ວັນພະຫັດທີ 28 ສິງຫາ
ພະເຢໂຫວາຢູ່ໃກ້ທຸກຄົນທີ່ຮ້ອງຫາເພິ່ນ. ເພິ່ນຢູ່ໃກ້ທຸກຄົນທີ່ຮ້ອງຫາເພິ່ນດ້ວຍຄວາມຈິງໃຈ.—ພສ. 145:18
ພະເຢໂຫວາ “ພະເຈົ້າຜູ້ມີຄວາມຮັກ” ຢູ່ກັບເຮົາ. (2ກຣ. 13:11) ເພິ່ນສົນໃຈເຮົາແຕ່ລະຄົນເປັນສ່ວນໂຕແລະເຮົາໝັ້ນໃຈວ່າເຮົາຈະໄດ້ຮັບ “ຄວາມຮັກທີ່ໝັ້ນຄົງຈາກເພິ່ນ.” (ພສ. 32:10) ແຮ່ງເຮົາຄິດຕຶກຕອງກ່ຽວກັບວິທີທີ່ພະເຢໂຫວາສະແດງຄວາມຮັກຕໍ່ເຮົາ ເຮົາກໍແຮ່ງໝັ້ນໃຈຫຼາຍຂຶ້ນວ່າເພິ່ນເປັນຫ່ວງເຮົາແລະເຮັດໃຫ້ເຮົາສະໜິດກັບເພິ່ນຫຼາຍຂຶ້ນ. ເຮົາສາມາດອະທິດຖານລົມກັບພະເຢໂຫວາໄດ້ທຸກເລື່ອງ ບອກເພິ່ນວ່າເຮົາຕ້ອງການຄວາມຮັກຈາກເພິ່ນຫຼາຍແທ້ໆ. ບອກເພິ່ນວ່າເຮົາກັງວົນເລື່ອງຫຍັງ ແລະເຮົາໝັ້ນໃຈໄດ້ວ່າພະເຢໂຫວາເຂົ້າໃຈຄວາມຮູ້ສຶກຂອງເຮົາແລະຢາກຊ່ວຍເຮົາແທ້ໆ. (ພສ. 145:19) ໃນມື້ທີ່ອາກາດໜາວໆເຮົາຄືຊິຢາກຢູ່ໃກ້ໆກອງໄຟເພື່ອໃຫ້ຮ່າງກາຍອຸ່ນ. ຄ້າຍຄືກັນ ໃນມື້ທີ່ຊີວິດຂອງເຮົາມີບັນຫາແລະເຈິຄວາມລຳບາກ ເຮົາກໍຢາກຢູ່ໃກ້ພະເຢໂຫວາເພື່ອໃຫ້ເພິ່ນຊ່ວຍເຮົາ. ດັ່ງນັ້ນ ຂໍໃຫ້ເຈົ້າມີຄວາມສຸກທີ່ພະເຢໂຫວາມອບຄວາມຮັກທີ່ອົບອຸ່ນໃຫ້ເຈົ້າ. ຂໍໃຫ້ເຮົາທຸກຄົນຕອບຮັບຄວາມຮັກນີ້ໂດຍເວົ້າວ່າ: “ຂ້ອຍຮັກພະເຢໂຫວາ”!—ພສ. 116:1. ຫ24.01 ໜ້າ 31 ຂໍ້ 19-20
ວັນສຸກທີ 29 ສິງຫາ
ລູກເຮັດໃຫ້ເຂົາເຈົ້າຮູ້ຈັກຊື່ຂອງພໍ່ແລ້ວ.—ຢຮ. 17:26
ພະເຢຊູບໍ່ພຽງແຕ່ບອກຄົນອື່ນໃຫ້ຮູ້ວ່າພະເຈົ້າຊື່ເຢໂຫວາ ແຕ່ເພິ່ນຍັງ “ເປັນຜູ້ທີ່ເຮັດໃຫ້ພວກເຮົາໄດ້ຮູ້ຈັກພະເຈົ້າ.” (ຢຮ. 1:17, 18) ຄົນຢິວໃນສະໄໝພະເຢຊູຮູ້ແລ້ວວ່າພະເຈົ້າຊື່ຫຍັງ. ໃນພະຄຳພີພາກພາສາເຮັບເຣີບອກວ່າ ພະເຢໂຫວາເປັນພະເຈົ້າທີ່ເມດຕາແລະໃຈດີ. (ອພຍ. 34:5-7) ແຕ່ພະເຢຊູເຮັດໃຫ້ຄວາມຈິງນີ້ແຈ້ງຂຶ້ນອີກໂດຍຍົກຕົວຢ່າງປຽບທຽບເລື່ອງລູກທີ່ຫຼົງທາງ. ໃນຕົວຢ່າງນັ້ນພະເຢຊູເວົ້າວ່າ ພໍ່ແນມເຫັນລູກທີ່ກັບໃຈຕອນທີ່ລາວຍັງຢູ່ໄກໆ “ພໍ່ຈຶ່ງແລ່ນໄປຫາ” ແລະກອດລາວແລະຍົກໂທດໃຫ້ລາວ. ຕົວຢ່າງນີ້ເຮັດໃຫ້ເຮົາເຫັນແຈ້ງວ່າພະເຢໂຫວາເປັນພະເຈົ້າທີ່ເມດຕາແລະມີຄວາມອີ່ຕົນ. (ລກ. 15:11-32) ພະເຢຊູເຮັດໃຫ້ເຫັນວ່າພະເຢໂຫວາເປັນແບບໃດແທ້ໆ. ຫ24.02 ໜ້າ 10 ຂໍ້ 8-9
ວັນເສົາທີ 30 ສິງຫາ
ຍ້ອນພວກເຮົາໄດ້ຮັບກຳລັງໃຈຈາກພະເຈົ້າ ພວກເຮົາຈຶ່ງຮູ້ວິທີໃຫ້ກຳລັງໃຈຄົນອື່ນ.—2ກຣ. 1:4
ກຳລັງໃຈຈາກພະເຢໂຫວາເຮັດໃຫ້ຄົນທີ່ທຸກໃຈສົດຊື່ນ. ເຮົາຈະຮຽນແບບພະເຢໂຫວາແນວໃດໃນການເຫັນອົກເຫັນໃຈຄົນອື່ນແລະໃຫ້ກຳລັງໃຈເຂົາເຈົ້າ? ວິທີໜຶ່ງກໍຄືການປູກຝັງຄຸນລັກສະນະຕ່າງໆທີ່ຈະຊ່ວຍເຮົາໃຫ້ເຫັນອົກເຫັນໃຈແລະໃຫ້ກຳລັງໃຈຄົນອື່ນ. ຄຸນລັກສະນະເຫຼົ່ານັ້ນມີຫຍັງແດ່? ສິ່ງໃດຈະຊ່ວຍເຮົາໃຫ້ຮັກກັນຕໍ່ໆໄປແລະ “ໃຫ້ກຳລັງໃຈກັນສະເໝີ” ໃນທຸກໆມື້? (1ທຊ. 4:18) ເຮົາຕ້ອງປູກຝັງຄຸນລັກສະນະຕ່າງໆເຊັ່ນ: ຄວາມເຫັນອົກເຫັນໃຈ ການຮັກກັນແບບພີ່ນ້ອງ ແລະຄວາມເມດຕາ. (ກລຊ. 3:12; 1ປຕ. 3:8) ຄຸນລັກສະນະເຫຼົ່ານີ້ຈະຊ່ວຍເຮົາແນວໃດ? ເມື່ອເຮົາເຫັນອົກເຫັນໃຈພີ່ນ້ອງແລະສົນໃຈເຂົາເຈົ້າແທ້ໆ ເຮົາກໍຈະໃຫ້ກຳລັງໃຈເຂົາເຈົ້າເມື່ອເຂົາເຈົ້າເຈິຄວາມຍາກລຳບາກ. ຄືກັບທີ່ພະເຢຊູເວົ້າວ່າ: “ໃຈເຕັມໄປດ້ວຍສິ່ງໃດ ປາກກໍເວົ້າສິ່ງນັ້ນອອກມາ. ຄົນດີເວົ້າແຕ່ສິ່ງດີໆທີ່ຢູ່ໃນໃຈຂອງລາວ.” (ມທ. 12:34, 35) ການໃຫ້ກຳລັງໃຈພີ່ນ້ອງໃນຍາມທີ່ເຂົາເຈົ້າຕ້ອງການເປັນວິທີທີ່ສຳຄັນຫຼາຍທີ່ສະແດງວ່າເຮົາຮັກເຂົາເຈົ້າ. ຫ23.11 ໜ້າ 10 ຂໍ້ 10-11