ້ຢືນຢັນວ່າເພິ່ນສົນໃຈເຮົາແຕ່ລະຄົນຫຼາຍ. ເຫັນໄດ້ແຈ້ງວ່າພະເຢຊູຢາກໃຫ້ເຮົາໝັ້ນໃຈວ່າເຮົາແຕ່ລະຄົນມີຄ່າຕໍ່ພະເຢໂຫວາພໍ່ຂອງເຮົາທີ່ຢູ່ໃນສະຫວັນ.
ຖ້າພະເຢໂຫວາເຫັນຄ່ານົກກະຈອກພຽງແຕ່ໂຕດຽວແລະເຖິງຂັ້ນຮູ້ວ່າມັນຕົກລົງດິນຕອນໃດ ເພິ່ນກໍແຮ່ງເຫັນຄ່າເຈົ້າຫຼາຍກວ່ານັ້ນອີກຍ້ອນເຈົ້າເປັນຜູ້ຮັບໃຊ້ທີ່ສັດຊື່ແລະຮັກເພິ່ນ! (ເບິ່ງຂໍ້ 14)
15. ຄຳເວົ້າຂອງພະເຢຊູໃນໂຢຮັນ 6:44 ບອກໃຫ້ເຮົາຮູ້ຫຍັງກ່ຽວກັບພະເຢໂຫວາ?
15 ໃຫ້ເຮົາມາເບິ່ງອີກຕົວຢ່າງໜຶ່ງທີ່ພະເຢຊູໃຊ້ຄຳວ່າ “ພໍ່.” (ອ່ານໂຢຮັນ 6:44) ພະເຈົ້າພໍ່ຂອງເຈົ້າທີ່ຢູ່ໃນສະຫວັນຊັກນຳເຈົ້າໃຫ້ມາຮູ້ຈັກເພິ່ນແລະຮັກເພິ່ນ. ເປັນຫຍັງເພິ່ນຈຶ່ງເຮັດແນວນັ້ນ? ຍ້ອນເພິ່ນເຫັນວ່າເຈົ້າມີຫົວໃຈທີ່ດີທີ່ເຕັມໃຈຕອບຮັບຄວາມຈິງ. (ກຈກ. 13:48) ເມື່ອພະເຢຊູເວົ້າສິ່ງທີ່ຂຽນໄວ້ໃນໂຢຮັນ 6:44 ເພິ່ນອາດໝາຍເຖິງສິ່ງທີ່ພະເຢໂຫວາເວົ້າກັບຄົນອິດສະຣາເອນໃນເຢເຣມີຢາ 31:3 ທີ່ວ່າ: “ເຮົາຊັກນຳເຈົ້າມາຫາເຮົາດ້ວຍຄວາມຮັກທີ່ໝັ້ນຄົງ.” (ຢຣມ. 31:3, ໄຂເງື່ອນ; ສົມທຽບກັບໂຮເຊອາ 11:4) ໃຫ້ຄິດເບິ່ງວ່າເປັນຫຍັງຈຶ່ງເວົ້າວ່າຄວາມຮັກຂອງພະເຢໂຫວາເປັນຄວາມຮັກທີ່ໝັ້ນຄົງ? ພະເຢໂຫວາພໍ່ຂອງເຮົາທີ່ຢູ່ໃນສະຫວັນເຊິ່ງມີຄວາມຮັກເຫັນສິ່ງທີ່ດີໃນໂຕເຈົ້າສະເໝີເຖິງວ່າເຈົ້າອາດຈະເບິ່ງບໍ່ເຫັນ.
16. (ກ) ພະເຢຊູບອກຫຍັງເຮົາ ແລະເປັນຫຍັງເຮົາຄວນເຊື່ອເພິ່ນ? (ຂ) ອັນໃດຈະຊ່ວຍເຈົ້າໃຫ້ໝັ້ນໃຈວ່າພະເຢໂຫວາເປັນພໍ່ທີ່ດີທີ່ສຸດທີ່ເຈົ້າຢາກມີ? (ເບິ່ງຂອບ “ພໍ່ທີ່ດີທີ່ສຸດທີ່ເຮົາຢາກມີ”)
16 ການທີ່ພະເຢຊູເອີ້ນພະເຢໂຫວາວ່າພໍ່ຂອງພວກເຮົາກໍເປັນຄືກັບພະເຢຊູກຳລັງບອກເຮົາວ່າ: “ພະເຢໂຫວາບໍ່ໄດ້ເປັນແຕ່ພໍ່ຂອງຂ້ອຍເທົ່ານັ້ນ ແຕ່ເປັນພໍ່ຂອງພວກເຈົ້ານຳ. ຂ້ອຍຢາກໃຫ້ພວກເຈົ້າໝັ້ນໃຈວ່າພະເຢໂຫວາຮັກແລະເປັນຫ່ວງພວກເຈົ້າແຕ່ລະຄົນຫຼາຍ.” ສະນັ້ນ ຖ້າບາງເທື່ອເຈົ້າຮູ້ສຶກບໍ່ໝັ້ນໃຈວ່າພະເຢໂຫວາຮັກເຈົ້າຫຼືບໍ່ ໃຫ້ຢຸດຄິດແລະຖາມໂຕເອງວ່າ: ‘ຂ້ອຍຄວນເຊື່ອຄຳເວົ້າຂອງພະເຢຊູແມ່ນບໍຍ້ອນເພິ່ນຮູ້ຈັກພະເຢໂຫວາພໍ່ຂອງເພິ່ນດີທີ່ສຸດ ແລະເພິ່ນເວົ້າຄວາມຈິງສະເໝີ?’—1ປຕ. 2:22
ໃຫ້ໝັ້ນໃຈຢູ່ສະເໝີວ່າພະເຢໂຫວາຮັກເຮົາ
17. ເປັນຫຍັງເຮົາຕ້ອງໝັ້ນໃຈຢູ່ສະເໝີວ່າພະເຢໂຫວາຮັກເຮົາ?
17 ເຮົາຕ້ອງໝັ້ນໃຈຢູ່ສະເໝີວ່າພະເຢໂຫວາຮັກເຮົາ. ຂໍໃຫ້ຈື່ໄວ້ວ່າຊາຕານກຳລັງເຮັດທຸກສິ່ງທີ່ມັນເຮັດໄດ້ເພື່ອໃຫ້ເຮົາເຊົາຮັບໃຊ້ພະເຢໂຫວາ. ມັນຢາກໃຫ້ເຮົາອ່ອນແອ. ດັ່ງນັ້ນ ມັນຈຶ່ງພະຍາຍາມຕໍ່ໆໄປເພື່ອເຮັດໃຫ້ເຮົາເຊື່ອວ່າພະເຢໂຫວາບໍ່ຮັກເຮົາ. ແຕ່ເຮົາຕ້ອງບໍ່ເຊື່ອຄຳຕົວະຂອງຊາຕານ!—ໂຢບ 27:5
18. ເຈົ້າຈະໝັ້ນໃຈຫຼາຍຂຶ້ນໄດ້ແນວໃດວ່າພະເຢໂຫວາຮັກເຈົ້າ?
18 ເພື່ອຈະໝັ້ນໃຈຫຼາຍຂຶ້ນວ່າພະເຢໂຫວາຮັກເຈົ້າ ໃຫ້ເຈົ້າອະທິດຖານຕໍ່ໆໄປເພື່ອຂໍພະເຢໂຫວາຊ່ວຍເຈົ້າໃຫ້ເບິ່ງໂຕເອງໃນແບບທີ່ເພິ່ນເບິ່ງ. ໃຫ້ຄິດຕຶກຕອງກ່ຽວກັບຂໍ້ຄຳພີຕ່າງໆທີ່ບອກວ່າພະເຢໂຫວາສົນໃຈຄົນທີ່ຮັກເພິ່ນ. ໃຫ້ຈື່ໄວ້ວ່າພະເຢໂຫວາຈະຮັກຄົນທີ່ສະແດງຄວາມຮັກຕໍ່ເພິ່ນສະເໝີ. ໃຫ້ຈື່ວ່າຄ່າໄຖ່ເປັນຂອງຂວັນທີ່ພະເຢໂຫວາໃຫ້ເຈົ້າເປັນສ່ວນໂຕ. ໃຫ້ເຊື່ອຄຳເວົ້າຂອງພະເຢຊູທີ່ບອກວ່າພະເຢໂຫວາເປັນພໍ່ຂອງເຈົ້າທີ່ຢູ່ໃນສະຫວັນ. ຖ້າເຈົ້າເຮັດທັງໝົດນີ້ ເມື່ອມີຄົນຖາມເຈົ້າວ່າ: “ເຈົ້າໝັ້ນໃຈບໍວ່າພະເຢໂຫວາຮັກເຈົ້າ?” ເຈົ້າກໍຈະຕອບດ້ວຍຄວາມໝັ້ນໃຈວ່າ: “ແມ່ນແລ້ວ ພະເຢໂຫວາຮັກຂ້ອຍ! ຂ້ອຍຈະເຮັດໃຫ້ດີທີ່ສຸດທຸກໆມື້ເພື່ອສະແດງໃຫ້ເຫັນວ່າຂ້ອຍຮັກເພິ່ນ!”
ເພງທີ 154 ຮັກທີ່ໝັ້ນຄົງຕະຫຼອດໄປ