ວັນເສົາທີ 30 ສິງຫາ
ຍ້ອນພວກເຮົາໄດ້ຮັບກຳລັງໃຈຈາກພະເຈົ້າ ພວກເຮົາຈຶ່ງຮູ້ວິທີໃຫ້ກຳລັງໃຈຄົນອື່ນ.—2ກຣ. 1:4
ກຳລັງໃຈຈາກພະເຢໂຫວາເຮັດໃຫ້ຄົນທີ່ທຸກໃຈສົດຊື່ນ. ເຮົາຈະຮຽນແບບພະເຢໂຫວາແນວໃດໃນການເຫັນອົກເຫັນໃຈຄົນອື່ນແລະໃຫ້ກຳລັງໃຈເຂົາເຈົ້າ? ວິທີໜຶ່ງກໍຄືການປູກຝັງຄຸນລັກສະນະຕ່າງໆທີ່ຈະຊ່ວຍເຮົາໃຫ້ເຫັນອົກເຫັນໃຈແລະໃຫ້ກຳລັງໃຈຄົນອື່ນ. ຄຸນລັກສະນະເຫຼົ່ານັ້ນມີຫຍັງແດ່? ສິ່ງໃດຈະຊ່ວຍເຮົາໃຫ້ຮັກກັນຕໍ່ໆໄປແລະ “ໃຫ້ກຳລັງໃຈກັນສະເໝີ” ໃນທຸກໆມື້? (1ທຊ. 4:18) ເຮົາຕ້ອງປູກຝັງຄຸນລັກສະນະຕ່າງໆເຊັ່ນ: ຄວາມເຫັນອົກເຫັນໃຈ ການຮັກກັນແບບພີ່ນ້ອງ ແລະຄວາມເມດຕາ. (ກລຊ. 3:12; 1ປຕ. 3:8) ຄຸນລັກສະນະເຫຼົ່ານີ້ຈະຊ່ວຍເຮົາແນວໃດ? ເມື່ອເຮົາເຫັນອົກເຫັນໃຈພີ່ນ້ອງແລະສົນໃຈເຂົາເຈົ້າແທ້ໆ ເຮົາກໍຈະໃຫ້ກຳລັງໃຈເຂົາເຈົ້າເມື່ອເຂົາເຈົ້າເຈິຄວາມຍາກລຳບາກ. ຄືກັບທີ່ພະເຢຊູເວົ້າວ່າ: “ໃຈເຕັມໄປດ້ວຍສິ່ງໃດ ປາກກໍເວົ້າສິ່ງນັ້ນອອກມາ. ຄົນດີເວົ້າແຕ່ສິ່ງດີໆທີ່ຢູ່ໃນໃຈຂອງລາວ.” (ມທ. 12:34, 35) ການໃຫ້ກຳລັງໃຈພີ່ນ້ອງໃນຍາມທີ່ເຂົາເຈົ້າຕ້ອງການເປັນວິທີທີ່ສຳຄັນຫຼາຍທີ່ສະແດງວ່າເຮົາຮັກເຂົາເຈົ້າ. ຫ23.11 ໜ້າ 10 ຂໍ້ 10-11
ວັນອາທິດທີ 31 ສິງຫາ
ຄົນທີ່ຮູ້ຈັກຄິດຈະເຂົ້າໃຈ.—ດນອ. 12:10
ເຮົາຕ້ອງຂໍຄວາມຊ່ວຍເຫຼືອຖ້າເຮົາຢາກເຂົ້າໃຈຄຳພະຍາກອນໃນຄຳພີໄບເບິນ. ຂໍໃຫ້ຄິດເຖິງຕົວຢ່າງປຽບທຽບນີ້: ສົມມຸດວ່າເຈົ້າກຳລັງຈະເດີນທາງໄປບ່ອນທີ່ເຈົ້າບໍ່ເຄີຍໄປ ແຕ່ໝູ່ທີ່ໄປນຳເຈົ້າຮູ້ຈັກບ່ອນນັ້ນດີ. ລາວຮູ້ວ່າເຈົ້າກັບລາວຢູ່ຈຸດໃດແລະຮູ້ວ່າທາງແຕ່ລະເສັ້ນຈະໄປຮອດໃສ. ເຈົ້າຄືຊິດີໃຈຫຼາຍແທ້ໆທີ່ມີໝູ່ຮ່ວມເດີນທາງໄປກັບເຈົ້າ! ຄ້າຍຄືກັນ ພະເຢໂຫວາຮູ້ດີວ່າເຮົາຢູ່ຈຸດໃດຂອງຊ່ວງເວລາແລະຮູ້ວ່າຈະເກີດຫຍັງຂຶ້ນໃນອະນາຄົດ. ດັ່ງນັ້ນ ຖ້າເຮົາຢາກເຂົ້າໃຈຄຳພະຍາກອນໃນຄຳພີໄບເບິນ ເຮົາກໍຕ້ອງຖ່ອມໃຈຂໍຄວາມຊ່ວຍເຫຼືອຈາກເພິ່ນ. (ດນອ. 2:28; 2ປຕ. 1:19, 20) ຄືກັບພໍ່ແມ່ທີ່ຮັກລູກ ພະເຢໂຫວາກໍຢາກໃຫ້ເຮົາມີອະນາຄົດທີ່ດີແລະມີຄວາມສຸກ. (ຢຣມ. 29:11) ແຕ່ພະເຢໂຫວາຕ່າງຈາກພໍ່ແມ່ທີ່ເປັນມະນຸດ ຍ້ອນເພິ່ນຮູ້ວ່າຈະເກີດຫຍັງຂຶ້ນໃນອະນາຄົດແລະເພິ່ນບອກໄດ້ຢ່າງຖືກຕ້ອງສະເໝີ. ພະເຢໂຫວາໃຫ້ມີຄຳພະຍາກອນຫຼາຍເລື່ອງໃນຄຳພີໄບເບິນເພື່ອໃຫ້ເຮົາຮູ້ວ່າຈະມີເຫດການທີ່ສຳຄັນຫຍັງແດ່ເກີດຂຶ້ນ.—ອຊຢ. 46:10. ຫ23.08 ໜ້າ 8 ຂໍ້ 3-4
ວັນຈັນທີ 1 ກັນຍາ
ຄວາມອີ່ຕົນນີ້ມາຈາກສະຫວັນຄືກັບແສງສະຫວ່າງຂອງມື້ໃໝ່.—ລກ. 1:78
ພະເຢໂຫວາໃຫ້ອຳນາດພະເຢຊູຈັດການກັບບັນຫາທຸກຢ່າງທີ່ມະນຸດເຈິ. ການອັດສະຈັນທີ່ພະເຢຊູເຮັດ ເຮັດໃຫ້ເຫັນວ່າເພິ່ນມີອຳນາດທີ່ຈະແກ້ໄຂບັນຫາທຸກຢ່າງທີ່ມະນຸດເຮົາບໍ່ສາມາດຈັດການດ້ວຍໂຕເອງໄດ້ ເຊັ່ນ: ພະເຢຊູມີອຳນາດທີ່ຈະກຳຈັດຕົ້ນເຫດຂອງບັນຫາທັງໝົດ ເຊິ່ງກໍຄືບາບແລະຜົນທີ່ເກີດຂຶ້ນຈາກບາບ ບໍ່ວ່າຈະເປັນຄວາມເຈັບປ່ວຍແລະຄວາມຕາຍ. (ມທ. 9:1-6; ຣມ. 5:12, 18, 19) ການອັດສະຈັນທີ່ພະເຢຊູເຮັດພິສູດວ່າເພິ່ນສາມາດປົວພະຍາດ “ທຸກຊະນິດ” ໄດ້ ແລະປຸກຄົນຕາຍໃຫ້ຟື້ນຄືນມາ. (ມທ. 4:23; ຢຮ. 11:43, 44) ເພິ່ນຍັງມີອຳນາດທີ່ຈະຄວບຄຸມພາຍຸ ແລະໄລ່ປີສາດທີ່ເຂົ້າສິງຄົນ. (ມຣກ. 4:37-39; ລກ. 8:2) ເມື່ອເຫັນວ່າພະເຢໂຫວາໃຫ້ອຳນາດແບບນີ້ກັບພະເຢຊູ ເຮັດໃຫ້ເຮົາຮູ້ສຶກໄດ້ກຳລັງໃຈແທ້ໆ! ເຮົາໝັ້ນໃຈໄດ້ວ່າການປົກຄອງຂອງພະເຈົ້າຈະເຮັດໃຫ້ຄຳສັນຍາເກີດຂຶ້ນແທ້. ການອັດສະຈັນຂອງພະເຢຊູເຮັດໃຫ້ເຮົາຮູ້ວ່າເພິ່ນຈະເຮັດສິ່ງທີ່ຍິ່ງໃຫຍ່ກວ່ານັ້ນຕອນທີ່ເພິ່ນເປັນກະສັດປົກຄອງໂລກນີ້. ຫ23.04 ໜ້າ 3-4 ຂໍ້ 5-7