ບົດທີ 17
ຂ້ອຍຄວນຮູ້ຫຍັງແດ່ກ່ຽວກັບການຄົບໝູ່ຢູ່ໂຮງຮຽນ?
“ບາງເທື່ອຂ້ອຍເຫັນຄົນກຸ່ມໜຶ່ງຍ່າງມາ ເຂົາເຈົ້າເບິ່ງຄືສະໜິດກັນຫຼາຍຂ້ອຍເລີຍຮູ້ສຶກອິດສາ ເພາະຂ້ອຍກໍຢາກມີໝູ່ທີ່ສະໜິດກັນແບບນັ້ນ.’”—ໂຈ
“ຢູ່ໂຮງຮຽນ ຂ້ອຍເຂົ້າກັບຄົນອື່ນໄດ້ງ່າຍເລີຍເຮັດໃຫ້ມີໝູ່ຫຼາຍ. ນີ້ແຫຼະເປັນບັນຫາສຳລັບຂ້ອຍ.”—ມາເຣຍ
ທຸກຄົນຢາກມີໝູ່ທີ່ພ້ອມຈະຮ່ວມສຸກຮ່ວມທຸກນຳກັນ. ພະເຢຊູມີໝູ່ແບບນັ້ນ ແລະເພິ່ນກໍມັກຄົບຫາກັບເຂົາເຈົ້າ. (ໂຢຮັນ 15:15) ຕອນທີ່ພະເຢຊູກຳລັງຈະຕາຍເທິງເສົາທໍລະມານ ໂຢຮັນໝູ່ສະໜິດຂອງເພິ່ນເຊິ່ງເປັນ “ລູກສິດທີ່ເພິ່ນຮັກ” ກໍຢູ່ໃກ້ໆເພິ່ນ. (ໂຢຮັນ 19:25-27; 21:20) ເຈົ້າຄືຊິຢາກມີໝູ່ທີ່ພ້ອມຈະຮ່ວມສຸກຮ່ວມທຸກແບບນີ້ແມ່ນບໍ?
ເຈົ້າອາດຄິດວ່າເຈົ້າເຈິໝູ່ແບບນີ້ຢູ່ໂຮງຮຽນແລ້ວ ອາດຈະມີໜຶ່ງຫຼືສອງຄົນທີ່ເຈົ້າສະໜິດຫຼາຍ. ພວກເຈົ້າສົນໃຈເລື່ອງທີ່ຄ້າຍໆກັນແລະລົມກັນຖືກຄໍ. ເຈົ້າອາດເບິ່ງວ່າການຄົບຫາກັບເຂົາເຈົ້າກໍບໍ່ແມ່ນ “ການຄົບຫາກັບຄົນທີ່ບໍ່ດີ.” (1 ໂກຣິນໂທ 15:33) ແອນບອກວ່າ: “ເຮົາເຈິໝູ່ຢູ່ໂຮງຮຽນເກືອບທຸກມື້. ເມື່ອຢູ່ກັບເຂົາເຈົ້າ ເຮົາຮູ້ສຶກສະບາຍໃຈ. ມັນບໍ່ຄືກັບຕອນຢູ່ນຳພີ່ນ້ອງໃນຫໍປະຊຸມທີ່ຕ້ອງລະມັດລະວັງຄຳເວົ້າແລະການກະທຳຢູ່ຕະຫຼອດ. ຢູ່ໂຮງຮຽນເຮົາເຮັດໂຕໄດ້ຕາມສະບາຍ.” ນອກຈາກນັ້ນ ເຈົ້າກໍອາດຄິດຄືກັບໂລອິດສ໌ທີ່ເວົ້າວ່າ: “ຂ້ອຍຢາກໃຫ້ໝູ່ຢູ່ໂຮງຮຽນເຫັນວ່າພະຍານພະເຢໂຫວາເປັນຄົນປົກກະຕິ ບໍ່ໄດ້ຕ່າງຈາກຄົນອື່ນແບບທີ່ທຸກຄົນຄິດ.” ແຕ່ນີ້ເປັນເຫດຜົນທີ່ຈະສະໜິດກັບໝູ່ຢູ່ໂຮງຮຽນບໍ?
ເປັນຫຍັງຈຶ່ງຕ້ອງລະວັງ?
ໃຫ້ເຮົາມາເບິ່ງສິ່ງທີ່ເກີດຂຶ້ນກັບມາເຣຍທີ່ເວົ້າເຖິງໃນຕອນຕົ້ນ. ການເຂົ້າກັບຄົນອື່ນໄດ້ງ່າຍເຮັດໃຫ້ລາວມີໝູ່ຫຼາຍ ແຕ່ລາວບໍ່ຮູ້ວ່າຄວນຈະສະໜິດກັນສ່ຳໃດ. ລາວຍອບຮັບວ່າ: “ຂ້ອຍຢາກໃຫ້ທຸກຄົນມັກຂ້ອຍ. ແຕ່ເມື່ອຄິດໄດ້ ຂ້ອຍກໍຮູ້ສຶກວ່າໂຕເອງກຳລັງຈົມເລິກລົງໄປກັບໂລກນີ້ຄືກັບຖືກຂີ້ຊາຍດູດ.” ໂລອິດສ໌ເຈິສິ່ງທີ່ຄ້າຍກັນ. ລາວບອກວ່າ: “ຂ້ອຍຕິດນິດໄສຈາກໝູ່ ແລະເລີ່ມເຮັດຄືເຂົາເຈົ້າ.”
ບໍ່ແປກໃຈເລີຍທີ່ທັງສອງຄົນຈະໄດ້ຮັບຜົນແບບນັ້ນ ເພາະຖ້າເຈົ້າຢາກເປັນໝູ່ສະໜິດກັບໃຜຄົນໜຶ່ງ ເຈົ້າຕ້ອງມີຄວາມສົນໃຈແລະຄ່ານິຍົມທີ່ຄ້າຍຄືກັບເຂົາເຈົ້າ. ຖ້າເຈົ້າສະໜິດກັບຄົນທີ່ບໍ່ໄດ້ເຮັດຕາມຄວາມເຊື່ອແລະມາດຕະຖານໃນຄຳພີໄບເບິນ ການປະພຶດຂອງເຈົ້າກໍຈະປ່ຽນໄປຄືເຂົາເຈົ້າ. (ສຸພາສິດ 13:20) ຍ້ອນແນວນີ້ ອັກຄະສາວົກໂປໂລຈຶ່ງຂຽນວ່າ: “ຢ່າມີສ່ວນຮ່ວມຫຍັງກັບຄົນທີ່ບໍ່ເຊື່ອ.”—2 ໂກຣິນໂທ 6:14
ເຈົ້າຄວນເຮັດຫຍັງ
ຄຳແນະນຳຂອງໂປໂລໝາຍຄວາມວ່າເຈົ້າບໍ່ຄວນພົວພັນກັບໃຜເລີຍແລະຕ້ອງເຊົາຫຼິ້ນກັບໝູ່ຢູ່ໂຮງຮຽນບໍ? ບໍ່! ຄລິດສະຕຽນໄດ້ຮັບຄຳສັ່ງໃຫ້ “ໄປຫາຄົນທຸກຊາດແລະສອນເຂົາເຈົ້າໃຫ້ເຂົ້າມາເປັນລູກສິດ” ເພື່ອຈະເຮັດແບບນັ້ນໄດ້ຕ້ອງຮູ້ວິທີລົມກັບຄົນອື່ນທັງຊາຍແລະຍິງຈາກທຸກເຊື້ອຊາດ ສາສະໜາ ແລະວັດທະນະທຳ.—ມັດທາຍ 28:19
ອັກຄະສາວົກໂປໂລວາງຕົວຢ່າງທີ່ດີຫຼາຍໃນເລື່ອງນີ້. ລາວຮູ້ວິທີເວົ້າລົມກັບ “ຄົນທຸກປະເພດ” ເຖິງວ່າລາວຈະບໍ່ໄດ້ເຊື່ອຄືເຂົາເຈົ້າກໍຕາມ. (1 ໂກຣິນໂທ 9:22, 23) ເຈົ້າຮຽນແບບໂປໂລໄດ້. ໃຫ້ເປັນມິດແລະຮຽນຮູ້ທີ່ຈະເວົ້າລົມດີໆກັບໝູ່. ແຕ່ຕ້ອງລະວັງທີ່ຈະບໍ່ຮຽນແບບຄຳເວົ້າແລະການກະທຳຂອງເຂົາເຈົ້າ. ອະທິບາຍໃຫ້ເຂົາເຈົ້າຟັງວ່າເປັນຫຍັງເຈົ້າຈຶ່ງເລືອກໃຊ້ຊີວິດຕາມມາດຕະຖານຂອງຄຳພີໄບເບິນ ແຮ່ງບອກໄວເທົ່າໃດກໍແຮ່ງດີ.—2 ຕີໂມທຽວ 2:25
ແມ່ນຢູ່ວ່າການແຕກຕ່າງຈາກຄົນອື່ນບໍ່ແມ່ນເລື່ອງງ່າຍ. (ໂຢຮັນ 15:19) ແຕ່ລອງຄິດແບບນີ້ເບິ່ງ. ຖ້າເຈົ້າຢູ່ໃນເຮືອຊູຊີບທີ່ອ້ອມຮອບດ້ວຍຄົນທີ່ກຳລັງຈະຈົມນ້ຳ ເຈົ້າຈະຊ່ວຍເຂົາເຈົ້າແນວໃດ? ເຈົ້າຈະຖິ້ມເຮືອແລ້ວໂດດລົງໄປໃນນ້ຳເພື່ອຊ່ວຍເຂົາເຈົ້າບໍ? ເຈົ້າຄືຊິບໍ່ເຮັດແບບນັ້ນແນ່ນອນ!
ຄ້າຍຄືກັນ ຢູ່ໂຮງຮຽນເຈົ້າຖືກອ້ອມຮອບໄປດ້ວຍຄົນທີ່ບໍ່ໄດ້ເປັນໝູ່ກັບພະເຢໂຫວາ ແລະເຂົາເຈົ້າກໍບໍ່ໄດ້ຮັບການປົກປ້ອງຈາກເພິ່ນ. (ເພງສັນລະເສີນ 121:2-8) ຖ້າເຈົ້າຖິ້ມມາດຕະຖານຂອງພະເຢໂຫວາພຽງເພື່ອຈະໄດ້ເປັນໝູ່ກັບຄົນເຫຼົ່ານັ້ນ ເຈົ້າກໍຈະທຳລາຍສາຍສຳພັນຂອງເຈົ້າກັບພະເຢໂຫວາແລະເຈົ້າຈະບໍ່ມີຄວາມສຸກ. (ເອເຟໂຊ 4:14, 15; ຢາໂກໂບ 4:4) ຈະດີກວ່າບໍຖ້າເຈົ້າພະຍາຍາມຊ່ວຍໝູ່ໃຫ້ມາຢູ່ໃນເຮືອຊູຊີບນຳກັນໂດຍຊວນເຂົາເຈົ້າໃຫ້ມາຮັບໃຊ້ພະເຢໂຫວາ? ນີ້ແຫຼະເປັນວິທີທີ່ດີທີ່ສຸດທີ່ສະແດງວ່າເຈົ້າເປັນໝູ່ແທ້.
ຂໍ້ຄຳພີຫຼັກ
“ຂ້ອຍເຮັດທຸກຢ່າງເພື່ອຂ່າວດີ ເພື່ອຂ້ອຍຈະໄດ້ປະກາດຂ່າວດີກັບຄົນອື່ນໆ.”—1 ໂກຣິນໂທ 9:23
ຄຳແນະນຳ
ຖ້າເຈົ້າເລົ່າສິ່ງທີ່ເຈົ້າເຊື່ອໃຫ້ໝູ່ຢູ່ໂຮງຮຽນຟັງ ແລ້ວລາວຟັງເຈົ້າ ກໍໃຫ້ຖາມຄວາມຄິດເຫັນລາວແລະຕັ້ງໃຈຟັງນຳ. ເມື່ອເຈົ້າອະທິບາຍກໍໃຫ້ເວົ້າ “ແບບສຸພາບແລະດ້ວຍຄວາມນັບຖື.”—1 ເປໂຕ 3:15
ເຈົ້າຮູ້ບໍ . . . ?
ຫຼາຍຄົນທີ່ຮັບໃຊ້ພະເຈົ້າໃນທຸກມື້ນີ້ໄດ້ຮຽນຮູ້ຄຳພີໄບເບິນຈາກໝູ່ຢູ່ໂຮງຮຽນທີ່ກ້າບອກກ່ຽວກັບຄວາມເຊື່ອຂອງໂຕເອງ.
ແຜນພາກປະຕິບັດ!
ຖ້າຂ້ອຍຮູ້ສຶກວ່າຂ້ອຍສະໜິດກັບໝູ່ຢູ່ໂຮງຮຽນຫຼາຍເກີນໄປ ຂ້ອຍຈະ ․․․․․
ຖ້າໝູ່ຢູ່ໂຮງຮຽນເຍາະເຍີ້ຍຄວາມເຊື່ອຂອງຂ້ອຍ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງເຈົ້າຄິດວ່າການຄົບໝູ່ຢູ່ໂຮງຮຽນຈຶ່ງງ່າຍກວ່າໝູ່ໃນປະຊາຄົມຄລິດສະຕຽນ?
● ຖ້າຫຼັງເລີກຮຽນ ເຈົ້າໄປຫຼິ້ນກັບໝູ່ທີ່ບໍ່ແມ່ນພະຍານພະເຢໂຫວາເລື້ອຍໆຈະມີຜົນເສຍແນວໃດ?
● ການບອກໝູ່ຢູ່ໂຮງຮຽນວ່າເຈົ້າເປັນພະຍານພະເຢໂຫວາມີຜົນດີແນວໃດ?
[ຖ້ອຍຄຳທີ່ຍົກມາໜ້າ 143]
“ຕອນຢູ່ໂຮງຮຽນຂ້ອຍມີໝູ່ຫຼາຍ ຂ້ອຍເລີຍເຮັດໂຕຄືກັບເຂົາເຈົ້າ. ນີ້ຈຶ່ງເຮັດໃຫ້ຂ້ອຍເຮັດຜິດ. ຂ້ອຍເລີຍປ່ຽນມາຫຼິ້ນກັບໝູ່ໃນປະຊາຄົມ ເຂົາເຈົ້າເປັນໝູ່ທີ່ຂ້ອຍໄວ້ໃຈໄດ້.”—ແດນຽວ
[ຮູບພາບໜ້າ 146]
ເຈົ້າຈະຊ່ວຍຄົນຈົມນ້ຳແນວໃດ ຈະໂດດລົງໄປໃນນ້ຳຫຼືໂຍນກົງເບັງໃຫ້?