ບົດທີ 16
ຜິດບໍທີ່ຈະໃຊ້ຊີວິດແບບຕີສອງໜ້າ?
□ ກິນເຫຼົ້າກິນເບຍ
□ ຄົບຫາກັບຄົນທີ່ພໍ່ແມ່ບອກວ່າບໍ່ດີ
□ ຟັງເພງທີ່ບໍ່ເໝາະສົມ
□ ໄປເຂົ້າເທັກເຂົ້າບາ
□ ລັກມີແຟນ
□ ເບິ່ງໜັງໂປ້ ຫຼືຫຼິ້ນເກມທີ່ມີຄວາມຮຸນແຮງ
□ ໃຊ້ຄຳຫຍາບຄາຍ
ຈາກລາຍການທີ່ເວົ້າມາ ມີຈຸດໃດບໍທີ່ເຈົ້າເຮັດລັບຫຼັງພໍ່ແມ່? ຖ້າມີເຈົ້າກໍຄືຊິຮູ້ວ່າໂຕເອງເຮັດສິ່ງທີ່ບໍ່ຖືກຕ້ອງແລະເຈັບປວດໃຈຍ້ອນຮູ້ສຶກຜິດ. (ໂຣມ 2:15) ບາງເທື່ອເຈົ້າກໍຢາກຈະບອກພໍ່ແມ່ວ່າເຈົ້າເຮັດຫຍັງຜິດມາ. ແຕ່ເມື່ອຄິດວ່າພໍ່ແມ່ຈະເສຍໃຈ ໃຈຮ້າຍຫຼືລົງໂທດເຈົ້າ ເຈົ້າກໍເລີຍເລືອກທີ່ຈະບໍ່ບອກພວກເພິ່ນ. ແຕ່ເຈົ້າຄິດບໍວ່າການເຮັດແບບນີ້ຖືເປັນການໃຊ້ຊີວິດແບບຕີສອງໜ້າ? ໃຫ້ເຮົາມາເບິ່ງວ່າອັນໃດເປັນສາເຫດໃຫ້ເຈົ້າເຮັດແບບນັ້ນ?
ຢາກມີອິດສະຫຼະ
ຄຳພີໄບເບິນບອກວ່າໃນທີ່ສຸດ “ຜູ້ຊາຍຈະຈາກພໍ່ແມ່ໄປ.” (ປະຖົມມະການ 2:24) ແນ່ນອນວ່າ ຜູ້ຍິງກໍຄືກັນ. ດັ່ງນັ້ນ ຈຶ່ງເປັນເລື່ອງປົກກະຕິທີ່ເຈົ້າຢາກເປັນຜູ້ໃຫຍ່ ຄິດ ແລະຕັດສິນໃຈດ້ວຍໂຕເອງ. ແຕ່ເມື່ອພໍ່ແມ່ຫ້າມລູກທີ່ເປັນໄວລຸ້ນບໍ່ໃຫ້ເຮັດສິ່ງທີ່ເຂົາເຈົ້າຢາກເຮັດຍ້ອນພໍ່ແມ່ຄິດວ່າມັນຜິດຫຼືບໍ່ເໝາະສົມ ໄວລຸ້ນບາງຄົນກໍເລີຍບໍ່ຟັງຄວາມ.
ແນ່ນອນວ່າ ພໍ່ແມ່ບາງຄົນກໍອາດເຂັ້ມງວດຫຼາຍເກີນໄປ. ໄວລຸ້ນຍິງຊື່ຄິມຈົ່ມວ່າ: “ພໍ່ແມ່ເກືອບຈະບໍ່ໃຫ້ເຮົາເບິ່ງໜັງຫຍັງເລີຍ. ບາດຊິຟັງເພງ ພໍ່ກໍຫ້າມບໍ່ໃຫ້ຟັງອີກ. ຈັກແມ່ນຫຍັງເອົາແທ້ເອົາວ່າ!” ເມື່ອພໍ່ແມ່ເຂັ້ມງວດເກີນໄປແລະບໍ່ມີເຫດຜົນ ໄວລຸ້ນບາງຄົນຈຶ່ງເລີ່ມຮູ້ສຶກອິດສາໝູ່ຄູ່ທີ່ມີອິດສະຫຼະຫຼາຍກວ່າ.
ໄວລຸ້ນຍິງທີ່ຊື່ທາມມີ້ບອກວ່າອີກເຫດຜົນໜຶ່ງທີ່ເຮັດໃຫ້ບາງຄົນໃຊ້ຊີວິດແບບຕີສອງໜ້າແມ່ນ ເພື່ອຈະເຂົ້າກັບໝູ່ຢູ່ໂຮງຮຽນໄດ້. ລາວເລົ່າວ່າ: “ຂ້ອຍເລີ່ມໃຊ້ຊີວິດແບບຕີສອງໜ້າໂດຍເວົ້າຄຳຫຍາບຄາຍ. ຕໍ່ມາກໍສູບຢາ ແລ້ວກໍກິນເຫຼົ້າກິນເບຍຈົນເມົາ. ພໍ່ແມ່ຂ້ອຍເຂັ້ມງວດຫຼາຍແລະບໍ່ອະນຸຍາດໃຫ້ຂ້ອຍມີແຟນ ຂ້ອຍຈຶ່ງລັກມີແຟນເອົາ.”
ໄວລຸ້ນຄົນໜຶ່ງຊື່ເພັດກໍມີປະສົບການຄ້າຍໆກັນ. ລາວເລົ່າວ່າ: “ຂ້ອຍໃຫຍ່ມາໃນຄອບຄົວທີ່ເປັນພະຍານພະເຢໂຫວາ ແຕ່ຂ້ອຍຢ້ານຫຼາຍທີ່ຈະຖືກໝູ່ເຍາະເຍີ້ຍ.” ແລ້ວເພັດເຮັດແນວໃດ? ລາວບອກວ່າ: “ຂ້ອຍພະຍາຍາມເຮັດໃຫ້ໂຕເອງໂດດເດັ່ນ. ຂ້ອຍຈະຕົວະແລະບອກເຫດຜົນທີ່ບໍ່ຖືກຕ້ອງວ່າເປັນຫຍັງຂ້ອຍຈຶ່ງບໍ່ຮັບເອົາຂອງຂວັນໃນເທດສະການຕ່າງໆ.” ເມື່ອເພັດເລີ່ມເຮັດຜິດໃນເລື່ອງເລັກໆນ້ອຍໆ ບໍ່ດົນລາວກໍຄ່ອຍໆເຮັດຜິດໃນເລື່ອງທີ່ຮ້າຍແຮງຂຶ້ນ.
ບໍ່ມີຫຍັງທີ່ຈະປົກປິດຈາກພະເຢໂຫວາໄດ້
ຕະຫຼອດປະຫວັດສາດຜູ້ຄົນໃຊ້ຊີວິດແບບຕີສອງໜ້າ. ຄົນອິດສະຣາເອນບູຮານບາງຄົນລັກໃຊ້ຊີວິດແບບຕີສອງໜ້າແລະຫວັງວ່າຈະບໍ່ມີໃຜສັງເກດເຫັນ. ແຕ່ຜູ້ພະຍາກອນເອຊາຢາເຕືອນເຂົາເຈົ້າວ່າ: “ຄວາມຈິບຫາຍຈະເກີດກັບຄົນທີ່ພະຍາຍາມເຊື່ອງແຜນການຊົ່ວຂອງເຂົາເຈົ້າບໍ່ໃຫ້ພະເຢໂຫວາຮູ້. ຕອນທີ່ເຂົາເຈົ້າລັກເຮັດຊົ່ວຢູ່ບ່ອນມືດໆ ເຂົາເຈົ້າຈະເວົ້າວ່າ: ‘ບໍ່ມີໃຜເຫັນເຮົາດອກ. ບໍ່ມີໃຜຮູ້ດອກວ່າເຮົາເຮັດຫຍັງ.’” (ເອຊາຢາ 29:15) ຄົນອິດສະຣາເອນລືມໄປວ່າພະເຈົ້າເຫັນສິ່ງທີ່ເຂົາເຈົ້າເຮັດ ແລະເມື່ອຮອດເວລາທີ່ເໝາະສົມເພິ່ນກໍຈະລົງໂທດເຂົາເຈົ້າ.
ໃນທຸກມື້ນີ້ກໍຄືກັນ. ເຖິງວ່າເຈົ້າຈະປິດບັງພໍ່ແມ່ບໍ່ໃຫ້ຮູ້ສິ່ງບໍ່ດີທີ່ເຈົ້າເຮັດໄດ້ ແຕ່ເຈົ້າປິດບັງພະເຢໂຫວາພະເຈົ້າບໍ່ໄດ້. ເຮັບເຣີ 4:13 ບອກວ່າ: “ທຸກສິ່ງທີ່ພະເຈົ້າສ້າງຂຶ້ນມາ ບໍ່ມີຫຍັງຖືກປົກປິດໄວ້ຈາກສາຍຕາຂອງເພິ່ນ ແຕ່ທຸກສິ່ງຖືກເປີດເຜີຍແລະປາກົດແຈ້ງຕໍ່ສາຍຕາຂອງເພິ່ນຜູ້ທີ່ພວກເຮົາຕ້ອງໃຫ້ການ.” ແລ້ວຈະປິດບັງໄປເຮັດຫຍັງ? ຂໍຈື່ໄວ້ວ່າ ເຖິງເຈົ້າຈະສະແດງວ່າມີຄວາມເຊື່ອໂດຍເຂົ້າຮ່ວມການປະຊຸມ ແຕ່ນັ້ນກໍບໍ່ໄດ້ເຮັດໃຫ້ພະເຢໂຫວາພໍໃຈເຈົ້າ. ພະເຢໂຫວາຮູ້ເມື່ອຄົນເຮົາ ‘ເວົ້າຊື່ໆວ່ານັບຖືເພິ່ນ ແຕ່ໃຈຂອງເຂົາເຈົ້າບໍ່ໄດ້ເປັນແບບນັ້ນ.’—ມາຣະໂກ 7:6
ເຈົ້າຮູ້ບໍວ່າຄົນທີ່ໃຊ້ຊີວິດແບບຕີສອງໜ້າເຮັດໃຫ້ພະເຢໂຫວາເຈັບປວດໃຈ? ເປັນແບບນັ້ນໄດ້ແທ້ບໍ? ໄດ້ແທ້! ເມື່ອພວກອິດສະຣາເອນບູຮານປະຖິ້ມກົດໝາຍຂອງພະເຈົ້າ ເຂົາເຈົ້າກໍ “ເຮັດໃຫ້ອົງບໍລິສຸດຂອງອິດສະຣາເອນເຈັບປວດໃຈ.” (ເພງສັນລະເສີນ 78:41) ໃນທຸກມື້ນີ້ເພິ່ນກໍຄືຊິເຈັບປວດຫຼາຍແທ້ໆເມື່ອໜຸ່ມສາວທີ່ໄດ້ສຶກສາ “ຫຼັກການແລະຄຳສອນຂອງພະເຢໂຫວາ” ລັກເຮັດຜິດ!—ເອເຟໂຊ 6:4
ແກ້ໄຂໃຫ້ຖືກຕ້ອງ
ແທ້ໆແລ້ວຖ້າເຈົ້າຮັກພະເຈົ້າ ຮັກພໍ່ແມ່ ແລະຮັກໂຕເຈົ້າເອງ ເຈົ້າຄວນສາລະພາບວ່າເຈົ້າກຳລັງລັກເຮັດຫຍັງຢູ່. ຍອມຮັບວ່າ ສິ່ງນີ້ອາດເຮັດໃຫ້ເຈົ້າອັບອາຍແລະຖືກສັ່ງສອນ. (ເຮັບເຣີ 12:11) ຕົວຢ່າງເຊັ່ນ ຖ້າເຈົ້າມັກຕົວະພໍ່ແມ່ເລື້ອຍໆ ເຂົາເຈົ້າກໍຄືຊິບໍ່ໄວ້ໃຈເຈົ້າແລະເຂັ້ມງວດກັບເຈົ້າຫຼາຍຂຶ້ນ. ແຕ່ການສາລະພາບກໍຍັງເປັນວິທີທີ່ດີທີ່ສຸດ. ຍ້ອນຫຍັງ?
ສົມມຸດວ່າເຈົ້າກັບຄອບຄົວໄປຍ່າງຫຼິ້ນໃນປ່າ. ພໍ່ແມ່ໄດ້ບອກເຈົ້າໃຫ້ຢູ່ໃກ້ໆເຂົາເຈົ້າຕະຫຼອດ ແຕ່ເມື່ອເຂົາເຈົ້າເຜີໄປເບິ່ງບ່ອນອື່ນ ເຈົ້າພັດບໍ່ເຊື່ອຟັງໂດຍຍ່າງອອກນອກເສັ້ນທາງແລະຫຼົງທາງ ແລ້ວກໍຖືກຂີ້ຊາຍດູດ. ເຈົ້າຈະອາຍຈົນບໍ່ກ້າຮ້ອງຂໍຄວາມຊ່ວຍເຫຼືອບໍ? ບໍ່! ເຈົ້າຄືຊິຮ້ອງດັງທີ່ສຸດເທົ່າທີ່ຈະເຮັດໄດ້ເພື່ອໃຫ້ເຂົາເຈົ້າມາຊ່ວຍ.
ຄ້າຍຄືກັນ ຖ້າເຈົ້າໃຊ້ຊີວິດແບບຕີສອງໜ້າ ເຈົ້າກໍຕ້ອງຟ້າວຂໍຄວາມຊ່ວຍເຫຼືອໄວໆ. ໃຫ້ຈື່ໄວ້ວ່າ ເຈົ້າກັບໄປປ່ຽນແປງອະດີດບໍ່ໄດ້ ແຕ່ເຈົ້າສາມາດປັບປຸງໂຕເອງເພື່ອຈະມີອະນາຄົດທີ່ດີຂຶ້ນໄດ້. ການບອກພໍ່ແມ່ບໍ່ແມ່ນເລື່ອງງ່າຍຢູ່ແລ້ວ ແຕ່ເຈົ້າຕ້ອງໃຫ້ເຂົາເຈົ້າຊ່ວຍກ່ອນທີ່ເຈົ້າຈະເຮັດຜິດໄປຫຼາຍກວ່ານີ້ເຊິ່ງອາດກໍ່ຄວາມເສຍຫາຍໃຫ້ກັບໂຕເຈົ້າເອງແລະຄອບຄົວນຳ. ຖ້າເຈົ້າເສຍໃຈແທ້ໆກັບຄວາມຜິດທີ່ເຈົ້າໄດ້ເຮັດໄປ ພະເຢໂຫວາກໍຈະອີ່ຕົນແລະສະແດງຄວາມເມດຕາຕໍ່ເຈົ້າແນ່ນອນ.—ເອຊາຢາ 1:18; ລູກາ 6:36
ດັ່ງນັ້ນ ໃຫ້ບອກຄວາມຈິງກັບພໍ່ແມ່. ຍອມຮັບວ່າເຈົ້າເຮັດໃຫ້ພໍ່ແມ່ເຈັບປວດແລະສົມຄວນຖືກລົງໂທດ. ຖ້າເຈົ້າເຮັດແບບນັ້ນ ເຈົ້າຈະເຮັດໃຫ້ພໍ່ແມ່ແລະພະເຢໂຫວາພະເຈົ້າດີໃຈ. ເຈົ້າຍັງຈະຮູ້ສຶກໂລ່ງໃຈຫຼາຍຍ້ອນເຈົ້າມີໃຈຮູ້ຜິດຮູ້ຖືກທີ່ສະອາດ.—ສຸພາສິດ 27:11; 2 ໂກຣິນໂທ 4:2
ເຈົ້າມີຫຼາຍຢ່າງທີ່ຄືກັນກັບໝູ່ຢູ່ໂຮງຮຽນ. ແຕ່ເຈົ້າຄວນຮູ້ຫຍັງກ່ຽວກັບການຄົບໝູ່ຢູ່ໂຮງຮຽນ?
ຂໍ້ຄຳພີຫຼັກ
“ຄົນທີ່ປົກປິດຄວາມຜິດຂອງໂຕເອງໄວ້ຈະບໍ່ປະສົບຄວາມສຳເລັດ ແຕ່ຄົນທີ່ສາລະພາບແລະເຊົາເຮັດຜິດຈະໄດ້ຮັບຄວາມເມດຕາ.”—ສຸພາສິດ 28:13
ຄຳແນະນຳ
ຢ່າຄິດວ່າການເຮັດຜິດໜ້ອຍໜຶ່ງຈະບໍ່ເປັນຫຍັງ ແຕ່ກໍບໍ່ຄວນເບິ່ງໃນແງ່ລົບຫຼາຍເກີນໄປ. ຈື່ໄວ້ວ່າພະເຢໂຫວາພ້ອມທີ່ຈະໃຫ້ອະໄພ.—ເພງສັນລະເສີນ 86:5
ເຈົ້າຮູ້ບໍ . . . ?
ຄວາມຮູ້ສຶກຜິດສາມາດກະຕຸ້ນຄົນເຮົາໃຫ້ແກ້ໄຂການກະທຳທີ່ຜິດ. ແຕ່ຖ້າຄົນນັ້ນຍັງເຮັດຜິດຕໍ່ໄປ ໃຈຮູ້ຜິດຮູ້ຖືກຂອງລາວກໍຈະເສຍຫາຍ. ໃນທີ່ສຸດ ມັນກໍຈະດ້ານຊາແລະບໍ່ມີຄວາມຮູ້ສຶກຄືກັບຜິວໜັງທີ່ຖືກດາດແລະມີຮອຍແປ້ວຕາມມາ.—1 ຕີໂມທຽວ 4:2
ແຜນພາກປະຕິບັດ!
ຖ້າຂ້ອຍໃຊ້ຊີວິດແບບຕີສອງໜ້າ ຂ້ອຍຈະລົມກັບ ․․․․․
ຂ້ອຍຈະອົດທົນກັບການສັ່ງສອນໄດ້ໂດຍ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງໄວລຸ້ນບາງຄົນຈຶ່ງໃຊ້ຊີວິດແບບຕີສອງໜ້າ?
● ການໃຊ້ຊີວິດແບບຕີສອງໜ້າມີຜົນເສຍຫຍັງແດ່?
● ເປັນຫຍັງຈຶ່ງດີທີ່ຈະເຊົາໃຊ້ຊີວິດແບບນີ້?
[ຖ້ອຍຄຳທີ່ຍົກມາໜ້າ 140]
“ຂ້ອຍຄິດວ່າເມື່ອເລີ່ມເຂົ້າໂຮງຮຽນ ໜຸ່ມສາວຄວນຮີບບອກໝູ່ແລະຄູວ່າໂຕເອງເປັນຄລິດສະຕຽນແລະມີມາດຕະຖານດ້ານສິນລະທຳສູງ. ຖ້າມົວແຕ່ລໍຖ້າໂອກາດ ມັນກໍແຮ່ງຍາກທີ່ຈະບອກ.”—ລິນດາ
[ຮູບພາບໜ້າ 141]
ຖ້າເຈົ້າໃຊ້ຊີວິດແບບຕີສອງໜ້າກໍຄືກັບເຈົ້າກຳລັງຖືກຂີ້ຊາຍດູດ ເຈົ້າຕ້ອງຟ້າວຂໍຄວາມຊ່ວຍເຫຼືອ